དེ་རིང་ཕྱི་ཟླ་ ༡༡ ཚེས་ ༡༠ ཉིན་གྱི་སྔ་དྲོ་ཕྱག་ཚོད་ ༡༠༌༣༠ ཡོལ་ཙམ་ལ་བཞུགས་སྒར་གངས་སྐྱིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་སྐབས་ ༡༦ པའི་བཀའ་ཤག་གི་བདམས་ཐོན་བཀའ་བློན་རྣམ་པ་གསུམ་གྱིས་བཀའ་བློན་གྱི་ལས་འཁུར་དང་གསང་རྒྱའི་དམ་འབུལ་ཞུས་སོང་།
དེ་རིང་དམ་འབུལ་གྱི་མཛད་རིམ་ཐོག་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གིས་དབུས་པའི་ཁྲིམས་ཞིབ་པ་གཞན་རྣམ་གཉིས། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཚོགས་གཞོན་སྒྲོལ་མ་ཚེ་རིང་མཆོག སྤྱི་འཐུས་རྒྱུན་ལས་ཁག་ཅིག རང་དབང་ཅན་གྱི་སྡེ་ཚན་ཁག་གི་འགན་འཛིན་དང་འབྲེལ་ཡོད་ལས་བྱེད། ལྷན་ཁང་ཁག་གི་དྲུང་ཆེ་ཆུང་རྣམ་པ། ས་གནས་འགོ་འཛིན་གྱི་འཛིན་སྐྱོང་ཚོགས་ཆེན་ཐོག་ཕེབས་པའི་གཞིས་འགོ་བཅས་ལྷན་འཛོམས་སར་བདམས་ཐོན་བཀའ་བློན་རྣམ་པས་རེ་མོས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་ཏེ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་དྲུང་ནས་བཀའ་བློན་གྱི་ལས་འཁུར་དང་གསང་རྒྱའི་དམ་འབུལ་ཞུས་ཡོད།
སྲིད་སྐྱོང་སྤེན་པ་ཚེ་རིང་མཆོག་གིས་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ཐོག་བཀའ་བློན་གྱི་འོས་གཞིར་མི་འགྲོ་བདུན་གྱི་མཚན་དང་ལོ་རྒྱུས་བཅས་འཆར་འབུལ་ཞུས་པའི་ཁྲོད་བཀའ་བློན་གྱི་མི་འགྲོ་གཉིས་ལ་གྲོས་ཚོགས་ནས་དགོས་ངེས་ཀྱི་རྒྱབ་སྐྱོར་མ་ཐོབ་པར་བརྟེན་འོས་གཞི་ནས་ཟགས་ཡོད་པ་དང་བཀའ་བློན་གྱི་འོས་མི་དྲུག་པའི་མཚན་འདོན་གནང་རྗེས་སྤྱི་འཐུས་ཁག་ཅིག་གིས་དེར་དགག་བྱ་གནང་ནས་གྲོས་ཚོགས་ཀྱི་ར་བ་ལས་ཕྱིར་ཐོན་རྐྱེན་གྲོས་ཚོགས་ཀྱི་གྲུབ་ཆ་མ་ལོངས་སྟབས་ལས་རིམ་རེ་ཞིག་མཇུག་སྐྱོང་གནང་ཐུབ་མེད་པ་རེད།
ཐེངས་འདིའི་བཀའ་ཤག་ནང་བཀའ་བློན་དུ་ལྕང་ར་ཐར་ལམ་སྒྲོལ་མ་མཆོག་དང་རྒྱ་རི་སྒྲོལ་མ་མཆོག ནོར་འཛིན་སྒྲོལ་མ་མཆོག་བཅས་བུད་མེད་གསུམ་འདེམས་ཐོན་བྱུང་བར་སྤྱི་ཚོགས་དྲ་ལམ་ཐོག་བོད་མི་རྣམས་ཀྱིས་སྒྲོལ་མ་གསུམ་ཞེས་ཆེ་བསྟོད་དང་བཅས་དགའ་བསུའི་འཚམས་འདྲི་ཞུས་ཏེ་བཀའ་བློན་རྣམ་པའི་ཕྱག་ལས་རྣམས་ལམ་ལྷོངས་ཡོང་བར་སྨོན་འདུན་ཞུ་མཁན་མང་དག་ཅིག་མཇལ་རྒྱུ་འདུག 
བཀའ་བློན་རྣམ་པའི་བཀའ་བློན་གྱི་ལས་འཁུར་དང་གསང་རྒྱའི་དམ་འབུལ་གྲུབ་མཚམས་སུ་གསར་འགོད་པས་བཀའ་འདྲི་དང་ལེན་སྐབས་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་བོད་མིའི་སྒྲིག་འཛུགས་ལ་ཞབས་འདེགས་ཞུ་རྒྱུའི་གོ་སྐབས་བྱུང་བར་དགའ་ཚོར་བྱུང་ཞེས་གསུངས་པ་དང་། ལྷག་པར་དུ་བཀའ་བློན་མཆོག་ཤེས་རིག་ལས་ཁུངས་ཀྱི་བཀའ་བློན་གནང་རྒྱུ་ཡིན་སྐོར་བཀའ་མོལ་ཞིག་འགྲོ་བཞིན་སྟབས་ཁོང་གིས་དེར་ངོས་བཞེས་ཀྱིས་ཤེས་རིག་བཀའ་བློན་གྱི་ཐུགས་འགན་བཞེས་རྒྱུ་ཡིན་པར་འགྲེལ་བརྗོད་གནང་བར་མ་ཟད། ཤེས་རིག་གི་ལས་དོན་གང་འདྲ་ཞིག་སྤེལ་ཡང་དེ་མཇུག་སྐྱོང་གནང་དགོས་རྒྱུ་ནི་གནད་འགག་ཞིག་ཡིན་པ་དང་སྒོས་ཤེས་རིག་གི་ཕྱག་ལས་གང་སྤེལ་བ་དེ་དག་འཕྲལ་མར་ཉིད་དུ་གྲུབ་འབྲས་སོན་པ་ཞིག་ཡོང་དཀའ་ནའང་རིམ་པས་བཟོ་ལྟ་བཟོས་ཏེ་དུས་ཚོད་ཏོག་ཙམ་འགོར་གྱི་རེད་ཅེས་གསུངས་ཡོད། 
བཀའ་བློན་རྒྱ་རི་སྒྲོལ་མ་མཆོག་གིས་ད་རེས་སླར་ཡང་བོད་མིའི་སྒྲིག་འཛུགས་ཀྱི་བཀའ་ཤག་ནང་ཞབས་འདེགས་ཞུ་རྒྱུའི་གོ་སྐབས་བྱུང་བ་ནི་བསོད་ནམས་ཡིན་སྐོར་གསུངས་པ་དང་སྦྲགས་ཏེ་སྲིད་སྐྱོང་མཆོག་གིས་རང་ཉིད་ནས་འདོད་པ་ཡོད་པའི་ལྷན་ཁང་གནང་སོང་བས་ལྷན་ཁང་དེར་བུད་མེད་ཀྱི་བཀའ་བློན་གནང་བ་ཆེས་ཐོག་མ་ཆགས་ཀྱི་ཡོད་སྟབས། ལས་འགན་ཆེན་པོ་ཞིག་ལ་ངོས་འཛིན་གནང་གི་ཡོད་པར་མ་ཟད་ལས་འགན་དེ་བུད་མེད་ཅིག་གི་ངོས་ནས་འགན་འཐུས་ཚང་ཞིག་བཞེས་ངེས་ཡིན་པར་མ་ཟད་སླད་མར་བོད་ཀྱི་བུད་མེད་ལ་གནས་སྟངས་གང་འདྲ་ཞིག་གི་ཐོག་ནས་འགན་གནང་ཡང་དེར་འཐུས་ཤོར་མེད་པར་ ཡིད་ཆེས་འཕེར་བ་ཞིག་ཡོང་ཐུབ་རྒྱུའི་ཐུགས་རེ་ཡོད་སྐོར་གསུངས་ཡོད།
བཀའ་བློན་ནོར་འཛིན་སྒྲོལ་མ་མཆོག་གིས་བོད་ཀྱི་གཉན་འཕྲང་གི་དུས་ཚོད་འདིར་རང་ཉིད་བཀའ་བློན་དུ་འདེམས་ཐོན་བྱུང་བ་འདིས་རང་ཉིད་ལ་འགན་ཆེན་པོ་ཞིག་ཡོད་པ་ཚོར་གྱི་འདུག་ཅེས་གསུངས་ཡོད། སྤྱིར་བཀའ་བློན་ནོར་འཛིན་སྒྲོལ་མ་མཆོག་ཕྱི་དྲིལ་ལས་ཁུངས་ཀྱི་བཀའ་བློན་གནང་རྒྱུ་ཡིན་པའི་བཀའ་མོལ་འགྲོ་བཞིན་པ་ལྟར་ཁོང་གིས་རྒྱལ་སྤྱིའི་འབྲེལ་ལམ་དང་བོད་ནང་གི་ཛ་དྲག་གནས་སྟངས་ཐད་དྲིལ་བསྒྲགས་ཤུགས་ཆེ་གནང་རྒྱུའི་དམིགས་ཡུལ་དང་འདུན་པ་ཡོད་སྐོར་གསུངས་ཡོད།
རྩ་བའི་དགུང་གྲངས་ ༧༠ ལ་ཕེབས་པའི་བཀའ་བློན་ལྕང་ར་ཐར་ལམ་སྒྲོལ་མ་མཆོག་ནི། སྒང་ཏོག་དང་སྦེལ་ཀོབ། མའེ་སོར་བཅས་ནས་གཞི་རིམ་སློབ་སྦྱོང་གནང་རྗེས་མའེ་སོར་ Teresian མཐོ་སློབ་ནས་ཉེ་བའི་གཙུག་ལག་རབ་འབྱམས་པ་དང་། མའེ་སོར་གཙུག་ལག་སློབ་ཁང་ཆེན་མོ་ནས་དཔལ་འབྱོར་རིག་པའི་གཙུག་ལག་རབ་འབྱམས་པ་ཐོན་པ་མ་ཟད་མའེ་སོར་ (St. Joseph) མཐོ་སློབ་ནས་དགེ་རྒན་འོས་སྦྱོང་ལེགས་ཐོན་གནང་ཡོད།
ཁོང་གིས་བཙན་བྱོལ་བོད་མིའི་སློབ་གྲྭ་ཁག་ཏུ་ཐོག་མར་དམའ་རིམ་དང་དེ་ནས་མཐོ་རིམ་དགེ་རྒན་དང་ཌལ་ཧོར་གཏན་སློབ་དང་། སྦེལ་ཀོབ་ཉིན་སློབ། བདེ་སླར་སློབ་གྲྭ། མོན་གྷོ་གཏན་སློབ་བཅས་ཀྱི་སློབ་སྤྱིའི་ཞབས་ཞུ་མི་ལོ་ ༣༧ ལྷག་གནང་སྟེ་ཕྱི་ལོ་ ༢༠༡༣ ལོར་རྒས་ཡོལ་དུ་ཕེབས་ཏེ། སྦེལ་ཀོབ་བུད་མེད་ཚོགས་པའི་རྒྱུན་ལས་དང་། Dalhousie Public School དང་། Hill Top School སློབ་གྲྭ་གཉིས་ཀྱི་སློབ་སྟོན་ཚོགས་ཆུང་གི་ཚོགས་མི་གནང་བར་མ་ཟད། ཕྱི་ལོ་ ༢༠༠༣ ལོར་རྒྱ་གར་རྒྱལ་ཡོངས་དགེ་རྒན་གྱི་གཟེངས་བསྟོད་གྲགས་ཅན་ (National Award for Teachers) ཞེས་པའི་གཟེངས་རྟགས་བཞེས་མྱོང་ཡོད་པ་རེད། ལྷག་པར་དུ་ཕྱི་ལོ་ ༢༠༡༡ ནས་བཟུང་བཙན་བྱོལ་བོད་མིའི་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གི་ལས་འཁུར་ཞུ་མུས་ཡིན་པ་དང་། སྦེང་ལོར་ཏཱ་ལའི་བླ་མའི་མཐོ་སློབ་ཀྱི་འགན་འཛིན་ལྷན་ཚོགས་ཀྱི་ཚོགས་མིའི་འགན་འཁུར་བཞེས་མུས་ཡིན་པ་རེད།
དེ་བཞིན་དགུང་གྲངས་ ༥༧ ལ་ཕེབས་པའི་བཀའ་བློན་རྒྱ་རི་སྒྲོལ་མ་མཆོག་ནི། རྡོ་རྗེ་གླིང་ནས་གཞི་རིམ་སློབ་མཐར་སོན་རྗེས་པན་ཇབ་གཙུག་ལག་སློབ་གཉེར་ཁང་ནས་ཉེ་བའི་གཙུག་ལག་རབ་འབྱམས་པ་དང་། དེ་ནས་ལྡི་ལི་གཙུག་ལག་སློབ་གཉེར་ཁང་ནས་ཉེ་བའི་ཁྲིམས་ལུགས་རབ་འབྱམས་པ་སློབ་སྦྱོང་གནང་ཡོད།
ཁོང་གིས་ ༡༩༨༦ ནས་ ༡༩༩༡ བར་དབུས་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ལས་དང་དབུས་བོད་ཀྱི་བུད་མེད་ལྷན་ཚོགས་ཀྱི་སློབ་སྟོན་པ་གནང་མྱོང་ཡོད་པ་དང་། ཕྱི་ལོ་ ༡༩༩༡ ལོར་དགུང་ལོ་ ༢༦ སྟེང་སྐབས་ ༡༡ པའི་བོད་མི་མང་སྤྱི་འཐུས་ལྷན་ཚོགས་སུ་འོས་ཐོན་གྱིས་ལོ་རྒྱུས་ནང་དགུང་ལོ་ཆུང་ཤོས་གྲས་ཀྱི་སྤྱི་འཐུས་ཡིན་པ་དང་སླར་སྐབས་ ༡༢་དང་ ༡༣། ༡༤ སོ་སོར་མདོ་སྟོད་སྤྱི་འཐུས་སུ་བདམས་ཐོན་གྱིས་བཙན་བྱོལ་ནང་སྤྱི་འཐུས་ལྷན་ཚོགས་ཀྱི་བུད་མེད་ཚོགས་གཞོན་དང་པོ་ཡིན་པ་དང་། བསྟུད་མར་སྐབས་གཉིས་རིང་ཚོགས་གཞོན་གྱི་མཛད་འཁུར་བཞེས་ཡོད། དེ་བཞིན་ཕྱི་ལོ་ ༢༠༡༡ ནས་ ༢༠༡༦ བར་བཀའ་ཤག་སྐབས་ ༡༤ པའི་ནང་སྲིད་བཀའ་བློན་གྱི་མཛད་འཁུར་བཞེས་ཡོད་ལ། ༢༠༢༡ ལོའི་སྲིད་སྐྱོང་འོས་བསྡུའི་ནང་ཆ་ཤས་ལེན་མཁན་བུད་མེད་གཅིག་པུ་དེ་ཡིན་པ་རེད།
དགུང་གྲངས་ ༤༦ ལ་ཕེབས་པའི་བཀའ་བློན་ནོར་འཛིན་སྒྲོལ་མ་མཆོག་ནི། རྒྱ་གར་ལྷོ་ཕྱོགས་ཀོ་ལི་གྷལ་དང་སིམ་ལ་བོད་གཞུང་གཏན་སློབ་གཉིས་ནས་གཞི་རིམ་སློབ་སྦྱོང་ཐོན་རྗེས། མའེ་སོར་སློབ་གྲྭ་ཆེན་མོ་ནས་ཨིན་ཡིག་རྩོམ་རིག་ཐོག་གཙུག་ལག་རབ་འབྱམས་པ་དང་། དེ་ནས་ཨ་རི་བོད་མིའི་སློབ་ཡོན་ལས་འཆར་འོག་སྦོ་སི་ཊོན་ཊཕ་སི་ (Tufts University, Boston) སློབ་གྲྭ་ཆེན་མོའི་ཧྥེ་ལེ་ཅར་ (Fletcher) སློབ་གཉེར་ཁང་དང་། ཧར་ཝཌ་སློབ་གྲྭ་ཆེན་མོ་མཉམ་འགྲིམས་བརྒྱུད་ཁྲིམས་དང་རྒྱལ་འབྲེལ་རིག་པའི་གཙུག་ལག་རབ་འབྱམས་པ་ཐོན་པ་མ་ཟད། རྗེས་སུ་མའེ་སོར་སློབ་གྲྭ་ཆེན་མོ་ནས་དཔེ་མཛོད་དང་ཡིག་ཚགས་རིག་པའི་ཐོག་ཉེ་བའི་རབ་འབྱམས་པ་ཡང་ཐོན་གནང་ཡོད།
ཁོང་གིས་ཕྱི་ལོ་ ༢༠༠༠ ནས་ ༢༠༠༦ བར་དྷ་ས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་དང་། ལས་འཆར་ལས་འཛིན་གནང་མྱོང་ཡོད་ལ། ཨ་རིར་སློབ་སྦྱོང་ཐོན་རྗེས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་མཉམ་འབྲེལ་རྒྱལ་ཚོགས་དང་། ཡུ་རོབ་མཐུན་ཚོགས། འགྲོ་བ་མིའི་ཐོབ་ཐང་ཚན་པའི་འགན་འཁུར་གནང་བ་དང་། དེ་རྗེས་ ༢༠༡༨ ནས་ ༢༠༢༠ བར་ཨ་རི་བོད་ཀྱི་ཐེབས་རྩར་དཔལ་འབྱོར་འདུ་འགོད་དང་རོགས་སྐྱོར་ལས་འཆར་བའི་འགན་འཁུར་ཡང་གནང་ཡོད་པ་རེད།
