ཁ་སང་རེས་གཟའ་ཉི་མའི་ཉིན་སླེ་ལུང་དགེ་རྩ་ཚོགས་པའི་༸སྐྱབས་རྗེ་སླེ་ལུང་རིན་པོ་ཆེ་མཆོག་གིས་རྒྱལ་ས་ལྡི་ལིར་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པར་ཛ་དྲག་ནད་པ་འོར་འདྲེན་གྱི་སྣུམ་འཁོར་ Ambulance ཞིག་མཐུན་འགྱུར་གནང་ཡོད་པ་རེད།
ཛ་དྲག་གི་ནད་པ་སྲོག་སྐྱོབ་གནང་ཕྱིར་དེང་དུས་ཀྱི་དགོས་མཁོ་ཆ་ཚང་འཛོམས་པའི་ཚད་ལྡན་མྱུར་སྐྱོབ་སྣུམ་འཁོར་དེ་ནི་རིན་པོ་མཆོག་གིས་རྒྱ་ནག་ནས་ཆེས་ཐོག་མར་ཁྱབ་གདལ་བྱུང་བའི་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་སྐབས་འདིར་རྒྱ་གར་ནང་ནད་མནར་རྐྱེན་པས་འདས་གྲོངས་སུ་གྱུར་བའི་མིའི་ཕུང་པོ་བསྲེག་པར་ཤིང་མི་འདང་བ་ལ་སོགས་པའི་ངལ་བ་ཆེས་ཆེར་འཕྲད་པའི་ཛ་དྲག་གི་གནས་སྟངས་ལ་ཐུགས་འཚབ་ཆེན་པོ་བྱུང་དོན་ལྟར་སླད་མར་མི་ཤི་སྐྱོན་ཆགས་ཀྱི་ཛ་དྲག་གནས་སྟངས་དེ་དག་ལ་ཐུགས་ཕན་ཕྲན་བུ་སོས་ཆེད་བོད་ཀྱི་འབྲས་ནད་ཚོགས་པར་ཛ་དྲག་ནད་པ་འོར་འདྲེན་གྱི་སྣུམ་འཁོར་ Ambulance ཞིག་མཐུན་འགྱུར་གནང་ཡོད།
ལྡི་ལི་བོད་སྒར་བསམ་ཡས་གླིང་གི་བོད་ཁྱིམ་སློབ་གྲྭར་མྱུར་སྐྱོབ་སྣུམ་འཁོར་གསོལ་སྩལ་གྱི་མཛད་སྒོའི་ཐོག་སླེ་ལུང་རིན་པོ་ཆེ་མཆོག་གིས་སླེ་ལུང་དགེ་རྩའི་ངོས་ནས་རྒྱལ་ས་ལྡི་ལི་ནང་བོད་རིགས་གཞོན་སྐྱེས་ཁང་པ་མེད་མཁན་ཚོར་སོ་སོའི་ཆོས་རིག་དང་ལེགས་བྱང་སོགས་མི་ཉམས་རྒྱུན་འཛིན་དང་། ལྷག་པར་དུ་མི་རིགས་ཁ་འཐོར་མི་འགྲོ་བའི་ཀུན་སློང་བཅངས་ཏེ་འཛུགས་སྐྲུན་གྱི་ལས་གཞི་རྒྱ་ཆེ་ཞིག་ཡོང་བའི་འདུན་པ་ཡོད་ཀྱང་། ད་བར་དངོས་སུ་ལག་བསྟར་ཐུབ་མེད་པ་དེ་སླད་མར་ཐུབ་པའི་ཐུགས་སྨོན་གནང་གི་ཡོད་སྐོར་བཀའ་གནང་བ་མ་ཟད། བོད་ཀྱི་འབྲས་ནད་ཚོགས་པས་ད་བར་སྤྱི་ཚོགས་ལ་གང་ཐུབ་ཐུབ་ཀྱིས་ཞབས་འདེགས་ཞུས་པར་བསྔགས་བརྗོད་གནང་བ་དང་སྦྲགས། རྣམ་ཀུན་ནས་བོད་མི་ཚོས་སེམས་ཅན་ལ་ཉེ་རིང་གང་ཡང་མེད་པར་ངོས་འཛིན་གནང་གི་ཡོད་སྟབས། རིགས་རུས་དབྱེ་མེད་ཀྱི་ཐོག་ནས་གཅིག་ཕན་གཅིག་གྲོགས་གནང་དགོས་གལ་ཡིན་པར་ལམ་སྟོན་གནང་ཡོད། 
ལྡི་ལི་བོད་སྒར་བསམ་ཡས་གླིང་གི་བརྒྱ་འཐུས་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་བཅས་ཕེབས་ཡོད་པའི་མཛད་སྒོའི་ཐོག་བོད་ཀྱི་འབྲས་ནད་ཚོགས་པའི་ཚོགས་གཙོ་ཚུལ་ཁྲིམས་རྡོ་རྗེ་ལགས་ནས་སླེ་ལུང་དགེ་རྩ་ཚོགས་པ་དང་༸སྐྱབས་རྗེ་སླེ་ལུང་མཆོག་སྤྲུལ་རིན་པོ་ཆེ་མཆོག་བཅས་ལ་ཁོང་ཚོའི་ཚོགས་པ་དང་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུས་པ་མ་ཟད། ཛ་དྲག་གི་གནས་སྟངས་སྐབས་འདིར་མྱུར་སྐྱོབ་སྣུམ་འཁོར་ Ambulance གྱི་དགོས་མཁོ་དང་ཕན་ཡོན་ཇི་ཡོད་སྐོར་ངོ་སྤྲོད་གནང་བ་དང་ཆབས་ཅིག ད་ཆ་བོད་ཀྱི་འབྲས་ནད་ཚོགས་པར་མྱུར་སྐྱོབ་སྣུམ་འཁོར་གཉིས་ཡོད་པ་ལས་གཅིག་ད་སྐབས་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་བཞིར་ཐུགས་ཕན་སོས་ཆེད་མེ་སོར་གྲོང་ཁྱེར་ནང་བཞག་ཡོད་སྐོར་དང་། ༸སྐྱབས་རྗེ་སླེ་ལུང་མཆོག་སྤྲུལ་རིན་པོ་ཆེ་མཆོག་གིས་མཐུན་འགྱུར་གནང་བའི་སྣུམ་འཁོར་དེ་ལྡི་ལི་རང་དུ་གཏན་འཇགས་འཇོག་རྒྱུ་ཡིན་པ་སོགས་འགྲེལ་བརྗོད་གནང་སོང་། 
ཁ་སང་གི་མཛད་སྒོའི་ཐོག་དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཟུར་པ་ཨཱཙཱརྱ་ཡེ་ཤེས་ཕུན་ཚོགས་མཆོག་ཀྱང་ཆེད་ཕེབས་གནང་ཡོད་པ་དང་། བོད་ཀྱི་འབྲས་ནད་ཚོགས་པའི་ངོས་ནས་དེ་སྔོན་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་གནས་སྟངས་ཁྲོད་མཐུན་འགྱུར་གནང་མཁན་དང་སྤྱི་ཚོགས་ཞབས་ཞུའི་དང་བླངས་པ་ཚོར་ཕྱག་འཁྱེར་སོགས་གནང་ཡོད།
