ཁ་སང་ཕྱི་ཚེས་ ༡༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ལ་དྭགས་ཀྱི་སུ་མུར་ཁུལ་དུ་གནས་པའི་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་གི་བསམ་གཏན་གླིང་དགོན་པའི་ ༢༠༡༨ ལོའི་དབྱར་ཆོས་ཆེན་མོ་དབུ་འབྱེད་མཛད་ཡོད་པ་དང་། ལ་དྭགས་སུ་འཚོགས་བཞིན་པའི་དབྱར་ཆོས་ཆེན་མོ་ནི་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ཕེབས་པ་ལྟར་ཕྱི་ལོ་ ༢༠༡༣ ལོར་ཐོག་མར་དབུ་འཛུགས་གནང་བ་ཞིག་དང་། དམིགས་ཡུལ་གཙོ་བོ་ནི་བོད་ཀྱི་ནང་བསྟན་ཆོས་བརྒྱུད་ཕན་ཚུན་དབར་ཐུགས་མཐུན་ཁྲིམས་གཙང་དང་། ས་གནས་མང་ཚོགས་ཚོར་ནང་ཆོས་ཀྱི་ཤེས་ཡོན་གོང་འཕེལ་ཡོང་ཐབས་དང་། ལྷག་པར་དུ་ཆོས་ལུགས་གཞན་དང་མཐུན་སྒྲིལ་གོང་འཕེལ་ཡོང་ཐབས་བཅས་སུ་དམིགས་པ་ཞིག་རེད།
བསམ་གཏན་གླིང་དགོན་པ་ནས་གོ་སྒྲིག་ཞུས་པའི་དབྱར་ཆོས་ཆེན་མོའི་མཛད་སྒོ་ཐོག་དགོན་པ་དེའི་དགོན་བདག་དགའ་ལྡན་ཁྲི་ཟུར་རིན་པོ་ཆེ་མཆོག་དང་། ཁྲིག་རྩེ་རིན་པོ་ཆེ་མཆོག་གིས་དབུས་པའི་བླ་ཆེན་ཁག་ཅིག ས་གནས་ཀྱི་དགོན་སྡེ་སོ་སོའི་སྐུ་ཚབ། ལྷག་པར་དུ་ས་གནས་ཀྱི་ཁ་ཆེའི་སྐུ་ཚབ། ཆབ་སྲིད་ཀྱི་མི་སྣ་དེ་བཞིན་ཡུལ་ལུང་སོ་སོའི་འགོ་དཔོན་དང་མི་མང་བཅས་ཁྱོན་མི་གྲངས་སྟོང་ཕྲག་འགའ་ཞིག་འདུ་འཛོམས་བྱུང་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་གདན་ས་ཁག་ནས་ཐོན་པའི་དགེ་བཤེས་ཚོས་རང་གི་གཞུང་ཙམ་མིན་པར་དབུ་ཕར་རྣམ་འགྲེལ་སོགས་ཀྱི་ཐོག་རིགས་གཅིག་རྐང་འཛིན་གྱི་སློབ་སྦྱོང་གསར་གཏོད་གནང་ཐུབ་ཐབས་སོགས་ཀྱི་ལམ་སྟོན་མཛད་པ་མ་ཟད། ཆོས་ལུགས་ཚང་མས་འཛམ་གླིང་ཀུན་གྱི་བདེ་སྐྱིད་ལ་ཞབས་འདེགས་ཞུ་ཐུབ་པའི་ནང་པའི་ཚད་མ་རིག་པ་དང་། སེམས་ཁམས་རིག་པ་གཉིས་ལ་དོ་སྣང་བྱེད་དགོས་གལ་ཡིན་པ་སོགས་ཀྱི་བཀའ་བསྩལ་འདུག
༸གོང་ས་མཆོག་ནས་ད་དུང་༸གང་ཉིད་མཆོག་འཛམ་གླིང་ས་ཁུལ་གང་དུ་ཆེད་ཕེབས་མཛད་ཀྱང་ནང་ཆོས་སྤེལ་ཐབས་འབད་བརྩོན་གནང་གི་མེད་ཅེས་བཀའ་བསྩལ་མཛད་པ་མ་ཟད། ཆོས་གང་དང་གང་བྱེད་མིན་དེ་སྒེར་སོ་སོའི་ཁམས་དང་མོས་པ་ལ་བསྟུན་དགོས་པ་ཞིག་རེད་ཅེས་ལམ་སྟོན་མཛད་འདུག
སྐབས་དེར་བསམ་གཏན་གླིང་དགོན་པའི་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་ནས་ཀྱང་མཐུན་འབྲེལ་གྱི་རྩ་བ་དེ་ཆོས་ལུགས་ཕན་ཚུན་གྱི་བླ་ཆེན་ཚོའི་དབར་འབྲེལ་བ་དེ་ཐུགས་མཐུན་ཡོང་རྒྱུ་གལ་འགངས་ཆེན་པོ་ཡིན་སོགས་བཀའ་བསྩལ་འདུག
ལ་དྭགས་སུ་མུར་ཁུལ་གྱི་བསམ་གཏན་གླིང་དགོན་པའི་དབྱར་ཆོས་ཆེན་མོའི་མཛད་སྒོ་དེའི་ཐོག་ལ་དྭགས་གླེ་གྲོང་ཁྱེར་གྱི་ཁ་ཆེའི་ Anjuman Mohammad Islam ཚོགས་པའི་ཚོགས་གཙོས་དབུས་པའི་ལྡུམ་ར་ཁུལ་གྱི་ཁ་ཆེའི་སྤྱི་ཚོགས་ཀྱི་ཚོགས་གཙོ་དང་། དེ་བཞིན་ཁ་ཆེའི་མི་མང་མང་པོ་ཞིག་ཕེབས་ཡོད་པ་ལྟར། སྐབས་དེར་ལྡུམ་རའི་ཁ་ཆེའི་ཚོགས་གཙོ་ Mohammad Akram ལགས་ནས་༸གོང་ས་༸སྐྱབས་མགོན་ཆེན་པོའི་རླབས་ཆེན་གྱི་མཛད་འཕྲིན་ཁག་ལ་ཡི་རང་བསྔགས་བརྗོད་ཤུགས་ཆེ་ཞུས་འདུག
དཔལ་ལྡན་འབྲས་སྤུངས་སྒོ་མང་གྲྭ་ཚང་གི་མཁན་རིན་པོ་ཆེ་ལ་དྭགས་པ་བློ་བཟང་རྒྱལ་མཚན་མཆོག་ནས་ཧི་མཱ་ལ་ཡའི་རི་རྒྱུད་ཀྱི་ནང་པ་སྤྱི་དང་། ལྷག་པར་དུ་ལ་དྭགས་པ་ཚོས་བོད་མི་སྐྱབས་བཅོལ་བ་ཚོའི་བཀྲིན་བསམ་ཤེས་བྱེད་དགོས་པ་སོགས་ཀྱི་གསུང་བཤད་གནང་སྟེ་བསམ་གཏན་གླིང་དགོན་པའི་དབྱར་ཆོས་ཀྱི་མཛད་སྒོ་དེ་མཇུག་སྒྲིལ་གནང་ཡོད་པ་རེད།
