ཁ་སང་ཟླ་ ༦ ཚེས་ ༢༦ ཉིན་ BBC གསར་ཁང་གི་ལྷོ་ཨེ་ཤ་ཡའི་ས་གནས་གསར་འགོད་པ་ལྕམ་ Rajini Vaidyanathan ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་འདྲི་ཞུས་པའི་སྐར་མ་གསུམ་དང་ཕྱེད་ཀ་ལྷག་ཙམ་ཡོད་པའི་བརྙན་ཐུང་ཞིག་འདོན་སྤེལ་གནང་འདུག
བཀར་འདྲིའི་ནང་གསར་འགོད་པས་མགོན་པོ་༸གང་ཉིད་མཆོག་བོད་ལ་ཕྱིར་ཕེབས་རྒྱུའི་ཐུགས་རེ་ཆད་པ་ཡིན་ནམ་ཞེས་བཀའ་འདྲི་ཞུ་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་དེ་ལྟར་ཆད་མེད་ཅེས་བཀའ་ལན་བསྩལ་བ་དང་འབྲེལ། གཞིས་ལུས་བོད་མི་ཚོས་ངོས་རང་ལ་ཡིད་ཆེས་ཆེན་པོ་བྱེད་ཀྱི་ཡོད་པ་དང་། ལྷག་པར་དུ་རྒན་རྒོན་མང་པོས་མིག་ནས་མཆི་མ་ལྷུང་བཞིན་ངོས་རང་བོད་ལ་ཕེབས་རྒྱུའི་གསོལ་འདེབས་ཞུ་ཡི་འདུག་ཅེས་བཀའ་ལན་མཛད་འདུག
གསར་ཁང་དེས་གཞིས་ལུས་བོད་མིའི་རེ་བ་བཞིན་དངོས་སུ་ཇི་ལྟར་གྲུབ་ཐུབ་བམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་ད་ཆ་རྒྱ་ནག་གཞུང་དེར་འགྱུར་བ་འགྲོ་བཞིན་ཡོད་པ་རེད་ཅེས་བཀའ་ལན་བསྩལ་འདུག 
བྷི་བྷི་སི་བཀའ་འདྲིའི་ནང་ཨ་རིའི་སྲིད་འཛིན་ཊམ་དང་འབྲེལ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་འཛིན་ཊམ་ནི་དཀའ་རྙོག་ཅན་ཞིག་ཡོད་པ་ནི་བཟང་སྤྱོད་ཀྱི་ཆ་ནས་མ་འདང་བ་ཞིག་ཡིན་པ་དང་། དེ་སྔ་ཁོང་ཐོག་མར་སྲིད་འཛིན་ཆགས་པའི་སྐབས་སུ་ཨ་རིའི་རྒྱལ་ཁབ་དེ་ཨང་དང་པོར་བཟོ་རྒྱུའི་གཏམ་བཤད་གནང་ཡོད་པ་ནི་ནོར་འཁྲུལ་ཞིག་ཡིན་པ་དང་། ཨ་རིའི་ངོས་ནས་གོ་ལ་སྤྱིར་སྨན་པའི་ཐུགས་འཁུར་བཞེས་དགོས་པ་ལམ་སྟོན་བསྩལ་ཡོད་པ་རེད།
གཞན་ཡང་སྐྱབས་བཅོལ་བའི་གནད་དོན་དང་འབྲེལ་༸གོང་ས་མཆོག་གིས་ཡུ་རོབ་མཐུན་ཚོགས་ཀྱི་སྒྲོམ་གཞིར་ཡི་རངས་བསྔགས་བརྗོད་དང་ཐུགས་མོས་གནང་བཞིན་ཡོད་ཅེས་བཀའ་བསྩལ་བ་དང་ཆབས་ཅིག ཡོ་རོབ་ནང་གི་རྒྱལ་ཁབ་ཚོས་ངེས་པར་དུ་སྐྱབས་བཅོལ་བ་དེ་དག་དང་བཞེས་གནང་དགོས་པ་དང་ཁོང་ཚོར་ཤེས་ཡོན་སློབ་གསོ་སྤྲད་ནས་ཕྱིར་རང་ཡུལ་ལ་ལོག་ཐུབ་རྒྱུའི་དམིགས་ཚད་བཟུང་དགོས་པ་སོགས་ལམ་སྟོན་མཛད་འདུག
