ཕྱི་ལོ་ ༡༩༨༩ ཟླ་ ༣ ཚེས་ ༨ ཉིན་མོར་བོད་ནང་བོད་མི་རྣམས་ཀྱིས་རྒྱ་ནག་གཞུང་ལ་ངོ་རྒོལ་སླད་ཞི་བའི་རྔམ་སྟོན་གནང་རྗེས་རྒྱ་གཞུང་གིས་བོད་ས་ཡོངས་རྫོགས་སུ་དྲག་པར་དམག་ཁྲིམས་གཞི་བསྡམས་ཏེ་བོད་མི་སེར་སྐྱ་མང་པོ་དམར་བསད་བཏང་བ་དང་ཁྲི་ཚོ་མང་པོ་བཙོན་འཇུག་དང་མནར་གཅོད། དེ་བཞིན་གར་སོང་ཆ་མེད་བཟོས་པ་སོགས་གཞིས་བཞུགས་རྒྱ་ཆེ་མང་ཚོགས་རྣམས་ལ་སྡུག་བསྔལ་མི་བཟོད་པ་བྱུང་བའི་དུས་སྐབས་འདིར་ལོ་ལྟར་བོད་མིའི་སྒྲིག་འཛུགས་ཀྱིས་གཞུང་འབྲེལ་གསུམ་བརྒྱད་མཆོད་འབུལ་སྨོན་ལམ་ཚོགས་གནང་སྲོལ་ཡོད་པ་ལྟར། དེ་རིང་ཐེག་ཆེན་ཆོས་གླིང་གཙུག་ལག་ཁང་དུ་བོད་ནང་གི་རྒྱལ་གཅེས་པ་རྣམས་ལ་བཀའ་དྲིན་རྗེས་དྲན་དང་ཁོང་རྣམ་པའི་རྗེས་ཤུལ་སྐུ་འཁོར་ཡོངས་ལ་སྐྱིད་སྡུག་མཉམ་མྱོང་གིས་གདུང་སེམས་མཉམ་བསྐྱེད། ལྷག་དོན་ཡུཀ་རེན་ནང་གང་མགྱོགས་ཞི་བདེ་སླར་གསོ་ཐུབ་ཕྱིར་གཞུང་འབྲེལ་མཆོད་འབུལ་སྨོན་ལམ་ཚོགས་སོང་། 
དེ་རིང་ཟླ་ ༣ ཚེས་ ༨ ཉིན་གྱི་སྔ་དྲོའི་ཚོུད་ ༩ ཐོག་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མཆོད་འབུལ་སྨོན་ལམ་གྱི་ཚོགས་མགོན་དུ་སྐུ་བཅར་རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེ་མཆོག་དབུ་བཞུགས་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྲི་ཞུ་བ། དེ་བཞིན་སེར་སྐྱ་མང་ཚོགས་བཅས་ཚང་འཛོམས་ཐོག་གཞུང་འབྲེལ་མཆོད་འབུལ་སྨོན་ལམ་ཚོགས་སོང་།
སྐབས་དེར་སྲིད་སྐྱོང་མཆོག་གིས་གསུམ་བརྒྱད་ཀྱི་དུས་ཚིགས་ངོ་སྤྲོད་གནང་བ་དང་སྦྲགས། དེ་རིང་ང་ཚོས་རྒྱ་ནག་གིས་དམག་ཁྲིམས་བསྡམས་པའི་རྐྱེན་གྱིས་རྒྱལ་གཅེས་པ་མང་དག་ཅིག་ལ་ངལ་བ་ཆེས་ཆེར་འཕྲད་པ་དང་དེ་བཞིན་ཚེ་སྲོག་ཤོར་བ་རྣམས་ཀྱི་ཆེད་དུ་རྗེས་དྲན་སྨོན་ལམ་གནང་བ་དང་བསྟུན། ད་ཆ་ཡུཀ་རེན་ནང་གནས་སྟངས་ཛ་དྲག་པོ་ཆགས་པའི་དུས་སྐབས་ཡུཀ་རེན་མང་ཚོགས་དང་སྒོས་དེ་རིང་རྒྱལ་སྤྱིའི་བུད་མེད་ཀྱི་ཉིན་མོ་ཞེས་སྲུང་བརྩི་ཞུ་བཞིན་ཡོད་སྟབས། ཡུཀ་རེན་ནང་གི་བུད་མེད་རྣམས་ལ་ལུས་སེམས་གཉིས་ཀར་སྐུ་ངལ་འཕྲད་བཞིན་པའི་དུས་ཚིགས་གཅིག་ཆགས་ཡོད་པར་བརྟེན་ཁོང་རྣམས་ཀྱི་ཆེད་དུ་ཐུགས་སྨོན་གནང་རོགས་ཞེས་གསུངས་ཡོད། 
གཞི་རྩའི་ཕྱི་ཟླ་ ༣ ཚེས་ ༨ ཉིན་མོ་དེ་ནི། ༡༩༨༩ ལོར་བོད་ཀྱི་རྒྱལ་ས་ལྷ་སར་བོད་མི་ཚོས་རྒྱ་གཞུང་གི་དྲག་པོའི་དབང་སྒྱུར་སྲིད་བྱུས་ལ་མ་བཟོད་པར་ཞི་བའི་རྔམ་སྟོན་གནང་བར་བརྟེན་རྒྱ་གཞུང་གིས་རྒྱལ་ས་ལྷ་སའི་ཕྱོགས་བཞི་མཚམས་བརྒྱད་ལ་དྲག་པོའི་བཀའ་རྒྱ་བསྡམས་ཏེ་བོད་མི་ཚོར་མི་སྤྱོད་ལས་འདས་པའི་དྲག་གནོན་ཅན་གྱི་སྲིད་བྱུས་ལག་བསྟར་བྱས་པའི་དབང་གིས་བོད་མི་མང་པོ་རྐྱེན་འདས་སུ་གྱུར་བའི་ཉིན་མོ་ཞིག་ཡིན་པ་རེད།
