བོད།

རྒྱ་གཞུང་གིས་ ༢༠༠༨ ལོའི་ཟླ་ ༣ ཚེས་ ༢༣ ཉིན་གྱི་འགོ་འཇོ་རྫོང་སྐྱ་འབོར་ཡུལ་མཚོ་སྲིད་གཞུང་ལས་ཁུངས་ཉེ་འགྲམ་དུ་འབར་གས་དོན་རྐྱེན་དང་འབྲེལ་ཡོད་ཉེས་མིང་འོག་བོད་ཆབ་མདོ་ས་ཁུལ་འགོ་འཇོ་རྫོང་སྐྱ་འབོར་ཡུལ་ཚོ་ཐང་སྐྱ་དགོན་པའི་དགེ་འདུན་པ་བརྒྱད་ལ་ལོ་ལྔ་ནས་ཚེ་བཙོན་བར་དུས་བཀག་བཙོན་འཇུག་གི་ཉེས་ཆད་བཏང་ཡོད་པའི་ཁོངས་ནས་གྲྭ་ཚེ་དབང་ཡེ་ཤེས་ལགས་ཟླ་བ་འདིའི་ཚེས་ ༤ ཉིན་ལོ་དགུའི་བཙོན་དུས་གཙང་སྟེ་གློད་བཀྲོལ་བཏང་ཡོད་པ་དང་། ཁོང་ཕ་ཡུལ་དུ་འབྱོར་སྐབས་དགོན་གྲོང་གཉིས་ནས་ཕེབས་བསུ་གཟབ་རྒྱས་ཞུས་ཡོད་པ་རེད་འདུག འདི་ག་རླུང་འཕྲིན་ཁང་དུ་དེ་འབྲེལ་ཤེས་རྟོགས་ཡོད་པའི་བོད་མི་ཞིག་གིས་འགྲེལ་བརྗོད་དོན་གནང་དོན། རྒྱ་ནག་གཞུང་གིས་ཕྱི་ལོ་ ༢༠༠༨ ཟླ་ ༤ པའི་ནང་གྲྭ་ཚེ་དབང་ཡེ་ཤེས་ལགས་ཀྱིས་གཙོས་པའི་དགེ་འདུན་པ་བརྒྱད་ལ་འབར་གས་དོན་རྐྱེན་དང་འབྲེལ་བའི་ཉེས་འཛུགས་ཀྱིས་སྔ་རྗེས་སུ་འཛིན་བཟུང་བྱས་པ་མ་ཟད། དགེ་འདུན་པ་དེ་དག་གིས་ཁོ་ཚོ་འབར་གས་དོན་རྐྱེན་དང་འབྲེལ་བ་རྩ་བ་ནས་མེད་ལུགས་དང་སྲིད་གཞུང་ནས་རྟག་དཔྱད་ཞིབ་འཇུག་ནན་པོ་ཡོང་བའི་འབོད་སྐུལ་ཞུས་ཀྱང་དོན་འབྲས་གང་ཡང་མ་སོན་པར་མཐར་ཆབ་མདོ་ས་ཁུལ་འབྲིང་རིམ་མི་མང་ཁྲིམས་ཁང་ཟེར་བ་དེས་ཕྱི་ལོ་ ༢༠༠༨ ལོའི་ཟླ་ ༣ ཚེས་ ༢༣ ཉིན་ཁོར་ཚོར་དུས་ཡུན་ལོ་ལྔ་ནས་ཚེ་བཙོན་བར་སོ་སོར་ཁྲིམས་ཐག་བཅད་ཡོད་པ་དང་། དགུང་ལོ་ ༢༨ ལ་སོན་པའི་གྲྭ་འཇིགས་མེད་དོན་གྲུབ་ལགས་ལ་ཚེ་བཙོན་ཁྲིམས་ཐག་བཅད་པ་དང་དགུང་ལོ་ ༣༡ ལ་སོན་པ་རྡོ་རྗེ་དབང་རྒྱལ་ལགས་དང་དགུང་ལོ་ ༢༠ ལ་སོན་པའི་གྲྭ་ཀུན་བཟང་བསྟན་འཛིན་རྣམ་གཉིས་ལ་དགུང་ལོ་ ༡༥ དང་། དགུང་ལོ་ ༡༧ ལ་སོན་པའི་གྲྭ་ཚེ་རིང་ཉི་མ་ལགས་དང་དགུང་ལོ་ ༡༩ ལ་སོན་པའི་གྲྭ་ཀུན་དགའ་ཕུན་ཚོགས་ལགས། དགུང་ལོ་ ༢༨ ལ་སོན་པའི་གྲྭ་རིན་ཆེན་རྒྱལ་མཚན་ལགས་བཅས་ལ་དུས་ཡུན་ལོ་བཅུ་རེའི་བཙོན་འཇུག་ཁྲིམས་ཐད་བཅད་པ་མ་ཟད། དེ་བཞིན་དགུང་ལོ་ ༢༡ ལ་སོན་པའི་གྲྭ་འཕྲིན་ལས་དབང་རྒྱས་ལགས་ལ་དུས་ཡུན་ལོ་ ༥འི་ཁྲིམས་ཐག་བཅད་ཡོད་པ་རེད། དགུང་ལོ་ ༢༠ ལ་སོན་པའི་གྲྭ་ཚེ་དབང་ཡེ་ཤེས་ལགས་ལ་ལོ་ ༩ རིང་གི་བཙོན་འཇུག་ཁྲིམས་ཐག་བཅད་ཡོད་པ་རེད་ཅེས་གསུངས་སོང་། བོད་མི་དེ་དག་གི་ཁྲོད་ནས་ད་ལན་གྲྭ་ཚེ་དབང་ཡེ་ཤེས་ལགས་ལོ་དགུའི་བཙོན་འཇུག་གི་ཉེས་ཆད་གཙང་པར་བརྟེན་ཉེ་ལམ་ཟླ་ ༤ ཚེས་ ༤ ཉིན་གློད་བཀྲོལ་ཐོབ་ཡོད་པ་དང་། ཁོང་ཕ་ཡུལ་དུ་འབྱོར་སྐབས་དགོན་གྲོང་གཉིས་ནས་ཕེབས་བསུ་གཟབ་རྒྱས་ཞུས་ཡོད་པ་རེད་འདུག རྩ་བའི་གྲྭ་ཚེ་དབང་ཡེ་ཤེས་ལགས་རྒྱ་གཞུང་གི་བཙོན་ཁང་ནས་གློད་བཀྲོལ་ཐོབ་ཡོད་ཀྱང་ཁོང་དང་དུས་མཉམ་འཛིན་བཟུང་བྱས་པའི་བཙོན་གྲོགས་དགེ་འདུན་པ་གཞན་ཚོ་ད་དུང་བཙོན་ཁང་དུ་མི་སྤྱོད་ལས་འདས་པའི་མནར་གཅོད་སྦྱོང་མྱང་བཞིན་ཡོད་པ་རེད་འདུག

མདོ་སྨད་རྔ་བ་ཨ་མཆོག་མཚན་ཉིད་དགོན་པའི་སྐྱོར་དཔོན་ཚུལ་ཁྲིམས་རྒྱ་མཚོ་ལགས་ཕྱི་ལོ་ ༢༠༠༨ ལོར་ཨ་མཆོག་མཚན་ཉིད་དགོན་གྱི་ངོ་རྒོལ་ལས་འགུལ་སྤེལ་མཁན་གཙོ་གྲས་ཡིན་པར་ངོས་འཛིན་གྱིས་ལོ་ངོ་དགུའི་རིང་བཙོན་འཇུག་ཁྲིམས་ཐག་བཅད་ནས་ཟི་ཁྲོན་མེན་ཡང་བཙོན་ཁང་དུ་བཙོན་འཇུག་བྱས་ཡོད་པ་རེད། ཁ་ཉིན་ཟླ་ ༤ ཚེས་ ༡ ཉིན་ཕྱི་དྲོ་ས་རུབ་རྗེས་བཙོན་འཇུག་དུས་ཡུན་རྫོགས་ཏེ་བཙོན་གྲོལ་བཏང་དོན་ལྟར་ཕྱིར་ཕ་ཡུལ་དུ་འབྱོར་ཡོད་པ་དང་ཨ་མཆོག་མཚན་ཉིད་དགོན་དུ་གྲྭ་བ་མང་གིས་དགའ་དད་སྤྲོ་གསུམ་ངང་བསུ་བ་དང་བཅས་བདེ་བར་འབྱོར་ཡོད་འདུག འདི་ག་རླུང་འཕྲིན་ཁང་ལ་དེ་འབྲེལ་ཤེས་རྟོགས་ཡོད་པའི་འབྲེལ་ཡོད་མི་སྣ་ཞིག་གིས་འགྲེལ་བརྗོད་གནང་དོན། རྒྱ་གཞུང་གིས་ཁོང་བཙོན་གྲོལ་བཏང་ཉིན་ཕ་ཡུལ་དུ་འབྱོར་སྐབས་ས་རུབ་ཟིན་པ་དང་དེ་ཡང་རྒྱ་གཞུང་གིས་ཆེད་དུ་ས་རུབ་ནས་མ་གཏོགས་བསྐྱོད་མི་ཆོག་པ་བཟོས་ཡོད་སྐོར་གསུངས་སོང་བ་དང་། ད་ལྟའི་ཆར་ཁོང་གི་གཟུགས་གཞིའི་གནས་སྟངས་ཇི་ལྟར་ཡོད་མེད་དང་བཙོན་ཁང་ནང་སྡུག་སྦྱོང་ཇི་ལྟར་མྱངས་ཡོད་མེད་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་མེད་པ་རེད། འོན་ཀྱང་ཁོང་བཙོན་གྲོལ་ཐོབ་སྐབས་དགུང་ལོ་ ༥༢ ལ་ཕེབས་ཡོད་སྐོར་གསུངས་སོང་། གཞི་རྩའི་ཕྱིི་ལོ་ ༢༠༠༨ ཟླ་ ༣ ཚེས་ ༡༦ དང་ ༡༧ ཉིན་ཨ་མཆོག་དགོན་གྱི་དགེ་འདུན་པ་དང་མི་མང་ ཆིག་སྟོང་ཙམ་གྱིས་ས་གནས་མི་དམངས་སྲིད་གཞུང་ཟེར་བའི་སྒོ་འགྲམ་དུ་འཛོམས་ཏེ་བོད་ལ་འགྲོ་བ་མིའི་ཐོབ་ཐང་དགོས། ༸གོང་ས་མཆོག་བོད་ལ་གདན་འདྲེན་ཞུ་དགོས། པཎ་ཆེན་ཆུང་སྲིད་རིན་པོ་ཆེ་མྱུར་དུ་གློད་བཀྲོལ་གཏོང་དགོས། དབུ་མའི་ལམ་གྱི་ཐོབ་ཐང་གཙང་མ་སྤྲོད་དགོས་ཞེས་འབོད་ཚིག་སྒྲོག་བཞིན་ངོ་རྒོལ་ཤུགས་ཆེ་བྱས་པ་མ་ཟད། རྒྱ་ནག་གི་རྒྱལ་དར་མར་ཕབ་པ་དང་བོད་ཀྱི་རྒྱལ་དར་སྒྲེང་པ་སོགས་གནང་པར་བརྟེན་ཟླ་བ་དེའི་ཕྱི་ཚེས་ ༡༨ ཉིན་ནས་རྒྱ་གཞུང་དམག་མིས་ཨ་མཆོག་མཚན་ཉིད་དགོན་པར་ཁྱོན་ཡོངས་ནས་དམ་བསྒྲགས་ཀྱིས་དགེ་འདུན་པ་ཚོར་ཉིན་མོ་འདྲི་རྩད་དང་མཚན་མོ་འཛིན་བཟུང་བྱས་པའི་ཁོངས་ལས་ལ་ལ་བཙོན་གྲོལ་བཏང་ཡང་སྐྱོར་དཔོན་ཚུལ་ཁྲིམས་རྒྱ་མཚོ་ལགས་དང་། སྐྱོར་དཔོན་བསྟན་དར་། སྐྱོར་དཔོན་ཕུན་ཚོགས། བསོད་ནམས་་ཀླུ་སྒྲུབ་བཅས་འཛིན་བཟུང་བྱས་པ་དང་། ཚུལ་ཁྲིམས་རྒྱ་མཚོ་ལགས་ལ་ངོ་རྒོལ་གྱི་སྣེ་ཁྲིད་མཁན་ཡིན་པའི་ཉེས་མིང་འོག་ལོ་དགུའི་བཙོན་འཇུག་ཁྲིམས་ཐད་བཅད་ཡོད་པ་རེད། འོན་ཀྱང་ཉེ་ཆར་ཁོང་གི་བཙོན་འཇུག་དུས་ཡུན་རྫོགས་ཏེ་གློད་བཀྲོལ་བཏང་ཡོདཔ་རེད།

ཕྱི་ལོ ༢༠༡༡ ལོར་རྔ་བ་རྫོང་ཐོག་ཁྲོམ་གཞུང་དུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་གནང་མཁན་རྔ་བ་ཀིརྟི་དགོན་པའི་དགེ་འདུན་པ་བློ་བཟང་དཀོན་མཆོག་ལགས་ཉེ་ཆར་ཟླ་ ༣ ཚེས་ ༢༨ ཉིན་གྱི་མཚན་མོ་རྒྱ་གཞུང་གིས་རྒྱ་ནག་ཟི་ཁྲོན་དན་ཡང་བཙོན་ཁང་ནས་གློད་བཀྲོལ་བཏང་འདུག་པ་དང་། དེའང་དམག་མིས་གསང་བའི་སྒོ་ནས་རང་ཁྱིམ་དུ་བསྐྱལ་ཡོད་པ་རེད་འདུག ཁོང་བཙོན་གྲོལ་ཐོབ་སྐབས་ཁོང་གི་རྐང་པ་གཡས་པ་བཏུབ་ཡོད་པ་དང་གཟུགས་གཞིའི་གནས་སྟངས་ཧ་ཅང་ཞན་པོ་ཡོད་པ་རེད་འདུག འདི་ག་རླུང་འཕྲིན་ཁང་ལ་བོད་ནང་གི་བོད་མི་ཞིག་གིས་དེ་འབྲེལ་གནས་ཚུལ་ཤེས་རྟོགས་ཡོད་པ་འགྲེལ་བརྗོད་གནང་དོན། ཁོང་འདི་ལོ་ཕྱི་ཟླ་གཉིས་པའི་ཟླ་མཇུག་ལ་བཙོན་དུས་ཚང་ཡོད་ཀྱང་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སོགས་བསླེབ་ལ་ཉེ་བ་ཡིན་སྟབས་དུས་ཚོད་ཕྱིར་འགྱངས་ཀྱིས་བཙོན་གྲོལ་བཏང་ཡོད་པ་དང་། ཁོང་བཙོན་གྲོལ་མ་བཏང་སྔོན་ནང་མི་ཉེ་འབྲེལ་ཚོར་གློད་བཀྲོལ་གཏོང་བའི་དུས་ཚོད་སོགས་གསལ་པོ་མ་བཤད་པར་ཡུལ་མི་ཚོས་ཕེབས་བསུ་སྣེ་ལེན་ཞུ་རྒྱུར་འགོག་རྐྱེན་བཟོས་ཡོད་འདུག འོན་ཀྱང་ཟླ་བ་འདིའི་ཚེས་ ༢༩ ཉིན་ཁོང་གི་འཛིན་གྲྭ་གཅིག་པའི་དགེ་འདུན་པ་ཚོས་འཚམས་འདྲི་ཞུ་བར་བཅར་ཡོད་པ་རེད་འདུག གྲྭ་བློ་བཟང་དཀོན་མཆོག་ལགས་བཙོན་གྲོལ་བཏང་ཡོད་ཀྱང་ཀིརྟི་དགོན་པ་དང་རྫོང་ཐོག་བཅས་ལ་འགྲོ་བསྐྱོད་མི་ཆོག་པར་རང་གི་ཁྱིམ་དུ་ཆེས་དམ་བསྒྲགས་འོག་བཞག་ཡོད་པ་རེད་འདུག གཞི་རྩའི་རྔ་བ་ཀི་རྟི་དགོན་པའི་གྲྭ་བློ་བཟང་དཀོན་མཆོག་ལགས་ནས་ཕྱི་ལོ་ ༢༠༡༡ ཟླ་ ༩ ཚེས་ ༢༦ ཉིན་རྔ་བ་རྫོང་ཐོག་ཁྲོམ་གཞུང་དུ་རང་ལུས་མེར་བསྲེགས་ཀྱིས་༸རྒྱལ་བ་རིན་པོ་ཆེ་༸སྐུ་ཚེ་ཁྲི་ལོར་བརྟན་པར་ཤོག  བོད་ལ་ཆོས་དད་རང་དབང་དགོས་ཞེས་པ་སོགས་ཀྱི་ངོ་རྒོལ་གནང་སྐབས་རྒྱ་གཞུང་ཉེན་རྟོག་དམག་མིས་མེ་བསད་ནས་བཙན་ཁྲིད་ཀྱིས་སྐབས་དེར་སྨན་ཁང་དུ་བསྐྱལ་ཡོད་ཀྱང་། ཁོང་གིས་ལུས་ལ་མེ་འབར་ཤུགས་ཆེ་བས་སྨན་ཁང་ནས་རྐང་པ་གཡས་པ་བཏུབ་ཡོད་པ་རེད། གཞན་ཡང་གནས་ཚུལ་ཤེས་རྟོགས་བྱུང་བར། ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་ལ་ས་བྱི་ཞི་རྒོལ་ཆེན་མོའི་སྐབས་སུ་བོད་མིའི་ཞི་རྒོལ་ནང་མཉམ་ཞུགས་གནང་པ་དང་འབྲེལ་བའི་ཉེས་མིང་འོག་འཛིན་བཟུང་གིས་ལོ་ ༩ རིང་བཙོན་འཇུག་ཁྲིམས་ཐག་བཅད་པའི་རྔ་བ་ཀིརྟི་དགོན་པའི་དགེ་འདུན་པ་འཕྲིན་ཚེའམ་འཕྲིན་ལས་ཚེ་རིང་ལགས་ལོ་དགུའི་བཙོན་འཇུག་གི་དུས་ཡུན་རྫོགས་ནས་ཟི་ཁྲོན་ཞིང་ཆེན་མེན་ཡང་བཙོན་ཁང་ནས་ཁ་སང་ཟླ་ ༣ ཚེས་ ༣༠ ཉིན་གློད་བཀྲོལ་བཏང་ཡོད་འདུག

ཨ་རིའི་ནང་དུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གཞུང་གིས་བླ་རུང་སྒར་གྱི་གྲྭ་ཤག་གཏོར་བཤིག་དང་ཕྱིར་ཕུད་ཟིན་པའི་གྲྭ་བཙུན་ཚོར་བཙན་དབང་གིས་ཆབ་སྲིད་ཀྱི་སློབ་གསོ་སྤེལ་མཚམས་འཇོག་དགོས་པ་གསུངས་འདུག རྩ་བའི་གསེར་རྟ་བླ་རུང་ནང་བསྟན་སློབ་གླིང་དེ་བོད་ནང་དུས་འགྱུར་བྱུང་རྗེས་ནང་པའི་སློབ་གཉེར་ཁང་ཆེ་ཤོས་ཤིག་ཆགས་ཡོད་པ་དང། རྒྱ་ནག་གཞུང་གིས་སྔ་ལོའི་ཕྱི་ཟླ་ ༧ ཚེས་ ༢༠ ནས་བཟུང་བླ་རུང་སྒར་དུ་གྲྭ་ཤག་གཏོར་བཤིག་དང་གྲྭ་བཙུན་ཕྱིར་ཕུད་ཀྱི་ལས་གཞི་བརྩམས་པའི་ཁྲོད། ད་བར་བཙུན་མ་གསུམ་གྱིས་རང་དགོན་གཏོར་བཤིག་དང་གྲྭ་བཙུན་ཕྱིར་ཕུད་ཀྱི་སྡུག་བསྔལ་བཟོད་མ་ཐུབ་པར་རང་སྲོག་བཅད་པའི་གནད་ཚུལ་བྱུང་ཡོད་པ་རེད། ལྷག་དོན་ཕྱིར་ཕུད་ཟིན་པའི་གྲྭ་བཙུན་རྣམས་རང་གི་ཕ་ཡུལ་དུ་ལོག་རྗེས་རང་ཁྱིམ་དུ་འགྲོ་མ་བཅུག་པར་གཀག་སྐྱིལ་འོག ཁོང་རྣམས་ལ་ཟླ་བ་མང་པོའི་རིང་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་བའི་ཁྲོད། སྔ་ལོ་བོད་ནང་ནས་བརྙན་འཕྲིན་ཁག་ཅིག་ཕྱིར་གྱར་བྱུང་བའི་ནང་དུ་བཙུན་མ་ ༢༥ སྐོར་ཞིག་ལ་རྒྱ་གཞུང་གི་དམག་ཆས་གྱོན་བཅུག་པ་དང་ཁོང་རྣམས་ལ་བོད་སྐད་ཐོག་བོད་རྒྱ་གཉིས་ཨ་མ་གཅིག་གི་ཕྲུ་གུ་ཡིན་ཅེས་པའི་གླུ་གཞས་བཏང་བཅུག་པ་མངོན་རྒྱུ་འདུག་པ་དང་འདི་བཞིན་བཙུན་མ་ཚོར་རྒྱལ་གཅེས་ཆོས་གཅེས་ཀྱི་སློབ་གསོ་སྤྲོད་པའི་བརྒྱུད་དམག་གི་སྦྱོང་བརྡར་གནང་བཅུག་པ་སོགས་མངོན་རྒྱུ་འདུག ཉེ་ཆར་ཕྱི་ཚེས་ ༢༣ ཉིན་བླ་རུང་སྒར་གྱི་མཁན་པོ་ཚུལ་ཁྲིམས་བློ་གྲོས་ལགས་ཀྱིས་མང་ཚོགས་ལ་བཀའ་སློབ་གནང་དོན་ཟླ་བ་འདིའི་ཚེས་ ༡༣ ཉིན་རྒྱ་གཞུང་གིས་བརྡ་ཁྱབ་ཞིག་བཏང་འབྱོར་ནང་དུ་བླ་རུང་སྒར་དུ་ད་བར་གྲྭ་ཤག་གཏོར་བཤིག་བཏང་ཟིན་པའི་ཐོག་ལ་འདི་ལོའི་ཕྱི་ཟླ་ ༤ ཚེས་ ༣༠ བར་གྲྭ་ཤག་ ༣༢༢༥ གཏོར་བཤིག་བཏང་རྒྱུ་ཡིན་པ་གསལ་བཏོན་གནང་ཡོད་པ་རེད། ཁ་སང་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་དྲ་གནས་ཐོག་གནས་ཚུལ་སྤེལ་བར་གཞིགས་ན། རྒྱ་གཞུང་གིས་བླ་རུང་སྒར་དང་ཡ་ཆེན་སྒར་ནས་ཕྱིར་ཕུད་བཏང་པའི་གྲྭ་བཙུན་མང་པོ་ཞིག་བོད་རང་སྐྱོང་ལྗོངས་ནང་དུ་ཕྱིར་ལོར་བྱེད་བཅུག་སྟེ་ཁོང་རྣམས་ཀྱི་ཆོས་དད་རང་དབང་ལ་དམ་བསྒྲགས་བྱས་པ་མ་ཟད། ཆེ་མཐོང་ལ་གནོད་པའི་བྱ་སྤྱོད་ཀྱང་སྤེལ་ཡོད་པ་རེད། འགྲོ་བ་མིའི་ལྟ་ཞིབ་ཚོགས་པར་ཁ་གསལ་ཤེས་རྟོགས་བྱུང་དོན་ལྟར་སྔ་ལོའི་ཕྱི་ཟླ་ ༡༡ ནང་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ས་ཁུལ་གྱི་ལྷོ་ཤར་ས་ཁུལ་ཉིང་ཁྲི་ཁུལ་དུ་གྲྭ་བཙུན་གྱི་རུ་ཁག་གཅིག་ལ་བཙན་དབང་གིས་ཆབ་སྲིད་ཀྱི་སློབ་གསོའི་ལས་འགུལ་ནང་མཉམ་ཞུགས་གནང་བཅུག་ཡོད་པ་ཐེར་བཏོན་གནང་འདུག དེ་བཞིན་སྔ་ལོ་བླ་རུང་སྒར་དང་ཡ་ཆེན་སྒར་ནས་ཕྱིར་ཕུད་བཏང་པའི་བཙུན་མ་རྣམས་ལ་ཆབ་སྲིད་ཀྱི་སློབ་གསོ་སྤེལ་བའི་འོག་དམག་ཆས་གྱོན་བཅུག་པ་དང་ཁོང་རྣམས་ལ་བོད་སྐད་ཐོག་བོད་རྒྱ་གཉིས་ཨ་མ་གཅིག་གི་ཕྲུ་གུ་ཡིན་ཅེས་པའི་གླུ་གཞས་བཏང་བཅུག་སྐོར་ལུང་འདྲེན་གྱིས་རྒྱ་གཞུང་གིས་བཙུན་མའི་ཐོག་མི་སྤྱོད་ལས་འདས་པའི་ཆོས་དད་རང་དབང་ལ་བརྩི་མེད་བཏང་པ་དེས་རྒྱ་ནག་གིས་རྒྱབ་སྐྱོར་ས་རྟགས་ཡོད་པའི་རྒྱལ་སྤྱིའི་མནར་གཅོད་ཀྱི་ཁྲིམས་ལུགས་དང་ཡོངས་སུ་འགལ་ཡོད་པ་ནན་བརྗོད་གནང་འདུག ཚོགས་པ་དེའི་ཤེས་རྟོགས་ཡོད་པའི་བཙུན་མ་གཉིས་བླ་རུང་སྒར་ནས་ཕྱིར་ཕུད་བཏང་རྗེས་བོད་རང་སྐྱོང་ལྗོངས་སུ་ཕྱིར་ལོག་བྱེད་དགོས་པ་བཟོས་ནས་ལྷ་སར་བསྡད་མ་བཅུག་པར་རང་གི་སྐྱེས་ཡུལ་གྲོང་གསེབ་ཁུལ་དུ་ལོག་བཅུག་པ་མ་ཟད། ཁུལ་དེར་རྟེན་གཞི་བྱས་པའི་བཙུན་དགོན་དང་བཙུན་དགོན་གཞན་གང་དུའང་བཞུགས་མི་ཆོག་པ་བཟོས་ཡོད་འདུག ལྷག་དོན་ཁོང་རྣམས་ལ་དུས་ནས་དུས་སུ་ཉེན་རྟོག་ལས་ཁུངས་ལ་ཡོང་དགོས་པ་སོགས་ཀྱི་བྱ་སྤྱོད་སྤེལ་བར་བརྟེན་ཁོང་རྣམ་པའི་ཚོ་བར་ངལ་བ་ཆེན་པོ་འཕྲད་བཞིན་ཡོད་པ་མངོན་གསལ་གནང་འདུག ལྟ་ཞིབ་ཚོགས་པ་དེའི་ངོས་ནས་སྔ་ལོའི་ཕྱི་ཟླ་ ༡༡ ནང་རྒྱལ་ཚོགས་ཀྱི་མི་སྣ་བདུན་ནས་བླ་རུང་སྒར་དུ་གྲྭ་ཤག་གཏོར་བཤིག་དང་གྲྭ་བཙུན་ཕྱིར་བཏང་དོན་གང་ཡིན་དང་། དེ་དག་ཁྲིམས་དང་མཐུན་མིན། དེ་བཞིན་བླ་རུང་སྒར་དུ་ལས་དོན་དེ་དག་སྤེལ་སྐབས་བླ་རུང་སྒར་གྱི་འཛིན་སྐྱོང་སྡེ་ཚན་དང་འབྲེལ་བ་ཞུ་མི་དགོས་པའི་རྒྱུ་མཚན། དགོན་པའི་གནད་དོན་ཐོག་ལ་གཞུང་གི་ལས་བྱེད་པས་ཐེ་བྱུས་ཅི་ཕྱིར་བྱེད་སྐོར་སོགས་གསལ་བཤད་དགོས་པའི་བསྒྲགས་གཏམ་ཞིག་རྒྱ་ནག་གཞུང་ལ་བཏང་ཡོད་པ་རེད། རྒྱ་གཞུང་གིས་དེའི་ལན་འདེབས་ཡོངས་བསྒྲགས་འདོན་སྤེལ་བྱེད་དགོས་པའི་རྒྱལ་ཚོགས་ལ་དགོས་འདུན་བཏོན་པ་དང་ཆབས་ཅིག ལྟ་ཞིབ་ཚོགས་པའི་ངེས་སྟོན་པ་ལྕམ་ Sophie Richardson ལགས་ཀྱིས་རྒྱ་ནག་གཞུང་གིས་བླ་རུང་སྒར་ནས་ཕྱིར་ཕུད་བཏང་པའི་གྲྭ་བཙུན་རྣམས་ལ་བཙན་དབང་གིས་ཆབ་སྲིད་སློབ་གསོ་སྤེལ་བ་དེས་བོད་མི་ཆོས་ཕྱོགས་ཀྱི་གནང་སྒོ་ཁག་ལ་བཙན་བཤད་ཀྱིས་བརྩི་མེད་གཏོང་བཞིན་སྐོར་གསུངས་པ་དང་འབྲེལ། རྒྱ་གཞུང་གིས་བྱ་སྤྱོད་དེ་དག་འཕྲལ་དུ་མེད་པ་བཟོ་ནས་ཁོང་རྣམས་ལ་རང་གི་ཆོས་ཕྱོགས་ཀྱི་བྱེད་སྒོ་ཁག་དང། སློབ་གཉེར་སོགས་ཀྱི་རང་དབང་ཕུལ་དགོས་སྐོར་གསུངས་ཡོད།

དེ་རིང་ཟླ་ ༣ ཚེས་ ༢༤ ཉིན་སྔ་དྲོ་བོད་གསེར་རྟ་རྫོང་གི་ཁྲོམ་གཞུང་དུ་རྒྱ་གཞུང་གི་དྲག་ཆས་ཉེན་རྟོག་པ་ཕོན་ཆེན་འགྲེམས་འཇོག་གིས་བོད་ཆས་སྤྲས་པའི་བོད་མི་རྣམས་གང་བྱུང་འཛིན་བཟུང་བྱེད་བཞིན་པ་ཡོད་པ་རེད་འདུག དེའང་གནད་དོན་འབྲེལ་བའི་བརྙན་པར་ཞིག་ཕྱིར་གྱར་བྱུང་བའི་ནང་གསལ་བ་ལྟར་ན། གསེར་རྟ་རྫོང་གི་ཁྲོམ་གཞུང་དུ་ཉེན་རྟོག་པའི་མོ་ཊའི་ནང་ནས་དྲག་ཆས་སྔོན་ནག་གྱོན་པའི་ཉེན་རྟོག་པ་དུ་མ་བསླེབས་ཏེ་བོད་མི་རྣམས་ལ་གང་བྱུང་འཛིན་བཟུང་དང་ལྕགས་རྒྱུག་གིས་རྡུང་རྡེག་གཏོང་བཞིན་བོད་མི་རེ་ལ་ཉེན་རྟོག་པ་ལྔ་དྲུག་གིས་རུབ་རྡུང་བྱེད་ཞོར་ཉེན་རྟོག་པའི་སྤྱི་སྤྱོད་རླངས་འཁོར་ནང་དུ་བཙན་ཁྲིད་བྱས་པ་མ་ཟད། ཉེ་འཁོར་དུ་ཡོད་པའི་བོད་མི་དག་ལ་འཇིགས་སྐུལ་བྱེད་བཞིན་པ་ཡང་མངོན་རྒྱུ་འདུག གཞི་རྩའི་རྒྱ་ནག་གཞུང་གིས་གསེར་རྟ་ཁུལ་དུ་རྟེན་གཞི་བྱས་པའི་འཛམ་གླིང་ནང་གི་ནང་པའི་སློབ་གཉེར་ཁང་ཆེ་ཤོས་གྲས་ཡིན་ཀྱང་། གསེར་རྟ་བླ་རུང་སྒར་དུ་སྔ་ལོའི་ཟླ་ ༧ ཚེས་ ༢༠ ནས་གྲྭ་ཤག་གཏོར་བཤིག་དང་གྲྭ་བཙུན་ཕྱིར་ཕུད་ཀྱི་ལས་གཞི་སྤེལ་བའི་ཁྲོད། ད་བར་གྲྭ་ཤག་ ༡༥༠༠ ཙམ་གཏོར་བཤིག་བཏང་ཟིན་ཡོད་པ་དང། གྲྭ་བཙུན་ ༤༠༠༠ ཙམ་ཕྱིར་ཕུད་བཏང་རྗེས་དགུན་ཁའི་གནམ་གཤིས་གྲང་ངར་ཆེ་བའི་རྐྱེན་གྱིས་ལས་གཞི་རེ་ཞིག་མཚམས་འཇོག་བྱས་ཡོད་པ་རེད། འདི་ལོའི་ཟླ་ ༡ པོ་ནས་སླར་ཡང་གྲྭ་ཤག་ ༣༠༠༠ ལྷག་གཏོར་བཤིག་གཏང་རྒྱུའི་བརྡ་ཁྱབ་བཏང་ཡོད་པ་མ་ཟད། དེར་གདོང་ལེན་བྱེད་མཁན་རྣམས་ལ་ཐག་གཅོད་ནན་པོ་བྱེད་ངེས་ཡིན་པ་བརྗོད་ཡོད་པ་རེད། གནད་དོན་དེའི་ཐོག་དགོན་པའི་མཁན་པོ་རྣམས་དང་འགན་འཛིན་ལྷན་ཚོགས་ནས་གོང་རིམ་ལ་ཞུ་གཏུགས་རིམ་པ་བྱས་ཀྱང་གྲུབ་འབྲས་གང་ཡང་སོན་མེད་པ་རེད། མཁན་པོ་ཚོས་མང་ཚོགས་ལ་མུ་མཐུད་སངས་རྒྱས་ཀྱི་བཀའ་དང་། བླ་མའི་གསུང་བཅས་ལ་བརྩི་ནས་བཟོད་སྒོམ་གནང་རོགས་ཞེས་འབོད་སྐུལ་སོགས་གནང་འདུག རྒྱ་ནག་གཞུང་གིས་གྲྭ་བཙོན་ཕྱིར་ཕུད་གཏང་རྒྱུའི་གྲངས་ཐོ་གཏན་འབེབས་བྱས་པར་ཁྱོན་གྲྭ་བཙུན་ ༤༨༢༨ ཡོད་པའི་ཁོངས་ནས་མང་ཆེ་བ་ད་ལྟ་ཕྱིར་ཕུད་བཏང་ཟིན་ཡོད་པ་དང། རིང་མིན་ཉིན་ཤས་ནང་བཙུན་མ་ ༢༥༠ ཙམ་ཕྱིར་ཕུད་གཏང་རྒྱུ་ཡིན་འདུག་པ་དང། གྲྭ་ཤག་ཁྱོན་ ༤༧༢༥ གཏོར་བཤིག་གཏང་འཆར་ཡོད་པ་མངོན་གསལ་བྱས་འདུག

དེའང་སྔ་ལོའི་ཕྱི་ཟླ་ ༡ པོའི་ནང་འཛིན་བཟུང་བྱས་པའི་བོད་ཡུ་ཤུལ་ཁུལ་གྱི་བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་ཀྱི་གནད་དོན་ཐད་ཁ་སང་རྒྱལ་སྤྱིའི་ཉེས་ཡང་ཚོགས་པས་སྙན་ཐོ་ཞིག་འདོན་སྤེལ་དང་འབྲེལ། རྒྱ་གཞུང་གི་བཙོན་ཁང་དུ་ཡོད་པའི་བཀྲིས་དབང་ཕྱུག་ལགས་ཀྱི་གཟུགས་གཞིའི་གནས་སྟངས་ཡག་པོ་མེད་པ་མངོན་གསལ་གནང་འདུག ཁ་སང་ཟླ་ ༣ ཚེས་ ༢༡ ཉིན་རྒྱལ་སྤྱིའི་ཉེས་ཡང་ཚོགས་པའི་དྲ་གནས་ཐོག་བཀྲིས་དབང་ཕྱུག་ལགས་ཀྱི་དེ་སྔའི་གནད་དོན་ཞིབ་ཕྲ་ལུང་འདྲེན་གྱིས་ད་ལྟའི་གནས་སྟངས་སྐོར་ལ་གསལ་ཁ་གནང་པ་དང་ཆབས་ཅིག རྒྱ་ནག་གཞུང་ལ་ཁོང་འཕྲལ་དུ་གློད་བཀྲོལ་གཏོང་དགོས་པའི་ཞུ་འབོད་གནང་འདུག ལྷག་དོན་རྒྱལ་སྤྱིའི་གཞུང་དང་ཚོགས་སྡེ་ཁག་གིས་རྒྱ་ནག་གཞུང་དང་བོད་མཚོ་སྔོན་ཞིང་ཆེན་གྱི་འབྲེལ་ཡོད་དཔོན་རིག་ཁག་གི་ཁ་བྱང་རྣམས་ཞིབ་ཕྲ་བཀོད་ནས་བཀྲིས་དབང་ཕྱུག་ལགས་འཕྲལ་མར་གློད་བཀྲོལ་གཏོང་དགོས་གལ་ཡིན་པའི་དོན་ཚན་གསུམ་གྱི་ཐོག་ནས་རེ་སྐུལ་ཞུས་འདུག བཀྲིས་དབང་ཕྱུག་ལགས་ཀྱིས་རང་ཉིད་ཀྱི་སྨྲ་བརྗོད་རང་དབང་ལོངས་སུ་སྤྱོད་པ་ལས་གཞན་ཁྲིམས་འགལ་གྱི་བྱ་སྤྱོད་གང་ཡང་གནང་མེད་སྟབས། ཁོང་ལ་ཆ་རྐྱེན་གང་ཡང་མེད་པའི་ཐོག་ནས་གློད་བཀྲོལ་གཏོང་གལ་ཡིན་པ་ནན་བརྗོད་གནང་པ་མ་ཟད། ཁོང་ལ་ཁྲིམས་ལྟར་ཁྲིམས་རྩོད་པའི་ཐོབ་ཐང་དང་ཁྲིམས་རྩོད་པའི་ལྷན་དུ་ཐུག་འཕྲད་སོགས་དགོས་མཁོ་ནམ་བྱུང་ལ་དེ་ལྟར་ཕུལ་དགོས་སྐོར་གསུངས་འདུག དེ་བཞིན་ཁོང་གི་ནང་མི་ཉེ་འབྲེལ་དང་ཐུག་འཕྲད་གནང་བཅུག་དགོས་པ་མ་ཟད། ཁོང་གི་གཟུགས་གཞིའི་གནས་སྟངས་ཡག་པོ་མེད་པའི་ཐོག་ནས་སྨན་བཅོས་སོགས་ཀྱི་མཐུན་རྐྱེན་སྦྱོར་གལ་ཡིན་པའང་གསུངས་ཡོད་པ་རེད། རྒྱལ་སྤྱིའི་ཉེས་ཡང་ཚོགས་པའི་སྙན་ཐོའི་ནང་དུ་ཟླ་བ་འདིའི་ཟླ་མགོར་རྒྱ་གཞུང་ཁྲིམས་ཁང་གི་ཁྲིམས་ཞིབ་པའི་ངོས་ནས་བཀྲིས་དབང་ཕྱུག་ལགས་ཀྱི་ནང་མིར་ཁོང་གི་ཁྲིམས་རྩོད་པ་སུ་ཡིན་མིན་དང་།  ཁྲིམས་རྩོད་པ་གླ་ཕྱོགས་དང་དེར་གླ་ག་ཚོད་སྤྲོད་ཡོད་མེད་ཀྱི་གནད་དོན་ཐོག་འདྲི་རྩད་བྱས་པ་མངོན་གསལ་གནང་འདུག ཁོང་གི་ཁྲིམས་རྩོད་པས་ཐུག་འཕྲད་གནང་སྐབས་ཁོང་ལ་རུས་ཚིགས་ནད་གཞི་ལྕི་མོ་ཕོག་པས་འཕྲོད་བསྟེན་གྱི་ངལ་བ་ཆེན་པོ་ཡོད་པ་ཤེས་རྟོགས་བྱུང་ཡོད་པ་དང་། ཁྲིམས་རྩོད་པ་རྣམས་ནས་བཙོན་ཁང་གི་འགན་ཁུར་བ་རྣམས་ལ་ཁོང་ལ་ནད་གཞི་དེའི་ཐོག་སྨན་བཅོས་ཀྱི་མཐུན་རྐྱེན་སྦྱར་དགོས་པའི་འབོད་སྐུལ་ཤུགས་ཆེ་གནང་འདུག གཞི་རྩའི་བཀྲ་ཤིས་དབང་ཕྱུག་ལགས་ནི་བོད་མདོ་ཁམས་ཡུལ་ཤུལ་ས་ཁུལ་དུ་བོད་ཀྱི་སྐད་ཡིག་དང་རིག་གནས་སྲུང་སྐྱོབ་ཆེད་ཕྱག་ལས་གནང་མཁན་ཞིག་ཡིན་པ་དང་། ཁོང་གིས་ས་གནས་རྒྱ་གཞུང་གིས་བོད་ཀྱི་སྐད་ཡིག་དང་རིག་གནས་ཉམས་རྒུད་གཏོང་བཞིན་ཡོད་པ་གོང་རིམ་སྲིད་གཞུང་ལ་འབོད་སྐུལ་གནང་པ་མ་ཟད་། ཨ་རིའི་ New York Times  རྒྱལ་སྤྱིའི་བརྒྱུད་ལམ་ཐོག་གནད་ཚུལ་དེ་དག་གསུང་པར་བརྟེན་རྒྱ་གཞུང་ཉེན་རྟོག་པས་ཁོང་ལ་རྒྱལ་ཁབ་ཁ་བྲལ་གྱི་སྐུལ་སློང་ཞེས་པའི་ཆབ་སྲིད་ཀྱི་ནག་ཉེས་འོག་འཛིན་བཟུང་གིས་ཟླ་བ་གསུམ་ཙམ་གར་སོང་ཆ་མེད་དུ་གྱུར།  ས་གནས་ཉེན་རྟོག་པས་བཀྲིས་དབང་ཕྱུག་ལགས་ཀྱིས་བོད་རང་བཙན་གྱི་ལས་འགུལ་སྤེལ་བ་དང་།  རྒྱལ་ཁབ་ཁ་བྲལ་གཏོང་ཐབས་བྱེད་པའི་ཆབ་སྲིད་ཀྱི་ནག་འོག་ད་བར་ཞིབ་འཇུག་རིམ་པ་གཉིས་བྱས་མཐར་ཉེ་ཆར་ཟླ་ ༡ ཚེས་ ༤ ཉིན་རྒྱ་ནག་གཞུང་གིས་བཀྲ་ཤིས་དབང་ཕྱུག་ལགས་ལ་རྒྱལ་ཁབ་ཁ་བྲལ་གྱི་ལས་འགུལ་སྤེལ་བའི་ཆབ་སྲིད་ཀྱི་ནག་ཉེས་འོག་རིང་མིན་ཁྲིམས་ཐོག་ནས་ཁྲིམས་བཤེར་བྱ་གཏན་འཁེལ་དོན་ལྟར་རྒྱལ་སྤྱིའི་ཚོགས་སྡེ་ཁག་གིས་ཆ་རྐྱེན་གང་ཡང་མེད་པའི་ཐོག་ནས་ཁོང་གློད་བཀྲོལ་གཏོང་དགོས་པའི་ཞུ་འབོད་ཀྱི་ལས་འགུལ་མང་དག་ཞིག་སྤེལ་ཡོད་པ་རེད།

དེའང་འདི་ལོའི་ཟླ་བ་ ༣ ཚེས་ ༡༨ ཉིན་བོད་ནང་གི་ཕྱི་དྲོ་ཕྱག་ཚོད་ ༤།༠༠ ཡས་མས་ཙམ་ལ་ཟི་ཁྲོན་ཞིང་ཆེན་དཀར་མཛེས་ཁུལ། ཉག་རོང་རྫོང་། མ་རུ་ཤང་། ཕྱུ་ཡུལ་གྲོང་ཚོའི་ཕ་དབང་རྒྱལ་དང་མ་ཡུལ་ལྷ་གཉིས་ཀྱི་བུ་རང་ལོ་ ༢༤ ཡིན་པ་པདྨ་རྒྱལ་མཚན་ནམ། བསྡུས་མིང་ལ་པད་རྒྱལ་ལགས་ཀྱིས་དཀར་མཛེས་རྫོང་ཐོག་ཏུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་གནང་ཡོད་པ་དང་། ས་གནས་ནས་གནས་ཚུལ་ཐོན་པར་རྒྱ་གཞུང་ཉེན་རྟོག་མི་སྣས་ཁོང་གི་ནང་མི་ཉེ་འབྲེལ་ཁག་ཅིག་ལ་གཅར་རྡུང་དྲག་པོ་བཏང་འདུག པདྨ་རྒྱལ་མཚན་ལགས་ཀྱིས་རང་ལུས་མེར་བསྲེགས་གནང་ནས་ཅུང་ཙམ་ལས་མ་འགོར་བར་རྒྱ་གཞུང་སྤྱི་བདེ་ཉེན་རྟོག་པ་ཡོང་ཏེ་མེ་བསད་པ་དང་བཙན་ཁྲིད་ཀྱིས་དཀར་མཛེས་རྫོང་སྨན་ཁང་ཞིག་ཏུ་བསྐྱལ་ཡོད་པ་རེད་འདུག ཕ་ཡུལ་ཉག་རོང་ནས་ཡིན་ཞིང་རྒྱ་གར་ལྷོ་ཕྱོགས་སུ་བཞུགས་པའི་སྐུ་ཞབས་བློ་བཟང་ལགས་སུ་ཁུངས་ལྡན་གནས་ཚུལ་འབྱོར་དོན་བཞིན་འདི་གར་མཁོ་སྤྲོད་གནང་དོན། པད་མ་རྒྱལ་མཚན་ལགས་ཀྱིས་རང་ལུས་མེར་སྲེག་གནང་སྐབས་ངོ་རྒོལ་གྱི་སྐད་འབོད་གནང་པ་དེ་ཉེ་འཁོར་དུ་ཡོད་པའི་མང་ཚོགས་ཚོས་གོ་ཐོས་བྱུང་ཡོད་ཀྱང་སྐད་འབོད་ཀྱི་འབོད་ཚིག་གང་ཡིན་གསལ་རྟོགས་ཐུབ་མེད་སྐོར་གསུངས་སོང་། པདྨ་རྒྱལ་མཚན་ལགས་ཀྱིས་དཀར་མཛེས་རྫོང་ཐོག་ཏུ་རང་ལུས་མེར་སྲེག་གནང་པའི་གནས་ཚུལ་ཁོང་གི་ཕ་ཡུལ་དུ་ནང་མི་ཉེ་འབྲེལ་ཚོས་ཤེས་རྟོགས་བྱུང་རྗེས་ནང་མི་ཉེ་འབྲེལ་མི་བཅུ་དེ་ཉིན་ཕྱི་དྲོ་དཀར་མཛེས་རྫོང་ཉེན་རྟོག་ལས་ཁུངས་སུ་བསྐྱོད་ནས་ཐུག་འཕྲད་བྱེད་ཆོག་པའི་ཞུ་སྐུལ་གནང་འདུག་ཀྱང་ཉེན་རྟོག་པས་དང་ལེན་བྱེད་རྒྱུ་ལས་ལྡོག་ཏེ་ཁོང་ཚོ་ཚང་མ་བཙོན་ཁང་དུ་བཅུག་པ་མ་ཟད། མཚན་གང་ས་ལ་སྡོད་མ་བཅུག་པའི་ཁར་གཅར་རྡུང་ཚད་མེད་བཏང་ཡོད་པ་དང་། མི་ཁ་ཤས་འགྲོ་བསྐྱོད་མི་ཐུབ་པར་གྱུར་ཡོད་པ་གསུངས་སོང་། ཁ་སང་ཟླ་ ༣ ཚེས་ ༡༩ ཉིན་གྲོང་ཚོའི་འགོ་ཁྲིད་ཀྱིས་ཉེན་རྟོག་པར་ཁོང་ཚོར་ཉེས་པ་མེད་པའི་གནས་ལུགས་བཤད་རྗེས་གཞི་ནས་གློད་བཀྲོལ་ཐོབ་ཡོད་ཀྱང་ཚང་མ་སྨན་ཁང་དུ་འགྲོ་དགོས་པ་བཟོས་ཡོད་པ་མ་ཟད། ཉེན་རྟོག་པས་བརྗོད་དོན་པད་རྒྱལ་ལགས་དཀར་མཛེས་སྨན་ཁང་ནས་སྐྱོབ་མ་ཐུབ་པར་ཁྲེན་དུ་སྨན་ཁང་དུ་ཁྲིད་ཡོད་སྲིད་སྟབས་མི་གཉིས་ཉེན་རྟོག་པ་དང་མཉམ་དུ་ལྟ་བར་འགྲོ་ན་འགྲིག་གི་ཡོད་ལུགས་བརྗོད་འདུག་ཀྱང་དེ་རྗེས་ཀྱི་གནས་ཚུལ་ཇི་ཆགས་གསལ་རྟོགས་ཐུབ་མེད་པ་རེད་འདུག གཞི་རྩའི་པདྨ་རྒྱལ་མཚན་ལགས་ཀྱི་ཕ་མ་གཉིས་ལ་ཕྲུ་གུ་ལྔ་ཡོད་པའི་ནང་ནས་ཁོང་ཕྲུ་གུ་རྒན་ཤོས་དེ་ཡིན་པ་རེད། ཁོང་གི་ཕ་མ་གཅིག་པའི་སྤྲུན་མཆེད་ལོ་ ༢༢ ཙམ་ཡིན་པའི་བུ་གཅིག་དང་ལོ་ན་ ༢༠ ཙམ་སོན་པའི་བོུ་གཅིག་ཡོད་པ་དེ་གཉིས་ཕྱི་ལ་མག་པ་དང་མནའ་མར་ཕྱིན་ཡོད་པ་དང་། ཁྱིམ་ལ་ཕ་མ་དང་ལྷན་ལོ་ན་བཅུ་བཞི་བཅོ་ལྔ་ཡས་མས་ཡིན་པའི་བོུ་གཉིས་བཅས་ཡོད་པ་རེད། ཁོང་གི་ཁྱིམ་ཚང་གི་འཚོ་བའི་གནས་སྟངས་ཧ་ཅང་ཞན་པོ་ཡིན་སྟབས་ཆུང་དུས་ནས་ཕ་མར་ལས་ཀའི་རོགས་རམ་བྱས་ཏེ་སློབ་གྲྭར་འགྲོ་རྒྱུའི་གོ་སྐབས་བྱུང་མེད་པ་དང་། རྒྱུན་དུ་ཆོས་སེམས་ཆེ་ཞིང་མི་ཚེ་གཅིག་རིང་ཤ་སྤངས་པའི་དམ་བཅའ་བཞག་ནས་ལོ་གཉིས་ཙམ་སོང་འདུག རྣམ་ཀུན་གཤིས་སྤྱོད་གཉིས་ཀ་བཟང་པོ་ཡོད་པ་དང་དེ་བཞིན་མིི་རིགས་ཀྱི་ལ་རྒྱ་ཡོད་མཁན་ཞིག་ཡིན་འདུག དཀར་མཛེས་རྫོང་དང་ཉག་རོང་ས་ཁུལ་དུ་འདི་ལོའི་གསུམ་བཅུའི་དུས་དྲན་སྔ་རྗེས་ཉིན་གཉིས་ཙམ་རིང་སྐད་འཕྲིན་དྲ་ལམ་ལ་དམ་བསྒྲགས་བྱས་ཡོད་ཀྱང་། ཁ་ཉིན་ཕྱི་ཚེས་ ༡༨ ཉིན་རང་ལུས་མེར་སྲེག་གི་ངོ་རྒོལ་བྱུང་རྗེས་ཡང་བསྐྱར་དྲ་ལམ་བཀག་འདུག དེར་བརྟེན་ད་ལྟའི་ཆར་ས་གནས་སུ་གནས་ཚུལ་གང་བྱུང་ཡོད་མེད་ཤེས་རྟོགས་ཐུབ་དཀའ་བའིི་གནས་སུ་གྱུར་འདུག ཉག་རོང་ས་ཁུལ་དུ་ཆ་མཚོན་ན་ཕྱི་ལོ་ ༢༠༠༨ ལོ་ནས་བོད་ས་ཁུལ་གཞན་དང་འདྲ་བར་ཆེས་དམ་བསྒྲགས་ཀྱི་གནས་སྟངས་འོག་ཡོད་པ་མ་ཟད་ ཕྱི་ལོ་ ༢༠༡༦ ཟླ་ ༢ ཚེས་ ༢༩ ཉིན་ཕྱི་དྲོ་ཚོད་ ༤།༠༠ ཡས་མས་ཙམ་ལ་ཉག་རོང་མཚོ་ཁ་ཨརྱ་གླིང་དགོན་པའི་རང་ལོ་ ༡༨ ཡིན་པའི་གྲྭ་སྐལ་བཟང་དབང་འདུས་ཀྱིས་དགོན་པའི་ཟུར་དུ་བོད་ལ་རང་དབང་རང་བཙན་དགོས་ཞེས་སྐད་འབོད་གནང་སྟེ་རང་ལུས་མེར་བསྲེགས་གནང་རྗེས་ཁྲེན་དུ་སྨན་ཁང་དུ་འདས་གྲོངས་སུ་གྱུར་ཡོད་པ་རེད། ད་རེས་པད་རྒྱལ་ལགས་ཀྱིས་རང་ལུས་མེར་སྲེག་གནང་བ་ནི་ཉག་རོང་ནས་མེར་སྲེག་གནང་མཁན་ཐེངས་གཉིས་པ་དེ་ཆགས་ཡོད་པ་རེད།

སྔ་ལོ་ཕྱི་ལོ་༢༠༡༦ ལོ་བཟུང་རྒྱ་ནག་གཞུང་གིས་གསེར་རྟ་བླ་རུང་སྒར་གྱི་གྲ་ཤག་གཏོར་གཤིག་དང་གྲྭ་བཙུན་ཕྱིར་འབུད་བྱས་པའི་ཡ་ང་བའི་གནད་དོན་དེར་བཙན་བྱོལ་བོད་མིའི་སྒྲིག་འཛུགས་དང་རྒྱལ་སྤྱིའི་སྤྱི་ཚོགས་ངོས་ནས་ངོ་རྒོལ་དང་ལས་གཞི་དེ་མཚམས་འཇོག་དགོས་པའི་རྒྱ་གཞུང་ལ་དགོས་འདུན་འདོན་བཞིན་པའི་སྐབས་དེར་ཉེ་ཆར་ཕྱི་ཟླ་༣ པའི ཚེས་༡༣ ཉིན་རྒྱ་གཞུང་ནག་གཞུང་གིས་སླར་ཡང་གསེར་རྟ་བླ་རུང་སྒར་གྱི་གྲ་ཤག་༣༢༢༥ གཏོར་གཤིག་གཏོང་རྒྱུ་ཐག་གཅོད་གཏན་ཁེལ་ཟིིན་པ་དང་་ཐག་གཅོད་དེར་འགྱུར་བ་གང་ཡང་མེད་པ་མ་ཟད་ལས་གཞི་དེ་འདི་ལོའི་ཕྱི་ཟླ་བཞི་པའི་ཟླ་མཇུག་ཏུ་ཚར་ཟིན་དགོས་པའི་བཀའ་རྒྱ་བཏང་བ་དང་ཆབས་ཅིག་་གལ་ཏེ་ཐག་གཅོད་དེར་འདོད་བློ་མ་ཁེངས་པའི་རྣམ་འགྱུར་བསྟན་ཚེ་ཐག་གཅོད་ནན་པོ་བྱ་རྒྱུ་ཡིན་པའི་འཇིགས་སྐུལ་ཡང་བྱས་འདུག་ དེ་ཡང་ཟླ་བ་ཛ་དྲག་གི་ཐག་གཅོད་དེར་དགོན་པའི་མཁན་པོས་གཙོས་རྒྱུན་ལས་རྣམ་པས་ཉིན་གསུམ་རིང་གོང་རིམ་རྒྱ་གཞུང་འབྲེལ་ཡོད་དབང་འཛིན་པར་ཐག་གཅོད་དེ་ཕྱིར་འཐེན་ཡོང་བའི་གནས་ལུགས་ཞུ་འབོད་ཀྱི་འབད་བརྩོན་ཡོད་རྒུ་བྱས་ཀྱང་དོན་འབྲས་མ་སོན་པར་མཐར་ཁ་ཉིན་ཕྱི་ཟླ་༣ ཚེས་༡༦ ཉིན་དགོན་པའི་མཁན་པོ་ཞིག་གིས་གྲྭ་བཙུན་མང་ཚོགས་ལ་གནས་ཚུལ་དེ་གསལ་བཤད་གནང་བའི་བརྙན་ཐུང་ཞིག་འདི་གར་འབྱོར་ཡོད་པ་རེད་དེའི་ནང་མཁན་པོ་མཆོག་གིས་གསུང་དོན་སྒྲ།། མཁན་པོ་མཆོག་གིས་མུ་མཐུད་སེར་སྐྱ་མང་ཚོགས་ལ་འབོད་སྐུལ་གསལ་བཤད་གནང་དོན་ནང་གཙོ་བོ་འདི་ལོ་ཕྱི་ལོ་ ༢༠༡༧ ཟླ་ ༡ ཚེས་ ༡༢ ཉིན་རྒྱ་ནག་གཞུང་གིས་གསེར་རྟ་བླ་རུང་ཆོས་སྒར་གྱི་སྡོད་ཁང་ ༤༣༢༠ གཏོར་བཤིག་དགོས་་པ་དང་འདི་ལོ་ཕྱི་ཟླ་བཞི་པའི་ཟླ་མཇུག་ཏུ་གྲུབ་ཟིན་དགོས་པའི་བཀའ་རྒྱ་འབྱོར་ཞིང་དེ་རྗེས་དགོན་པའི་ལས་སྣེ་ཚོས་དངོས་ཡོད་དཀའ་ངལ་གོང་རིམ་ལ་ཞུ་གཏུག་རིམ་པར་བྱས་རྗེས་མཐར་ཕྱི་ཟླ་ ༣ ཚེས་ ༡༣ ཉིན་རྒྱ་ནག་གཞུང་ནས་གྲྭ་ཤག་༣༢༢༥ ངེས་པར་དུ་སྤྱི་ཟླ་བཞི་བའི་ཟླ་མཇུག་བར་གཏོར་བཤིག་གཏོང་རྒྱུའི་ཐག་གཅོད་ཀྱི་བཀའ་རྒྱ་འབྱོར་བ་དང་དགོན་པའི་ལས་སྣེ་ཆོས་སླར་ཡང་ཐབས་ཤེས་ཡོད་དགུས་རྩལ་སྤྲུགས་བྱས་ཏེ་་གོང་རིམ་ལ་དཀའ་ངལ་ཞུ་གཏུག་བྱས་ཀྱང་དོན་འབྲས་མ་སོན་པ་སོགས་ཀྱི་གནས་ཚུལ་འབྱུང་རིམ་དང་ངོ་སྤྲོད་དང་སྦྲགས་སྒྲ།། ད་བར་དགོན་པའི་དཀའ་སྡུག་གི་གནད་དོན་ཡོངས་རྫོགས་རྒྱུན་ལས་རྣམ་པས་མང་གཙོའི་ལམ་ནས་ཐག་གཅོད་བྱེད་བཞིན་པ་ཡིན། དེར་བརྟེན་སྙན་པོ་མེད་ཀྱང་གྲྭ་མང་ལ་གསལ་བཤད་བྱེད་དགོས་བྱུང་། གང་ལྟར་ང་ཚོའི་མགོ་ཐོག་ལ་ཡོང་བཞིན་པ་ནི་བཟོད་མི་ཐུབ་པའི་དཀའ་ངལ་ཡིན་ཡང་མུ་མཐུད་སངས་རྒྱས་ཀྱི་བཀའ་དང་། བླ་མའི་གསུངས་བཅས་ལ་བརྩིས་ནས་བཟོད་སྒོམ་གནང་རོགས་ཞེས་སོགས་ཀྱི་འབོད་སྐུལ་ནན་པོ་གནང་འདུག ཤེས་རྟོག་བྱུང་བ་ལྟར་ན་སྤྱི་ལོ་༢༠༡༦་ལོར་རྒྱ་ནག་གཞུང་གིས་གསེར་རྟ་བླ་རུང་སྒར་གྱི་གྲྭ་ཤག་༡༥༠༠ གཏོར་གཤིག་བཏང་བ་དང་ནས་གྲྭ་བཙུན་མི་གྲངས་༣༧༢༩་ཕྱིར་འབུད་བྱས་ཡོད་པ་དང་ ཕྱི་ལོ་༢༠༡༧་ལོར་གྲ་ཤག་ ༡༥༠༠ གྲ་བཙུན ༨༩༥་ཕྱིར་ཕུད་བྱས་ཡོད་པ་རེད།

བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སྔ་རྗེས་སུ་བོད་ཀྱི་ས་ཁུལ་གང་སར་དམག་མི་སྔར་ལས་མང་བ་འགྲེམས་འཇོག་གིས་དམ་དྲག་ཆེ་རུ་བཏང་ཏེ་བོད་མིའི་འགྲོ་འདུག་སྤྱོད་གསུམ་ཐད་སྟངས་འཛིན་ནན་པོ་བྱས་ཡོད་པ་བཞིན། འདི་ལོའི་གསུམ་བཅུའི་དུས་དྲན་གོང་། མདོ་སྨད་རྔ་བ་སྟག་ཚང་ལྷ་མོ་ཀིརྟི་དགོན་པ་ནས་དེ་སྔོན་བོད་དོན་ཆབ་སྲིད་དང་འབྲེལ་བའི་གནད་དོན་འོག་འཛིན་བཟུང་བྱས་མྱོང་བའི་དགེ་འདུན་པ་རྣམས་ཕྱི་ཕྱོགས་སུ་འགྲོ་བསྐྱོད་མི་ཆོག་པའི་བཙན་བཀའ་བཏང་ཡོད་འདུག གནས་ཚུལ་ངོ་སྤྲོད་པས་མུ་་མཐུད་བརྗོད་དོན་ལྟར་བྱས་ན། འདི་ལོའི་གསུམ་བཅུའི་དུས་དྲན་གོང་ནས་ས་གནས་རྒྱ་གཞུང་གི་ཉེན་རྟོག་པ་དང་ལས་བྱེད་ཁག་ཅིག་སྟག་ཚང་ལྷ་མོ་ཀིརྟི་དགོན་པར་ཡོང་ཏེ། དེ་སྔ་ཕྱི་ལོ་༢༠༠༨ ལོ་ནས་བཟུང་རྒྱ་གཞུང་ལ་ངོ་རྒོལ་སྐད་འབོད་དང་རང་ལུས་མེར་སྲེག་གི་གནད་དོན་དང་འབྲེལ་བ་ཡོད་པའི་ཉེས་མིང་འོག་འཛིན་བཟུང་བྱས་མྱོང་བའི་དགེ་འདུན་པའི་གྲྭ་ཤག་རེ་རེར་འཛུལ་ཏེ། ཁྱོད་ཚོ་ནི་རྒྱལ་ཁབ་ཀྱི་གཏན་ལྷིང་ལ་ཉེན་ཁ་བཟོ་མཁན་ཡིན་སྟབས། ཕྱི་ཟླ་གསུམ་པའི་ནང་གྲྭ་ཤག་རང་དུ་སྡོད་དགོས་པ་ལས་ཕྱི་ཕྱོགས་ཡར་མར་ལ་གཏན་ནས་སོང་མི་ཆོག་ཅེས་བཙན་བཀའ་བཏང་བ་མ་ཟད། དེ་ལྟར་སྒྲུབ་པར་ཁས་ལེན་དམ་བཅའ་ཡང་བྱེད་དུ་བཅུག་ཡོད་པ་རེད་ཅེས་དང་། ལྷག་པར་ཏུ་དེ་སྔ་ཆབ་སྲིད་ཀྱི་གནད་དོན་དང་འབྲེལ་བ་གཏན་ནས་མེད་པའི་དགེ་འདུན་པ་ཁག་ཅིག་ལ་ཡང་རྔ་བ་རྫོང་ཐོག་ཏུ་ཡོད་པའི་རྒྱ་ནག་ཉེན་རྟོག་ལས་ཁུངས་ནས་ཁ་པར་འབྱོར་ཏེ་རྫོང་ཉེན་རྟོག་ལས་ཁུངས་སུ་ཡོང་དགོས་པར་བཤད་འདུག་པ་ལྟར། དགེ་འདུན་པ་ཁག་ཅིག་སོང་ཡོད་ཀྱང་། དགེ་འདུན་པ་གཞན་ཁག་ཅིག་གིས་ཉེན་རྟོག་ལས་ཁུངས་སུ་ཡོང་དགོས་པའི་ང་ཚོས་ཆབ་སྲིད་དང་འབྲེལ་བའི་ཉེས་པ་གང་ཡང་བསགས་མེད་ཅེས་ལན་འདེབས་བྱས་ཏེ་ཕྱིན་མེད་པ་རེད་འདུག སྤྱིར་བཏང་ནས་ཀིརྟི་དགོན་པར་ཕྱི་ཟླ་གསུམ་པའི་ནང་དམ་དྲག་ཤུགས་ཆེར་བྱེད་བཞིན་ཡོད་པ་མ་ཟད། དེ་སྔ་ཆབ་སྲིད་ཀྱི་ཉེས་མིང་འོག་འཛིན་བཟུང་བྱས་མྱོང་བའི་དགེ་འདུན་པ་ཚོ་དུས་ནས་དུས་སུ་རྔ་བ་རྫོང་ཉེན་རྟོག་ལས་ཁུངས་སུ་འབོད་འགུག་བྱས་ཏེ། འདྲི་རྩད་དང་སུན་བཙིར་བཟོ་བཞིན་པའི་ཐོག་རྒྱ་གཞུང་གིས་གསང་ཉུལ་བ་བཏང་ཏེ་ཀིརྟི་དགོན་པའི་ནང་། དགེ་འདུན་པ་ཚོས་དྲ་ལམ་སོགས་བརྒྱུད་ཕྱི་ཕྱོགས་སུ་འབྲེལ་བ་བྱེད་ཀྱིན་ཡོད་མེད་དང་ཕྱི་ཕྱོགས་ཀྱི་གསར་འགྱུར་བརྒྱུད་ལམ་ཁག་ལ་ལྟ་ཉན་བྱེད་ཀྱིན་ཡོད་མེད་ཐད་ལྟ་སྲུང་ནན་པོ་བྱེད་བཞིན་ཡོད་པ་སོགས་ཀྱི་འགྲེལ་བརྗོད་ཀྱང་གནང་སོང་།