བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་མཆོག་གིས་ཁ་སང་ཐེ་ཝན་གྱི་ཕྱི་སྲིད་བློན་ཆེན་ལས་ཁུངས་སུ་བློན་ཆེན་སྐུ་ཞབས་ Joseph Wu མཆོག་དང་མཇལ་མོལ་གནང་སྟེ་བོད་ཀྱི་གནད་དོན་ཐད་མུ་མཐུད་ནས་རྒྱབ་སྐྱོར་ཆེས་ཆེར་གནང་སྐྱོང་ཡོང་བ་གཙོས་བཙན་བྱོལ་བོད་མིའི་ལག་དེབ་སེར་པོར་མཐོང་མཆན་གྱི་དཀའ་ངལ་འཕྲད་བཞིན་པ་སོགས་གལ་ཆེའི་གནད་དོན་ཁག་གཅིག་གི་ཐོག་གསུང་མོལ་གནང་འདུག
བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་དྲུང་ཆེ་ཀརྨ་ཆོས་དབྱིངས་ལགས་རྣམ་གཉིས་ཟླ་བ་འདིའི་ཚེས་ ༢༧ ནས་དབུ་འཛུགས་ཀྱིས་གཟའ་འཁོར་གཅིག་རིང་ཐེ་ཝན་ནང་གཞུང་འབྲེལ་འཚམས་གཟིགས་གནང་བཞིན་ཡོད་པ་ལྟར། ཁ་སང་ཕྱི་དྲིལ་བཀའ་བློན་མཆོག་དང་དྲུང་ཆེ་རྣམ་གཉིས་ཀྱིས་ཐེ་ཝན་གྱི་ཕྱི་སྲིད་བློན་ཆེན་ལས་ཁུངས་སུ་བློན་ཆེན་སྐུ་ཞབས་ Joseph Wu མཆོག་དང་མཇལ་འཕྲད་ཞུས་ཏེ་བོད་ཀྱི་གནད་དོན་ཐད་མུ་མཐུད་ནས་རྒྱབ་སྐྱོར་ཆེས་ཆེར་གནང་སྐྱོང་ཡོང་བ་གཙོས་བཙན་བྱོལ་བོད་མིའི་ལག་དེབ་སེར་པོར་མཐོང་མཆན་གྱི་དཀའ་ངལ་འཕྲད་བཞིན་པ་སོགས་གལ་ཆེའི་གནད་དོན་ཁག་གཅིག་གི་ཐོག་གསུང་མོལ་གནང་འདུག་པར་མ་ཟད། གྲོས་ཚོགས་ཀྱི་ཚོགས་ཁང་ནང་གྲོས་ཚོགས་ཀྱི་ཚོགས་གཙོ་དབུས་པའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཚོགས་གཞོན་དང་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སོགས་གནད་ཡོད་མི་སྣ་ཁག་དང་མཇལ་མོལ་གནང་ཡོད།
རླུང་འཕྲིན་ཁང་གིས་ཕྱི་དྲིལ་བཀའ་བློན་མཆོག་གི་ཐེ་ཝན་ནང་གི་གཞུང་འབྲེལ་འཚམས་གཟིགས་དང་འབྲེལ་ནས་སྐུ་ཚབ་དོན་གཅོད་སྤྱི་ཟུར་སྐལ་བཟང་རྒྱལ་མཚན་ལགས་སུ་བཅར་འདྲི་ཞུས་ཡོད།
