བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཞུགས་སྒར་གངས་སྐྱིད་ཀྱི་ཉེ་འདབས་སུ་ཆགས་པའི་དྷ་ཤོད་ Byepass ས་ཚོགས་སུ་གསར་རྒྱག་གནང་བའི་ནད་རིགས་སྣ་ཚོགས་ཀྱི་སྨན་བཅོས་ལྡན་པའི་སྨན་ཁང་གསར་པ་ APEX Multispeciality Hospital ཞེས་པ་དེ་དབུ་འབྱེད་གནང་བ་དང་སྐབས་དེར་སྨན་ཁང་གསར་པའི་ངོས་ནས་བོད་མིའི་སྒྲིག་འཛུགས་ཀྱི་སྲི་ཞུ་བ་ཚོ་ལ་སྨན་བཅོས་ཀྱི་རིང་འབབ་ཆག་ཡང་ཐོག་ནས་གནང་རྒྱུའི་དགོངས་པ་བཞེས་པར་ཐུགས་རྗེ་ཆེ་ཞེས་གསུངས་ཡོད།
དེ་རིང་ཕྱི་ཚེས་ ༨ ཉིན་གྱི་སྔ་དྲོའི་ཆུ་ཚོད་ ༡༡༌༣༠ ཐོག་ཧིན་བོད་མཛའ་འབྲེལ་ཚོགས་པའི་སློབ་སྟོན་པ་སྐུ་ཞབས་ Ram Swaroop ལགས་དང་བོད་དོན་རྒྱབ་སྐྱོར་བ་པྲེམ་སགྷར་ལགས། དེ་བཞིན་དྷ་སའི་མངའ་ཁུལ་དུ་ཡོད་པའི་སྨན་པ་རྒན་གྲས་ཁག་ཅིག་གིས་ཟུང་འབྲེལ་ཐོག་གསར་འཛུགས་གནང་བའི་ APEX སྨན་ཁང་དབུ་འབྱེད་ཀྱི་མཛད་སྒོ་ཚོགས་སོང་བ་དང་། སྐབས་དེར་སྐུ་མགྲོ་གཙོ་བོ་སྲིད་སྐྱོང་སྤེན་པ་ཚེ་རིང་མཆོག་གིས་སྨན་ཁང་འབུ་འབྱེད་གནང་བ་དང་འབྲེལ་ཏེ་སྨན་བཅོས་ཀྱི་བརྒྱུད་རིམ་ནང་ལ་སྨན་པ་ཤེས་ཚད་ལྡན་པ་ཞིག་དགོས་གལ་ཡིན་སྐོར་གསུངས་པ་དང་ཆབས་ཅིག སྨན་པ་ཚོའི་ངོས་ནས་ཀྱང་ནད་པ་ཚོ་དང་བཀའ་མོལ་གནང་སྟངས་གཙོས་འབྲེལ་བ་གནང་སྐབས་བྱམས་བརྩེ་ལྡན་པའི་ཐོག་ནས་གནང་དགོས་པ་སོགས་ལམ་སྟོན་གནང་ཡོད། 
སྲིད་སྐྱོང་མཆོག་གིས་རྒྱ་གར་དབུས་གཞུང་དང་ལྷག་པར་དུ་༸གོང་ས་མཆོག་གི་བཞུགས་གནས་དང་། བོད་མིའི་སྒྲིག་འཛུགས་ཀྱི་བསྟི་གནས་ཆགས་ཡུལ་ཧི་མཱ་ཅལ་མངའ་སྡེའི་སྲིད་གཞུང་རིམ་པས་བོད་དོན་ཐོག་ཕྱག་རོགས་གནང་དང་གནང་བཞིན་པར་ཐུགས་རྗེ་ཆེ་ཞེས་གསུངས་པ་དང་། ད་རེས་སླར་གངས་སྐྱིད་གཙོས་བོད་མིའི་བཞུགས་གནས་དང་ཉེ་བའི་ས་ཚིགས་ཤིག་ལ་སྨན་ཁང་ཆེ་གྲས་གསར་འཛུགས་གནང་བ་དེས་ས་གནས་ཡུལ་མི་ཙམ་མ་ཟད་བོད་མི་ཚོ་ལའང་སྨན་བཅོས་དུས་ཐོག་ལ་ཐོབ་རྒྱུའི་ཆ་རྐྱེན་ཞིག་དང་། ལྷག་པར་དུ་འབྲེལ་ཡོད་རྣམས་ནས་བོད་མིའི་བོད་མིའི་སྒྲིག་འཛུགས་སྲི་ཞུ་བ་ཚོ་ལ་སྨན་བཅོས་ཀྱི་རིན་འབབ་ཆག་ཡང་ཐོག་ནས་གནང་རྒྱུའི་དགོངས་བཞེས་གནང་བར་ཐུགས་རྗེ་ཆེ་ཞེས་གསུངས་ཡོད།
དེ་བཞིན་སྐབས་དེར་དམིགས་བསལ་སྐུ་མགྲོན་སྨན་པ་ V.P Mahajan ལགས་ཀྱིས་འདས་པའི་སྨན་བཅོས་ལས་དོན་གྱི་ཉམས་མྱོང་དང་འབྲེལ། ནད་པ་མི་ཉུང་བ་ཞིག་དུས་ཐོག་ལ་བརྟག་དཔྱད་དང་སྨན་བཅོས་མ་གནང་བའི་དབང་གིས་ཚེ་སྲོག་ཤོར་བཞིན་ཡོད་པ་སོགས་འགྲེལ་བརྗོད་དང་སྦྲགས། མང་ཚོགས་ཚོས་དུས་ཐོག་ལ་བརྟག་དཔྱད་གནང་གལ་ཡིན་པ་དང་། སྨན་པ་ཚོའི་ངོས་ཀྱང་སྨན་བཅོས་ཀྱི་བརྒྱུད་རིམ་ཁྲོད་ནད་པ་ཚོར་དགོས་ངེས་ཀྱི་སྨན་བཅོས་གནང་བ་ཙམ་མིན་པར་རྣམ་ཀུན་ནས་ནད་པ་ཚོར་ནད་རིགས་གང་ཡིན་ལ་མ་ལྟོས་པར་གདོང་ལེན་གནང་ཐུབ་ཀྱི་རེད་ཅེས་བློ་སྤོབས་བསྐྲུན་གལ་ཡིན་པའི་ལམ་སྟོན་གནང་ཡོད།
དེ་རིང་དབུ་འབྱེད་གནང་བའི་ནད་རིགས་སྣ་ཚོགས་ཀྱི་སྨན་བཅོས་ལྡན་པའི་སྨན་ཁང་གསར་པ་ APEX Multispeciality Hospital ཞེས་པའི་ནང་ལ་རྒྱུན་ལྡན་གྱི་ནད་རིགས་ཁག་དང་ལུས་པོ་བརྟག་དཔྱད། སྙིང་དང་མཆིན་པའི་ནད་གཞི། དེ་བཞིན་མིག་དང་ཕོ་མོའི་སྐྱེ་ནུས། བེུད་མེད་ཀྱི་ལུས་ཁམས་དང་འབྲེལ་བའི་ནད་གཞི་བརྟག་དཔྱད་དང་སྨན་བཅོས་ཀྱི་མཐུན་རྐྱེན་ཡོད་པ་མ་ཟད། སླད་པར་རིམ་བཞིན་སྨན་ཁང་དེ་རྒྱ་སྐྱེད་གནང་རྒྱུའི་འཆར་གཞི་ཡོད་པ་རེད།
