རྒྱལ་སྤྱི།

དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་ International Network of Engaged Buddhists ཞེས་པའི་རྒྱལ་སྤྱིའི་ནང་པའི་ཚོགས་པའི་སྐུ་ཚབ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཡོད་པ་དང་༸གོང་ས་མཆོག་གིས་ནང་པ་ཚོར་སེམས་ཀྱི་ཞི་བདེ་གོང་འཕེལ་བརྒྱུད་འཛམ་གླིང་ཞི་བདེ་བསྐྲུན་སླད་དམིགས་བསལ་གྱི་ལས་འགན་ཡོད་པ་བཀའ་བསྩལ་སོང་། དེ་རིང་ཚོགས་པ་དེ་ཆེད་འཛུགས་གནང་མཁན་སྐུ་ཞབས་ Sulak Sivaraksa ལགས་ཀྱིས་སྣེ་ཁྲིད་འོག་ཐེ་ལེན་ཌི་དང་རྒྱ་གར། ཨ་རི།  བྷར་མ། ཉི་ཧོང་། ལྷོ་ཀོ་རི་ཡ།  བྷང་ལ་དེ་ཤ བལ་ཡུལ་སོགས་རྒྱལ་ཁབ་ ༡༥ ནས་ཁྱོན་སྐུ་ཚབ་ ༡༦༥ ལྷག་བཞུགས་སྒར་༸རྒྱལ་བའི་ཕོ་བྲང་དུ་༸གོང་ས་མཆོག་གི་མཇལ་ཁ་ཞུས་བར་བཅར་ཡོད་པ་ལྟར་༸གོང་ས་མཆོག་གིས་སྐབས་དེར་འགྲོ་བ་མི་ཐམས་ཅད་བདེ་བ་འདོད་ཀྱང་ད་ཆ་འཛམ་གླིང་ནང་དཀའ་ངལ་མང་དག་ཅིག་འཕྲད་བཞིན་པ་དེ་མིས་བཟོས་པ་ཞིག་དང་། དཀའ་ངལ་དེ་དག་ཡང་ང་ཚོ་དང་ཁོ་ཚོ་ཟེར་ཞེས་རིམ་པ་གཉིས་པར་གཙིགས་ཆེར་འཛིན་རྐྱེན་ཡོང་བ་ཞིག་ཡིན་སྟབས། མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་བཞི་ལས་གཅིག་ཆོས་ལུགས་མཐུན་སྒྲིལ་གོང་འཕེལ་མཛད་རྒྱུ་དེ་ཡིན་སྐོར་བཀའ་བསྩལ་ཡོད། དེ་བཞིན་མགོན་པོ་༸གང་ཉིད་མཆོག་གིས་ནང་ཆོས་ཀྱི་གཞི་རྩ་པཱ་ལི་གཞུང་ལུགས་དང་ཚད་མའི་སྒོ་ནས་དཔྱད་པའི་ལེགས་སྦྱར་གཞུང་ལུགས་གཉིས་ཟུང་འབྲེལ་གྱིས་ཚན་རིག་དང་མཉམ་དུ་བསྐྱོད་དགོས་པ་དང་ཆབས་ཅིག་ཏུ་ནང་པའི་གཞུང་ལུགས་ཐད་རྒྱུ་མཚན་དཔྱད་པའི་སྒོ་ནས་དེར་སློབ་སྦྱོང་གནང་བ་ཡིན་ན་དུས་རབས་ ༢༡ གི་ནང་པ་ཞིག་ཆགས་ངེས་ཡིན་སྐོར་བཀའ་བསྩལ་ཡོད་པ་རེད། ༸གོང་ས་མཆོག་གིས་ད་དུང་ད་ཆ་འཛམ་བུ་གླིང་ལ་དཀའ་ངལ་འཕྲད་བཞིན་པའི་གནད་དོན་ཐད་ཆོས་ལུགས་ཚང་མར་དེ་འབྲེལ་དཀའ་ངལ་སེལ་བར་ནུས་པ་ཡོད་པ་དང་དེའི་ཁོངས་ནས་ནང་པ་ལྟ་བུ་མཚོན་ན་དད་པ་ཁོ་ན་མ་ཡིན་པར་རྒྱུ་མཚན་ལ་བརྟེན་ནས་དཔྱད་པ་གནང་རྒྱུའི་ཁྱད་ཆོས་ཐུན་མོང་མ་ཡིན་པ་ཞིག་ཡོད་སྟབས། ནང་པ་ཚོར་སེམས་ཀྱི་ཞི་བདེ་གོང་འཕེལ་བརྒྱུད་འཛམ་གླིང་ཞི་བདེ་བསྐྲུན་སླད་དམིགས་བསལ་གྱི་ལས་འགན་ཡོད་པ་བཀའ་བསྩལ་སོང་། དེ་བཞིན་སྐུ་ཞབས་ Sulak ལགས་ཀྱིས་འདི་ལོ་ཚོགས་པ་དབུ་བརྙེས་ནས་ལོ་ ༣༠ འཁོར་བ་མ་ཟད་སྒོས་ང་ཚོས་བདག་ཅག་གི་སྟོན་པ་བཅོམ་ལྡན་འདས་ཀྱི་གནས་ནས་ཡོང་སྟེ་ལྷན་ཚོགས་འཚོགས་རྒྱུ་དེ་འཚམས་པོ་ཞིག་ཏུ་མཐོང་བ་དང་ལྷག་པར་དུ་ད་རེས་འདིར་༸གོང་ས་མཆོག་གི་བཀའ་སློབ་ཞུ་སླད་བཅར་བ་ཡིན་སྐོར་གསུངས་སོང་བ་དང་ཆབས་ཅིག་ཏུ་༸གོང་ས་མཆོག་གི་མཇལ་ཁ་ཞུ་རྒྱུ་བྱུང་བ་ནི་ཧ་ཅང་དགའ་ཚོར་བྱུང་སོང་ཞེས་དང་༸གང་ཉིད་མཆོག་གིས་ང་ཚོ་ནང་པ་རྣམས་ནས་ཆོས་ལུགས་གཞན་ཚོ་དང་ལྷན་དུ་མཉམ་སྦྲེལ་གནང་དགོས་པ་དང་དེ་བཞིན་ཁོར་ཡུག་སོགས་དང་འབྲེལ་བའི་དཀའ་ངལ་དག་སེལ་ཐབས་ལ་གདོང་ལེན་གནང་དགོས་པ་སོགས་ཀྱི་ལམ་སྟོན་མཛད་ཡོད་པ་ངོ་སྤྲོད་གནང་སོང་། ཚོགས་པ་དེའི་རྒྱུན་ལས་ཁོངས་སུ་ཡོད་པ་ Anchalee Karutach ལགས་ཀྱིས་ད་རེས་ལྷན་ཚོགས་མ་འཚོགས་གོང་༸གོང་ས་མཆོག་གི་མཇལ་ཁ་ཞུ་རྒྱུ་བྱུང་བར་དངོས་གནས་སེམས་འགུལ་ཐེབས་པ་ཞིག་བྱུང་སོང་བ་དང་མགོན་པོ་༸གང་ཉིད་མཆོག་ལྟ་བུ་མཚོན་ན་༸སྐུ་སྒེར་ལ་སྐུ་ངལ་ཇི་ཙམ་འཕྲད་མིན་ལ་བལྟོས་མེད་སེམས་ཅན་དོན་དུ་མཛད་པ་བསམ་གྱིས་མི་ཁྱབ་པ་བསྐྱངས་པ་མ་ཟད་དགུང་ལོ་བགྲེས་པོ་ཕེབས་ཡོད་ཀྱང་འགྲོ་བ་གཞན་གྱི་བདེ་དོན་སླད་དུ་ཐུགས་སྤོབས་ཁྱད་པར་ཅན་ཡོད་པ་དེ་ཡི་རང་ཞུ་རྒྱུ་ཞིག་ཡིན་པ་དང་། ང་ཚོ་སྤྱི་ཚོགས་ཞབས་ཞུ་བར་མཚོན་ན་༸གོང་ས་མཆོག་དཔེ་མཚོན་བཟང་ཤོས་ཤིག་ཡིན་སྐོར་གསུངས་སོང་། གཞི་རྩའི་ཕྱི་ལོ་ ༡༩༨༩ ལོར་ཐེ་ལན་ཌི་ནང་རྩོམ་པ་པོ་དང་གཙུག་ལག་སློབ་དཔོན་ཡིན་པ་སྐུ་ཞབས་ Sulak Sivaraksa ལགས་དང་ནང་པའི་རུ་ཁག་དེ་སྤྱི་ཚོགས་ཞབས་ཞུ་བ་ཁག་གཅིག་གིས་ནང་པ་ཕན་ཚུན་དང་། ཆོས་ལུགས་གཞན་བར་མཉམ་སྦྲེལ་དང་གོ་རྟོགས་གོང་འཕེལ་གཏོང་རྒྱུ། ནང་པའི་ལྟ་གྲུབ་ཉམས་ལེན་གྱིས་སྤྱི་ཚོགས་ནང་ཞི་བདེ་བསྐྲུན་སླད་ཆེད་དམིགས་གནང་བའི་ཚོགས་པ་ཞིག་ཡིན་པ་དང་། ཚོགས་པ་དེར་ཨེ་ཤ་ཡ་གཙོས་གྱུར་ཡོ་རོབ་དང་བྱང་ཨ་རི།  དེ་བཞིན་ཨོ་སི་ཊོ་ལི་ཡ་སོགས་རྒྱལ་ཁབ་ ༢༥ ཙམ་ཞིག་ནས་ཚོགས་མི་ཡོད་པ་རེད་འདུག  ད་རེས་ཚོགས་པ་དེ་དབུ་བརྙེས་ཏེ་ལོ་ངོ་ ༣༠ འཁོར་བ་དང་བསྟུན་བཞུགས་སྒར་གྱི་ཉེ་འདབས་སུ་ཆགས་པའི་སྦིར་དུ་རྟེན་གཞི་བྱས་པའི་ Deer Park Institute དུ་ The Culture of Awakening ཞེས་པའི་བརྗོད་གཞི་ཐོག་ལྷན་ཚོགས་ཤིག་འཚོགས་གཏན་ཁེལ་འདུག

NBA ཞེས་བྱང་ཨ་རིའི་རྒྱལ་ཡོངས་སིལ་སྦོལ་མཐུན་ཚོགས་ཀྱི་ཚོགས་མི་ Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱིས་ Twitter ཐོག་ཧོང་ཀོང་ལ་རྒྱབ་སྐྱོར་མཚོན་པའི་བརྗོད་ཚིག་ཞིག་བརྒྱུད་སྤེལ་གནང་བ་ནས་བཟུང་སྟེ་འདས་པའི་གཟའ་སྐོར་གསུམ་ལྷག་གི་གོང་ནས་ཨ་མི་རི་ཀའི་རྒྱལ་ཡོངས་སིལ་སྦོལ་མཐུན་ཚོགས་དང་རྒྱ་ནག་གཞུང་གིས་གཙོས་པའི་རྒྱ་ནག་གི་ཚོང་ལས་སྡེ་ཚན་ཁག་གཅིག་དབར་འགྲོ་བ་མིའི་ཐོབ་ཐང་དང་ཚོང་འབྲེལ་སོགས་ཀྱི་གནད་དོན་ཐོག་གླེང་སློང་མི་ཉུང་བ་ཞིག་འབྱུང་བཞིན་པའི་ཁྲོད་ཕྱི་ཚེས་ ༡༨ ཉིན་གྱི་དགོང་མོ་ཨ་རིའི་གྲོང་ཁྱེར་ནིའུ་ཡོག་གི་སིལ་སྤོལ་རུ་ཁག་ Brooklyn Nets དང་ཁེ་ན་ཌའི་ Toronto Raptors རུ་ཁག་གཉིས་དབར་རྩེད་འགྲན་གནང་སྐབས་བོད་མི་དང་ཧོང་ཀོང་བ། དེ་བཞིན་བོད་དང་ཧོག་ཀོང་གི་རང་དབང་ལ་རྒྱབ་སྐྱོར་གནང་མཁན་བཅས་ནས་བོད་རང་བཙན་དང་ཧོང་ཀོང་ལ་རྒྱབ་སྐྱོར་ཡོད་པའི་སྟོད་གོས་དང་རྒྱལ་དར་སོགས་འཆར་ཏེ་ལས་འགུལ་སྤེལ་འདུག ཐེངས་འདིའི་རྩེད་འགྲན་དེ་ནི་ཨ་རིའི་གྲོང་ཁྱེར་ནིའུ་ཡོག་གི་སིལ་པོལ་རུ་ཁག་ Brooklyn Nets རྒྱ་ནག་ནང་རྩེད་འགྲན་སྐོར་སྐྱོད་ཟིན་ཏེ་ཨ་རི་ནང་གི་རྩེད་འགྲན་གནང་བ་དང་པོ་དེ་ཆགས་ཀྱི་ཡོད་པ་དང་། སྐབས་དེར་བོད་རང་བཙན་སློབ་ཕྲུག་ཚོགས་པའི་ཚོགས་མི་དང་བོད་དོན་རྒྱབ་སྐྱོར་བ་མི་ཉུང་བ་ཞིག་ནས་ལག་ཏུ་བོད་ཀྱི་རྒྱལ་དར་བསྣམས་པ་དང་ལུས་ལ་ཨ་རིའི་རྒྱལ་ཡོངས་སིལ་སྤོལ་མཐུན་ཚོགས་ནས་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱེད་དགོས་པ་དང་། ཧོང་ཀོང་མི་མང་གི་ཞི་བའི་ལས་འགུལ་ལ་རྒྱབ་སྐྱོར་ཡོད་པ་སོགས་འཁོད་པའི་སྟོད་གོས་དཀར་པོ་གྱོན་ཏེ་སྐད་འབོད་གནང་འདུག ལས་འགུལ་བ་ཁག་གཅིག་ནས་ Brooklyn Nets རུ་ཁག་གི་སྦྱིན་བདག་ Joe Tsai དང་ LA Lakers རུ་ཁག་གི་རྩེད་འགྲན་པ་ LeBron James གཉིས་ནས་དེ་སྔ་ Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱིས་ཧོང་ཀོང་ལ་རྒྱབ་སྐྱོར་མཚོན་པའི་བརྗོད་ཚིག་སྤེལ་སྐབས་མི་འདོད་པའི་རྣམ་པ་ཆེད་བཏོན་གནང་བ་དང་ངོ་ཚ་ཁྲེལ་གཞུང་མེད་པའི་ Joe Tsai དང་ LeBron James ཞེས་འཁོད་པའི་ཕྲེད་དར་ནག་པོ་འཕྱར་ཏེ་ངོ་རྒོལ་གནང་འདུག སྐབས་དེར་བོད་མི་དང་བོད་དོན་རྒྱབ་སྐྱོར་བ་ཙམ་མ་ཟད་ཧོང་ཀོང་གི་མང་གཙོ་དོན་གཉེར་བ་དང་གྲོས་ཚོགས་འཐུས་མི་ཟུར་པ་སྐུ་ཞབས་ Nathan Law ལགས་ཀྱིས་གཙོས་པའི་ལས་འགུལ་བ་དང་རྒྱབ་སྐྱོར་བ་སུམ་བཅུ་ལྷག་གིས་ཧོང་ཀོང་ལ་རྒྱབ་སྐྱོར་ཡོད་ཅེས་པའི་སྟོད་གོས་ནག་པོ་གྱོན་ཏེ་ངོ་རྒོལ་གྱི་ལས་འགུལ་གནང་ཡོད་པ་དང་། བོད་མི་དང་ཧོང་ཀོང་བའི་ལས་འགུལ་ཁྲོད་ཤར་ཏུར་ཀིས་ཐན་གྱི་ཡུ་གུར་ཁ་ཆེའི་མི་རིགས་ཁག་གཅིག་ནས་ཀྱང་མཉམ་ཞུགས་གནང་བ་མ་ཟད་ལས་འགུལ་བ་རྣམས་ཉེན་རྟོག་པས་རྩེད་འགྲན་གནང་ཡུལ་ནས་སྐད་འབོད་གནང་རྐྱེན་ཕྱིར་འབུད་བཏང་འདུག གཞི་རྩའི་སྐབས་དེའི་ལས་འགུལ་དང་འབྲེལ་གསར་འགོད་བསྒྲགས་གཏམ་ཞིག་ཡོངས་ཁྱབ་གནང་ཡོད་པ་དང་། ལས་འགུལ་ནང་དངོས་སུ་ཞུགས་མཁན་བོད་དོན་ལས་འགུལ་ལྟེ་གནས་ཁང་གི་ཉམས་ཞིབ་པ་བསྟན་འཛིན་རྡོ་རྗེ་ལགས་ནས་ རྒྱ་གཞུང་གི་དྲགསཔོའི་སྲིད་བྱུས་འོག་དཀའ་སྡུག་མྱོང་བཞིན་པའི་ཧོང་ཀོང་དང་བོད། དེ་བཞིན་ཤིན་ཅང་བཅས་ཀྱི་འགྲོ་བ་མིའི་ཐོབ་ཐོབ་ཐང་ཐོག་རྒྱལ་སྤྱིའི་མང་ཚོགས་ནས་རྒྱབ་སྐྱོར་གནང་རྒྱུ་གལ་ཆེན་པོ་ཡིན་པར་འགྲེལ་བརྗོད་དང་སྦྲགས་ཏེ་ཉེ་དུས་སུ་ Houston Rockets སིལ་སྤོལ་རུ་ཁག་གི་སྤྱི་ཁྱབ་འགན་འཛིན་ནས་ཧོང་ཀོང་མི་མང་ལ་རྒྱབ་སྐྱོར་གནང་བ་དེ་ནི་འགྲིག་པ་ཞིག་ཡིན་པ་དང་། དེར་ཨ་རིའི་རྒྱལ་ཡོངས་སིལ་སྤོལ་མཐུན་ཚོགས་ཀྱིས་རྒྱབ་སྐྱོར་གནང་བར་ཡི་རང་བསྔགས་བརྗོད་ཡོད་ཅེས་གསུངས་ཏེ་རྩེད་འགྲན་པ་ LeBron James དང་ Brooklyn Nets རུ་ཁག་གི་སྦྱིན་བདག་ Joe Tsai གཉིས་ཀྱིས་མི་མང་གི་རང་དབང་ལས་ཚོང་དང་སྒེར་གྱི་ཁེ་བཟང་གལ་འགངས་ཆེ་བར་ངོས་འཛིན་པ་དེར་བློ་འཚབ་ཆེན་པོ་ཡོད་ཅེས་གསུངས་འདུག

རྒྱ་ནག་གཞུང་གིས་བོད་དང་ཤིན་ཅང་། ཧོང་ཀོང་དང་ཐེ་ཝན་བཅས་ཀྱི་ནང་དུ་གཞི་རྩའི་འགྲོ་བ་མིའི་ཐོབ་ཐང་གཙོས་གནས་ཚུལ་རྒྱུས་ལོན་རང་དབང་ལ་རྡོག་རོལ་ཚད་མེད་གཏོང་རྒྱུའི་སླད་དུ་ཀུ་ཤུ་རྟགས་ཅན་གྱི་ཚོང་ལས་ཁང་དེའི་ངོས་ནས་རོགས་འདེགས་དང་ངན་པ་ལག་སྦྲེལ་བྱེད་བཞིན་པ་དེ་དག་མཚམས་འཇོག་དགོས་པའི་ངོ་རྒོལ་གྱི་ལས་འགུལ་ཞིག་སྤེལ་འདུག དེ་ཡང་ཁ་སང་ཕྱི་ཟླ་ ༡༠ ཚེས ༡༧ ཉིན་ཨ་རི་New York ནང་རྟེན་གཞི་བྱས་པའི་ཀུ་ཤུ་རྟགས་ཅན་གྱི་ཚོང་ལས་ཁང་གི་ལྟེ་གནས་མཐོ་ཤོས་ཏེ་ Apple’s Grand Central Station store ཞེས་པའི་མདུན་དུ་བོད་དོན་ལས་འགུལ་ལྟེ་གནས་ཁང་གི་གཙོས་ཡུ་གུར་དང་། ཧོང་ཀོང་། ཐེ་ཝན་བཅས་ཀྱི་འཐུས་ཚབ་མི་སྣ་དང་ལས་འགུལ་བ་ཁག་ཅིག་འདུ་འཛོམས་གནང་ནས་ཀུ་ཤུ་རྟགས་ཅན་གྱི་གཙོ་འཛིན་ Tim Cook ལགས་སུ་རྒྱ་ནག་གཞུང་གིས་བོད་དང་ཧོང་ཀོང་། ཤིང་ཅང་དང་ཐེ་ཝན་བཅས་ཀྱི་གཞི་རྩའི་འགྲོ་བ་མིའི་ཐོབ་ཐང་གཙོས་རང་དབང་ཁག་ལ་རྡོག་རོལ་ཚད་མེད་གཏོང་བཞིན་པ་ལ་ཀུ་ཤུ་རྟགས་ཅན་གྱི་ངོས་ནས་རོགས་འདེགས་ཞུ་རྒྱུ་མཚམས་འཇོག་དགོས་པ་མ་ཟད། གོང་སྨྲོས་ཡུལ་ལུང་དེ་དག་ལ་རྒྱ་ནག་གཞུང་ནས་སོ་ཉུལ་བྱ་རྒྱུའི་སླད་དུ་ཚོང་ལས་ཁང་དེའི་ངོས་ནས་ངན་པ་ལག་སྦྲེལ་བྱ་རྒྱུ་ཆེ་རུ་སོང་བ་དེ་དག་རྐྱེན་གྱིས་གནས་ཚུལ་རྒྱུས་ལོན་རང་དབང་དང་། སྨྲ་བརྗོད་རང་དབང་སོགས་ལ་རྡོག་རོལ་ཤུགས་ཆེར་འགྲོ་བཞིན་ཡོད་སྟབས་རྒྱ་ནག་གཞུང་ལ་རོགས་འདེགས་དང་ངན་པ་ལག་སྦྲེལ་བྱ་རྒྱུ་འཕྲལ་དུ་མཚམས་འཇོག་དགོས་པའི་ངོ་རྒོལ་གྱི་ལས་འགུལ་ཞིག་སྤེལ་འདུག སྐབས་དེར་ལས་འགུལ་བའི་ཕྱག་ལ་ཀུ་ཤུ་རྟགས་ཅན་གྱི་མཚོན་རྟགས་བཀོད་པའི་སྦྱར་ཡིག་བསྣམས་ཏེ་མཚོན་རྟགས་དེའི་ནང་དུ་ཡི་གེ་དམར་པོ་དང་ནག་པོ་བྲིས་ཏེ།  རྒྱ་ནག་གཞུང་གིས་རང་དབང་ལ་རྡོག་རོལ་གཏོང་བཞིན་པར་བརྟེན་ཚོང་ལས་ཁང་ནས་རོགས་འདེགས་བྱ་རྒྱུ་མཚམས་འཇོག་དགོས་པ་དང་། ཚོང་ལས་ཁང་དེ་རང་དབང་གི་ཆེད་དུ་ལངས་དགོས་པ། དེ་བཞིན་ཚོང་ལས་ཁང་དེའི་ངོས་ནས་མི་མང་ལ་རོགས་འདེགས་ཞུ་དགོས་པ་ལས་རྒྱ་ནག་གཞུང་ལ་རོགས་འདེགས་བྱ་རྒྱུ་མཚམས་འཇོག་དགོས་པ་སོགས་ཡིག་ངག་གཉིས་ཀྱི་ཐོག་ནས་ངོ་རྒོལ་དང་། དེ་བཞིན་མང་ཚོགས་ཀྱི་ཁྲོད་ཚོང་ལས་ཁང་དེའི་ངོས་ནས་རྒྱ་ནག་གཞུང་དང་ལྷན་དུ་མཉམ་འབྲེལ་གྱི་ཐོག་ནས་གཞི་རྩའི་འགྲོ་བ་མིའི་ཐོབ་ཐང་ཁག་ལ་ཇི་ལྟར་རྡོག་རོལ་གཏོང་གི་ཡོད་མིན་འཁོད་པའི་ཡིག་ཆ་འགྲེམས་སྤེལ་དང་མང་ཚོགས་ཀྱི་བསམ་ཚུལ་བསྡུ་ལེན་སོགས་ཀྱི་ལས་འགུལ་སྤེལ་འདུག སྐབས་དེར་བོད་དོན་ལས་འགུལ་ལྟེ་གནས་ཁང་གི་འགན་འཛིན་ལྷ་སྒྲོན་བཀྲས་མཐོང་ལགས་ཀྱིས་འཛམ་གླིང་རྒྱལ་སྤྱིའི་ཁྲོད་ཀུ་ཤུ་རྟགས་ཅན་གྱི་ཚོང་ལས་ཁང་དེས་ཚོང་གི་བྱ་བཞག་ལས་གཞན་པའི་གཞན་བྱ་སྤྱོད་དེ་དག་ཕྱིར་མངོན་རྒྱུའི་ཆེད་དུ་ལས་འགུལ་སྤེལ་བ་ཞིག་ཡིན་སྐོར་དང་། བོད་གཙོས་ཤིང་ཅང་དང་རྒྱ་ནག   ཧོང་ཀོང་བཅས་ཀྱི་ནང་དུ་གནས་ཚུལ་མཁོ་སྒྲུབ་བྱ་རྒྱུར་ཆེས་དམ་དྲག་དང་།  མང་ཚོགས་ནས་སྤྱོད་བཞིན་པའི་མཉེན་ཆས་མང་དག་ཅིག་ལ་ཚོང་ལས་ཁང་དེས་རྒྱ་ནག་གཞུང་ལ་རམ་འདེགས་བྱས་ཏེ་བཀག་འགོག་བྱས་པ་ནི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་བཏང་བ་ཞིག་ཡིན་པར་སྐྱོན་བརྗོད་ནན་པོ་བྱས་ཏེ་ཚོང་ལས་ཁང་དེའི་ངོས་ནས་རྒྱ་ནག་གཞུང་དང་ངན་པ་ལག་སྦྲེལ་བྱ་རྒྱུ་མཚམས་འཇོག་དགོས་པ་དང་། རང་དབང་གི་གནས་ཚུལ་མཁོ་གཏོང་དང་མཁོ་སྒྲུབ་བྱ་རྒྱུ་ཙམ་མ་ཟད། མཉེན་ཆས་བཀག་སྡོམ་བྱས་པ་དང་ཕྱིར་འཐེན་བྱས་པ་རྣམས་རང་དབང་གི་ཐོག་ནས་བཀོལ་སྤྱོད་བྱ་རྒྱུ་ཡོད་པ་བཟོ་དགོས་ཞེས་བརྗོད་འདུག ཕྱོགས་མཚུངས་བོད་རང་བཙན་སློབ་ཕྲུག་ཚོགས་པའི་ལས་འགུལ་དང་འབྲེལ་མཐུད་ཀྱི་ངེས་སྟོན་པ་བསོད་ནམས་མཚོ་ལགས་ཀྱིས་ཚོང་ལས་ཁང་དེའི་ངོས་ནས་རྒྱ་ནག་གཞུང་དང་ངན་པ་ལག་སྦྲེལ་བྱས་ནས་བོད་དང་ཤིན་ཅང་། ཧོང་ཀོང་དང་ཐེ་ཝན་བཅས་ལ་མུ་མཐུད་བཙན་གནོན་བྱས་པ་ཡིན་ན་ཚོང་ལས་ཁང་དེའི་ཚོང་ཟོག་སྤྱོད་མཁན་ཚོས་དུས་ནམ་ཡང་རྒྱབ་སྐྱོར་གནང་གི་མ་རེད་ཅེས་བརྗོད་འདུག དེ་བཞིན་བོད་དོན་ལས་འགུལ་ལྟེ་གནས་ཁང་གི་ཉམས་ཞིབ་པ་བསྟན་འཛིན་རྡོ་རྗེ་ལགས་ཀྱིས་ཕྱི་ལོ ༢༠༡༧ ལོར་ཀུ་ཤུ་རྟགས་ཅན་གྱི་མཉེན་ཆས་ ༡༠༠༠ ཙམ་ཞིག་རྒྱ་ནག་གི་མཉེན་ཆས་ཚོང་ལས་ཁང་ནས་ཕྱིར་འཐེན་བྱས་པའི་རྐྱེན་གྱིས་བོད་དང་ཡུ་གུར། རྒྱ་རིགས་མང་གཙོ་དོན་གཉེར་བ་ཚོས་རང་དབང་གི་གནས་ཚུལ་མཁོ་གཏོང་བྱ་རྒྱུར་གདོང་ལེན་ཆེན་པོ་གནང་དགོས་ཀྱི་ཡོད་པ་དང་།  ལྷག་པར་དུ་༸གོང་ས་མཆོག་གི་མཚན་དང་། བོད་རང་བཙན། དེ་བཞིན་ཡུ་གུར་བའི་རང་དབང་དང་དྲུག་བཞི་དོན་རྐྱེན་སོགས་ཀྱི་ཐ་སྙད་ལ་དོགས་ཟོན་ཆེན་པོ་བྱ་དགོས་ཀྱི་ཡོད་པ་མ་ཟད། ཉེ་ལམ་ཚོང་ལས་ཁང་དེའི་ངོས་ནས་རྒྱ་ནག་གཞུང་གི་གནོན་ཤུགས་འོག་ HKmap.live ཞེས་པའི་མཉེན་ཆས་ཤིག་ཕྱིར་འཐེན་བྱས་པའི་རྐྱེན་གྱིས་ཧོང་ཀོང་གི་མང་གཙོའི་ལས་འགུལ་བ་ཚོར་ཉེན་ཚབ་ཆེན་པོར་གྱུར་ཡོད་པ་མ་ཟད།  རྒྱ་ནག་གཞུང་གིས་སོ་ཉུལ་བྱ་རྒྱུའི་མཚོན་པའི་རང་དབང་དང་གཞི་རྩའི་འགྲོ་བ་མིའི་ཐོབ་ཐང་ཐད་གླེང་སློང་བྱས་པ་ཡིན་ན་གང་བྱུང་འཛིན་བཟུང་དང་མནར་གཅོད་ཚད་མེད་གཏོང་བཞིན་ཡོད་སྟབས། ཚོང་ལས་ཁང་དེའི་ངོས་ནས་མཉེན་ཆས་ཕྱིར་བསྡུ་བྱ་རྒྱུ་ནི་ཐད་ཀར་རྒྱ་གཞུང་ལ་རོགས་འདེགས་བྱས་པ་ཙམ་དུ་མ་ཟད། རྒྱ་ནག་གཞུང་གིས་བོད་གཙོས་གཞན་རྒྱལ་ཁབ་ཁག་གི་རང་དབང་ལ་རྩིས་མེད་རྡོག་རོལ་གཏོང་བཞིན་པ་ལ་བློ་སྤོབས་སྤྲོད་པ་དང་གཅིག་མཚུངས་རེད་ཅེས་སྐྱོན་བརྗོད་གནང་འདུག    

ཟླ་བ་འདིའི་ཕྱི་ཚེས་༤ ཉིན་ NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྤོལ་མཐུན་ཚོགས་ཀྱི་ཚོགས་མི་ཡིན་པ་Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱིས་རང་ཉིད་ཀྱི་ Twitter དྲ་གནས་ཐོག་རང་དབང་འཐབ་རྩོད་གནང་དགོས།  ཧོང་ཀོང་མཉམ་དུ་ཡོད་ཞེས་ཧོང་ཀོང་མི་མང་གི་ཞི་བའི་ལས་འགུལ་ལ་རྒྱབ་སྐྱོར་ཡོད་པའི་ཚིག་བརྗོད་ཞིག་བརྒྱུད་སྤེལ་གནང་རྗེས་རྒྱ་ནག་གི་གཞུང་འབྲེལ་གྱི་ CCTV བརྙན་འཕྲིན་ལས་ཁང་དང་ tencent sports ཞེས་རྩེད་འགྲན་ཐད་གཏོང་བྱེད་མཁན་ཚོང་ལས་སྡེ་ཚན་སོགས་ཀྱིས་ NBA སིལ་སྤོལ་རྩེད་འགྲན་རྣམས་རྒྱ་ནག་ནང་རྒྱང་བསྲིང་བྱེད་རྒྱུ་ཕྱིར་འཐེན་བྱས་པ་མ་ཟད། རྒྱ་ནག་གཞུང་ངོས་ནས་ NBA སིལ་སྤོལ་མཐུན་ཚོགས་ལ་གནོན་ཤུགས་སྤྲད་དེ་སྐུ་ཞབས་ Morey ལགས་ལས་གནས་ནས་ཕྱིར་ཕུད་གཏོང་ཐབས་བྱས་ཡོད་པ་རེད་འདུག   དེའང་ཁ་སང་ NBA སིལ་སྤོལ་མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ Time གསར་ཁང་གི་བཅར་འདྲིའི་ལས་རིམ་ཞིག་གི་ཐོག་ད་བར་རྒྱ་ནག་གཞུང་དང་ཚོང་གི་སྡེ་ཚན་ཁག་ནས་NBA རྩེད་འགྲན་ཐོག་དམ་དྲག་བྱས་པ་དེས་དཔལ་འབྱོར་གྱི་ཡོང་འབབ་ཐོག་གྱོང་གུད་ཆེན་པོ་ཐེབས་པ་དང་། ལྷག་པར་དུ་ཉེ་ཆར་རྒྱ་ནག་གཞུང་དང་རྒྱ་ནག་གི་ཚོང་གི་སྡེ་ཚན་ཁག་ནས་ཧོང་ཀོང་གི་གནད་དོན་ལ་རྒྱབ་སྐྱོར་གནང་མཁན་སྐུ་ཞབས་ Daryl Morey ལགས་ Houston Rockets རུ་ཁག་གི་འགན་འཛིན་ལས་གནས་ནས་ཕྱིར་ཕུད་གཏོང་དགོས་པའི་དགོས་འདུན་བཏོན་ཡོད་པ་འགྲེལ་བརྗོད་དང་སྦྲགས། རྒྱ་ནག་གི་དགོས་འདུན་དེ་ནི་འགྲུབ་ཐབས་མེད་པ་ཞིག་ཡིན་པ་མ་ཟད། ང་ཚོ་NBA སིལ་སྤོལ་མཐུན་ཚོགས་ནས་སྐུ་ཞབས་ Daryl Morey ལགས་གཙོས་པའི་མི་སྒེར་རེ་རེའི་ཐོག་ལ་སྟངས་འཛིན་བྱེད་ཐབས་མེད་པའི་ལན་འདེབས་གནང་འདུག མ་ཟད་སྐུ་ཞབས་ Adam Silver ལགས་ནས་དེ་སྔ་གནད་དོན་དེ་ཐོག་མར་བྱུང་སྐབས། ངས་སྐུ་ཞབས་ Daryl Morey ལགས་ཀྱི་ཧོང་ཀོང་དང་འབྲེལ་བའི་ཚིག་བརྗོད་དེར་བློ་འགྱོད་ཡོད་སྐོར་བརྗོད་པ་དེ་ནི་རྒྱ་ནག་གཞུང་ལ་དགོངས་སེལ་ཞུས་པ་ཞིག་མིན་པ་དང་། དེ་ནི་གཙོ་བོ་NBA སིལ་སྤོལ་ལ་དགའ་ཞེན་ཆེ་བའི་རྒྱ་རིགས་མི་སེར་ཚོའི་སེམས་ཁམས་ལ་ཕོག་ཐུག་བྱུང་བར་བློ་འགྱོད་ཡོད་ཅེས་ཞུས་པ་ཡིན་ཞེས་གསལ་བཤད་གནང་བ་དང་ཆབས་ཅིག NBA སིལ་སྤོལ་མཐུན་ཚོགས་ཀྱི་ངོས་ནས་དེ་སྔ་གསལ་བཤད་བྱས་པ་ལྟར། སྐུ་ཞབས་ Daryl Morey ལགས་གཙོས་པའི་དེ་གའི་ཚོགས་མི་རྣམ་པའི་ཆབ་སྲིད་ཀྱི་ལངས་ཕྱོགས་ལ་གུས་བརྩི་དང་། ལྷག་པར་དུ་སྨྲ་བརྗོད་ཀྱི་རང་དབང་དེ་ནི་ཨ་མི་རི་ཀའི་ཐུན་མོང་མ་ཡིན་པའི་རིན་ཐང་ཞིག་ཡིན་སྟབས། དེ་ལ་ང་ཚོས་བརྩི་སྲུང་མུ་མཐུད་བྱེད་རྒྱུ་ཡིན་ཞེས་གསུངས་འདུག གཞི་རྩའི་ Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱི་ཧོང་ཀོང་དང་འབྲེལ་བའི་ཚིག་བརྗོད་དེ་སྤེལ་བ་ནས་བཟུང་རྒྱ་ནག་དང་ NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྤོལ་མཐུན་ཚོགས་དབར་གྱི་འབྲེལ་ལམ་ལ་དོ་ཕོག་ཆེན་པོ་ཐེབས་པ་མ་ཟད། ད་ལྟའི་ཆར་ NBA སིལ་སྤོལ་རྩེད་འགྲན་རྣམས་རྒྱ་ནག་ནང་རྒྱང་བསྲིང་བྱེད་རྒྱུ་བཀག་སྡོམ་བྱེད་བཞིན་ཡོད་པ་དང་། ཉིན་ཤས་གོང་ཨ་རིའི་ནང་ཚོགས་པའི་རྩེད་འགྲེན་ཁག་ཅིག་གི་ཐོག་ལ་བོད་མི་དང་། བོད་དོན་རྒྱབ་སྐྱོར་བ། དེ་བཞིན་ཧོང་ཀོང་མི་མང་གི་ལས་འགུལ་ལ་རྒྱབ་སྐྱོར་གནང་མཁན་སོགས་ནས་བོད་རང་བཙན་དང་། བོད་དང་ཧོང་ཀོང་ལ་རང་དབང་དགོས་སོགས་འཁོད་པའི་ཤོག་བྱང་དང་བོད་ཀྱི་རྒྱལ་དར་སོགས་འཕྱར་ཏེ་རྒྱ་ནག་གཞུང་ལ་ངོ་རྒོལ་དང་། ཨ་རིའི་རྒྱལ་ཡོངས་སིལ་སྤོལ་མཐུན་ཚོགས་ནས་རྒྱ་ནག་འོག་མགོ་བོ་སྒུར་རྒྱུ་མེད་པ་སོགས་ཀྱི་དགོས་འདུན་བཏོན་པའི་གནས་སྟངས་སོགས་ཀྱང་བྱུང་ཡོད། ད་རེས་ NBA སིལ་སྤོལ་མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་རྒྱ་ནག་གི་དགོས་འདུན་ལ་ངོས་བཞེས་གནང་མེད་སྟབས། ཨ་མི་རི་ཀའི་གྲོས་ཚོགས་གོང་མའི་འཐུས་མི་སྐུ་ཞབས་ Ben Sasse ལགས་ནས་བསྒྲགས་གཏམ་ཞིག་སྤེལ་ཏེ། རྒྱ་ནག་གཞུང་གི་དུས་རྟག་ཏུ་ཨ་མི་རི་ཀའི་མི་སེར་ཞིག་གི་འགྲོ་བ་མིའི་ཐོབ་ཐང་གི་གནད་དོན་ལ་རྒྱབ་སྐྱོར་བྱས་ན་མི་དེ་ལས་གནས་ནས་ཕྱིར་ཕུད་གཏོང་དགོས་པའི་དགོས་འདུན་བཏོན་པ་དང་། དེ་བཞིན་རྒྱ་ནག་གི་མི་སེར་ཞིག་ནས་འགྲོ་བ་མིའི་ཐོབ་ཐང་གི་གནད་དོན་སྐོར་གླེང་སློང་བྱས་ཚེ། དེ་མ་ཐག་བཙན་ཁྲིད་བྱས་ཏེ་གར་སོང་ཆ་མེད་དུ་འགྲོ་བཞིན་པར་འགྲེལ་བརྗོད་དང་སྦྲགས། ད་རེས་སྐུ་ཞབས་ Adam Silver ལགས་ཀྱི་རྒྱ་ནག་གི་དགོས་འདུན་ཁག་ངོས་བཞེས་མ་གནང་བའི་ཐག་གཅོད་དེར་བསྔགས་བརྗོད་གནང་འདུག

རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བ་ནས་བསླབ་མཐར་སོན་པ་པའི་མཐོ་རིམ་སློབ་མ་རྣམས་ས་གནས་སྒྲིག་འཛུགས་ཁག་གི་ནང་དུ་ལས་ཀའི་གོ་སྐབས་ནང་མཉམ་ཞུགས་གནང་བར་༸གོང་ས་མཆོག་ལ་མཚན་སྨད་ཞུ་དགོས་པ་མ་ཟད་རྒྱ་ནག་དམར་ཤོག་ཚོགས་པའི་ཆབ་སྲིད་ཀྱི་རྩ་འཛིན་དང་འབྲེལ་བའི་ལྟ་སྤྱོད་གསལ་པོ་དང་བརྟན་པོ་དགོས་པའི་ཆ་རྐྱེན་ཆེད་བཏོན་བྱས་འདུག ཁ་སང་ཕྱི་ཟླ་ ༡༠ ཚེས་ ༡༦ ཉིན་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གཞུང་ནས་བོད་རང་སྐྱོང་ལྗོངས་ཟེར་བ་ནས་བསླབ་མཐར་སོན་པའི་མཐོ་རིམ་སློབ་མ་རྣམས་ཀྱི་ཆེད་དུ་སྤྱི་ཚོགས་སྒྲིག་འཛུགས་ཁག་གི་ནང་དུ་ལས་ཀའི་ས་མིག་༡༠༠༠ གསལ་བསྒྲགས་བྱས་ཡོད་པ་དང་། བོད་རིགས་སློབ་མ་ཚོས་ལས་ཀའི་ཚུད་རྒྱུགས་ཀྱི་ནང་དུ་མཉམ་ཞུགས་མ་གནང་གོང་དུ་རྒྱ་ནག་དམར་ཤོག་ཚོགས་པའི་ལངས་ཕྱོགས་ཁ་གསལ་དང་འགོ་ཁྲིད་ཚོར་རྒྱབ་སྐྱོར་བྱེད་དགོས་པ་མ་ཟད་ཁ་བྲལ་བར་ངོ་རྒོལ་དང་༸གོང་ས་༸སྐྱབས་མགོན་ཆེན་པོ་མཆོག་ལ་སྐྱོན་བརྗོད་ཀྱིས་མཚན་སྨད་ཞུ་པ་སོགས་ཀྱི་ཆ་རྐྱེན་ཆེད་བཏོན་བྱས་ཡོད་པ་བཀོད་འདུག རྒྱལ་སྤྱིའི་བོད་དོན་ལས་འགུལ་ཁང་གིས་བོད་རང་སྐྱོང་ལྗོངས་ཀྱི་ལས་ཀའི་མ་སིག་གསལ་བསྒྲགས་ནང་གསལ་ཆ་རྐྱེན་ཁག་ནི་རྒྱ་ནག་སྤྱིའི་ལས་ཀའི་ས་མིག་གི་ཆ་རྐྱེན་ལས་ཆེས་དམ་དྲག་ཆེ་བ་ཡོད་པ་དང་དེ་ནི་དཔུང་ཤུགས་ཀྱི་ལམ་ནས་རྒྱ་ནག་གཞུང་ལ་དགའ་ཞེན་ཡོད་ཚུལ་གྱི་རྣམ་པ་བསྟན་དུ་བཅུག་པའི་མི་རིགས་དབྱེ་འབྱེད་དང་འགྲོ་བ་མིའི་ཐོབ་ཐང་དང་ཡོངས་སུ་འགལ་བ་ཞིག་ཡིན་པར་སྐྱོན་བརྗོད་གནང་འདུག བོད་རང་སྐྱོང་ལྗོངས་ནང་གི་ལས་ཀའི་ས་མིག་དང་འབྲེལ་བའི་གསལ་བསྒྲགས་དེའི་ནང་གསལ་བར་བོད་རིགས་ཚོ་ལས་ཀའི་ནང་མཉམ་ཞུགས་མ་གནང་གོང་ཆབ་སྲིད་དང་འབྲེལ་བའི་ཞིབ་གཅོད་དང་ཤེས་ཚད་ཞིབ་གཅོད། དེ་བཞིན་ས་གནས་ཉེན་རྟོག་པས་ཞིབ་གཅོད་སོགས་ལ་ཆས་དགོས་ཀྱི་ཡོད་པ་མ་ཟད། People’s Social Welfare Department ཞེས་མི་མང་བདེ་འཇགས་ཚན་པས་ཞིབ་གཅོད་ཟིན་པའི་འགེང་ཤོག་གི་སྟེང་དུ་ཐམ་ཀ་བཀོད་པ་དགོས་ཀྱི་ཡོད་པ་དང་རྒྱ་གཞུང་གི་ལྟ་སྤྱོད་ལ་གུས་བརྩི་མེད་པ་དང་སྤྱི་ཚོགས་དྲྭ་ལམ་བརྒྱུད་འཆལ་གཏམ་རིགས་ཁྱབ་སྤེལ་བྱས་པ་སོགས་མངོན་གསལ་བྱུང་ཚེ་ལས་ཀའི་གོ་སྐབས་རག་ཐབས་མེད་སྐོར་ཁ་གསལ་ཀོད་ཡོད་པ་རེད་འདུག རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་ཀྱིས་༸གོང་ས་མཆོག་ལ་མཚན་སྨད་ཞུ་དགོས་ཟེར་བ་དང་ལས་ཀའི་ཆེད་དུ་ཞིབ་གཅོད་སྣ་ཚོགས་བྱེད་དགོས་པ་ནི་རྒྱ་གཞུང་གིས་གཞིས་བཞུགས་བོད་མི་རྣམས་ལ་དབྱེ་འབྱེད་དང་། མཐོང་ཆུང་། དེ་བཞིན་གཞི་རྩའི་འགྲོ་བ་མིའི་ཐོབ་ཐང་། བསམ་སྤྱོད་ཀྱི་རང་དབང་དང་ཆོས་དད་ཀྱི་རང་དབང་སོགས་དང་ཡོངས་སུ་འགལ་བ་ཞིག་ཡིན་པར་སྐྱོན་བརྗོད་གནང་བ་དང་འབྲེལ་ཏེ་བོད་མིའི་ངོས་ནས་རྒྱ་ནག་ལ་འགོག་རྒོལ་གྱི་རྣམ་པ་མཁྲེགས་ཏུ་གཏང་ངེས་ཡིན་པ་གསུངས་འདུག རྩ་བའི་ཐེངས་འདིའི་བོད་རང་སྐྱོང་ལྗོངས་ཟེར་བའི་ལས་ཀའི་ས་མིག་གི་གསལ་བསྒྲགས་སྤེལ་བའི་ནང་ཁྱོན་ས་མིག་ ༡༠༠༠ ཡོད་པ་དང་། དེའི་ནང་ནས་ཤེས་ཡོན་དང་འབྲེལ་བའི་ས་མིག་ ༦༠༠ ས་གནས་རིམ་པའི་ཚན་པ་ཁག་གི་ནང་ས་མིག་ ༢༥༠ དེ་བཞིན་རྫོང་རིམ་པའི་ཚན་པ་དང་འབྲེལ་བའི་ས་མིག་ ༡༥༠ བཅས་གསལ་བསྒྲགས་བྱས་ཡོད་པ་རེད།

བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་དེ་རིང་ Puzhal དབུས་བཙོན་ཁང་ནས་གློད་བཀྲོལ་བཏང་བ་དང་གཟའ་འཁོར་སྔོན་མར་རྒྱ་གར་ལྷོ་ཕྱོགས་ Mamallapuram གྲོང་ཁྱེར་ནང་རྒྱ་དཀར་ནག་གཉིས་ཀྱི་དབུ་ཁྲིད་དབར་ཆེས་མཐོའི་ནང་མོལ་ལྷན་འཛོམས་གནང་བའི་སྔ་རོལ་དུ་རྒྱ་གར་ཉེན་རྟོག་པས་བོད་མི་ཁྱོན་ ༤༠ ལྷག་ཙམ་སྔ་རྗེས་སུ་འཛིན་བཟུང་བྱས་པ་ཡོངས་རྫོགས་གློད་བཀྲོལ་ཟིན་འདུག དེའང་ཉེ་ལམ་ཟླ་བ་འདིའི་ཚེས་ ༡༢ དང་ ༡༣ བཅས་ཉིན་གཉིས་ཀྱི་རིང་རྒྱ་གར་གྱི་ལྷོ་ཕྱོགས་Tamil Nadu མངའ་སྡེའི་གྲོང་ཁྱེར་ Mamallapuram ནང་རྒྱ་གར་གྱི་སྲིད་བློན་ Narendra Modi དང་རྒྱ་ནག་གི་སྲིད་འཛིན་ Xi Jinping གཉིས་དབར་ Sino-Indo summit ཞེས་ལོ་རྒྱུས་ཀྱི་རང་བཞིན་ལྡན་པའི་ཆེས་མཐོའི་ནང་མོལ་ཚང་འཛོམས་གནང་བའི་ཉིན་ཤས་ཀྱི་སྔ་རོལ་དུ་ཞི་ཅིན་ཕིང་ལ་ངོ་རྒོལ་བྱ་སྲིད་པའི་དོགས་གཞིའི་འོག་མངའ་སྡེའི་ཉེན་རྟོག་པས་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་དང། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ། དེ་བཞིན་བོད་རང་བཙན་སློབ་ཕྲུག་ཚོགས་པའི་རིག་འཛིན་ཆོས་སྒྲོན་ལགས་བཅས་ཀྱིས་གཙོས་པའི་བོད་པའི་སློབ་མ་དང་ལས་འགུལ་བ་ཁྱོན་བོད་མི་ ༤༠ ལྷག་ཙམ་སྔ་རྗེས་སུ་འཛིན་བཟུང་གིས་ཁག་གཅིག་ Chennai གྲོང་ཁྱེར་གྱི་བཙོན་ཁང་དང་ཁ་ཤས་ Puzhal དབུས་བཙོན་ཁང་དུ་བཀག་བསྐྱིལ་བྱས་ཡོད་པ་རེད། ཤེས་རྟོགས་བྱུང་བར་གཞིགས་ན་རྒྱ་གར་ཉེན་རྟོག་པས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོས་གཙོས་པའི་ལས་འགུལ་བ་ ༢༥ རེས་གཟའ་ཉི་མའི་ཉིན་གློད་བཀྲོལ་བཏང་ཡོད་པ་ལྟར། སྦེང་ལོར་དང་ལྡི་ལི་ནས་ཡིན་པའི་ལས་འགུལ་བ་ ༡༦ རང་གནས་སུ་ཕྱིར་ལོག་ཟིན་པ་དང་ཁ་སང་ནས་དེ་རིང་བར་ Puzhal དབུས་བཙོན་ཁང་ནས་བསྟན་འཛིན་བརྩོན་འགྲུས་ལགས་གཙོ་གྱུར་ལས་འགུལ་བ་ ༡༤ ཡོད་པ་ཚང་མ་གློད་བཀྲོལ་ཟིན་པ་དེ་ལྟར་ཡང་། ཁོང་རྣམས་པ་ད་ལྟའི་ཆར་ Chennai ནས་ཉིན་བཅོ་ལྔ་རིང་ཕྱིར་ལོག་གནང་ཆོག་གི་མེད་པ་རེད་འདུག བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་སུ་རྒྱ་དཀར་ནག་གཉིས་དབར་གྱི་དབུ་ཁྲིད་རྣམ་པའི་མཇལ་འཕྲད་མ་གནང་གོང་དུ་ཁོང་ཉེན་རྟོག་པས་འཛིན་བཟུང་བྱས་པ་དེའི་ཐོག་ཚོར་སྣང་ཇི་བྱུང་བཀའ་འདྲི་ཞུས་པར་ ཁོང་གིས་ད་རེས་རྒྱ་གར་གྱིས་བོད་མིའི་ལས་འགུལ་བར་དམ་དྲག་དེ་ལྟར་གནང་བ་དེས་རྒྱ་གར་རྒྱལ་ཁབ་ནས་མང་གཙོའི་ལམ་ལུགས་དང་དེའི་ཐོབ་ཐང་ཁག་ལ་རྩིས་མེད་གནང་བ་ཞིག་ཆགས་ཡོད་སྐོར་གསུངས་སོང་། རྩ་བའི་རྒྱ་གར་གྱི་ཉེན་རྟོག་པས་རྒྱ་དཀར་ནག་གཉིས་ཀྱི་དབུ་ཁྲིད་གཉིས་དབར་མཇལ་འཕྲད་སྐབས་ཞི་ཅིན་ཕིང་ལ་ངོ་རྒོལ་བྱ་སྲིད་པའི་དོགས་གཞིའི་འོག་བོད་མི་ལས་འགུལ་བ་དང་སློབ་ཕྲུག་དེ་དག་ཉིན་ཤས་སྔོན་ནས་འཛིན་བཟུང་བཙོན་འཇུག་བྱས་པར་བརྟེན། བོད་མི་དང་བོད་དོན་རྒྱབ་སྐྱོར་བ། དེ་བཞིན་དཔྱད་ཞིབ་པ་མང་དག་ཅིག་གིས་དེའི་ཐོག་ཐུགས་འཚབ་ཆེན་པོ་ཡོད་པའི་རྣམ་པ་ཆེད་བཏོན་གནང་བ་མ་ཟད་ཕྱི་ཚེས་ ༡༠ ཉིན་མ་རྡ་ར་སི་གཙུག་ལག་སློབ་གཉེར་ཁང་གི་རྒྱལ་སྤྱིའི་འབྲེལ་ལམ་སྡེ་ཚན་གྱི་རྒྱ་གར་སློབ་ཕྲུག་ ༢༠ ཙམ་གྱིས་མཐོ་སློབ་དེའི་ Chepauk Campus དུ་ང་ཚོ་བོད་པའི་སློབ་ཕྲུག་ཚོ་དང་མཉམ་དུ་ཡོད་ཅེས་པའི་འབོད་ཚིག་འཁོད་པའི་ཤོག་བྱང་བསྣམས་ཏེ་རྒྱ་གར་ཉེན་རྟོག་པས་ཁོང་རྣམས་འཛིན་བཀག་བསྐྱིལ་དང་བསུན་བརྩེར་བྱས་པར་གདུང་སེམས་མཉམ་བསྐྱེད་ཀྱི་ལས་འགུལ་ཡང་སྤེལ་ཡོད་པ་རེད།

ཁ་སང་ཨ་རིའི་གྲོས་ཚོགས་འོག་ནང་སྤྱི་མོས་ཀྱི་ཐོག་ནས་ཧོང་ཀོང་ནང་གི་འགྲོ་བ་མིའི་ཐོབ་ཐང་དང་མང་གཙོ་ཞེས་པའི་ཁྲིམས་འཆར་གཏན་འབེབས་གནང་ཡོད་པ་དང་། གྲོས་ཚོགས་གོང་མས་ཀྱང་ཁྲིམས་གཞི་དེར་ངོས་བཞེས་གནང་ཐུབ་ཚེ་ཁྲིམས་འཆར་དེ་བརྒྱུད་ནས་ཨ་རིས་ལོ་ལྟར་ཧོང་ཀོང་ནང་གི་འགྲོ་བ་མིའི་ཐོབ་ཐང་ལ་བསྐྱར་ཞིབ་བྱས་ཏེ་རྒྱ་ནག་གིས་ཁུལ་དེའི་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་སྒྱུར་ལ་རྡོག་རོལ་གཏོང་གི་ཡོད་པ་ར་སྤྲོད་བྱུང་ཚེ་ད་ལྟའི་ཆར་ཧོང་ཀོང་དང་ཨ་རི་གཉིས་ཀྱི་བར་དུ་ཡོད་པའི་ཚོང་གི་འབྲེལ་ལམ་དམིགས་བསལ་བ་དེ་མཚམས་འཇོག་བྱེད་རྒྱུ་ཡིན་པ་རེད། གསར་ཁང་ཁག་གིས་ཨ་རིའི་གྲས་ཚོགས་གོང་མས་ཀྱང་ཁྲིམས་གཞི་དེ་གཏན་འབེབས་གནང་བ་ཡིན་ན་ཨ་རིའི་ཕྱི་སྲིད་ལྷན་ཁང་གི་ངོས་ནས་ལོ་རྟག་པར་ཧོང་ཀོང་དེ་རྒྱ་ནག་གི་སྟངས་འཛིན་འོག་ནས་རང་སྐྱོང་ཚད་ལྡན་ཞིག་ཡོང་གི་ཡོད་མེད་ཀྱི་སྙན་ཐོ་ཞིག་ཨ་རིའི་གྲོས་ཚོགས་ལ་འབུལ་དགོས་པ་མ་ཟད། རྒྱ་ནག་གིས་ཧོང་ཀོང་ནང་གི་སྤྱི་མང་གི་ཐོབ་ཐང་དང་ཁྲིམས་ཀྱི་སྟངས་འཛིན་རྣམས་ལ་གཏོར་རྒོལ་གཏོང་གི་ཡོད་མེད་སོགས་ཀྱི་ཐད་ནས་དུས་ལྟར་བསྐྱར་ཞིབ་བྱེད་དགོས་ལུགས་འཁོད་འདུག  ཁྲིམས་གཞི་དེ་དང་འབྲེལ་ནས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ཀྱིས་ཐེངས་འདིའི་ཧོང་ཀོང་གི་འགྲོ་བ་མིའི་ཐོབ་ཐང་དང་མང་གཙོའི་ཁྲིམས་གཞི་དེའི་དམིགས་འདུན་ནི་རྒྱ་ནག་གི་རྒྱལ་ཁབ་གཅིག་དང་ལམ་ལུགས་གཉིས་ཀྱི་སྲིད་བྱུས་ཀྱི་འོག་ཏུ་ཧོང་ཀོང་མི་མང་སྤྱི་ལ་འགྲོ་བ་མིའི་ཐོབ་ཐང་ཚད་ལྡན་ཞིག་རག་རྒྱུའི་དམིགས་འབེན་ཡིན་པར་འགྲེལ་བརྗོད་གནང་འདུག འོན་ཀྱང་ཧོང་ཀོང་གི་སྤྱི་ཁྱབ་པ་ལྕམ་ Carrie Lam ཨ་རིའི་ཁྲིམས་གཞི་དེ་ནི་གྲོང་ཁྱེར་གྱི་ནང་ཁུལ་གྱི་བྱ་བཞག་ལ་ཐེ་གཏོགས་བྱས་པ་ཞིག་ཡིན་ཚུལ་འགྲེལ་བརྗོད་བྱས་ཡོད་ནའང་། ཧོང་ཀོང་གི་མང་གཙོ་དོན་གཉེར་གྱི་ལས་འགུལ་བ་སྐུ་ཞབས་ Joshua Wong ལགས་ཀྱིས་ཧོང་ཀོང་གི་ཡུལ་མི་ས་ཡ་ལྷག་གིས་ཁྲོམ་གཞུང་དུ་རྒྱ་ནག་གི་ཉེས་ཅན་རྩིས་སྤྲོད་ཀྱི་ཁྲིམས་འཆར་དེར་ངོ་རྒོལ་བྱས་བ་བརྒྱུད་ནས་མི་མང་གིས་ཨ་རིའི་རྒྱལ་གླུ་བླངས་ཏེ་རྒྱལ་དར་འཕྱར་ཡོད་པ་ངོ་སྤྲོད་བྱས་ཏེ་ཨ་རིའི་ཐེངས་འདིའི་འགྲོ་བ་མིའི་ཐོབ་ཐང་དང་མང་གཙོ་ཡི་ཁྲིམས་གཞི་དེས་ཧོང་ཀོང་གི་མང་གཙོ་ལ་སྲུང་སྐྱོབ་ཐུབ་ཐབས་ཀྱི་སྐོར་ནས་ངོ་སྤྲོད་བྱས་འདུག དེ་བཞིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་གིས་ཨ་རིའི་ངོས་ནས་རང་གི་ཚོང་དོན་གྱི་ཁེ་དབང་ལ་བལྟས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཀྱི་སྐོར་ནས་སྐད་ཆ་མ་བཤད་པ་ཡིན། ཨ་རིའི་ངོས་ནས་འཛམ་གླིང་ནང་གི་ས་ཆ་གང་དུ་ཡང་སྐད་ཆ་བཤད་རྒྱུའི་ཀུན་སྤྱོད་ཀྱི་ཁེ་དབང་ཡོངས་སུ་བརླག་པ་ཞིག་རེད་ཅེས་བརྗོད་དེ་ཨ་རིས་ངེས་པར་དུ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཀྱི་སྐོར་ལ་བཀའ་མོལ་གནང་དགོས་པ་གསུངས་འདུག རྩ་བའི་འདི་ལོའི་སྤྱི་ཟླ་དྲུག་པ་ནས་བཟུང་རྒྱ་ནག་གིས་ཧོང་ཀོང་ནང་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་ཞིག་གཏན་འབེབས་བྱེད་རྩིས་ཀྱིས་མི་མང་ས་ཡ་མང་པོས་སྲིད་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ་ལྟར།   ཐེངས་འདིའི་ཧོང་ཀོང་ནང་གི་མང་གཙོ་དང་འགྲོ་བ་མིའི་ཐོབ་ཐང་གི་ཁྲིམས་འཆར་དེ་ནི་འདི་ལོ་སྤྱི་ཟླ་དྲུག་པའི་ནང་དུ་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་དང་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ ChrisSmith ལགས་གཉིས་ཀྱིས་ངོ་སྤྲོད་གནང་བ་ཞིག་རེད་འདུག

དེ་རིང་གསར་ལམ་ཁག་ཏུ་གནས་ཚུལ་ཐོན་པར་ཨོ་གླིང་གི་ Queensland མངའ་སྡེ་ནང་གི་ Brisbane གྲོང་ཁྱེར་གྱི་རྒྱ་ནག་གཞུང་ཚབ་ཁང་གི་ཡན་ལག་ལས་ཁུངས་ཀྱི་སྐུ་ཚབ་པ་  Dr Xu Jie ཟེར་བ་ཞིག་གིས་སྤྱི་ཚོགས་དྲྭ་རྒྱ་འདྲ་མིན་གྱི་སྟེང་དུ་རྒྱ་ནག་ལ་ངོ་རྒོལ་བྱེད་མཁན་གྱི་སློབ་ཕྲུག་ཅིག་གི་མིང་འདོན་བྱས་ཏེ་སློབ་ཕྲུག་དེའི་རྒྱལ་ཁབ་བྲལ་གྱི་ལས་འགུལ་རྩོམ་གྱི་ཡོད་པ་བརྗོད་ཡོད་སྟབས་སློབ་ཕྲུག་དེས་ཁོང་གི་ཚེ་སྲོག་ལ་འཇིགས་སྐུལ་བྱས་ཡོད་པའི་མིང་ཐོག་ནས་རྒྱ་ནག་གི་གཞུང་ཚབ་པ་དེར་ཁྲིམས་གཏུག་བྱས་འདུག ཨོ་གླིང་གི་མངའ་སྡེ་ Queensland  ཡི་གཙུག་ལག་སློབ་ཁང་གི་སློབ་མའི་མཐུན་ཚོགས་ཀྱི་སྐུ་ཚབ་ Drew Pavlou ལགས་ཀྱིས་ཧོང་གོང་གི་མང་གཙོའི་ལས་འགུལ་ལ་རྒྱབ་སྐྱོར་གྱིས་ཁུལ་དེར་རྒྱ་ནག་གི་དབང་ཤུགས་དང་དྲག་གནོན་ལ་ངོ་རྒོལ་གྱི་ལས་འགུལ་ཅིག་གོ་སྒྲིག་བྱས་པ་བརྒྱུད་ནས་ཁོང་ལ་འཇིགས་སྐུལ་བྱེད་མཁན་མང་པོ་བྱུང་ཡོད་པ་དང་། ལྷག་དོན་རྒྱ་ནག་གི་གཞུང་ཚབ་ཀྱི་དྲུང་ཆེ་ Dr Xu Jie ལགས་ཀྱིས་སློབ་ཕྲུག་ Drew Pavlou ལགས་ནི་རྒྱ་ནག་ལ་ངོ་རྒོལ་གྱི་སྐུལ་སློང་བྱེད་མཁན་ཡིན་པར་ཁྱབ་བསྒྲགས་བྱས་པ་དང་མཉམ་དུ་རྒྱ་ནག་གི་སློབ་ཕྲུག་མང་པོས་ཁོང་ལ་འཇིགས་སྐུལ་རབས་དང་རིམ་པ་བྱས་པར་བརྟེན་ཁོང་གིས་ Dr Xu Jie ལགས་ཀྱིས་ཁོང་ནི་ཁ་བྲལ་གྱི་བྱ་བ་རྩོམ་མཁན་གྱི་གཏེ་བོ་ཡིན་པར་བསྒྲགས་ནས་ཁོང་གི་འཇུགས་སྐུལ་བྱས་ཡོད་པའི་ཐད་ནས་ཁྲིམས་གཏུག་བྱས་ཏེ་རྒྱ་ནག་གི་གཞུང་ཚབ་པས་འཕྲལ་དུ་ཁོང་ལ་དགོངས་དག་ཞུ་དགོས་པ་མ་ཟད་སྤྱི་ཚོགས་དྲྭ་ལམ་དུ་སྤེལ་བའི་གནས་ཚུལ་དེ་དག་ཕྱིར་བསྡུ་བྱས་ནས་རྗེས་ཕྱོགས་ནས་ངལ་སྐུལ་གྱི་བྱ་བར་མི་ཞུགས་རྒྱུའི་དམ་བཅའ་འཇོག་དགོས་ལུགས་ཀྱི་དགོས་འདུན་བཏོན་འདུག སློབ་ཕྲུག་ Drew Pavlou ལགས་ཀྱིས་ཁྲིམས་གཏུག་གྱི་ཞུ་ཡིག་ནང་དུ་རྒྱ་ནག་གི་གཞུང་ཚབ་ཁང་གི་ཡན་ལག་ལས་ཁུངས་ཀྱི་སྐུ་ཚབ་ Dr Xu Jie ལགས་ཀྱིས་རྒྱ་ནག་གི་གཞུང་འབྲེལ་གྱི་དྲྭ་རྒྱ་ Global Times ཞེས་པ་དང་དེ་བཞིན་ཨོ་གླིང་ནང་དུ་རྟེན་གཞི་བྱས་པའི་རྒྱ་ནག་གི་རྒྱ་ཡིག་གི་དྲྭ་རྒྱ་སོགས་སུ་ཁོང་མིང་འདོན་བྱས་ནས་རྒྱ་ནག་ལ་ངོ་རྒོལ་བྱེད་མཁན་གྱི་གཙོ་བོ་ཞིག་ཡིན་པར་འགྲེལ་བརྗོད་བྱས་ཡོད་སྟབས་ད་ཆ་ཁོང་གི་ཚེ་སྲིག་དེ་ཉེན་ཁ་ཆེ་བའི་གནས་སུ་ལྷུང་ཡོད་པར་འགྲེལ་བརྗོད་ཀྱིས་ཁོང་ཐེངས་གཉིས་ལ་རྒྱ་ནག་གི་རྒྱབ་སྐྱོར་བས་དཔུང་འཇུག་གིས་རྒོལ་རྡུང་བྱས་ཡོད་པས་ཁྲིམས་གཏུག་མི་བྱེད་ཐབས་མེད་དུ་གྱུར་ཡོད་སྐོར་འགྲེལ་བརྗོད་བྱས་འདུག Drew Pavlou ལགས་ཀྱིས་ཨོ་གླིང་གི་  Sydney Morning Herald and The Age ཞེས་པའི་གསར་ཁང་ལ་ད་ཆ་ཁོང་གི་མི་ཚེ་དེ་ཉེན་ཁ་ཆེ་བའི་གནས་སུ་ལྷུང་ཡོད་པར་འགྲེལ་བརྗོད་ཀྱིས་ཁོང་གི་ཕ་མ་གཉིས་ཀྱིས་གནས་ཚུལ་དེ་ཆེ་རུ་མི་འགྲོ་བའི་ཆེད་དུ་གནས་སྐབས་སུ་ཁོང་ཕྱི་ལོག་ཅིག་ལ་སོང་ནས་ཁུ་སིམ་མེར་སྡོད་རྒྱུའི་རེ་བ་རྒྱག་གི་ཡོད་ནའང་། ངས་དེ་ལས་ལྡོག་ཏེ་གནས་ཚུལ་འདིའི་ཐད་ནས་སྐད་ཆ་བཤད་དགོས་བའི་དུས་ལ་བབ་ཡོད་པར་མཐོང་གི་ཡོད་པར་བརྗོད་འདུག ཁོང་གི་ཁྲིམས་རྩོད་པ་སྐུ་ཞབས་ Tarrant ལགས་ཀྱིས་རྒྱ་ནག་གི་ཁྲིམས་ཡིག་གི་ནང་དུ་ཁ་བྲལ་གྱི་ལས་འགུལ་ནི་ཉེན་ཚབ་ཆེ་བའི་ནག་ཉེས་ཀྱི་གནད་དོན་ཞིག་ཡིན་པར་འགྲེལ་བརྗོད་བྱས་ཡོད་སྟབས་རྒྱ་ནག་གི་གཞུང་ཚབ་པ་ Dr Xu Jie ལགས་ཀྱིས་ཁྲིམས་ཁང་ནང་གནས་ཚུལ་དེ་ཁུངས་སྐྱེལ་བྱེད་དགོས་པར་བརྗོད་དེ་རྒྱ་ནག་གི་གཞུང་ཚབ་པ་དེ་ཟླ་བ་རྗེས་མའི་ཚེས་ ༢༢ ཉིན་ཁྲིམས་ཁང་དུ་ཡོང་དགོས་ལུགས་བརྗོད་འདུག རྩ་བའི་རང་ལོ་ ༢༠ ཡིན་པའི་སློབ་ཕྲུག་ Pavlou ལགས་ནི་དུས་རྒྱུན་ནས་རྒྱ་ནག་སྲིད་གཞུང་ལ་སྐྱོན་བརྗོད་བྱེད་མཁན་ཞིག་ཡིན་པ་མ་ཟད། ཁོང་གིས་སྔོན་ཆད་ཀྱང་གཙུག་ལག་སློབ་ཁང་དེར་རྒྱ་ནག་གི་ཁུང་ཙི་སློབ་གཉེར་ཁང་སྒོ་རྒྱག་དགོས་པའི་འབོད་ཚིག་གི་འོག་ནས་རྒྱ་ནག་ལ་ངོ་རྒོལ་གྱི་ལས་འགུལ་གོ་སྒྲིག་བྱས་ཡོད་པ་མ་ཟད་གཙུག་ལག་སློབ་དེའི་ཉེ་བའི་རིགས་བདག་གཞོན་པ་སྐུ་ཞབས་ Peter Hoj མི་སྒེར་གྱི་ཐོག་ནས་རྒྱ་ནག་སྲིད་གཞུང་ལ་འབྲེལ་བ་ཆེན་པོ་ཡོད་པར་དུས་རྒྱུན་ནས་སྐྱོན་བརྗོད་ཚ་ནན་བྱེད་མཁན་ཞིག་རེད་འདུག ཐེངས་འདིའི་གནད་དོན་དེ་བརྒྱུད་ནས་གཙུག་ལག་ཁང་གཞན་ཁག་ཏུ་ཡང་རྒྱལ་སྤྱིའི་ནང་རྒྱ་ནག་གི་དབང་ཤུགས་ཆེ་རུ་འགྲོ་བཞིན་པའི་ཐད་ལ་གླེང་སློང་བྱེད་མཁན་ཇེ་མང་དུ་འགྲོ་བཞིན་ཡོད་པ་རེད།

ཁ་སྔོན་རེས་གཟའ་སྤེན་པའི་ཉིན་རྒྱ་གར་གྱི་ Strategic News International ཞེས་པའི་གསར་ཁང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་བོད་རྒྱ་གཉིས་ཀྱི་གནད་དོན་དང་༸སྐུའི་ཡང་སྲིད། ༸པཎ་ཆེན་རིན་པོ་ཆེ་མཆོག་སོགས་གནད་དོན་འདྲ་མིན་ཐོག་བཀའ་འདྲི་ཞུས་པའི་སྐར་མ་ ༡༧༌༥༦ ཡོད་པའི་གླེང་མོལ་གྱི་ལས་རིམ་རྒྱང་བསྲིངས་ཞུས་འདུག་པ་དང་། དེའི་ནང་སྲིད་སྐྱོང་མཆོག་གིས་རྒྱ་ནག་དམར་ཤོག་ཚོགས་པས་ལོ་ངོ་ ༦༠ རིང་བོད་བཙན་བཟུང་བྱས་ཡོད་་ཀྱང་ད་བར་དོན་ཕན་ལྡན་པའི་གྲུབ་འབྲས་ཅི་ཡང་སོན་མེད་པ་རྒྱ་ནག་གི་སྲིད་འཛིན་ཞི་ཅིན་ཕིང་ནས་ཤེས་དགོས་པ་གསུངས་འདུག གསར་ཁང་གི་རྩོམ་སྒྲིག་པ་གཞོན་པ་ Parul Chandra ལགས་ཀྱིས་ཞི་ཅིན་ཕིང་དང་རྒྱ་གར་གྱི་སྲིད་བློན་ནཱ་རེནྡྲ་མོ་དཱི་མཆོག་གི་ནང་མོལ་མཇལ་འཕྲད་གཉིས་པ་དང་འབྲེལ། གལ་ཏེ་སྲིད་སྐྱོང་མཆོག་ལ་ཞི་ཅིན་ཕིང་དང་མཇལ་འཕྲད་གནང་རྒྱུ་བྱུང་ཚེ་བོད་དོན་གྱི་གནད་དོན་གང་གླེང་འཆར་ཡོད་དམ་ཞེས་བཀའ་འདྲི་ཞུས་པར་སྲིད་སྐྱོང་མཆོག་གིས་རྒྱ་ནག་གིས་བོད་བཙན་འཛུལ་བྱས་ནས་ད་བར་མི་ལོ་ ༦༠ འགྲོ་བཞིན་པ་དང་མི་ལོ་ ༦༠ འི་དྲག་གནོན་འོག་རྒྱ་གཞུང་གིས་བོད་མིའི་གཞི་རྩའི་རང་དབང་ལ་དམ་དྲག་དང་དགོན་པ་གཏོར་བཤིག ཉེ་ལམ་ཡ་ཆེན་སྒར་གྱི་བཙུན་མ་རྣམས་ཕྱིར་འབུད་ཀྱིས་དགོན་པ་ཕྱེད་ཀ་ལྷག་རྩ་མེད་བཟོས་པ། དེ་བཞིན་བོད་མི་ནས་རྒྱ་གཞུང་ལ་ངོ་རྒོལ་ཁྲོད་བོད་མི་ ༡༥༠ ལྷག་ནས་རང་ལུས་མེར་བསྲེགས་གནང་ཡོད་སྟབས་ཞི་ཅིན་ཕིང་ནས་བོད་ཀྱི་གནས་སྟངས་ལ་བལྟ་ནས་རྒྱ་གཞུང་གི་ནོར་འཁྲུལ་ཅན་གྱི་སྲིད་བྱུས་འོག་ད་བར་དོན་ཕན་ལྡན་པའི་གྲུབ་འབྲས་ཅི་ཡང་སོན་མེད་པ་ཤེས་དགོས་པ་དང་ཆབས་ཅིག་ཏུ་ཕྱོགས་གཉིས་ཀྱི་དཀའ་རྙོག་ཞི་བདེ་ལྷིང་འཇགས་ངང་སེལ་བར་གྲོས་མོལ་གནང་དགོས་པའི་ལན་འདེབས་གནང་འདུག དེ་བཞིན་ Parul Chandra ལགས་ཀྱིས་བོད་རྒྱ་གཉིས་ཀྱི་དབར་ད་བར་གྲོས་མོལ་མ་བྱུང་ནས་ལོ་ངོ་བཅུ་ཕྲག་ཙམ་ཕྱིན་ཀྱང་དེ་འབྲེལ་གྲོས་མོལ་ཆད་པའི་རྒྱུ་མཚན་གང་ཡིན་ནམ་ཞེས་པར་སྲིད་སྐྱོང་མཆོག་གིས་ང་ཚོའི་ངོས་ནས་དུས་རྟག་ཏུ་དེ་འབྲེལ་གྲོས་མོལ་སླད་གྲ་སྒྲིག་ཡོད་པ་དང་རྒྱ་གཞུང་ནས་དེར་བཟང་ཕྱོགས་ཀྱི་ལན་གནང་དགོས་སྐོར་གསུངས་འདུག ༸སྐུའི་ཡང་སྲིད་ཀྱི་གནད་དོན་དང་འབྲེལ་ཏེ་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ཐག་གཅོད་དེ་༸མགོན་པོ་མཆོག་ལ་ཡོད་པ་མ་གཏོགས་རྒྱ་གཞུང་ལ་མེད་པ་མ་ཟད་༸སྐུའི་ཡང་སྲིད་བདམས་ཐོན་གྱི་ལམ་ལུགས་དེ་བོད་བརྒྱུད་ནང་བསྟན་གྱི་རིག་གཞུང་ཡིན་སྟབས་རྒྱ་གཞུང་ལ་དེའི་ཐོག་ཐེ་བྱུས་བྱ་རྒྱུའི་ཐོབ་ཐང་མེད་སྐོར་གསུངས་པ་དང་། པཱ་རུལ་ལགས་ཀྱིས་གལ་ཏེ་སླད་མར་རྒྱ་གཞུང་ནས་ངོས་འཛིན་བྱས་པ་དང་རང་དབང་ལུང་པར་ཡོད་པའི་༸གོང་ས་མཆོག་གི་སྐུ་ཚབ་ནས་ངོས་འཛིན་བྱས་པ་བཅས་༸སྐུའི་ཡང་སྲིད་གཉིས་བྱུང་སྲིད་དམ་ཞེས་དྲིས་པར་རྒྱ་ནག་ནས་སླད་མར་༸གོང་ས་མཆོག་གི་ཡང་སྲིད་ངོས་འཛིན་བྱས་ཀྱང་བོད་མི་ནས་དེར་དད་པ་དང་ཡིད་ཆེས་གནང་གི་མ་རེད་ཅེས་ནན་པོ་གསུངས་འདུག སྲིད་སྐྱོང་མཆོག་གིས་བོད་ཀྱི་གནད་དོན་དེ་རྒྱ་གར་གྱི་གནད་དོན་གཙོ་གྲས་ཤིག་ཆགས་ཀྱི་ཡོད་སྐོར་དང་དེ་སྔ་ལོ་རྒྱུས་ནང་བོད་དང་རྒྱ་གར་གཉིས་ཀྱི་ས་མཚམས་ཐད་རྩོད་རྙོག་མེད་པ་དང་ཁྱིམ་མཚེས་རྒྱལ་ཁབ་གཉིས་ཞི་བདེ་ལྷིང་འཇགས་ངང་གནས་ཡོད་པ་ལྟར་རྒྱ་གར་ནས་བོད་ཀྱི་གནད་དོན་གཙོ་བོར་ངོས་བཞེས་ཀྱིས་ཞི་བའི་སྒོ་ནས་སེལ་དགོས་གལ་ཞིག་ལ་གཟིགས་སྐོར་གསུངས་འདུག གཞི་རྩའི་སྲིད་སྐྱོང་མཆོག་ད་ཆ་ཡོ་རོབ་ནང་གཞུང་འབྲེལ་འཚམས་གཟིགས་སུ་ཕེབས་ཡོད་པ་དང་བསྟུན་ཁ་སང་ཅེཀ་སྤྱི་འཐུན་རྒྱལ་ཁབ་ནང་ཕེབས་འབྱོར་བྱུང་ཡོད། ཁ་སང་ཕྱི་དྲོ་པྲག་ནང་ཕྱི་ལོ་ ༢༠༠༠ ཐམ་པའི་གླེང་སྟེགས་ཐེངས་ ༢༣ པའི་ the 23rd Forum 2000 དབུ་འབྱེད་མཛད་སྒོར་མཉམ་ཞུགས་གནང་ཡོད་པ་དང་དབུ་འབྱེད་མཛད་སྒོའི་ཐོག་པྲག་གི་གྲོང་ཁྱེར་སྤྱི་ཁྱབ་དང་བོད་དོན་རྒྱབ་སྐྱོར་བ་སྐུ་ཞབས་ Zdenek Hrib ལགས་དང་ནོ་སྦེལ་ཞི་བདེ་གཟེངས་རྟགས་བཞེས་མྱོང་མཁན་དང་། ཡེ་མི་ནི་གསར་འགོད་པ།  སྲིད་དོན་པ། དེ་བཞིན་འགྲོ་བ་མིའི་ཐོབ་ཐང་རྩོད་ལེན་པ་ལྕམ་ Tawakkol Karman ལགས། དེ་བཞིན་ཅེཀ་ཀྱི་སྲིད་འཛིན་ཟུར་པ་སྐུ་ཞབས་ Vaclav Havel མཆོག་གི་གཅུང་པོ་སྐུ་ཞབས་ Ivan Havel ལགས་དང་ཐེ་ཝན་གྱི་ཕྱི་སྲིད་བློན་ཆེན་གཞོན་པ་ Dr Szu-chien Hsu  ལགས།  སྤྱི་འཐུས་ཐུབ་བསྟན་དབང་ཆེན་ལགས་སོགས་མི་སྣ་ ༣༠༠ ལྷག་ནས་མཉམ་ཞུགས་གནང་འདུག   པྲག་ནང་ཉིན་གྲངས་ ༣ རིང་གི་མཛད་འཆར་དེའི་ཁྲོད་སྲིད་སྐྱོང་མཆོག་ནས་དེ་རིང་ཕྱི་དྲོར་ Responsibility as the Ultimate Measure of Human Action ཞེས་པའི་བརྗོད་གཞི་བརྒྱུད་སྐུ་ཞབས་ Vaclav Havel ལགས་ཀྱི་འགྲོ་བ་མིའི་འོས་འགན་ཐོག་དགོངས་འཆར་དང་དེ་དེང་རབས་འཛམ་གླིང་དང་འབྲེལ་བ་སྐོར་གོ་བསྡུར་གནང་ཡོད་པ་རེད། མཛད་འཆར་ལྟར་ན་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་གཞུང་འབྲེལ་སྒོ་ནས་སྲིད་སྐྱོང་མཆོག་ལ་སྣེ་ལེན་ཞུ་རྒྱུ་དང་གསར་འགོད་པ་དང་མི་སྣ་སོགས་མཇལ་འཕྲད་གནང་རྒྱུ། པྲག་གི་འཚམས་གཟིགས་གྲུབ་མཚམས་སུ་སྲིད་སྐྱོང་མཆོག་བྷེལ་འཇམ་དང་འཇར་མ་ནི། ཕ་རན་སི་བཅས་སུ་གཞུང་འབྲེལ་འཚམས་གཟིགས་གནང་རྒྱུ་ཡིན་པ་རེད།