Monthly Archives: December, 2022

སང་ཕྱི་ཟླ་ ༡༢ ཚེས་ ༩ ཉིན་ནས་བཞུགས་སྒར་དྷརྨ་སཱ་ལཱར་རྟེན་གཞི་བྱས་པའི་༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་དུ་ཆོས་ལུགས་ལ་མ་བརྟེན་པའི་བཟང་སྤྱོད་འམ་ SEE ཤེས་ཡོན་སློབ་གསོ་དང་འབྲེལ་བའི་ཉིན་གཉིས་རིང་གི་ལྷན་ཚོགས་དབུ་འཛུགས་གནང་གི་ཡོད་པ་རེད།དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་སཱི་ཤེས་ཡོན་བསླབ་གཞི་བཀོད་སྒྲིག་ཐད་ཐུགས་འགན་གཙོ་བོ་བཞེས་མཁན་ཨ་རིའི་ཨེ་མོ་རི་གཙུག་ལག་སློབ་ཁང་གི་ཚོགས་གཙོ་སྐུ་ཞབས་ Gregory Louis Fenves ལགས་དང་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Bob Goddard ལགས། མཐོ་སློབ་ཀྱི་འགན་འཛིན་སྐུ་ཞབས་ Ravi V. Bellamkonda ལགས། དེ་བཞིན་ཨེ་མོ་རི་གཙུག་ལག་སློབ་གཉེར་ཁང་གི་སཱི་ཤེས་ཡོན་སློབ་གསོའི་འབྲེལ་མཐུད་པ་དགེ་བཤེས་བློ་བཟང་བསྟན་འཛིན་ནེ་གི་ལགས་བཅས་ལ་གཟིམ་ཆུང་མཇལ་ཁ་སྩལ་འདུགརྩ་བའི་ SEE Learning ཞེས་སྤྱི་ཚོགས་དང་སེམས་མྱོང་བཟང་སྤྱོད་བཅས་ཀྱི་ཤེས་ཡོན་བསླབ་གཞི་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་ཨ་རིའི་ཨེ་མོ་རི་གཙུག་ལག་སློབ་གཉེར་ཁང་གིས་ཆེད་སྒྲིག་གནང་བ་ཞིག་ཡིན་པ་དང་། དེའང་ཕྱི་ལོ་ ༢༠༡༩ ཕྱི་ཟླ་ ༤ པའི་ནང་རྒྱ་གར་གྱི་རྒྱལ་ས་ལྡི་ལིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་རྒྱ་གར་བ་སྐུ་ཞབས་ Kailash Satyarthi མཆོག དེ་བཞིན་ལྡི་ལི་མངའ་སྡེའི་སྤྱི་ཁྱབ་བློན་ཆེན་གཞོན་པ་དང་ཤེས་རིག་བློན་ཆེན་གཅིག་ལྕོགས་སྐུ་ཞབས་ Manish Sisodia མཆོག་བཅས་ཀྱིས་གཙོས་པའི་རྒྱལ་སྤྱིའི་རྒྱལ་ཁབ་ ༣༥ ལྷག་ནས་ཕེབས་པའི་ཤེས་ཡོན་མི་སྣ་ ༩༠༠ ཙམ་ལྷན་ཞུགས་ཐོག་དབུ་འབྱེད་མཛད་ཡོད།བསླབ་གཞི་དེ་དབུ་འབྱེད་མཛད་རྗེས་ད་ཆ་ལོ་ངོ་གསུམ་ལྷག་འཁོར་བའི་དུས་ཚིགས་དང་བསྟུན། སང་ཉིན་ནས་དབུ་འཛུགས་གནང་རྒྱུའི་ཉིན་གྲངས་གཉིས་རིང་གི་ལྷན་ཚོགས་ཀྱི་ཚོགས་མགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་མཛད་ཀྱི་ཡོད་པ་དང་། ཚོགས་འདུ་ཐོག་གཙོ་བོ། ལས་གཞི་དེའི་ཤུགས་རྐྱེན་དང་ལས་གཞི་ལག་བསྟར་ཁྲོད་གདོང་ལེན་གནང་དགོས་པའི་གནད་དོན་སོགས་དང་འབྲེལ་བའི་བཀའ་བསྡུར་གནང་རྒྱུ་དང་ཆབས་ཅིག ཨེ་མོ་རི་གཙུག་ལག་སློབ་གཉེར་ཁང་གི་ CBCT ཞེས་སྒོམ་སྒྲུབ་ཚན་རིག་དང་སྙིང་རྗེ་གཞི་རྩར་བཟུང་བའི་བཟང་སྤྱོད་ཀྱི་ལྟེ་གནས་ཁང་གིས་ད་བར་འཛམ་གླིང་འདི་བྱམས་བརྩེ་དང་ཞི་བདེ་ལྡན་པ་ཞིག་བཟོ་ཐབས་སླད་ཉམས་ཞིབ་སོགས་ཀྱི་ལས་གཞི་གང་དང་གང་སྤེལ་བཞིན་ཡོད་པའི་ཐོག་གྲོས་བསྡུར་གནང་རྒྱུ་ཡིན་པ་རེད།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ལུགས་ལ་མ་བརྟེན་པའི་བཟང་སྤྱོད་དང་ SEE ཤེས་ཡོན་བསླབ་གཞི་དེ་དབུ་འབྱེད་མཛད་སྐབས་བསླབ་གཞི་དེའི་གྲུབ་འབྲས་བདུན་ཕྲག་གཅིག་གཉིས་ནང་ལམ་སེང་ཐོན་རྒྱུ་ཁག་པོ་ཡོད་ཀྱང་། མ་འོངས་པའི་མི་རབས་གསར་པ་ཚོ་བྱམས་བརྩེའི་རང་བཞིན་ལྡན་པ་ཞིག་ཡོང་རྒྱུར་ཐུགས་རེ་ཡོད་ཅེས་བཀའ་སྩལ་ཡོད།གཤམ་ལ་ལས་གཞི་དེའི་རྒྱབ་ལྗོངས་སྐོར་དེ་སྔ་འདི་ག་རླུང་འཕྲིན་ཁང་གིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་དབྱིན་སྐད་གསུང་སྒྱུར་བ་དགེ་ཤེས་ཐུབ་བསྟན་སྦྱིན་པ་ལགས་དང་ཨེ་མོ་རི་གཙུག་ལག་སློབ་གཉེར་ཁང་གི་སཱི་ཤེས་ཡོན་སློབ་གསོའི་འབྲེལ་མཐུད་པ་དགེ་བཤེས་བློ་བཟང་བསྟན་འཛིན་ནེ་གི་ལགས། དེ་བཞིན་དྷ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་བཅས་རྣམ་པ་གསུམ་ལ་བཀའ་འདྲི་ཞུས་པ་ཞིག་གསན་གནང་ཡོང་བ་ཞུ།

འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་སྒྲིག་འོག་རྒྱ་ནག་གཞུང་དང་ཁེ་ན་ཌ་གཉིས་མཉམ་སྦྲེལ་གྱིས་གཙོ་སྐྱོང་བྱས་པའི་ Convention on Biodiversity Cop15 འམ་རྒྱལ་སྤྱིའི་སྣ་མང་སྐྱེ་དངོས་ཀྱི་ཚོགས་འདུ་ཞིག་ཁ་ན་ཌའི་གྲོང་ཁྱེར་ Montreal ནང་ཁ་སང་ཕྱི་ཚེས་ ༧ ནས་འགོ་འཛུགས་ཀྱིས་ཚེས་  ༡༩ བར་ཚོགས་ཀྱི་ཡོད་པ་དང་བསྟུན། ཊོ་རོན་ཊོ་ས་གནས་བོད་ཀྱི་གཞོན་ནུའི་ལྷན་ཚོགས་ཀྱི་གོ་སྒྲིག་འོག་ཚོགས་འདུ་ཚོགས་ཡུལ་གྱི་མདུན་གྱི་ལམ་ཆེན་ནས་རྒྱ་ནག་དམར་པོའི་གཞུང་ལ་ངོ་རྒོལ་དང་ཚོགས་ཆེན་དེར་མཉམ་ཞུགས་བྱེད་མཁན་དང་ལམ་ཆེན་དུ་འགྲུལ་བཞུད་བྱེད་མཁན་ཀུན་ལ་བོད་ཀྱི་གནས་གཤིས་འགྱུར་ལྡོག་སོགས་ཀྱི་སྐོར་ངོ་སྤྲོད་འཁོད་པའི་ཤོག་བྱང་འགྲེམས་སྤེལ་གནང་འདུག གནམ་གཤིས་འཁྲིགས་ནས་ཆར་པ་ཅུང་ཟད་འབབ་བཞིན་པའི་སྐབས་དེར་ Cop15 ཚོགས་འདུ་ཚོགས་ཡུལ་གྱི་ལམ་ཆེན་ནས་ལས་འགུལ་བ་ཚོས་བོད་ཆས་ལེགས་པར་སྤྲས་ཏེ་ཕྱག་ལ་བོད་ཀྱི་རྒྱལ་དར་དང་རྒྱ་ནག་དམར་པོའི་གཞུང་གིས་བོད་ནང་སྤེལ་བཞིན་པའི་གདུག་རྩུབ་ཅན་གྱི་སྲིད་བྱུས་འོག་གཞི་རྩའི་འགྲོ་བ་མིའི་ཐོབ་ཐང་མེད་པ་དང་ལྷག་དོན་བོད་ཁུལ་གྱི་གནམ་གཤིས་འགྱུར་ལྡོག་དང་འབྲེལ་ནས་བོད་ཀྱི་རི་དྭགས་ཀྱི་ངོ་སྤྲོད་འཁོད་པའི་ཤོག་བྱང་བསྣམས་པ། དེ་བཞིན་སྐྱེ་དངོས་དང་རི་དྭགས་ལ་སྲུང་སྐྱོབ་བྱེད་དགོས་ཀྱང་རྒྱ་ནག་གཞུང་གི་ངོས་ནས་ཐེངས་འདིའི་ཚོགས་འདུ་གཙོ་སྐྱོང་བྱས་པར་དགག་པ་ཡོད་ཅེས་དང་། རྒྱ་ནག་གིས་བོད་དང་འབྲེལ་བའི་ཁོར་ཡུག་གི་གླེང་མོལ་ཡོངས་རྫོགས་བཀག་འགོག་བྱེད་བཞིན་ཡོད་པ། བོད་དེ་འཛམ་གླིང་གཞན་དང་བསྡུར་ན་ལྡབ་གསུམ་གྱི་ཚ་དྲོད་འཕེལ་བཞིན་ཡོད་པ་སོགས་བཀོད་པའི་སྦྱར་ཡིག་བསྣམས་ཏེ་ཞི་རྒོལ་གྱི་ལས་འགུལ་ཞིག་སྤེལ་ཡོད། ཁེ་ན་ཌའི་གྲོང་ཁྱེར་ Montreal ནང་ Biodiversity འམ་སྣ་མང་སྐྱེ་དངོས་ཀྱི་གནད་དོན་དང་འབྲེལ་ནས་ Cop15  ཚོགས་འདུ་དེ་ཕྱི་ལོ་ ༢༠༡༠ ལོར་ཉི་ཧོང་ཁུལ་དུ་ཚོགས་པའི་རྗེས་ཀྱི་ཚོགས་འདུ་ཞིག་དང་། འདི་ལོའི་ Cop15 ཚོགས་འདུ་འདི་ཁ་སང་ཕྱི་ཚེས་ ༧ ནས་ཚེས་ ༡༩ བར་བདུན་ཕྲག་གཉིས་རིང་ཚོགས་ཀྱི་འདུག ཚོགས་འདུ་ཐོག་རྒྱལ་ཁབ་ ༡༩༦ གི་འགོ་ཁྲིད་དང་སྐུ་ཚབ་མི་སྣ་སྟོང་ཕྲག་ཉི་ཤུ་ཙམ་འདུ་འཛོམས་གནང་བའི་ཐོག་ནས་ཕྱི་ལོ་ ༢༠༣༠ བར་ལོ་ངོ་བརྒྱད་ཀྱི་ནང་འཛམ་གླིང་ཁྱོན་ལ་གོ་ལའི་སྣོད་བཅུད་ལ་སྲུང་སྐྱོབ་དང་བསྐྱར་གསོའི་སླད་རྒྱལ་སྤྱིའི་རང་བཞིན་ལྡན་པའི་སྐྱེ་དངོས་བདག་གཉེར་དང་སྲུང་སྐྱོབ་ཀྱི་ལམ་སྟོན་གཏན་འབེབ་གནང་སླད་ཚོགས་པ་ཞིག་ཆགས་ཡོད། ཚོགས་འདུ་སྒོ་འབྱེད་ཐོག་ཁེ་ན་ཌའི་སྲིད་བློན་སྐུ་ཞབས་ Justin Trudeau མཆོག་གིས་ང་ཚོའི་སྣོད་བཅུད་དེ་ད་ཆ་ཉེན་ཁའི་འོག་ཏུ་ཡོད་པ་དང་། སྣོད་བཅུད་ལ་གནོད་འཚེ་བཏང་བའི་བྱེད་བབ་དེ་ནི་ཡག་རྟགས་གང་ཡང་མ་རེད་ཅེས་གསུངས་པ་དང་སྦྲགས་ཏེ། ཁེ་ན་ཌས་སྣོད་བཅུད་སྲུང་སྐྱོབ་གནང་རྒྱུའི་དམ་བཅའ་བཞག་ཟིན་སྐོར་གཏམ་བཤད་གནང་ཡོད། དེ་བཞིན་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres ལགས་ཀྱིས་གོ་ལའི་རང་བྱུང་ཁམས་ནི་འགྲོ་བ་མིའི་རིགས་ཀྱི་གྲོགས་པོ་ཡག་ཤོས་དེ་ཡིན་པ་དང་། རང་བྱུང་ཁམས་མེད་ན་ང་ཚོར་གང་ཡང་ཡོད་མ་རེད། རྒྱལ་ཁབ་ཚང་མས་ནུས་པ་མཉམ་སྤུངས་ཐོག་ནས་སྣོད་བཅུད་ལ་སྒུལ་འཁྲུག་གཏོང་བའི་དམག་དེ་འཕྲལ་མར་མཚམས་འཇོག་གནང་དགོས་ཞེས་གསུངས་འདུག འོན་ཀྱང་ COP15 ཚོགས་འདུ་གཙོ་སྐྱོང་བྱེད་མཁན་རྒྱ་ནག་གི་སྣོད་བཅུད་དང་ཁོར་ཡུག་བློན་ཆེན་ Huang Runqiu ཆགས་ཀྱི་ཡོད་སྟབས། ཚོགས་ཆེན་དངོས་ཚོགས་སའི་མདུན་གྱི་ལམ་ཆེན་ནས་བོད་མི་རྣམས་ཕྱིར་ཐོན་ནས་རྒྱ་ནག་གཞུང་ལ་ངོ་རྒོལ་གནང་ཡོད་པ་རེད།

ཉན་པ།: Listen ཕབ་ལེན། Download རྒྱ་ནག་ནང་གི་ངོ་རྒོལ་ལས་འགུལ་ལ་བསྙད་དེ་བོད་རིགས་བོུ་ལྔ་འཛིན་བཟུང་། རྒྱ་ནག་ནང་གི་ངོ་རྒོལ་ལ་གདུང་སེམས་མཉམ་བསྐྱེད་ཀྱི་ཞི་རྒོལ་གནང་བ། རྒྱལ་སྤྱིའི་ཡུལ་གྲུ་ཁག་ཏུ་རྒྱ་ནག་གི་ཉེན་རྟོག་ཁང་ཞེ་བརྒྱད་གསར་འཛུགས་ཤེས་རྟོགས། ༸གོང་ས་མཆོག་གི་དགོངས་གཞིའི་འོག་ཨ་རིའི་གྲོང་ཁྱེར་ཆེ་ཁག་བྱམས་བརྩེ་ཅན་གྱི་གྲོང་ཁྱེར་བསྐྲུན་ཐབས། Wednesday 07/12/2022 China arrests five Tibetan women for protesting against ‘zero covid policy’ Tibetan hold peaceful protest in solidarity with white paper protests in China Rights group find 48 more Chinese overseas police stations, total 102 in 53 countries Louisville, US to become to compassionate city, after mayor Greg Fischer met Dalai Lama  

ཉེ་སྔོན་རྒྱ་ནག་གི་གྲོང་ཁྱེར་འདྲ་མིན་ནང་གཞུང་གི་གཉན་རིམས་ཀླད་ཀོར་གྱི་སྲིད་བྱུས་དང་དམར་ཤོག་གཞུང་། དེ་བཞིན་སྲིད་འཛིན་ཞི་ཅིན་ཕིང་བཅས་ལ་ངོ་རྒོལ་སྐད་འབོད་གནང་བའི་གནད་དོན་བྱུང་བ་དང་འབྲེལ་ཏེ། ཁྲིན་ཏུའུ་གྲོང་ཁྱེར་ནང་མང་ཚོགས་ཀྱི་ཞི་རྒོལ་ནང་མཉམ་ཞུགས་གནང་བའི་ཉེས་འཛུགས་འོག་ཟླ་འདིའི་ཕྱི་ཚེས་ ༥ ཉིན་བོད་དར་མདོ་རྫོང་ཁོངས་ནས་ཡིན་པའི་བོད་རིགས་བུ་མོ་བཞི་འཛིན་བཟུང་བྱས་འདུག་པ་དང་། དེ་བཞིན་ནན་ཅིན་གྲོང་ཁྱེར་ནང་དུ་སློབ་ཕྲུག་གིས་ཞི་རྒོལ་ནང་དུ་མཉམ་ཞུགས་གནང་བར་བསྙད་དེ་ལྷ་ས་ནས་ཡིན་པའི་བོད་རིགས་བེུད་གཅིག་འཛིན་བཟུང་བྱས་རྗེས་གར་ཡོད་ཤེས་རྟོགས་མེད་པར་གྱུར་འདུགཁ་སང་བོད་ཀྱི་དུས་བབ་གསར་ཁང་གིས་གནས་ཚུལ་སྤེལ་བར་ཟླ་བ་འདིའི་ཚེས་ ༢ ཉིན་ཁྲིན་ཏུའུ་ཅིན་ནེའུ་ས་ཁུལ་དུ་མི་མང་དང་སློབ་ཕྲུག་མང་པོ་འདུ་འཛོམས་ཀྱིས་སྲིད་གཞུང་གི་གཉན་རིམས་ཀླད་ཀོར་གྱི་སྲིད་བྱུས་ལ་ངོ་རྒོལ་གྱི་ལས་འགུལ་སྤེལ་ཡོད་པ་ལྟར་ལས་འགུལ་ནང་མཉམ་ཞུགས་གནང་བའི་ཉེས་མིང་འོག་ཟླ་འདིའི་ཕྱི་ཚེས་ ༥ ཉིན་ཁྲིན་ཏུའུ་གྲོང་ཁྱེར་ནས་དཀར་མཛེས་ཁུལ་དར་མདོ། འཁོར་ཡུལ་གསེར་ལུང་གྲོང་ཚོ་ནས་ཡིན་པའི་རང་ལོ་ ༢༦ ཡིན་པ་འཛམ་དཀར་ལགས་དང་རང་ལོ་ ༢༨ ཡིན་པ་སྐལ་བཟང་སྒྲོལ་མ་ལགས། དེ་བཞིན་བདེ་ཆེན་ལགས་དང་བདེ་ལྷ་ལགས་བཅས་བོད་རིགས་བུ་མོ་ ༤ འཛིན་བཟུང་བྱས་འདུག བུ་མོ་དེ་དག་དར་མདོ་རྫོང་ཁོངས་ནས་དམའ་འབྲིང་སློབ་གྲྭ་གཉེར་རྗེས། ཁྲིན་ཏུའུ་གྲོང་ཁྱེར་ཅིན་ནེའུ་ས་ཁུལ་གྱི་མགྲོན་ཁང་ཞིག་ཏུ་ལས་ཀ་བྱེད་བཞིན་པ་དང་། ཉེ་ཆར་ས་གནས་སུ་གཉན་རིམས་བཀག་སྡོམ་གྱི་རྐྱེན་གྱིས་ཟླ་ཤས་རིང་ལས་མེད་དུ་གྱུར་ཏེ་དཀའ་ངལ་མང་པོ་འཕྲད་འདུག ཁ་ཉིན་ཚེས་ ༥ ཉིན་རྒྱ་གཞུང་ཉེན་རྟོག་པས་ཁོང་རྣམས་འཛིན་བཟུང་བྱས་རྗེས་ཁོང་ཚོའི་ནང་མི་ཉེ་འབྲེལ་རྣམས་ཉེན་རྟོག་ཁང་དུ་ཕྱིན་ནས་ཁོང་རྣམས་གང་དུ་ཡོད་མེད་སོགས་ཀྱི་འདྲི་རྩད་བྱས་སྐབས་གནས་ཚུལ་དེ་རིགས་གང་ནས་གོ་ཐོས་བྱུང་ངམ་ཞེས་ཚུར་འདྲི་རྩད་དེ་ལས་མང་བ་བྱས་མཐར་ནང་མི་ཚོའི་ཁ་པར་ནང་སྔོག་གཤེར་བྱས་ཡོད་པར་མ་ཟད། དར་མདོ་རྫོང་ཁུལ་དུའང་དམ་བསྒྲགས་ཆེས་ཆེར་བྱས་ཏེ་མི་མང་གི་ཁ་པར་སྔོག་གཤེར་བྱེད་བཞིན་ཡོད་པ་རེད་འདུག དེའི་བར་ན་ཟླ་བ་སྔོན་མའི་ཚེས་ ༢༦ ཉིན་གྱི་ཕྱི་དྲོ་ནན་ཅིན་གསར་འགྱུར་འབྲེལ་ལམ་རིག་པའི་ཆེད་ལས་སློབ་ཆེན་གྱི་སློབ་མ་བརྒྱ་ཕྲག་མང་པོ་ཁྲོམ་གཞུང་དུ་འཛོམས་ཏེ་རྒྱ་ནག་དམར་ཤོག་གཞུང་གི་གཉན་རིམས་ཀླད་ཀོར་གྱི་སྲིད་བྱུས་ལ་ཞི་རྒོལ་གྱི་ལས་འགུལ་སྤེལ་བ་དང་འབྲེལ། ཉུང་མཐར་སློབ་མ་ ༦༠ ཙམ་འཛིན་བཟུང་བྱས་ཡོད་པ་དང་དེའི་ཁྲོད་སློབ་ཆེན་གྱི་སློབ་མ་བོད་རིགས་བུ་མོ་ཚེ་དབྱངས་ལྷ་མོ་ལགས་ཀྱང་འཛིན་བཟུང་བྱས་པར་བརྟེན་ཁོང་དང་འབྲེལ་བའི་གནས་ཚུལ་གང་ཡང་ཤེས་རྟོགས་མེད་པར་གྱུར་འདུག རང་ལོ་ ༢༣ ཡིན་པ་བུ་མོ་ཚེ་དབྱངས་ལྷ་མོ་ལགས་ནི་ལྷ་ས་གྲོང་ཁྱེར། ལྕགས་རོང་སྡེ་ཁུལ་ནས་ཡིན་ཞིང་། དེ་སྔོན་བོད་ལྗོངས་མི་རིགས་སློབ་གྲྭ་ཆེན་མོ་འགྲིམས་མྱོང་ཡོད་པ་དང་། འདི་ལོའི་ལོ་མགོར་ནན་ཅིན་གྱི་སློབ་ཆེན་ལ་འཛུལ་ཞུགས་གནང་འདུག ཁོང་གི་ཕ་མིང་ལ་ཕུར་བུ་དང་མ་མིང་ལ་བདེ་ཆེན་མཁའ་འགྲོ་ཟེར་བ་དང་། ཁོང་ལ་སྤུན་མཆེད་གཉིས་འདུག རྩ་བའི་ཕྱི་ཟླ་ ༡༡ ཚེས་ ༢༤ ཉིན་ཤིན་ཅང་གི་རྒྱལ་ས་ Urumchi ནང་གི་ཁང་རྩེག་ཞིག་ཏུ་མེ་སྐྱོན་དོན་རྐྱེན་ལས་མི་བཅུ་ཙམ་རྐྱེན་འདས་སུ་གྱུར་བའི་གནད་དོན་བྱུང་བའི་ཁྲོད། ཚེས་ ༢༦ ཉིན་རྒྱལ་ས་པེ་ཅིང་གཙོས་རྒྱ་ནག་གི་གྲོང་ཁྱེར་འདྲ་མིན་ ༣༠ ཙམ་གྱི་ནང་མི་མང་དང་སློབ་ཕྲུག་གིས་གཞུང་གི་གཉན་རིམས་ཀླད་ཀོར་གྱི་སྲིད་བྱུས་ལ་ངོ་རྒོལ་སྐད་འབོད་གནང་བ་མ་ཚད་པར་རྒྱ་ནག་དམར་པོའི་གཞུང་དང་སྲིད་འཛིན་ཞི་ཅིན་ཕིང་ལའང་དེ་ལྟར་ངོ་རྒོལ་གནང་བ་བཅས་ནི་རྒྱ་ནག་གི་ཉེ་བའི་ལོ་རྒྱུས་ནང་བྱུང་མ་མྱོང་བ་ཞིག་བྱུང་ཡོད་པ་རེད། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་པ་བསྟན་འཛིན་ནོར་རྒྱས་ལགས་ཀྱིས་དེ་ལས་དྲ་ཚིག་ཐོག་རྩོམ་ཞིག་སྤེལ་བར་ཉེ་ཆར་རྒྱ་ནག་གི་གྲོང་ཁྱེར་ཆེ་ཁག་འདྲ་མིན་ནང་གཞི་རྒྱ་ཆེ་བའི་ངོ་རྒོལ་སྐད་འབོད་ཀྱི་གནད་དོན་འབྱུང་བཞིན་སྐབས་སུ་བོད་ནང་ལའང་དམ་བསྒྲགས་ཆེས་ཆེར་བྱེད་བཞིན་རྐྱེན་བོད་མི་ཚོར་རྒྱ་ནག་རྒྱལ་ནང་གི་ངོ་རྒོལ་སྐོར་གང་ཡང་ཤེས་རྟོགས་མེད་པར་ལུས་ཡོད་པར་མངོན་གསལ་གནང་འདུག འབྲེལ་ཡོད་པར་བདག་དབང་། བོད་ཀྱི་དུས་བབ་དང་སྤྱི་ཚོགས་དྲ་རྒྱ་བཅས་ལས་བཏུས།

བོད་མིའི་གཞུང་འབྲེལ་མིན་པའི་ཚོགས་པ་ཁག་བཞིའི་གོ་སྒྲིག་འོག་བཞུགས་སྒར་དྷརྨ་སཱ་ལཱའི་མེག་གྷན་བཞི་མདོར་རྒྱ་ནག་ནང་ཉེ་ལམ་ཤོག་བུ་དཀར་པོའི་ལས་འགུལ་ཞེས་རྒྱ་ནག་དམར་པོའི་གཞུང་དང་ཞི་ཅིན་ཕིང་ལ་ངོ་རྒོལ་གྱིས་གཞི་རྒྱ་ཆེ་བའི་ལས་འགུལ་སྤེལ་ཡོད་པར་གདུང་སེམས་མཉམ་བསྐྱེད་ཀྱི་ཞི་བའི་ལས་འགུལ་ཞིག་སྤེལ་སོང་།གདུང་སེམས་མཉམ་བསྐྱེད་ཀྱི་ལས་ཞི་བའི་ལས་འགུལ་ཐོག་བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཀྱི་ཚོགས་གཙོ་གཙོས་ཚོགས་མི་རྣམ་པ་དང་། ལྷག་པར་དུ་ཨོ་སི་ཊོ་ལི་ཡ་ནས་ཡིན་པའི་འགྲོ་བ་མིའི་ཐོབ་ཐང་གི་ལས་འགུལ་བ་སྐུ་ཞབས་ Drew Pavlou ལགས་མཉམ་ཞུགས་གནང་ཡོད། དེ་རིང་གི་གདུང་སེམས་མཉམ་བསྐྱེད་ཀྱི་ལས་འགུལ་དེའི་ཁྲོད་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་ལགས་ཀྱིས་དེང་གི་ཆར་རྒྱ་ནག་ནང་གཞོན་སྐྱེས་མང་པོས་མང་གཙོའི་གལ་གནད་ཤེས་པའི་ཐོག་ནས་རྒྱ་དམར་གཞུང་ལ་ངོ་རྒོལ་བརྒྱུད་ཤོག་བུ་དཀར་པོའི་སྒེར་ལངས་ཀྱི་ཞི་རྒོལ་དེ་ལྟར་གནང་ཡོད། གཞིས་བཞུགས་བོད་རིགས་སྤུན་ཟླ་རྣམས་ཀྱིས་ཀྱང་དེ་མཚུངས་སུ་རྒྱ་དམར་གྱི་བཙན་གནོན་འོག་དཀའ་སྡུག་མྱངས་དང་མྱོང་བཞིན་ཡོད་པར་ང་ཚོས་དེར་གདུང་སེམས་མཉམ་བསྐྱེད་གནང་རྒྱུ་ནི་ཆེས་གནད་འགག་ཆེན་པོ་ཆགས་ཡོད་པ་སོགས་གསུངས་སོང་། དེ་བཞིན་ཁོང་གིས་རྒྱ་ནག་གཞུང་གི་བཙན་དབང་འོག་ཡོད་པའི་གྲངས་ཉུད་མི་རིགས་སུ་འདྲ་ཞིག་ལ་ངལ་བ་འཕྲད་ཚེ་ང་ཚོ་བོད་མི་རྣམས་ཀྱིས་དེར་གདུང་སེམས་མཉམ་བསྐྱེད་གནང་དགོས་གལ་ཡིན་པ་གསུངས་ཡོད།རྒྱ་གར་རྒྱལ་ཡོངས་ཀྱི་བོད་རང་བཙན་སློབ་ཕྲུག་ཚོགས་པའི་འགན་འཛིན་རིག་འཛིན་ཆོས་སྒྲོལ་ལགས་ཀྱིས་དེ་རིང་གི་ལས་འགུལ་དེ་དང་འབྲེལ་ཏེ་གསུངས་པར་དེ་སྔ་ཕྱི་ལོ་ ༡༩༨༩ ལོའི་ཕྱི་ཟླ་ ༦ པར་པེ་ཅིང་གནམ་སྡེ་སྒོར་མོ་ཆེའི་དོན་རྐྱེན་བྱུང་རྗེས་རྒྱ་དམར་གཞུང་ལ་ངོ་རྒོལ་གྱི་ལས་འགུལ་སྤེལ་བ་ཧ་ཅང་དཀོན་པོ་ཡིན་སྟབས། ད་ཆ་རྒྱ་ནག་ནང་དེ་ལྟ་བུའི་ལས་འགུལ་སྤེལ་བཞིན་ཡོད་སྐབས་བོད་མི་རྣམས་ཀྱིས་གོ་སྐབས་དམ་འཛིན་གྱིས་ལས་འགུལ་སྤེལ་དགོས་གལ་ཡིན་པ་དང་། ལྷག་པར་དུ་ཤོག་བུ་དཀར་པོའི་སྒེར་ལངས་བརྒྱུད་ནས་དམར་ཤོག་སྲིད་གཞུང་མཚམས་འཇོག་དགོས་པ་དང་ཞི་ཅིན་ཕིང་སྲིད་དབང་ནས་རྩ་དགོངས་ཞུ་དགོས་པ། དེ་བཞིན་མང་གཙོ་དང་རང་དབང་དགོས་ཞེས་འབོད་སྒྲ་དེ་དག་ལ་གཞིགས་ན། རྒྱ་ནག་ནང་གི་མི་མང་དང་གཞོན་སྐྱེས་རྣམས་ཀྱིས་རྒྱ་དམར་སྲིད་གཞུང་ལ་མི་འདོད་པའི་རྣམ་པ་ཆེས་མངོན་གསལ་གནང་ཡོད་སྐོར་གསུངས་སོང་། དེ་བཞིན་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་བཀྲ་ཤིས་དོན་གྲུབ་ལགས་ཀྱིས་ཀྱང་རྒྱ་ནག་ནང་ངོ་རྒོལ་གྱི་ལས་འགུལ་སྤེལ་བ་དེ་ནི་ཏོག་དབྱིབས་གཉན་རིམས་ཀླད་ཀོར་གྱི་སྲིད་བྱུས་ཁོ་ནའི་དབང་གིས་བྱུང་བ་ཞིག་མིན་པར་མང་གཙོ་དང་རང་དབང་བཅས་ཐོག་ནས་སྤེལ་བ་ཞིག་ཡིན་སྟབས། བོད་མི་ལས་འགུལ་བ་རྣམས་ཀྱི་ངོས་ནས་དོ་སྣང་གནང་དགོས་རྒྱུ་གལ་ཡིན་པ་སོགས་གསུངས་སོང་།ལྷག་པར་དུ་ལས་འགུལ་ཐོག་མཉམ་ཞུགས་གནང་མཁན་ཨོ་སི་ཊོ་ལི་ཡ་ནས་ཡིན་པའི་འགྲོ་བ་མིའི་ཐོབ་ཐང་ལས་འགུལ་བ་དང་བོད་དོན་རྒྱབ་སྐྱོར་བ་སྐུ་ཞབས་ Drew Pavlou ལགས་ཀྱིས་རྒྱ་ནག་དམར་ཤོག་ཚོགས་པས་ཐབས་བྱུས་འདྲ་མིན་ཇི་ཙམ་སྤེལ་མིན་ལ་ལྟོས་མེད་མིའི་སེམས་ཁམས་ལ་འགྱུར་ལྡོག་གཏང་ཐུབ་ཀྱི་མ་རེད་ཅེས་གསུངས་པ་དང་ཆབས་ཅིག་མང་གཙོ་དོན་གཉེར་ཅན་དང་དྲང་བདེན་ལ་ཡིད་ཆེས་ཡོད་པ་རྣམས་ནམ་ཞིག་སྲིད་དབང་སྒེར་འཛིན་གྱི་ལམ་ལུགས་ལས་ཡོངས་སུ་རྣམ་པར་རྒྱལ་ངེས་ཡིན་པའི་བརྡ་ལན་གནང་ཡོད།

ཨ་རིའི་ Kentucky མངའ་སྡེའི་གྲོང་སྡེ་ཆེ་གྲས་ Louisville སྤྱི་ཁྱབ་སྐུ་ཞབས་ Greg Fischer ལགས་ཀྱིས་སྣེ་ཁྲིད་པའི་གྲོང་སྡེ་ཆེ་ཁག་བདུན་གྱི་སྤྱི་ཁྱབ་པས་ཟླ་བ་འདིའི་ཚེས་ ༥ ཉིན་༸རྒྱལ་བའི་བཞུགས་སྒར་དྷརྨ་སཱ་ལཱར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁ་ཞུས་ཡོད་པ་རེད། སྐུ་ཞབས་ Fischer ལགས་ཀྱིས་དབུས་པའི་ཨ་རིའི་གྲོང་ཁྱེར་ཆེ་ཁག་བདུན་གྱི་སྤྱི་ཁྱབ་པའི་རུ་ཁག་ནང་། Ohio མངའ་སྡེའི་གྲོང་ཁྱེར་ Cincinnati དང་། Washington མངའ་སྡེའི་ Tacoma དང་།    California མངའ་སྡེའི་ Oakland དང་། San Leandro དེ་བཞིན་ Texas མངའ་སྡེའི་ San Antonio དེ་བཞིན་  Pennsylvania མངའ་སྡེའི་ Pittsburgh གྲོང་ཁྱེར་དང་། Kentucky མངའ་སྡེའི་ Louisville གྲོང་ཁྱེར་བཅས་ཀྱི་སྤྱི་ཁྱབ་ཡོད་པ་རེད། སྤྱི་ཁྱབ་པ་དེ་དག་ཚང་མས་སོ་སོའི་གྲོང་ཁྱེར་ནང་གི་ལས་གཞི་ཆེ་གྲས་མང་དག་ཅིག་ཡོད་པའི་ཁྲོད་གཅིག་འགྱུར་ཐོག་ནས་ཐུགས་སྣང་ཆེན་པོ་གནང་ཡུལ་ཞིག་ནི་བྱམས་བརྩེ་དང་འབྲེལ་བའི་ལས་གཞི་ཆགས་ཀྱི་ཡོད་པ་རེད།སྐུ་ཞབས་ Greg Fischer ལགས་དང་ཐོག་ཕྱི་ལོ་ ༢༠༡༡ ལོར་གྲོང་སྡེའི་སྤྱི་ཁྱབ་པར་བཞེངས་སྐབས་ Louisville གྲོང་སྡེ་དེ་འཕྲོད་བསྟེན་དང་ཉེན་སྲུང་མ་འཇོག་གི་སྒོ་ནས་བྱམས་བརྩེ་ཅན་གྱི་གྲོང་སྡེའི་ངོ་བོར་བསྒྱུར་རྒྱུའི་དགོངས་པ་ཡོད་པ་དང་། དེ་རྗེས་ཕྱི་ལོ་ ༢༠༡༣ ལོར་༸དཔལ་ལྡན་འབྲས་སྤུངས་སྒོ་མང་གྲྭ་ཚང་གི་བྱང་ཨ་རི་ཁུལ་གྱི་ཆོས་ཚོགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་གདན་འདྲེན་ཞུས་སྐབས་སྤྱི་ཁྱབ་པས་ཐེངས་དང་པོ་མགོན་པོ་༸གང་ཉིད་མཆོག་དང་དངོས་སུ་མཇལ་མོལ་བྱུང་ནས་སྔར་ཡོད་དགོངས་པ་དེ་གཏིང་ཟབ་ཏུ་ཕྱིན་ཡོད་པ་རེད་འདུགཨ་རིའི་ Louisville གྲོང་སྡེ་ནང་མི་མང་འདུ་འཛོམས་ཆེས་མང་ཤོས་དེ་སྐབས་གཉིས་ལ་བྱུང་ཡོད་པའི་གསུང་རྒྱུན་གྱི་ཁྲོད་ནས་གཅིག་ནི་ཕྱི་ལོ་ ༢༠༡༣ ལོར་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་ཆིབས་བསྒྱུར་མཛད་སྐབས་ཡིན་པར་གྲོང་སྡེའི་ལོ་རྒྱུས་ཀྱི་ཕྱག་དེབ་ནང་གསལ་ཡོད་པ་དང་། སྐབས་དེར་༸གོང་ས་མཆོག་གིས་མི་མང་ཆིག་ཁྲི་བདུན་སྟོང་ལྷག་ལ་བྱམས་བརྩེའི་སྐོར་བཀའ་སློབ་སྩལ་ཡོད་པ་རེད། ཐེངས་འདིའི་གྲོང་ཁྱེར་སྤྱི་ཁྱབ་པའི་རུ་ཁག་ཁོངས་སུ་ཡོད་པ་ San Antonio གྲོང་ཁྱེར་སྤྱི་ཁྱབ་སྐུ་ཞབས་ Nirenberg ལགས་ལ་མཚོན་ན། ཕྱི་ལོ་ ༢༠༡༧ ལོར་སྤྱི་ཁྱབ་པའི་ལས་གནས་བཞེས་སྐབས་གྲོང་ཁྱེར་དེ་བྱམས་བརྩེ་ཅན་དུ་བསྒྱུར་རྒྱུའི་གསལ་བསྒྲགས་གནང་བ་དང་འབྲེལ་ཏེ་ས་གནས་ཀྱི་མང་ཚོགས་ཁྲོད་བྱམས་བརྩེ་གོང་འཕེལ་གྱི་ལས་གཞི་དབུ་འཛུགས་གནང་བར་མ་ཟད་ཤེས་ཡོན་སྡེ་ཁག་ཏུ་བྱམས་བརྩེའི་བསླབ་གཞི་གསར་འཇུག་གནང་ཡོད།དེ་བཞིན་ Tacoma ལྟ་བུར་མཚོན་ན། ཕྱི་ལོ་ ༢༠༢༠ ལོ་ནས་བྱམས་བརྩེ་ཅན་གྱི་གྲོང་ཁྱེར་ལ་བསྒྱུར་ཏེ་ས་གནས་ཀྱི་མང་ཚོགས་ཁྲོད་བྱམས་བརྩེ་ལག་བསྟར་གྱི་ལས་གཞི་སྤེལ་དགོས་པའི་སྐུལ་མ་དང་འབྲེལ། དེ་ལྟ་བུའི་ལས་གཞི་སྤེལ་མཁན་རྣམས་ལ་ཆེ་བསྟོད་སོགས་གནང་ཡོད། ལྷག་པར་ Louisville གྲོང་ཁྱེར་ནི་ཕྱི་ལོ་ ༢༠༡༡ ཙམ་ནས་དེ་ལྟ་བུའི་ལས་གཞི་དབུ་འཛུགས་གནང་ཡོད་པ་ལྟར་ད་ཆ་གྲོང་ཁྱེར་དེ་རྒྱལ་སྤྱིའི་མིག་དཔེ་ལྟ་ཡུལ་གྱི་གྲོང་ཁྱེར་གཙོ་གྲས་དང་། སྤྱི་ཁྱབ་པ་སྐུ་ཞབས་ Greg Fischer ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞིའི་འོག་ནས་ས་གནས་སུ་བྱམས་བརྩེ་གོང་འཕེལ་གྱི་ལས་གཞི་སྣ་མང་སྤེལ་དང་སྤེལ་མུས་ཐོག་ཝར་ཇི་ནིཡ་གཙུག་ལག་སློབ་གཉེར་ཁང་དང་མཉམ་འབྲེལ་ཐོག་ནས་གཞི་རིམ་སློབ་གྲྭ་ཉི་ཤུ་ལྷག་གི་ནང་བྱམས་བརྩེ་ལག་བསྟར་གནང་རྒྱུའི་བསླབ་གཞིའི་ཕྱག་དེབ་བརྩམས་ཡོད་པ་མ་ཟད། ཚན་རིག་པས་བརྟག་འབྲས་སུ་བྱམས་བརྩེ་སློབ་ཁྲིད་དངོས་སུ་གནང་བ་དང་སློབ་ཁྲིད་མ་གནང་བའི་དབར་སློབ་མ་ཚོའི་ནང་བསམ་བློའི་ཁྱེར་སོ་ལ་ཁྱད་པར་ཆེན་པོ་ཡོད་པའི་ དངོས་ར་གསལ་འཕྲོད་བྱུང་ཡོད་པར་གསུངས་སོང་།གཞི་རྩའི་ཐེངས་འདིའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་མོལ་ཐོག་སྐུ་ཞབས་ Greg Fischer ལགས་ཀྱིས་དབུས་པའི་གྲོང་སྡེའི་སྤྱི་ཁྱབ་ཁག་གཅིག་བཞུགས་སྒར་དུ་ཆེད་ཕེབས་གནང་བ་ནི་གནས་ཡུལ་རྒྱལ་ཁབ་དང་སྒོས་གྲོང་སྡེ་དེ་དག་སོ་སོའི་ནང་བྱམས་བརྩེ་གོང་སྤེལ་གནང་རྒྱུར་དམིགས་ཏེ་ཕེབས་པ་ཞིག་ཡིན་པར་མ་ཟད། ཆེད་ཕེབས་གནང་བའི་སྤྱི་ཁྱབ་པ་དེ་དག་གི་ཁོངས་སུ་ལོ་ན་ཆུང་ཤོས་ཡིན་པ་བོད་རིགས་ཨ་རི་བ་སྐུ་ཞབས་  Aftab Pureval ལགས་ཀྱིས་དབུས་པའི་སྤྱི་ཁྱབ་པ་གཞན་ཚང་མའི་དགོངས་པར་ཕྱིར་རང་གནས་སུ་ཕེབས་རྗེས་བྱམས་བརྩེའི་ཐོག་ནས་ཕྱག་ལས་གནང་ཐུབ་པར་ཐུགས་རེ་ཆེན་པོ་ཡོད་པ་རེད་འདུག

ཉན་པ།: Listen ཕབ་ལེན། Download རྩོམ་པ་པོ་སྒོ་ཡོན་གློད་བཀྲོལ་ཐོབ་ཟིན་ཀྱང་ཆབ་སྲིད་བཙོན་ཟུར་དང་རྩོམ་པ་པོ་གཞན་ཁག་གཅིག་ལ་བཙོན་འཇུག་ཁྲིམས་ཆད་ལྕི་མོ་བཏང་བ། ལྷ་སར་སྤྱི་སྤྱོད་རླངས་འཁོར་སླར་འགོ་ཚུགས་ཏེ་རིམས་འགོག་དང་འབྲེལ་བའི་དམ་བསྒྲགས་ལྷོད་ཡངས། རྒྱ་ནག་ནང་གི་འགྲོ་བ་མིའི་ཐོབ་ཐང་ཐད་ཉི་ཧོང་གྲོས་ཚོགས་འཐུས་མིའི་བྱུས་སྟོན་ཚོགས་ཆུང་གསར་འཛུགས། འཚེ་མེད་ཞི་བའི་ཐོག་ནས་བོད་དོན་འཐབ་རྩོད་མུ་མཐུད་གནང་དགོས། བོད་མིའི་རིགས་རྫས་དེ་ཚོང་གི་ཆེད་མིན་ཟེར་ནས་ངོ་རྒོལ་གྱི་ལས་འགུལ་སྤེལ་བ། ཨ་ལ་ལ་མོ། གླུ་བ་བསོད་བཀྲ་ལགས་ཀྱི་གླུ་གཞས་ཕྱོགས་སྒྲིག Tuesday 06/12/2022 Tibetan writer Goyon believed to be released from detention China eases curbs in Lhasa as Public transportation service resumes Japan launches parliamentary caucus to Monitor Human Rights in China We should strive for freedom through non violence: Drew Pavlou Tibetans stage protest against ThermoFisher for supplying DNA test kids to China Alalamo: Tibetan love song ‘Tell me Why’ by Sota  

བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་སྔ་ལོའི་ཕྱི་ཟླ་ ༡༢ ནང་ཁམས་བྲག་མགོ་ནས་ཡིན་པའི་བོད་ནང་གི་རྩོམ་པ་པོ་སྒོ་ཡོན་སོགས་འཛིན་བཟུང་བྱས་ཏེ་བཙན་དབང་འོག་གར་སོང་ཆ་མེད་དུ་གྱུར་ཡོད་ཀྱང་། ད་ཆ་ཁོང་ཉིད་གློད་བཀྲོལ་ཐོབ་ཟིན་པའི་ཚོད་དཔག་དང་། ཉེ་ལམ་དཀར་མཛེས་བོད་རིགས་རང་སྐྱོང་ཁུལ་གྱི་འབྲིང་རིམ་མི་དམངས་ཁྲིམས་ཁང་ཟེར་བས་བོད་ཀྱི་ཆབ་སྲིད་བཙོན་ཟུར་དང་ཤེས་ལྡན་པ་བོད་མི་དྲུག་ཙམ་ལ་“རྒྱལ་ཁབ་ཁ་བྲལ་ལ་ངན་སྐུལ་”བྱས་པ་དང་“རྒྱལ་ཁབ་ཀྱི་བདེ་འཇགས་ལ་གནོད་སྐྱོན་”བཟོས་པ་སོགས་ཀྱི་ཉེས་མིང་འོག་ཁྲིམས་ཆད་ལྕི་མོ་བཏང་ཡོད་སྐོར་སྤེལ་འདུག ཁམས་བྲག་མགོ་ནས་ཡིན་པའི་བོད་ནང་གི་རྩོམ་པ་པོ་སྒོ་ཡོན་ལགས་སྔ་ལོའི་ཕྱི་ཟླ་བཅུ་གཉིས་ནང་འཛིན་བཟུང་བྱས་ཏེ་བཙན་དབང་འོག་གར་སོང་ཆ་མེད་དུ་གྱུར་སྐབས་ལྟེ་གནས་ཁང་གིས་ཁོང་དང་ན་གཞོན་ཤེས་ཡོན་པ་ས་བུ་ཆེ། སྙན་ངག་པ་རོང་བོ་དགེ་འདུན་ལྷུན་འགྲུབ་དང་རོང་བོ་གངས་དཀར་སོགས་ཀྱི་གནས་བབ་ཐད་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚན་ཁག་ལ་སྙན་སེང་ཞུས་ཡོད་ཀྱང་རྒྱ་གཞུང་གིས་ས་བུ་ཆེ་དང་རོང་བོ་དགེ་འདུན་ལྷུན་འགྲུབ་གཉིས་འཛིན་བཟུང་བྱས་ཟིན་པ་ངོས་ལེན་བྱས་ཡོད་པ་མ་གཏོགས་སྒོ་ཡོན་གྱི་སྐོར་ལ་གསལ་བཤད་གང་ཡང་བྱས་མེད་པ་རེད། འོན་ཀྱང་འདི་ལོ་ཕྱི་ཟླ་བརྒྱད་པའི་ནང་ཁོང་ཉིད་གློད་བཀྲོལ་ཐོབ་ཡོད་ཚུལ་གྱི་གནས་ཚུལ་དང་ལྷག་པར་དུ་ཕྱི་ཟླ་ ༡༡ ཚེས་ ༣༠ ཉིན་སྒོ་ཡོན་གྱི་སྐད་འཕྲིན་གྱི་རྒྱབ་ངོས་སུ་“ལོ་ངོ་གཉིས་ལྷག་ལ་དྲྭ་ལམ་དང་བྲལ་ཏེ། ད་ལྟ་ལེགས་སྐྱེས་ཆུང་ཆུང་འདི་འདྲ་ཞིག་འཁྱེར་ནས་ཐོན་ཡོད་”ཅེས་ཁོང་ཉིད་ཀྱིས་གསར་དུ་བསྒྱུར་བའི་“སྐྱེས་ཐོབ་ཀྱི་གསོ་བྱེད་ Healing Without Medicine” ཞེས་པའི་འཚོ་བཅུད་རིག་པའི་འགྱུར་དེབ་ཅིག་གསར་དུ་ཐོན་ཡོད་པ་གསལ་བསྒྲགས་བྱས་པ་དེས་ཁོང་ཉིད་གློད་བཀྲོལ་ཐོབ་ཟིན་པ་དངོས་བདེན་ཡིན་པར་ཚོད་དཔག་གནང་གི་འདུག འོན་ཀྱང་རྒྱ་གཞུང་གིས་“རྒྱལ་ཁབ་ཁ་བྲལ་ལ་ངན་སྐུལ་”བྱས་པ་དང་“རྒྱལ་ཁབ་ཀྱི་བདེ་འཇགས་ལ་གནོད་སྐྱོན་”བཟོས་པ་སོགས་ཀྱི་ཉེས་མིང་འོག་བོད་ཀྱི་ཆབ་སྲིད་བཙོན་ཟུར་དང་ཤེས་ལྡན་པ་གངས་སྐྱེས་སྒྲུབ་པ་སྐྱབས་ལགས་ལ་ལོ་ ༡༤ ཡི་དུས་བཀག་བཙོན་འཇུག་དང་བསམ་འགྲུབ་དང་གངས་ཚེ་རིང་སྒྲོལ་མ་ལགས་ལ་ལོ་ ༨ གངས་བུ་གཡུ་བྷྲུཾ་ལགས་ལ་ལོ་ ༧  སྲས་རྣམ་ལགས་ལ་ལོ་ ༦ བྲག་མགོ་ནས་ཡིན་པའི་པདྨ་རིན་ཆེན་ལགས་ལ་ལོ་ ༤ བཅས་བོད་མི་དྲུག་ཙམ་ལ་ཁྲིམས་ཆད་ལྕི་མོ་བཏང་ཡོད་པ་ཁུངས་ལྡན་གནས་ཚུལ་དང་སྦྲགས། ཐེངས་འདིར་ཁྲིམས་ཆད་ལྕི་མོ་ཕོག་པའི་ཆབ་སྲིད་བཙོན་ཟུར་རྣམས་ལ་སྔོན་ནས་ཀྱང་བཙོན་འཇུག་ཁྲིམས་ཆད་དང་མནར་གཅོད་ཡང་ཡང་ཕོག་མྱོང་མཁན་ཤ་སྟག་ཡིན་པར་མ་ཟད་སྔོན་ཆད་གློད་བཀྲོལ་ཐོབ་པའི་གནས་སྐབས་སུ་སུན་གཙེར་སྣ་ཚོགས་བྱས་ཏེ་འགྲོ་འདུག་རང་དབང་དང་སྨྲ་བརྗོད་རང་དབང་སོགས་འགྲོ་བ་མིའི་ཐོབ་ཐང་ཁག་རྩ་ནས་སྤྲད་ཡོད་མ་རེད་ཅེས་བཀོད་འདུག གོང་གསལ་གནད་དོན་དང་འབྲེལ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་ནག་ནི་“མནར་གཅོད་དང་མི་སྤྱོད་ལས་འདས་པའི་གདུག་རྩུབ་དང་ཉེས་ཆད་སོགས་འགོག་པའི་རྒྱལ་སྤྱིའི་སྤྱི་ཆིངས་”དེ་ཉིད་ལ་མཚན་བཀོད་དང་ལག་བསྟར་ཁས་ལེན་བྱེད་མཁན་གྱི་རྒྱལ་ཁབ་ཅིག་ཡིན་པར་བརྟེན། བོད་ཀྱི་ཆབ་སྲིད་བཙོན་ཟུར་དང་ཤེས་ལྡན་མི་སྣ་སོགས་ལ་ཉེས་མེད་ཉེས་འགེལ་བྱས་ཏེ་འདི་ལྟར་མི་སྤྱོད་ལས་འདས་པའི་གདུག་རྩུབ་དང་ཉེས་ཆད་གཏོང་བཞིན་པ་དེ་ནི་སྤྱི་ཆིངས་དང་ཡོངས་སུ་འགལ་ཡོད་པ་མ་ཚད་པར་དྲང་བདེན་མིན་པའི་ཁྲིམས་ཆད་དེ་དག་ཕྱིར་ལྡོག་བྱས་ཏེ་ཁོང་རྣམས་ཆ་རྐྱེན་གང་ཡང་མེད་པར་གློད་བཀྲོལ་གཏོང་དགོས་པ་དང་། ཧ་ཅང་ཛ་དྲག་ཅན་གྱི་གནད་དོན་འདི་ལ་མཉམ་འབྲེལ་རྒྱལ་ཚོགས་ཀྱི་མནར་གཅོད་འགོག་པའི་ཚོགས་ཆུང་གཙོས་འབྲེལ་ཡོད་སྡེ་ཁག་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་དང་སྤྱི་སྒེར་རྣམས་ནས་ངེས་པར་དུ་ཐུགས་སྣང་བཞེས་པའི་ཐོག་ནས་རྒྱ་གཞུང་ལ་མངོན་སུམ་འཛེམས་མེད་ཀྱིས་གནོན་ཤུགས་སྤྲོད་དགོས་པའི་འབོད་སྐུལ་ནན་པོ་གནང་ཡོད།

ཁ་སང་རྒྱ་ནག་གཞུང་གིས་བོད་གཙོས་ཤར་ཏུར་ཀི་སི་ཐན། ལྷོ་སོག་བཅས་ཀྱི་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་པར་བྱ་ར་གནང་ཕྱིར་ཉི་ཧོང་གྲོས་ཚོགས་འཐུས་མིའི་བྱུས་སྟོན་ཚོགས་ཆུང་ཞིག་གསར་འཛུགས་གནང་བ་དེ་དབུ་འབྱེད་གནང་འདུགཁ་སང་ཕྱི་ཚེས་ ༥ ཉིན་ཉི་ཧོང་གྲོས་ཚོགས་ཀྱི་ཚོགས་ཁང་དུ་བོད་དང་ཡུ་གུར། ལྷོ་སོག་གི་གནད་དོན་ལ་རྒྱབ་སྐྱོར་གནང་མཁན་གྱི་ཉི་ཧོང་གྲོས་ཚོགས་འཐུས་མི་ཁག་གཅིག་ལྷན་འཛོམས་ཀྱིས་རྒྱ་གཞུང་གིས་བོད་ཀྱིས་གཙོས་པའི་ཤར་ཏུར་ཀི་སི་ཐན་དང་ལྷོ་སོག་བཅས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཐད་བྱ་ར་གནང་ཕྱིར་ཉི་ཧོང་གྲོས་ཚོགས་འཐུས་མིའི་བྱུས་སྟོན་ཚོགས་ཆུང་གསར་འཛུགས་གནང་བ་དེ་གསལ་བསྒྲགས་གནང་ཡོད།ཚོགས་ཆུང་གི་ཚོགས་གཙོ་དང་དྲུང་ཆེར་ཉི་ཧོང་གི་གུ་ཡངས་མང་གཙོ་ཚོགས་པའི་འཐུས་མི་ Keiji Furuya ལགས་དང་ Hiromi Mitsuybayashi བསྐོ་གཞག་བྱུང་འདུག གྲོས་ཚོགས་འཐུས་མི་སྐུ་ཞབས་ Keiji Furuya ལགས་དང་དཔལ་འབྱོར་བདེ་འཇགས་ཀྱི་བློན་ཆེན་ལྕམ་སྐུ་ Sanae Takaichi མཆོག ཉི་ཧོང་གི་སྲིད་བྱུས་ཉམས་ཞིབ་ཁང་གི་ངེས་སྟོན་པ་ལྕམ་ Yoshiko Sakurai ལགས་རྣམ་པས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ཐད་རྒྱལ་སྤྱིའི་སྤྱི་ཚོགས་ནས་མུ་མཐུད་ཁུ་སིམ་པོར་བཞུགས་པའི་རྐྱེན་གྱིས་རྒྱ་གཞུང་གི་བྱེད་སྟངས་ལ་ད་ཆ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་པ་དང་ལྷག་པར་ད་ཆ་ང་ཚོས་རྒྱལ་སྤྱིའི་ཁྲིམས་སྒྲིག་སྲུང་སྐྱོབ་གནང་རྒྱུ་དང་རྒྱ་ནག་གི་བྱེད་ཕྱོགས་ལ་བཀའ་མོལ་གནང་བའི་དུས་ལ་སླེབས་ཡོད་ཅེས་གསུང་བཤད་གནང་ཡོད། དེ་བཞིན་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Shimomura Hakubun ལགས་ཀྱིས་བོད་ནང་རིག་གཞུང་རྩ་གཏོར་བྱེད་བཞིན་པའི་སྐོར་སོགས་གསུང་བཤད་གནང་ཡོད་འདུག་པར་མ་ཟད། དབུ་འབྱེད་ཐོག་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་གྲོས་ཚོགས་འཐུས་མི་རྣམ་པར་བྱུས་སྟོན་ཚོགས་ཆུང་གསར་འཛུགས་གནང་བར་ཐུགས་རྗེ་ཆེ་ཞུས་འདུགདེ་བཞིན་ཚོགས་འདུ་ཐོག་དམིགས་བསལ་གསུང་བཤད་པའི་ཁོངས་སུ་བོད་མིའི་སྒྲིག་འཛུགས་ཀྱི་སྲིད་ཟུར་བློ་བཟང་སེང་གེ་མཆོག་དང་རྒྱལ་སྤྱིའི་ཡུ་གུར་ཚོགས་པ་ World Uyghur Congress ཞེས་པའི་ཚོགས་གཙོ་ Dolkun Isa ལགས་མགྲོན་འབོད་གནང་འདུགགཞི་རྩའི་ཁ་སང་ཉི་ཧོང་གྲོས་ཚོགས་འཐུས་མིའི་བྱུས་སྟོན་ཚོགས་ཆུང་གསར་འཛུགས་གནང་བ་དེ་ཉིད་ཉི་ཧོང་གྲོས་ཚོགས་གོང་མར་མང་མོས་ཀྱི་འོས་བསྡུའི་ལམ་ནས་རྒྱ་ནག་གིས་བོད་གཙོས་ཤིན་ཅང་དང་ནང་སོག དེ་བཞིན་ཧོང་ཀོང་སོགས་ཀྱི་ནང་ཆོས་དད་རང་མོས་རྡོག་རོལ་དང་མང་ཚོགས་རྣམས་བཙན་གྱིས་བཀག་སྐྱིལ་བྱས་དང་བྱེད་བཞིན་པའི་གནད་དོན་དང་འབྲེལ་ཏེ་འགྲོ་བ་མིའི་ཐོབ་ཐང་གི་གནས་སྟངས་ཧ་ཅང་ཛ་དྲག་ཆགས་ཡོད་པར་བློ་འཚབ་ཀྱི་རྣམ་པ་མངོན་གསལ་གནང་སྟེ་དེ་འབྲེལ་གྲོས་ཆོད་ཆེད་འཇོག་གནང་བ་དང་དུས་མཉམ་འཁེལ་ཡོད།