ཨ་རིའི་ཕྱི་སྲིད་ལས་ཁུངས་སུ་བོད་ཀྱི་ལོ་གསར་སྲུང་བརྩི།

ཟླ་ ༢ ཚེས་ ༥ ཉིན་ནས་བོད་མི་གནས་ཡུལ་རྒྱལ་སྤྱིའི་ས་གནས་གང་སར་བོད་རྒྱལ་ལོ་ ༢༡༤༦ རབ་གནས་ས་ཕག་ལོའི་གནམ་ལོ་གསར་བཞད་ཀྱི་དགའ་སྟོན་སྲུང་བརྩི་ཞུ་བཞིན་ཡོད་པ་ལྟར། ཕྱི་ཚེས་ ༨ ཉིན་ཨ་རིའི་ཕྱི་སྲིད་ལྷན་ཁང་དུ་ལྷན་ཁང་དེའི་ཤར་ཨེ་ཤ་ཡ་དང་ཞི་བདེ་རྒྱ་མཚོའི་ལས་དོན་ཁང་གི་དྲུང་ཆེའི་ཕྱག་རོགས་སྐུ་ཞབས་ Patrick Murphy ལགས་དང་ཨ་རིའི་ཕྱི་འབྲེལ་མི་སྣ་ལྕམ་ Alice Wells ལགས་རྣམ་གཉིས་ཀྱིས་གཙོས་པའི་ལས་རོགས་ཁག་ཅིག དེ་བཞིན་ཨ་རི་བོད་ཀྱི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། རྒྱལ་སྤྱིའི་བོད་དོན་ལས་འགུལ་ཁང་གི་བསྟན་ཆོས་རྒྱ་མཚོ་ལགས་ཀྱིས་གཙོས་པའི་འབྲེལ་ཡོད་ལས་བྱེད་དང་ས་གནས་བོད་མི་བཅས་ལྷན་ཞུགས་ཐོག་བོད་ཀྱི་ལོ་གསར་དགའ་སྟོན་སྲུང་བརྩི་ཞུས་ཡོད་པ་རེད།སྐབས་དེར་ཨ་རིའི་ཕྱི་སྲིད་ལྷན་ཁང་གི་ཤར་ཨེ་ཤ་ཡ་དང་ཞི་བདེ་རྒྱ་མཚོའི་ལས་དོན་ཁང་གི་དྲུང་ཆེའི་ཕྱག་རོགས་སྐུ་ཞབས་ Patrick Murphy ལགས་ནས་བོད་མི་ཡོངས་ལ་ལོ་གསར་གྱི་འཚམས་འདྲི་དང་སྦྲགས། ཨ་རིའི་སྲིད་གཞུང་གི་ངོས་ནས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག དེ་བཞིན་བོད་མིའི་ངོ་བོ་སྲུང་སྐྱོབ་བཅས་ཀྱི་ཐད་མུ་མཐུད་རྒྱབ་སྐྱོར་ཡོད་ཅེས་ནན་བརྗོད་གནང་འདུག

གཞི་རྩའི་ཨ་རིའི་ཕྱི་སྲིད་ལས་ཁུངས་སུ་འདི་ལོའི་ལོ་གསར་སྲུང་བརྩི་མ་གནང་བའི་གོང་ལོ་གསར་གྱི་ཚེས་གཅིག་ཟིན་མཚམས་སུ་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Michael R. Pompeo ལགས་ནས་ཨ་རི་གཞུང་གི་སྐུ་ཚབ་མཚོན་པའི་ཐོག་ཧི་མཱ་ལ་ཡའི་རི་རྒྱུད་སྤྱི་དང་སྒོས་རྒྱ་གར་དང་བལ་ཡུལ། འབྲུག བོད་བཅས་རྒྱལ་སྤྱིའི་ས་གནས་གང་སར་ཡོད་པའི་བོད་མི་རྣམས་ལ་ལོ་གསར་པའི་དགའ་སྟོན་ལ་འཚམས་འདྲི་དང་ལོ་གསར་སྐབས་དོ་བདག་སོ་སོའི་ནང་མི་སྤུན་མཆེད། ཚོགས་སྐྱིད་སོགས་མཉམ་འཛོགས་ཐོག་དགའ་སྤྲོའི་དཔལ་ལ་རོལ་སྐབས་སུ་ཨ་རིའི་སྲིད་གཞུང་འདི་སྔར་བཞིན་བོད་པའི་མཐུན་གྲོགས་འགྱུར་བ་མེད་པ་ཞིག་ཡིན་པ་ཐུགས་འཇགས་གནང་རོགས་ཞེས་གསུངས་ཡོད།ཁ་ཉིན་ཨ་རིའི་མངའ་སྡེ་ནིའུ་ཡོག་དང་ནིའུ་ཇར་སིའི་ས་གནས་བོད་རིགས་སྤྱི་མཐུན་ཚོགས་པས་གོ་སྒྲིག་འོག་ཕུན་ཚོགས་སྡེ་བཞིའི་ཚོགས་ཁང་དུ་ཨ་རིའི་གྲོས་ཚོགས་འཐུས་མི་ Alexandria Ocasio-Cortez ལགས་དང་། ནིའུ་ཡོག་ས་གནས་གྲོས་ཚོགས་འཐུས་མི་ Jessica Ramos ལགས། དེ་བཞིན་ནིའི་ཡོག་གྲོང་སྡེའི་སྤྱི་ཁྱབ་ལས་ཁུངས་ཀྱི་ལས་བྱེད་ Nick Gulotta ལགས་སོགས་ཨ་རི་དབུས་དང་ས་གནས་གྲོས་ཚོགས་འཐུས་མི་དང་ལས་བྱེད་བཅས་གདན་ཞུས་ཀྱིས་ལོ་གསར་སྲུང་བརྩི་ཞུས་ཡོད་པ་དང་། དེ་རེས་ས་གནས་སུ་ལོ་གསར་དགའ་སྟོན་ཐོག་ཨ་རིའི་གནད་ཡོད་མི་སྣ་གདན་ཞུ་གནང་ཐུབ་པ་དེ་ཆེས་ཐོག་མ་ཆགས་ཀྱི་ཡོད་པ་རེད།

སྐབས་དེར་ཨ་རིའི་གྲོས་ཚོགས་འཐུས་མི་ Alexandria Ocasio-Cortez ལགས་ནས་བོད་མི་ཡོངས་ལ་ལོ་གསར་ལ་དགའ་བསུའི་འཚམས་འདྲི་དང་སྦྲགས། ང་ཚོ་འདིར་ལྷན་འཛོམས་ཐུབ་པ་དེ་གཙོ་བོ་བོད་ཀྱི་ཐུན་མོང་མ་ཡིན་པའི་རིག་གཞུང་གོམས་སྲོལ་བཟང་པོ་དེ་དག་ལ་བརྟེན་ནས་བྱུང་བ་ཞིག་རེད་ཅེས་གསུངས་ཡོད། དེ་བཞིན་ཨ་མི་རིའི་མ་ངའ་སྡེ་ Utah དང་ Minnesota  སོགས་སུ་ཡང་ཨ་རི་དབུས་དང་ས་གནས་གྲོས་ཚོགས་འཐུས་མི་སོགས་གདན་ཞུ་ཐོག་བོད་ཀྱི་ལོ་གསར་སྲུང་བརྩི་ཞུས་ཡོད་པ་དང་། ཁེ་ན་ཌའི་ Toronto ནང་རྟེན་གཞི་བྱས་པའི་གངས་ལྗོངས་ཆོས་ལྡན་གླིང་དུ་ཡུལ་དེའི་གྲོས་ཚོགས་འཐུས་མི་སྐུ་ཞབས་ Arif Virani ལགས་ཀྱིས་གཙོས་པའི་གནད་ཡོད་མི་སྣ་ཁག་ཅིག་གདན་ཞུ་ཐོག་ལོ་གསར་གྱི་དགའ་སྟོན་སྲུང་བརྩི་ཞུས་ཡོད་པ་རེད།གནམ་ལོ་གསར་དུ་བཞད་པའི་བོད་ཀྱི་ལོ་གསར་སྐབས་རྒྱལ་སྤྱིའི་གཞུང་དང་གནད་ཡོད་མི་སྣ་མང་དག་ཅིག་ནས་བོད་མི་ཚོར་འཚམས་འདྲི་གནང་ཡོད་པ་ལྟར། འདི་ལོའི་ལོ་གསར་སྐབས་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jai Ram Thakur མཆོག་ནས་ཧི་མཱ་ཅལ་མངའ་སྡེའི་ནང་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་མཛད་པ་འདིར་དུས་རྟག་ཏུ་དམིགས་བསལ་གྱི་དགའ་སྤོབས་ཆེན་པོ་ཡོང་གི་འདུག་ཅེས་གསུངས་པ་དང་སྦྲགས། ཧི་མཱ་ཅལ་གཞུང་མང་ཡོངས་ནས་རྒྱ་གར་གཙོ་གྱུར་འཛམ་གླིང་ས་གནས་གང་སར་ཞུགས་པའི་བོད་མི་རྣམས་ལ་ལོ་གསར་པར་དགའ་བསུའི་འཚམས་འདྲི་དང་མ་འོངས་པའི་ལས་དོན་ཀུན་ལམ་ལྷོང་ཡོང་བར་སྨོན་འདུན་གནང་ཡོད།