དེ་རིང་ཟླ་ ༢ ཚེས་ ༡༥ ཉིན་ཝཱ་ཎ་བོད་ཀྱི་གཙུག་ལག་སློབ་གཉེར་ཁང་དུ་རྒྱ་གར་ནང་གི་མཐོ་སློབ་ཁག་འདྲ་མིན་ ༢༣ ནང་གི་བོད་རིགས་སློབ་མའི་སྐུ་ཚབ་སློབ་ཕྲུག་ ༡༠༠ ལྷག་འདུ
་འཛོམས་ཀྱིས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་ ༡༡ དབུ་འཛུགས་གནང་འདུག
བོད་རིགས་སློབ་མའི་ཚོགས་ཆེན་དེ་དེ་རིང་ནས་མགོ་འཛུགས་ཀྱིས་ཚེས་ ༢༡ བར་ཚོགས་ཀྱི་ཡོད་པ་དང་། ཐེངས་འདིའི་བོད་རིགས་སློབ་མའི་ཚོགས་ཆེན་གྱི་གླེང་བརྗོད་གཙོ་བོ་ནི། དེང་གི་བོད་རིགས་མཐོ་རིམ་སློབ་མའི་རེ་བ་དང་གནས་སྟངས་ཞེས་པ་དེ་ཆགས་ཀྱི་འདུག ཚོགས་ཆེན་དེའི་རིང་སློབ་མ་ཚོས་གྲོས་གཞི་དོན་ཚན་ཁག་བཞིའི་ཐོག་ཕན་ཚུན་དབར་ལ་གོ
་བསྡུར་གནང་རྒྱུ་དང་། བཙན་བྱོལ་སློབ་གྲྭ་ཁག་ནང་གི་གཞི་རིམ་གོང་འོག་གི་དགེ་རྒན་གྱི་སྤུས་ཚད་གོང་མཐོ་གནང་ཐབས། འབུམ་རམས་སློབ་མའི་མཐུན་རྐྱེན་དང་མདུན་ལམ་སྐོར། ཝཱཎ་དང་སྨན་རྩིས་ཁང་སོགས་ཀྱི་མཐོ་རིམ་སློབ་མའི་འབྲེལ་ལམ་ཁྲོད་ལ་བོད་ཡིག་མཐོ་རིམ་སློབ་གསོའི་མ་ལག་ཞིག་བསྐྲུན་ཐབས། དེ་བཞིན་བོད་མི་མང་སྤྱི་འཐུས་ལྷན་ཚོགས་སུ་ཆོས་བརྒྱུད་ཀྱི་སྤྱི་འཐུས་དགོས་མིན་གྱི་གནད་དོན་བཅས་གྲོས་གཞི་དོན་ཚན་ཁག་བཞི་ཆགས་ཀྱི་འདུག ཚོགས་ཆེན་དེའི་ཚོགས་བཅར་བར་གཞིགས་ན། རྒྱ་གར་མཐོ་སློབ་ཁག་དུ་སློབ་གཉེར་གནང་བཞིན་པའི་བོད་ཕྲུག་སློབ་མ་དང་། ཝཱ་རཱ་ཎ་སཱི་བོད་ཀྱི་གཙུག་ལག་སློབ་གཉེར་ཁང་། སྨན་རྩིས་ཁང་མཐོ་སློབ། ས་རཱ་མཐོ་སློབ། ཏཱ་ལའི་བླ་མ་མཐོ་སློབ། ཤེས་རབ་དགའ་ཚ
ལ་སློབ་གླིང་། དགོན་སྡེ་ཁག་གི་དགེ་བཙུན་སློབ་གཉེར་བ་སོགས་ཤེས་ཡོན་སྡེ་ཚན་ཁག་མི་འདྲ་ ༢༣ གྱི་སློབ་མའི་སྐུ་ཚབ་འདུ་འཛོམས་བྱུང་ཡོད་པ་རེད།
རྩ་བའི་བོད་རིགས་མཐོ་རིམ་སློབ་མའི་ཚོགས་ཆེན་དེ་ཐོག་མར་ཕྱི་ལོ་ ༢༠༠༦ ལོར་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གིས་མཐོ་རིམ་སློབ་མར་ཟབ་སྦྱོང་གནང་སྐབས་དེའི་ཐོག་བཅར་བའི་རྒྱ་གར་ནང་གི་མཐོ་སློབ་ཁག་ཏུ་བསྐྱོད་བཞིན་པའི་བོད་རིགས་མཐོ་རིམ་སློབ་མ་ཁག་ཅིག་གིས་བོད་ཕྲུག་མཐོ་རིམ་སློབ་མ་རང་གི་ཚོགས་ཆེན་ཞིག་ཚོགས་ཐུབ་ཚེ་དགེ་མཚན་ཆེན་པོ་ཡོད་སྐོར་བསམ་ཚུལ་བྱུང་དོན་ལྟར། ཚོགས་ཆེན་ཐེངས་དང་པོ་རྒྱ་གར་ལྷོ་ཕྱོགས་མེག་ལོར་དུ་ཚོགས་ཡོད་པ་དང་། དེ་ནས་རིམ་པས་རྒྱ་གར་ནང་གི་བོད་རིགས་སློབ་མ་ཡོད་སའི་ས་གནས་ཁག་ཏུ་རེ་མོས་ཀྱིས་གོ་སྒྲིག་ཞུས་མུས་ཡིན་པ་རེད། བོད་རིགས་མཐོ་རིམ་སློབ་མའི་ཚོགས་ཆེན་གྱི་འབོད་སྒྲ་ནི་རང་ངོ་རང་ཤེས་དང་རང་འགན་རང་ཁུར་ཞེས་པ་དེ་ཡིན་པ་རེད།
