ཉེ་ཆར་སྐབས་ ༡༦ བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ཐོག་གྲོས་ཚོགས་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་པ་རྣམ་པ་དུས་གཅིག་ལ་འཕོ་འགྱུར་གནང་བའི་གནད་དོན་དང་འབྲེལ་ནས་ཟླ་ ༤ ཚེས་ ༨ ཉིན་བོད་མི་མང་མདོ་སྨད་སྤྱི་འཐུས་བློ་བཟང་ཆོས་འབྱོར་ལགས་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་ལས་གནས་ནས་དགོངས་པ་ཞུས་ཡོད་སྟབས། ཕྱི་ཚེས་ ༩ ཉིན་དབུས་འོས་བསྡུ་ལས་ཁང་གིས་སྐབས་ ༡༦ པའི་མདོ་སྨད་སྤྱི་འཐུས་ཀྱི་དངོས་གཞིའི་འོས་གྲངས་ཕྱོགས་བསྡོམས་ཀྱི་སྒུག་ཐོ་དང་པོ་སྟེ་མདོ་སྨད་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་དགེ་བཤེས་རྔ་བ་གངས་རི་ལགས་སྤྱི་འཐུས་སུ་བསྐོ་བཞག་གནང་འདུག
དབུས་འོས་བསྡུ་ལས་ཁང་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ང་གཅིག་པའི་ནང་གསེས་གཉིས་པ་སྤྱི་འཐུས་དུས་ཡུན་ནང་ས་མིག་སྟོང་པ་ཐོན་ཚེ་བར་མའི་འོས་བསྡུ་མ་དགོས་པར་སྒུག་ཐོའི་གྲལ་མཚམས་གར་འཁེལ་ནས་ཚབ་གསར་འཇུག་རྒྱུའི་ཆེད། འོས་ཐོབ་མང་རིམ་བཞིན་ཐོར་བཀོད་དེ་འོས་བསྡུའི་འགན་འཛིན་དང༌ཟུར་དཔང་རྣམས་ཀྱི་མཚན་རྟགས་བཀོད་པ་འོས་བསྡུ་ལས་ཁང་དུ་ཉར་དགོས་ཞེས་པའི་དགོང་དོན་འོག་དེ་སྔ་ཕྱི་ལོ་ ༢༠༡༦ ལོའི་སྤྱི་འཐུས་ཀྱི་དངོས་གཞིའི་འོས་བསྡུ་ཆེན་མོའི་ཁྲོད་མདོ་སྨད་ཆོལ་ཁའི་ཁོངས་ནས་དགེ་བཤེས་རྔ་བ་གངས་རི་ལགས་ཨང་ ༡༡ པ་སྒུག་ཐོ་དང་པོ་དེ་ཆགས་ཀྱི་ཡོད་པར་བརྟེན་སྐབས་ ༡༦ པའི་བོད་མི་མང་སྤྱི་འཐུས་ལ་བསྐོ་བཞག་གནང་སྐོར་གསུངས་འདུག
དེ་བཞིན་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ཀྱང་ཁྲིམས་ཞིབ་པ་འཕོ་འགྱུར་གནང་བའི་གནད་དོན་ཁྲོད་ཚོགས་གཙོ་དང་སྤྱི་འཐུས་ཀྱི་ལས་གནས་ནས་རྩ་དགོངས་ཞུས་པའི་གསལ་བསྒྲགས་ཤིག་ཕྱི་ཚེས་ ༨ ཉིན་ཁོང་སྒེར་གྱི་ངོ་དེབ་ཐོག་བཀོད་པ་མ་ཟད་བརྒྱུད་ལམ་ཁག་ཅིག་ཏུ་དགོངས་པ་ཞུས་ཟིན་སྐོར་གསུངས་ཡོད།
དེ་དང་འབྲེལ་དེ་རིང་རླུང་འཕྲིན་ཁང་གིས་དེ་སྔ་ཕྱི་ལོ་ ༢༠༡༦ ལོའི་སྤྱི་འཐུས་ཀྱི་དངོས་གཞིའི་འོས་བསྡུ་ཆེན་མོའི་ཁྲོད་དབུས་གཙང་ཆོལ་ཁའི་ཁོངས་ཀྱི་སྒུག་ཐོ་ཨང་དང་པོ་སྨན་པ་རྣམ་རྒྱལ་ཁྱུ་གསར་ལགས་སུ་དབུས་འོས་བསྡུ་ལས་ཁང་ནས་ཚོགས་གཙོ་པདྨ་འབྱུང་གནས་ལགས་ཀྱི་ཚབ་ཏུ་བོད་མི་མང་དབུས་གཙང་སྤྱི་འཐུས་སུ་བསྐོ་བཞག་གནང་བའི་གཞུང་འབྲེལ་ཕྱག་བྲིས་འབྱོར་སོང་ངམ་ཞེས་བཀའ་འདྲི་ཞུས་པར་ཁོང་གིས་ད་ལྟའི་ཆར་འབྱོར་མ་བྱུང་ཞེས་གསུངས་སོང་། 
སྤྱི་འཐུས་སུ་རུང་ནས་དགོངས་ཞུ་ཕུལ་བའི་རྗེས་སུ་སྤྱི་འཐུས་ལྷན་ཚོགས་ནས་དགོངས་ཞུ་ཕུལ་མཁན་གྱི་མཚན་དབུས་འོས་བསྡུ་ལས་ཁང་ཕུལ་དགོས་པ་དང་། དབུས་འོས་བསྡུ་ལས་ཁང་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ང་གཅིག་པའི་དགོངས་དོན་འོག་ཁུངས་སོ་སོའི་སྒུག་ཐོར་ཡོད་པ་རྣམས་རྩེ་ཏོག་གིས་སྤྱི་འཐུས་སུ་བསྐོ་གཞག་གནང་བའི་ཕྱག་བྲིས་ཕུལ་གྱི་ཡོད་པ་རེད།
གཞི་རྩའི་སྐབས་ ༡༦ པའི་བོད་མི་མང་སྤྱི་འཐུས་རྣམ་པ་རིང་མིན་ཕྱི་ཟླ་ལྔ་པའི་ཟླ་མཇུག་ཙམ་ནས་ལས་ཡུན་ཚང་གི་ཡོད་ཀྱང་ཁྲིམས་ཞིབ་པ་རྣམ་གསུམ་འཕོ་འགྱུར་དང་འབྲེལ་ནས་བཅའ་ཁྲིམས་བསྐྱར་བཅོས་ཀྱི་ལས་དོན་དང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམས་བསྐོ་གཞག་གནང་རྒྱུ་སོགས་ཀྱི་ལས་དོན་ཁག་ཅིག་ལྷག་ཡོད་སྟབས། ཕྱི་ཟླ་ལྔ་པའི་ནང་སླར་གྲོས་ཚོགས་འཕར་མ་ཞིག་འཚོགས་གཏན་འཁེལ་ཡོད་སྟབས། སྐབས་དེར་གྲོས་ཚོགས་ཀྱི་ཚོགས་གཙོ་བསྐོ་གཞག་དང་འདེམས་ཐོན་སྤྱི་འཐུས་ཀྱི་དམ་འབུལ་སོགས་ཀྱང་གནང་དགོས་པའི་གནས་སྟངས་ཆགས་ཡོད།
