Tibetan Royal Year of 2151 | Year of the Wood Dragon

༸གོང་ས་མཆོག

ཕི་ལ་གྲེལ་ཕི་ཡ་ནང་བྱམས་བརྩེའི་ཉིན་མོ་སྲུང་བརྩི་ཞུ་འཆར་ཡོད་པ་རེད་འདུག

ཨ་རིའི་གྲོང་ཁྱེར་ཕི་ལ་གྲེལ་ཕི་ཡ་ (Philadelphia )ནང་རིང་མིན་ཕྱི་ཟླ་ ༡༠ ཚེས་ ༢༧ ཉིན་བྱམས་བརྩེའི་ཉིན་མོ་ཞེས་སྲུང་བརྩི་ཞུ་འཆར་ཡོད་པ་རེད་འདུག ཟླ་ ༡༠ ཚེས་ཉེར་དྲུག་དང་ཉེར་བདུན་བཅས་སུ་ཕི་ལ་གྲེལ་ཕི་ཡ་གྲོང་ཁྱེར་ནང་༸གོང་ས་༸སྐྱབས་མགོན་ཆེན་པོ་མཆོག་ཆིབས་བསྒྱུར་གནང་གཏན་ཁེལ་བ་དང་བསྟུན་། ཁུལ་དེའི་ནང་ཡོད་པའི་ཨ་རིའི་གློག་བརྙན་ཁྲབ་སྟོན་པ་དང་སྒྱུ་རྩལ་བ་སྐུ་ཞབས་ Nathan Bazzel ལགས་དང་ ཕི་ལ་གྲེལ་ཕི་ཡ་བོད་རིགས་ནང་པའི་ལྟེ་གནས་ཁང་གི་ཚོགས་མི་ལྕམ་སྐུ་ Elazar Aslan གཙོས་པའི་གནད་ཡོད་མི་སྣ་ཁག་གཅིག་ནས་ཉིན་མོ་དེ་ནི་བྱམས་བརྩེའི་ཉིན་མོར་སྲུང་བརྩི་ཞུ་འཆར་ཡོད་པ་མ་ཟད། ལས་འཆར་དེའི་འཛིན་སྐྱོང་འགན་འཛིན་སྐུ་ཞབས་ Nathan Bazzel ལགས་ཀྱིས་གསུངས་དོན་ལ་ལས་འཆར་དེ་ནི་གཙོ་བོ་༸གོང་ས་མཆོག་གི་བཀའ་དགོངས་བཞིན་མང་ཚོགས་ལ་བྱམས་བརྩེའི་གོ་རྟོགས་སྤེལ་ཏེ་འགྲོ་བ་མིའི་རྒྱུད་ཀྱི་བཟང་སྤྱོད་གོང་འཕེལ་གཏོང་ཆེད་ཡིན་པར་གསུངས་འདུག ལས་རིམ་ལྟར་ཁུལ་དེའི་སློབ་གྲྭ་དང་མཐོ་སློབ་ཁག་གི་ནང་བྱམས་བརྩེའི་སྐོར་སྙན་རྩོམ་རིགས་བྲིས་པ་ཁག་སྤྱི་ཚོགས་འབྲེལ་མཐུད་ཀྱི་དྲ་རྒྱ་ twitter དང་ངོ་དེབ་སོགས་ཀྱི་ཐོག་ལ་ཁྱབ་སྤེལ་གནང་རྒྱུ་ཡིན་སྐོར་འཁོད་འདུག ད་དུང་སྐབས་དེའི་མཛད་འཆར་ཁྲོད་ཁུལ་དེ་ནས་༸གོང་ས་མཆོག་གི་མཛད་འཕྲིན་ལ་ཆེ་བསྟོད་དང་སྦྲགས་ཏེ་ཕྱི་ལོ་ ༢༠༡༥ ལོའི་ཨ་རིའི་རང་དབང་གཟེངས་རྟགས་དེ་བཞིན་མགོན་པོ་མཆོག་ལ་འབུལ་ལམ་ཞུ་རྒྱུའི་གསལ་བསྒྲགས་ཀྱང་སྤེལ་འདུག

༸གོང་ས་མཆོག་གིས་༸སྐུའི་འཁྲུངས་སྐར་ལ་འཚམས་འདྲི་ཞུས་མཁན་ཚང་མར་ཐུགས་རྗེ་ཆེ་ཞུ་གསུངས་འདུག

གཤམ་འཁོད་གསུང་འཕྲིན་འདི་ནི་དཔལ་ལྡན་དགའ་ལྡན་ཕོ་བྲང་གི་དྲ་གནས་ཐོག་འདོན་སྤེལ་གནང་འདུག དེ་ཡང་༸གོང་ས་མཆོག་གིས་ ( འདི་ལོ་ཕྱི་ཟླ་དྲུག་པ་བདུན་པའི་ནང་ངོས་རང་ལོ་བརྒྱད་ཅུར་སོན་པའི་སྐྱེས་ཚེས་ཀྱི་དུས་སྟོན་གྱི་སྐབས་འཇིག་རྟེན་འདིའི་ཡུལ་ལུང་སྣ་ཚོགས་སུ་བཞུགས་པའི་མཆེད་གྲོགས་རྣམས་པས་འཚམས་འདྲི་དང་།ལེགས་བརྗོད་སྨོན་འདུན་གནང་སོན་བྱུང་བར་སྙིང་ནས་ཐུགས་རྗེ་ཆེ་ཞེས་བརྗོད་རྒྱུ་ཡིན། ཀུན་གྱིས་མཁྱེན་གསལ་བཞིན་ངོས་ཀྱི་མི་ཚེ་སེམས་ཅན་ཐམས་ཅད་ཀྱི་ཕན་བདེ་སྒྲུབ་པའི་དོན་དུ་དམིགས་ཤིང། ལྷག་པར་འགྲོ་བ་མིའི་སྤྱི་ཚོགས་ལ་ཞབས་འདེགས་ཅི་ནུས་སྒྲུབ་པའི་ལྷག་བསམ་བཅངས་བཞིན་པ་ཡིན། བདེ་བ་འདོད་ལ་སྡུག་བསྔལ་མི་འདོད་པ་ནི་སྲོག་ཆགས་ཀུན་གྱི་རང་གཤིས་ཡིན་པ་དང་། དེ་ནི་སེམས་ཅན་ཐམས་ཅད་གཅིག་མཐུན་འདྲ་མཉམ་ཡིན་པའི་རྒྱུ་མཚན་ཡང་ཡིན། དེར་བརྟེན་འགྲོ་བ་ཡོངས་ཀྱི་ཕན་བདེ་སྒྲུབ་པ་དང་། སྡུག་བསྔལ་སེལ་བའི་མཉམ་འདུས་ཀྱི་ལས་འགན་ཡང་ཀུན་ལ་ཡོད་པས་འགྲོ་བ་མིའི་བྱམས་བརྩེ་སྙིང་པོ་ཅན་གྱི་བཟང་སྤྱོད་གོང་འཕེལ་དང་། འཐབ་རྩོད་དང་འཚེ་བ་སྤོང་ཐབས། ཆོས་ལུགས་ཕན་ཚུན་གུས་བརྩིའི་མཐུན་ལམ། རང་བྱུང་ཁོར་ཡུག་སྲུང་སྐྱོབས་བཅས་ལ་ཚང་མས་ཐུགས་ཁུར་ཆེ་བསྐྱེད་གནང་བའི་རེ་སྨོན་དང་འབོད་བསྐུལ་བྱེད་ཀྱི་ཡོད། ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མ་སྐྱེ་ཕྲེང་བཅུ་བཞི་པས། རབ་བྱུང་བཅུ་བདུན་པའི་ཤིང་ལུག་ཟླ་ ༦ ཚེས་ ༢༨ ཕྱི་ལོ ༢༠༡༥ ཟླ་ ༨ ཚེས་ ༡༢ ལ། ། ) ཞེས་བཀའ་བསྩལ་འདུག

༸གོང་ས་མཆོག་རྒྱ་གར་གྱི་རྒྱལ་ས་ལྡི་ལིར་ཞབས་སོར་བདེ་བར་འཁོད་གནང་མཛད་པ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ནང་གི་མཛད་འཕྲིན་ཁག་ལེགས་པར་གྲུབ་པ་དང། དེ་རིང་སྔ་དྲོ་མགོན་པོ་༸གང་ཉིད་མཆོག་རྒྱ་གར་གྱི་རྒྱལ་ས་ལྡི་ལི་ནང་ཞབས་སོར་བདེ་བར་འཁོད་གནང་མཛད་འདུག དེ་རིང་ཟླ ༧ ཚེས་ ༣༡ སྔ་དྲོ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་རི་རྫོང་སྲས་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་མཆོག་གིས་དབུས་པའི་ས་གནས་གཞུང་འབྲེལ་དཔོན་རིགས་ཁག་དང། མཛད་འཆར་གོ་སྒྲིག་བ་ལ་དྭགས་དགོན་ཚོགས་ཀྱི་སྐུ་ཚབ། དེ་བཞིན་ཕེབས་ལམ་ཐོག་སེར་སྐྱ་མང་ཚོགས་རྣམས་ནས་དད་གུས་ཀྱིས་སེར་བང་དང་བཅས། ༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་དཔེ་ཐུབ་དར་རྒྱས་གླིང་དགོན་པ་ནས་ལ་དྭགས་ཀྱི་རྒྱལ་ས་སླེ་སྦ་སྐུ་ལའི་གནམ་ཐང་དབར་ཕེབས་སྐྱེལ་གཟབ་རྒྱས་ཞུས་འདུག ༸གོང་ས་༸སྐྱབས་མགོན་ཆེན་པོ་མཆོག་ནས་ཟླ་ ༧ ཚེས་ ༢༧ ནས་ ༣༠ བཅས་ཉིན་བཞིའི་རིང་གི་མཛད་འཕྲིན་ཁག་བསྐྱང་པའི་ཁྲོད་དུ་མགོན་པོ་མཆོག་གིས་ཕར་ཕྱིན་དབྱར་ཆོས་ཆེན་མོའི་ཚོགས་མགོན་དུ་དབུ་བཞུགས་གནང་ཐོག་དགེ་འདུན་པ་ཚོར་བླང་དོར་གྱི་བཀའ་སློབ་ལམ་སྟོན་སྩལ་བ་དང། ལ་དྭགས་སླེ་འཇམ་དབྱངས་སློབ་གྲྭར་ཆིབས་སྒྱུར་གྱིས་བུ་མོའི་སྡོད་ཁང་གསར་པ་དབུ་འབྱེད་གནང་བ་མ་ཟད། མཐོ་རིམ་སློབ་མའི་གཞོན་སྐྱེས་ཚོར་ནང་པའི་ལྟ་གྲུབ་དང་ཚན་རིག་ཐོག་བཀའ་སློབ་བསྩལ་བ། དེ་བཞིན་ས་གནས་མང་ཚོགས་དད་ལྡན་ཆོས་ཞུ་བ་ ༥༠༠༠ ལྷག་ལ་དགེ་བཤེས་གླང་རི་དམ་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་དང་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀྲིན་ཆེ་བ་བཅས་ཀྱི་མཛད་འཆར་མང་དག་བསྐྱངས་ཡོད་པ་རེད། ལྷག་དོན་དུ་ས་གནས་གཞུང་མང་གཉིས་ནས་མགོན་པོ་༸གང་ཉིད་མཆོག་དགུང་གྲངས་ ༨༠ ཕེབས་པ་དང་བསྟུན། མགོན་པོ་མཆོག་༸སྐུ་ཚེ་མི་འཇིགས་རྡོ་རྗེའི་ཁམས་སུ་བརྟན་ཕྱིར་བརྟན་བཞུགས་རྒྱས་པ་ཞིག་བསྟར་འབུལ་ཞུས་ཡོད་པ་རེད། མགོན་པོ་མཆོག་དེ་རིང་དང་སང་བཅས་ཉིན་གཉིས་རིང་ལྡི་ལིར་༸སྐུའི་འཕྲོད་བཞེས་བརྟགས་དཔྱད་མཛད་སླད་བཞུགས་བཞགས་གནང་རྒྱུ་དང། གནངས་ཟླ་ ༨ ཕྱི་ཚེས་ ༢ ཉིན་མགོན་པོ་མཆོག་བཞུགས་སྒར་དྷ་སར་ཞབས་སོར་འཁོད་གནང་མཛད་རྒྱུ་རེད་འདུག

ལ་དྭགས་མི་དམངས་ཡོངས་ཀྱིས་༸གོང་ས་མཆོག་གི་༸སྐུའི་གྱ་སྟོན་ལ་བརྟན་བཞུགས་བསྟར་འབུལ་ཞུས་པ།

བོད་ཀྱི་བླ་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ལ་དྭགས་མི་དམས་ཡོངས་ཀྱིས་བརྟན་བཞུགས་རྒྱས་པ་ཞིག་བསྟར་འབུལ་ཞུས་འདུག དེ་རིང་ཟླ་ ༧ ཚེས་ ༣༠ ཉིན་ལ་དྭགས་ཞི་བའི་འཚལ་ཕོ་བྲང་དུ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་རི་རྫོང་སྲས་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་མཆོག་དབུས་པའི་ལ་དྭགས་ཡུལ་མི་དང་། ས་གནས་བོད་མི་བཅས་ཐུན་མོང་གིས་དགའ་གུས་དད་གསུམ་གྱི་ཐོག་ནས་འདི་ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་ ༨༠ ཕེབས་པ་དང་བསྟུན།མགོན་པོ་༸གང་ཉིད་མཆོག་༸སྐུ་ཚེ་མི་འཇིགས་རྡོ་རྗེའི་ཁམས་སུ་བརྟན་ཕྱིར་ས་གནས་དགོན་ཁག་ ༡༦ གི་མཁན་བློ་སྤྲུལ་རྣམ་པ། ས་གནས་གཞུང་འབྲེལ་དཔོན་རིགས། བོད་མིའི་སྐུ་ཚབ་དང། དེ་བཞིན་སེར་སྐྱ་མང་ཚོགས་ ༥༠༠༠ ལྷག་འདུ་འཛོམས་ཐོག་བརྟན་བཞུགས་རྒྱས་པ་ཞིག་བསྟར་འབུལ་ཞུས་འདུགསྐབས་དེར་མགོན་པོ་མཆོག་གིས་སེམས་པ་བཟང་པོ་བྱ་གལ་ཆེ་བ་དང་བྱང་ཆུབ་སེམས་སྒོམ་ནས་སྟིང་ཉིད་རྟོགས་པའི་ལྟ་བས་རྩིས་ཟིན་པ་ཞིག་གནང་དགོས་གལ་ཆེ་བ་སོགས་ཀྱི་ཐད་ལ་བཀའ་བསྩལ་མཛད་འདུག རྩ་བའི་སྔ་དྲོ་༸གོང་ས་མཆོག་གིས་ལ་དྭགས་སླེ་ཞི་བའི་འཚལ་ཕོ་བྲང་དུ་ལ་དྭགས་མགོན་ཚོགས་ནས་ཇི་ལྟར་གསོལ་འདེབས་ཞུ་དོན་ལྟར། དད་ལྡན་མང་ཚོགས་ཆོས་ཞུ་བ་ ༥༠༠༠ ལྷག་ལ་དགེ་བཤེས་གླང་རི་དམ་པས་མཛད་པའི་བློ་སྦྱོང་ཚིག་བརྒྱད་མའི་གསུང་ཆོས་དང། པཎ་གྲུབ་བཅུ་བདུན་གྱི་བཤད་ལུང། དེ་བཞིན་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀྲིན་ཆེ་བ་བསྩལ་འདུག

ལ་དྭགས་མི་དམངས་ཡོངས་ནས་༸སྐུའི་གྱ་སྟོན་ལ་འཚམས་འདྲི་ཞུས་པ།

དེ་རིང་རྒྱ་གར་བྱང་ཕྱོགས་ཇ་མུ་དང་ཀ་ཤ་མིར་ནང་དུ་རྟེན་གཞི་བྱས་པའི་ལ་དྭགས་མི་དམངས་དང་ས་གནས་ཀྱི་གཞུང་འབྲེལ་དཔོན་རིགས་རྣམས་ནས་༸གོང་ས་མཆོག་དགུང་གྲངས་ ༨༠ ཕེབས་པར་དགའ་དད་སྤྲོ་གསུམ་གྱིས་གསོལ་སྟོན་རྒྱས་པ་ཞིག་གོ་སྒྲིག་ཞུས་ནས་༸སྐུའི་གྱ་སྟོན་ལ་འཚམས་འདྲི་ཞུས་འདུག མཛད་རིམ་དེ་ནི་ལ་དྭགས་ཀྱི་གྲོང་ཁྱེར་སླེ་ཉེ་འཁྲིས། Ladakh Sindh Sanskrit ཚོགས་ཁང་ཆེན་མོའི་ནང་དུ་ཚོགས་པ་དང། སྐབས་དེར་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཁང་གི་གཙོ་འཛིན་བཀའ་བློན་རིག་འཛིན་དཔལ་འབར་མཆོག མངའ་སྡེའི་བློན་ཆེན་སྐུ་ཞབས་ཚེ་རིང་རྡོ་རྗེ་མཆོག ངག་དབང་རིག་འཛིན་མཆོག་དང། དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་མཁན་བླ་སྤྲུལ་རྣམ་པ། དེ་བཞིན་ལ་དྭགས་མི་མང་སྤྱི་འཐུས་ཐུབ་བསྟན་ཚེ་དབང་ལགས་སོགས་ཆེས་མཐོའི་དཔོན་རིགས་ཁག་གཙོས་པའི་གཞུང་ཞབས་ ༥༠༠ སོགས་ཆེད་ཕེབས་གནང་ཡོད་འདུག ཉིན་དགུང་ཚོུད་ ༡༡།༣༠ ཡོལ་ཙམ་ལ་༸གོང་ས་མཆོག་དབུ་བཞུགས་ཐོག་༸སྐུའི་གྱ་སྟོན་གྱི་རྟེན་འབྲེལ་དུས་སྟོན་སྲུང་བརྩིའི་ཐོག་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཁང་གི་གཙོ་འཛིན་བཀའ་བློན་རིག་འཛིན་དཔལ་འབར་མཆོག་གིས་མགོན་པོ་༸གང་ཉིད་མཆོག་ད་རེས་སླར་ཡང་ལ་དྭགས་སུ་ཆིབས་སྒྱུར་བསྐྱངས་པར་བཀྲིན་བླ་མེད་དུ་ཆེ་ཞེས་གུས་འདུད་ཀྱིས་ཞུས་པ་མ་ཟད།དེ་རིང་གི་དུས་ཚིགས་ཁྱད་པར་བ་འདིའ་ཐོག་ནས་ལ་དྭགས་མི་མང་ཡོངས་ཀྱི་ཚབ་ཞུས་ནས་སྐུའི་འཁྲུངས་སྐར་འཚམས་འདྲི་ཞུས་པ་དང་སྦྲགས། ད་བར་མགོན་པོ་༸གང་ཉིད་མཆོག་གིས་སྐུ་དྲིན་ལ་བརྟེན་ནས་ལ་དྭགས་དགོན་གྲོང་གཉིས་ལ་ཤེས་ཡོན་སོགས་ཕྱོགས་གང་སྤྱིའི་ཐད་ནས་ཡར་རྒྱས་ཧ་ཅང་ཆེན་པོ་སོང་ཡོད་པར་བཀྲིན་རྗེས་དྲན་ཞུས་འདུག་པ་དང། སླད་མར་ཡང་མགོན་པོ་༸གང་ཉིད་ཀྱི་ཐུགས་རྗེའི་བྱིན་རླབས་བསྩལ་སྐྱོང་ཡོང་བའི་གསོལ་འདེབས་སོགས་ཞུས་ཡོད་པ་རེད་འདུག སྐབས་དེར་༸གོང་ས་མཆོག་གིས་བཀའ་སློབ་བསྩལ་བའི་ཁྲོད་དུ་བོད་གངས་ཅན་ལྗོངས་སུ་དར་བའི་པའི་དཔལ་ན་ལེནྡྲའི་ཆོས་བརྒྱུད་དྲི་མ་མེད་པ་དེ་དང་བོད་རང་གི་ཆོས་བརྒྱུད་ཆེན་པོ་བཞིའི་བླ་ཆེན་རྣམ་པའི་དགོངས་པ་དང་མཐུན་པར་སྔར་ལྷག་རྒྱུན་གནས་ཐུབ་ཐབས་དང་ཆོས་ལུགས་ཕན་ཚུན་དབར་མཐུན་སྒྲིག་གནང་གལ་ཆེ་བ་སོགས་ཀྱི་ཐད་བཀའ་སློབ་བསྩལ་གནང་མཛད་འདུག གཞན་ཡང་དེ་རིང་གི་མཛད་འཆར་གཙོ་བོ་གཅིག་ནི་ལ་དྭགས་ནང་རྟེན་གཞི་བྱས་པའི་དཔེ་ཐུབ་དགོན་པར་སྔ་དང་མི་འདྲ་བ་ནང་པའི་ཆོས་བརྒྱུད་ཆེན་པོ་བཞིའི་དགོན་སྡེ་ཆེ་ཁག་༡༦ གི་དགེ་འདུན་པ་བརྒྱ་ལྷག་ཆེད་བཅར་གྱིས་འཚོགས་བཞིན་པའི་ཕར་ཕྱིན་དབྱར་ཆོས་ཆེན་མོའི་ཚོགས་དགོན་དུ་ཆིབས་སྒྱུར་བཀྲིན་བསྐྱངས་འདུག

བོད་རང་དབང་ཚོགས་པས་སི་ཁོ་ཊི་ལན་ཌི་གཞུང་ཕྱོགས་ནས་རྒྱ་ནག་གི་ཁུང་ཙི་སློབ་གླིང་དང་འབྲེལ་བ་མི་གནང་བའི་ཞུ་འབོད་གནང་བ།

དབྱིན་ཡུལ་ནང་བརྟེན་གཞི་བྱས་པའི་བོད་རང་དབང་ཚོགས་པས་བསྒྲགས་གཏམ་ཞིག་སྤེལ་བའི་ནང་སི་ཁོ་ཊི་ལན་ཌིའི་གཞུང་ནས་རྒྱ་ནག་གི་ཁུང་ཙི་སློབ་གླིང་དང་མཉམ་དུ་མུ་མཐུད་འབྲེལ་ལམ་བྱེད་བཞིན་པ་མ་ཟད། སླར་ཡང་ཡུལ་དེའི་ནང་རྒྱ་ནག་གི་ཁུང་ཙི་སློབ་གླིང་ཉི་ཤུ་རྩ་གཅིག་ལྷག་གསར་རྒྱག་བྱ་རྒྱུའི་འདུན་པ་དང་ལས་འཆར་ཁག་སྐྱོན་བརྗོད་ནན་པོ་ཞུས་འདུག ཟླ་ ༧ ཕྱི་ཚེས་ ༢༦ ཉིན་སི་ཁོ་ཊི་ལན་ཌིའི་བློན་ཆེན་ལྕམ་སྐུ་ Nicola Sturgeon ལགས་ནས་རྒྱ་ནག་ནང་ཚོང་དང་། དཔལ་འབྱོར་། ཤེས་ཡོན་དང་ དེ་བཞིན་རིག་གཞུང་བརྗེ་རེས་སོགས་ཀྱི་གནད་དོན་ཐད་འཚམས་གཟིགས་གནང་བཞིན་པའི་ཁྲོད་། རྒྱ་ནག་ནང་ཡོད་པའི་སི་ཁོ་ཊི་ལན་ཌེའི་ཚོང་པ་དང་སློབ་ཕྲུག་རྣམས་ལ་རྒྱ་ནག་གི་ཁུང་ཙི་སློབ་གླིང་ལ་ཆེ་བསྟོད་དང་སྦྲགས། སློབ་གླིང་དེ་དག་རྒྱུད་སི་ཁོ་ཊི་ལན་ཌིའི་སློབ་ཕྲུག་དང་མི་དམངས་རྣམས་ལ་ལས་གནས་ཀྱི་གོ་སྐབས་དང་དཔལ་འབྱོར་སོགས་ཀྱི་ཁེ་ཕན་ཆེན་པོ་ཡོད་ལུགས་བརྗོད་པ་དང། ཁུང་ཙི་སློབ་གླིང་དང་འབྲེལ་བ་བཞག་ཐོག་སི་ཁོ་ཊི་ལན་ཌི་ནང་ཡོད་པའི་གཞི་རིམ་སློབ་གྲྭ་ཁག་ཉི་ཤུ་རྩ་གཅིག་གི་ནང་རྒྱ་ནག་གི་སྐད་ཡིག་དང་རིག་གཞུང་སོགས་སློབ་ཁྲིད་བྱ་རྒྱུའི་འདུན་པ་ཆེན་པོ་ཡོད་པ་གསུངས་འདུག བོད་རང་དབང་ཚོགས་པའི་གསར་འགོད་འགན་འཛིན་སྐུ་ཞབས་ Alistair Currie ལགས་ནས་བསྒྲགས་གཏམ་ཞིག་སྤེལ་བའི་ནང་སི་ཁོ་ཊི་ལན་ཌི་དང་རྒྱ་ནག་གི་མི་སེར་དབར་འབྲེལ་བ་ཇི་མང་དུ་འགྲོ་བཞིན་པ་ནི་བཟང་ཕྱོགས་ཀྱི་རྣམ་པ་ཞིག་ཡིན་མོད། འོན་ཀྱང་རྒྱ་ནག་གི་ཁུང་ཙི་སློབ་གླིང་དང་མཉམ་དུ་སི་ཁོ་ཊི་ལན་ཌིའི་གཞུང་ཕྱོགས་ནས་མུ་མཐུད་འབྲེལ་བ་དམ་ཟབ་བྱེད་མཞིན་པར་སེམས་འཚབ་ཆེན་པོ་ཡོད་སྐོར་གསུངས་པ་དང། རྒྱ་ནག་གི་ཁུང་ཙི་སློབ་གླིང་དེ་དག་གིས་སི་ཁོ་ཊི་ལན་ཌི་ནང་རྒྱ་ནག་གི་སྐད་ཡིག་དང་རིག་གཞུང་ཁག་དར་སྤེལ་བྱེད་པ་དང་མཉམ་དུ་རིམ་བཞིན་སི་ཁོ་ཊི་ལན་ཌིའི་སློབ་ཕྲུག་དང་མི་དམངས་ཀྱི་སྨྲ་བརྗོད་རང་དབང་སོགས་ལ་དོ་ཕོག་ཤུགས་ཆེ་ཡོང་ངེས་ཡིན་པའི་ཉེན་བརྡ་བཏང་འདུག་པ་མ་ཟད། རྒྱ་གཞུང་གིས་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་ཀྱི་ཐོག་ནས་རྡོག་རོལ་གཏོང་མཁན་ཞིག་ཡིན་སྟབས། སི་ཁོ་ཊི་ལན་ཌིའི་གཞུང་ཕྱོགས་ནས་ཀྱང་རྒྱ་ནག་གི་གཡོ་སྒྱུའི་རང་བཞིན་ལྡན་པའི་སྲིད་བྱུས་དང་ལས་འཆར་ཁག་ལ་དང་ལེན་ནམ་ཡང་གནང་རྒྱུ་མེད་པ་རེད་ཅེས་ཞུ་འབོད་གནང་འདུག དེ་མཚུངས་དེ་རིང་ཨ་རི་ནང་ཡོད་པའི་ EPoch Times གསར་ཤོག་ཐོག་ཐོན་པའི་གནས་ཚུལ་ལ་གཞིགས་ན། ཨུ་རུ་སུའི་ནང་གི་ཁྲིམས་རྩོད་པ་ཞིག་གིས་རྒྱལ་ཁབ་དེའི་གྲོང་ཁྱེར་ Blagoveshchensk ནང་རྟེན་གཞི་བྱས་པའི་ Blagoveshchensk State Pedagogical གཙུག་ལག་སློབ་གྲྭ་ཆེན་མོའི་ནང་རྒྱ་ནག་གི་ཁུང་ཙི་སློབ་གླིང་སྒོ་བརྒྱབ་དགོས་པ་དང་། དེ་བཞིན་སློབ་གླིང་དེ་དང་འབྲེལ་བ་ཡོད་སློབ་གཞི་དང་དགེ་རྒན་ཁག་ཕྱིར་འབུད་བྱ་དགོས་པའི་ཁྲིམས་གཏུགས་བྱས་འདུག

༸གོང་ས་མཆོག་གིས་ལ་དྭགས་ཁུལ་གྱི་དགེ་སློབ་ ༧༠༠༠ ལྷག་ལ་ནང་པའི་ཚན་རིག་དང་ལྟ་གྲུབ་གྱི་སྐོར་བཀའ་སློབ་བསྩལ་འདུག

༸གོང་ས་མཆོག་གིས་ལ་དྭགས་ཁུལ་གྱི་དགེ་སློབ་ ༧༠༠༠ ལྷག་ལ་ནང་པའི་ཚན་རིག་དང་ལྟ་གྲུབ་གྱི་སྐོར་བཀའ་སློབ་བསྩལ་འདུག དེ་རིང་ཟླ་ ༧ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལ་དྭགས་ནང་ཉིན་དང་པོའི་མཛད་འཆར་དབུ་བཙུགས་དང་སྦྲགས།ལ་དྭགས་ནང་རྟེན་གཞི་བྱས་པའི་འཇམས་དབྱངས་སློབ་གྲྭའི་རྩེད་ཐང་དུ་ཁུལ་དེའི་གཞུང་སྒེར་གཉིས་ཀྱི་སློབ་གྲྭ་ཁག་གི་དགེ་ལས་དང་། འཛིན་རིམ་དྲུག་པ་ཡན་གྱི་སློབ་ཕྲུག དེ་བཞིན་མཐོ་རིམ་སློབ་མའི་གཞོན་སྐྱེས་སོགས་ཁྱོན་མི་གྲངས་ ༧༠༠༠ ལྷག་ལ་བྱམས་པ་དང་སྙིང་རྗེ། ནང་པའི་ཚན་རིག་དང་ལྟ་གྲུབ་གྱི་སྐོར་བཀའ་སློབ་སྩལ་བ་དང་གཞོན་སྐྱེས་ཚོར་ནང་པའི་ལྟ་གྲུབ་ཤེས་པ་ཙམ་མ་ཡིན་པར་དངོས་ཐོག་ཉམས་ལེན་གྱིས་ཉིན་རེའི་འཚོ་བའི་ནང་བདེ་སྐྱིད་ཞིག་སྐྲུན་ཐུབ་པ་དགོས་གལ་ཆེ་བར་བཀའ་བསྩལ་འདུགདེ་ཡང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་སླེ་གྲོང་ཁྱེར་ནང་ཡོད་པའི་ཇོ་ཁང་ནང་གནས་གཟིགས་དང་། བསྔོ་སྨོན་གསོལ་འདེབས་གསུང་འདོན་གནང་བ་དང་སྦྲགས་དེའི་ཐོག་བཅར་བའི་ལ་དྭགས་དགོན་ཚོགས་ཀྱི་སྐུ་ཚབ་རྣམ་པ་དང་དགོན་ཁག་བཅུ་དྲུག་གི་དགེ་འདུན་པ་རྣམས་ལ་བཀའ་བསྒྱུར་གྱི་ཕྱག་དཔེ་དེ་དག་ཆོས་བཤོམས་ནང་སྒྲིག་ཏེ་མ་འཇོག་པར་སློབ་སྦྱོང་གི་འདུ་ཤེས་ཐོག་སློབ་གཉེར་བྱ་དགོས་པའི་བཀའ་བསྩལ་འདུགདེ་རྗེས་མགོན་པོ་མཆོག་ལ་དྭགས་ས་ཁུལ་གྱི་འབྲོག་པའི་ཕྲུ་གུ་རྣམས་ཀྱི་ཤེས་ཡོན་སླད་ཆེད་འཛུགས་གནང་བའི་འཇམ་དབྱངས་སློབ་གྲྭར་ཆིབས་སྒྱུར་གྱིས་བུ་མོའི་སྡོད་ཁང་གསར་པ་དབུ་འབྱེད་ཀྱི་བཀྲིན་ཆེ་བ་མཛད་འདུག

༸གོང་ས་མཆོག་ལ་དྭགས་སུ་ཞབས་སོར་བདེ་བར་འཁོད་པ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྔ་དྲོ་ཚོུད་ ༡༠།༣༠ ཡས་མས་སུ་ལ་དྭགས་སླེ་རུ་ཞབས་སོར་བདེ་བར་འཁོད་གནང་མཛད་འདུག མགོན་པོ་༸གང་ཉིད་མཆོག་ལ་དྭགས་གནམ་ཐང་དུ་ཞབས་སོར་འཁོད་སྐབས་ཇ་མུ་ཀ་ཤ་མིར་མངའ་སྡེ་བློན་ཆེན་ཚེ་རིང་རྡོ་རྗེ་ལགས། མངའ་སྡེ་གྲོས་ཚོགས་འཐུས་མི་ངག་དབང་རིན་འཛིན་ཇོ་ར་ལགས་རྣམ་གཉིས་དང་། དགའ་ལྡན་ཁྲི་རིན་པོ་མཆོག་དབུས་པའི་གཞུང་འབྲེལ་མི་སྣ་ཁགདེ་བཞིན་ལ་དྭགས་ནང་པའི་ཚོགས་པ་དང་ཆོས་ལུགས་ཁག་གི་སྐུ་ཚབ་སོགས་ཆེད་ཕེབས་དང། ས་གནས་མང་ཚོགས་རྣམས་ནས་དགའ་དད་སྤྲོ་གསུམ་གྱི་ཐོག སྦ་སྐུ་ལ་གནམ་ཐང་ནས་དཔེ་ཐུབ་དགོན་པའི་བར་བཀྲིས་པའི་མཆོད་རྫསདང་བདུག་སྤོས། ཞུགས་ཏོག་གཞན་ཡང་དགའ་གུས་ཀྱི་གླུ་སྒར་བཅས་ཀྱིས་གདན་འདྲེན་གཟབ་རྒྱས་ཞུས་འདུག མགོན་པོ་མཆོག་དཔེ་ཐུབ་དགོན་པར་ཞབས་གསོར་འཁོད་མ་ཐག འཇམ་མགོན་རྒྱལ་བའི་རྒྱལ་ཚབ་དགའ་ཁྲི་རིན་པོ་ཆེ་མཆོག་གིས་མཎྡྲལ་རྟེན་གསུམ་འདེགས་འབུལ་གནང་བ་དང། གྲོ་མ་འབྲས་སིལ་བཤམས་སྟོན་ཐོག་ཕེབས་བསུའི་མཛད་སྟོན་ཚོགས་གནང་འདུག ༸གང་ཉིད་མཆོག་ད་ལན་ལ་དྭགས་སུ་བཀྲིན་ཆེན་པོས་ཆིབས་སྒྱུར་བསྐྱངས་མཛད་དོན་གཙོ་བོ་ནི། ལ་དྭགས་ནང་པའི་ཆོས་ཚོགས་དང་དགོན་པའི་ཚོགས་པ་གཉིས་ཀྱིས་ཇི་ལྟར་གསོལ་འདེབས་ཞུ་དོན་ལྟར་དཔེ་ཐུབ་དགོན་པའི་ཕར་ཕྱིན་དབྱར་ཆོས་ཆེན་མོའི་ཚོགས་མགོན་སླད་ཆེད་ཕེབས་མཛད་པ་ཞིག་ཡིན་འདུག མགོན་པོ་མཆོག་གིས་རིང་མིན་སྤྱི་ལོ་ ༢༠༡༦ ནང་ལ་དྭགས་སུ་ཆིབས་བསྒྱུར་བསྐྱང་ནས་ཡུན་རིང་བཞུགས་གནང་མཛད་རྒྱུའི་བཀའ་བཞེས་བཟང་པོའང་བསྩལ་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ཟླ་འདིའི་ཚེས་ ༢༧ ནས་༣༠ བཅས་སུ་ཆིབས་སྒྱུར་མཛད་པའི་ཁྲོད་དུ། ཕྱི་ཚེས་ ༢༨ ཉིན་སླེ་གྲོང་ཁྱེར་ནང་ཡོད་པའི་ཇོ་ཁང་ནང་གནས་གཟིགས་དང་། དེ་བཞིན་ལ་དྭགས་ས་ཁུལ་གྱི་འབྲོག་པའི་ཕྲུ་གུ་རྣམས་ཀྱི་ཤེས་ཡོན་སླད་ཆེད་འཛུགས་གནང་བའི་འཇམ་དབྱངས་སློབ་གྲྭར་ཆིབས་སྒྱུར་གྱིས་བུ་མོའི་སྡོད་ཁང་གསར་པ་དབུ་འབྱེད་དང་། མཐོ་རིམ་སློབ་མའི་གཞོན་སྐྱེས་ཚོར་ལེགས་ངན་བླང་དོར་གྱི་བཀའ་སློབ་བཀའ་དྲིན་བསྩལ་རྒྱུ་ཡིན་འདུག དེ་མཚུངས་ཕྱི་ཚེས་ ༢༩ ཉིན་ཕར་ཕྱིན་དབྱར་ཆོས་ཆེན་མོའི་ཚོགས་མགོན་དུ་དབུ་བཞུགས་མཛད་རྒྱུ། ཁུལ་དེར་དད་ལྡན་མང་ཚོགས་རྣམས་ལ་དགེ་བཤེས་གླང་རི་དམ་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་དང། སྒྲོལ་དཀར་ཡིད་བཞིན་འཁོར་ལོའི་ཚེ་དབང་བསྩལ་རྒྱུ། ལྷག་དོན་ཕྱི་ཚེས་ ༣༠ ཉིན་ལ་དྭགས་ལྕོག་ལམ་སར་ཞི་བའི་འཚལ་ཕོ་བྲང་དུ་མང་ཚོགས་ ༥༠༠༠༠ ལྷག་འདུ་འཛོམས་ཀྱིས་༸སྐུའི་གྱ་སྟོན་སྲུང་བརྩི་དང་དུས་མཚུངས་ལ་དྭགས་མི་མང་ཡོངས་ནས་མགོན་པོ་༸གང་ཉིད་མཆོག་༸སྐུ་ཚེ་མི་འཇིགས་རྡོ་རྗེའི་ཁམས་སུ་བརྟན་ཕྱིར་བརྟན་བཞུགས་རྒྱས་པ་ཞིག་ཀྱང་བསྟར་འབུལ་ཞུ་རྒྱུ་སོགས་ཀྱི་མཛད་འཆར་འདུག

༸གོང་ས་མཆོག་ལ་དྭགས་སུ་ཆིབས་སྒྱུར་བསྐྱང་རྒྱུ།

རྒྱ་གར་བྱང་ཕྱོགས་ ཇ་མུ་ཀཤ་མིར་ མངའ་སྡེ་ནང་དུ་རྟེན་གཞི་བྱས་པའི་ལ་དྭགས་ནང་པའི་དགོན་ཚོགས་གཉིས་ནས་ཇི་ལྟར་གསོལ་འདེབས་ཞུ་དོན་བཞིན་བཀའ་བཞེས་བཟང་པོ་སྨིན་སྩོལ་ཐོབ་སྟེ། བོད་ཀྱི་བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་ཟླ་བ་འདིའི་ཕྱི་ཚེས་༢༧ནས་༣༠བར་ཉིན་བཞི་རིང། ལ་དྭགས་སུ་ཆིབས་སྒྱུར་བཀྲིན་བསྐྱང་གཏན་འཁེལ་འདུག ༸གོང་ས་མཆོག་ཕྱི་ཚེས་༢༧ ཉིན་བཞུགས་སྒར་ནས་ཆིབས་སྒྱུར་བསྐྱང་གནང་གི་འདུག་པ་དང། ས་གནས་ཀྱི་མཛད་འཆར་ཁྲོད་མགོན་པོ་༸གང་ཉིད་མཆོག་གིས་དད་ལྡན་མང་ཚོགས་ལ་བློ་སྦྱོང་ཚིགས་བརྒྱད་མའི་ཆོས་འབྲེལ་དང། སྒྲོལ་དཀར་ཡིད་བཞིན་འཁོར་ལོའི་ཚེ་དབང་། ཕར་ཕྱིན་དབྱར་ཆོས་ཆེན་མོའི་ཚོགས་མགོན་དུ་ཆིབས་སྒྱུར་དང་། དེ་བཞིན་མཐོ་རིམ་སློབ་མའི་གཞོན་སྐྱེས་ཚོར་བླང་དོར་བཀའ་སློབ་བཀྲིན་བསྩལ་འཆར་འདུག ལྷག་པར་དུ་ཕྱི་ཚེས་༣༠ཉིན། ཞི་བའི་འཚལ་ཕོ་བྲང་དུ་མང་ཚོགས་ཁྲི་ལྔ་ལྷག་འདུ་འཛོམས་ཀྱིས་༸སྐུའི་གྱ་སྟོན་སྲུང་རྩིས་དང་དུས་མཚུངས་ལ་དྭགས་མི་མང་ཡོང་ནས་བརྟན་བཞུགས་བསྟར་འབུལ་ཞུ་རྒྱུ་སོགས་ཀྱི་མཛད་འཆར་འདུག

Latest news