དེ་རིང་ཕྱི་ཚེས་ ༡༡ སྟེ། ༸རྒྱལ་བའི་༸སྐུའི་བླ་གཟའ་དང་བསྟུན། བཞུགས་སྒར་དུ་རྟེན་གཞི་བྱས་པའི་དབུས་གཙང་དང་མདོ་སྨད། དེ་བཞིན་མདོ་སྟོད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་། བོད་ཀྱི་བུད་མེད་ལྷན་ཚོགས། རྒྱལ་སྤྱི་དབུ་མའི་ལམ་མི་མང་ལས་འགུལ་ཁང་བཅས་གཞུང་འབྲེལ་མིན་པའི་ཚོགས་པ་ཁག་ལྔའི་གོ་སྒྲིག་དང་༸སྐུ་བཅར་རྣམ་རྒྱལ་གྲྭ་ཚང་གི་མཐུན་འགྱུར་འོག་བོད་མིའི་ཆིག་སྒྲིལ་གོང་བུ་གཅིག་ཏུ་གནས་རྒྱུ་དང་། ཡང་སྒོས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭའི་ཞབས་རིམ་སྒྲོལ་མ་དང་། སྨན་བླའི་མདོ་ཆོག་དང་འབྲེལ་སྨན་བླའི་མཚན་སྔགས་གསོག་སྒྲུབ་ཞུ་བཞིན་འདུག
དེ་ཡང་ཞབས་རིམ་དེའི་ཐོག་༸སྐུ་བཅར་རྣམ་རྒྱལ་གྲྭ་ཚང་གཙོས་པའི་བཞུགས་སྒར་ཁུལ་དུ་རྟེན་གཞི་བྱས་པའི་དགོན་སྡེ་ཁག་གི་དགེ་འདུན་པ་དང་བཙུན་མ། དེ་བཞིན་ཆོལ་གསུམ་མི་མང་བཅས་མི་གྲངས་ཆིག་སྟོང་ལྷག་ལྷན་ཞུགས་ཀྱིས་སྔ་དྲོ་ཕྱག་ཚོད་ ༨ ནས་ཉིན་རྒྱབ་ཕྱག་ཚོད་ ༥ བར་ཚོགས་གནང་གི་འདུག
རྩ་བའི་འདི་ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུའི་འཕྲོད་བཞེས་བརྟག་དཔྱད་སླད་དུ་བཞུགས་སྒར་དྷརྨ་སཱ་ལཱ་ནས་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་མཛད་ཡོད་པ་རེད།
