ཁྱོན་བོད་མི་ ༡༥༠༠ ལྷག་ཁ་ཐོར་དུ་གནས་ཡོད་པའི་དབྱིན་ཡུལ་ས་གནས་འོས་བསྡུ་ལས་ཁང་ཁྱབ་ཁོངས་དབྱིན་ཡུལ་གཙོས་ནོར་ཝེ་དང་ཨར་ལེཊ། པོ་ལན་ཌི། ཌན་མག དེ་བཞིན་སུ་ཌན་བཅས་ཡོ་རོབ་རྒྱལ་ཁབ་དྲུག་ནང་གི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་དངོས་གཞིའི་འོས་བསྡུའི་གྲུབ་འབྲས་ཁ་སང་ཕྱི་ཚེས་ ༡༣ ཉིན་ཕྱི་དྲོ་དབྱིན་ཡུལ་སྐུ་ཚབ་དོན་གཅོད་དང་ས་གནས་འོས་བསྡུའི་འགན་འཛིན་གཅིག་ལྕོགས་བསོད་ནམས་ཚེ་རིང་ཕར་སི་ལགས་ཀྱིས་དྲ་ཐོག་ནས་གསལ་བསྒྲགས་གནང་སོང་།
གོང་གསལ་ཡོ་རོབ་རྒྱལ་ཁབ་དྲུག་གནང་གི་ནང་གི་དངོས་གཞིའི་སྲིད་སྐྱོང་གི་འོས་མིའི་འོས་གྲངས་ཕྱོགས་བསྡོམས་ཀྱི་གྲུབ་འབྲས་ལ་གཞིགས་ན། ཚོགས་ཟུར་སྐུ་ཞབས་སྤེན་པ་ཚེ་རིང་ལགས་སུ་དབྱིན་ཡུལ། ༡༡༥ ནོར་ཝེ།༣ ཨར་ལེཊ། ༡༤ པོ་ལན་ཌི། ༥ ཌན་མག ༥ དེ་བཞིན་སུ་ཌན་ ༡༦ བཅས་ཁྱོན་ ༡༥༨ ཐོབ་འདུག དེ་བཞིན་ དོན་ཟུར་སྐུ་ཞབས་དབུ་དཀར་ཚང་སྐལ་བཟང་རྡོ་རྗེ་ལགས་སུ་དབྱིན་ཡུལ། ༩༩ ནོར་ཝེ། ༢༩ ཨར་ལེཊ། ༡༦ པོ་ལན་ཌི། ༤ ཌན་མག ༨ དེ་བཞིན་སུ་ཌན་༡༡ བཅས་ཁྱོན་ ༡༦༧ བཅས་ཐོབ་འདུག
གོང་གསལ་ཡོ་རོབ་རྒྱལ་ཁབ་ཁག་ནས་ཐེངས་འདིའི་ཡོ་རོབ་དང་ཨ་ཧྥི་རི་ཀའི་ཁུལ་གྱི་དངོས་གཞིའི་སྤྱི་འཐུས་འོས་མི་རྣམ་པའི་འོས་ཐོབ་ལ་གཞིགས་ན། སྤྱི་འཐུས་འོས་མི་ཐུབ་བསྟན་དབང་ཆེན་ལགས་སུ་འོས་གྲངས། ༢༢༩ ཐུབ་བསྟན་རྒྱ་མཚོ་ལགས་སུ་འོས་གྲངས། ༡༢༦ གངས་གཞོན་ཚང་བློ་བཟང་ལགས་སུ་འོས་གྲངས། ༡༡༢ དེ་བཞིན་བཀྲིས་བདེ་ལགས་སུ་འོས་གྲངས། ༡༠༡ བཅས་ཐོབ་འདུག
རྩ་བའི་དབྱིན་ཡུལ་ས་གནས་འོས་བསྡུ་ལས་ཁངས་ཁྱབ་ཁོངས་ཡོ་རོབ་རྒྱལ་ཁབ་དྲུག་ནས་ཐེངས་འདིའི་སྲིད་སྤྱི་གཉིས་ཀྱི་དངོས་གཞིའི་འོས་བསྡུ་ནང་དུ་མི་མང་ཁྱོན་ ༣༣༧ ནས་འོས་བསྡུའི་དེབ་སྐྱེལ་གནང་ཡོད་པ་དང། དངོས་སུ་མང་ཚོགས་༣༢༥ འོས་འཕངས་ཡོད་པ་བཅས་མང་ཚོགས་བརྒྱ་ཆ་ ༨༦ གིས་འོས་བསྡུའི་ཆ་ཤས་བཞེས་འདུག
