བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་སྣེ་ཁྲིད་པའི་བཀའ་ཤག་སྐབས་ ༡༥ པའི་ལས་ཡུན་རྫོགས་ལ་ཉེ་བ་དང་བསྟུན། སྲིད་སྐྱོང་མཆོག་གིས་ཟླ་བ་འདིའི་ཚེས་ ༣ ནས་རྒྱ་གར་ལྷོ་ཕྱོགས་ཀྱི་བོད་མིའི་གཞི་ཆགས་ཁག་ལ་སྐོར་བསྐྱོད་དང་སྦྲགས་མི་མང་རྣམས་ལ་ཐུགས་རྗེ་ལེགས་འབུལ་ཞུ་བཞིན་པ་ལྟར། ཁོང་ཐོག་མར་ཀོ་ལེ་གྷལ་དོན་ལྡན་གླིང་དང་དེའི་རྗེས་ཧུན་སུར་རབ་རྒྱས་གླིང་བཅས་སུ་ཆེད་ཕེབས་ཀྱིས་བོད་མི་གང་མང་ཐུག་འཕྲད་གནང་ནས་གཏམ་བཤད་གནང་ཡོད་པ་མ་ཟད། ཁ་སང་སྔ་དྲོ་ཕྱག་ཚོད་ ༡༡ ཙམ་ལ་སྦེལ་ཀོབ་གཞིས་ཆགས་སུ་ཕེབས་འབྱོར་གྱིས་གཞུང་དང་གཞུང་འབྲེལ་མིན་པའི་ཚོགས་པ་ཁག་དང་ས་གནས་ཀྱི་ལྷ་མོ་ཚོགས་པས་སྣེ་ལེན་གཟབ་རྒྱས་ཞུས་སོང་།
སྲིད་སྐྱོང་མཆོག་གིས་ཐོག་མར་བོད་ཁྱིམ་དང་སམ་བྷོ་ཊའི་སློབ་ཕྲུག་རྣམས་ལ་གསུང་བཤད་གནང་བ་མ་ཟད། ཉིན་རྒྱབ་དགོན་སྡེ་ཁག་ལ་གནས་གཟིགས་དང་ཕྱི་དྲོ་ཕྱག་ཚོད་༦ པའི་ཐོག་སེ་ར་བླ་སྤྱིའི་མདུན་ཐང་དུ་དགེ་འདུན་པ་རྣམས་ལ། མང་ཚོགས་ཀྱིས་ཁོང་ལ་ཆབ་སྲིད་ཀྱི་འགན་བསྐུར་བ་བཞིན། ཁོང་གིས་ཞབས་འདེགས་གང་ཐུབ་ཞུས་པའི་ལས་དོན་ཆེ་ཁག་སྙན་གསེང་དང་། ལྷག་པར་ཁོང་གིས་སྲིད་སྐྱོང་གནང་བའི་དུས་ཡུན་ཁྲོད་ཤེས་ཡོན་དང་དཔལ་འབྱོར། གཞིས་ཆགས་ཡར་རྒྱས་བཅས་གང་ཅིའི་ཐད་ལ་འཕེལ་རྒྱས་ཆེན་པོ་ཕྱིན་ཡོད་པར་བསྒྲགས་སོང་།
སྲིད་སྐྱོང་མཆོག་གིས་སྐབས་དེར་། ཕྱི་ལོ་ ༢༠༢༠ ལོའི་ལོ་མཇུག་ཏུ་ཨ་རིའི་སྲིད་འཛིན་མཆོག་གིས་མཚན་རྟགས་བཀོད་པ་དང་འབྲེལ་ཡུལ་དེའི་ཁྲིམས་སུ་བཅས་པའི་ཨ་རིའི་གཞུང་གི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གྱི་སྔ་རྗེས་ཀྱི་བརྒྱུད་རིམ་ངོ་སྤྲོད་གནང་བ་དང་འབྲེལ། དེ་སྔ་ང་ནི་བོད་མི་གཅིག་པོས་ངོས་འཛིན་གནང་བའི་སྲིད་སྐྱོང་ཞིག་ཡིན་ནའང་། ཨ་རིས་ཁྲིམས་གཞི་དེ་གཏན་འབེབས་གནང་བ་ནས་བཟུང་སྟེ་ང་ནི་ཨ་རི་གཞུང་ནས་ངོས་འཛིན་གནང་བའི་སྲིད་སྐྱོང་ཞིག་ཆགས་ཡོད་ཅེས་གསུངས་བ་དང་ཆབས་ཅིག མ་འོངས་པར་ཁོང་གི་ལས་ཡུན་ཚང་བའི་རྗེས་སུ་སྲིད་སྐྱོང་གསར་པ་སུ་ཕེབས་ཀྱང་ཕྱག་ལས་གནང་བར་སྟབས་བདེ་པོ་བཟོས་ཡོད་སྐོར་གསུང་སོང་།
མ་ཟད་ཉེ་བའི་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག་སྐོར་ལ་གསུང་བཤད་གནང་བ་དང་འབྲེལ་ད་སྐབས་རྒྱ་གར་དང་ཞི་བདེ་རྒྱ་མཚོའི་ཐབས་བྱུས་ནང་བོད་ཀྱི་གནད་དོན་དེ་ ཚུད་ཐུབ་ཡོད་སྐོར་འགྲེལ་བརྗོད་གནང་སོང་། སྲིད་སྐྱོང་མཆོག་གིས་ད་དུང་དེ་རིང་རྒྱལ་བའི་ཕོ་བྲང་ཁུལ་དུ་སྦེལ་ཀོབ་གཞིས་ཆགས་གསར་རྙིང་གཉིས་ཀྱི་མང་ཚོགས་ལ་གཏམ་བཤད་གནང་ཡོད་པ་དང་། སྦེལ་ཀོབ་ཀྱི་གཏམ་བཤད་ཀྱི་རྗེས་སུ་མོན་གྷོ་འདོད་རྒུ་གླིང་ལ་ཕེབས་ཀྱི་ཡོད་པ་རེད།
