ཉི་ཧོང་རྒྱལ་ཁབ་ཀྱིས་རྒྱ་ནག་གི་ཁུང་ཙི་སློབ་གླིང་ནི་དམར་ཤོག་སྲིད་གཞུང་གི་དྲིལ་བསྒྲགས་ཀྱི་ལག་ཆ་ཡིན་པར་སེམས་ཁྲལ་གྱིས་ཨ་རི་དང་ཁ་ན་ཊ་སོགས་ཀྱིས་ཁུང་ཙི་སློབ་གླིང་སྒོ་རྒྱག་ཏུ་བཅུག་པ་ལྟར་ཉི་ཧོང་རྒྱལ་ཁབ་ཀྱིས་ཀྱང་ཁུལ་དེར་རྩ་འཛུགས་བྱས་ཡོད་པའི་ཁུང་ཙི་སློབ་གླིང་ཁག་ལ་གཞི་རྒྱ་ཆེ་བའི་བསྐྱར་ཞིབ་གནང་རྒྱུ་ཡིན་པར་བསྒྲགས་འདུག
དེ་ཡང་ཉི་ཧོང་གི་ནང་དུ་རྟེན་གཞི་བྱས་པའི་ Nikkei Asia ཞེས་པའི་གསར་ཁང་གིས་དེ་རིང་གསར་འགྱུར་སྤེལ་བའི་ནང་དུ། ཉི་ཧོང་གི་ཤེས་ཡོན་བློན་ཆེན་ལས་ཁུངས་ཀྱིས་གོ་སྒྲིག་གི་ཐོག་ནས། ཁུལ་དེར་རྒྱ་ནག་སྲིད་གཞུང་གིས་མ་དངུལ་མཁོ་འདོན་བྱེད་བཞིན་པའི་ཁུང་ཙི་སློབ་གླིང་དང་འབྲེལ་བའི་ཤེས་ཡོན་ལྟེ་གནས་ཁག་ལ་རྩད་གཅོད་ཀྱིས་དྲི་ཞིབ་བྱེད་རྒྱུ་ཡིན་པ་མ་ཟད། འདིའ་ལོའི་ལོ་མཇུག་བར་དུ་ཤེས་ཡོན་ལྟེ་གནས་ཁག་ལ་རྒྱ་ནག་དང་འབྲེལ་བའི་སློབ་གླིང་གི་མ་དངུལ་མཁོ་འདོན་དང་། སློབ་མ་རྣམས་ཀྱི་མཉམ་ཞུགས་བྱེད་ཕྱོགས། ལྷག་པར་སློབ་གླིང་གི་ལས་དོན་བྱེད་ཕྱོགས་ཀྱིས་གཙུག་ལག་སློབ་ཁང་དུ་སྤྱིའི་ཉམས་ཞིབ་ཀྱི་ལས་དོན་ལ་ཤུགས་རྐྱེན་ཇི་ཡོད་སོགས་དང་འབྲེལ་བའི་དྲི་བ་ཁག་གཅིག་གཏན་འབེབས་གནང་རྒྱུ་རེད་འདུག
གསར་ཁང་གིས་སྤེལ་བའི་གནས་ཚུལ་ལྟར་ན། ཨ་རི་དང་ཡུ་རོབ་གཉིས་ཀྱིས་རྒྱ་ནག་གི་ཁུང་ཙི་སློབ་གླིང་གི་བྱ་འགུལ་ལ་སྟངས་འཛིན་དང་ཁག་ཅིག་ཡོངས་སུ་མཚམས་འཇོག་བྱས་པའི་རྗེས་སུ། ཉི་ཧོང་གིས་རྒྱ་ནག་གི་ཁུང་ཙི་སློབ་གླིང་གིས་རྒྱ་ནག་གཞུང་འབྲེལ་གྱི་དྲིལ་བསྒྲགས་རིགས་ཁྱབ་སྤེལ་བྱེད་རྒྱུར་སེམས་ཁྲལ་བྱེད་བཞིན་པ་ཙམ་དུ་མ་ཟད། རྒྱ་ནག་གི་མི་སྒེར་གྱི་འབྲེལ་ལམ་བརྒྱུད་དེ་ཉི་ཧོང་གི་འཕྲུལ་རིགས་ཀྱི་གསང་བ་རྣམས་ཀྱང་རྒྱ་ནག་ཏུ་ཤོར་ཉེན་ཡོད་པར་སེམས་འཚབ་བྱེད་བཞིན་ཡོད་སྐོར་གསུངས་འདུག
དེ་བཞིན་ཉི་ཧོང་གི་ཤེས་ཡོན་བློན་ཆེན་སྐུ་ཞབས Koichi Hagiuda ལགས་ཀྱིས་ད་ལྟའི་ཆར་ཨ་རི་དང་ཡུ་རོབ་ལྟ་བུའི་ཐུན་མོང་གི་རིན་ཐང་ཡོད་པའི་རྒྱལ་ཁབ་ཁག་ཅིག་གིས་སྒེར་སོ་སོའི་རྒྱལ་ཁབ་ནང་གི་ཁུང་ཙི་སློབ་གླིང་ཁག་མཚམས་འཇོག་བྱས་པ་ལྟར། ང་ཚོའི་ངོས་ནས་ཀྱང་ཉི་ཧོང་ནང་གི་ཤེས་ཡོན་གྱི་ལྟེ་གནས་ཁང་རྣམས་ཀྱིས་རྒྱ་ནག་གི་ཁུང་ཙི་སློབ་གླིང་དང་འབྲེལ་བའི་འཛིན་སྐྱོང་གི་ལས་དོན་དང་། ཞིབ་འཇུག་གི་ལས་གཞི་མཐའ་དག་ཕྱི་གསལ་ནང་གསལ་གནང་དགོས་པའི་འབོད་སྐུལ་ཞུ་བཞིན་་ཡོད་ཅེས་གསུངས་འདུག
གཞན་ཡང་འདི་ལོའི་ཟླ་བ་ལྔ་བའི་ནང་དུ། ཉི་ཧོང་གི་མི་འབྱོར་ཞིབ་བཤེར་གྱི་བློན་ཆེན་ཟུར་བ་ལྕམ Haruko Arimura ལགས་ཀྱིས་ གྲོས་ཚོགས་གོང་མའི་ཚོགས་ཆེན་ཞིག་གི་དབུས་སུ་ཕྱིའི་རྒྱལ་ཁབ་མང་པོ་ཞིག་གིས་རྒྱ་ནག་གི་ཁུང་ཙི་སློབ་གླིང་དེ་ནི་བདེ་འཇགས་ལ་ཉེན་ཚབ་ཆེ་བ་ཞིག་ཏུ་ངོས་འཛིན་གནང་གི་ཡོད་པ་ལུང་འདྲེན་གྱིས། ཉི་ཧོང་གི་འབྲེལ་ཡོད་ལས་ཁུངས་ཁག་གིས་རྒྱ་ནག་གི་ཁུང་ཙི་སློབ་གླིང་ལ་སྟངས་འཛིན་བྱེད་དགོས་བའི་འབོད་སྐུལ་ཞུས་ཡོད་པར་འཁོད་འདུག
གསར་ཁང་གིས། རྒྱ་ནག་གི་ཁུང་ཙི་སློབ་གླིང་ཁག་གིས་དམིགས་བསལ་གྱིས་ཤེས་ཡོན་གྱི་ལག་འཁྱེར་རིགས་མཁོ་སྤྲོད་བྱེད་ཀྱི་མེད་སྟབས་ཡན་ལག་ལས་ཁུངས་གསར་འཛུགས་སྐབས་སུ་སྲིད་གཞུང་གི་ཆོག་མཆན་ནམ་དེབ་སྐྱེལ་སོགས་བྱེད་དགོས་ཀྱི་མེད་པར་གསལ་འགྲེལ་གྱིས། རྒྱ་ནག་གིས་ཐབས་ལམ་དེ་སྤྱད་ནས་དྲིལ་བསྒྲགས་དང་འབྲེལ་བའི་ལས་གཞི་ཁག་ཁྱབ་སྤེལ་བྱེད་བཞིན་ཡོད་པར་མངོན་གསལ་གནང་འདུག
ཉི་ཧོང་ནང་གི་ greater Tokyo ཁུལ་གྱི་སྒེར་བཙུགས་ཀྱི་སློབ་ཆེན་གྱི་ལས་བྱེད་ཅིག་གིས་གསར་ཁང་ལ་འགྲེལ་བརྗོད་གནང་བའི་ནང་དུ། ཁོང་གི་སྒེར་བཙུགས་ཀྱི་སློབ་གྲྭ་དེར་རྒྱ་ནག་གིས་ཁུང་ཙི་སློབ་གླིང་གསར་འཛུགས་བྱེད་རྒྱུའི་རེ་སྐུལ་བྱས་ཡོད་ནའང་། སློབ་གླིང་དེས་ངོས་ལེན་བྱས་མེད་པ་དང་། སྤྱི་ཡོངས་ཀྱི་ཆ་ནས་ལས་གཞི་དེའི་རིགས་ཀྱིས་རྒྱ་ནག་དང་ཉི་ཧོང་གཉིས་ཀྱི་བར་དུ་སློབ་ཕྲུག་བརྗེ་ལེན་ལ་ཕན་ཐོག་ཡོང་གི་ཡོད་ནའང་ཤེས་ཡོན་ལྟེ་གནས་ཁག་གིས་ཐེ་ཝན་དང་མཉམ་དུ་སློབ་ཕྲུག་བརྗེ་ལེན་གྱི་ལས་གཞི་གསར་འཛུགས་བྱས་ན་རྒྱ་ནག་གི་མ་དངུལ་མཁོ་འདོན་རིགས་མཚམས་འཇོག་བྱེད་ངེས་ཡིན་པ་གསུངས་འདུག
གཞི་རྩའི་རྒྱ་ནག་གིས་ཕྱི་ལོ་ ༢༠༠༤ ལོ་ནས་བཟུང་ཕྱིའི་རྒྱལ་ཁབ་ ༡༦༠ ལྷག་གི་ནང་དུ་རྒྱ་ནག་གི་སྐད་ཡིག་དང་རིག་གཞུང་ཁྱབ་སྤེལ་བྱེད་ཐབས་ཀྱི་ཁུང་ཙི་སློབ་གླིང་ ༥༠༠ ལྷག་རྩ་འཛུགས་བྱས་ཡོད་པའི་ཁྲོད་དུ། ཉི་ཧོང་ནང་གི་སྒེར་བཙུགས་ཀྱི་ཤེས་ཡོན་ལྟེ་གནས་ཁང་ Waseda དང་ Ritsumeikan གཙུག་ལམ་སློབ་ཆེན་སོགས་ཀྱི་གཙོ་བྱས་པའི་གཙུག་ལག་ཁང་ ༡༤་ཙམ་གྱི་ནང་དུ་ཡང་རྒྱ་ནག་གི་ཁུང་ཙི་སློབ་གླིང་ཆེད་འཛུགས་བྱས་ཡོད་པ་རེད། འདས་བའི་ལོ་འགའི་རིང་དུ་བོད་རང་བཙན་སློབ་ཕྲུག་ཚོགས་པ་སོགས་ཀྱི་དབུ་འཛུགས་ཀྱི་ཐོག་ནས་རྒྱ་ནག་གིས་ཁུང་ཙི་སློབ་གླིང་བརྒྱུད་ནས་རྒྱ་ནག་གི་འཇམ་པོའི་སྟོབས་ཤུགས་རྒྱ་བསྐྱེད་དང་། སྲིད་གཞུང་གི་དྲིལ་བསྒྲགས་རིགས་ཕྱི་ལོག་གི་སྤྱི་ཚོགས་ནང་དུ་ཁྱབ་སྤེལ་བྱེད་བཞིན་ཡོད་པར་ཡོངས་གྲགས་ཀྱིས་ལས་འགུལ་སྣ་མང་སྤེལ་ཡོད་པ་ལྟར། ཨ་རི་དང་ཡུ་རོབ། ཨོ་གླིང་སོགས་ཀྱི་ནང་དུ་རྒྱ་ནག་གི་ཁུང་ཙི་སློབ་གླིང་བརྒྱ་ཕྲག་ལྷག་སྒོ་རྒྱག་དགོས་བའི་གནས་སུ་ལྷུང་ཡོད་པ་རེད།
