བོད་ཀྱི་རྒྱལ་ས་ལྷ་སར་བོད་རིགས་རླངས་འཁོར་ལས་རྒྱ་རིགས་རླངས་འཁོར་ལྡབ་ལྔ་ལྷག་མང་བ།

ཕྱི་ཟླ་ ༡༢ ཚེས་ ༢༢ ཉིན་བོད་ནང་གི་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བར་བོད་ཀྱི་རྒྱལ་ས་ལྷ་སའི་ཁུལ་དུ་དེང་སྐབས་རྒྱ་ཡིག་གི་ཡིག་ཆ་པར་སློག་གང་ནས་བྱེད་ཆོག་ཀྱང་། བོད་ཡིག་གི་ཡིག་པར་རྒྱག་ས་རག་གི་མེད་པ་རེད་འདུག དེའང་རྒྱ་མི་ཡིག་པར་རྒྱག་མཁན་ཚོས་བོད་ཡིག་གི་ཡིག་པར་གཏན་ནས་རྒྱག་གི་མེད་པའི་སྒང་ལ་རྒྱ་གཞུང་གི་འབྲེལ་ཡོད་གོང་རིམ་ནས་ཁོང་ཚོར་བོད་ཡིག་གི་ཡིག་པར་རྒྱག་མི་ཆོག་པའི་བཙན་བཀའ་འབྱོར་ཡོད་པ་རེད་འདུག པར་ཁང་དང་གློག་ཀླད་ཀྱི་ཡིག་དཔར་རྒྱག་མཁན། ཡིག་བཤུ་བྱེད་མཁན་བཅས་སྒེར་གཉེར་གྱི་ལས་རིགས་ཚང་མའི་ནང་བོད་ཡིག་གི་ལས་ཀ་བྱེད་མི་ཆོག་པ་བཟོས་ཡོད་པ་དང་། ཐ་ན་ཁང་པ་ཞིག་ཁང་གླ་གཏང་རྒྱུ་ཡོད་པའི་བརྡ་ཁྱབ་ཀྱང་བོད་ཡིག་ཐོག་བྲི་མི་ཆོག་པ་བཟོས་འདུག རྒྱལ་ཁབ་རྩ་ཁྲིམས་དང་གྲངས་ཉུང་མི་རིགས་ཀྱི་བཅའ་ཁྲིམས་ནང་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་དང་མཐོང་ཆེན་བྱེད་དགོས་པ་འཁོད་ཡོད་ཀྱང་། དེ་ནི་རྩ་ཁྲིམས་དང་བཅའ་ཁྲིམས་སུ་ཡིག་ཐོག་འཁོད་པ་ཙམ་ལས་དོན་དངོས་ཐོག་བོད་ཡིག་དང་འབྲེལ་བའི་གོ་སྐབས་གཏན་ནས་སྤྲད་ཀྱི་མེད་པ་ནི་རྩ་ཁྲིམས་དང་ཡོངས་སུ་འགལ་ཡོད་སྐོར་གསུངས་སོང་། སྤྱིར་བོད་ནང་གི་ཤེས་ཡོན་ཅན་བརྒྱ་ལྷག་གིས་རྒྱ་ནག་གི་ཁྲིམས་ཁང་སོགས་ཀྱི་དྲྭ་ཚིགས་ཐོག་བོད་ཡིག་བཀོལ་སྤྱོད་བྱེད་ཀྱི་མེད་པ་དེས་སྲིད་གཞུང་དང་རྒྱལ་ཁབ་ཀྱི་གནས་ཚུལ་གཞི་རིམ་མི་མང་ནས་ཤེས་རྟོགས་ཐུབ་རྒྱུར་དཀའ་ངལ་འཕྲད་པ་མ་ཟད། རྒྱལ་ཁབ་ཀྱི་རྩ་ཁྲིམས་ནང་གྲངས་ཉུང་མི་རིགས་ཀྱི་སྐད་ཡིག་སྲུང་སྐྱོབ་ཀྱི་ཁྲིམས་ཡིག་དང་ཡོངས་སུ་དངོས་འགལ་ཡོད་པ་རེད་ཅེས་སེམས་ཚོར་ཆེན་པོས་བརྗོད་བཞིན་འདུག

བོད་ཀྱི་རྒྱལ་ས་ལྷ་ས་ནང་དེང་སྐབས་བོད་རིགས་ཧ་ཅང་གྲངས་ཉུང་འགྱུར་བཞིན་ཡོད་པ་མ་ཟད་བོད་རིགས་རླངས་འཁོར་ལས་རྒྱ་རིགས་རླངས་འཁོར་ལྡབ་ལྔ་ལྷག་མང་བ་ཆགས་འདུག བོད་རིགས་རླངས་འཁོར་གཏོང་མཁན་དེ་དག་ལ་འགྲིམ་འགྲུལ་གྱི་ནོར་འཁྲུལ་ཕྲན་བུ་ཙམ་ཤོར་ཚེ་རྒྱ་སྒོར་ ༢༠༠ ནས་ ༣༠༠ བར་གྱི་ཉེས་ཆད་བཏང་བ་དང་། ལག་འཁྱེར་ནས་སྐར་གྲངས་གཅོག་པ་མ་ཟད། དེ་འབྲེལ་སློབ་གཉེར་བྱེད་པར་འགྲོ་དགོས་པ་སོགས་ཀྱི་ཉེས་ཆད་འདྲ་མིན་གཏོང་བཞིན་ཡོད་ཀྱང་རྒྱ་རིགས་རླངས་འཁོར་གཏོང་མཁན་ལ་དམིགས་བསལ་ཡོད་པ་རེད་འདུག རྒྱ་རིགས་རླངས་འཁོར་གྱི་ཨང་གྲངས་ཚང་མ་རྒྱ་ནག་ནང་ཁུལ་ནས་བཟོས་པ་ཤ་སྟག་ཡིན་སྟབས་ཁོང་ཚོར་ཆད་པ་ཕོག་གི་མེད་པ་རེད་འདུག དེང་སྐབས་བོད་ནང་སྔར་ལྷག་དམ་དྲག་ཇེ་ཆེར་འགྲོ་བཞིན་ཡོད་པ་མ་ཟད་སྔ་ལམ་ཡོད་ཚད་ལ་དམག་གི་རླངས་འཁོར་དང་དམག་མི་རུ་སྒྲིག་གིས་མང་ཚོགས་ལ་འཇིགས་སྐུལ་དཔུང་ངོམས་བྱེད་བཞིན་ཡོད་པ་མ་ཟད། འདི་གར་གནས་ཚུལ་མཁོ་སྤྲོད་གནང་མཁན་ཁོང་རང་ཉིད་ལའང་རྒྱ་གཞུང་གིས་དོགས་པའི་འོག་ལྟ་སྲུང་བྱེད་མུས་ཡིན་སྟབས་གནས་ཚུལ་མང་པོ་ངོ་སྤྲོད་གནང་ཐབས་མི་འདུག་ཅེས་འགྲེལ་བརྗོད་གནང་སོང་།