དེ་རིང་སྔ་དྲོ་ཕྱག་ཚོད་དགུ་དང་ཕྱེད་ཀའི་སྟེང་། བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཚོགས་ཁང་གི་དབུས་སུ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། གཞན་ཡང་བཀའ་བློན་རྣམས་དང་མཛད་གཙོ་རྣམས་ལྷན་འཛོམས་ཀྱི་ཐོག སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་གློག་འཕྲུལ་ཡིག་ཚགས་ལས་གཞི་དབུ་འབྱེད་གནང་སོང་།
སྐབས་དེར་སྲིད་སྐྱོང་མཆོག་གིས་ E-Governance ཞེས་པའི་དྲ་ཐོག་ནས་གཞུང་འཛིན་སྐྱོང་བྱེད་རྒྱུ་དེ་རྩ་བའི་ལས་གཞི་ཆེན་པོ་ཞིག་ཡིན་ཡང་། དེ་རིང་ལས་གཞི་དེའི་ཆ་ཤས་སུ་བོད་མིའི་སྒྲིག་འཛུགས་ཀྱི་ལས་ཁུངས་ཕན་ཚུན་བར་གྱི་ཡིག་འབྲེལ་རིགས་རྣམས་E-Filling ཞེས་དྲ་ཐོག་ནས་བརྗེ་ལེན་བྱེད་རྒྱུའི་ལས་གཞི་ཞིག་དབུ་འཛུགས་གནང་གི་ཡོད་པར་འགྲེལ་བརྗོད་ཀྱིས། དེ་ཙམ་མ་ཡིན་པར་བཞུགས་སྒར་ཁུལ་གྱི་སྣེ་ལེན་ཁང་གི་ས་ཆའི་ཆ་ཤས་ཤིག་ཏུ་ཕྱི་ལོ་ ༡༩༥༩ ནས་ ༢༠༢༢ བར་གྱི་གཞུང་འབྲེལ་གྱི་ཡིག་ཚགས་གང་ཡོད་པ་མཐའ་ཐག་གློག་པར་སྐྱོན་ནས་སྡེ་ཚན་སོ་སོར་དབྱེ་བ་བྱས་ཏེ་གློག་འཕྲུལ་གྱི་ཡིག་ཚགས་ཀྱི་ངོ་བོར་གསོག་ཉར་བྱེད་རྒྱུ་ཡིན་པར་གསུངས་སོང་།
གཞན་ཡང་སྲིད་སྐྱོང་མཆོག་གིས་བོད་མི་རྣམས་ཀྱི་ངོས་ནས་དུས་རྒྱུན་ནས་ཕྱི་ལོགས་ཀྱི་རོགས་དངུལ་ཁོ་ནར་སྒུར་ནས་འདུག་རྒྱུ་དེ་མིན་པར། ད་ལྟའི་བར་དུ་རང་གི་བྱེད་ལས་ཀྱི་ཉམས་མྱོང་དང་རིག་པ་གཞི་ལ་བཞག་ནས་རང་འགན་རང་འཁྲིའི་ལས་གཞི་འགོ་འཛུགས་བྱེད་རྒྱུ་དེ་གལ་ཆེན་པོ་ཡིན་པར་ངོ་སྤྲོད་ཀྱིས། བོད་མིའི་སྒྲིག་འཛུགས་ཀྱི་ཀམ་པུ་ཊར་སྡེ་ཚན་ལ་ཡང་དེ་དོན་སྔར་ལོ་ནས་རེ་སྐུལ་བྱས་པ་ལྟར་ད་ཆ་གློག་འཕྲུལ་ཡིག་ཚགས་ཀྱི་ལས་གཞི་དེ་ལེགས་འགྲུབ་བྱུང་ཡོད་པ་ལྟར། ག་ལེར་བོད་མིའི་སྒྲིག་འཛུགས་གཅིག་པོ་ཙམ་མིན་པར། དོན་གཅོད་ཁག་དང་ས་གནས་ཆེ་ཁག་གི་ས་གནས་འགོ་འཛིན་ལས་ཁུངས་ཁག་ཏུ་ཡང་ལས་གཞི་དེ་ལག་བསྟར་བྱེད་འཆར་ཡོད་པར་གསུངས་སོང་།
སྐབས་དེར་འདི་གའི་གསར་འགོད་པས་ཀམ་པུ་ཊར་སྡེ་ཚན་གྱི་ལས་གཞི་འདིར་འགན་གཙོ་བོ་བཞེས་མཁན་གྱི་ཆེད་ལས་བ་ཀུན་དགའ་འཇིགས་མེད་ལགས་སུ་ལས་གཞི་དེ་ལག་བསྟར་བྱས་པ་ཡིན་ན་གཞུང་ཡིག་རྣམས་ཀྱི་བདེ་འཇགས་དང་འབྲེལ་ནས་ཉེན་ཁ་ཡོད་མེད་ཀྱི་ཐད་ནས་བཀའ་འདྲི་ཞུས་པར་ཁོང་གིས། ཐེངས་འདིའི་གློག་འཕྲུལ་གྱི་ཡིག་ཚགས་དང་འབྲེལ་བའི་མཉེན་ཆོས་དེ་ནི་ Internate འམ་དྲ་རྒྱ་དང་འབྲེལ་བ་མེད་པ་ཞིག་ཡིན་པ་མ་ཟད། ཡིག་ཚགས་ཀྱི་སྒྲོམ་གཞི་ཚང་མ་ཚད་མཐོ་བོ་བཟོ་སྐྲུན་བྱས་ཡོད་པ་དང་། ཕྱི་ལོགས་ཀྱི་འཕྲུལ་ལས་ཆེད་མཁས་བར་ཡང་རྟོག་ཞིབ་ཀྱི་ཆེད་དུ་ཕུལ་ཡོད་པ་ཞིག་ཡིན་པར་ངོ་སྤྲོད་ཀྱིས། ཕྱི་ལོགས་ཀྱི་དྲ་རྒྱ་གཏོར་རྒོལ་གྱི་ཉེན་ཁ་ཉུང་ཉུང་ཡིན་པ་ལྟར་དེ་ལ་ལྟ་རྟོག་བྱེད་རྒྱུ་ཡང་གང་གཟབ་བྱེད་རྒྱུ་ཡིན་སྟབས་བདེ་འཇགས་ཀྱི་ཆ་ནས་ཉེན་ཁ་དེ་ཙམ་མེད་པ་ཞིག་ཡིན་པར་ངོ་སྤྲོད་གནང་སོང་།
གཞན་ཡང་སྲིད་སྐྱོང་མཆོག་གིས་དེ་རིང་གི་ལས་གཞི་དེ་དང་འབྲེལ་ནས་འབྲེལ་ཡོད་ཀྱི་བཀའ་བློན་དང་དྲུང་ཆེ་རྣམས་ཀྱིས་འགན་གཙོ་བཞེས་ཀྱི་ཐོག་ནས་ལས་གཞི་དེ་ལག་བསྟར་ཡོང་ཐབས་ལ་འབད་བརྩོན་ལྷུར་ལེན་གནང་དགོས་བའི་རེ་སྐུལ་གནང་བ་མ་ཟད། ད་ལྟའི་བར་ལས་དོན་བྱེ་བྲག་ཞིག་གི་སྒང་ལ་ཆེད་མཁས་བ་ཞིག་དགོས་ཟེར་དུས་ཕྱི་ལོགས་ནས་ཆེད་དུ་གདན་ཞུས་ཀྱི་གླ་དངུལ་ཆེན་པོ་སྤྲོད་དགོས་བའི་གནས་སྟངས་ཤིག་ཆགས་ཡོད་པ་དེར་བློ་འཚབ་ཀྱིས། མ་འོངས་བར་སྲི་ཞུ་ལས་བྱེད་རྣམས་ཀྱི་ནང་དུ་ཡང་རང་གི་ཉམས་མྱོང་ལ་གཞིགས་ནས་ལས་དོན་བྱེ་བྲག་གི་སྒང་ལ་ཉམས་མྱོང་དང་ཤེས་ཚད་མཐོ་བར་ཡོང་རྒྱུར་འབད་བརྩོན་གནང་དགོས་བ་དེ་ཧ་ཅང་གི་གལ་ཆེན་ཡིན་པའི་གཞེན་སྐུལ་གནང་སོང་།
