རྒྱ་གར་མཐོ་སློབ་ནས་བོད་པའི་བེུད་ཅིག་ལ་གསེར་གྱི་རྟགས་མ་ཐོབ་འདུག

རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་རྟེན་གཞི་བྱས་པའི་ KLE Academy of Higher Education and Research ཞེས་པའི་མཐོ་རིམ་ཤེས་ཡོན་དང་ཉམས་ཞིབ་བསྟི་གནས་ཁང་གི་སློབ་མ་བསྟན་འཛིན་ནོར་གཡང་ལགས་ལ་གསེར་གྱི་རྟགས་མ་ཞིག་ཐོབ་འདུག ཁོ་མོ་ཕྱི་ལོ་ ༢༠༡༦ ནས་མཐོ་སློབ་དེར་སློབ་ཞུགས་གནང་བ་ནས་བཟུང་ད་བར་སྨན་ཞབས་པའི་ཐོག་ཉེ་བའི་གཙུག་ལག་རབ་འབྱམས་པའི་སློབ་སྦྱོང་གནང་བའི་ཁྲོད་ལོ་ལྟར་ཡིག་རྒྱུགས་ནང་ཨང་དང་པོ་བསྟུད་མར་བཞེས་པ་ལྟར། ད་རེས་སློབ་གཉེར་ཁང་གི་བསླབ་པ་མཐར་སོན་གྱི་མཛད་སྒོའི་ཐོག་ཁོང་གིས་ཚན་རིག་དང་འབྲེལ་སྨན་ཞབས་པའི་ཐོག་ལོ་བཞིའི་རིང་སློབ་སྦྱོང་གནང་མཐར་ཡིག་རྒྱུགས་གྲུབ་འབྲས་རྩེ་ཕུད་སོན་པར་བརྟེན་ཁོང་ལ་བསྔགས་བརྗོད་དང་ཆེ་མཐོང་མཚོན་ཕྱིར་གསེར་གྱི་གཟེངས་རྟགས་ཤིག་ཐོབ་ཡོད།གསར་འགོད་པས་བསྟན་འཛིན་ནོར་གཡང་ལགས་སུ་དུས་དང་རྣམ་པ་ཀུན་ཏུ་སློབ་གཉེར་གནང་སྟངས་དང་། ད་རེས་མཐོ་སློབ་ནས་གཟེངས་རྟགས་གནང་སྐབས་ཚོར་བ་ཇི་བྱུང་སྐོར་ལ་བཅར་འདྲི་ཞུས་པར་ཁོང་གིས་གཙོ་བོ་ཕ་མ་གཉིས་ཀྱི་ལམ་སྟོན་དང་འཛིན་གྲྭའི་སྐབས་སུ་སློབ་སྦྱོང་ཐད་ལ་ཐུགས་སྣང་ཆེན་པོ་གནང་སྐོར་དང་། ལྷག་དོན་འཛིན་གྲྭ་གྲོལ་བའི་རྗེས་སུ་ཟུར་དུ་སློབ་གཉེར་གནང་བ་སོགས་ངོ་སྤྲོད་གནང་བ་དང་ཆབས་ཅིག རང་ཉིད་ཀྱིས་དུས་ཚོད་ཆུད་ཟོས་སུ་མི་འགྲོ་བར་འབད་པ་ལྷོད་མྱོང་མེད་པར་གྲུབ་འབྲས་བཟང་པོ་ཞིག་སྨིན་སྟབས་སེམས་ནང་དགའ་སྤོབས་དང་ཕ་མ་གཉིས་ཀྱི་དྲིན་ལན་འཇལ་ཐུབ་པ་ལྟ་བུའི་ཚོར་སྣང་ཞིག་བྱུང་ཞེས་གསུངས་ཡོད།བསྟན་འཛིན་ནོར་གཡང་ལགས་ནི་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་ནས་ཡིན་པ་དང་ཕྱི་ལོ་ ༢༠༡༦ ལོར་འཛིན་རིམ་བཅུ་གཉིས་ཐོན་རྗེས་ KLE སློབ་གཉེར་ཁང་དུ་ B.SC Nursing འམ་སྨན་ཞབས་པའི་སློབ་སྦྱོང་གནང་ཡོད་པརེད།