མ་ནཱ་ལི་ནས་དབུ་འཛུགས་ཀྱིས་རྒྱལ་ས་ལྡི་ལི་བར་བོད་ནང་གི་དངོས་ཡོད་གནས་ཚུལ་དང་བོད་དོན་དང་འབྲེལ་བའི་དོན་གནད་གསུམ་གྱི་དགོས་འདུན་བརྒྱུད་བསྒྲགས་འོག་བོད་དོན་ཞི་བའི་གོམ་བགྲོད་གནང་མཁན་བོད་མི་དང་བླངས་པ་གསུམ་པོ་དེ་རིང་ཕྱི་ཚེས་ ༦ ཉིན་རྒྱལ་ས་ལྡི་ལིར་འབྱོར་བར་སྤྱི་ལེ་ ༩༥ ཡོད་པའི་ས་ཚིགས་པཱ་ཎི་པཱཏ་ཏུ་འབྱོར་འདུག
དེའང་ཟླ་བ་སྔོན་མའི་ཕྱི་ཚེས་ ༢༣ རེས་གཟའ་ལྷག་པ་ལྷག་དཀར་གྱི་ཉིན་མོ་དང་བསྟུན་རང་ལོ་ ༤༧ སོན་པ་ཚེ་རིང་དོན་གྲུབ་ལགས་དང་ ༤༥ སོན་པ་ཚེ་རིང་དབང་འདུས་ལགས། དེ་བཞིན་ ༦༥ ལ་སོན་པ་པཱ་ཆུང་བདག་ལགས་གསུམ་གྱིས་མ་ནཱ་ལི་ནས་རྒྱལ་ས་ལྡི་ལི་བར་བོད་དོན་ཞི་བའི་གོམ་བགྲོད་ལས་འགུལ་ཞིག་དབུ་འཛུགས་གནང་ཡོད་པ་ལྟར། དེ་དག་གི་ཁོངས་ནས་པཱ་ཆུང་བདག་ལགས་མ་ནཱ་ལི་ནས་སྤྱིལེ་ ༡༣༠ ཙམ་གྱི་ས་ཚིགས་ཤིག་ཏུ་འབྱོར་སྐབས་ལྷམ་བདེ་མིན་གྱི་རྐྱེན་གྱིས་ཞབས་ལ་ཆུ་ལྒང་ཐོན་པར་བརྟེན་གོམ་བགྲོད་ལ་ཞུགས་མ་ཐུབ་པར་སྨན་བཅོས་གནང་ཡང་དེར་དྲག་སྐྱེད་མ་བྱུང་སྟབས་ཁོང་སླར་ཡང་ཕྱིར་རང་གི་གཟིམ་ཤག་ཏུ་ཕེབས་དགོས་བྱུང་ཡོད་པ་རེད།
གོམ་བགྲོད་པ་རྣམས་ཀྱིས་རྒྱ་གར་གྱི་ས་གནས་ས་ཐོག་ཏུ་བོད་དོན་དྲིལ་བསྒྲགས་དང་། ལྷག་པར་དུ་རྒྱ་ནག་གཞུང་ནས་༸གོང་ས་སྐྱབས་མགོན་ཆེན་པོ་མཆོག་བོད་ནང་ཆིབས་བསྒྱུར་བཀའ་དྲིན་བསྐྱང་དུ་འཇུག་དགོས་པ་དང་། བོད་མིའི་དབུ་མའི་ལམ་གྱི་སྲིད་བྱུས་གཞིར་བཞག་གི་དགོངས་དོན་འོག་རྒྱ་ནག་གཞུང་ནས་༸གོང་ས་མཆོག་དང་བོད་མིའི་སྒྲིག་འཛུགས་ལྷན་དུ་ཞི་བའི་གྲོས་མོལ་གནང་དགོས་པ། དེ་བཞིན་རྒྱ་གཞུང་གི་བཙོན་འོག་ཏུ་ཡོད་པ་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་དབུས་པའི་བོད་མིའི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་འཕྲལ་དུ་གློག་བཀྲོལ་གཏོང་དགོས་པ་སོགས་ཀྱི་དགོས་འདུན་བརྒྱུད་བསྒྲགས་གནང་སྟེ་ཉིན་མ་རེ་ལ་སྤྱི་ལེ་ ༣༠ ནས་ ༤༠ བར་གོམ་བགྲོད་གནང་སྟེ་ཟླ་བ་འདིའི་ཕྱི་ཚེས་ ༢༢ ཙམ་ལ་རྒྱལ་ས་ལྡི་ལིར་འབྱོར་གྱི་ཡོད་པ་དང་། ལྷག་དོན་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་དགོས་འདུན་ཁག་འགྲེམས་སྤེལ་དང་ཞི་བའི་རྔམ་སྟོན་གྱི་ལས་འགུལ་རྒྱ་ཆེ་སྤེལ་འཆར་ཡོད་པ་རེད།
རླུང་འཕྲིན་ཁང་ནས་དེ་རིང་སྔ་དྲོ་ལས་འགུལ་གྱི་སྣེ་ཁྲིད་གནང་མཁན་ཚེ་རིང་དོན་གྲུབ་ལགས་སུ་ཞལ་པར་བརྒྱུད་ས་གནས་ས་ཐོག་གི་བོད་མི་ཚོས་སྣེ་ལེན་ཞུ་ཕྱོགས་དང་འབྲེལ་བའི་བཀའ་འདྲི་ཞུས་པར་ཁོང་གིས་བོད་མི་ཚོས་སྣེ་ལེན་གང་གཟབ་ཞུས་པ་མ་ཟད་ལས་འགུལ་སྤེལ་བར་བསྔགས་བརྗོད་གནང་ཡོད་སྐོར་གསུངས་སོང་། 
དེ་བཞིན་ཁོང་གི་ས་གནས་ས་ཐོག་ཏུ་བཞུགས་པའི་བོད་མི་ཚོས་རྒྱབ་སྐྱོར་དང་སྣེ་ལེན་གང་ལེགས་གནང་ཡོད་སྟབས་རང་ཉིད་ཀྱི་ངོས་ནས་བོད་ཀྱི་གནད་དོན་དང་འབྲེལ་བའི་ལས་འགུལ་འདི་འདྲ་སྤེལ་རྒྱུ་བྱུང་བར་དགའ་སྤོབས་ཆེན་པོ་བྱུང་ཞེས་དང་། ས་གནས་ཆེ་ཁག་ཏུ་འབྱོར་རིམ་བཞིན་རྒྱ་གར་མང་ཚོགས་ཁྲོད་ནས་ཀྱང་གཟིགས་ཚུལ་ལེགས་པོ་ཡོད་སྐོར་ངོ་སྤྲོད་གནང་སོང་།
ཁོང་གིས་གོམ་བགྲོད་ཁྲོད་དགུང་ལོ་ ༦༥ སོན་པའི་པྰ་ཆུང་བདག་ལགས་ཀྱི་ཞབས་ལ་ཆུ་ལྒང་ཐོན་རྐྱེན་གནས་སྐབས་སུ་གོམ་བགྲོད་ལ་ཞུགས་མ་ཐུབ་པར་སྨན་བཅོས་གནང་མུས་ཡིན་པ་དང་། ཁོང་གི་ཞབས་དྲག་སྐྱེད་བྱུང་མ་ཐག་ཏུ་མུ་མཐུད་གོམ་བགྲོད་ལ་ཕེབས་ངེས་ཡིན་སྐོར་གསུངས་ཡོད།
ཚེ་རིང་དོན་གྲུབ་ལགས་ཀྱིས་བོད་གཞིས་བྱེས་གཉིས་སུ་བཞུགས་པའི་བོད་མི་རྣམས་ལ་དུས་ནམ་ཡང་སེམས་ཤུགས་ཆགས་རྒྱུ་མེད་པའི་གཞེན་སྐུལ་དེ་ལྟར་གནང་སོང་།
དེ་བཞིན་པྰ་ཆུང་བདག་ལགས་ཀྱི་ཚབ་ཏུ་ཅན་ཌི་གྷར་མཐོ་སློབ་ཏུ་སློབ་གཉེར་གནང་བཞིན་པ་བསྟན་འཛིན་ཉི་མ་ལགས་སུ་ཁོང་ལས་འགུལ་ཁོངས་དེར་ཞུགས་དོན་གང་ཡིན་ཐོག་བཅར་འདྲི་ཞུས་པར་ཁོང་གིས་ཆུང་དུས་ནས་བོད་དོན་ཐོག་ལ་སེམས་ཤུགས་དམིགས་བསལ་ཞིག་ཡོད་པ་ལྟར་ད་རེས་དངོས་སུ་མཉམ་ཞུགས་གནང་སྐོར་གསུངས་སོང་། 
རྩ་བའི་ད་ལྟའི་ཏོག་དབྱིབས་རིམ་ནད་ཀྱི་ཛ་དྲག་དུས་སྐབས་སུ་མང་ཚོགས་འདུ་འཛོམས་ཐོག་གཞི་རྒྱ་ཆེ་བའི་ལས་འགུལ་སྤེལ་རྒྱུ་ཁག་པོ་ཡིན་སྟབས། འདས་པའི་དུས་སུ་ཁེ་ན་ཊ་དང་སུད་སི། དབྱིན་ཡུལ། ཨ་རི། ཨོ་སི་ཀྲོ་ལི་ཡ། ཧྥ་རན་སུ་སོགས་སུ་བོད་མི་ཁག་ཅིག་གིས་གོམ་བགྲོད་དང་། རྐང་འཁོར་སྐོར་སྐྱོད། དེ་བཞིན་རྒྱང་སྐྱོད་སོགས་བརྒྱུད་དེ་བོད་དོན་ལས་འགུལ་སྤེལ་ཡོད་པ་རེད།
