བོད་ཀྱི་རྒྱལ་ས་ལྷ་ས་ཡོངས་བཀག་སྡོམ་བྱས་ཏེ་ཉིན་གྲངས་ ༥༨ ཕྱིན་པའི་མཚམས་འདིར་རྒྱ་རིགས་ཚོང་པ་ Tang Yangchun ཞེས་པ་ཞིག་གིས་སྲིད་གཞུང་གིས་ནད་ཡམས་ཀླད་ཀོར་གྱི་སྲིད་བྱུས་འོག་མང་ཚོགས་ལ་བཀག་སྡོམ་དང་བརྟག་དཔྱད་རྫུན་མ་བྱས་དང་བྱེད་བཞིན་པར་མ་བཟོད་ནས་གསར་འགྱུར་ལས་ཁང་ཚོས་ལྷ་ས་ཁུལ་གྱི་གནས་སྟངས་ལ་རྟོག་ཞིབ་བྱེད་དགོས་པའི་ཞུ་སྐུལ་དང་གནས་སྟངས་འདི་མུ་མཐུད་ལྷག་ཚེ་རང་སྲོག་གཅད་རྒྱུའི་ཉེན་བརྡ་བཏང་འདུག 
འཕྲུལ་སྒྲ་ཐོག་ལོན་ཌོན་གཙུག་ལག་སློབ་གྲྭ་ཆེན་མོའི་ཤར་ཕྱོགས་དང་ཨ་ཕི་རི་ཀའི་ཞིབ་འཇུག་པ་དང་བོད་རིག་པའི་མཁས་དབང་ Robert Barnett ལགས་ཀྱིས་རྒྱ་རིགས་ཚོང་པ་ Tang Yangchun ཞེས་པས་ལྷ་སའི་སྲིད་གཞུང་ནས་ནད་ཡམས་སྟངས་འཛིན་བྱེད་ཕྱོགས་ཐད་སྐྱོན་འཛུགས་ཀྱིས་རང་སྲོག་གཅད་རྒྱུའི་ཉེན་བརྡ་བཏང་ཡོད་པའི་གནད་དོན་སྐོར་བརྙན་པར་ཞིག་བཞག་འདུག་ཅིང་། བརྙན་ནང་ཚོང་པ་དེས་ཁོ་པའི་ནང་མི་རྣམས་དུས་ཚོད་གཅིག་ལ་གཉན་རིམས་ཕོག་ཡོད་མེད་བརྟག་དཔྱད་བྱེད་ས་མི་འདྲ་བ་ལས་གྲུབ་འབྲས་མི་འདྲ་བར་ཐོན་སྟབས་དེ་ལྟར་ཡོང་དགོས་དོན་གང་ཡིན་ནམ་ཞེས་ཀྱི་དྲིས་ཡོད་པར་མ་ཟད། སྲིད་གཞུང་གི་ངོས་ནས་ནད་ཡམས་ཀྱི་འབྱུང་རྐྱེན་གང་ཡིན་མིན་གང་མགྱོགས་རྩད་གཅོད་བྱེད་ཐུབ་པའི་རེ་བ་བྱེད་ཀྱི་ཡོད། དོན་མེད་གོ་ལོག་དང་ཏོག་དབྱིབས་ཀྱི་གྲུབ་འབྲས་རྫུན་མ་དེར་ཆ་འཇོག་བྱས་ནས་མང་ཚོགས་རྣམས་དྲུད་དེ་སྤྱི་སྤྱོད་རླངས་འཁོར་ནང་བརྒྱངས་ཏེ་འགོག་དབྱེ་ཟུར་འཇོག་ཁང་དུ་འཇོག་མཚམས་དགོས་པ་བཤད་འདུག
དེ་བཞིན་ཁོ་པས་ལྷ་ས་ནང་གི་གནས་སྟངས་མུ་མཐུད་འདི་ལྟ་བུ་ལྷག་ཚེ་རང་སྲོག་གཅད་རྒྱུ་ཡིན་སྐོར་བཤད་འདུག་པར་མ་ཟད་ལྷག་དོན་ལྷ་ས་ནང་གི་གནས་སྟངས་ཁྲོད་འདིར་མང་ཚོགས་དུ་མས་དཀའ་སྡུག་སྙན་སེང་ཞུ་ཐུབ་རྒྱུ་དཀའ་བ་གྱུར་ཡོད་པ་བཤད་འདུག སྐར་མ་ ༦ ཅན་གྱི་བརྙན་དེ་ཁ་སང་ཆུ་ཚོད་ཁ་ཤས་རྗེས་ནས་ནག་བསུབ་བཏང་ཡོད་ཀྱང་བརྙན་དེར་གཟིགས་མཁན་ཧ་ཅང་མང་པོ་བྱུང་འདུག
གཞི་རྩའི་ཁོ་པ་ནི་ཚོང་པ་ཞིག་དང་རྒྱལ་ཞེན་དང་སྲིད་གཞུང་ལ་རྒྱབ་སྐྱོར་བྱེད་མཁན་ཞིག་ཡིན་འདུག་པ་དང་། ཚོང་པ་དེས་དངོས་གནས་བློ་ཁོག་ཆེན་པོའི་ཐོག་ནས་ལྷ་ས་ནང་གི་གནས་སྟངས་སྐོར་དང་ནད་ཡམས་ཀྱི་སྲིད་བྱུས་ལ་ཁག་དཀྲི་བྱས་ཏེ་མང་ཚོགས་རྣམས་ཚོད་མེད་བཀག་སྡོམ་འོག་སྨན་གྱི་མཐུན་རྐྱེན་སོགས་མ་རག་པའི་དཀའ་སྡུག་མྱོང་བཞིན་པའི་གནད་དོན་བཤད་ཡོད།
བོད་ནང་གཉན་རིམས་ཀླད་ཀོར་ཞེས་པའི་སྲིད་བྱུས་འོག་ལྷ་ས་ནང་བོད་མི་མང་དག་ཅིག་ལ་ཞལ་ལག་འདང་ངེས་མེད་པའི་ཁར་ཕྱི་ལོགས་ལ་ཟས་རིན་ཧ་ཅང་འཕར་བའི་དཀའ་ངལ་འཕྲད་ཡོད། ཆབས་ཅིག་འཕྲུལ་སྒྲ་ཐོག་ཏུ་ད་ཆ་ལྷ་ས་ནང་ནད་ཡམས་ཀྱི་ཉེན་ཚབས་ཆུང་བའི་ས་ཚིགས་ཀྱི་མང་ཚོགས་རྣམས་རང་ཁྱིམ་ནས་ཕྱིར་ཐོན་ཆོག་ཀྱང་རང་ཉིད་སོ་སོའི་ས་ཚིགས་ནས་ཕྱིན་ཐོན་ཆོག་གི་མེད་པར་མ་ཟད་ཕྱི་ཕྱོགས་ནས་དངོས་ཟོག་ཉོས་པ་རྣམས་བཞི་མདོ་ནས་ལེན་ཆོག་གི་ཡོད་པའི་གནས་ཚུལ་བཀོད་འདུག
