ཕྱི་ལོ་ ༢༠༡༢ ལོར་བོད་ཁམས་དཀར་མཛེས་ཁུལ་བྲག་མགོ་རྫོང་ནས་འཛིན་བཟུང་བཙན་ཁྲིད་ཀྱིས་མི་ལོ་དྲུག་རིང་བཙོན་འཇུག་ཁྲིམས་ཐག་བཅད་པའི་བོད་ཀྱི་ཆབ་སྲིད་བཙོན་ཟུར་དགེ་བཤེས་བསྟན་འཛིན་དཔལ་བཟང་ལགས་ཟླ་ ༡༡ ཚེས་ ༡ ཉིན་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག
རྒྱ་གར་ལྷོ་ཕྱོགས་བོད་མིའི་གཞིས་ཆགས་ནས་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བར་གཞིགས་ན། དེ་སྔོན་ཕྱི་ལོ་ ༢༠༡༢ ལོའི་ཟླ་ ༡ ནང་བྲག་མགོ་རྫོང་ཐོག་ཏུ་བོད་མི་སེར་སྐྱ་མང་པོ་ཚང་འཛོམས་ཀྱིས་ཞི་བའི་སྒེར་ལངས་ཀྱི་གནད་དོན་བྱུང་ཡོད་པ་དང་སྐབས་དེར་རྒྱ་གཞུང་གི་དྲག་ཆས་ཉེན་རྟོག་པས་བོད་མི་ཞི་རྒོལ་བར་གང་བྱུང་མེ་མདའ་བརྒྱབ་པའི་ཁྲོད་བོད་མི་ཁག་གཅིག་དེ་གར་དམར་བསད་བཏང་བ་དང་མང་དག་ཅིག་ལ་རྨས་སྐྱོན་ཚབས་ཆེན་ཕོག་པའི་གནད་དོན་བྱུང་ཡོད་པར་མ་ཟད། ཉིན་ཤས་རྗེས་བྲག་མགོ་རྫོང་དུ་ཞིང་ཆེན་དང་ཁུལ་གྱི་ཉེན་རྟོག་པས་གསལ་བཤད་དང་འགྲེལ་བརྗོད་ཅི་ཡང་མེད་པར་ཁྲིན་ཏུ་གྲོང་ཁྱེར་སྒོ་ཆེན་དགོན་པའི་ཕྱག་མཛོད་དགེ་བཤེས་བསྟན་འཛིན་དཔལ་བཟང་ལགས་གཙོས་སློབ་དགེ་དང་རྩིས་པ། དེ་བཞིན་ཚོང་པ་གཅིག་བཅས་འཛིན་བཟུང་བྱས་པའི་ཁོངས་ནས་དགེ་བཤེས་དཔལ་བཟང་ལགས་ཟླ་བ་བཅུ་ལྷག་གི་རིང་ལ་གར་ཡོད་ཤེས་རྟོགས་མེད་པར་གྱུར་རྗེས་ལོ་དེའི་ཟླ་བ་ ༤ ཚེས་ ༢ ཉིན་ཁོང་ལ་བྲག་མགོའི་སེར་སྐྱ་མང་ཚོགས་ཀྱི་ངོ་རྒོལ་ལས་འགུལ་སྣེ་ཁྲིད་པའི་ཉེས་མིང་འོག་ལོ་དྲུག་གི་བཙོན་འཇུག་ཁྲིམས་ཐག་བཅད་དེ་བཙོན་འཇུག་བྱེད་སྐབས་མི་སྤྱོད་ལས་འདས་པའི་མནར་གཅོད་དང་རྡུང་རྡེག་ཚབས་ཆེན་ཡང་ཡང་བཏང་རྐྱེན་བཙོན་ཁང་ནང་ལོ་གསུམ་མ་ཟིན་ཙམ་ནས་ནད་གཅོང་དུ་གྱུར་ཏེ་དུས་ཐོག་ཏུ་སྨན་བཅོས་ཀྱི་གོ་སྐབས་མ་ཐུབ་པ་དང་ཟས་གོས་གནས་མལ་ཧ་ཅང་ཞན་པའི་ཁར་འཕྲོད་བསྟེན་ཞན་པའི་དབང་གིས་ན་ཚ་ཇེ་སྡུག་ཏུ་སོང་བ་སོགས་ངལ་བ་རིམ་འཕྲད་ཀྱིས་མཐར་ཕྱི་ལོ་ ༢༠༡༨ ལོའི་ཟླ་ ༤ ཚེས་ ༢ ཉིན་སྐུ་གཟུགས་ཀྱི་གནས་སྟངས་ཧ་ཅང་ཞན་པའི་གནས་བབ་ཐོག་ནས་གློད་བཀྲོལ་བཏང་ཡོད་ཀྱང་། འདི་ལོའི་ཕྱི་ཟླ་ ༩ ཙམ་གྱི་གོང་ནས་སྔར་གྱི་ནད་རྙིང་རྣམས་འཕེལ་ཞིང་ཁོར་ཡུག་དང་ཆབ་སྲིད་ཀྱི་གནོན་ཤུགས་འོག་སྨན་བཅོས་ཚད་ལྡན་ཞིག་མ་ཐོབ་པའི་དབང་གིས་འདས་གྲོངས་སུ་གྱུར་འདུག
རྩ་བའི་དགེ་བཤེས་བསྟན་འཛིན་དཔལ་བཟང་ངམ་བསྟན་དགའ་ལགས་ནི། ཕྱི་ལོ་ ༡༩༦༥ ལོར་བྲག་མགོ་ནོར་བ་རུ་ཕ་དོན་འགྲུབ་བཀྲ་ཤིས་དང་མ་བདེ་དབང་གཉིས་སུ་འཁྲུངས་ཤིང་། ཆུང་དུས་ས་གནས་སློབ་ཆུང་འགྲིམས་ཏེ་བོད་རྒྱ་གཉིས་ཀྱི་ཡིག་རིགས་ལ་སྦྱང་པ་གནང་མྱོང་ཡོད་པ་དང་། རྗེས་སུ་བྲག་མགོ་དགོན་པའི་ཆོས་སྒོར་ཞུགས་ཏེ་དགོན་པའི་སྒྲིག་འོག་ནས་འདོན་ཆོས་སོགས་ལ་ལེགས་པར་སྦྱང་པ་གནང་བ་དང་། ཕྱི་ལོ་ ༡༩༨༦ ལོར་རྒྱ་གར་ལ་བཙན་བྱོལ་དུ་ཕེབས་ཏེ་འབྲས་སྤུངས་བློ་གླིང་གྲྭ་ཚང་གི་ཆོས་སྒོར་ཞུགས། སྔ་ཕྱིར་གཞུང་ཆེན་ཁག་ལ་སློབ་གཉེར་གནང་ཞིང་ཕྱི་ལོ་ ༢༠༠༩ ལོར་དགེ་བཤེས་ཀྱི་མཚན་རྟགས་བཞེས་རྗེས་ལོ་དེར་ཕྱིར་རང་ཡུལ་ལ་ཕེབས་ཏེ་བྲག་མགོ་དགོན་པའི་ཕྱི་ནང་གི་ལས་དོན་རྒྱ་ཆེར་གནང་ཞིང་བྲག་མགོ་དགོན་པའི་ཕྱག་མཛོད་རྒན་པའི་ཐུགས་འགན་བཞེས་མྱོང་ཡོད་པ་རེད།
