ཁ་སང་ཕྱི་ཚེས་ ༡༠ ཉིན་མོ་དེ་ནི་རྒྱལ་ཚོགས་ཀྱི་གཏན་འབེབས་གནང་བའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་པ་དང་བསྟུན། རྒྱ་ནག་ནང་དུ་རྟེན་གཞི་བྱས་པའི་ཨ་རིའི་གཞུང་ཚབ་པས་རྒྱ་གཞུང་གིས་བོད་དང་ཤར་ཏུར་ཀིས་ཏན། ཧོང་ཀོང་བཅས་ཀྱི་ནང་དུ་འགྲོ་བ་མིའི་ཐོབ་ཐང་རྡོག་རོལ་ལ་བློ་འཚབ་ཀྱི་རྣམ་པ་མངོན་གསལ་དང་སྦྲགས། བོད་མིའི་འགྲོ་བ་མིའི་ཐོབ་ཐང་རྡོག་རོལ་དང་བོད་ཀྱི་ཐུན་མིན་རིག་གཞུང་། སྐད་ཡིག མི་རིགས་ཀྱི་ངོ་བོ་བཅས་རྩ་མེད་བཟོ་བའི་ལས་འགུལ་ལ་སྐྱོན་བརྗོད་གནང་འདུག
དེ་རིང་ཕྱི་ཚེས་ ༡༡ ཉིན་རྒྱ་ནག་ནང་དུ་རྟེན་གཞི་བྱས་པའི་ཨ་རིའི་གཞུང་ཚབ་པ་སྐུ་ཞབས་ Nicholas Burns ལགས་ཀྱིས་གཞུང་ཚབ་པའི་དྲ་ཚིགས་ཐོག་སྤེལ་བའི་གནས་ཚུལ་ནང་། དེ་སྔོན་ཕྱི་ལོ་ ༡༩༤༨ ལོར་རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་བསྐྱངས་པའི་ཁྲིམས་སྒྲིག་དེའི་ནང་རྒྱལ་ཚོགས་ཀྱི་ཚོགས་མི་ཚང་མས་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ནི་འགྲོ་བ་མི་ཚང་མར་ལྷན་སྐྱེས་སུ་ཡོད་པ་ཞིག་ལ་ངོས་འཛིན་གནང་གི་ཡོད་པ་དང་འབྲེལ། གང་ནས་ཡིན་པ་དང་སུ་ཡིན་མིན་སོགས་ལ་ལྟོས་མེད་མི་ཚང་མར་སྐྱེས་དུས་ནས་རང་དབང་དང་། དེ་བཞིན་ཆེ་མཐོང་དང་ཐོབ་ཐང་འདྲ་མཉམ་ཡོད་པར་གསལ་བཏོན་གནང་ཡོད་ཅེས་གསུངས་འདུག་པ་མ་ཟད། ཁྲིམས་སྒྲིག་དེ་ཉིད་གཏན་འབེབས་ཀྱིས་ལོ་ངོ་ ༧༥ འཁོར་མཚམས་འདིར་ཨ་རིའི་གཞུང་གི་ངོས་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་འགན་འཁྲི་དང་། ཁས་ལེན་དམ་བཅའ་ཞུས་པ་རྣམས་སྒྲུབ་མ་ཐུབ་པར་ཧ་ཅང་སེམས་འཚབ་ཆེན་པོ་ཡོད་ཅེས་སྐྱོན་བརྗོད་ནན་པོ་གནང་འདུག
ལྷག་པར་དུ་བོད་མིའི་འགྲོ་བ་མིའི་ཐོབ་ཐང་རྡོག་རོལ་ཐོག བོད་ཀྱི་ཐུན་མོང་མ་ཡིན་པའི་རིག་གཞུང་དང་། སྐད་ཡིག མི་རིགས་ཀྱི་ངོ་བོ་བཅས་པ་རྩ་མེད་བཟོ་རྒྱུའི་གདུག་རྩུབ་ཅན་གྱི་སྲིད་བྱས་དང་ལས་འགུལ་རྣམས་ལ་སྐྱོན་བརྗོད་ནན་པོ་གནང་འདུག་པ་མ་ཟད། ཤར་ཏུར་ཀིས་ཏན་གི་ཡུ་གུར་བ་གཙོས་པའི་གྲངས་ཉུང་མི་རིགས་གཞན་ལ་གཏོང་བཞིན་པའི་ཁྲིམས་འགལ་གྱི་བྱ་སྤྱོད་དེ་དག་ལ་ངོ་རྒོལ་ཡོད་པ། དེ་བཞིན་ཧོང་ཀོང་ནང་གི་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ཁག་ལ་རྡོག་རོལ་དང་ཞི་བའི་ངང་ནས་བདེན་པ་བརྗོད་མཁན་ཚོར་དོ་དམ་དྲག་པོ་བྱེད་ཀྱི་ཡོད་པའི་གནད་དོན་ཐད་སེམས་འཚབ་མངོན་གསལ་དང་འབྲེལ། ཨ་རིའི་ངོས་ནས་ཞི་བའི་འདུ་འཛོམས་དང་། ཆོས་ལུགས་རང་དབང་། སྨྲ་བརྗོད་རང་དབང་། དེ་བཞིན་ཁྲིམས་ཀྱི་དབང་སྒྱུར་བཅས་ལ་རྒྱབ་སྐྱོར་གནང་གི་ཡོད་ཅེས་གསལ་བརྗོད་གནང་འདུག
མ་ཟད་རྒྱ་ནག་ནང་དུ་ཞི་བདེ་དང་། བདེ་འཇགས། ཆེ་མཐོང་སོགས་ཀྱི་ཆེད་དུ་ལས་དོན་སྤེལ་བའི་ཁྲོད་འཇིགས་སྐུལ་དང་བཙོན་འཇུག་མྱོང་མཁན་གྱི་རྒྱ་ནག་གི་ཁྲིམས་རྩོད་པ་དང་། གསར་འགོད་པ། སྤྱི་མི་སོགས་གཞན་གྱི་ཐོབ་ཐང་སྲུང་སྐྱོབ་གནང་མཁན་རྣམས་ལ་རྒྱབ་སྐྱོར་ཡོད་སྐོར་མངོན་གསལ་གནང་འདུག དེ་བཞིན་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ངོས་ནས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལག་བསྟར་ཁག་ལ་རྟོག་ཞིབ་གནང་དགོས་གལ་ཐོག རྒྱལ་སྤྱིའི་འགྲོ་བ་མིའི་ཐོབ་ཐང་གི་འགན་འཁྲི་དང་མི་མང་ལ་ཁས་ལེན་དམ་བཅའ་བྱས་པ་དེ་དག་བརྩི་སྲུང་བྱ་དགོས་པ་ནན་བརྗོད་གནང་འདུག
གཞན་ཡང་ཁ་སང་དབྱིན་ཡུལ་རྒྱལ་ས་ལོན་ཌོན་ནང་དུ་རྒྱ་ནག་གི་བཙན་གནོན་མནར་གཅོད་འོག་མྱོང་བཞིན་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་བ་དང་རྒྱ་རིགས་སོགས་ནས་རྒྱ་གཞུང་གི་བཙན་གནོན་དང་རྒྱལ་མཚམས་ལས་བརྒལ་བའི་དྲག་གནོན་གྱི་ལས་འགུལ་རྣམས་མཚམས་འཇོག་བྱ་དགོས་པ་དང་། དབྱིན་གཞུང་ནས་གནད་དོན་དེ་དག་གི་ཐོག་རྒྱབ་སྐྱོར་གནང་དགོས་པ་སོགས་ཀྱི་འབོད་ཚིག་དང་འབྲེལ་ཞི་བའི་ངོ་རྒོལ་གྱི་ལས་འགུལ་སྤེལ་འདུག
དེ་བཞིན་ཧྥ་རན་སི་བོད་རང་བཙན་སློབ་ཕྲུག་ཚོགས་པ་སོགས་ཚོགས་པ་ཁག་ལྔའི་གོ་སྒྲིག་འོག་པེ་རི་སིར་རྒྱ་ནག་གཞུང་ཚབ་ཁང་གི་མདུན་དུ་ཞི་བའི་སྐད་འབོད་ལས་འགུལ་སྤེལ་བའི་བརྒྱུད་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་སྲུང་བརྩི་ཞུས་འདུག
རྩ་བའི་ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ཧྲིལ་པོ་ ༣༤ འཁོར་བའི་དུས་ཆེན་དང་བསྟུན། བོད་མིའི་གནས་སྡོད་འཛམ་གླིང་ས་ཕྱོགས་གང་སར་ཉིན་མོ་དེ་གཟབ་རྒྱའི་ངང་སྲུང་བརྩི་ཞུས་ཡོད་པ་དེ་ལྟར་ཡང་། བལ་ཡུལ་གནས་སྡོད་འབྲེལ་ཡོད་ཅིག་གི་གནས་ཚུལ་མཁོ་སྤྲོད་གནང་བའི་ནང་། བལ་ཡུལ་ནང་མགོན་པོ་༸གང་ཉིད་མཆོག་གིས་༸སྐུའི་འཁྲུངས་སྐར་གཙོས་པའི་བོད་དོན་ལས་འགུལ་ཁག་ལ་དམ་བསྒྲགས་ཤུགས་ཆེར་བྱེད་བཞིན་ཡོད་པའི་ཁྲོད། ཁ་སང་ཁུལ་དེར་ནོ་སྦེལ་ཞི་བདེའི་གཟེངས་རྟགས་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྟབས་གཅིག་ཏུ་སྲུང་བརྩི་ཞུ་རྒྱུའི་ཐད་སྔར་ལྷག་དམ་བསྒྲགས་ཤུགས་ཆེར་བྱས་ཏེ་བལ་ཡུལ་དོན་གཅོད་གཙོས་པའི་འབྲེལ་ཡོད་བོད་མི་རྣམས་ཀྱི་འགྲོ་འདུག་སྤྱོད་གསུམ་ལ་དམ་བསྒྲགས་ཤུགས་ཆེར་བྱེད་མུས་ཡིན་པ་གསུངས་ཀྱི་འདུག
མ་ཟད་དུས་རྒྱུན་དང་མ་འདྲ་བའི་ས་གནས་ཉེན་རྟོག་པ་མིན་པར་བལ་ཡུལ་དབུས་གཞུང་གི་ཉེན་རྟོག་པས་འཛིན་བཟུང་བྱ་རྒྱུའི་གནས་སྟངས་ཤིག་ཏུ་གྱུར་ཡོད་པ་དང་འབྲེལ། ཁ་སང་བལ་ཡུལ་འཕགས་པ་ཤིང་ཀུན་ཉེ་འདབས་བྲག་དཀར་དགོན་དུ་དེ་འབྲེལ་མཛད་སྒོ་སྲུང་བརྩི་ཞུས་སྐབས་ཞོགས་པ་ཕྱག་ཚོད་ ༨ པའི་ཐོག་བལ་ཡུལ་གཞུང་གི་ཉེན་རྟོག་པ་ཕོན་ཆེན་བསླེབས་ཏེ་བོད་པའི་བུད་མེད་བཞི་འཛིན་བཟུང་གིས་འཕགས་ཤིང་ས་གནས་ཉེན་རྟོག་ཁང་དུ་ཁྲིད་དེ་ཕྱི་དྲོ་བློས་གྲོལ་བཏང་ཟིན་ཡོད་པ་འགྲེལ་བརྗོད་གནང་གི་འདུག
