གྲྭ་འཇིགས་མེད་རྒྱ་མཚོ་ལགས་རྒྱ་དམར་གྱིས་འཛིན་བཟུང་བྱས་ཏེ་ལོ་གཅིག་ལྷག་ཕྱིན་རུང་ད་ལྟའང་ཁྲིམས་ཐག་བཅད་མེད་པར་བཀག་ཉར་འོག་བཞུགས་མུས་ཡིན་འདུག
ཁ་སང་བོད་མིའི་སྒྲིག་འཛུགས་དྲ་ཐོག་ཏུ་སྤེལ་བའི་གནས་ཚུལ་ལ་གཞིགས་ན། ཕྱི་ལོ་ ༢༠༢༡ ཟླ་ ༦ པའི་ནང་གྲྭ་འཇིགས་མེད་རྒྱ་མཚོ་ལགས་དང་ཁོང་གི་ཕྱག་རོགས་ཁག་གཅིག་གིས་མཚོ་སྔོན་ཞིང་ཆེན་བོད་བརྒྱུད་ནང་བསྟན་སློབ་གླིང་གི་སློབ་མ་ཁག་གཅིག་གིས་བསླབ་པ་མཐར་སོན་གྱི་མཛད་སྒོའི་སྐབས་སྙན་རྩོམ་དཔེ་དེབ་འགྲེམས་སྤེལ་གནང་རྐྱེན། མཚོ་སྔོན་ཞིང་ཆེན་གྱི་ཉེན་རྟོག་པས་ལོ་དེའི་ཧོར་ཟླ་ ༥ ཚེས་ ༡ ཉིན་ཤིང་བཟའ་དགོན་ནས་འཛིན་བཟུང་གིས་གར་སོང་ཆ་མེད་དུ་གྱུར་ཡོད་པ་དང་། ཤེས་རྟོགས་བྱུང་བར་ད་ལྟའང་ཁོང་ལ་ཁྲིམས་ཐག་བཅད་མེད་པར་བཀག་ཉར་འོག་བཞུགས་མུས་ཡིན་འདུག
རྩ་བའི་གྲྭ་འཇིགས་མེད་རྒྱ་མཚོ་ལགས་ནི་ཡུལ་ཀན་རྫོང་། མདོ་གསུམ་ཤང་། ཐོང་སྐོ་སྡེ་བ་ནས་ཡིན་དང་། ད་ལྟའི་ཆར་ཁོང་རང་ལོ་ ༣༦ ཡིན་སྐད་འདུག ཁོང་ལ་ཕྱི་ལོ་ ༢༠༡༧ ཟླ་ ༦ ཚེས་ ༢༡ ཉིན་ལྷོ་ཁ་འཕྱོངས་རྒྱས་སྲིད་གཞུང་གི་གོ་སྒྲིག་འོག་བོད་མདོ་དབུས་ཁམས་གསུམ་ནས་ཐུ་བྷོད་སྙན་ངག་མཁས་པའི་འགྲན་སྡུར་ནང་རྩོམ་ཡིག་གི་བྱ་དགའ་ཐོབ་མྱོང་ཡོད་པ་དང་འབྲེལ། ཁོང་གི་མྱུག་མིང་ལ་ནུབ་རླུང་ཡིན་པ་རེད་འདུག
གཞི་རྩའི་བོད་ནང་རྒྱ་དམར་གྱི་བཙན་གནོན་དང་གདུག་རྩུབ་འོག་བོད་མི་མང་དག་འཛིན་བཟུང་བྱས་དང་བྱེད་བཞིན་ཡོད་པ་ལྟར། དེའི་ཁྲོད་དེ་སྔོན་རྔ་བ་ཀིརྟི་དགོན་གྱི་དགེ་བཤེས་བསོད་ནམས་རྒྱ་མཚོ་ལགས་དང་། རྔ་བ་ཀིརྟི་དགོན་གྱི་རྭ་ཆུང་དགེ་འདུན་ལགས་གཉིས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་༸སྐྱབས་རྗེ་ཀིརྟི་རིན་པོ་ཆེ་བཅས་ལ་སྐྱབས་བསྔོ་ཞུ་རྟེན་ཆེད་དུ་ཕྱི་རྒྱལ་དུ་སྒོར་བསྐུར་བའི་ཉེས་མིང་འོག་འཛིན་བཟུང་གིས་ལོ་ཡུན་གཉིས་དང་། གསུམ་བཅས་རིམ་པར་ཁྲིམས་གཅོད་བཙོན་འཇུག་བྱས་ཡོད།
པར་དབང་བོད་མིའི་སྒྲིག་འཛུགས།
