ཨ་རི་དང་ཐེ་ཝན་གཉིས་ཀྱི་ཚོང་འབྲེལ་དང་འཕྲོད་བསྟེན་ལས་གཞི་སོགས་རྒྱ་སྐྱེད་ལ་དམིགས་ཏེ་ཉེ་ཆར་རེས་གཟའ་ཉི་མའི་ཉིན་ཨ་རིའི་འཕྲོད་བསྟེན་དྲུང་ཆེ་སྐུ་ཞབས་ Alex Azar མཆོག་ཐེ་ཝན་ནང་གཞུང་འབྲེལ་འཚམས་གཟིགས་སུ་ཕེབས་སྐབས་ཡུལ་དེའི་ཕྱི་སྲིད་བློན་ཆེན་གཞོན་པ་ Tien Chung-kwang ལགས་ནས་དགའ་བསུའི་སྣེ་ལེན་ཞུས་པ་མ་ཟད། ཁ་སང་སྲིད་འཛིན་ Tsai Ing-wen མཆོག་དང་མཇལ་འཕྲད་ཀྱིས་གསར་འགོད་ལྷན་ཚོགས་སོགས་གནང་ཡོད་པ་རེད། 
གཞི་རྩའི་ད་རེས་ཨ་མི་རི་ཀའི་འཕྲོད་བསྟེན་དྲུང་ཆེ་སྐུ་ཞབས་ Alex Azar མཆོག་ཐེ་ཝན་ནང་གཞུང་འབྲེལ་འཚམས་གཟིགས་སུ་ཕེབས་པ་ནི་ཕྱི་ལོ་ ༡༩༧༩ རྗེས་སུ་ཨ་རིའི་ཆེས་མཐོའི་སྐུ་ཚབ་ཐེ་ཝན་ནང་ཕེབས་པ་ཐེངས་དང་པོ་དེ་ཆགས་ཀྱི་ཡོད་པ་དང་། ཁོང་གིས་གསར་འགོད་ལྷན་ཚོགས་ཐོག་སྐུ་ཞབས་ Alex Azar ལགས་ནས་སྲིད་འཛིན་ Tsai Ing-wen མཆོག་གིས་དབུས་པའི་ཐེ་ཝན་མང་ཚོགས་ནས་དགའ་བསུའི་སྣེ་ལེན་ཞུས་པར་ཐུགས་རྗེ་ཆེ་ཞུས་པ་དང་སྦྲགས། ཨ་རིའི་སྲིད་འཛིན་སྐུ་ཞབས་ Donald Trump མཆོག་ནས་ཐེ་ཝན་རྒྱལ་ཁབ་ལ་རྒྱབ་སྐྱོར་ཤུགས་ཆེ་གནང་བཞིན་ཡོད་པ་མ་ཟད་ཨ་རིའི་ངོས་ནས་ཐེ་ཝན་གྱི་མང་ཚོགས་དང་ཕྱི་གསལ་ནང་གསལ་ཐོག་ལས་དོན་གནང་བཞིན་པར་བསྔགས་བརྗོད་ཞུ་བཞིན་ཡོད་ཅེས་གསུངས་འདུག ལྷག་པར་དུ་སྐུ་ཞབས་མཆོག་ནས་ཏོག་དབྱིབས་རིམས་ནད་ཀྱི་དུས་སྐབས་འདིར་ཐེ་ཝན་ཕྱོགས་ནས་འབད་བརྩོད་གང་ཐུབ་གནང་བ་དང་བསྟུན་རིམས་ནད་སྔོན་འགོག་གི་ལས་དོན་ཚགས་ཚུད་གནང་བར་ཡི་རངས་བསྔགས་བརྗོད་དང་། ཨ་རི་དང་ཐེ་ཝན་གཉིས་ཀྱི་འབྲེལ་བ་འདི་བཞིན་དུས་ནས་དུས་སུ་ཇེ་བཟང་དུ་འགྲོ་བཞིན་ཡོད་སྐོར་གསུངས་འདུག
སྐབས་དེར་ཐེ་ཝན་གྱི་སྲིད་འཛིན་ Tsai Ing-wen མཆོག་གིས་ཨ་རིའི་སྐུ་ཚབ་མཆོག་གི་འཚམས་གཟིགས་བརྒྱུད་ནས་ཐེ་ཝན་དང་ཨ་རི་གཉིས་ཀྱི་དབར་རིམས་ནད་སྔོན་འགོག་ཙམ་མིན་པར་གཉན་རིམས་དང་འབྲེལ་བའི་ཉམས་ཞིབ་དང་སྨན་སྦྱོར་གྱི་ལས་དོན་ཁག་གོང་མཐོར་གཏོང་ཐུབ་པ་མ་ཟད། ཞི་བདེ་རྒྱ་མཚོའི་མངའ་ཁུལ་གྱི་བདེ་འཇགས་ལས་དོན་སོགས་ཀྱི་ཐོག་མཉམ་ལས་ཐུབ་རྒྱུའི་གོམ་སྟབས་ཆེན་པོ་ཞིག་ཀྱང་རེད་ཅེས་གསུངས་འདུག
ལྷག་པར་དུ་སྲིད་འཛིན་མཆོག་ནས་དེ་སྔ་ཨ་རི་སྲིད་གཞུང་ནས་ཐེ་ཝན་འདི་འཛམ་གླིང་འཕྲོད་བསྟེན་སྒྲིག་འཛུགས་ཁོངས་སུ་ཚུད་རྒྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག རྒྱ་ནག་ཕྱོགས་ནས་གནད་དོན་དེ་ཆབ་སྲིད་དང་འབྲེལ་བ་བཏགས་ཏེ་ད་བར་སྐྱོན་བརྗོད་བྱེད་བཞིན་པ་དེ་ནི་རྒྱལ་སྤྱིའི་འཕྲོད་བསྟེན་ཐོབ་ཐང་གི་གཞི་རྩའི་རྩ་འཛིན་དང་ཡོངས་སུ་འགལ་བ་རེད་ཅེས་གསུངས་འདུག
ཐེངས་འདིའི་ཨ་རིའི་ཆེས་མཐོའི་སྐུ་ཚབ་ཐེ་ཝན་ནང་འཚམས་གཟིགས་སུ་ཕེབས་པ་དང་བསྟུན། རྒྱ་ནག་ཕྱོགས་ནས་ཐེ་ཝན་གྱི་མཁའ་དབྱིངས་སུ་དམག་འཐབ་གནམ་གྲུ་བཏང་སྟེ་འཇིགས་སྐུལ་རིགས་བྱས་པ་མ་ཟད་ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་རྒྱ་ནག་ཕྱོགས་ནས་དེ་སྔ་ནས་ཨ་རི་དང་ཐེ་ཝན་དབར་གཞུང་འབྲེལ་གྲོས་མོལ་ཡོངས་རྗོགས་ལ་འགག་པ་བྱེད་བཞིན་ཡོད་པ་དང་། ལྷག་པར་དུ་ཐེ་ཝན་གྱི་གནད་དོན་དེ་ནི་རྒྱ་ནག་གི་ཚོར་བ་རྣོ་བའི་གནད་དོན་ཞིག་ཡིན་སྟབས་ཨ་རིའི་ངོས་ནས་ཀྱང་རྒྱ་ནག་གཅིག་གི་སྲིད་བྱུས་ལ་བརྩི་སྲུང་ཞུས་ཏེ་ཨ་རྒྱ་གཉིས་ཀྱི་འབྲེལ་བ་དམ་ཟབ་ལ་འབད་དགོས་ཞེས་བརྗོད་འདུག
ཐེངས་འདིའི་ཨ་རིའི་ཆེས་མཐོའི་སྐུ་ཚབ་ཐེ་ཝན་དུ་ཕེབས་པ་དང་འབྲེལ་ནས་དཔྱད་ཞིབ་པ་ཁག་ཅིག་ནས་འཚམས་གཟིགས་འདིས་ཨ་རི་དང་ཐེ་ཝན་དབར་འབྲེལ་བ་ཇེ་བཟང་དུ་འགྲོ་ངེས་ཡིན་སྐོར་གསུང་མཁན་འདུག་པ་དང་། ཡང་ལ་ལས་འདི་ནི་ཨ་རི་སྲིད་གཞུང་གིས་ཐེ་ཝན་སྤྱོད་ནས་རྒྱ་ནག་ལ་ཁ་གཏད་གཅོག་རྒྱུ་དང་། ལྷག་པར་དུ་སྲིད་འཛིན་ཊམ་མཆོག་གིས་ཏོག་དབྱིམས་རིམས་ནད་སྔོན་འགོག་ཐད་འཐུས་ཤོར་བྱུང་བ་རྣམས་སྦས་གསང་བྱེད་བཞིན་ཡོང་ལ་ཉེ་བའི་ཨ་རིའི་འོས་བསྡུའི་ལས་རིམ་ལ་ཁེ་ཕན་ཡོང་ཕྱིར་གནང་བ་རེད་སོགས་གསུང་མཁན་འདུག
རྩ་བའི་ཐེངས་འདིའི་ཨ་རིའི་འཕྲོད་བསྟེན་དྲུང་ཆེ་སྐུ་ཞབས་ Alex Azar མཆོག་ཐེ་ཝན་ནང་འཚམས་གཟིགས་གནང་བའི་ཁྲོད་ཐེ་ཝན་འཕྲོད་བསྟེན་བློན་ཆེན་དང་ལྷན་དུ་འཕྲོད་བསྟེན་ལས་དོན་ཐོག་མཉམ་ལས་གནང་རྒྱུའི་གྲོས་མཐུན་ཁག་ཅིག་བཞག་གནང་ཡོད།
