བཙན་བྱོལ།

སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཞི་པའི་ཐོག་སྲིད་སྐྱོང་བློ་བཟང་སེང་མཆོག་གིས་ད་ལྟའི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་བཀའ་ཤག་སྐབས་ ༡༥ པའི་བཀའ་བློན་དུ་མཚན་འདོན་གནང་དོན་བཞིན་ཁོང་ལ་མང་མོས་ཀྱིས་བཀའ་བློན་དུ་བདམས་ཐོན་གནང་སོང་།དེ་རིང་ཟླ་ ༣ ཚེས་ ༢༢ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཞི་པ་དབུ་འཛུགས་གནང་བ་དང་འབྲེལ། བོད་རྒྱ་འབྲེལ་མོལ་དང་དབུ་མའི་ལམ་གྱི་སྲིད་བྱུས་ཐོག་སྐར་རྟགས་ཅན་གྱི་དྲི་བ་དང་ལན་འདེབས་ཀྱི་ལས་རིམ་གྲུབ་རྗེས། སྲིད་སྐྱོང་མཆོག་གིས་གྲོས་ཚོགས་སུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༡ པའི་དགོངས་དོན་བཀའ་དྲུང་སྟོབས་རྒྱལ་ཚེ་རིང་ལགས་བཀའ་བློན་གྱི་འོས་མིར་མཚན་འདོན་གནང་ཡོད་པ་རེད། སྲིད་སྐྱོང་མཆོག་གིས་བཀའ་བློན་གྱི་འོས་མི་ངོ་སྤྲོད་གནང་གྲུབ་རྗེས་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་རང་ཉིད་ཀྱི་ལངས་ཕྱོགས་དང་ལྟ་གྲུབ་གཞིར་བཞག་ཐོག་ནས་དགག་བྱ་གནང་ཡོད་སྟབས། མཛོང་ཁ་སྟོབས་རྒྱལ་ཚེ་རིང་ལགས་སུ་སྤྱི་འཐུས་རྣམ་པས་གསང་བའི་འོས་ཤོག་འཕངས་རྗེས་སྤྱི་འཐུས་རྩ་འབོར་ ༤༣ ནས་འོས་པ་ ༢༡ དང་མི་འོས་པ་ ༡༨ སྟོང་པ་ ༢ དང་རྩིས་མེད་ ༡ བཅས་མང་མོས་ཐོག་ནས་སྐབས་ ༡༥ པའི་བཀའ་ཤག་ལྷན་ཚོགས་ཀྱི་བཀའ་བློན་དུ་བདམས་ཐོན་བྱུང་ཡོད་པ་རེད།སྤྱི་འཐུས་རྣམས་ནས་འོས་ཤོག་མ་འཕང་གོང་དུ་སྲིད་སྐྱོང་བློ་བཟང་སེང་གེ་མཆོག་གིས་ད་ལྟའི་བཀའ་བློན་འོས་མི་འདི་ལ་དགག་པ་གནང་མཁན་སྤྱི་འཐུས་གཅིག་བྱུང་ཡོད་ཀྱང་། ད་ལྟའི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་ཐེགས་པ་རིམ་འཛེམས་ཀྱིས་དབུས་བོད་མིའི་སྒྲིག་འཛུགས་ནང་ལ་ཕྱག་ལས་ཡུན་རིང་གནང་མཁན་ལྷག་བསམ་ཅན་ཞིག་ཡིན་པ་དང་ཁོང་ལ་བཀའ་བློན་གྱི་འོས་ཆོས་ཚང་ཡོད་སྐོར་ནན་གསུངས་གནང་ཡོད།གསར་འགོད་པས་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་སུ་བཀའ་བློན་དུ་བདམས་ཐོན་བྱུང་བ་དང་འབྲེལ་བཅར་འདྲི་ཁག་ཅིག་ཞུས་པར་ཁོང་གིས་རིང་མིན་ཕྱི་ཟླ་དྲུག་པའི་ཟླ་མཇུག་ཙམ་ལ་ཁོང་གི་རྒས་ཡོལ་འཕར་འགྱངས་ཀྱི་དུས་ཚོད་རྫོགས་ཀྱི་ཡོད་སྟབས། སྲིད་སྐྱོང་མཆོག་ནས་ཁོང་བཀའ་ཤག་སྐབས་ ༡༥ པ་དབུ་འཛུགས་པ་ནས་ད་བར་བཀའ་དྲུང་གི་ཕྱག་ལས་གནང་མུས་ཡིན་པར་དགོངས་བཞེས་ཀྱིས་བཀའ་ཤག་སྐབས་ ༡༥ པའི་ཕྱག་ལས་གནང་རྒྱུ་ལྷག་བསྡད་ཁག་རྒྱུན་འཁྱོངས་གནང་དགོས་པར་བཀའ་ཕེབས་ལྟར་ངོས་བཞེས་གནང་ཡོད་སྐོར་གསུངས་སོང་།གཞི་རྩའི་མཛོངས་ཁ་སྟོབས་རྒྱལ་ཚེ་རིང་ལགས་ཕྱི་ལོ་ ༡༩༥༥ ཕྱི་ཟླ་ ༧ ཚེས་ ༡ ཉིན་འཁྲུངས་ཡོད་པ་དང་། ཕྱི་ལོ་ ༡༩༧༣ ལོར་རྒྱ་གར་རྒྱལ་ཡོངས་འབྲིང་རིམ་སློབ་གཉེར་ལེགས་པར་ཐོན་མ་ཐག་རང་གཞུང་གི་བཀའ་འབྲེལ་ལྟར་ཐོག་མར་བལ་ཡུལ་ཤར་ཁུམ་བུ་སློབ་གྲྭར་ལོ་བཞིའི་རིང་དགེ་ཆེ་གནང་བ་དང་། དེ་རྗེས་མུ་མཐུད་གཞུང་ཞབས་ལས་གནས་སུ་ཞུགས་པ་ལྟར་ད་བར་སྲི་ཞུའི་ལས་འགན་ཐོག་ལ་ཐེགས་པ་རིམ་འཛེགས་ཀྱིས་རྩིས་པ་དང་། དྲུང་ཡིག བཟོ་མགོ མཉམ་དྲུང་། ལ་སྤྱི། ས་གནས་འགོ་འཛིན། ནང་སྲིད་དང་འཕྲོད་བསྟེན་གཉིས་སུ་གཟུང་དྲུང་དང་དྲུང་འཕར། ཤེས་རིང་དྲུང་ཆེ་བཅས་ཀྱི་ལས་འགན་ཞུས་ཡོད་པ་དང་། ད་ལྟ་བཀའ་དྲུང་ལས་ཐོག་ཡིན་པ་བཅས་ཁྱོན་མི་ལོ་ ༤༠ ལྷག་གི་རིང་དབུས་བོད་མིའི་སྒྲིག་འཛུགས་ཀྱི་སྲི་ཞུའི་ཕྱག་ལས་གནང་བཞིན་ཡོད་པ་རེད།

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་གསུམ་པའི་ཚོགས་དུས་ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་མ་ལག་དང་བཅས་པའི་ལོ་འཁོར་སྔོན་རྩིས་ཕྱོགས་བསྡོམས་གཏན་འབེབས་དང་དྲི་བ་དྲིས་ལན་སོགས་མུ་མཐུད་གནང་ཡོད། ཁ་སང་དང་དེ་རིང་བཅས་བགྲོ་གླེང་གནང་བའི་ཁྲོད་བོད་མི་མང་སྤྱི་འཐུས་ཚེ་རིང་ལྷ་མོ་ལགས་ཀྱིས་ཉེ་ཆར་གཞུང་འབྲེལ་གསུམ་གཅུའི་དུས་དྲན་ཐོག་ཕེབས་པའི་རྒྱ་རིགས་སྐུ་མགྲོན་ཞིག་ནས་སོ་སོའི་ཁེ་ཕན་ལ་དམིགས་ཏེ་གནས་ཚུལ་རྫུན་བཟོས་ཀྱིས་ཁྱབ་སྤེལ་བྱས་ཡོད་པ་སོགས་འགྲེལ་བརྗོད་གནང་བ་དང་སྦྲགས། མ་འོངས་པར་བོད་མིའི་སྒྲིག་འཛུགས་ཀྱིས་རྒྱ་མི་དང་འབྲེལ་བ་གནང་སྐབས་རྒྱ་མི་དེ་དག་གི་རྒྱབ་ལྗོངས་ཀྱི་དམིགས་ཡུལ་སོགས་ཀྱི་ཐོག་དོ་སྣང་གཟབ་ནན་གནང་དགོས་སྐོར་གསུངས་ཡོད་པ་རེད། གནད་དོན་དེ་ལས་འཕྲོས་ཏེ་སྤྱི་འཐུས་གཞན་ཁག་གཅིག་གིས་རྒྱ་རིགས་བོད་དོན་ལ་རྒྱབ་སྐྱོར་གནང་མཁན་གྱི་གྲངས་འབོར་ལས་སྤུས་ཚད་གནད་ཆེ་ཡིན་པ་སོགས་ཀྱི་དགོངས་ཚུལ་གནང་ཡོད།སྐབས་དེར་སྲིད་སྐྱོང་བློ་བཟང་སེང་གེ་མཆོག་མཆོག་གིས་འདི་ལོའི་གསུམ་བཅུའི་དུས་དྲན་ཐོག་ཕེབས་པའི་རྒྱ་རིགས་རྣམས་བོད་དོན་ལ་གདུང་སེམས་མཉམ་བསྐྱེད་མཚོན་ཆེད་རང་ངོས་ནས་ཆེད་མངགས་འགྲོ་གྲོན་གནང་ནས་ཕེབས་པར་སྒྲིག་འཛུགས་ཀྱི་ངོས་ནས་ཕེབས་བསུ་ཞུས་ཡོད་པ་དང་། སྤྱིར་བོད་མིའི་སྒྲིག་འཛུགས་ནས་རྒྱ་རིགས་གྲོགས་ཕོ་མོ་སུ་འདྲ་ཞིག་དགོས་མིན་གྱི་ཆ་རྐྱེན་སོགས་བསྐྲུན་ཐབས་མེད་པ་དང་། བོད་སྤྱིའི་རྩ་དོན་ཆེད་དུ་རྒྱ་རིགས་གྲོགས་ཕོ་མོ་དགོས་པ་མ་ཟད་དེའང་ག་ཚོད་མང་ན་ཡག་གི་རེད་ཅེས་གསུངས་ཡོད། དེ་བཞིན་ཕྱི་དྲིལ་ལས་ཁུངས་ཀྱི་ལས་དོན་དང་འབྲེལ་སྤྱི་འཐུས་ཁག་གཅིག་གིས་བོད་མིའི་སྒྲིག་འཛུགས་ནས་དབུ་མའི་ལམ་གྱི་ཟབ་སྦྱོང་དང་འབྲེལ་ལོ་ལྟར་གཏོང་བཞིན་པའི་མ་དངུལ་དང་དེའི་གྲུབ་འབྲས་ཇི་ཙམ་ཐོན་ཡོད་མེད་ཐོག་བཀའ་འདྲི་ཞུས་པ་མ་ཟད། ལ་ལས་དབུ་མའི་ལམ་དང་རང་བཙན་གང་ཡིན་ཀྱང་རྩོད་ས་དེ་རྒྱ་ནག་ཡིན་པ་མ་ནོར་བ་གནང་དགོས་གལ་ཡིན་པ་སོགས་གཞེན་སྐུལ་གནང་ཡོད།སྲིད་སྐྱོང་མཆོག་གིས་དབུ་མའི་ལམ་གྱི་སྲིད་བྱུས་འདི་སྤྱི་མོས་ཀྱིས་གཏན་ལ་ཕབ་པའི་སྲིད་བྱུས་ཤིག་ཡིན་པ་དང་། དེ་ལག་བསྟར་གནང་རྒྱུ་འཛིན་སྐྱོང་བཀའ་ཤག་ལ་འགན་ཡོད་པ་བཞིན་ཕྱག་ལས་གནང་མུས་ཡིན་པ་སོགས་གསལ་བཤད་དང་འབྲེལ། སྒྲིག་འཛིགས་ཀྱིས་ད་བར་དབུ་མའི་ལམ་གྱི་གོ་རྟོགས་སྤེལ་ཕྱིར་དཔེ་དེབ་དང་བརྙན་ཐུང་སོགས་འགྲེམ་སྤེལ་བརྒྱུད་མང་ཚོགས་ཁྲོད་གོ་རྟོགས་རྒྱ་ཆེ་སྤེལ་ཡོད་པ་མ་ཟད། དབུ་མའི་ལམ་གྱི་ཟབ་ཁྲིད་གནང་མཁན་ཚོ་ཡང་དབུ་མའི་ལམ་ལ་ངེས་པ་རྙེད་པ་ཤ་སྟག་ཆགས་ཡོད་པར་གསུངས་ཡོད།གཞན་ཡང་བགྲོ་གླེང་ཁྲོད་ད་བར་བོད་མིའི་སྒྲིག་འཛུགས་ནས་བསྐོང་ཚོགས་གནང་བའི་ལྔ་དང་ལྔ་བཅུའི་ཚོགས་འདུ་ཁག་གི་གྲུབ་དོན་གང་ཡིན་དང་། མ་འོངས་པར་མུ་མཐུད་ལྔ་དང་ལྔ་བཅུའི་ཚོགས་འདུ་ཚོགས་འཆར་ཡོད་མེད་སོགས་སྤྱི་ཡོངས་ཐོག་བཀའ་འདྲི་ཞུས་པ་དང་། སྲིད་སྐྱོང་མཆོག་ནས་ད་རེས་གྲོས་ཚོགས་མཇུག་སྒྲིལ་མ་ཟིན་པའི་སྔོན་ལ་ལྔ་དང་ལྔ་བཅུའི་ཚོགས་འདུ་དང་འབྲེལ་བའི་སྙན་ཐོག་གྲོས་ཚོགས་སུ་འབུལ་ཐུབ་པ་ཞུ་རྒྱུ་དང་། ལྔ་དང་ལྔ་བཅུའི་གཞོན་སྐྱེས་ཚོགས་འདུ་མུ་མཐུད་འཚོགས་རྒྱུ་ཡིན་པ་སོགས་གསལ་བཤད་དང་། ལྷག་པར་དུ་བདུན་ཕྲག་རྗེས་མའི་རེས་གཟའ་ལྷག་པའི་ཉིན་གྲོས་ཚོགས་སུ་ལྔ་དང་ལྔ་བཅུའི་ཚོགས་འདུ་དང་འབྲེལ་བའི་གསལ་བཤད་རྒྱས་པ་ཞིག་གནང་རྒྱུ་ཡིན་པ་གསུངས་སོང་།རྩ་བའི་ཁ་སང་ཉིན་རྒྱབ་ཚོགས་དུས་བཞི་པ་ནས་དབུ་འཛུགས་ཀྱིས་དེ་རིང་ཉིན་གང་རིང་སྤྱི་འཐུས་རྣམ་པས་ཕྱི་དྲིལ་ལས་ཁུངས་མ་ལག་དང་བཅས་པའི་ལོ་འཁོར་སྔོན་རྩིས་ཕྱོགས་བསྡོམས་གཏན་འབེབས་དང་ལས་དོན་བཅས་ཀྱི་ཐོག་བགྲོ་གླེང་གནང་ཡོད་པ་དང་། སྐབས་དེར་བོད་མིའི་སྒྲིག་འཛུགས་ནས་རྒྱལ་ཚོགས་ཐོག་ལས་འགུལ་སྔར་ལྷག་སྤེལ་དགོས་པ། རྒྱ་ནག་གི་དྲྭ་ལམ་ཐོག་དྲྭ་འབུ་གཏོང་བཞིན་པར་དོགས་ཟོན་སོགས་གནད་དོན་མང་དག་ཅིག་གི་ཐོག་བགྲོ་གླེང་གནང་མཐར་ཕྱི་དྲིལ་ཁུངས་ཀྱི་དམིགས་བསལ་འགྲོ་གྲོན་སྒོར་འབུམ་ ༢༠༠༢༤༢༦༥ དང་། ཕྱི་དྲིལ་ལས་ཁུངས་ཀྱི་ཟུར་བཀོད་མ་དངུལ་འབུམ་ ༡༡༠༤༩༣༩༦ བཅས་གཏན་འབེབས་ཟིན་མཚམས་སུ་ཕྱི་དྲིལ་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་དང་། སྐུ་ཚབ་དོན་གཅོད་ལས་ཁུངས་ཁག་གི་ཟུར་བཀོད་དང་རྒྱུན་གྲོན། དམིགས་བསལ་བཅས་ཀྱི་མ་དངུལ་གཏན་འབེབས་དབུ་འཛུགས་གནང་ཡོད།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༧ པའི་ལས་ཉིན་ ༢ པའི་ཚོགས་དུས་གཉིས་པ་དང་གསུམ་པའི་ཐོག་བོད་མིའི་སྒྲིག་འཛུགས་བདེ་སྲུང་ལས་ཁུངས་མ་ལག་དང་བཅས་པའི་ལོ་འཁོར་སྔོན་རྩིས་ཕྱོགས་བསྡོམས་ཐད་བགྲོ་གླེང་གནང་ཡོད་པ་ལྟར། བདེ་སྲུང་བཀའ་བློན་མཆོག་གིས་རྒྱ་གར་དུ་གནས་བཞུགས་བཙན་བྱོལ་བོད་མི་རྣམས་ནས་རང་ཉིད་ཀྱི་སྐྱབས་བཅོལ་ལག་དེབ་དུས་ཐོག་ཏུ་དུས་འགྱངས་ཞུ་དགོས་པའི་འབོད་སྐུལ་གནང་སོང་།གྲོས་ཚོགས་སུ་སྤྱི་འཐུས་མང་དག་ཅིག་ནས་བོད་མིའི་སྐྱབས་བཅོལ་ལག་དེབ་དང་འབྲེལ་བའི་དུས་འགྱངས་ཀྱི་ཉེས་ཆད་དེ་ཨ་སྒོར་གྱི་ཚད་གཞིའི་ཐོག་ནས་ཉེས་ཆད་གཅོད་ཀྱི་ཡོད་པ་དེ་རྒྱ་གར་ནང་སྲིད་ལས་ཁུངས་དང་ཕྱི་སྲིད་ལས་ཁུངས་ཀྱི་བཀོད་ཁྱབ་ནང་བོད་མིས་ཨ་སྒོར་འབུལ་དགོས་པ་ཞིག་བཀོད་ཡོད་མེད་དང་བོད་མི་སྐྱབས་བཅོལ་ལག་དེབ་འཁྱེར་མཁན་ཞིག་ནས་ཨ་སྒོར་ནང་ཉེས་ཆད་དངུལ་སྤྲོད་དགོས་པའི་རྒྱུ་མཚན་གང་ཡིན་པ་སོགས་ཀྱི་ཐོག་བཀའ་བསྡུར་གནང་ཡོད་མེད། སྤྱི་འཐུས་ཁག་གཅིག་ནས་སྐྱབས་བཅོལ་ལག་དེབ་མེད་པ་རྣམས་ལ་གསར་བཟོ་ག་ཚོད་ཙམ་གནང་ཡོད་པ་དང་གསར་བཟོ་མ་ཐུབ་པ་ཇི་ཡོད། དེ་བཞིན་ཕྱིར་སྐྱོད་ལག་འཁྱེར་སོགས་ཀྱི་དཀའ་ངལ་མང་དག་ཅིག་འཕྲད་བཞིན་ཡོད་པའི་སྐོར་དང་འབྲེལ་བའི་བགྲོ་གླེང་གནང་སྐབས་བཀའ་བློན་མཆོག་གིས་འབྲེལ་ཡོད་ས་གནས་སྤྱི་བདེ་ལས་ཁུངས་དང་། ཉེན་རྟོག་ལས་ཁུངས། གསང་བའི་ལས་ཁུངས། ནང་སྲིད་ལས་ཁུངས་བཅས་ལ་ཞུ་གཏུགས་གནང་མུས་ཡིན་པ་དང་། རིང་མིན་གྲུབ་འབྲས་ཐོན་རྒྱུར་ཐུགས་རེ་གནང་བཞིན་ཡོད་སྐོར་གསུངས་པ་དང་སྦྲགས། བོད་མི་ཚོའི་ངོས་ནས་རང་ཉིད་ཀྱི་སྐྱབས་བཅོལ་ལག་དེབ་དུས་ཐོག་ཏུ་དུས་འགྱངས་ཞུ་དགོས་པའི་འབོད་སྐུལ་གནང་སོང་།བོད་མི་མང་སྤྱི་འཐུས་ཁག་གཅིག་གིས་དེ་སྔ་ཆབ་སྲིད་བཙོན་ཟུར་འབྲེལ་ཡོད་འབྲེལ་ཆགས་ཀྱི་མིང་ཐོག་ནས་ཨོ་སི་ཊོ་ལི་ཡར་བསྐྱོད་པའི་བོད་མི་ཁག་གཅིག་ནས་བོད་མིའི་སྒྲིག་འཛུགས་ཀྱི་བཀའ་ཤག་ལ་ངོ་རྒོལ་གནང་མཁན་དང་རྒྱ་ནག་གཞུང་ཚབ་ཁང་སོགས་ལ་ལས་ཀ་བྱེད་བཞིན་པ་ཁག་ཅིག་ཡོང་བཞིན་ཡོད་སྟབས། དེར་བདེ་སྲུང་ལས་ཁུངས་ནས་ཞིབ་བཤེར་དང་དོ་དམ་གནང་གི་ཡོད་དམ་ཞེས་བཀའ་འདྲི་ཞུས་པར་བདེ་སྲུང་བཀའ་བློན་མཆོག་གིས་བོད་མི་ཆབ་སྲིད་བཙོན་ཟུར་ཨོ་སི་ཊོ་ལི་ཡར་གཏོང་རྒྱུ་དེ་བོད་མི་དེ་དག་ནས་དེ་སྔ་བོད་ནང་ཕྱག་ལས་གང་གནང་ཡོད་མེད་དང་། ཕ་མས་གང་གནང་ཡོད་མེད་བཅས་ལ་གཞིགས་ཏེ་ཆབ་སྲིད་བཙོན་ཟུར་ལ་ངོས་འཛིན་གནང་གི་ཡོད་པ་བཀའ་ལན་གནང་ཡོད།བདེ་སྲུང་བཀའ་བློན་མཆོག་གིས་སྤྱི་ཚོགས་དྲྭ་ལམ་བརྒྱུད་༸གོང་ས་མཆོག་ལ་མཚན་སྨད་ཞུས་པ་དང་དེ་བཞིན་བོད་མིའི་སྒྲིག་འཛུགས་ལ་སྐྱོན་བརྗོད་མང་དག་ཅིག་ཞུས་དང་ཞུ་བཞིན་པར་བདེ་སྲུང་ལས་ཁུངས་ནས་ཐུགས་སྣང་གནང་གི་ཡོད་སྐོར་གསུངས་པ་དང་སྦྲགས། སྐྱོན་བརྗོད་གནང་མཁན་དེ་དག་གི་ངོ་དེབ་ནང་མིང་དང་པར་སོགས་མེད་པའི་སྤྱི་ཚོགས་དཀྲུག་མཁན་མང་པོ་ཞིག་འབྱུང་བཞིན་ཡོད་ཀྱང་བདེ་སྲུང་ལས་ཁུངས་ལ་རྒྱ་གར་ཉེན་རྟོག་ལས་ཁུངས་ལྟར་བཏང་འཛིན་གནང་ཆོག་ཆོག་མེད་སྐོར་ལན་འདེབས་གནང་ཡོད།རྩ་བའི་དེ་རིང་བདེ་སྲུང་ལས་ཁུངས་ཀྱི་མ་ལག་དང་བཅས་པའི་སྔོན་རྩིས་བགྲོ་གླེང་སྐབས་དེ་སྔོན་སྤྱི་འཐུས་ཁག་གཅིག་ནས་གསུང་ཆོས་དང་། དུས་འཁོར་དབང་ཆེན་སོགས་ཀྱི་སྐབས་སུ་མང་གཙོའི་ཀ་བ་གསུམ་གྱི་མཛད་གཙོ་རྣམ་པའི་གདན་ཐོབ་དང་འབྲེལ་བའི་གནང་ཕྱོགས་ལ་དྲི་བ་ཁག་ཅིག་ཕུལ་ཡོད་པ་དང། བདེ་སྲུང་བཀའ་བློན་མཆོག་གིས་གདན་ཐོབ་ཀྱི་ལམ་སྲོལ་དེ་བཀའ་ཤག་གིས་ལམ་སྟོན་གནང་བ་བཞིན་གནང་ཡོད་པ་གསལ་བཤད་གནང་བའི་རྗེས་སུ་སྤྱི་འཐུས་ཁག་གཅིག་ནས་བཀའ་ཤག་གི་ལམ་སྟོན་དེའི་ཐོག་འདྲི་རྩད་གནང་བ་ལྟར། ཚོགས་གཙོ་པདྨ་འབྱུང་གནས་མཆོག་གིས་གནད་དོན་དེ་ནི་ཚོགས་གཙོས་སྔ་མའི་ལས་དོན་མཇུག་སྐྱོང་གནང་རྒྱུ་ཞིག་ཆགས་ཡོད་པ་དང་། ད་ལྟ་མཇུག་སྐྱོང་གནང་གྲབས་ཡོད་སྟབས་སླད་མར་བཀའ་སྤྱི་ལྷན་འཛོམས་ཐོག་ནས་ཐག་གཅོད་གནང་རྒྱུ་ཡིན་ཞེས་གསལ་བཤད་གནང་ཡོད།གཞན་ཡང་དེ་རིང་གྲོས་ཚོགས་ཀྱི་ལས་ཉིན་གཉིས་པར་སྤྱི་འཐུས་ཁག་གཅིག་ནས་རིང་མིན་ཕྱི་ཟླ་ ༥ པའི་ནང་འཚོགས་རྒྱུའི་དམིགས་བསལ་ཚོགས་ཆེན་གྱི་བརྗོད་གཞི་གཉིས་པོ་དང། ལྷག་པར་དུ་བརྗོད་གཞི་གཉིས་པ་༸གོང་ས་མཆོག་དང་བོད་མི་དབར་གྱི་འབྲེལ་བའི་ཐོག་ལ་དོགས་འདྲི་ཞུས་པ་ལྟར་སྐབས་དེར་ཚོགས་གཙོ་པདྨ་འབྱུང་གནས་མཆོག་གིས་སྤྱི་འཐུས་ཀྱི་བཞུགས་མོལ་ཚོགས་འདུ་ཞིག་འཚོགས་རྒྱུ་ཡིན་པ་གསུངས་ཡོད།

འདས་ལོའི་ཕྱི་ཟླ་ ༡༢ ནང་ཨ་རིའི་རྒྱལ་ཁབ་ནང་ཨ་རིའི་ཕྱི་སྲིད་ལས་ཁུངས་ཀྱི་དྲུང་ཆེ་སྐུ་ཞབས་ Mike Pompeo མཆོག་དང་བལ་ཡུལ་གྱི་ཕྱི་སྲིད་བློན་ཆེན་སྐུ་ཞབས་ Pradeep Gyawali མཆོག་རྣམ་གཉིས་མཇལ་འཕྲད་གནང་བ་དང་སྦྲགས།  སྐུ་ཞབས་ Pradeep མཆོག་གིས་བལ་ཡུལ་གཞུང་ནས་ཁུལ་དེར་གནས་བཞུགས་བོད་མི་རྣམས་ཀྱི་ཐོབ་ཐང་རྣམས་མུ་མཐུད་སྲུང་སྐྱོབ་གནང་རྒྱུ་དང་། དེ་བཞིན་བྲོས་བྱོལ་དུ་ཕེབས་པའི་བོད་མི་རྣམས་རང་ཉིད་ཀྱི་ལུང་པར་ཕྱིར་ཕེབས་རྒྱུ་མིན་པར་ཁས་ལེན་གནང་འདུག ཁ་སང་ Kathmandu Post དྲྭ་གནས་ཐོག་སྐུ་ཞབས་ Mike Pompeo མཆོག་ནས་བལ་ཡུལ་གྱི་སྲིད་བློན་སྐུ་ཞབས་ KP Sharma Oli  མཆོག་སྲིད་བློན་གྱི་ལས་སྣེ་བཞེས་ནས་ལོ་གཅིག་ཟིན་པའི་འཚམས་འཕྲིན་ཕུལ་བ་དང་། འཚམས་འཕྲིན་ནང་སྐུ་ཞབས་ Pompeo མཆོག་གིས་ཉེ་ལམ་ཁོང་དང་བློན་ཆེན་ Pradeep མཆོག་རྣམ་གཉིས་དབར་མཇལ་འཕྲད་སྐབས་བལ་ཡུལ་གཞུང་ནས་བལ་ཡུལ་གནས་བཞུགས་བོད་མི་རྣམས་ཀྱི་ཐོབ་ཐང་དག་མུ་མཐུད་སྲུང་སྐྱོབ་དང། བཙན་བྱོལ་བ་དག་གི་ལུང་པར་རང་ཉིད་ཀྱི་ཚེ་སྲོག་དང་། ཆོས་དང་རིག་གཞུང་། དེ་བཞིན་སྐད་ཡིག་གི་རང་དབང་སོགས་ཆེས་ཉེན་འཚབ་འོག་ལྷུང་ཡོད་པས་ཁོང་རྣམས་རང་ཉིད་ཀྱི་ལུང་པར་ཕྱིར་ཕེབས་མི་ཆོག་པའི་སྤྱི་ཁྲིམས་འགྲེལ་བརྗོད་དང་འབྲེལ། དེ་དོན་སྐུ་ཞབས་ Pradeep མཆོག་གིས་ཁས་ལེན་གནང་བའི་སྐོར་ཆེད་བཀོད་གནང་འདུགརྩ་བའི་བལ་ཡུལ་ནང་བོད་མི་ ༡༡༠༠༠ ལྷག་གནས་བཞུགས་གནང་བཞིན་པ་དང་ཨ་རིའི་གཞུང་ནས་བལ་ཡུལ་གཞུང་ལ་བལ་ཡུལ་དུ་གནས་བཞུགས་བོད་མི་དག་ལ་ལས་ཀ་དང་། འགྲིམ་འགྲུལ། དེ་བཞིན་ཤེས་ཡོན་སོགས་ཀྱི་སླད་སྐྱབས་བཅོལ་གནས་བཞུགས་ཀྱི་ལག་འཁྱེར་སྤྲད་དགོས་པའི་ཞུ་གཏུགས་རབ་དང་རིམ་པ་གནང་ཡོད་ཀྱང་། བལ་ཡུལ་ནས་རྒྱ་ནག་གཅིག་གི་སྲིད་བྱུས་དང་བོད་དེ་རྒྱ་ནག་གི་ཆ་ཤས་ཡིན་པ་ཁས་ལེན་གནང་གི་ཡོད་སྟབས། ཕྱི་ལོ་ ༡༩༩༥ ལོ་ནས་བཟུང་བོད་མི་རྣམས་ལ་སྐྱབས་བཅོལ་བའི་ལག་འཁྱེར་དང་དེ་བཞིན་ཕྱི་ལོ་ ༡༩༩༠ ལོ་ནས་བོད་ནས་ཕེབས་པའི་བོད་མི་རྣམས་ལ་ངོས་འཛིན་གནང་གི་མེད་པ་མ་ཟད་བལ་ཡུལ་ནང་བོད་མི་རྣམས་ནས་ལས་འགུལ་ལ་སོགས་པ་སྤེལ་རྒྱུར་བཀག་སྡོམ་གནང་གི་ཡོད་པ་རེད། གནད་དོན་དེ་དག་གི་ཐད་ལ་ཨ་རིའི་ཕྱི་སྲིད་ལས་ཁུངས་ནས་ཉེ་ལམ་ཕྱི་ལོ་ ༢༠༡༨ ལོའི་འགྲོ་བ་མིའི་ཐོབ་ཐང་གི་སྙན་ཐོ་འདོན་སྤེལ་གནང་བའི་ནང་ཕྱི་ལོ་ ༡༩༩༠ ལོ་ནས་བལ་ཡུལ་ནང་ཕེབས་པའི་བོད་མི་མང་པོ་ཞིག་རྒྱ་གར་དུ་གནས་སྤོས་བྱས་ཡོད་ཀྱང་། གྲངས་འབོར་མི་གསལ་བ་ཁག་ཅིག་ད་དུང་བལ་ཡུལ་ནང་གནས་བཞུགས་བྱེད་བཞིན་པ་ལྟར་ད་ཆ་བལ་ཡུལ་ནང་གནས་བཞུགས་བོད་མི་དང་། ལྷག་པར་དུ་ཁུལ་དེར་སྐྱེས་པའི་བོད་མི། དེ་བཞིན་ཕྱི་ལོ་ ༡༩༩༥ ལོར་ལོ་ན་ ༡༦ ལས་ཆུང་བ་ཡིན་པ་རྣམས་ལ་སྐྱབས་བཅོལ་བའི་ལག་འཁྱེར་གང་ཡང་སྤྲད་མེད་པ་ཐེར་འདོན་གནང་བ་དང་ཆབས་ཅིག་ཏུ་རྒྱ་གཞུང་གིས་ཕྱི་ལོ་ ༢༠༠༨ ལོ་ནས་བཟུང་ས་མཚམས་ཁག་དང་བོད་ནང་དུ་དམ་དྲག་ཇེ་ཆེར་བཏང་རྐྱེན་བོད་མི་བཙན་བྱོལ་དུ་འབྱོར་བའི་གྲངས་འབོར་དེ་ཧ་ཅང་ཉུང་ངུ་ཆགས་ཡོད་པ་ཐེར་འདོན་གནང་ཡོད་པ་རེད། རྒྱལ་ཚོགས་ཀྱི་སྐྱབས་བཅོལ་ལས་ཁུངས་ནས་འདོན་སྤེལ་གནང་བའི་སྙན་ཐོའི་ནང་ཕྱི་ལོ་ ༢༠༡༧ ལོར་བོད་མི་ ༥༣ ཙམ་ཞིག་མ་གཏོགས་བཙན་བྱོལ་དུ་འབྱོར་ཐུབ་མེད་པར་ཐེར་འདོན་གནང་ཡོད་པ་རེད།  

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ཉིན་རྒྱབ་ཀྱི་ཚོགས་ཐུན་ཐོག་བོད་མིའི་སྒྲིག་འཛུགས་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་རྩིས་ལོ་ ༢༠༡༩་༢༠ ལོའི་ལས་ཁུངས་མ་ལག་དང་བཅས་པའི་སྔོན་རྩིས་གསུང་བཤད་གནང་བ་དང་འབྲེལ། རྩིས་ལོ་ ༢༠༡༩་༢༠ ལོའི་ཕྱོགས་བསྡོམས་ཚོད་དཔག་འགྲོ་གྲོན་ཧིན་སྒོར་ས་ཡ་ ༢༥༠༥ ལྷག་འཆར་འབུལ་ཞུས་ཡོད་པ་དང་། དེའང་སྔ་ལོའི་སྔོན་རྩིས་བཀའ་འཁྲོལ་གཏན་འབེབས་བྱུང་བར་གཞིགས་ན་སྒོར་ས་ཡ་ ༡༤༧ ལྷག་ཉུང་བ་ཆགས་ཀྱི་འདུགའཛིན་སྐྱོང་བཀའ་ཤག་གི་སྔོན་རྩིས་འདི་བོད་མིའི་སྒྲིག་འཛུགས་བཀའ་ཤག་སྐབས་བཅོ་ལྔ་པའི་སྔོན་རྩིས་འབུལ་ཐེངས་གསུམ་པ་དེ་ཆགས་ཀྱི་ཡོད་པ་དང་། རྩིས་ལོ་ ༢༠༡༩་༢༠ ལོའི་ཕྱོགས་བསྡོམས་སྔོན་རྩིས་ས་ཡ་ ༢༥༠༥ ལྷག་ཙམ་རྒྱབ་གཉེར་ཞུས་པའི་ཁོངས་ནས་རྒྱུན་གྲོན་སླད་ས་ཡ་ ༧༣༠ ལྷག་ཙམ་དང་དམིགས་བསལ་ལས་དོན་ཆེད་སྒོར་ས་ཡ་ ༣༩༧ ལྷག་ཙམ། དེ་བཞིན་དམིགས་བཀར་ལས་འཆར་སླད་སྒོར་ས་ ༡༣༧༧ ལྷག་ཙམ་འཆར་འབུལ་ཞུས་འདུགཆབ་སྲིད་དང་འབྲེལ་བའི་ཐོག་བརྒྱ་ཆ་ ༢༣ ལྷག་དང་ཤེས་ཡོན་དང་འབྲེལ་བའི་ཐོག་བརྒྱ་ཆ་ ༢༢ ལྷག སྤྱི་ཚོགས་དང་འབྲེལ་བ་བརྒྱ་ཆ་ ༢༡ ལྷག འཛིན་སྐྱོང་དང་འབྲེལ་བའི་བརྒྱ་ཆ་ ༡༥ ལྷག འཕྲོད་བསྟེན་དང་འབྲེལ་བའི་བརྒྱ་ཆ་ ༨ ལྷག ཆོས་ཕྱོགས་དང་འབྲེལ་བའི་བརྒྱ་ཆ་ ༤ ལྷག དེ་བཞིན་ཁྲིམས་བཟོ་དང་འབྲེལ་བའི་བརྒྱ་ཆ་ ༣་༩༧ བཅས་ཆགས་ཀྱི་འདུགཐེངས་འདིར་འཛིན་སྐྱོང་བཀའ་ཤག་གི་ངོས་ནས་གྲོས་ཚོགས་སུ་རྩིས་ལོ་ ༢༠༡༩་༢༠ ལོའི་ཕྱོགས་བསྡོམས་སྔོན་རྩིས་འཆར་འབུལ་ཞུས་པའི་ཁོངས་སུ་དགོན་སྡེ་ཁག ༣༠༠ ལྷག་གི་དཔེ་ཁྲིད་དགེ་རྒན་ལ་གསོལ་ཕོག་གི་དོད་འབུལ་རྒྱུ་དང་༸གོང་ས་མཆོག་གི་བཀའ་དགོངས་ལམ་སྟོན་གཞིར་བཟུང་འདི་ལོར་བོད་རིགས་གཞོན་སྐྱེས་ཚོར་དམིགས་ཏེ་སོ་ནམ་ཞིང་ལས་དང་འབྲེལ་བའི་སློབ་སྟོན་དང་བུན་སྟོང་སྐྱེ་ལྡན་སོ་ནམ་དང་ཞིང་ལས་འཛུགས་བསྐྲུན། དེ་བཞིན་རྒྱལ་སྤྱིའི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་ཆེན། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་ཆེན། རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན། དེ་བཞིན་དམིགས་བསལ་ཚོགས་ཆེན་བཅས་ཆགས་ཀྱི་ཡོད་པ་རེད། དཔལ་འབྱོར་བཀའ་བློན་མཆོག་གིས་སྔོན་རྩིས་གསུང་བཤད་གནང་སྐབས་བོད་མིའི་སྒྲིག་འཛུགས་ཀྱི་འཛིན་སྐྱོང་འགྲོ་གྲོན་ལ་ཕན་པའི་དགོས་དངུལ་ཡོང་ཁུངས་གཙོ་བོ་མང་ཚོགས་ཀྱི་དང་བླངས་དཔྱ་དངུལ་འབུལ་འབབ་དང་འབུལ་འབབ་གཞན། ལས་ཁུངས་སོ་སོའི་མ་དངུལ་དང་དེའི་སྐྱེད་འབབ་ལས་གཞན་ཡོང་དམིགས་ཕུགས་གཏན་འཁེལ་བ་མེད་པས་བཙན་བྱོལ་བའི་གནས་བབས་དང་མཚུངས་པའི་འགྲོ་གྲོན་བསྲི་ཚགས་གནང་རྒྱུའང་འཕྲལ་ཕུགས་ཀྱི་གནས་བབས་ཐོག་ནས་གལ་གནད་ཆེན་པོ་ཆགས་ཀྱི་ཡོད་སྟབས། འགྲོ་གྲོན་གཏོང་ཕྱོགས་ཐད་དགོངས་བཞེས་ཡོང་བའི་ཞུ་སྐུལ་གནང་སོང་བ་དང་བཙན་བྱོལ་བའི་གནས་བབས་འདི་དེ་སྔ་དང་བསྡུར་ན་བཟང་དུ་ཕྱིན་ཡོད་པས་ཚང་མས་གཞན་རྟེན་གྱི་བསམ་བློ་དོར་ནས་རང་ཁ་རང་གསོ་ཐུབ་རྒྱུར་འབད་དགོས་པའི་གཞེན་སྐུལ་གནང་ཡོད། དཔལ་འབྱོལ་བཀའ་བློན་མཆོག་གིས་རྩིས་ལོ་ ༢༠༡༩ དང་ ༢༠༢༠ ལོའི་ལས་ཁུངས་མ་ལག་དང་བཅས་པའི་ཕྱོགས་བསྡོམས་ཚོད་དཔག་འགྲོ་གྲོན་སྔོན་རྩིས་འཆར་འབུལ་ཞུས་པའི་རྗེས་སུ་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སྙན་སྒྲོན་ཞུས་ཡོད་པ་དང། སྙན་ཐོའི་ནང་གསལ་ལྟར་ན་སྔོན་རྩིས་ཚོད་དཔག་འཆར་རྩིས་ཚོགས་ཆུང་གིས་འདི་ལོ་བཀའ་ཤག་གི་སྔོན་རྩིས་འཆར་འབུལ་ལ་དམིགས་བསལ་གཅོག་སྤར་གང་ཡང་གནང་མི་འདུག

དེ་རིང་ཟླ་ ༣ ཚེས་ ༡༩ ཉིན་གྱི་སྔ་དྲོ་ཆུ་ཚོད་ ༩༌༣༠ ཐོག་བོད་མི་མང་སྤྱི་འཐུས་ལྷན་ཚོགས་སུ་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་དབུ་འཛུགས་དང་སྦྲགས། ཚོགས་དུས་འདིའི་ཐོག་སྤྱི་འཐུས་རྣམ་པས་བཀའ་མོལ་གང་གནང་ཡང་བོད་རྒྱལ་ཁབ་དང་མི་རིགས་ལ་ཐུགས་ཕན་གསོས་པ་ཞིག་གནང་དགོས་གལ་ཡིན་པ་གསུངས་སོང་།  བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་གྲོས་ཚོགས་ཚོགས་དུས་བདུན་པ་དབུ་འཛུགས་དང་འབྲེལ་འདས་པའི་ཟླ་བ་དྲུག་ལྷག་གི་རིང་བོད་མི་མང་སྤྱི་འཐུས་ལྷན་ཚོགས་ནས་རྒྱ་གར་དང་བལ་ཡུལ་གཙོ་གྱུར་རྒྱལ་སྤྱིའི་རྒྱལ་ཁབ་ཁག་ཅིག་ཏུ་གཞུང་འབྲེལ་འཚམས་གཟིགས་དང་། བོད་དོན་ཞུ་གཏུགས། དེ་བཞིན་བཞུགས་སྒར་དུ་ཆེད་བཅར་ཞུས་པའི་ཕྱིའི་རྒྱལ་ཁབ་ཁག་གི་གྲོས་ཚོགས་འཐུས་མི་དང་གནད་ཡོད་མི་སྣ། དེ་བཞིན་རིག་གཞུང་འཁྲབ་སྟོན་པ་སོགས་ལ་དགའ་བསུའི་འཚམས་འདྲི་དང་བོད་དོན་སྙན་གསེང་ཞུས་ཡོད་པ་སོགས་གྲོས་ཚོགས་ཀྱི་ལས་དོན་གནང་ཟིན་པ་ཁག་ངོ་སྤྲོད་གནང་ཡོད།ཚོགས་གཙོ་མཆོག་གིས་ཐེངས་འདིའི་གྲོས་ཚོགས་ཀྱི་ཚོགས་དུས་རིང་ལ་སྤྱི་འཐུས་རྣམ་པ་མང་ཚོགས་ཀྱིས་རེ་བ་དང་ཡིད་ཆེས་གནང་བའི་ཐོག་ནས་འོས་འདེམས་བྱུང་བ་ཤ་སྟག་ཡིན་སྟབས། ལས་དོན་གང་ཞིག་གནང་ཚེ་གཞིས་བཞུགས་རྒྱ་ཆེ་མང་ཚོགས་ཐུགས་མ་ཕམ་པ་ཞིག་དང་། གྲོས་ཚོགས་ནང་བཀའ་མོལ་གང་གནང་ཡང་བོད་རྒྱལ་ཁབ་དང་མི་རིགས་ལ་ཐུགས་ཕན་གསོས་པ་ཞིག་གནང་དགོས་གལ་ཡིན་པར་ལམ་སྟོན་གནང་ཡོད།  ཚོགས་གཙོའི་དབུ་འབྱེད་གསུང་བཤད་གྲུབ་མཚམས་སུ་ཉེ་ལམ་བལ་ཡུལ་གྱི་གནས་མཆོག་ཡང་ལེ་ཤོད་གྱི་ཉེ་འདབས་སུ་གློ་བུར་དུ་དགོངས་པ་ཆོས་དབྱིངས་སུ་ཐིམ་པ་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་༸སྐྱབས་རྗེ་ཀཿཐོག་དགེ་རྩེ་རིན་པོ་ཆེ་མཆོག་དང་། ཨ་མདོ་རྔ་བ་རྫོང་ཐོག་ཏུ་རྒྱ་གཞུང་གི་དྲག་གནོན་ཅན་གྱི་སྲིད་བྱུས་ལ་ཞུ་འབོད་སླད་རང་ལུས་མེར་བསྲེགས་གནང་སྟེ་སྐུ་འདས་གྲོངས་སུ་གྱུར་བ་རྡོ་པོ་ལགས། ༸གོང་ས་༸སྐྱབས་མགོན་ཆེན་པོ་མཆོག་གི་བྱང་ཨ་རིའི་དམིགས་བསལ་སྐུ་ཚབ་ཟུར་པ་བཀའ་ཟུར་རྒྱ་རི་རིན་པོ་ཆེ་དམ་པ་མཆོག བོད་མི་མང་སྤྱི་ཟུར་མངའ་རིས་ཁྱུང་ལྷོ་གྲགས་པ་རྣམ་རྒྱལ་ལགས། དེ་བཞིན་ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་རྒྱ་གར་གྱི་བདེ་སྲུང་བློན་ཆེན་ཟུར་པ་སྐུ་ཞབས་ཇོར་ཇི་ཕར་ནན་ཌི་སི་མཆོག་དང་ཨ་རིའི་སྲིད་འཛིན་ཟུར་པ་སྐུ་ཞབས་ George HW Bush དམ་པ་མཆོག་བཅས་ཀྱི་མཛད་རྗེས་ལ་ཆེ་བསྟོད་དང་དྲན་གསོ་ཞུས་ཏེ་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་ཁག་སྤྱི་མོས་ཀྱིས་གཏན་འབེབས་གནང་ཡོད།དེ་བཞིན་ད་བར་བོད་དོན་ཆེད་སྐུ་སྲོག་བློས་བཏང་གནང་མཁན་རྒྱལ་གཅེས་པ་ཡོངས་ཀྱི་སྙིང་སྟོབས་ལ་ཆེ་བསྟོད་ཞུ་རྒྱུའི་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་གྲོས་ཚོགས་སུ་སྙན་སྒྲོན་ཞུས་ཡོད་པ་དང་། གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དེའི་ནང་ཕྱི་ལོ་ ༢༠༡༩ ལོ་འདི་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ་ ༧༠ དང་བོད་དུ་མང་གཙོ་བཅོས་སྒྱུར་བྱས་ཏེ་ཡར་ལངས་ཞིང་བྲན་ཁྲི་ཚོ་བརྒྱ་ལ་བཅིངས་བཀྲོལ་བཏང་ནས་ལོ་ ༦༠ སོགས་ལོ་གྲངས་སྣ་མང་འཛོམས་པའི་དུས་ཚིགས་གནད་འགག་ཅན་ཞིག་ཏུ་ངོས་འཛིན་གནང་བཞིན་ཡོད་ཀྱང་དུས་ཡུན་དེའི་རིང་གཅིག་བསྡུས་དབང་སྒྱུར་འོག་བོད་ཐོག་འཛིན་པའི་དྲག་གནོན་དང་གདུག་རྩུབ་ཅན་གྱི་སྲིད་བྱུས་ལ་བཟང་ཕྱོགས་ཀྱི་འགྱུར་བ་གང་ཡང་བཏང་མེད་པ་ཆེད་བཀོད་གནང་འདུགརྒྱ་ནག་གིས་བོད་དབང་སྒྱུར་བྱས་པ་ནས་བཟུང་བོད་མིའི་ཆོས་དད་རང་དབང་ལ་དམ་དྲག་དང་། བོད་ཀྱི་རང་བྱུང་ཁོར་ཡུལ་ལ་གནོད་པའི་གཏེར་ཁ་སྔོག་འདོན་དང་གཙང་པོ་ཁ་སྒྱུར་སོགས་ཀྱི་ལས་གཞི་སྤེལ་བ་མ་ཟད། ལྷག་པར་དུ་ཉེ་ཆར་བོད་ལྗོངས་ཉིན་རེའི་གསར་ཤོག་ཐོག་ཏཱ་ལའི་སྐུ་ཕྲེང་བཅུ་བཞི་པའི་ལོག་སྤྱོད་ཀྱི་ངོ་བོར་ངོས་འཛིན་གསལ་པོ་བྱེད་དགོས་སྐོར་གྱི་དཔྱད་གཏམ་སོགས་སྤེལ་ཏེ་གཞིས་བཞུགས་བོད་མིའི་སེམས་ཁམས་ལ་ཕོག་ཐུག་ཤུགས་ཆེ་བཏང་ཡོད་པ་དང་། རྒྱ་གཞུང་གིས་འདས་པའི་ལོ་དུས་དེ་དག་ཁྲོད་རང་ལུས་མེར་སྲེག་གནང་མཁན་རྣམས་ཀྱི་དགོས་འདུན་ལའང་བདག་སྤྲོད་བྱས་མེད་པ་སོགས་ཐེར་འདོན་གནང་ཡོད།སྔ་དྲོའི་ཚོགས་དུས་རིང་བོད་མི་མང་སྤྱི་འཐུས་ ༡༨ ནས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ལ་རྒྱབ་སྐྱོར་དང་སྦྲགས་ནས་ད་ལྟའི་བོད་ནང་གི་ཛ་དྲགས་གནས་སྟངས་ཐོག་བགྲོ་གླེང་གི་ཆ་ཤས་བླངས་ཡོད། གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་སང་ཉིན་གྲོས་ཚོགས་ཀྱི་ལས་ཉིན་གཉིས་པར་སྤྱི་འཐུས་རྣམ་པས་མུ་མཐུད་བགྲོ་གླེང་གནང་རྒྱུ་ཡིན་པ་རེད།   གཞི་རྩའི་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་ཐོག་བོད་མིའི་སྒྲིག་འཛུགས་ནས་རྩིས་ལོ་ ༢༠༡༩་༢༠ ལོའི་ལས་ཁུངས་མ་ལག་དང་བཅས་པའི་སྔོན་རྩིས་བཀའ་ཁྲོལ་གཏན་འབེབས་གནང་གི་ཡོད་པ་ལྟར། དེ་རིང་ཉིན་རྒྱབ་ཀྱི་ཚོགས་དུས་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༡༩༌༢༠༢༠ ལོའི་སྔོན་རྩིས་གྲོས་ཚོགས་སུ་འགོད་འབུལ་ཞུས་ཡོད་པ་རེད།

ཁ་སང་ཟླ་ ༣ ཚེས་ ༡༨ ཉིན་ Reuters  གསར་ཁང་གིས་༸གོང་ས་མཆོག་ལ་༸སྐུའི་ཡང་སྲིད་དང་འབྲེལ་བའི་བཅར་འདྲི་ཞུས་པའི་ཐོག་༸གོང་ས་མཆོག་གིས་མགོན་པོ་༸གང་ཉིད་མཆོག་རྒྱ་གར་དུ་མི་ལོ་དྲུག་ཅུ་ལྷག་གི་རིང་བཞུགས་མྱོང་ཡོད་སྟབས་༸སྐུའི་ཡང་སྲིད་དེ་རྒྱ་གར་རང་དབང་ལུང་པར་འཁྲུངས་སྲིད་སྐོར་བཀའ་ལན་བསྩལ་བ་མ་ཟད། རྒྱ་ནག་གིས་ཡང་སྲིད་ཅིག་འདེམས་སྲིད་པའི་དབང་དུ་བཏང་ཡང་དེ་ལ་མི་མང་ནས་གུས་བརྩི་དང་ཆ་འཇོག་ཞུ་མི་སྲིད་པའི་བཀའ་ལན་མཛད་འདུག༸གོང་ས་མཆོག་གིས་རྒྱ་ནག་གི་ངོས་ནས་༸སྐུའི་ཡང་སྲིད་ཀྱི་གནད་དོན་དེ་དོན་གནད་ཅིག་ཏུ་ངོས་འཛིན་བཞིན་ཡོད་པ་མ་ཟད། དེའི་ཐོག་༸གང་ཉིད་མཆོག་ལས་ལྷག་པའི་སེམས་ཁྲལ་བྱེད་བཞིན་ཡོད་སྐོར་བཀའ་བསྩལ་བ་དང་འབྲེལ། མ་འོངས་པར་༸སྐུའི་ཡང་སྲིད་དེ་རང་དབང་གི་རྒྱལ་ཁབ་ནས་གཅིག་དང་རྒྱ་ནག་སྲིད་གཞུང་གིས་གཅིག་གཏན་འབེབས་བྱུང་བ་ཡིན་ན། མི་མང་གི་ངོས་ནས་རྒྱ་ནག་གིས་བདམས་པའི་ཡང་སྲིད་དེར་གུས་བརྩི་ཞུ་ཐབས་མེད་སྟབས། རྒྱ་ནག་ལ་དཀའ་ངལ་འཕར་མ་ཞིག་ཆགས་ངེས་ཡིན་པར་བཀའ་འགྲེལ་དང་ལྷན་ཞལ་འཛུམ་དང་བཅས་དེ་ལྟ་བུའི་གནས་སྟངས་ཤིག་ཤར་སྲིད་པ་རེད་ཅེས་བཀའ་ལན་བསྩལ་འདུགགཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་སྔ་ཕྱི་ལོ་ ༢༠༡༡ ལོར་ཚོགས་པའི་ཆོས་ཚོགས་ཐེངས་ ༡༡ པའི་ཐོག་མ་འོངས་པར་མགོན་པོ་༸གང་ཉིད་མཆོག་༸རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་ཕེབས་སྐབས་ཆོས་བརྒྱུད་ཁག་གི་བླ་ཆེན་རྣམ་པ་དང༌། བོད་མིས་མཚོན་འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་༸རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐུགས་ཐག་གཅད་རྒྱུ་ཡིན་པ་དང་། གལ་ཏེ་༸རྒྱལ་དབང་སྐུ་ཕྲེང་རྒྱུན་མཐུད་དགོས་པ་དང༌། སྐུ་ཕྲེང་བཅོ་ལྔ་པའི་ཡང་སྲིད་ངོས་འཛིན་གནང་དགོས་པའི་དུས་སྐབས་ཤིག་ཤར་ཚེ་དེའི་གནང་སྒོའི་འགན་ཁུར་གཙོ་བོ་ཏཱ་ལའི་བླ་མ་༸སྐུ་སྒེར་གྱི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང༌། ཁོང་རྣམས་ཀྱིས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང༌། ༸རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་མ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་ངོས་འཛིན་སྔར་སྲོལ་བཞིན་གནང་དགོས་པ་མ་ཟད། མགོན་པོ་༸གང་ཉིད་མཆོག་གིས་ཀྱང་གནང་ཕྱོགས་དེ་དག་ལ་ལམ་སྟོན་གསལ་བཀོད་ཀྱི་ཕྱག་ཡིག་བསྩལ་རྒྱུ་ཡིན་ཞིང༌། ཚུལ་མཐུན་རྩད་གཅོད་ངོས་འཛིན་བྱུང་བའི་ཡང་སྤྲུལ་ཞིག་ལས་གཞན་སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་པས་མཚོན་སྲིད་དབང་འཛིན་པ་སུ་ཞིག་གིས་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་༸རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་ཞུ་མི་དགོས་པའི་ལམ་སྟོན་གསལ་པོ་བསྩལ་ཡོད་པ་རེད།ཐེངས་འདིའི་ Reuters  གསར་ཁང་གིས་བཅར་འདྲིའི་སྐབས་སུའང་༸གོང་ས་མཆོག་གིས་ཏཱ་ལའི་བླ་མའི་ཡང་སྲིད་དགོས་མིན་དེ་ནི་འདི་ལོའི་ལོ་མཇུག་ཙམ་ལ་ཆོས་བརྒྱུད་ཁག་གི་བླ་ཆེན་ཚོགས་ཆེན་ཐོག་ནས་ཐུགས་ཐག་གཅད་རྒྱུ་ཡིན་པ་དང་འབྲེལ། བོད་མི་སྤྱི་བོ་གནམ་བསྟན་ཡོངས་ཀྱིས་༸རྒྱལ་དབང་སྐུ་ཕྲེང་མུ་མཐུད་མཇུག་སྐྱོང་དགོས་པ་ཞིག་ལ་དགོངས་ཚེ་༸དཔལ་ལྡན་དགའ་ལྡན་ཕོ་བྲང་གི་ལྟེ་གནས་དེ་ད་དུང་གནས་སྲིད་པ་ཞིག་རེད། དེ་འབྲེལ་༸སྐུའི་ཡང་སྲིད་སྐུ་ཕྲེང་བཅོ་ལྔ་པ་བྱོན་པ་ཡིན་ནའང་ཁོང་ལ་ཆབ་སྲིད་ཀྱི་སྐུ་དབང་གང་ཡང་མེད་པར་བཀའ་བསྩལ་ནན་པོ་ཕེབས་འདུག༸གོང་ས་མཆོག་ལ་བོད་ནང་དུ་ཕེབས་འདོད་ཡོད་དམ་ཞེས་བཀའ་འདྲི་ཞུས་པར་མགོན་པོ་མཆོག་གིས་རྒྱ་ནག་གཞུང་གིས་༸གང་ཉིད་མཆོག་བོད་དུ་ཕྱིར་ཕེབས་སུ་བཅུག་ཚེ་རྒྱ་ནག་གི་གཙུག་ལག་སློབ་ཆེན་ཁག་ཏུ་ཆེད་ཕེབས་ཀྱིས་དཀར་རྩིས་རིག་པ་དང་། ཀླད་རྩ་རིག་པ། དེ་བཞིན་རྡུལ་ཕྲན་གྱི་རྣམ་གཞག་དང་སེམས་ཁམས་རིག་པའི་ཐོག་ལ་བཀའ་སློབ་བསྩལ་འདུན་ཡོད་པར་བཀའ་བསྩལ་ཡོད་པ་དེ་ལྟར་ཡང་། རྒྱ་ནག་དམར་ཤོག་གི་གཞུང་ལ་འགྱུར་བ་ཞིག་མ་ཕྱིན་བར་དུ་མགོན་པོ་༸གང་ཉིད་མཆོག་ཡུལ་དེར་ཕེབས་འདོད་མེད་ཅེས་བཀའ་ལན་མཛད་ཡོད། ༸གོང་ས་མཆོག་གིས་རྩ་བའི་རྒྱ་ནག་ནི་གདོད་མའི་རླབས་ཆེན་གྱི་རྒྱལ་ཁབ་ཅིག་ཡིན་ཀྱང་ཆབ་སྲིད་ཀྱི་ལམ་ལུགས་དེ་དབང་ཆ་གཅིག་སྡུད་ཀྱི་ལམ་ལུགས་འོག་ཡོད་པར་བརྟེན་མི་མང་ལ་རང་དབང་ཅི་མང་མེད་པར་བཀའ་བསྩལ་ནས་མགོན་པོ་༸གང་ཉིད་མཆོག་ད་དུང་རྒྱ་གར་དུ་བཞུགས་འདོད་ཡོད་པ་བཀའ་བསྩལ་བ་ཆབས་ཅིག བོད་མིའི་སྟོབས་ཤུགས་དེ་བདེན་པ་ལ་གཞིིར་བཅོལ་ཡོད་པ་དང་རྒྱ་ནག་གི་སྟོབས་ཤུགས་དེ་གོ་མཚོན་ལ་གཞིར་བཅོལ་བས་གནས་སྐབས་སུ་རྒྱ་ནག་གོ་མཚོན་གྱི་སྟོབས་ཤུགས་དེ་ཐག་ཆོད་པོ་ཡོད་ཀྱང་ཕུགས་རྒྱང་རིང་པོར་དགོངས་ཚེ་བདེན་པ་སྟོབས་ཤུགས་ཆེ་བ་ཡོད་པ་བཀའ་ལན་བསྩལ་འདུག གཞན་ཡང་༸གོང་ས་མཆོག་གིས་གཞུང་འབྲེལ་གྱི་བོད་རྒྱ་འབྲེལ་ལམ་དེ་ཕྱི་ལོ་ ༢༠༡༠ ལོ་ནས་བཟུང་ཆད་ཡོད་པ་དང་། པེ་ཅིང་སྲིད་གཞུང་ནས་རྒས་ཡོལ་དུ་ཕྱིན་པའི་ལས་བྱེད་ཟུར་པ་དང་། རྒྱ་ནག་སྲིད་གཞུང་དང་འབྲེལ་ཡོད་ཀྱི་ཚོང་པ་དེ་འདྲ་དུས་རྒྱུན་ནས་ཁོང་ལ་མཇལ་བཅར་ཞུ་བར་ཡོང་བཞིན་པ་མ་ཟད། ད་ཆ་བོད་ཕྱི་ནང་གཉིས་ཀྱི་འབྲེལ་ལམ་དེ་སྔར་ལས་དམ་ཟབ་ཏུ་འགྲོ་བཞིན་ཡོད་པར་བཀའ་བསྩལ་འདུག Reuters གསར་ཁང་གིས་༸གོང་མཆོག་བོད་མཐོ་སྒང་མཚོ་སྔོན་གྱི་གྲོང་གསེབ་ཅིག་ཏུ་འཁྲུངས་པའི་ལོ་རྒྱུས་ལུང་འདྲེན་གྱིས་ཉེ་སྔོན་གསར་ཁང་གི་ལས་མི་ཞིག་༸གང་ཉིད་མཆོག་འཁྲུངས་ཡུལ་སྟག་འཚེར་དུ་གཟིགས་སྐོར་སོང་ནའང་། རྒྱ་ནག་གི་གོ་མཚོན་ཐོགས་པའི་དམག་མིས་ལམ་ཁ་བཀག་ཡོད་པ་མ་ཟད་ཕྱི་ལོག་གི་མི་སྟག་འཚེར་ནང་གཏོང་གི་མེད་པའི་བཙན་བཀའ་བཏང་བར་བརྟེན་ཡུལ་དངོས་སུ་འགྲོ་ཐབས་མ་བྱུང་བའི་གནས་ཚུལ་གསལ་བཤད་ཞུས་འདུག

བཀའ་སྤྱི་གཉིས་ནས་འདི་ལོའི་ཕྱི་ཟླ་ ༡༠ ཚེས་ ༣ ནས་ཚེས་ ༥ བར་བཞུགས་སྒར་དྷ་རྨ་ས་ལར་ཉིན་གྲངས་གསུམ་གྱི་རིང་དམིགས་བསལ་ཚོགས་ཆེན་བསྐོང་ཚོགས་གནང་རྒྱུའི་གསལ་བསྒྲགས་གནང་སོང་།དེ་རིང་ཟླ་ ༣ ཚེས་ ༡༥ ཉིན་གྱི་ཚོུད་ ༡༢༌༣༠ ཐོག་མེག་གྷན་དུ་རྟེན་གཞི་བྱས་པའི་ club house གསོལ་མགྲོན་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་རྣམ་གཉིས་དབུ་བཞུགས་ཀྱིས་གསར་འགོད་ལྷན་ཚོགས་ཤིག་གནང་སོང་བ་དང་། སྐབས་དེར་ཉེ་སྔོན་ཕྱི་ཟླ་ ༡ ཚེས་ ༡༡ ཉིན་བཀའ་ཤག་དང་སྤྱི་འཐུས་ཚོགས་གཙོ་སྦྲེལ་པོས་ཐུགས་ཐག་བཅད་དོན་ལྟར་འདི་ལོའི་ཕྱི་ཟླ་ ༡༠ ཚེས་ ༣ ནས་ཚེས་ ༥ བར་ཉིན་གྲངས་གསུམ་གྱི་རིང་དམིགས་བསལ་ཚོགས་ཆེན་བསྐོང་ཚོགས་གནང་རྒྱུ་ཡིན་པར་ཡོངས་ཁྱབ་གནང་ཡོད་པ་དང། ཚོགས་ཆེན་ཐོག་གཙོ་བོ་ལྔ་དང་ལྔ་བཅུའི་འཆར་སྣང་དང་འབྲེལ་མང་ཚོགས་ནས་དགོངས་ཚུལ་བསྡུ་ལེན་དང་། ༸རྒྱལ་བ་༸སྐུ་ཕྲེང་རིམ་བྱོན་དང་བོད་མིའི་དབར་གྱི་འབྲེལ་བ་ཞེས་པའི་བརྗོད་གཞི་གཉིས་ཀྱི་ཐོག་བཀའ་བསྡུར་གནང་རྒྱུ་རེད་འདུགཚོགས་གཙོ་པད་མ་འབྱུང་གནས་མཆོག་གིས་བོད་མིའི་སྒྲིགས་འཛུགས་ཀྱིས་སྔ་ལོར་ལྔ་དང་ལྔ་བཅུའི་འཆར་སྣང་དང་འབྲེལ་ནས་ཚོགས་འདུ་རིམ་པ་ཐེངས་གསུམ་ཚོགས་ཡོད་ཀྱང་། བཙན་བྱོལ་དུ་འབྱུང་འགྱུར་གྱི་ལོ་ངོ་ལྔ་དང་ལྔ་བཅུའི་རིང་གནས་དགོས་བྱུང་ཚེ་གནས་མཁན་དེ་རྒྱ་ཆེ་མང་ཚོགས་ཡིན་སྟབས། རྒྱ་ཆེ་མང་ཚོགས་ནས་ལྔ་དང་ལྔ་བཅུའི་འཆར་སྣང་དང་འབྲེལ་བའི་དགོངས་འཆར་བསྡུ་ལེན་གནང་རྒྱུ་དེ་གནད་ཆེར་ངོས་འཛིན་གྱི་ཡོད་ཅེས་གསུངས་པ་མ་ཟད། བོད་མི་དང་༸རྒྱལ་བ་༸སྐུ་ཕྲེང་རིམ་བྱོན་དབར་གྱི་འབྲེལ་བ། དེ་བཞིན་༸རྒྱལ་བ་༸སྐུ་འཕྲེང་རིམ་བྱོན་གྱི་སྒྲིག་འཛུགས་དེ་བོད་མིར་བཀའ་དྲིན་ཇི་ཙམ་ཆེ་སྐོར། བོད་མིའི་ལས་འགན་སོགས་ཀྱི་ཐོག་མང་ཚོགས་ནས་དགོངས་ཚུལ་བསྡུ་ལེན་གནང་རྒྱུར་དམིགས་ཏེ་བསྐོང་ཚོགས་གནང་རྒྱུ་ཡིན་སྐོར་སོགས་གསུངས་ཡོད།གསར་འགོད་གསལ་བསྒྲགས་གྲུབ་མཚམས་སུ་ཕྱི་ནང་གི་གསར་འགོད་པ་ཚོས་བཀའ་སྤྱི་གཉིས་ལ་ཐེངས་འདིའི་དམིགས་བསལ་ཚོགས་ཆེན་ཐོག་ཚོགས་བཅར་བའི་མི་འགྲོའི་སྐོར་ལ་བཅར་འདྲི་ཞུས་པར་དེ་སྔ་ཕྱི་ལོ་ ༢༠༡༢ ལོར་དམིགས་བསལ་ཚོགས་ཆེན་བསྐོོང་ཚོགས་གནང་སྐབས་ཚོགས་བཅར་བ་སྤྱི་ཟུར་རྣམ་པ་དང་། དང་བླངས་ཚོགས་བཅར་བ། དེ་བཞིན་བླ་ཆེན་རྣམ་པ་ཐེངས་འདིའི་ཚོགས་འདུར་ཕེབས་ཀྱི་མེད་པ་ལས་དེ་མིན་ཚོགས་བཅར་བ་གཞན་རྣམས་གཅིག་མཚུངས་ཡིན་པ་དང་། སྐུ་ཚབ་དོན་གཅོད་དང་ས་གནས་འགོ་འཛིན། རང་བདེན་ཚོགས་ཆུང་གི་སྐུ་ཚབ། ས་གནས་འཐུས་མིའི་སྐུ་ཚབ་སོགས་ཕེབས་འཆར་ཡོད་པར་བཀའ་གནང་ཡོད་།གཞི་རྩའི་ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ས་བྱི་ཞི་རྒོལ་ཆེན་མོའི་ལས་འགུལ་སྤེལ་རྗེས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སྤྱི་གཉིས་ལ་བོད་ནང་ཛ་དྲག་གནས་སྟངས་ཀྱི་བྱུང་རྐྱེན་དང་རྒྱལ་སྤྱིའི་གནས་བབས་བཅས་བོད་ཀྱི་རྩ་དོན་ཐོག་གོ་བསྡུར་བགྲོ་གླེང་ཞིབ་ལྷོད་ཅིག་གནང་ཆེད་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ ནང་གསེས་ཁག་གི་ཆ་རྐྱེན་འོག་དམིགས་བསལ་ཚོགས་ཆེན་ཞིག་བསྡུ་བསྐོང་དགོས་པའི་བཀའ་སློབ་ལམ་སྟོན་ཕེབས་པ་བཞིན། ཕྱི་ཟླ་ ༡༡ ནང་བཞུགས་སྒར་དྷ་རྨ་ས་ལར་དམིགས་བསལ་ཚོགས་ཆེན་ཐེངས་དང་པོ་ཚོགས་ཡོད་པ་དང་། དེ་རྗེས་ཕྱི་ལོ་ ༢༠༡༢ ཟླ་ ༩ ནང་བོད་ནང་གི་ཛ་དྲག་གནས་སྟངས་ལ་བོད་མིའི་སྒྲིག་འཛུགས་ཀྱི་གཞུང་མང་གཉིས་ནས་གདོང་ལེན་གནང་ཕྱོགས་སྐོར་གོ་བསྡུར་སླད་དམིགས་བསལ་ཚོགས་ཆེན་ཐེངས་གཉིས་པ་ཚོགས་ཡོད་པ་རེད།

འགྲོ་བ་མིའི་ཐོབ་ཐང་དང་འབྲེལ་བའི་ཇི་ནི་ཝའི་རྒྱལ་སྤྱིའི་གློག་བརྙན་དུས་སྟོན་ཐེངས་ ༡༧ ཐོག་བྲོས་བྱོལ་གྱི་མི་ཚེ་མཚོན་པའི་སྐྱོ་དབྱངས་མངར་མོ་བོད་ཀྱི་གློག་བརྙན་གཟིགས་འབུལ་ཞུས་འདུག17th Geneva international Film festival and Forum on Human Rights འམ་འགྲོ་བ་མིའི་ཐོབ་ཐང་་འབྲེལ་བའི་ཇི་ནི་ཝའི་རྒྱལ་སྤྱིའི་གློག་བརྙན་དུས་སྟོན་དེ་ལོ་ལྟར་འདི་གར་ཕྱི་ཟླ་ ༣ པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་འཚོགས་བཞིན་པ་དང་བསྟུན་ཚོགས་ཀྱི་ཡོད་པ་རེད། དུས་སྟོན་ཐོག་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ས་ཁུལ་དང་མང་ཚོགས་ཀྱི་དཀའ་སྡུག་རྣམས་གློག་བརྙན་གྱི་ལམ་ནས་གཟིགས་འབུལ་དང། དེ་བཞིན་འབྲེལ་ཡོད་སྒྱུ་རྩལ་བ་དང་ཆེད་ལས་མི་སྣའི་དབར་སྦྱང་བཤད་གནང་རྒྱུའི་སྡིངས་ཆ་ཞིག་ཀྱང་ཡིན་པ་རེད།ཁ་སང་ཕྱི་དྲོ་དུས་སྟོན་ཐོག་བཙན་འབྱོལ་ནང་གི་བོད་མི་གློག་བརྙན་བཟོ་སྐྲུན་པ་བསྟན་འཛིན་བསོད་ནམས་རི་ཏུ་ལགས་དང་ཁོང་གི་སྐུ་ཟླ་ Ritu Sarin ལགས་རྣམ་གཉིས་ཀྱིས་བཟོ་སྐྲུན་གནང་བའི་ The Sweet Requiem འམ་སྐྱོ་དབྱངས་མངར་མོ་ཞེས་པའི་གློག་བརྙན་གཟིགས་འབུལ་ཞུས་སོང་། སྐབས་དེར་གསར་འགོད་པས་གློག་བརྙན་བཟོ་སྐྲུན་པ་བསྟན་འཛིན་བསོད་ནམས་ལགས་སུ་བཅར་འདྲི་ཞུས་པར་གློག་བརྙན་གྱི་ལམ་ནས་གང་ཐུབ་ཐུབ་ཀྱིས་བོད་དོན་ཁྱབ་བསྒྲགས་གནང་རྒྱུ་ནི་གློག་བརྙན་བཟོ་སྐྲུན་པ་ཞིག་གི་འོས་འགན་ལ་ངོས་འཛིན་གནང་གི་ཡོད་སྐོར་གསུངས་སོང་།རྩ་བའི་གློག་བརྙན་དེ་ནི་བོད་སྐད་ཐོག་གི་གློག་བརྙན་ཞིག་ཡིན་པ་མ་ཟད་འཁྲབ་སའི་ཡུལ་དངོས་ཀྱང་བོད་པ་རང་གི་སྤྱི་ཚོགས་ཏེ་འཁྲབ་གཞུང་མང་ཆེ་བ་བོད་མིའི་གནས་ཡུལ་གཙོ་བཟུང་གིས་བཟོ་སྐྲུན་གནང་བ་ཞིག་ཡིན་པ་རེད། གློག་བརྙན་དེའི་ནང་དོན་གཙོ་བོ་རང་ལོ་ ༢༦ ཡིན་ཞིང་རྒྱལ་ས་ལྡི་ལིར་འཚོ་སྡོད་བྱས་པའི་བུ་མོ་སྒྲོལ་དཀར་ལགས་ཆུང་དུས་ནས་ཕ་རྒན་དང་མཉམ་དུ་དཀའ་སྡུག་དུ་མའི་ངང་བོད་ནས་བྲོས་བྱོལ་ལ་ཡོང་བའི་གཏམ་རྒྱུད་དང་། དེ་བཞིན་རང་གི་དྲིན་ཆེན་ཨ་མ་དང་གཅུང་མོ་གཉིས་ཤུལ་དུ་ལྷག་པའི་དྲན་གདུང་།  བྲོལ་བྱོལ་གྱི་མི་ཚེའི་ནང་སྐྱབས་བཅོལ་གྱི་འཚོ་བ་གསར་པ་ཞིག་ལ་གདོང་གཏད་ནས་འཚར་ལོངས་བྱུང་བ་སོགས་ཀྱི་མི་སྒེར་གྱི་འཚོ་བའི་ཟུར་ངོས་དང་། དེ་བཞིན་དེ་དང་ཐག་ཉེ་བའི་བྲོས་བྱོལ་གྱི་མི་རིགས་ཤིག་གི་ཡུལ་ལྗོངས་ཀྱི་སྣང་བརྙན་དང་དེ་འབྲེལ་བསམ་གཞིགས་སོགས་མཚོན་པ་གནང་བའི་མི་རབས་ཤིག་གི་གཏམ་རྒྱུད་དྲན་ངོས་སུ་འདྲེན་ཐུབ་པའི་གློག་བརྙན་ཞིག་ཡིན་པ་རེད། སྐྱོ་དབྱངས་མངར་མོ་ཞེས་པ་འདི་ད་རེས་རྒྱལ་སྤྱིའི་གློག་བརྙན་གཞན་མང་དག་ཅིག་དང་ལྷན་དུ་འགྲན་རྩོད་གནང་སྟེ་ཐེངས་འདིའི་རྒྱལ་སྤྱིའི་ཇི་ནི་ཝའི་གློག་བརྙན་དུས་སྟོན་ཐོག་འདེམས་སྒྲུག་གནང་བ་ཞིག་ཆགས་ཀྱི་ཡོད་པ་རེད། ཁེ་ན་ཌའི་གྲོང་ཁྱེར་ཊོ་རན་ཊོ་ནང་ཚོགས་པའི་ TIFF ཞེས་ཊོ་རན་ཊོ་རྒྱལ་སྤྱིའི་གློག་བརྙན་དུས་སྟོན་ཐོག་སྐྱོ་དབྱངས་མངར་མོ་བོད་ཀྱི་གློག་བརྙན་དེ་ཆེས་ཐོག་མ་གཟིགས་འབུལ་ཞུས་ཡོད་པ་དང་ད་རེས་ཇི་ནི་ཝའི་རྒྱལ་སྤྱིའི་གློག་བརྙན་དུས་སྟོན་ཐེངས་ ༡༧ ཐོག་གཟིགས་འབུལ་ཐེངས་གཉིས་པ་ཞུས་ཡོད་པ་རེད། སྐྱོ་དབྱངས་མངར་མོ་གློག་བརྙན་དེ་ཁེ་ན་ཌ་དང་ཨ་རི། ནོར་ཝེ། དེ་བཞིན་རྒྱ་གར་བཅས་རྒྱལ་སྤྱིའི་གློག་བརྙན་དུས་སྟོན་མང་པོའི་ཐོག་གཟིགས་འབུལ་ཞུས་འདུག་པ་མ་ཟད། རིང་མིན་ཟླ་ ༣ པ་འདིའི་ནང་དབྱིན་ཡུལ་རྒྱལ་ས་ལོན་ཊོན་ དུ་འགྲོ་བ་མིའི་ལྟ་ཞིབ་ཚོགས་པས་གོ་སྒྲིག་ཞུས་པའི་རྒྱལ་སྤྱིའི་གློག་བརྙན་དུས་སྟོན་དང། Cambodia རྒྱལ་སྤྱིའི་གློག་བརྙན་བཅས་སུ་གཟིགས་འབུལ་ཞུ་རྒྱུ་རེད་འདུག