སུད་སིར་གནས་བཞུགས་བོད་མི་གཞས་པ་དང་སྒྱུ་རྩལ་བ་བློ་ལྡན་རྣམ་གླིང་ལགས་གནངས་ཕྱི་ཚེས་ ༩ ནས་གླིང་ཕྲན་ཨ་ཕི་རི་ཀ་བྱང་ཕྱོགས་སུ་ཆགས་པའི་ Morocco རྒྱལ་ཁབ་ནང་ལ་འཚོགས་གཏན་ཁེལ་བའི་རྒྱལ་སྤྱིའི་རོལ་དབྱངས་དུས་སྟོན་ཐོག་ཕེབས་རྒྱུའི་གྲ་སྒྲིག་ཆ་ཚང་ཟིན་འདུག་པ་དེ་ལྟར་ནའང་ རྒྱ་ནག་གཞུང་གི་གནོན་ཤུགས་འོག་དུས་སྟོན་གོ་སྒྲིག་ཚོགས་ཆུང་ནས་བློ་བུར་དུ་བློ་ལྡན་རྣམ་གླིང་ལགས་རོལ་དབྱངས་དུས་སྟོན་ཐོག་མཉམ་ཞུགས་གནང་རྒྱུའི་མགྲོན་བརྡ་ཕྱིར་འཐེན་གནང་འདུག
གཞི་རྩའི་ World Sacred Music Festival ཞེས་པ་དེ་ནི་ Morocco ནང་ལོ་ལྟར་ཚོགས་སྲོལ་ཡོད་པའི་རྒྱལ་སྤྱིའི་རོལ་དབྱངས་དུས་སྟོན་ཆེ་གྲས་ཤིག་ཡིན་པ་དང་། ད་རེས་རྒྱ་ནག་གི་གནོན་ཤུགས་འོག་བློ་ལྡན་རྣམ་གླིང་ལགས་དུས་སྟོན་ནས་ཕྱིར་འཐེན་གནང་དགོས་བྱུང་བ་དང་འབྲེལ་བཀའ་འདྲི་ཁག་གཅིག་ཞུས་པར་ཁོང་གིས་དེ་སྔ་དུས་སྟོན་ཐོག་བཅར་རྒྱུའི་མགྲོན་བརྡ་བྱུང་བ་ལྟར། གཞས་དང་རོལ་དབྱངས་སོགས་གཏང་རྒྱུའི་གྲ་སྒྲིག་ཆ་ཚང་བྱས་ཡོད་ཀྱང་། རྒྱ་ནག་གི་གནོན་ཤུགས་ཀྱི་རྐྱེན་གྱིས་དུས་སྟོན་ཐོག་མཉམ་བཞུགས་གནང་མ་ཐུབ་པའི་གནས་སྟངས་གྱུར་ཡོད་པ་འགྲེལ་བརྗོད་གནང་སོང་། 
ལྷག་པར་དུ་ཁོང་གིས་ད་བར་རྒྱ་ནག་གཞུང་གི་གནོན་ཤུགས་སྣ་ཚོགས་འོག་ནས་རྒྱལ་སྤྱིའི་སྒྱུ་རྩལ་བ་མང་པོ་ཞིག་ལ་དམ་དྲག་མང་དག་ཅིག་བྱས་ཡོད་པ་སོགས་འགྲེལ་བརྗོད་དང་སྦྲགས། ད་རེས་རྒྱ་ནག་གཞུང་གིས་ཁོང་རོལ་དབྱངས་དུས་སྟོན་ཐོག་མཉམ་ཞུགས་བྱ་རྒྱུར་བཀག་སྡོམ་བྱས་པ་དེས་ད་བར་བོད་དོན་ལས་འགུལ་སྤེལ་ཁག་རྒྱ་ནག་གཞུང་ལ་དོ་ཕོག་འགྲོ་ཡོད་པ་མངོན་གསལ་ཆགས་པ་ཞིག་མཚོན་གྱི་ཡོད་སྟབས་སོ་སོའི་ངོས་ནས་རྒྱལ་ཁ་ཞིག་ལ་ངོས་འཛིན་ཞུ་བཞིན་ཡོད་ཅེས་གསུངས་ཡོད།
རྩ་བའི་བློ་ལྡན་རྣམ་གླིང་ལགས་ད་ལྟའི་ཆར་བོད་ནས་ཁྱེད་ལ་གཞས་གཅིག་འམ་ A Song from Tibet for You ཞེས་པའི་ལས་འགུལ་གྱི་མིང་བྱང་འོག་ཡོ་རོབ་རྒྱལ་ཁབ་ཁག་ཏུ་བོད་དོན་ཆེད་སྐོར་སྐྱོད་གནང་བཞིན་ཡོད་པ་དང་། དེ་སྔ་ཕྱི་ལོ་ ༢༠༡༢ ལོར་ཁོང་ནས་བོད་ནང་གི་དངོས་ཡོད་གནས་སྟངས་རྒྱལ་སྤྱིའི་མང་ཚོགས་ལ་གོ་རྟོགས་སྤེལ་ཆེད་བོད་རང་དབང་གི་འགྲུལ་བཞུད་ཅེས་པའི་མིང་བྱང་འོག་སུད་སི་རྒྱལ་ས་སྦན་ནས་ཇི་ནི་ལྦ་བར་སྤུར་སྒམ་འགྲུད་དེ་གོམ་བགྲོད་ཀྱི་ལས་འགུལ་དང་། ལོ་འདིའི་འགོ་སྟོད་དུ་གངས་ཤུད་ལྷམ་གྱོན་ཏེ་པེ་ཅིང་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་གྱི་གོམ་བགྲོད་ལས་འགུལ་སོགས་སྤེལ་ཡོད།
