རྒྱ་གཞུང་གིས་པེ་ཅིང་དུ་ཡོད་པའི་རྒྱ་གར་གཞུང་ཚབ་ཆེན་མོ་ཆེད་སྐོང་གིས་རྒྱ་ནག་གི་ཁེ་ཕན་ལ་གནོད་པའི་བྱ་སྤྱོད་རིགས་སྤེལ་མཚམས་འཇོག་དགོས་པའི་ཉེན་བརྡ་བཏང་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐེངས་འདིའི་རྒྱ་གར་བྱང་ཤར་ཨ་རུ་ནཱ་ཅལ་ཁུལ་གྱི་ཆིབས་བསྒྱུར་ཐད་ལ་རྒྱ་གཞུང་གིས་སྒོ་གང་ས་ནས་རྒྱ་གར་གཞུང་ལ་སྐྱོན་བརྗོད་ཤུགས་ཆེ་བྱེད་བཞིན་པའི་ཁྲོད། ཁ་སང་པེ་ཅིང་དུ་རྟེན་གཞི་བྱས་པའི་རྒྱ་གར་གྱི་གཞུང་ཚབ་ཁང་གི་གཞུང་ཚབ་ཆེན་མོ་མཆོག་རྒྱ་ནག་ཕྱི་སྲིད་ལས་ཁུངས་སུ་ཆེད་བསྐོང་གིས་རྒྱ་གར་གཞུང་གིས་ཏཱ་ལའི་བླ་མ་བེད་སྤྱོད་བརྒྱུད་རྒྱ་ནག་གི་ཁེ་ཕན་ལ་གནོད་པའི་བྱ་སྤྱོད་རིགས་སྤེལ་རྒྱུ་འཕྲལ་མར་མཚམས་འཇོག་དགོས་ཞེས་ཉེན་བརྡ་བཏང་འདུག ཁ་སང་ཟླ་ ༤ ཚེས་ ༥ རེས་གཟའ་ལྷག་པ་ཉིན་རྒྱ་ནག་གི་ཕྱི་སྲིད་ལས་ཁུངས་སུ་ཚོགས་པའི་ལྷན་ཚོགས་ཤིག་གི་ཐོག་རྒྱ་ནག་ཕྱི་སྲིད་མགྲིན་ཚབ་པ་ Hua Chunying ཡིས་རྒྱ་གར་གྱི་གཞུང་ཚབ་ཆེན་མོ་སྐུ་ཞབས་ Vijay Gokhale མཆོག་ཆེད་འབོད་ཀྱིས་སྐུ་ཞབས་ཁོང་ལ་ཐེངས་འདིའི་༸གོང་ས་མཆོག་གི་ཨ་རུ་ནཱ་ཅལ་ནང་གི་ཆིབས་བསྒྱུར་ཐད་མི་འདོད་པའི་རྣམ་འགྱུར་ཤུགས་ཆེ་བཏོན་པ་དང་སྦྲགས། རྒྱ་གར་གཞུང་གིས་རྒྱ་ནག་གི་སེམས་ཁྲལ་བྱ་གཞི་གནད་དོན་ཁག་རྒྱབ་ཏུ་བསྐྱུར་ནས་༸གོང་ས་མཆོག་ཡུལ་དེར་གདན་ཞུ་གནང་པར་སྐྱོན་བརྗོད་ཤུགས་ཆེ་བྱས་པ་མ་ཟད། རྒྱ་གར་གྱི་ཕྱོགས་ནས་ཏཱ་ལའི་བླ་མ་བེད་སྤྱོད་ཀྱིས་རྒྱ་ནག་གི་རྩ་དོན་དང་ཁེ་ཕན་ལ་སྣང་ཆུང་གཏོང་རྒྱུ་མཚམས་འཇོག་བྱེད་དགོས་པ་དང་། ཅི་སྟེ་དེ་ལྟར་མ་བྱས་ཚེ་རྒྱ་དཀར་ནག་གཉིས་ཀྱི་འབྲེལ་ལམ་ལ་དོ་ཕོག་འགྲོ་ངེས་ཡིན་པའི་ཉེན་བརྡ་བཏང་འདུག ད་རེས་༸གོང་ས་མཆོག་ཨ་རུ་ནཱ་ཅལ་ནང་གི་ཆིབས་བསྒྱུར་དེ་དང་འབྲེལ་ནས་རྒྱ་དཀར་ནག་གཉིས་དབར་གླེང་སློང་ཆེས་ཤུགས་ཆེ་བྱུང་བཞིན་པ་མ་ཟད། ལྷག་པར་བརྒྱུད་ལམ་ཁག་ཏུ་རྒྱ་གར་གཞུང་གིས་བོད་ཐོག་འཛིན་པའི་སྲིད་བྱུས་ལ་འགྱུར་བ་ཕྱིན་ཡོད་པའི་གནས་ཚུལ་ཐོན་བཞིན་ཡོད་སྟབས། འདི་ག་རླུང་འཕྲིན་ཁང་གིས་བོད་མི་མང་སྤྱི་འཐུས་ཚོགས་གཞོན་ཨཙཱརྱ་ཡེ་ཤེས་ཕུན་ཚོགས་མཆོག་ལ་བཀའ་འདྲི་ཞུས་པར་ཁོང་གིས་བོད་དང་རྒྱ་གར་དབར་གྱི་ས་མཚམས་ཀྱི་འབྲེལ་ལམ་དེ་དེ་སྔ་ལོ་རྒྱུས་ནས་ཡོད་པ་ཞིག་ཡིན་སྟབས། དེར་རྒྱ་གཞུང་གིས་གློ་བུར་དུ་འགྱུར་བ་གཏོང་ཐབས་མེད་སྐོར་གསུངས་པ་དང་འབྲེལ། གནད་དོན་དེའི་དབང་གིས་རྒྱ་གར་གཞུང་གི་ངོས་ནས་བོད་ཐོག་འཛིན་པའི་སྲིད་བྱུས་ལ་འགྱུར་བ་ཕྱིན་པར་ངོས་འཛིན་ཞུ་བཞིན་མེད་ཀྱང་། རྒྱ་གར་གཞུང་གི་ཕྱག་ལས་གནང་ཕྱོགས་ལ་གུ་ཡངས་དང་མངོན་གསལ་ཆགས་པར་ངོས་འཛིན་གྱི་ཡོད་ཅེས་སོགས་གསུངས་སོང། དེའི་ཁྲོད་རྒྱ་གར་གྱི་ཁྱད་མཁས་མི་སྣ་དང་གནད་དོན་དབྱེ་ཞིབ་པ་ཁག་ཅིག་གིས་རྒྱ་གཞུང་གིས་༸གོང་ས་མཆོག་གི་ཆིབས་བསྒྱུར་དང་འབྲེལ་རྒྱ་གར་གཞུང་ལ་སྐྱོན་བརྗོད་བྱེད་བཞིན་པ་ཁག་ལ་དོགས་ཟོན་རྩ་བ་ནས་མ་གནང་པར་རྒྱབ་ཏུ་བསྐྱུར་དགོས་སྐོར་གསུངས་འདུག དེ་བཞིན་ཁ་སང་རྒྱ་གར་གྱི་བདེ་སྲུང་ཁྱད་མཁས་མི་སྣ་དང་དམག་དཔོན་ཁག་གིས་རྒྱ་གར་གྱི་ ANI གསར་ཁང་གི་ཆེད་འདོན་དྲི་བར་ལན་འདེབས་གནང་པར་རྒྱ་གར་གྱི་རུ་དཔོན་སྐུ་ཞབས་ Praful Bakshi...