Monthly Archives: September, 2018

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་དུ་ལྷོ་ཤར་ཨེ་ཤ་ཡའི་དད་ལྡན་པ་ཁག་ཅིག་ལ་ཉིན་བཞིའི་བཀའ་ཆོས་དབུ་འཛུགས་བསྐྱངས་པ་དང་འབྲེལ། མིའི་རང་བཞིན་ལྷན་སྐྱེས་ནི་བྱམས་བརྩེ་ལྡན་པ་ཞིག་ཡིན་སྟབས་བྱམས་བརྩེ་གོང་འཕེལ་ཐོག་འབད་བརྩོན་གནང་ཚེ་དེར་ནུས་པ་ངེས་ཅན་ཞིག་ཐོན་རྒྱུ་དང་སྤྱི་ཚོགས་འཆམ་མཐུན་ཞེས་པ་དེའང་བྱམས་བརྩེའི་ཐོག་ནས་བཟོ་ཐུབ་རྒྱུ་ཡིན་པའི་ལམ་སྟོན་མཛད་སོང་། དེའང་ཨིན་དྷུ་ནེ་ཤི་ཡ། ཀོ་རི་ཡ། མཱ་ལེ་ཤེ་ཡ། སིངྒ་པུར། ཐའེ་ལན་ཌི། ཝི་ཏི་ནམ་སོགས་ལྷོ་ཤར་ཨེ་ཤ་ཡའི་དད་ལྡན་པ་ཁག་ཅིག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་པ་བཞིན། དེ་རིང་ཟླ་ ༩ ཚེས་ ༤ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་གཞུང་སྐུལ་བ་པོས་གཙོས་པའི་ཕྱི་ནང་གི་མང་ཚོགས་སྟོང་ཕྲག་འགལ་བར་སློབ་དཔོན་སངས་རྒྱས་བསྐྱངས་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་འགྲེལ་པ་བུདྡྷ་པཱ་ལི་ཏ་ལས་སྔར་ལོའི་ཆོས་འབྲེལ་འཕྲོས་རབ་བྱེད་བདུན་པའི་བཀའ་ཆོས་དབུ་འཛུགས་བསྐྱངས་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ཐོག་མར་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ནས་ཕེབས་པའི་ཆོས་ཞུ་བ་རྣམས་ཀྱིས་གཙོས་པའི་ཐའེ་ལན་ཌི། ཝི་ཏི་ནམ། དེ་བཞིན་ཀོ་རི་ཡའི་སོགས་ཀྱི་ཆོས་ཞུ་བ་ཚོར་དགའ་བསུའི་འཚམས་འདྲི་བསྩལ་བ་སྦྲགས། ༸གོང་ས་མཆོག་གི་ཐུགས་བསྐྱེད་དམ་བཅའ་ཆེན་པོ་བཞི་ཡོད་པ་ལས་དང་པོ་འགྲོ་བ་མི་གཅིག་གྱུར་གྱི་ཐུགས་བསྐྱེད་ཆེན་པོ་དང་འབྲེལ་ཏེ་མགོན་པོ་༸གང་ཉིད་མཆོག་ནི་འཛམ་གླིང་འདིའི་ནང་གི་འགྲོ་བ་མི་ཞིག་ཡིན་སྟབས་འཛམ་གླིང་འདི་ལ་བདེ་སྐྱིད་ཞིག་ཡོང་ཚེ་༸གོང་ས་མཆོག་ལའང་བདེ་སྐྱིད་ཡོང་གི་ཡོད་པ་དང་། འགྲོ་བ་ཀུན་ཆོས་དད་ཡོད་མེད་ལ་ལྟོས་མེད་ཞི་བདེ་བག་ཕེབས་ཤིག་འདོད་ཀྱི་ཡོད་པ་ལྟར། དེ་ལྟར་ཡོང་བར་འབད་བརྩོན་བྱེད་དགོས་ཞེས་ལམ་སྟོན་བསྩལ་ཡོད། དེ་བཞིན་༸གོང་ས་མཆོག་གིས་གཞུང་དངོས་གཞི་དབུ་འཛུགས་མ་མཛད་གོང་དུ་རྣམ་ཀུན་ལྟར་ནང་ཆོས་ངོ་སྤྲོད་སྤྱི་བཤད་བསྩལ་སྐབས་སུ་མིའི་རང་བཞིན་ལྷན་སྐྱེས་དེ་ནི་བྱམས་བརྩེ་ལྡན་པའི་རང་བཞིན་ཡིན་པ་ཚན་རིག་པ་ཚོས་ཀྱང་བརྟག་དཔྱད་གནང་འབྲས་སུ་ར་འཕྲོད་ཡོད་སྐོར་དཔེ་མཚོན་དང་བཅས་ངོ་སྤྲོད་མཛད་པ་དང་འབྲེལ། སྤྱི་ཚོགས་འཆམ་མཐུན་ཞེས་པ་དེ་བྱམས་བརྩེས་བཟོ་ཐུབ་པ་མ་གཏོགས་ཁོང་ཁྲོ་དང་ང་རྒྱལ་གྱི་བཟོ་ཐུབ་རྒྱུ་མེད་པར་བཀའ་བསྩལ་སོང་། མགོན་པོ་༸གང་ཉིད་མཆོག་གིས་གཞན་ཡང་འཛམ་གླིང་འདིའི་ཐོག་ཡོད་པའི་ཆོས་ལུགས་ཡོད་དོ་ཅོག་ཕན་ཚུན་མཐུན་འབྲེལ་ཡོང་ཐབས་སུ་ང་ཚོས་བདེ་སྐྱིད་ཀྱི་རྩ་བ་བྱམས་བརྩེའི་བློ་ལ་ཡོན་ཏན་དུ་བལྟས་ནས་དང་འདོད་གནང་དགོས་པ་དང་། དེང་སྐབས་ཆོས་ལུགས་རྒྱུ་མཚན་དུ་བྱས་ནས་མི་གསོད་རེས་ཀྱི་གནས་དོན་བྱུང་བཞིན་ཡོད་པ་ནི་ཆེས་ཡིད་སྐྱོ་དགོས་པའི་གནས་ཚུལ་ཐོན་བཞིན་པ་རེད། ལྷག་དོན་མི་དང་འབྲེལ་བའི་ཆོས་ལུགས་ཚང་མའི་ནང་བྱམས་བརྩེའི་སྐོར་གསུངས་ཡོད་པ་ལྟར། དེ་རིང་ཆོས་འབྲེལ་ཐོག་བཅར་བའི་ཆོས་གྲོགས་ཕོ་མོ་ཚོས་རང་ཉིད་ཀྱི་ལུང་པར་ལོག་རྗེས་ཆོས་ལུགས་མཐུན་འབྲེལ་ཐོག་བསམ་བློ་གཏོང་དགོས་པའི་ལམ་བསྟོན་མཛད་ཡོད། རྩ་བའི་༸གོང་ས་མཆོག་གིས་དེ་རིང་ཆོས་འབྲེལ་བྱ་རྒྱུའི་བུདྡྷ་པཱ་་ལི་ཏའི་ལུང་དེ་དགའ་ལྡན་ཁྲི་ཟུར་རིན་པོ་ཆེ་མཆོག་གི་དྲུང་ནས་ཞུས་ཡོད་པ་དང་། གཞུང་འདི་ནི་བསྟན་འགྱུར་ནང་གི་གཞུང་གལ་ཆེ་ཞིག་ཆགས་ཀྱི་ཡོད་པ་ལྟར་བསྟན་འགྱུར་གྱི་གཞུང་ཁག་ལ་སློབ་གཉེར་གནང་དགོས་གལ་ཡིན་པའི་ལམ་སྟོན་མཛད་ཡོད་པ་རེད།  ཐེངས་འདིའི་ཆོས་འབྲེལ་ཐོག་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ཅིག་ནས་ཆོས་ཞུ་བ་ཞལ་གྲངས་ ༧༠༠ ཡས་མས་ཤིག་དང་ལྷག་དོན་ལྷོ་ཀོ་རི་ཡ་ནས་ཆོས་ཞུ་བ་ ༤༠༠ ལྷག་བཅར་ཡོད་པ་རེད་འདུག ཉིན་གྲངས་བཞིའི་ཆོས་འབྲེལ་དེ་སྔ་དྲོ་ཚོུད་ ༩་༠༠ ནས་ ༡༡༌༣༠  བར་ཡིན་པ་དང་། ཉིན་རྒྱབ་ཏུ་མཁན་པོ་དང་དགེ་བཤེས་རྣམ་པས་ཉིན་སོ་སོའི་ཆོས་ཐུན་བསྐྱར་བཤད་དང་དྲི་བ་འདྲི་ལན་བཅས་གནང་གི་ཡོད་པ་རེད།

འདི་ལོའི་ཕྱི་ཟླ་ ༩ ཚེས་ ༡ ཉིན་ཨ་རིའི་མངའ་སྡེ་མི་ནི་སོ་ཊ་ནང་རྟེན་གཞི་བྱས་པའི་བོད་རིགས་སྤྱི་མཐུན་ཚོགས་པ་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་པ་དང་འབྲེལ། ས་གནས་བོད་མི་ཚོས་མི་ནི་སོ་ཊའི་གཞུང་མང་གཉིས་ལ་བོད་དོན་དང་བོད་མི་སླད་རྒྱབ་སྐྱོར་གཡོ་བ་མེད་པ་གནང་བར་ཐུགས་རྗེ་ཆེ་ཞུས་འདུག Double Tree ཞེས་པའི་མགྲོན་ཁང་ཞིག་ཏུ་མཛད་སྒོ་ཚོགས་གནང་བ་དང་སྐབས་དེར་སྐུ་མགྲོན་གཙོ་བོ་མི་ནི་སོ་ཊའི་གྲོང་ཁྱེར་སྤྱི་ཁྱབ་སྐུ་ཞབས་ Mike Dayton མཆོག་དང་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གཙོས་པའི་མི་ནི་སོ་ཊ་མངའ་སྡེ་དང་དབུས་གྲོས་ཚོགས་གོང་འོག་གི་འཐུས་མི་ཁག་ཅིག  བྱང་ཨ་རིའི་སྐུ་ཚབ་དོན་གཅོད།  ས་གནས་སྤྱི་འཐུས་རྣམ་གཉིས། བྱང་ཨ་རིའི་སྤྱི་མཐུན་ཚོགས་པ་ ༢༢ ཀྱི་སྐུ་ཚབ་རྣམ་པ་དང་མི་མང་བཅས་ཁྱོན་མི་གྲངས་ ༥༠༠ ལྷག་ནས་མཉམ་ཞུགས་གནངའདུག སྐབས་དེར་བོད་རིགས་སྤྱི་མཐུན་ཚོགས་པ་ངོས་ནས་མི་ནི་སོ་ཊའི་གཞུང་མང་གཉིས་ཀྱིས་བོད་དོན་སླད་རྒྱབ་སྐྱོར་གཡོ་བ་མེད་པ་གནང་བར་ཐུགས་རྗེ་ཞུ་ཆེད་གྲོང་ཁྱེར་སྤྱི་ཁྱབ་པ་ Mike མཆོག་དང་གྲོས་ཚོགས་གོང་འོག་གི་འཐུས་མི་རྣམས་ལ་ཕྱག་རྟགས་ཕུལ་འདུག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་སྤྱི་མཐུན་ཚོགས་པར་འཚམས་འདྲིའི་ཕྱག་ཡིག་ཞིག་བསྩལ་བའི་ནང་བོད་རིགས་སྤྱི་མཐུན་ཚོགས་པ་དབུ་བརྙེས་ནས་ལོ་ངོ་ ༢༥ འཁོར་བར་འཚམས་འདྲི་དང་སྦྲགས། སྤྱི་མཐུན་ཚོགས་པའི་འགོ་ཁྲིད་འོག་ཁུལ་དེའི་བོད་མི་རྣམས་ནས་བོད་ཀྱི་བདེན་དོན་ཐོག་ལས་འགུལ་རབ་དང་རིམ་པ་རྒྱལ་སྤྱིའི་སྡིངས་ཆར་སྤེལ་ཐུབ་པར་བསྔགས་བརྗོད་དང།  མ་འོངས་པར་མུ་མཐུད་ནས་བོད་མི་རིགས་ཀྱི་གཅེས་ནོར་དཔལ་ནཱ་ལེནྜའི་ཆོས་བརྒྱུད་དང།  འཇིག་རྟེན་ཐོག་ངོམས་སུ་ཆོག་པའི་ཆོས་དང་རིག་གཞུང་སྐད་ཡིག་བཅས་སྲུང་སྐྱོབ་གནང་ཐོག་འཛམ་གླིང་སྤྱི་ལ་ཞབས་འདེགས་བསྒྲུབ་དགོས་པའི་ལམ་སྟོན་བཀའ་སློབ་ཕེབས་ཡོད་པ་རེད། སྐབས་དེར་གྲོང་ཁྱེར་སྤྱི་ཁྱབ་སྐུ་ཞབས་ Mike Dayton མཆོག་གིས་ཕྱི་ཟླ་ ༩ ཚེས་ ༡ ཉིན་མོ་དེ་བོད་རིགས་སྤྱི་མཐུན་ཚོགས་པའི་ཉིན་མོ་ཞེས་ངོས་འཛིན་གནང་བའི་ངོས་ལེན་གྱི་ཕྱག་ཡིག་ཀྱང་གནང་འདུག སྐུ་མགྲོན་གཙོ་བོ་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ད་ལྟ་སྤྱི་མཐུན་ཚོགས་པ་དེ་ཚགས་ཚུད་ཡོང་བའི་རྒྱུ་རྐྱེན་གཙོ་བོ་དེ་འདས་པའིདུས་སུ་མི་རབས་རྒན་པ་ཚོས་སྐུ་ངལ་འཛེམས་ཀྱིས་ཕྱག་ལས་གནང་བ་ཁག་ལ་བརྟེན་ནས་ཡིན་སྟབས། ཁོང་རྣམས་ལ་ཐུགས་རྗེ་ཆེ་ཞུ་བ་དང་ཆབས་ཅིག་ཏུ་འཚམས་འདྲི་ཡང་གནང་འདུག   བཀའ་བློན་མཆོག་གིས་ད་དུང་ཕྱི་ལོ་ ༢༠༡༨ ལོ་དེ་བཀའ་ཤག་ནས་བཙན་བྱོལ་བོད་མི་རྣམས་ནས་རང་ཉིད་ཀྱི་གནས་ཡུལ་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་དགོས་པའི་ལམ་སྟོན་གནང་བ་ངོ་སྤྲོད་དང་འབྲེལ་མི་ནི་སོ་ཊའི་གཞུང་མང་གཉིས་ནས་བོད་མི་ཚོར་རྒྱབ་སྐྱོར་དང་རོགས་སྐྱོར་གནང་བར་ཐུགས་རྗེ་ཆེ་ཞུས་འདུག གཞི་རྩའི་བོད་རིགས་སྤྱི་མཐུན་ཚོགས་པ་དེའི་དམིགས་ཡུལ་གཙོ་བོ་བོད་ཀྱི་ཆོས་དང་རིག་གཞུང་སྲུང་སྐྱོབ་གནང་རྒྱུ་དང།  ད་ལྟའི་ཆར་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་བོད་པའི་གཞོན་སྐྱེས་རྣམས་ལ་སྐད་ཡིག་དང་རིག་གཞུང་སློབ་གཉེར་ཆེད་གཟའ་མཇུག་སློབ་གྲྭ་ཚོགས་གནང་གི་ཡོད་པ་ལྟར།  བོད་ཕྲུག་མང་པོ་ཞིག་གིས་དེར་ཚ་ཚ་འུར་འུར་ངང་མཉམ་ཞུགས་གནང་གི་ཡོད་པ་རེད་འདུག རྩ་བའི་མི་ནི་སོ་ཊ་བོད་རིགས་སྤྱི་མཐུན་ཚོགས་པ་དེ་ཕྱི་ལོ་ ༡༩༩༢ ལོར་ཨ་རི་ནང་རྒྱ་གར་དང་བལ་ཡུལ་དུ་གནས་པའི་བོད་མི་ཆིག་སྟོང་རྒྱན་ཤོག་བརྒྱུད་གནས་སྤོས་གནང་རྗེས་གསར་འཛུགས་གནང་བ་ཞིག་དང།  དེའི་སྐབས་སུ་མི་ནི་སོ་ཊ་ནང་བོད་རིགས་ ༡༦༠ ལྷག་ཙམ་གཞིས་སྤོས་གནང་བ་དང་དེ་བཞིན་རིམ་བཞིན་བོད་མི་ཇེ་མང་དུ་ཕྱིན་སྟབས་ད་ལྟའི་ཆར་བོད་མི་སུམ་སྟོང་ལྷག་ཡོད་པ་རེད་འདུག

ཉན་པ།: Listen ཕབ་ལེན། Download ༸གོང་ས་མཆོག་གིས་དགུང་ལོ་བརྒྱ་སྐོར་བཞུགས་ཐུབ་པར་ཐུགས་སྨོན་མཛད་ཀྱི་ཡོད་ཅེས་བཀའ་བསྩལ་བ། རྒྱ་གར་རྒྱལ་ས་ལྡི་ལི་དང་ལྷོ་ཕྱོགས་ཁུལ་དུ་བོད་མི་ཚོས་མང་གཙོ་དུས་དྲན་སྲུང་བརྩི་ཞུས་པ། རྒྱ་གར་ Congress ཆབ་སྲིད་ཚོགས་པའི་དབུ་ཁྲིད་རཱ་ཧུལ་གྷན་དྷཱི་མཆོག་རྒྱལ་ས་ལྷ་སར་ཕེབས་འབྱོར། བྱང་ཨ་རིའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་རྟགས་མའི་རྐང་སྤོལ་རྩེད་འགྲན་ལས་ནིའུ་ཡོག་ Team Tibet རུ་ཁལ་ལ་རྒྱལ་ཁ་ཐོབ་འདུག Monday 03/09/2018 I hope I will live till 100 for the good of this humanity: HHDL at 'Tenshug' Exile Tibetans celebrate 58th anniversary of Tibetan Democracy Day Rahul Gandhi arrives in Lhasa to begin Kailash Mansarovar pilgrimage Team Tibet NY bags North America GCM Gold Cup

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་༸རྒྱལ་མཆོག་༸སྐུ་ཕྲེང་བཅུ་བཞི་བ་ཆེན་པོ་མཆོག་ཕྱི་ལུགས་དགུང་གྲངས་ ༨༤ དང་བོད་ལུགས་དགུང་གྲངས་ ༨༥ ཕེབས་པའི་དགུང་གེགས་ཁེལ་གྱི་ཡོད་པས་བསྟན་འགྲོ་སྤྱིའི་བདེ་དོན་སླད་དུ་དགུང་གེགས་ཀྱི་མཚན་མ་ཕྲ་མོ་ཙམ་ཡང་མི་བཞེས་པ་དང་། ལྷག་པར་དུ་བོད་གངས་པའི་བོད་འབངས་ཡོངས་ཀྱི་མགོན་དཔུང་དམ་པར་༸སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་པ་སོགས་ལ་དམིགས་ཏེ་དེ་རིང་ཟླ་ ༩ ཚེས་ ༣ ཉིན་སྔ་དྲོ་བཞུགས་སྒར་དུ་དབུས་གཙང་ཆོལ་ཁ་དང་། མདོ་སྨད་ཆོལ་ཁ། རྡ་སར་རྟེན་གཞི་བྱས་པའི་ཆུ་སྒང་དང་རྒྱ་གར་བྱང་ཤར་ཕྱོགས་སུ་རྟེན་གཞི་བྱས་པའི་ཀ་རྡོར་སྒང་གསུམ་དང་ར་ཝང་ལ་བཅས་ནས་མགོན་པོ་༸གང་ཉིད་མཆོག་ལ་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུས་སོང་བ་དང་། སྐབས་དེར་༸གོང་ས་མཆོག་གིས་བོད་མི་ཚོའི་ངོས་ནས་རེ་སྨོན་ཞུ་བཞིན་པ་ལྟར་མགོན་པོ་མཆོག་གིས་ཀྱང་དགུང་ལོ་བརྒྱ་སྐོར་བཞུགས་ཐུབ་པར་ཐུགས་སྨོན་མཛད་ཀྱི་ཡོད་ཅེས་བསྐལ་བཟང་གི་བཀའ་བསྩལ་སོང་། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྔ་དྲོ་ཚོུད་  ༧༌༣༠ ནས་ ༨༌༣༠ བར་དགའ་ལྡན་ཁྲི་ཐོག་ ༡༠༤ པ་བྱང་རྩེ་ཆོས་རྗེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དང། རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་རྣམ་གཉིས་དབུ་བཞུགས་ཐོག་བརྟན་བཞུགས་ཀྱི་སྒྲུབ་བཤག་གནང་ཟིན་རྗེས་ཚོུད་ ༩༌༠༠ སྟེང་༸གོང་ས་མཆོག་༸རྒྱལ་བའི་ཕོ་བྲང་ནས་ཆིབས་བསྒྱུར་མཛད་དེ་གཙུག་ལག་ཁང་གི་བཞུགས་ཁྲིར་༸ཞབས་སོར་བདེ་བར་འཁོད་བསྟུན་བརྟན་བཞུགས་བསྟར་འབུལ་གྱི་མཛད་རིམ་དངོས་སུ་དབུ་འཛུགས་བསྐྱངས་ཡོད་པ་རེད། སྐབས་དེར་༸གོས་ས་མཆོག་གིས་སྤྱིར་མགོན་པོ་མཆོག་༸སྐུ་ན་ཆུང་དུས་ནས་ཀ་རྡོར་སྒང་གསུམ་གྱི་སྐོར་གསན་སྐབས་ཐུགས་ལ་སྤྲོ་སྣང་ཞིག་འཁྲུངས་པ་དང་ཐུགས་ཐག་ཉེ་བའི་༸སྐུའི་མྱོང་ཚོར་བྱུང་སྐོར་དང། ད་རེས་ཀ་རྡོར་སྒང་གསུམ་དང་ཆོས་ཁ་གསུམ་ནས་མགོན་པ་མཆོག་ལ་བརྟན་བཞུགས་བསྟར་འབུལ་ཞུ་བཞིན་ཡོད་པ་འདི་ནི་དམ་ཚིག་ལྡན་པ་ཞིག་ཡིན་པ་མ་ཟད། ༸གོང་ས་མཆོག་ལས་དང་སྨོན་མལམ་དབང་གིས་བོད་མིའི་བདེ་དོན་སྲུང་མཁན་ཞིག་ཆགས་པ་མ་ཟད་སྤྱིར་འགྲོ་བ་རིགས་དྲུག་སེམས་ཅན་ཐམས་ཅད་ལ་ཕན་པ་བསྒྲུབ་ཐུབ་པའི་ཐུགས་འཁུར་བཞེས་གནང་མཁན་ཞིག་ཡིན་པའི་ཆ་ནས་༸སྐུ་ཚེ་རིང་པོ་བཞུགས་ཐུབ་ན་འགྲོ་བར་ཕན་ཐོགས་བསྒྲུབ་ཐུབ་རྒྱུ་ཡིན་པ་དང་སྒོས་བོད་མི་མང་ཚོགས་ནས་ཀྱང་རེ་བ་དང་སྨོན་ལམ་ཞུ་བཞིན་པ་ལྟར་མགོན་པོ་༸གང་ཉིད་མཆོག་གིས་ཀྱང་དགུང་ལོ་བརྒྱ་སྐོར་བཞུགས་ཐུབ་པར་ཐུགས་སྨོན་མཛད་ཀྱི་ཡོད་ཅེས་བསྐལ་བཟང་གི་བཀའ་བསྩལ་སོང་། རྒྱ་གར་བྱང་ཤར་ཕྱོགས་སུ་རྟེན་གཞི་བྱས་པའི་ཀ་རྡོར་སྒང་གསུམ་དང་ར་ཝང་ལ་བཅས་ནས་མགོན་པོ་༸གང་ཉིད་མཆོག་གི་བཀའ་དགོངས་བཞིན་བོད་ཀྱི་སྐད་ཡིག་སྲུང་སྐྱོབ་ཐད་འབད་པ་གང་ནུས་ཞུ་རྒྱུའི་དམ་ཡིག་ཞིག་ཕུལ་ཡོད་པ་དང་འབྲེལ་༸གོང་ས་མཆོག་གིས་བོད་ལ་ཡོད་པའི་ནང་པ་སངས་རྒྱས་ཀྱི་བསྟན་པ་འདི་ཆ་ཚང་བ་དང་སྤུས་དག་པོ་ཞིག་བོད་ཡིག་དང་བོད་སྐད་ཁོ་ནར་ཡོད་སྟབས་འདིས་བསྟན་པར་ཞབས་འདེགས་བསྒྲུབ་རྒྱུ་དང། བོད་མི་རིགས་ཀྱི་རྣམ་དཔྱོད་ངོམ་ཆོག་པ་ཞིག་ཡིན་སྐོར་བཀའ་ནན་བསྩལ་སོང་། དེང་སྐབས་བོད་པ་མ་ཡིན་པ་རྣམས་ནས་ཀྱང་ནང་ཆོས་ལ་དོ་སྣང་དང་བོད་ཡིག་ཐོག་སློབ་གཉེར་གནང་བཞིན་ཡོད་པས་བོད་མི་ཚོས་ཀྱང་བོད་ཡིག་དང་བོད་སྐད་བདག་གཅེས་ལེགས་པོ་གནང་དགོས་གལ་ཡིན་པ་སོགས་ལམ་སྟོན་བཀྲིན་ཆེ་བ་མཛད་ཡོད་པ་རེད། རྩ་བའི་ཆོལ་གསུམ་ཐུན་མོང་གི་ངོས་ནས་མགོན་པོ་༸གང་ཉིད་མཆོག་ལ་བརྟན་བཞུགས་ཀྱི་འབུལ་རྫས་གཙོ་བོ་ནི་ཐུབ་དབང་༸སྐུ་བརྙན་ ༡༡༤ དང་ཚེ་ལྷ་རྣམ་གསུམ། དེ་བཞིན་བྱང་ཆུབ་མཆོད་རྟེན་བཅས་ཕུལ་ཡོད་པ་དང་དེ་བཞིན་ཀ་རྡོར་སྒར་གསུམ་དང་སོ་ན་ཌ། དེ་བཞིན་ར་ཝང་ལ་བཅས་བོད་མིའི་གཞིས་སྒར་ནས་མགོན་པོ་༸གང་ཉིད་མཆོག་གི་བཀའ་དགོངས་བཞིན་བོད་ཀྱི་སྐད་ཡིག་སྲུང་སྐྱོབ་ཐད་འབད་པ་གང་ནུས་ཞུ་རྒྱུ་དང་༸པཎ་གྲུབ་བདུན་གྱི་ཞལ་ཐང་། སྒྲོལ་དཀར་ཡིད་བཞིན་འཁོར་ལོའི་༸སྐུ་བརྙན་བཅས་ཕུལ་ཡོད་པ་རེད། ཐེངས་འདིའི་བརྟན་བཞུགས་བསྟར་འབུལ་དང་འབྲེལ་ཀ་རྡོར་སྒང་གསུམ་དང་ར་ཝང་ལ་བཅས་ནས་བོད་མི་ཁྱོན་ ༡༧༨ ཙམ་ཆེད་བཅར་ཞུས་འདུག་པ་དང། ཆོལ་ཁ་གསུམ་མཐུན་མོང་གི་ཕྱོགས་ནས་རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་བཅས་ནས་མི་གྲངས་ ༧༠༠ ཙམ་བཅས་ཆེད་བཅར་ཞུས་སྟབས་ཁྱོན་བོད་མི་ ༡༠༠༠ ཙམ་ཆེད་འཛོམས་གནང་འདུག

བཞུགས་སྒར་ཉེ་འདབས་སུ་རྟེན་གཞི་བྱས་པའི་ཤེས་རབ་དགའ་ཚལ་སློབ་གླིང་དུ་བོད་ཁྱིམ་དང་སཾ་བྷོ་ཊ། ནོར་གླིང་མཐོ་སློབ། ས་རཱ་མཐོ་སློབ། སྨན་རྩིས་ཁང་མཐོ་སློབ། དེ་བཞིན་དགོན་སྡེ་ཁག་ཅིག བཅས་ཁྱོན་སློབ་གཉེར་ཁང་ ༡༦ གི་སློབ་མ་ཚོའི་དབར་སྐབས་གསུམ་པའི་བོད་ཀྱི་རྒྱུན་སྤྱོད་ཐ་སྙད་འགྲན་སྡུར་དང་བགྲོ་གླེང་གི་ཚོགས་འདུ་དབུ་འཛུགས་གནང་སོང་། བོད་ཀྱི་རྒྱུན་སྤྱོད་ཐ་སྙད་འགྲན་སྡུར་དང་བགྲོ་གླེང་དེ་ཐོག་མར་ཤེས་རབ་དགའ་ཚལ་སློབ་གླིང་གི་སློབ་མ་ཁག་ཅིག་གིས་དང་བླངས་ཐོག་ཕྱི་ལོ་ ༢༠༡༣ ལོར་དབུ་འཛུགས་གནང་བ་ཞིག་ཡིན་པ་དང་། དེ་རིང་ཟླ་ ༩ ཚེས་ ༣ ཉིན་སློབ་གཉེར་ཁང་དུ་སྐབས་གསུམ་པའི་བོད་ཀྱི་རྒྱུན་སྤྱོད་ཐ་སྙད་འགྲན་སྡུར་དང་བགྲོ་གླེང་ཐོག་མཉམ་ཞུགས་གནང་མཁན་མཐོ་སློབ་དང་བོད་སློབ། དེ་བཞིན་གྲྭ་བཙུན་དགོན་སྡེ་ཁག་གི་སྐུ་ཚབ་ཚོ་སྡེ་ཚན་ཆ་བགོས་ཀྱིས་དེ་དག་ལས་ཨང་རིམ་དང་པོ་སོན་པར་བྱ་དགའ་ཧིན་སྒོར་ ༣༠༠༠༠ དང་ཨང་རིམ་གཉིས་པ་སོན་པར་བྱ་དགའ་ཧིན་སྒོར་ ༢༠༠༠༠ ཐམ་པ་དང་ཨང་རིམ་གསུམ་པ་སོན་པར་བྱ་དགའ་ཧིན་སྒོར་ ༡༠༠༠༠ ཐམ་པ་བཅས་གནང་གི་འདུག ཐེངས་འདིའི་བོད་ཀྱི་རྒྱུན་སྤྱོད་ཐ་སྙད་ཚོགས་ཆུང་གི་ཚོགས་མི་དངོས་གྲུབ་ལགས་ཀྱིས་ཤེས་རབ་དགའ་ཚལ་སློབ་གླིང་གི་སློབ་མ་ཁག་ཅིག་གིས་དང་བླངས་ཐོག་ཆེད་གཉེར་གནང་བའི་བོད་ཀྱི་རྒྱུན་སྤྱོད་ཐ་སྙད་དང་འབྲེལ་བའི་དཔར་བསྐྲུན་དང་བོད་པའི་དགེ་བཙུན་དང་སློབ་མ་བཅས་ཀྱི་དབར་ཐ་སྙད་འགྲན་སྡུར་གོ་སྒྲིག་གནང་བའི་དགོས་དམིགས་གང་ཡིན་བཅས་ངོ་སྤྲོད་གནང་སོང་། སྐུ་མགྲོན་གཙོ་བོ་ཤེས་རིག་ལས་ཁུངས་ཀྱི་ཐ་སྙད་ཚན་པའི་འགན་འཛིན་ཨོ་རྒྱན་བསྟན་འཛིན་ལགས་ཀྱིས་ད་ལྟའི་ཆར་བོད་ཕྱི་ནང་གཉིས་ནང་བོད་ཀྱི་སྐད་ཡིག་གི་གནས་སྟངས་དེ་ཏོག་ཙམ་ཞན་པོ་ཆགས་ཡོད་སྟབས། ང་རང་ཚོའི་ངོས་ནས་༸གོང་ས་མཆོག་གིས་རྣམ་ཀུན་ནས་བོད་ཀྱི་སྐད་ཡིག་གི་གལ་གནད་རང་བཞིན་ཐོག་ལམ་སྟོན་བཀའ་ཕེབས་ལྟར་སྐད་ཡིག་འདི་མི་ཉམས་རྒྱུན་འཛིན་དང་སྲུང་སྐྱོབ་ཆེད་འབད་བརྩོན་གནང་དགོས་གལ་ཡིན་པའི་ལམ་སྟོན་གནང་ཡོད་པ་རེད། གཞན་ཡང་དངོས་གྲུབ་ལགས་ཀྱིས་མ་འོངས་པར་བོད་མིའི་མི་རབས་གསར་པ་ཚོས་བོད་ཀྱི་སྐད་ཡིག་རྒྱུན་རིང་གསོན་གནས་ཐུབ་པར་བོད་མིའི་གནས་ཡུལ་ཁག་ཏུ་ལས་འགུལ་འདི་ལྟ་བུ་རྒྱ་གང་ཆེ་སྤེལ་ཐུབ་པར་འབད་བརྩོན་གནང་རོགས་ཞེས་གཞེན་སྐུལ་གནང་སོང་། རྩ་བའི་བོད་ཀྱི་རྒྱུན་སྤྱོད་ཐ་སྙད་ཚོགས་ཆུང་ཞེས་པ་དེ་ཐོག་མེ་ཤེས་རབ་དགའ་ཚལ་སློབ་གླིང་གི་འཛིན་གྲྭ་ཞིག་གིས་རྐང་འགན་བཞེས་ཐོག་འཛིན་གྲྭ་ནང་ཁུལ་དབར་ཐ་སྙད་འགྲན་སྡུར་གནང་བ་དང་དེ་རྗེས་ལོ་མཇུག་ཏུ་སློབ་གྲྭ་ཕན་ཚུལ་བར་འགྲན་སྡུར་དང་བགྲོ་གླེང་གི་ལས་རིམ་སྤེལ་མགོ་བརྩམས་འདུག་ཅིང་། ཕྱི་ལོ་ ༢༠༡༣ ལོར་ཐེངས་དང་པོ་འགྲན་སྡུར་གནང་བ་དང་ཕྱི་ལོ་ ༢༠༡༤ ལོར་སློབ་གྲྭའི་སྤྱི་ཁྱབ་འགན་བདག་གིས་རྐང་འགན་བཞེས་ཐོག་ཐེངས་གཉིས་པའི་རྒྱུན་སྤྱོད་ཐ་སྙད་འགྲན་སྡུར་གནང་བ་མ་ཟད་ད་བར་ཐ་སྙད་གསར་སྒྲིག་གི་དཔེ་དེབ་ ༣ དཔར་བསྐྲུན་གནང་འདུག

ཉན་པ།: Listen ཕབ་ལེན། Download བཙན་བྱོལ་བོད་མིའི་མང་གཙོ་དབུ་བརྙེས་ནས་ལོ་ ༥༨ འཁོར་བའི་དུས་དྲན་སྲུང་བརྩི་ཞུས་པ། དམིགས་བསལ་ལེ་ཚན། ལོ་ངོ་ ༥༨ ཟིན་པའི་བཙན་བྱོལ་བོད་མིའི་མང་གཙོ། Sunday 02/09/2018 Dharamsala marks 58th Democracy Day, Tibetans urged to remember the great oath of 1960 Special feature: 58 years of Democracy in exile

ད་རིང་བཞུགས་སྒར་དྷ་རམ་ས་ལར་བཙན་བྱོལ་གཞུང་མང་ཡོངས་ནས་བོད་མིའི་མང་གཙོ་དབུ་བརྙེས་ཏེ་མི་ལོ་ ༥༨ འཁོར་བའི་དུས་ཆེན་སྲུང་བརྩི་ཞུས་པ་དང་འབྲེལ་བཀའ་སྤྱི་གཉིས་ནས་བོད་མིའི་མང་གཙོ་དེ་བཞིན་བོད་ཕྱི་ནང་གཉིས་ཀྱི་མངོན་འདོད་མཚོན་པའི་དམིགས་བསལ་ཁྱད་ཆོས་ལྡན་པའི་མང་གཙོ་ཞིག་ཡིན་པ་དང་། ཉེ་བའི་འཆར་བཙན་བྱོལ་བོད་མི་སྤྱི་ཚོགས་ཁྲོད་ཆོལ་ཁ་དང་ཆོས་ལུགས་འཐེན་ཁྱེར་ཀྱི་རྣམ་པ་ཞིག་བྱུང་བཞིན་ཡོད་པ་དེ་ནི་ཕྱི་ལོ ༡༩༦༠ ལོར་༸གོང་ས་མཆོག་གི་དབུ་འོག་ཏུ་རྡོག་རྩ་ཆིག་སྒྲིལ་བྱས་ཀྱི་ཡིན་ཞེས་པའི་མནའ་གན་མཐུ་མོ་ཆིའི་དམ་བཅའ་ཕུལ་བ་དེ་དང་བརྒལ་གྱི་ཡོད་པ་གསུངས་སོང་། དེ་ཡང་ད་རིང་གི་ཉིན་མོ་དེ་ནི་ ༡༩༦༠ ཐམ་པའི་ཕྱི་ཟླ་༩ཚེས་༢ཀྱི་ཉིན་བོད་མི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ནས་བོད་མི་ཡོངས་ལ་མང་གཙོ་གསོལ་བསྩལ་གནང་ནས་མི་ལོ་༥༨འཁོར་བའི་དུས་ཚིགས་ཁྱད་པར་བ་ཞིག་ཡིན་པ་དང་། བོད་མིའི་ལོ་རྒྱུས་ཁྲོད་ཀྱི་དུས་ཚིགས་ཁྱད་པར་བ་དེའི་ཐོག་ད་རིང་སྔ་དྲོ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྐུ་མགྲོན་གཙོ་བོར་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ ཀུན་ཝར་སྦ་ར་ཏན་དཱ་ར་སིང་མཆོག་དང་། བོད་མི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམ་པ། མི་མང་དང་སློབ་ཕྲུག་བཅས་བོད་མི་སེར་སྐྱ་མང་ཚོགས་བརྒྱ་ཕྲག་ཁ་ཤས་ལྷན་འཛོམས་ཐོག་ཉིན་མོ་དེ་སྲུང་བརྩི་གཟབ་རྒྱས་ཞུས་གནང་སོང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གོང་ས་༸སྐྱབས་མགོན་ཆེན་པོ་མཆོག་གིས་དགུང་ན་ཆུང་དུས་ནས་དགོངས་བཞེས་ཡོད་པ་ལྟར། ཐོག་མར་བོད་ནང་ལེགས་བཅོས་ལས་ཁང་གསར་འཛུགས་དང། དེ་ནས་བོད་ལ་དུས་འགྱུར་བྱུང་རྗེས་བཙན་བྱོལ་དུ་༡༩༦༠ ཟླ་ ༩ ཚེས ༢་ཉིན་དེང་དུས་དང་མཐུན་པའི་གཞུང་གི་འགྲོ་སྟངས་བཞིན་བོད་མི་ཡོངས་ཀྱི་ངོ་ཚབ་མཚོན་པའི་ཆོལ་གསུམ་ཆོས་བརྒྱུད་དང་བཅས་པའི་སྤྱི་འཐུས་ཐོག་མར་བསྐོ་འདེམས་བྱེད་ནས་བོད་མིའི་ཆབ་སྲིད་ཀྱི་རང་བཞིན་མང་གཙོའི་ལམ་ཕྱོགས་སུ་འཁྲིད་གནང་མཛད་པའི་འཕེལ་རིམ་ཞིབ་ཕྲ་ངོ་སྤྲོད་གནང་བ་ཆབ་གཅིག ད་ལྟའི་ཆར་བོད་མིའི་མཐོུང་མ་ཡིན་པའི་མང་གཙོའི་ལམ་སྲོལ་དེ་འཛམ་གླིང་གཞན་ལྟར་ཚད་དང་ལྡན་པའི་མང་གཙོ་ཆགས་ཡོད་པ་དེ་ལྟར་ཡང། ཉེ་བའི་འཆར་བཙན་བྱོལ་བོད་མི་སྤྱི་ཚོགས་ཁྲོད་ཆོལ་ཁ་དང་ཆོས་ལུགས་ཀྱི་འཐེན་ཁྱེར་དེས་བོད་མི་ནང་ཁུལ་གྱི་མཐུན་ལམ་དང་ཆིག་སྒྲིལ་ལ་དོ་ཕོག་འགྲོ་བཞིན་པ་དེ་ཧ་ཅང་ཐབས་སྐྱོ་བོ་ཡིན་པ་མ་ཟད། དེ་ནི་ཕྱི་ལོ ༡༩༦༠ ལོར་༸གོང་ས་མཆོག་གི་དབུ་འོག་ཏུ་རྡོག་རྩ་ཆིག་སྒྲིལ་བྱས་ཀྱི་ཡིན་ཞེས་ཕུལ་བའི་མནའ་གན་མཐུ་མོ་ཆེ་དམ་བཅའ་དང་ཡོངས་སུ་བརྒལ་གྱི་ཡོད་པ་གསུངས་སོང་། སྲིད་སྐྱོད་མཆོག་གིས་སྐབས་དེར་ད་དུང་འདས་པའི་མི་ལོ་༦༠ནང་རྒྱ་ནག་གཞུང་གི་དྲག་པོའི་སྲིད་བྱུས་འོག་བོད་ནང་གཞི་རྩའི་འགྲོ་བ་མིའི་ཐོབ་ཐང་ཙམ་ཡང་མེད་པར་དུས་དང་རྣམ་པ་ཀུན་ཏུ་དངངས་སྐྲག་འོག་གནས་བཞིན་ཡོད་པ་མ་ཟད། ཉེ་ཆར་ཞོ་སྟོན་སྐབས་བོད་ཀྱི་རྒྱལ་ས་ལྷ་སར་དམག་མི་ཕོན་ཆེན་འགྲེམས་འཇོག་དང་། དགོན་སྡེ་ཁག་ཏུ་ཡོད་པའི་གྲ་བཙུན་དགོང་ལོ་༡༨མན་ཆད་རྣམས་ངེས་པར་དུ་གུང་ཁྲན་ཏང་གི་སློབ་གྲྭ་བཏང་དགོས་པ་ལས་ཅི་སྟེ་སློབ་གྲྭར་མ་བཏང་བ་ཡིན་ན་མ་བུ་གཉིས་ཀར་ཉེས་ཆེད་གཏང་རྒྱུ་ཡིན་པའི་བཀོད་ཁྱབ་དང་། སློབ་ཕྲུག་ཚོར་ཆ་མཚོན་ན་སློབ་གྲྭའི་དགུང་གསེང་སྐབས་ཆོས་ཕྱོགས་ཀྱི་བྱེད་སྒོར་བཞུགས་མི་ཆོག་པ་ལ་སོགས་ཀྱི་བཀོད་ཁྱབ་བཏང་ནས་བོད་ནང་ཆོས་དད་རང་དབང་ཐོག་དམ་དྲག་བྱས་མུས་ཡིན་པ་ནི་རྒྱ་ནག་རང་ཉིད་ཀྱི་རྩ་ཁྲིམས་དང་གྲངས་ཉུང་མི་རིགས་ཀྱི་ཁྲིམས། དེ་བཞིན་རྒྱལ་སྤྱི་འགྲོབ་མིའི་ཐོབ་ཐང་བཅས་དང་ཡོངས་སུ་བརྒལ་བཞིག་ཡིན་པ་གསུངས་སོང་བ་མ་ཟད། བོད་མིའི་ཐོག་སྲིད་བྱུས་ལག་བསྟར་བྱེད་མཁན་གྱི་དབང་འཛིན་པ་ཚོས་བྱེད་བབ་དེ་དག་ནི་སྲིད་འཛིན་ཞི་ཅིན་པིང་གིས་དེ་སྔོན་“རྒྱ་ནག་གི་རིག་གཞུང་དར་འཕེལ་ཡོང་བར་ནང་ཆོས་ཀྱིས་ནུས་པ་འདོན་ཐུབ་”ཅེས་ཡོངས་གྲགས་ཐོག་ངོས་ལེན་བྱས་ཡོད་པ་དེ་དང་ཡོངས་སུ་འགལ་བ་ཞིག་ཆགས་ཀྱི་ཡོད་སྐོར་གསུངས་སོང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་གཏན་འཕེལ་མཆོག་གིས་༸གོང་ས་མཆོག་ནས་ཐབས་མཁས་ཐུགས་རྗེ་ཆེན་པོས་བོད་མི་ཡོངས་ལ་གསོལ་བསྩལ་གནང་བའི་མང་གཙོའི་ལམ་ལུགས་དེ་ནི་གྲོས་ཚོགས་དབུས་སུ་བཞག་པའི་མང་གཙོའི་ལམ་སྲོལ་དམིགས་བསལ་བ་ཞིག་ཡིན་སྐོར་འགྲེལ་བརྗོད་དང་འབྲེལ། བོད་དོན་བདེན་མཐའ་སེལ་ཐབས་བྱ་རྒྱུར་མེད་དུ་མི་རུང་བའི་ཆ་རྐྱེན་གཅིག་ནི་བོད་མི་ཡོངས་རྫོགས་མཐུན་སྒྲིལ་དམ་ཚིག་འོ་ཆུ་གཅིག་འདྲེས་གནང་དགོས་པ་དེ་ཡིན་སྐོར་ནན་བརྗོད་གནང་སོང་། ད་དུང་རྒྱ་ནག་གཞུང་ལ་དུས་དང་སྤྱི་ཚོགས་ཀྱི་འགྱུར་འགྲོས་ལ་བརྟེན་ནས་མཁྲེགས་བཟུང་གི་སྲིད་བྱུས་དོར་ཏེ་བོད་རྒྱ་གཉིས་སྨན་གྱི་ཐབས་ལམ་བརྒྱུད་དེ་གང་མགྱོགས་འབྲེལ་མོལ་འགོ་འཛུགས་དགོས་རྒྱུའི་འབོད་སྐུལ་བསྐྱར་ནན་ཞུས་སོང་།

ཉན་པ།: Listen ཕབ་ལེན། Download བྱང་ཨ་རིའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་རྟགས་མའི་རྐང་སྤོལ་རྩེད་འགྲན་ཐེངས་ ༢ དབུ་འཛུགས། སེར་བྱེས་གྲྭ་ཚང་གིས་ཀེ་ར་ལ་མངའ་སྡེའི་ནང་ཆུ་ལོག་གི་གོད་ཆག་ཕོག་པར་རོགས་རམ་གནང་བཞིན་པ། ཚེས་བཅུ་སྒྲོལ་མ་ལགས་ཕྱི་ལོ་ ༢༠༡༨ ལོའི་ཨེ་ཤ་ཡའི་ཕུལ་བྱུང་ན་གཞོན་ཁོངས་སུ་མིང་འདོན་བྱས་འདུག ཐེ་ཝན་དང་བོད་ཀྱི་འགྲོ་བ་མིའི་ཐོབ་ཐང་ཚོགས་པའི་སྐོར་གླེང་མོལ། Saturday 01/09/2018 2018 North America GCM Gold Cup football tournament begins in NY Sera Jey monks help Kerala flood victims Tsechu Dolma listed under 2018 Asia 21 young leaders Human Rights Network for Taiwan and Tibet: Interview

འདི་ལོའི་བྱང་ཨ་རིའི་རྒྱལ་ཡུམ་ཆེན་མོའི་དྲན་རྟེན་རྐང་སྤོལ་རྩེད་འགྲན་ཐེངས་གཉིས་པ་ཨ་རིའི་གྲོང་ཁྱེར་ནིའུ་ཡོག་གི་Randal Island Park རྩེད་ཐང་དུ་ཁ་སང་ཚེས་ ༣༡ ཉིན་དབུ་འཛུགས་གནང་འདུག ཐེངས་འདིའི་རྩེད་འགྲན་ཐོག་ཁེ་ན་ཌ་དང་ཨ་རི་ཁུལ་གྱི་ས་ཕྱོགས་འདྲ་མིན་གྱི་ཁྱོན་རུ་ཁག་ ༡༦ ནས་མཉམ་ཞུགས་གནང་འདུག་པ་དང། རྩེད་འགྲན་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་གཙོས་བོད་རྒྱལ་ཡོངས་རྩེད་རིགས་ཚོགས་པའི་སྐུ་ཚབ་ཀརྨ་དངོས་གྲུབ་ལགས། དེ་བཞིན་བྱང་ཨ་རིའི་ནང་རྟེན་གཞི་བྱས་པའི་ཚོགས་པ་ཁག་གི་སྐུ་ཚབ་དང་གཟིགས་མོ་བ་མང་དག་ཞིག་ཕེབས་ཡོད་པ་རེད་འདུགསྐབས་དེར་གོ་སྒྲིག་ཚོགས་ཆུང་ནས་རྩེད་འགྲན་དེའི་ནང་མཉམ་ཞུགས་གནང་མཁན་རུ་ཁག་སོ་སོའི་དགོས་དམིགས་བོད་དབྱིན་གཉིས་ནང་ངོ་སྤྲོད་གནང་བ་དང་སྦྲགས།  བོད་རྒྱལ་ཁབ་ཆེན་པོའི་རྒྱལ་དར་འགྲེམ་སྟོན་གནང་ཐོག་རྒྱལ་དར་གྱི་བྱུང་རིམ་ལོ་རྒྱུས་དང་། ལྷག་དོན་ཕྱི་ལོ་ ༡༩༣༤ ལོར་རྒྱལ་སྤྱིའི་ NatGeo དུས་དེབ་ཐོག་བོད་ཀྱི་རྒྱལ་དར་སྐོར་ཐོན་པའི་ངོ་སྤྲོད་དང་འབྲེལ་བོད་མི་ཚོས་དེར་སྤོབས་པ་གནང་དགོས་སྐོར་སོགས་འགྲེལ་བརྗོད་གནང་འདུག    དེ་རྗེས་མཉམ་ཞུགས་པ་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་བླངས་པ་དང་ས་གནས་དེར་གནས་བཞུགས་ལྷ་མོ་ཚོགས་པ་ནས་༸གོང་ས་མཆོག་ལ་ཆེ་བསྟོད་ཀྱི་རྣམ་ཐར་ཕུལ་བའི་ཐོག་མཛད་སྒོ་དབུ་འཛུགས་གནང་འདུག སྐབས་དེར་སྐུ་གྲོན་གཙོ་བོ་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་རྩེད་མོའི་སྒོ་ནས་བོད་མི་ཡོངས་མཉམ་འཛོམས་ཐུབ་པར་དགའ་བསུ་གནང་བ་དང་འབྲེལ། རྩེད་མོ་དང་སྒྱུ་རྩལ་གྱི་ཐོག་ནས་བོད་དོན་འཐབ་རྩོད་གནང་དགོས་སྐོར་། དེ་བཞིན་རྒྱལ་སྤྱིའི་སྡིངས་ཆའི་སྟེང་བོད་མི་ཚོས་དཔུང་པ་མཉམ་གཤིབས་ཐོག་འགྲན་བསྡུར་གནང་ཐུབ་པའི་རེ་བ་དང་།  རྩེད་འགྲན་སྐབས་སུ་དྲང་བདེན་གནང་དགོས་གལ་སྐོར་གསུངས་འདུག དེ་བཞིན་བོད་རྒྱལ་ཡོངས་རྩེད་རིགས་ཚོགས་པའི་སྐུ་ཚབ་ཀརྨ་དངོས་གྲུབ་ལགས་ཀྱིས་བྱང་ཨ་རིའི་ནང་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་དེ་གནང་དོན་དང་མ་འོངས་པར་རྩེད་རིགས་གཞན་གི་ཐོག་ནས་ཀྱང་གཞོན་སྐྱེས་ཚོར་སྡིངས་ཆ་བསྐྲུན་ཐབས་གནང་རྒྱུ་ཡིན་པ་གསུངས་འདུག ཁ་སང་ཉིན་དང་པོའི་རྩེད་འགྲན་ལས་ཐོག་མ་ Snow Lion Fc NewYork རྐང་སྤོལ་རུ་ཁག་དང་ Tibetan Phoenix FC རྐང་སྤོལ་རུ་ཁག་གཉིས་དབར་རྩེད་འགྲན་གནང་ཡོད་པ་ལྟར་སྤོ་ལོ་གསུམ་དང་ཀླད་ཀོར་ཐོག་ནས་ནིའུ་ཡོག་གངས་སེང་རུ་ཁག་ལ་རྒྱལ་ཁ་ཐོབ་འདུག གཞི་རྩའི་རྩེད་འགྲན་དེ་ཁ་སང་ནས་དབུ་འཛུགས་ཀྱིས་ཟླ་ ༩ ཚེས་ ༢ བར་རྩེད་གནང་གི་འདུག  བྱང་ཨ་རིའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྩེད་འགྲན་དེ་ཐོག་མར་ཕྱི་ལོ་ ༢༠༡༦ ལོར་༸སྐུའི་༸རྒྱལ་ཡུམ་ཆེན་མོར་བཀའ་དྲིན་རྗེས་དྲན་ཞུ་ཕྱིར་དབུ་འཛུགས་གནང་ཡོད་པ་དང་། རྩེད་འགྲན་ཐེངས་དང་པོ་དེ་ཁེ་ན་ཌའི་རྒྱལ་ས་ཊོ་རན་ཊོ་ནང་ཚུགས་པ་མ་ཟད་སྐབས་དེ་དུས་ཊོ་རན་ཊོའི་ཆོལ་གསུམ་རུ་ཁག་ནས་གསེར་གྱི་རྟགས་མ་བཞེས་ཡོད་པ་རེད།