Monthly Archives: September, 2022

ཉན་པ།: Listen ཕབ་ལེན། Download ཞི་ཅིན་ཕིང་སྲིད་འཛིན་གྱི་གོ་གནས་ལ་མུ་མཐུད་གནས་མི་གནས་ཀྱིས་བོད་དོན་ལ་ཁྱད་པར་མེད། རྒྱ་ནག་གི་མི་སེར་སྤེལ་ཡུལ་དང་བཙན་བཟུང་འོག་གནས་པའི་མང་ཚོགས་ཀྱི་མངོན་འདོད་ཅེས་པའི་བགྲོ་གླེང་། ཕྱི་དྲིལ་བཀའ་བློན་མཆོག་གིས་ཡོ་རོབ་ཁུལ་དུ་གཞུང་འབྲེལ་འཚམས་གཟིགས་གནང་བ། ཞི་ཅིན་ཕིང་གི་འགོ་ཁྲིད་འོག་རྒྱ་ནག་གི་ཆེ་མཐོང་ཇེ་སྡུག་ཏུ་སོང་བར་མངོན་གསལ། བོད་མི་མང་སྤྱི་འཐུས་གཉིས་ཀྱི་ཕྱོགས་བསྐྱོད་ད་དང་འབྲེལ་བའི་བཅར་འདྲི།   Friday 30/09/2022 Civil Society groups including Tibetans protest against Chinese National Day Experts ask the world to confront China for its colonialist deeds DIIR Kalon on official tour in Europe Opinion of China in advanced economies sours 'precipitously' under Xi – Pew Visiting Tibetan MPs meet Pondicherry CM    

རང་དབང་དང་ཞི་བདེ་ལ་དགའ་མོས་ཡོད་མཁན་འགྲོ་བ་མིའི་ཐོབ་ཐང་དོན་གཉེར་བ་རྣམས་ཀྱིས་ཆིག་སྒྲིལ་གྱི་ཐོག་ནས་རྒྱ་ནག་གི་མི་གཅིག་དབང་སྒྱུར་རིང་ལུགས་རྒྱ་སྐྱེད་བྱེད་བཞིན་པར་གདོང་ལེན་གནང་དགོས་ཞེས་གསུངས་ཏེ་རྒྱ་ནག་རྒྱལ་སྟོན་གྱི་ཉིན་མོ་སྔ་སྣུར་ལ་ཐེ་ཝན་ནང་ཡོད་པའི་གཞུང་འབྲེལ་མིན་པའི་ཚོགས་པ་འགས་ལས་འགུལ་སྤེལ་སོང་།སང་ཉིན་ཕྱི་ཟླ་ ༡༠ ཚེས་ ༡ ཉིན་མོ་དེ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ་ངོ་ ༧༣ འཁོར་བའི་ཉིན་མོ་ཡིན་པ་དང་དེ་བཞིན་རིང་མིན་རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་ཉི་ཤུ་པ་འཚོགས་གྲབས་དང་བསྟུན། དེ་རིང་སྔ་དྲོ་ཕྱག་ཚོད་ ༡༠ ཐོག་ཐེ་ཝན་གྲོས་ཚོགས་མདུན་དུ་བོད་དང་ཐེ་ཝན་འགྲོ་བ་མིའི་ཐོབ་ཐང་གི་འབྲེལ་མཐུད་ཁང་གིས་གཙོ་འགན་བཞེས་ཏེ་གཞུང་འབྲེལ་མིན་པའི་ཚོགས་པ་མང་དག་ཅིག་མཉམ་རུབ་ཐོག་ནས་འགྲོ་བ་མིའི་ཐོབ་ཐང་ནམ་ཡང་བློས་བཏང་གནང་མི་སྲིད། རྒྱ་ནག་གཅིག་སྡུད་རིང་ལུགས་ལ་ཁ་གཏད་གཅོག་དགོས་ཞེས་པའི་འཕྲེད་དར་བསྣམས་ནས་གསར་འགོད་ལྷན་ཚོགས་གནང་ཡོད་པར་མ་ཟད་ཉིན་རྒྱབ་ཏུ་ཐེ་པིར་ཡོད་པའི་རྒྱ་ནག་དངུལ་ཁང་མདུན་དུ་འདུ་འཛོམས་ཀྱིས་གཏམ་བཤད་སྤེལ་བ་དང་ཕྱི་དྲོའང་དེ་འབྲེལ་གྱི་ལས་འགུལ་སྤེལ་ཡོད།ཚོགས་པ་ཁག་མཉམ་རུབ་ཀྱིས་གསར་འགོད་བསྒྲགས་གཏམ་སྤེལ་བའི་ནང་རྒྱ་ནག་གཅིག་སྡུད་རིང་ལུགས་ཀྱི་སྲིད་གཞུང་གིས་ཡུན་རིང་ནས་རྒྱ་ནག་ནང་རང་དབང་དང་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་མུས་ཡིན་པ་དང་། ལྷག་པར་ཐེ་ཝན་ལ་མུ་མཐུད་འཇིགས་སྐུལ་དང་དཔལ་འབྱོར་སྟོབས་ཤུགས་སོགས་སྤྱོད་ནས་ཐུབ་ཚོད་གཏོང་བཞིན་ཡོད་སྟབས་རང་དབང་དང་ཞི་བདེ་ལ་དགའ་མོས་གནང་མཁན་གྱི་འགྲོ་བ་མིའི་ཐོབ་ཐང་དོན་གཉེར་བ་རྣམས་ཀྱིས་འགྲོ་བ་མིའི་ཐོབ་ཐང་སྲུང་སྐྱོབ་སླད་རྒྱ་ནག་ལ་གདོང་ལེན་གནང་རྒྱུ་དམ་བཅའ་བཞག་ནས་རྒྱ་ནག་གི་མི་གཅིག་དབང་སྒྱུར་རིང་ལུགས་རྒྱ་སྐྱེད་བྱེད་བཞིན་པར་རྡོག་ཏུ་བསྒྲིལ་ནས་གདོང་ལེན་གནང་དགོས་ཞེས་གསུངས་འདུག གཞུང་དང་ཚོགས་སྡེ་ཁག་གིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་བཏང་བར་སྐྱོན་བརྗོད་རིམ་པ་གནང་ཁག་རྒྱ་གཞུང་གི་ངོས་ནས་ངོས་ལེན་རྩ་བ་ནས་བྱེད་ཀྱི་མེད་པའི་ཁར་རྒྱ་ནག་གིས་ཡར་རྒྱས་ལ་ཁག་དཀྲི་བྱས་ཏེ་བརྩི་མེད་རྡོག་རོལ་གཏོང་བཞིན་པ་ལས་ང་ཚོས་མུ་མཐུད་སྲུང་སྐྱོབ་སླད་ལས་འགུལ་སྤེལ་རྒྱུ་ཡིན་ཞེས་དང་། རྒྱ་ནག་དམར་ཤོག་ཚོགས་པར་གདོང་ལེན་ཆེད་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་ཚོ་ངེས་པར་དུ་མཉམ་ལས་གནང་དགོས་པ་དང་རྒྱ་ནག་ལ་མགོ་བཏགས་ནམ་ཡང་ཞུ་རྒྱུ་མེད་ཅེས་གསུངས་འདུག ཐེ་ཝན་དང་བོད་ཀྱི་འགྲོ་བ་མིའི་ཐོབ་ཐང་གི་འབྲེལ་མཐུད་ཁང་གི་འགན་འཛིན་གཞོན་པ་བཀྲིས་ཚེ་རིང་ལགས་ཀྱིས་འདི་ག་རླུང་འཕྲིན་ཁང་ལ་ཐེ་ཝན་གྱི་ལས་འགུལ་སྐོར་གསུངས་དོན། རྒྱ་ནག་གཞུང་གིས་ད་བར་དབང་ཤུགས་དང་དཔལ་འབྱོར་སྟོབས་ཤུགས་སྤྱོད་ནས་འཁྱོག་བཤད་དྲིལ་བསྒྲགས་དང་གནོན་ཤུགས་སོགས་སྤྲོད་བཞིན་ཡོད་པ་དེ་ལྟར་ནའང་ད་ཆ་འཛམ་གླིང་གི་རྒྱལ་ཁབ་རྣམས་ཀྱིས་རྒྱ་ནག་གི་བྱུས་ངན་སོགས་མཁྱེན་གྱི་ཡོད་སྟབས་སྔོན་ལྟར་གནས་མེད་པ་དང་སྒོས་བོད་མི་རྣམས་ཀྱིས་འཐབ་རྩོད་ཐོག་མུ་མཐུད་ཕྱག་ལས་གནང་གལ་ཆེ་བར་མ་ཟད་ལྷག་དོན་ཞི་ཅིན་ཕིང་སྲིད་འཛིན་གྱི་གོ་གནས་ལ་མུ་མཐུད་གནས་མི་གནས་ཀྱིས་བོད་དོན་ལ་ཁྱད་པར་གང་ཡང་མེད་པས་བོད་ཀྱི་མི་རབས་གཉིས་པ་དང་གསུམ་པ་རྣམས་ཀྱིས་འགན་གཙོ་བཞེས་ཐོག་བོད་དོན་བདེན་མཐའ་སེལ་སླད་སྐུ་ལས་སྐྱོན་དགོས་ཞེས་གསུངས་ཡོད།

ཨ་རི་ནང་རྟེན་གཞི་བྱས་པའི་ Pew Research Center ཞེས་པའི་ཉམས་ཞིབ་ལྟེ་གནས་ཁང་གིས་ཨ་རིས་གཙོས་པའི་འཛམ་གླིང་ནང་གི་ཡར་ཐོན་ཅན་གྱི་རྒྱལ་ཁབ་ཁག་གི་མང་ཚོགས་ཁྲོད་ལ་རྒྱ་ནག་ལ་གཟིགས་སྟངས་ཇི་ཡོད་དང་འབྲེལ་བའི་དཔྱད་ཞིབ་གནང་བའི་གྲུབ་དོན་ལ་འདས་པའི་ཞི་ཅིན་ཕིང་གི་འགོ་ཁྲིད་འོག་རྒྱ་ནག་ཐད་མང་ཚོགས་ཀྱི་གཟིགས་སྟངས་ཧ་ཅང་ཞན་དུ་སོང་ཡོད་པ་བཀོད་འདུག རིང་མིན་ཟླ་བ་རྗེས་མའི་ཚེས་ ༡༦ ནས་བཟུང་རྒྱ་ནག་གི་རྒྱལ་ས་པེ་ཅིང་དུ་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་ཐེངས་ ༢༠ པ་འགོ་འཛུགས་དང་བསྟུན་ཚོགས་ཆེན་ཐོག་ནས་ཞི་ཅིན་ཕིང་གིས་སྲིད་འཛིན་ལས་ཡུན་གསུམ་པ་འཛིན་ངེས་ལ་ངོས་འཛིན་བྱེད་བཞིན་པ་དང་རྒྱ་ནག་གི་དཔལ་འབྱོར་སྟོབས་ཤུགས་ཇེ་ཆེར་འཕེལ་བཞིན་པ་དེར་ལྷོ་ཨ་མི་རི་ཀ་དང་ཨ་ཕི་ར་ཀ། དེ་བཞིན་དཀྱིལ་ཤར་ཡུལ་གྲུ་ཁག་གཅིག་གིས་བཟང་ཕྱོགས་ཐོག་ནས་གཟིགས་ཀྱི་ཡོད་ཀྱང་། ཨ་རི་དང་ཨོ་སི་ཊི་ལི་ཡ། ཉི་ཧོང་སོགས་སྟོབས་ཆེན་རྒྱལ་ཁབ་ཁག་གཅིག་གིས་རྒྱ་ནག་དེ་དཀའ་ངལ་ཆེན་པོ་ཞིག་ལ་ངོས་འཛིན་གནང་བཞིན་ཡོད་པ་རེད། Pew ཉམས་ཞིབ་ལྟེ་གནས་ཁང་གིས་ཁ་སང་ཚེས་ ༢༩ ཉིན་འདོན་སྤེལ་གནང་བའི་དཔྱད་ཞིབ་ཀྱི་གྲུབ་དོན་ནང་། དེ་སྔ་ཕྱི་ལོ་ ༢༠༠༢ ནས་ ༢༠༡༧ བར་ནུབ་ཕྱོགས་ཀྱི་ཡར་ཐོན་རྒྱལ་ཁབ་དེ་དག་ནང་རྒྱ་ནག་ཐོག་ལྟ་སྟངས་དེ་ཕྲན་བུ་ཞན་པོ་ཡོད་ཀྱང་འགྲོ་བ་མིའི་ཐོབ་ཐང་དང་དམག་དོན་ཤུགས་རྐྱེན་སོགས་ཀྱི་གནད་དོན་ཁྲོད་ཕྱི་ལོ་ ༢༠༡༩ དང་ ༢༠༢༠ ལོར་རྒྱ་ནག་ཐོག་གཟིགས་སྟངས་ཆེས་ཇེ་སྡུག་ཏུ་སོང་ཡོད་སྐོར་བཀོད་འདུག གཙོ་བོ་ཕྱི་ལོ་ ༢༠༡༩ ལོར་རྒྱ་ནག་གི་གྲོང་ཁྱེར་ཝུ་ཧན་ Wuhan ནས་ཆེས་ཐོག་མར་མཆེད་པའི་ཏོག་དབྱིབས་ནད་དུག་གློ་ཚད་གསར་པའི་ནད་རིམས་ཁྱབ་གདལ་ལ་སྟངས་འཛིན་ལེགས་པོ་བྱས་མེད་པའི་གནས་སྟངས་དང་ཨ་རྒྱ་གཉིས་དབར་ཚོང་འབྲེལ་ཐད་གདོང་ཐུག དྲག་ཤུལ་ཅན་གྱི་ཕྱི་འབྲེལ་སྲིད་བྱུས། དེ་བཞིན་ལྷོ་རྒྱ་ནག་རྒྱ་མཚོ་ཐོག་རྒྱ་ནག་གི་དམག་སྟོབས་ཆེ་རུ་བཏང་བ་སོགས་ཀྱི་གནད་དོན་ལས་གཟིགས་ཚུལ་དེ་ལྟར་ཇེ་སྡུག་ཏུ་སོང་བར་མངོན་གསལ་གནང་འདུག་པ་དང་ཆབས་ཅིག ཨ་རིས་གཙོས་པའི་ལྷོ་ཀོ་རི་ཡ། དབྱིན་ཡུལ་བཅས་ཀྱི་མང་ཚོགས་ཁྲོད་ནས་རྒྱ་ནག་ཐོག་ལྟ་སྟངས་དེ་ལོ་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་པར་གཟིགས་སྣང་ཡོད་མཁན་ཀྱི་བརྒྱ་ཆ་ཇེ་འཕར་འགྲོ་མུས་ཡིན་པར་ཆེས་གསལ་གནང་འདུག Pew ཉམས་ཞིབ་ལྟེ་གནས་ཁང་གི་ཉམས་ཞིབ་པ་རྒན་པ་ལྕམ་སྐུ་ Laura Silver ལགས་ཀྱིས་ Reuters གསར་ཁང་ལ་འཛམ་གླིང་ནང་གི་དཔལ་འབྱོར་གྱི་སྟོབས་ཤུགས་ཆེས་ཆེར་རྒྱས་བཞིན་པའི་རྒྱལ་ཁབ་ཚོའི་མང་ཚོགས་ཀྱི་ངོས་ནས་རྒྱ་ནག་གི་སྲིད་འཛིན་ཞི་ཅིན་ཕིང་ལ་གོ་ལ་སྤྱིའི་འགན་འཁུར་གྱི་གདེང་སྤོབས་རྩ་བ་ནས་མེད་པར་གཟིགས་སྟངས་ཤིག་ཡོད་པར་འགྲེལ་བརྗོད་གནང་འདུག་ལ། དེ་བཞིན་ཁོང་གིས་ཨོ་སི་ཊོ་ལི་ཡ་གཙོ་གྱུར་ཁེ་ན་ཌ་དང་ཉི་ཧོང་། ལྷོ་ཀོ་རི་ཡ་སོགས་ཀྱིས་རྒྱ་ནག་དང་ཚོང་འབྲེལ་བཅད་ནས་ཨ་རི་དང་ཚོང་འབྲེལ་དམ་ཟབ་གཏོང་བཞིན་ཡོད་པ་གསུངས་ཡོད། ལྷག་པར་དུ་བྱང་ཨ་རི་དང་ཡོ་རོབ་རྒྱལ་ཁབ་ཚོས་རྒྱ་ནག་དང་ཚོང་འབྲེལ་ལས་འགྲོ་བ་མིའི་ཐོབ་ཐང་གི་གནས་སྟངས་དེ་གལ་གནད་ཆེ་ཤོས་ལ་ངོས་འཛིན་གནང་གི་ཡོད་པ་དེ་ལྟར་ནའང་། ཨིཛ་རེལ་དང་མ་ལེ་ཤ་ཡ། སིངྒ་པུར། ལྷོ་ཀོ་རི་ཡ་སོགས་མང་ཆེ་བས་རྒྱ་ནག་དང་མཉམ་དུ་ཚོང་འབྲེལ་རྒྱུན་གནས་ཐུབ་ཐབས་གནད་ཆེར་ངོས་འཛིན་བྱེད་ཀྱི་ཡོད་སྐོར་འགྲེལ་བརྗོད་གནང་འདུག རྩ་བའི་ Pew ཉམས་ཞིབ་ལྟེ་གནས་ཁང་གིས་རེས་གཟའ་ལྷག་པར་ཨ་རིས་གཙོས་པའི་ཡོ་རོབ་རྒྱལ་ཁབ་ཁག་གི་མང་ཚོགས་ཕལ་མོ་ཆེས་རྒྱ་ནག་ཐོག་གཟིགས་ཕྱོགས་ཇེ་ཞན་ཇེ་སྡུག་ཏུ་འགྲོ་བཞིན་པའི་དགོངས་འཆར་ཡོད་པའི་དཔྱད་ཞིབ་གྲུབ་དོན་དཔར་བསྐྲུན་གནང་རྗེས་ཕྱི་ཉིན་དེར་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ Wang Wenbin ཡིས་རྒྱུན་གཏན་གསར་འགོད་ལྷན་ཚོགས་བརྒྱུད་ལྟེ་གནས་ཁང་གིས་དཔར་བསྐྲུན་གནང་བའི་རྒྱ་ནག་ལ་གཟིགས་སྟངས་ཀྱི་གྲུབ་དོན་ལ་ངོས་ལེན་མེད་པ་དང་དེས་གོ་ལའི་མི་འབོར་མང་བའི་དགོངས་འཆར་མཚོན་གྱི་མེད་པར་དགག་པ་བྱས་འདུག་པར་མ་ཟད། རྒྱ་ནག་མང་ཚོགས་ཐེར་འབུམ་ ༡།༤ ཡིས་ཞི་ཅིན་ཕིང་ལ་རྒྱབ་སྐྱོར་དང་གུས་བརྩི་ཞུ་བཞིན་ཡོད་སྐོར་བཤད་འདུག པར་སྤྱི་ཚོགས་དྲ་རྒྱ་ལས་བཏུས།

བོད་མི་མང་སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས་དང་སྤྱི་འཐུས་བློ་བཟང་རྒྱ་མཚོ་སྲི་ཐར་ལགས་རྣམ་གཉིས་ཀྱིས་ཟླ་ ༩ ཚེས་ ༢༥ ནས་ ༢༨ བར་རྒྱ་གར་ལྷོ་ཕྱོགས་ཀྱི་གྲོང་ཁྱེར་ཅེ་ན་ཡའི་དང་ཨོ་རོ་ཝི་ལེ། པོན་ཌི་ཅེ་རིའི་བཅས་ལ་གཞུང་འབྲེལ་ཕྱོགས་ཕེབས་གནས་ཏེ་པོན་ཌི་ཅེ་རིའི་མངའ་སྡེའི་སྤྱི་ཁྱབ་བློན་ཆེན་དང་མངའ་སྡེའི་གྲོས་ཚོགས་ཚོགས་གཙོར་མཇལ་འཕྲད་གནང་བ་གཙོས་བོད་དོན་རྒྱབ་སྐྱོར་བ་དང་། ཨ་རི་དང་ཐེ་ཝན་གྱི་གཞུང་ཚབ་ཁང་གི་གནད་ཡོད་མི་སྣ། དེ་བཞིན་བོད་རིགས་སློབ་མ་དང་ཐུག་འཕྲད་ཀྱིས་གཞུང་འབྲེལ་ཕྱོགས་ཕེབས་ལེགས་གྲུབ་བྱུང་ཡོད་པ་རེད། རླུང་འཕྲིན་ཁང་གིས་སྤྱི་འཐུས་བློ་བཟང་རྒྱ་མཚོ་སྲི་ཐར་ལགས་སུ་ཕྱོགས་བསྐྱོད་དང་འབྲེལ་ནས་ཞལ་པར་བརྒྱུད་བཀའ་འདྲི་འགའ་ཞིག་ཞུས་གཤམ་ལ་གསན་རོགས།

དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཁ་སང་ཕྱི་ཚེས་ ༢༩ ཉིན་ཡོ་རོབ་རྒྱལ་ཁབ་ཨི་ཊ་ལིའི་རྒྱལ་ས་རོམ་དུ་ཕེབས་འབྱོར་དང་འབྲེལ་ཏེ་འཁྱུར་ལ་ཉེ་བའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མིས་གཙོས་པའི་ས་གནས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་དང་མཇལ་མོལ་གནང་བ་བརྒྱུད་ད་བར་བོད་དོན་ལ་རྒྱབ་སྐྱོར་རྒྱ་ཆེར་གནང་བར་ཐུགས་རྗེ་ཆེ་ཞུས་པ་དང་། ལྷག་པར་དེ་རིང་ཕྱི་ཚེས་ ༣༠ ཉིན་བཀའ་བློན་མཆོག་ལ་ཇི་ལྟར་མགྲོན་འབོད་ཞུས་པ་ལྟར་ཁུལ་དེའི་ Perugia གྲོང་ཁྱེར་ནང་ཨི་ཊ་ལི་བོད་དོན་རྒྱབ་སྐྱོར་ཚོགས་པ་དང་ས་གནས་གྲོང་སྡེ་ལྷན་ཁང་གཉིས་ཟུང་འབྲེལ་གྱིས་གོ་སྒྲིག་ཞུས་པའི་བོད་ཀྱི་ཆོས་རིག་དང་རྒྱལ་རབས་ལོ་རྒྱུས་སོགས་དང་འབྲེལ་བའི་འགྲེམས་སྟོན་དབུ་འབྱེད་ཀྱི་མཛད་སྒོར་ལྷན་ཞུགས་གནང་ཡོད་པ་རེད།བཀའ་བློན་མཆོག་ཨི་ཊ་ལི་དང་སུད་སི། འཇར་མི་ནི། སྦལ་སིལ་བཅས་ཡོ་རོབ་རྒྱལ་ཁབ་བཞིའི་ནང་གཞུང་འབྲེལ་འཚམས་གཟིགས་གནང་གི་ཡོད་པ་རེད།སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་བཀའ་བློན་མཆོག་ཡོ་རོབ་རྒྱལ་ཁབ་ནང་གཞུང་འབྲེལ་འཚམས་གཟིགས་ཕེབས་པའི་མཛད་འཆར་གཙོ་བོ་ནི་ཨི་ཊ་ལིའི་ Milan གྲོང་ཁྱེར་དུ་འཚོགས་རྒྱུའི་ཡོ་རོབ་ཁུལ་གྱི་བོད་རིགས་ཚོགས་པའི་ལོ་འཁོར་ཚོགས་ཆེན་གྱི་དབུ་འབྱེད་མཛད་སྒོར་དབུ་ཞུགས་གནང་རྒྱུ་དང་། ཉེ་འཁོར་གྱི་ལྷོ་ཊི་རོལ་རང་སྐྱོང་མངའ་ཁུལ་གྱི་གཙོ་འཛིན་མཆོག་གིས་གཙོས་པའི་གཞུང་འབྲེལ་གནད་ཡོད་མི་སྣ་སོགས་དང་མཇལ་མོལ་གནང་ཕྱིར་ཡིན་པ་གསུངས་སོང་། དེ་བཞིན་ཕྱི་ཟླ་ ༡༠ ཚེས་ ༤ ཉིན་བཀའ་བློན་མཆོག་གིས་སུད་སི་གྲོང་ཁྱེར་ཇི་ནི་ཝ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༡ དང་བསྟུན་ཨ་རིའི་གཞུང་ཚབ་ཁང་གིས་གོ་སྒྲིག་ཞུས་པའི་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་༸སྐུའི་ཡང་སྲིད་དང་འབྱུང་འགྱུར་འཛམ་གླིང་ནང་ཤུགས་རྐྱེན་ཇི་ལྟར་ཐེབས་མིན་ཞེས་པའི་ཟུར་ཚོགས་ཐོག་དབུ་བཞུགས་ཀྱིས་གསུང་བཤད་གནང་རྒྱུ་སོགས་ཀྱི་མཛད་འཆར་ཡོད་པ་གསུངས་ཡོད།

ཉན་པ།: Listen ཕབ་ལེན། Download རྒྱ་གཞུང་ཉེན་རྟོག་པས་དངོས་གྲུབ་ཚེ་རིང་ལགས་ལ་གཅར་རྡུང་བཏང་ནས་བསད་འདུག རྒྱལ་ཁབ་སུམ་ཅུ་ལྷག་གིས་བོད་ནང་གི་འགྲོ་བ་མིའི་ཐོབ་ཐང་ལ་བློ་འཚབ་གནང་བ། རྒྱ་དཀར་ནག་གཉིས་དབར་གདོང་ཐུག་གི་གནད་དོན་མཇུག་སྒྲིལ་ཚུལ་བཤད་འདུག ཉི་ཧོང་གིས་བོད་མིའི་སྒྲིག་འཛུགས་ལ་མུ་མཐུད་རྒྱབ་སྐྱོར་གནང་བའི་ལམ་ཁ་གསལ་པོ་འདུག ༸རྒྱལ་བའི་ཡང་སྲིད་ཀྱི་གནང་སྒོ་དང་འབྲེལ་བའི་དམིགས་བསལ་བཅར་འདྲི། འཕྲོད་བསྟེན་ཤེས་བྱ་ངོ་སྤྲོད། གཅིན་སྙི་ནང་གཞི་དང་འབྲེལ་བའི་དྲི་བ་ལྔ། Thursday 29/09/2022 Tibetan beaten to death by Chinese police in Tibet 30 countries, including US and EU blast China’s human rights record in Tibet Emergency response phase since Galwan incident over: China envoy Japan will continue its Tibet support: Tibet Representative on Sikyong’s visit Kashag on Dalai Lama’s reincarnation: Special Interview Health and Wellness : Five Questions on Diabetes    

རྒྱ་ནག་གཞུང་གི་ཉེན་རྟོག་པས་བོད་དར་རྩེ་མདོ་བརྒྱད་ཟུར་རྫོང་ནས་ཡིན་པའི་བོད་མི་དངོས་གྲུབ་ཚེ་རིང་ལགས་ལ་གཅར་རྡུང་ཚད་མེད་བཏང་རྐྱེན་ཁ་སང་སྔ་དྲོ་འདས་གྲོངས་སུ་གྱུར་འདུག མཚན་བརྗོད་འདོད་མེད་པའི་བོད་ནང་གི་བོད་མི་ཞིག་གིས་གནས་ཚུལ་མཁོ་སྤྲོད་གནང་བར་ཁ་ཉིན་ཚེས་ ༢༧ གྱི་སྔ་དྲོར་དར་རྩེ་མདོ་བརྒྱད་ཟུར་རྫོང་ནས་ཡིན་པའི་བོད་མི་ན་གཞོན་དངོས་གྲུབ་ཚེ་རིང་ལགས་ཀྱིས་ས་གནས་རྒས་གསོ་ཁང་ཞིག་ཏུ་ཟ་ཆས་ཀྱི་ཞལ་འདེབས་གནང་སྟེ་ཕྱིར་རང་ཁྱིམ་དུ་ཕེབས་སྐབས་གློ་བུར་དུ་རྒྱ་གཞུང་ཉེན་རྟོག་པ་འགའ་ཡོང་ནས་འཛིན་བཟུང་གིས་ས་གནས་ཉེན་རྟོག་ཁང་དུ་བཙན་ཁྲིད་བྱས་པ་མ་ཚད་པར་རྒས་གསོ་ཁང་དེར་སྲིད་གཞུང་གིས་རྣམ་ཀུན་ནས་ལྟ་རྟོག་དང་ཟ་འབྲུ་སོགས་རོགས་རམ་བྱེད་བཞིན་ཡོད་ཀྱང་ཁྱེད་ཀྱིས་དེར་རོགས་རམ་བྱས་པའི་རྒྱབ་ལྗོངས་ཀྱི་དམིགས་ཡུལ་གང་ཡོད་དམ་ཞེས་འདྲི་རྩད་མང་དག་ཅིག་བྱས་འདུག་ལ། དེས་སྲིད་གཞུང་ལ་མིང་ཆད་བཟོ་ཡི་འདུག་ཅེས་བཤད་པ་མ་ཟད་ཁོང་གི་རྣམ་འགྱུར་ལེགས་པོ་མེད་ལུགས་སོགས་རྒྱུ་མཚན་དུ་མར་བསྙད་འདོགས་ཀྱིས་གཅར་རྡུང་ཚད་མེད་བཏང་བའི་རྐྱེན་གྱིས་ཁ་སང་སྔ་དྲོར་ཉེན་རྟོག་ཁང་དུ་འདས་གྲོངས་སུ་གྱུར་འདུག ད་ལྟའི་ཆར་འདས་པོ་ཁོང་གི་སྐུ་ཕུང་ནང་མིར་རྩིས་སྤྲོད་བྱས་ཡོད་མེད་སོགས་ཀྱི་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མི་འདུག དངོས་གྲུབ་ཚེ་རིང་ལགས་ནི། ས་གནས་ཀྱི་གླ་འཁོར་གཏོང་མཁན་ཞིག་ཡིན་པ་དང་། ཁྱིམ་དུ་དགུང་ལོ་ ༧༨ ལ་ཕེབས་པའི་ཁོང་གི་ཨ་མ་ལྷ་སྐྱིད་ལགས་དང་སྐུ་ཟླ་གཡུ་མཚོ་ལགས། དེ་བཞིན་བུ་ཕྲུག་གཉིས་བཅས་འདུག འབྲེལ་ཡོད་པར་གྱི་བདག་དབང་བོད་ཀྱི་དུས་བབ།

ཇི་ནི་ཝར་འཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཐེངས་ ༥༡ ཐོག་རྒྱལ་ཚོགས་ཀྱི་ཚོགས་མི་རྒྱལ་ཁབ་ཨ་རིས་གཙོས་པའི་དབྱིན་ཡུལ་དང་འཇར་མི་ནི། སུད་སི། ཉེ་ཧོང་། དེ་བཞིན་ཚོགས་མི་རྒྱལ་ཁབ་ ༢༧ ལས་གྲུབ་པའི་ཡོ་རོབ་མཐུན་ཚོགས་བཅས་ཀྱིས་རྒྱ་ནག་གཞུང་གིས་བོད་གཙོས་པའི་མངའ་འོག་གི་ས་ཁུལ་ཁག་ཏུ་དྲག་གནོན་དང་ཚོད་འཛིན་བརྒྱུད་མང་ཚོགས་ཀྱི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་བརྩི་མེད་རྡོག་རོལ་ཚབས་ཆེན་གཏོང་བཞིན་པའི་གནས་སྟངས་མངོན་གསལ་གྱིས་བློ་འཚབ་གནང་ཡོད། སྐབས་དེར་ལྷན་ཚོགས་ཐོག་ཨ་རིས་རྒྱ་གཞུང་གི་ངོས་ནས་མང་ཚོགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་སྤྱི་དང་སྒོས་བོད་ནང་གི་བོད་མིའི་ཐོག་དྲག་གནོན་ཚབས་ཆེན་བྱེད་བཞིན་པའི་ཁར་བོད་མིའི་ངོ་བོ་མཚོན་པའི་ཆོས་རིག་དང་སྐད་ཡིག ལེགས་བྱང་བཅས་པ་རྩ་མེད་གཏོང་བཞིན་པའི་བྱ་སྤྱོད་ཁག་ལ་ཨ་རིའི་ངོས་ནས་མུ་མཐུད་ཐུགས་འཚབ་གནང་བཞིན་ཡོད་སྐོར་གསུངས་འདུག ལྷན་ཚོགས་ཐོག་ཅེཀ་སྤྱི་མཐུན་རྒྱལ་ཁབ་ཀྱི་སྐུ་ཚབ་ཀྱིས་རྒྱལ་ཁབ་ ༢༧ ལས་གྲུབ་པའི་ཡོ་རོབ་མཐུན་ཚོགས་ཀྱི་ཚབ་ཞུས་ཏེ་ཇེ་ཞན་ཇེ་སྡུག་ཏུ་འགྲོ་བཞིན་པའི་རྒྱ་ནག་གི་འགྲོབ་མིའི་ཐོབ་ཐང་གནས་སྟངས་གླེང་སློང་དང་སྦྲགས། རྒྱ་ནག་གཞུང་གིས་རྒྱ་ནག་རྒྱལ་ནང་གི་ཁྲིམས་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ཁག་ལ་གུས་བརྩི་དང་དོན་འཁྱོལ་ལག་བསྟར་བྱས་ཏེ་རྒྱ་ནག་གི་མངའ་འོག་ཏུ་ཡོད་པའི་བོད་ཀྱིས་གཙོས་པའི་ས་ཁུལ་ཁག་གི་མང་ཚོགས་རྣམས་ཀྱི་འགྲོ་བ་མིའི་ཐོབ་ཐང་དང་གཞི་རྩའི་རང་དབང་སྲུང་སྐྱོབ་བྱེད་དགོས་པའི་གཞེན་སྐུལ་གནང་ཡོད། དེ་བཞིན་ཡོ་རོབ་རྒྱལ་ཁབ་ཌན་མག་དང་འཇར་མི་ནི། ལི་ཐོ་ནི་ཡ། ཉེ་ཧོང་། དབྱིན་ཡུལ། ཧྥི་ལན་ཌི། ནི་ཐར་ལན་ཌི་སོགས་ཀྱིས་རྒྱ་ནག་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་གླེང་སློང་གནང་བར་མ་ཟད་ལྷག་པར་ཡོ་རོབ་རྒྱལ་ཁབ་སུ་ཌེན་གྱིས་བོད་གཙོས་པའི་རྒྱ་ནག་རྒྱལ་ནང་གི་འགྲོ་བ་མིའི་ཐོབ་ཐང་ཐོག་ལ་ཧ་ཅང་བློ་འཚབ་ཡོད་ཅེས་གསུངས་པ་དང་འབྲེལ། རྒྱ་གཞུང་གི་ངོས་ནས་འགྲོ་བ་མིའི་ཐོབ་ཐང་དང་རྒྱལ་སྤྱིའི་ཁྲིམས་སྒྲིག་སྤྱི་དང་སྒོས་གྲངས་ཉུང་མི་རིགས་ཁག་གི་རང་དབང་དང་ཐོབ་ཐང་། སྨྲ་བརྗོད་རང་དབང་ལ་གུས་བརྩི་ཞུ་དགོས་ཞེས་གསུངས་ཡོད། སྐབས་དེར་སུད་སི་སྐུ་ཚབ་ཀྱིས་ལྷན་ཚོགས་ཐོག་རྒྱལ་ཚོགས་ཀྱི་དམིགས་བསལ་ཁྱད་ལས་རྟོག་ཞིབ་ཚོགས་ཆུང་གིས་རྒྱ་ནག་ཐོག་སྤེལ་བའི་སྙན་ཐོ་ཞིག་ལུང་འདྲེན་དང་འབྲེལ་ཏེ་བོད་གཙོས་ས་ཁུལ་གཞན་ཁག་ཏུ་རྒྱ་གཞུང་གིས་མང་ཚོགས་ལ་བཙན་དབང་ཐོག་ནས་ངལ་རྩོལ་བྱེད་བཅུག་པའི་བྱ་སྤྱོད་ལ་སེམས་འཚབ་ཡོད་ཅེས་གསུངས་པ་མ་ཚད་པར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་ལས་ཁུངས་ནས་དེ་སྔོན་ཤིན་ཅང་ཐོག་སྤེལ་བའི་སྙན་ཐོར་གཞིགས་ཚེ་རྒྱ་ནག་གཞུང་གིས་ཁུལ་དེར་ལག་བསྟར་བྱས་པའི་གནད་དོན་དེ་དག་ནི་འགྲོ་བ་མིའི་རིགས་ལ་སྤེལ་བ་ནི་ཁྲིམས་འགལ་གྱི་བྱ་སྤྱོད་ཅིག་རེད་ཅེས་མངོན་གསལ་གནང་འདུག ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ Melanie Blondelle ལགས་ཀྱིས་རྒྱལ་ཚོགས་ཀྱི་ངོས་འཛིན་ཡོད་པའི་གཞུང་འབྲེལ་མིན་པའི་ཚོགས་པའི་མིང་ཐོག་ནས་སྲིད་འཛིན་ཞི་ཅིན་ཕིང་གི་འགོ་ཁྲིད་འོག་བོད་ནང་རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་བོད་མིའི་འགྲོ་བ་མིའི་ཐོབ་ཐང་རྡོག་རོལ་དང་བཙན་དབང་གིས་མི་རིགས་མཉམ་བསྲེས་ཀྱི་སྲིད་བྱུས་ལག་བསྟར་དང་། ལྷག་པར་ཉེ་ལམ་རྒྱ་གཞུང་གིས་བོད་རང་སྐྱོང་ལྗོངས་ཟེར་བའི་ནང་གི་བོད་མི་མང་ཚོགས་ཀྱི་རིགས་རྫས་བཙན་དབང་གིས་མཁོ་སྒྲུབ་བྱས་པའི་གསང་བའི་ལྟ་སྲུང་གི་ལས་གཞི་བརྒྱུད་དམ་དྲག་ཆེས་ཆེར་བྱེད་བཞིན་ཡོད་པའི་གནད་དོན་སོགས་སྙན་སེང་ཞུས་འདུག་ལ། ད་བར་རྒྱལ་ཚོགས་ཐོག་རྒྱ་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་བའི་བདེན་དཔང་ར་སྤྲོད་བྱུང་བའི་བྱ་སྤྱོད་ནི་རྒྱལ་སྤྱིའི་ཁྲིམས་སྒྲིག་དང་ཡོངས་སུ་འགལ་བའི་ཚབས་ཆེན་གྱི་བྱ་སྤྱོད་དེ་རེད་ཅེས་གསུངས་ཡོད། སྐབས་དེར་སུད་སི་བོད་ཀྱི་སྐུ་ཚབ་དོན་གཅོད་ཁང་གི་རྒྱལ་ཚོགས་ཀྱི་འབྲེལ་མཐུད་པ་སྐལ་ལྡན་མཚོ་མོ་ལགས་ཀྱིས་རྒྱལ་ཚོགས་ཀྱི་ངོས་འཛིན་ཡོད་པའི་གཞུང་འབྲེལ་མིན་པའི་ཚོགས་པའི་མིང་ཐོག་ནས་ཇེ་ཞན་ཇེ་སྡུག་ཏུ་འགྲོ་བཞིན་པའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཁག་སྙན་སེང་ཞུས་པ་དང་འབྲེལ། བོད་ནང་རྒྱ་གཞུང་གིས་ཏོག་དབྱིབས་ནད་ཡམས་ཀླད་ཀོར་གྱི་སྲིད་བྱུས་འོག་གཞིས་ལུས་བོད་མི་རྣམས་བཙན་དབང་གིས་ཟུར་བཀག་ཁང་དུ་བཅུག་པ་དང་ནད་ཕོག་པའི་མང་ཚོགས་ལ་སྨན་བཅོས་དང་ཟས་བཅུད་སོགས་ཉེར་མཁོའི་མཐུན་རྐྱེན་ཁག་འཐུས་ཚང་སྦྱོར་སྤྲོད་བྱེད་ཀྱི་མེད་སྟབས་བོད་མི་རྣམས་དམྱལ་བ་མི་ཡུལ་ལྟར་ངལ་བ་ཆེས་ཆེར་མྱངས་དང་མྱོང་བཞིན་པའི་ཡ་ང་བའི་གནས་སྟངས་རྣམས་ལྷན་ཚོགས་ཐོག་སྙན་སེང་ཞུས་པ་དང་ཆབས་ཅིག་རྒྱ་ནག་གཞུང་གི་ངོས་ནས་ནད་ཡམས་ཕོག་པའི་བོད་མི་རྣམས་ལ་དུས་ཐོག་ཏུ་སྨན་བཅོས་ཀྱི་མཐུན་རྐྱེན་སྦྱོར་དགོས་པའི་འབོད་སྐུལ་སོགས་གནང་ཡོད།

རྒྱ་གར་ནང་གི་རྒྱ་ནག་གི་གཞུང་ཚབ་པས་འཕགས་བོད་གཉིས་ཀྱི་ས་མཚམས་སུ་ཕན་ཚུན་གདོང་ཐུག་གི་གནད་དོན་བྱུང་བ་དེ་མཇུག་སྒྲིལ་ཡོད་ཚུལ་དང་ཞི་འཇམ་ངང་ནས་རྒྱུན་སྐྱོང་བྱེད་བཞིན་ཡོད་སྐོར་བཤད་ཡོད་པ་དེ་ལྟར་ཡང། རྒྱ་གར་གྱི་ཕྱི་སྲིད་བློན་ཆེན་མཆོག་གིས་རྒྱ་ནག་དང་ལྷན་དུ་ཞི་འཇམ་རྒྱུན་འཛིན་ཐུབ་པར་ཕྱོགས་གཉིས་ཀྱི་དབར་གུས་བརྩི་དང་བསམ་ཤེས། ཕྱོགས་གཉིས་ཀྱི་མངོན་འདོད་ལ་གཞིགས་ཏེ་ཕན་ཚུན་གཉིས་མོས་ཀྱི་འབྲེལ་ལམ་དམ་ཟབ་ཡོང་དགོས་ཀྱི་རེད་ཅེས་གསུངས་འདུགཁ་ཉིན་རེས་གཟའ་མིག་དམར་ཉིན་རྒྱ་གར་དུ་རྟེནགཞི་བྱས་པའི་རྒྱ་ནག་གི་གཞུང་ཚབ་ལས་ཁུངས་ཀྱིས་དྲ་རྒྱ་བརྒྱུད་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ་ངོ་ ༧༣ འཁོར་བའི་དུས་དྲན་སྲུང་བརྩི་ཞུས་སྐབས་རྒྱ་དཀར་ནག་གཉིས་དབར་འཕགས་བོད་གཉིས་ཀྱི་ས་མཚམས་གྷལ་ཝན་ Galwan ལུང་གཤོངས་ཀྱི་གདོང་ཐུག་གནད་དོན་དེ་མཇུག་སྒྲིལ་ཡོད་པ་དང་། རྒྱ་དཀར་ནག་གཉིས་ཀྱི་འབྲེལ་ལམ་ཞི་འཇམ་ངང་ནས་རྒྱུན་གཏན་ལྟར་གནས་རྒྱུ་ཡིན་ཞེས་བཤད་པར་མ་ཟད། ཕྱོགས་གཉིས་ཀྱི་འབྲེལ་ལམ་ལ་དོ་ཕོག་མ་འགྲོ་བར་ཚུལ་མཐུན་དང་འོས་འཚམ་ཐོག་ནས་ཐེ་གཏོགས་གནང་དགོས་གལ་ཡིན་སྐོར་བཤད་འདུག རྒྱ་གར་གྱིས་བོད་དང་ཧོང་ཀོང་གི་གནད་དོན་དང་འབྲེལ་ནས་རྒྱ་ནག་ནང་ཁུལ་གྱི་གནད་དོན་ལ་ཚུལ་མཐུན་དང་འོས་ཤིང་འཚམས་པའི་ཐོག་ནས་ལག་པ་འཆང་རྒྱུའི་རེ་བ་བྱེད་བཞིན་ཡོད་སྐོར་བཤད་ཡོད། འོན་ཀྱང་རྒྱ་ནག་གི་གཞུང་ཚབ་པའི་གཏམ་བཤད་དང་འབྲེལ་ནས་རྒྱ་གར་གྱི་ཕྱི་སྲིད་བློན་ཆེན་སྐུ་ཞབས་ S Jaishankar ལགས་ཨ་རིར་གཞུང་འབྲེལ་ཕྱོགས་སྐྱོད་གནང་བཞིན་པའི་སྐབས་ཀྱི་གསར་འགོད་ལྷན་ཚོགས་ཤིག་གི་ཐོག་རྒྱལ་ཁབ་ཀྱི་མཐའ་མཚམས་ཀྱི་གནད་དོན་ཐོག་ནས་རྒྱལ་ཁབ་ཕན་ཚུན་དབར་གྱི་འབྲེལ་ལམ་དེ་གསལ་ཐུབ་ཀྱི་ཡོད་པ་དང་། རྒྱ་ནག་དང་ལྷན་དུ་ཞི་འཇམ་རྒྱུན་འཛིན་ཐུབ་པར་ཕྱོགས་གཉིས་ཀྱི་དབར་ལ་གུས་བརྩི་དང་བསམ་ཤེས། དེ་བཞིན་ཕྱོགས་གཉིས་ཀྱི་མངོན་འདོད་ལ་གཞིགས་ནས་ཕན་ཚུན་གཉིས་མོས་ཀྱི་ཐོག་ནས་ཡོང་དགོས་ཀྱི་རེད། གལ་ཏེ་དེ་ལྟར་འབྱུང་ཚེ་རྒྱ་ནག་དང་ལྷན་དུ་འབྲེལ་ལམ་དམ་ཟབ་གནང་རྒྱུར་འབད་བརྩོན་གནང་གི་ཡོད་ཅེས་འགྲེལ་བརྗོད་གནང་འདུག དེ་བཞིན་སྐབས་དེར་རྒྱ་གར་གྱི་ངོས་ནས་རྒྱ་ནག་གི་གནད་དོན་དང་འབྲེལ་ནས་ཨ་རི་དང་འབྲེལ་ལམ་གང་འདྲ་འཇོག་རྒྱུའི་སྐོར་བཀའ་འདྲི་ཞུས་པར་ཁོང་གིས་རྒྱ་གར་དང་ཨ་རི་གཉིས་ནས་དམིགས་ཡུལ་གཅིག་གི་ཐོག་ནས་ཞི་བདེ་རྒྱ་མཚོར་སྲུང་སྐྱོབ་དང་རྒྱུན་གནས་གནང་རྒྱུ་དེ་ཡིན་སྐོར་གསུངས་ཡོད།