འདས་པའི་བདུན་ཕྲག་ནང་བོད་མི་ ༣༦ ལ་ཏོག་དབྱིབས་ནད་གཞི་ཕོག་འདུག

འདས་པའི་གཟའ་འཁོར་ནང་བཙན་བྱོལ་བོད་མིའི་འདུས་སྡོད་དུ་བོད་མི་ ༣༦ ལ་ཏོག་དབྱིབས་ནད་གཞི་ཕོག་འདུག་པ་དང་སྦྲགས། ནད་གཞི་ཕོག་མཁན་རྣམས་ནས་ས་གནས་སུ་ཡོད་པའི་ཕྱི་ལུགས་དང་བོད་ལུགས་གཉིས་ཀྱི་སྨན་པར་བསྟེན་གཏུག་གནང་བའི་ཐོག་ཟས་སྤྱོད་ཚུལ་ལྡན་བསྟེན་དགོས་པའི་གཞེན་སྐུལ་གནང་སོང་། ཁ་སང་བོད་མིའི་སྒྲིག་འཛུགས་ཀྱི་ COVID19 ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༧༧ པ་སྤེལ་བ་དང་སྦྲགས། ཚོགས་ཆུང་གི་འབྲེལ་མཐུད་པ་གསོ་རིག་སྨན་པ་ཚེ་རིང་མཚམས་གཅོད་ལགས་ཀྱིས་ནད་ཡམས་དང་འབྲེལ་གནས་སྟངས་སོགས་ཀྱི་སྐོར་སྙན་གསེང་ཞུས་སྐབས། ཁོང་གིས་སྔོན་ཁབ་དང་འབྲེལ། རྒྱ་གར་ནང་ཁ་སང་བར་སྔོན་ཁབ་རིམ་པ་དང་པོ་དང་གཉིས་ཀ་བརྒྱབ་ཟིན་པ་དེ་བོད་མི་གྲངས་ ༣༣༢༠༦ དང་དེ་བཞིན་རིམ་པ་དང་པོ་བརྒྱབ་ཟིན་པ་དེ་༡༧༠༤༦ ཆགས་ཀྱི་ཡོད་པ་དང་ཕྱོགས་མཚུངས་བལ་ཡུལ་ནང་སྔོན་ཁབ་གཉིས་ཀ་ཐོབ་ཟིན་པ་དེ་ ༣༡༩༡ དང་སྔོན་ཁབ་རིམ་པ་དང་པོ་ཐོབ་པའི་མི་གྲངས་དེ་ ༥༣༣ ཆགས་ཀྱི་ཡོད་སྐོར་གསུངས་སོང་། དེ་བཞིན་ཁོང་གིས་རྒྱ་བལ་གཉིས་ཀྱི་བཙན་བྱོལ་འདུས་སྡོད་ནང་འདས་པའི་བདུན་ཕྲག་གཅིག་ནང་ནད་གཞི་གསར་པ་ཕོག་མཁན་མི་གྲངས་ ༣༦ བྱུང་བ་དང་ནད་གཞི་ཕོག་མཁན་རྣམས་ཀྱང་དེ་ཙམ་གྱི་ཚབས་ཆེན་པོ་མེད་པར་གསུངས་སོང་། གཞི་རྩའི་ད་བར་བཙན་བྱོལ་འདུས་སྡོད་སྤྱི་ཚོགས་ནང་ནད་གཞི་ཕོག་མཁན་ཁྱོན་མི་གྲངས་ ༦༣༡༠ དང་དྲག་སྐྱེད་ཕྱིན་པ་ ༦༡༠༥ དེ་བཞིན་ནད་ཡམས་རྐྱེན་འདས་གྲོངས་སོང་བ་དེ་ ༡༥༠ དང་ནད་ཀྱིས་མནར་བཞིན་པ་མི་གྲངས་ ༥༥ ཆགས་ཡོད་འདུག སྨན་པ་མཚམས་གཅོད་ལགས་ཀྱིས། ཐུགས་སྣང་ལམ་སྟོན་དང་འབྲེལ་ད་ཆ་རྡ་རམ་ས་ལ་གཙོས་པའི་བོད་མིའི་འདུས་སྡོད་གཞན་ཁག་ནས་ཏོག་དབྱིབས་ནད་གཞི་ཕོག་པའི་གནད་དོན་ཐོན་བཞིན་པས། ནད་གཞི་ཕོག་མཁན་རྣམས་ས་གནས་སུ་ཡོད་པའི་ཕྱི་ལུགས་དང་བོད་ལུགས་གཉིས་ཀྱི་སྨན་པར་བསྟེན་གཏུག་དང་ལམ་སྟོན་ཞུས་པའི་ཐོག་ཟས་སྤྱོད་གཉིས་ཚུལ་ལྡན་བསྟེན་ན་གསོ་བཅོས་སོགས་ཡག་པོ་ཡོང་གི་ཡོད་སྐོར་གསུངས་སོང་།

ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། ད་ཆ་རྒྱ་གར་ནང་ཏོག་དབྱིབས་ནད་གཞི་ཕོག་མཁན་ཇེ་ཉུང་དུ་སོང་ཡོད་ཀྱང་ Mahrashtra དང་། Kerela Karnataka Tamilnadu Andhra Pradesh དེ་བཞིན་Mizoram སོགས་ཀྱི་མངའ་སྡེ་ཁག་ཅིག་ནང་ནད་གཞི་ཕོག་མཁན་ཇེ་མང་དུ་འགྲོ་བཞིན་པ་མ་ཟད། རང་རེའི་བོད་མིའི་འདུས་སྡོད་ནང་དུའང་ས་གནས་ཁག་ཅིག་ནང་ནད་གཞི་ཕོག་མཁན་ཇེ་མང་དུ་འགྲོ་བཞིན་འདུག་གསུངས་སོང་། ལྷག་པར་སོ་སོའི་ངོས་ནས་རྒྱུན་ལྡན་འཐུས་ཤོར་མེད་པའི་ཐོག་སྔོན་འགོག་གི་ཐབས་ལམ་ཁག་མུ་མཐུད་བསྟེན་རྒྱུ་དང་། ཡང་སྒོས་ནད་རྟགས་རིགས་ཐོན་ཚེ་ངེས་པར་དུ་བརྟག་དཔྱད་གནང་རོགས་ཞེས་གསུངས་སོང་། ཕྱོགས་མཚུངས་ཁོང་གིས་རྒྱ་གར་ནང་སྔོན་ཁབ་མང་པོ་བསྐྱོན་གྱི་ཡོད་ཀྱང་མི་འབོར་མང་བའི་ཆ་ནས་ད་ཆ་སྔོན་ཁབ་རིམ་པ་དང་པོ་ཐོབ་མཁན་དེ་བརྒྱ་ཆ་ ༤༡།༨ དང་སྔོན་ཁབ་གཉིས་ཀ་ཐོབ་མཁན་དེ་བརྒྱ་ཆ་ ༡༣།༣ ཆགས་ཀྱི་ཡོད་པས་སྔོན་ཁབ་མ་ཐོབ་པའི་གྲངས་འབོར་དེ་མང་བ་ཡོད་སྟབས་བོད་མི་མང་ཚོགས་ནས་གཟབ་ནན་གནང་གལ་ཡིན་སྐོར་གསུངས་སོང་།

དེ་བཞིན་ཁོང་གིས་མང་ཚོགས་ཁྲོད་གལ་ཏེ་ནད་ཚ་གཞན་ཆེད་སྔོན་ཁབ་བསྐྱོན་རྒྱུའི་འཆར་གཞི་ཡོད་ན་སྔོན་ཁབ་གཉིས་བར་ཉུང་མཐར་ཉིན་གྲངས་བཅུ་བཞིའི་བར་ཐག་འཇོག་དགོས་སྐོར་གྱི་ལམ་སྟོན་སོགས་གནང་སོང་། གཞི་རྩའི་ད་བར་འཛམ་གླིང་ཁྱོན་ཡོངས་ལ་ཏོག་དབྱིབས་གཉན་རིམས་ནད་གཞི་ཕོག་པ་མི་གྲངས་ས་ཡ་ ༢༢༥ དང་། དེའི་ནང་ནས་ཨ་རི་ནི་ཚད་མཐོ་ཤོས་ཆགས་ཀྱི་འདུག རྒྱ་གར་ནང་ཏོག་དབྱིབས་གཉན་རིམས་ནད་གཞི་ཕོག་པའི་མི་གྲངས་ས་ཡ་ ༣༣ བྱུང་ཡོད་པ་དང་འདས་པའི་ཆུ་ཚོད་ ༢༤ནང་རྒྱ་གར་ནང་ནད་གཞི་གསར་པ་ཕོག་པའི་མི་གྲངས་སྟོང་ཕྲག་སུམ་ཅུ་དང་ལྔ་བརྒྱ་བདུན་ཅུ་ཙམ་བྱུང་འདུག