དེ་རིང་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐེངས་ ༦༤ དང་བསྟུན་རྒྱ་གར་ལྷོ་ཕྱོགས་བོད་མི་རྣམས་ཀྱིས་སེམས་ཚོར་དྲག་པོས་ཉིན་མོ་དེ་སྲུང་བརྩི་ཞུས་སོང་།
སྦེལ་ཀོབ་དང་ཀོ་ལེ་གྷལ། ཧོན་སུར་ས་གནས་བུད་མེད་ལྷན་ཚོགས་དང་དབུ་མའི་ལམ་བོད་ཀྱི་གཞོན་ནུ་ལྷན་ཚོགས་ཀྱིས་འགོ་ཁྲིད་པའི་ཐོག་ས་གནས་ཀྱི་རྒྱུན་ལས་རྣམས་ཀྱིས་ཟླ་ ༣ ཚེས་ ༩ དབུ་འཛུགས་གནང་སྟེ་མེ་སོར་རྫོང་དཔོན་ལས་ཁུངས་ཀྱི་མདུན་ཐང་དུ་ཟས་བཅད་ངོ་རྒོལ་དང་མར་མེ་སྨོན་ལམ་གནང་སོང་།
དེ་རིང་མེ་སོར་ནང་གཞིས་ཆགས་གསུམ་གྱི་ས་གནས་རྒྱུན་ལས་དང་གཞིས་མི་མང་པོ་ཞིག་ལྷན་འཛོམས་གནང་སྟེ་མེ་སོར་རྒྱལ་ཁང་ནས་རྫོང་དཔོན་ལས་ཁུངས་བར་བོད་ཀྱི་རྒྱལ་དར་འཕྱར་བ་དང་རང་ཉིད་ཀྱི་ངོ་གདོང་ལ་འབོད་ཚིག་འདྲ་མིན་བྲིས་པར་མ་ཟད། སྐད་ཤུགས་ཆེན་པོའི་ཐོག་ནས་བོད་ཀྱི་བདག་པོ་བོད་མི་ཡིན། བོད་མིར་རང་དབང་དགོས། རྒྱ་མི་བོད་ནས་ཕྱིར་འཐོན་བྱེད་དགོས། བོད་ནང་གི་བོད་མི་རྣམས་ལ་འགྲོ་མིའི་ཐོབ་ཐང་སྤྲོད་དགོས་ཞེས་སོགས་དགོས་འདུན་བཏོན་ཡོད།
རྫོང་དཔོན་ལས་ཁུངས་མདུན་ཐང་དུ་འབྱོར་མ་ཐག་ཧུན་སུར་གྱི་ MLA Manjunath ལགས་མགྲོན་འབོད་གནང་བ་ལྟར་ཁོང་གིས་ལས་འགུལ་བ་རྣམས་ལ་གཏམ་བཤད་གནང་ཡོད། སྐབས་དེར་ལས་འགུལ་པ་རྣམས་ཀྱིས་མཉམ་འབྲེལ་རྒྱལ་ཚོགས་དང་རྒྱ་གར་གཞུང་མང་གཉིས་ལ་ཞུ་སྙན་ཞིག་ཕུལ་ཡོད་པ་མ་ཚད་པར་སྐུ་ལུས་ཞུགས་འབུལ་གནང་མཁན་རྣམས་ཀྱི་ཆེད་དུ་མར་མེ་སྨོན་ལམ་རྒྱས་པ་ཞིག་ཀྱང་ཚོགས་ཡོད།
དེ་བཞིན་སྔ་དྲོའི་ཕྱག་ཚོད་ ༩།༣༠ ནས་སྦེང་ལོར་ས་གནས་གཞོན་ནུའི་གོ་སྒྲིག་འོག་བོད་ཁྱིམ་སྡོད་ཁང་ནས་ freedom park བར་བོད་དོན་དང་འབྲེལ་བའི་འབོད་ཚིག་སྒྲོག་བཞིན་སྦག་སྦག་སྐོར་སྐྱོད་ཀྱི་ལས་འགུལ་སྤེལ་སོང་།
ལས་འགུལ་བ་སློབ་མ་རྣམ་པས་དེ་རིང་གི་ཉིན་མོ་འདི་ནི་བརྗེད་དཀའ་བའི་ཉིན་མོ་ཞིག་ཡིན་དང་ང་ཚོ་ཚང་མས་ཉིན་མོ་འདི་གལ་ཆེ་དོན་ཆེར་རྩིས་ཏེ་ལས་འགུལ་ནང་མཉམ་ཞུགས་གནང་དགོས་པ་དང་ང་ཚོ་བོད་མི་ཡིན་ནོ་ཅོག་ལ་འོས་འགན་ཡོད་པར་གསུངས་ཡོད། སློབ་མ་གཞན་ཞིག་གིས་ང་ཚོ་བོད་མི་རྣམས་ཕན་ཚུནདབར་་འཆམ་མཐུན་དང་བོད་དོན་འཐབ་རྩོད་ལ་སྨན་པའི་ཆིག་སྒྲིལ་གནང་རོགས་ཞེས་ཚོར་ཤུགས་ཆེན་པོ་རེ་སྐུལ་ཞུས་སོང་།
གཞན་ཡང་མོན་གྷོ་བོད་མིའི་གཞིས་སྒར་དུ་གཞུང་འབྲེལ་གྱི་གསུམ་བཅུ་དུས་དྲན་མཛད་སྒོ་ཚོགས་པ་མར་མེ་སྨོན་ལམ་གསུང་འདོན་རྒྱས་པ་ཞིག་གནང་འདུག
རྒྱ་གར་ལྷོ་ཕྱོགས་ཀྱི་བོད་མིའི་གཞིས་སྒར་དང་བོད་མི་སྡོད་གནས་ཚང་མར་བོད་མི་ཚོས་གཞི་རྒྱ་ཆེ་ཆུང་ལ་ལྟོས་མེད་བོད་མིའི་རང་དབང་སྒེར་ལངས་ཐེངས་ ༦༤ པ་དེ་ཉིད་སེམས་ཚོར་དྲགས་པོས་སྲུང་བརྩི་ཞུས་ཡོད།
