བོད།

རྒྱ་གཞུང་གིས་བོད་ཀྱི་ཆབ་སྲིད་བཙོན་ཟུར་དང་རྩོམ་པ་པོ་དྲུག་ལ་རྒྱལ་ཁབ་ཁ་བྲལ་གྱི་ངན་སྐུལ་དང་རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཟོས་པའི་ཉེས་མིང་འོག་ལོ་ ༤ ནས་ ༡༤ བར་གྱི་དུས་བཀག་བཙོན་འཇུག་ཁྲིམས་ཐག་བཅད་པ་དང་། བོད་མི་དེ་དག་འཛིན་བཟུང་བཙན་ཁྲིད་བྱས་ནས་དུས་ཡུན་མི་ལོ་གཅིག་ནས་གཉིས་རིང་འབྲེལ་ཡོད་ཁྱིམ་མིར་བརྡ་ལན་ཙམ་ཡང་མ་སྤྲད་པར་གསང་སྟབས་ཀྱིས་བཀག་ཉར་བྱས་འདུགདེ་རིང་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བར་འདི་ལོའི་ཕྱི་ཟླ་ ༩ ནང་དཀར་མཛེས་ཁུལ་འབྲིང་རིམ་མི་དམངས་ཁྲིམས་ཁང་གིས་རྒྱལ་ཁབ་ཁ་བྲལ་གྱི་ངན་སྐུལ་དང་རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཟོས་པའི་ཉེས་འཛུགས་འོག བོད་ཀྱི་རྩོམ་པ་པོ་གངས་སྐྱེས་སྒྲུབ་པ་སྐྱབས་ལགས་ལ་ལོ་ ༡༤ དང་སྲས་རྣམ་ལགས་ལ་ལོ་ ༦ གངས་བུ་གཡུ་བྷྲུཾ་ལགས་ལ་ལོ་ ༧ ཡས་མས། གངས་ཚེ་རིང་སྒྲོལ་མ་ལགས་ལོ་ ༨ པདྨ་རིན་ཆེན་ལགས་ལ་ལོ་ ༤ བསམ་འགྲུབ་ལགས་ལ་ལོ་ ༨ བཅས་ཀྱི་ཁྲིམས་ཐག་བཅད་ཡོད་པ་གསུངས་ཡོད།གངས་ཚེ་རིང་སྒྲོལ་མ་ལགས་ཐེངས་དང་པོ་འཛིན་བཟུང་བྱེད་སྐབས་ཉེན་རྟོག་པས་གཅར་རྡུང་དྲག་པོ་བཏང་བའི་རྐྱེན་གྱིས་ཁོང་གི་དཔྱི་མགོ་བཅག་པ་དང་འབྲེལ་ནས་དུས་ད་ལྟའང་ནད་པ་ཡིན་པ་མ་ཟད། ཁོང་གཙོས་བོད་མི་གཞན་ལྔ་པོ་རྣམས་ལའང་བཙོན་ཁང་དང་བཀག་ཉར་འོག་གཅར་རྡུང་དྲག་པོ་བཏང་སྟེ་ལུས་པོར་ནད་གཞི་ཚབས་ཆེ་འདྲ་མིན་ཕོག་ཡོད་པ་དེ་ལྟར་ཡང་། རྒྱ་གཞུང་ཉེན་རྟོག་པས་ཉེན་རྟོག་ཁང་དུ་ཐོ་འགོད་ཆེད་ཡོང་དགོས་པ་བཟོས་པ་དང་། ས་གནས་གཞན་ལ་སྐྱོད་རྒྱུའི་ཆོག་མཆན་མ་སྤྲད་པ་སོགས་སུན་གཙེར་དང་དམ་བསྒྲགས་ཆེས་ཆེར་བཟོས་ཡོད།རླུང་འཕྲིན་ཁང་གིས་སྔ་ལོའི་ཕྱི་ཟླ་ ༤ པ་ནང་དུ་རྩོམ་པ་གངས་སྐྱེས་སྒྲུབ་པ་སྐྱབས་ལགས་དང་། སྲས་རྣམ་ལགས། གངས་བུ་གཡུ་བྷུཾམ། དེ་བྷཟིན་གངས་ཚེ་རིང་སྒྲོལ་མ་ལགས་བཅས་བཞི་འཛིན་བཟུང་བྱས་པའི་གནས་ཚུལ་སྤེལ་བའི་རྗེས་སུ་ད་རེས་ཁོང་རྣམས་ལ་ཁྲིམས་ཐག་བཅད་པའི་གནས་ཚུལ་མ་ཐོས་ཀྱི་བར་དུ་ཁོང་རྣམས་བཙོན་ཁང་གང་དུ་ཡོད་མེད་དང་གནས་སྟངས་ཇི་ཆགས་སོགས་གང་ཡང་ཤེས་རྟོགས་མེད་པར་ལུས་ཡོད་པ་རེད།དེ་རིང་མགོ་ལོག་འཇིགས་མེད་ལགས་ཀྱིས་གནས་ཚུལ་མཁོ་སྤྲོད་གནང་བར་སྔ་ལོ་གངས་སྐྱེས་སྒྲུབ་པ་སྐྱབས་ལགས་གཙོས་ཁོང་བཞི་འཛིན་བཟུང་སྐབས་ད་དུང་བོད་མི་གཞན་ཞིག་ཡོད་པ་ཤེས་ཀྱང་མཚན་གང་ཡིན་སོགས་གསལ་པོ་ཤེས་རྟོགས་ཐུབ་ཀྱི་མི་འདུག་ཅེས་ཞུས་ཡོད་པ་དེ་བསམ་འགྲུབ་ལགས་ཡིན་པ་ར་འཕྲོད་བྱུང་ཡོད།དེ་བཞིན་ཁམས་དཀར་མཛེས་བྲག་མགོ་ནས་ཡིན་པའི་པདྨ་རིན་ཆེན་ལགས་ལྟ་བུར་ཆ་མཚོན་ན་དེ་སྔོན་ཕྱི་ལོ་༢༠༡༡ ལོར་ཁོང་གིས་<<ལྟོས།>> ཞེས་པའི་སྒེར་དེབ་ཅིག་བྲིས་ཏེ་དཔར་འགྲེམས་བྱས་ཡོད་སྟབས་ཐེངས་དང་པོ་འཛིན་བཟུང་བྱས་རྗེས་ཕྱི་ལོ་ ༢༠༢༠ ལོ་མཇུག་ཙམ་ལ་ཁོང་གིས་སྒེར་དེབ་གཉིས་པ་འབྲི་བཞིན་པའི་གནས་ཚུལ་ཞིག་དང་འབྲེལ་ནས་ཁོང་གི་བཀའ་མོལ་དེ་གསུངས་རྗེས་ད་བར་གར་སོང་ཆ་མེད་དུ་གྱུར་ཡོད་པ་རེད། ད་ལན་མི་ལོ་ ༤ ནས་ ༡༤ བར་གྱི་བཙོན་འཇུག་ཁྲིམས་ཐག་བཅད་པའི་བོད་མི་དྲུག་གི་ཁོངས་ནས་གངས་སྐྱེས་སྒྲུབ་པ་སྐྱབས་ལགས་དང་གངས་བུ་གཡུ་བྷུཾམ་ལགས། དེ་བྷཞིན་བསམ་འགྲུབ་ལགས་གསུམ་ནས་དེ་སྔ་ ༢༠༡༢ ལོར་དམར་རྒོལ་གདོང་ལེན་ཚོགས་པ་ཞེས་གསར་འཛུགས་གནང་བ་དང་འབྲེལ་ནས་སྐབས་དེར་འཛིན་བཟུང་བཙོན་འཇུག་བྱས་ཡོད་པ་རེད།བོད་མི་དྲུག་པོ་དེ་དག་དུས་རྟག་ཏུ་བོད་དོན་དང་བོད་མི་རིགས་ཀྱི་ལ་རྒྱ་ཤུགས་ཆེ་ཡོད་པ་དང་དེ་བཞིན་བློས་བཏང་ཆེན་པོས་རྩོམ་ཡིག་དང་ངོ་རྒོལ་སྐད་འབོད་སོགས་ཀྱི་བོད་དོན་ལས་འགུལ་འདྲ་མིན་སྤེལ་མྱོང་ཡོད་པ་རེད། བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་གོང་གི་ས་ཁུལ་དེར་དུས་རྒྱུན་ནས་རྒྱ་གཞུང་གིས་དྲ་རྒྱ་དང་བརྡ་འཕྲིན། ༸གོང་ས་མཆོག་གི་༸སྐུ་པར་དང་ཆོས་ཕྱོགས་ཀྱི་གནང་སྒོ་ཁག་ལ་དམ་བསྒྲགས་ཤུགས་ཆེར་བྱེད་བཞིན་ཡོད་པའི་ཁྲོད་དེ་རིང་ཁ་སང་ཏོག་དབྱིབས་གཉན་རིམས་ ༡༩ ལ་ཁ་གཡར་ཏེ་དམ་བསྒྲགས་དེ་བས་ཆེས་བྱེད་མུས་ཁར་རྒྱ་ནག་དམར་ཤོག་ཚོགས་པའི་ཚོགས་མི་ཡིན་པའི་བོད་རིགས་གུང་ཁྲན་ཏང་ཡོན་རྣམས་ལ་ཡང་ངལ་བ་ཆེན་པོ་འཕྲད་བཞིན་ཡོད་པ་གསུངས་སོང་།

ཚེ་བཙོན་གྱི་ཁྲིམས་ཆད་འོག་གནས་པའི་རྡོ་རྗེ་བཀྲ་ཤིས་ལགས་གློད་བཀྲོལ་ཆེད་ཁོང་གི་ནང་མིས་གཞུང་འབྲེལ་ཞུ་གཏུག་གི་བརྒྱུད་རིམ་ཡོད་ཚད་ཕྱིན་ཟིན་ཡོད་ཀྱང་དྲང་བདེན་གྱི་ཁྲིམས་ཐག་གཅོད་ཀྱི་མེད་སྟབས་ད་ཆ་ཡོངས་ཁྱབ་ཐོག་ནས་ཞུ་གཏུག་ལས་འགུལ་དབུ་འཛུགས་གནང་འདུག ཁ་སང་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་གསར་དུ་རག་སོན་བྱུང་བའི་བརྙན་པར་དང་བཅས་གནས་ཚུལ་ཞིག་སྤེལ་བར་གཞིགས་ན། རྒྱ་ནག་གཞུང་གིས་ཕྱི་ལོ་ ༢༠༠༨ ལོའི་གསུམ་གཅིག་བཞི་ཟེར་བའི་དོན་རྐྱེན་འོག་ཐོག་མར་ཁ་བྲལ་གྱི་ཉེས་འཛུགས་དང་། རྗེས་སུ་བུ་ལོན་གཡོ་ལེན་བྱས་ཡོད་པར་བསྙད་འདོགས་ཀྱིས་ཕྱི་ལོ་ ༢༠༡༠ ལོར་ཚེ་བཙོན་གྱི་ཁྲིམས་ཐག་བཅད་ཡོད་པའི་བོད་མི་ཕྱུག་བདག་རྡོ་རྗེ་བཀྲ་ཤིས་ལགས་གློད་བཀྲོལ་ཡོང་ཐབས་སུ་ཁོང་གི་ནང་མིས་གཞུང་འབྲེལ་ཞུ་གཏུག་གི་བརྒྱུད་རིམ་ཡོད་ཚད་ཕྱིན་ཡོད་ཀྱང་ཁོང་གློད་བཀྲོལ་ཐོབ་མེད་སྟབས། ཁོང་གི་གཅེན་པོས་འདི་ལོའི་ཕྱི་ཟླ་ ༩ ནང་རྒྱ་གཞུང་ལ་ཡོངས་ཁྱབ་ཀྱི་ཞུ་ཡིག་ཕུལ་བར་མ་ཟད། གཅེན་མོས་འདི་ལོའི་ཕྱི་ཟླ་ ༦ ནང་ལྷ་ས་མི་མང་ཁྲིམས་ཁང་གི་མདུན་དུ་ཞི་བའི་ལས་འགུལ་སྤེལ་བ་དང་བརྙན་པར་བརྒྱུད་ཁོང་གི་ཚེ་བཙོན་ཁྲིམས་ཆད་དེ་དྲང་བདེན་ཞིག་བྱུང་མེད་སྐོར་གསལ་བཤད་གནང་འདུག རྡོ་རྗེ་བཀྲ་ཤིས་ལགས་ཀྱི་གཅེན་པོས་རྒྱ་གཞུང་ལ་ཡོངས་ཁྱབ་ཀྱི་ཞུ་ཡིག་ཕུལ་ཡོད་པའི་ནང་རྒྱ་ནག་གི་དབང་ཆ་ཆེན་པོ་ཡོད་པའི་དཔོན་རིགས་ཁག་གསུམ་གྱིས་ཆབ་སྲིད་ཀྱི་གནད་དོན་ལ་ཁ་གཡར་ནས་རྡོ་རྗེ་བཀྲ་ཤིས་ལགས་ཀྱི་དངོས་ཡོད་གནས་ཚུལ་ལ་ལོག་བཤད་དང་། ཁོང་ལ་ཚེ་བཙོན་གྱི་ཁྲིམས་ཐག་བཅད་པ་དེ་དྲང་བདེན་ཞིག་བྱུང་མེད་པར་ཁུངས་སྐྱེལ་ར་སྤྲོད་གནང་སྟེ་གཞུང་འབྲེལ་གྱི་འབྲེལ་ཡོད་ཚན་པ་ཁག་ལ་ལོ་མང་རིང་ཞུ་གཏུག་ཡང་ཡང་གནང་འབྲས་སུ་དོན་སྙིང་ལྡན་པའི་མཇུག་འབྲས་སོན་མེད་པར་མ་ཟད། ཁོང་གིས་དངུལ་ཁང་ནས་རྒྱ་སྒོར་ས་ཡ་ ༡་༤ བུ་ལོན་གཡར་བ་དེ་ཕར་སློག་ཚར་ཡོད་པ་དེ་ལྟར་ཡང་ཁོང་ལ་བུ་ལོན་གཡོ་ལེན་བྱས་པའི་སྐྱོན་འཛུགས་བྱས་པ་དང་། ཕྱི་ལོ་ ༢༠༠༡ ཟླ་ ༡ ཚེས་ ༢༡ ཉིན་མི་མང་གི་ཆེས་མཐོའི་ཁྲིམས་ཁང་གིས་གཏན་འབེབས་བྱས་པའི་རྒྱལ་ཡོངས་ཀྱི་ཁྲིམས་སྒྲིག་ནང་གསལ་ལྟར་དཔལ་འབྱོར་ནག་ཉེས་ཀྱི་གྱོད་གཞིའི་ཁྲིམས་འབྲུ་དེ་དག་ལུང་འདྲེན་གྱིས་རྡོ་རྗེ་བཀྲ་ཤིས་ལགས་སུ་བུ་ལོན་གཡོ་ལེན་བྱས་པའི་སྐྱོན་འཛུགས་དང་འབྲེལ་ཉེས་ཆད་བཏང་བ་དེ་ཁྲིམས་མཐུན་མིན་པ་སོགས་བཀོད་འདུག དེ་བཞིན་རྡོ་རྗེ་བཀྲ་ཤིས་ལགས་ཀྱི་གཅེན་མོ་དཀོན་ཊེ་ལགས་ཀྱིས་ཀྱང་འདི་ལོའི་ཕྱི་ཟླ་ ༦ ནང་ལྷ་ས་མི་མང་ཁྲིམས་ཁང་གི་མདུན་དུ་ཞི་བའི་ལས་འགུལ་སྤེལ་བ་མ་ཟད་བརྙན་པར་བརྒྱུད་ཁོང་གི་ཚེ་བཙོན་ཁྲིམས་ཆད་དེ་དྲང་བདེན་ཞིག་བྱུང་མེད་སྐོར་གསལ་བཤད་གནང་ཡོད་སྟབས། རྒྱལ་སྤྱིའི་བོད་དོན་ལས་འགུལ་ཁང་གིས་དེ་འབྲེལ་བརྙན་པར་དག་ཐེངས་འདིའི་གནས་ཚུལ་བརྒྱུད་ཡོངས་གྲགས་གནང་འདུག བརྙན་པར་ནང་གཅེན་མོ་དཀོན་ཊེ་ལགས་ཀྱིས་ལྷ་ས་མི་མང་ཁྲིམས་ཁང་གི་མདུན་དུ་ཞི་བའི་ཐོག་ནས་ཞུ་གཏུག་གནང་སྐབས་ཐོག་མ་ཁུལ་དེའི་སྐོར་སྲུང་བ་ལྔ་བསླེབས་ཡོད་པ་དང་དེ་རྗེས་སྐོར་སྲུང་བ་བཅུ་བསླེབས་ནས་ཁོང་གི་ཞུ་གཏུག་གི་ལས་འགུལ་དེ་མཚམས་འཇོག་བྱེད་དགོས་པར་འབད་བརྩོད་བྱས་ཡོད་པ་མངོན་རྒྱུ་འདུག དེ་བཞིན་ཁོང་གི་གཅུང་པོར་བུ་ལོན་གཡོ་ལེན་བྱས་པའི་ཉེས་འཛུགས་བྱས་པ་དེ་དང་འབྲེལ་ནས་དངུལ་ཁང་ལ་ཕར་བུ་ལོན་སྤྲོད་འཇལ་ཟིན་པའི་ཐོག་རྒྱ་སྒོར་སྟོང་ཕྲག་ ༥༠ སྐྱེད་འབབ་སྤྲད་ཡོད་པ་མ་ཟད། ཁྱོན་རྒྱ་སྒོར་ས་ཡ་ ༢ སྤྲད་ཡོད་པ་གསུངས་འདུག ཁོང་གིས་ད་དུང་རྡོ་རྗེ་བཀྲིས་ལགས་སུ་དྲང་བདེན་གྱི་ཁྲིམས་ཐག་གཅོད་དགོས་པའི་ཞུ་སྐུལ་གནང་སྐབས་མི་མང་ཁྲིམས་ཁང་གི་ངོས་ནས་ཐག་གཅོད་གང་བྱས་པ་དེར་དྲང་པོ་བྱུང་མིན་ལ་མ་ལྟོས་པར་ངེས་པར་དུ་བརྩི་དགོས་སྐོར་བཤད་ཡོད། མི་མང་ཁྲིམས་ཁང་ནས་གནད་དོན་དེ་ཡར་གོང་རིམ་ལ་ཞུས་ཡོད་ལུགས་དང་གོང་རིམ་ནས་དེ་འབྲེལ་དཔྱད་ཁྲ་གསར་པ་བཏང་མེད་ཚུལ་སོགས་བཤད་ཡོད་དང་འབྲེལ། ཁོང་གིས་གཅུང་པོར་ཁྲིམས་ཐོག་ནས་དྲང་བདེན་གྱི་ཐག་གཅོད་མ་བྱུང་བར་དུ་ངོ་རྒོལ་གནང་རྒྱུ་ཡིན་པ་གསུངས་ཡོད་སྟབས་མི་མང་བདེ་འཇགས་ལས་ཁུངས་དང་ས་གནས་ཉེན་རྟོག་འགོ་དཔོན་གྱིས་དེ་ལྟར་བྱས་ཚེ་འཛིན་བཟུང་བྱེད་སྲིད་པའི་ཉེན་བརྡ་བཏང་ཡོད་སྐོར་གསུངས་འདུག

ཁ་ཉིན་ཕྱི་ཟླ་ ༡༠ ཚེས་ ༡༦ ཉིན་རྒྱ་ནག་གི་རྒྱལ་ས་པེ་ཅིང་དུ་རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་ ༢༠ པ་འགོ་འཛུགས་བྱས་པའི་ཐོག་སྲིད་འཛིན་ཞི་ཅིན་ཕིང་གིས་གཏམ་བཤད་ནང་དམར་ཤོག་གཞུང་གིས་གྲངས་ཉུང་མི་རིགས་ཁྲོད་ནས་འགོ་ཁྲིད་སྐྱེད་སྲིང་དང་བསྐོ་གཞག་གལ་ཆེར་བརྩི་རྒྱུ་ཡིན་སྐོར་བཤད་ཡོད་ཀྱང་། དོན་དངོས་ཐོག་ཕྱི་ལོ་ ༢༠༡༤ ལོར་འབའ་བ་ཕུན་ཚོགས་དབང་རྒྱལ་ལགས་སྐུ་གཤེགས་པའི་རྗེས་སུ་རྒྱ་གཞུང་གིས་བོད་ནང་གི་བོད་མིའི་རྒྱབ་སྐྱོར་དང་ཡིད་ཆེས་བློ་འགེལ་ཡོད་པའི་བོད་རིགས་འགོ་ཁྲིད་གཅིག་ཀྱང་སྐྱེད་སྲིང་ཐུབ་མེད་པ་ཐེར་འདོན་གནང་འདུགརྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་ཚོགས་གཙོ་སྐུ་ཞབས་བུ་ཆུང་ཚེ་རིང་ལགས་ཀྱིས་ཕྱི་ལོ་ ༡༩༨༩ ལོར་༸པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་སྐུ་གཤེགས་པ་དང་། ༢༠༠༩ ལོར་ང་ཕོད་ངག་དབང་འཇིགས་མེད་ལགས་སྐུ་གཤེགས་པ། ཕྱི་ལོ་ ༢༠༡༤ ལོར་འབའ་བ་ཕུན་ཚོགས་དབང་རྒྱལ་ལགས་བཅས་གསུམ་སྐུ་གཤེགས་པའི་རྗེས་སུ་རྒྱ་ནག་གཞུང་གི་ངོས་ནས་ཁོང་རྣམ་པ་གསུམ་ལྟ་བུ་བོད་མིའི་རྒྱབ་སྐྱོར་ཡོད་པའི་བོད་རིགས་འགོ་ཁྲིད་སྐྱེད་སྲིང་བྱེད་ཐབས་རིམ་པ་བྱས་ཡོད་པ་དེ་ལྟར་ཡང་། ད་ལྟ་རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་ ༢༠ པ་འཚོགས་བཞིན་པའི་སྐབས་སུ་རྒྱ་གཞུང་གིས་བོད་ནང་གི་བོད་མིའི་རྒྱབ་སྐྱོར་དང་ཡིད་ཆེས་བློ་འགེལ་ཡོད་པའི་བོད་རིགས་འགོ་ཁྲིད་གཅིག་ཀྱང་སྐྱེད་སྲིང་ཐུབ་མེད་པ་དང་། རྒྱ་ནག་གཞུང་གིས་བོད་བཙན་བཟུང་བྱས་ནས་མི་ལོ་ ༦༠ རྗེས་སུའང་བོད་མིའི་ཆོད་སེམས་ལ་འགྱུར་ལྡོག་རྩ་བ་ནས་ཕྱིན་མེད་པའི་ངེས་ཤེས་ཐུབ་ཀྱི་ཡོད་པ་གསུངས་འདུག

ཉེ་ཆར་ཕྱི་ཚེས་ ༡༣ ཉིན་རྒྱ་གཞུང་ཉེན་རྟོག་པས་མདོ་སྨད་མགོ་ལོག་ཁུལ་ནས་ཡིན་པའི་གླུ་བ་བདེ་རབ་ལགས་དང་ཁོང་གི་གཞས་ཚིག་རྩོམ་པ་པོ་སོགས་བོད་མི་ན་གཞོན་ལྔས་༸གོང་ས་མཆོག་ལ་ཆེ་བསྟོད་ཀྱི་གླུ་བླངས་པའི་རྐྱེན་གྱིས་འཛིན་བཟུང་བཙན་ཁྲིད་བྱས་འདུག གསར་འགོད་པར་གནས་ཚུལ་མཁོ་སྤྲོད་པས་འགྲེལ་བརྗོད་གནང་དོན་ལ་ཟླ་ ༡༠ ཚེས་ ༡༣ ཉིན་བོད་ནང་དུ་མགྱོགས་འཕྲིན་ཐད་གཏོང་བརྒྱུད་གླུ་གཞས་འགྲན་བསྡུར་གྱི་དགོང་ཚོགས་ཚོགས་ཡོད་པ་དང་སྐབས་དེར་མགོ་ལོག་ཁུལ་ནས་ཡིན་པའི་འགྲན་ཞུགས་པ་ན་གཞོན་གླུ་བ་བདེ་རབ་ལགས་ཀྱིས་༸གོང་ས་མཆོག་ལ་ཆེ་བསྟོད་ཀྱི་གླུ་གཞས་ཤིག་བླངས་ཡོད་སྟབས། ས་གནས་རྒྱ་གཞུང་ཉེན་རྟོག་པས་གླུ་བ་བདེ་རབ་ལགས་ཀྱིས་གཙོས་པའི་གཞས་ཚིག་རྩོམ་པ་པོ་དང་རམ་དཀྲོལ་བ། དེ་བཞིན་ཐད་གཏོང་ནང་གི་རོགས་པ་འགའ་བཅས་ཁྱོན་བོད་མི་ལྔ་འཛིན་བཟུང་བཙན་ཁྲིད་བྱས་ཏེ་གླུ་གཞས་དང་འབྲེལ་བའི་ཐོག་འདྲི་རྩད་མང་དག་ཅིག་བྱས་རྗེས་ཉིན་དེ་རང་ལ་གླུ་བ་བདེ་རབ་ལགས་དང་རོགས་པ་གཞན་གསུམ་གློད་བཀྲོལ་བཏང་ཡོད་ཀྱང་། བསྟོད་གཞས་རྩོམ་པ་པོ་དང་རམ་དཀྲོལ་བ་མུ་མཐུད་འཛིན་བཟུང་བཀག་ཉར་བྱེད་མུས་ཡིན་པ་གསུངས་ཡོད། ད་ལྟའི་ཆར་རྒྱ་གཞུང་གི་བཀག་ཉར་འོག་ཡོད་པ་གླུ་བ་བདེ་རབ་ལགས་ཀྱི་རམ་དཀྲོལ་བ་དང་བསྟོད་ཚིག་རྩོམ་པ་པོའི་མིང་སོགས་ཁ་གསལ་ཤེས་རྟོགས་ཐུབ་མེད་པ་དང་། བདེ་རབ་ལགས་ཀྱིས་མགྱོགས་འཕྲིན་གྱི་ཐད་གཏོང་སྟེང་དུ་བླུངས་པའི་བསྟོད་གླུའི་ཚིག་ལ་“རྗེ་བླ་མ་དང་པོ་བོད་ནས་འཁྲུངས།། སྐུ་འགྲོ་དོན་ས་མཐའི་ཡུལ་ནས་མཛད།། བྱམས་སྙིང་རྗེ་ལྡན་པའི་བླ་མ་ཁོང་།། སྐུ་མྱུར་ཏུ་ཕེབས་པའི་སྨོན་ལམ་འདེབས།།”ཞེས་འཁོད་ཡོད་པ་རེད། གླུ་བ་བདེ་རབ་ལགས་དང་རོགས་པ་གསུམ་གློད་བཀྲོལ་བཏང་ཡོད་ཀྱང་ས་གནས་རྒྱ་གཞུང་ཉེན་རྟོག་པས་གཞས་པ་བདེ་རབ་ཀྱིས་རྗེས་ནས་གླུ་གཞས་འགྲན་བསྡུར་དུ་མི་ཞུགས་པ་དང་ཐད་གཏོང་བྱེད་སྐབས་གཞས་འདྲ་མིན་མི་གཏོང་བ། སྤྲོ་ཚོགས་དང་དུས་སྟོན་སྟེང་དུ་གཞས་མི་གཏོང་བ་སོགས་ཀྱི་ཁས་ལེན་ཡི་གེར་མཛུབ་ཐེལ་རྒྱག་ཏུ་བཅུག་ཡོད་པའི་གནས་སྟངས་བྱུང་བར་འགྲེལ་བརྗོད་གནང་ཡོད། བོད་མི་ལྔ་འཛིན་བྱས་པའི་གནས་ཚུལ་དང་འབྲེལ་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་གཞུང་གིས་ཉེས་མེད་འཛིན་བཟུང་བཀག་ཉར་བྱས་པ་དང་རམ་དཀྲོལ་བ་ད་དུང་གློད་བཀྲོལ་མ་བཏང་བའི་ཁྲིམས་འགལ་གྱི་བྱ་སྤྱོད་ལ་ངོ་རྒོལ་མཐའ་གཅིག་ཏུ་ཡོད་ཅེས་དང་། ཉེས་མེད་བོད་མི་ཁོང་འཕྲལ་དུ་གློད་བཀྲོལ་གཏོང་དགོས་པ་མ་ཟད་གཞས་པ་བདེ་རབ་ལ་དོན་མེད་ཀྱི་ཚད་བཀག་བཟོས་པ་མཐའ་དག་ཕྱིར་འཐེན་བྱེད་དགོས་པ། དེ་བཞིན་རྒྱ་ནག་གི་མགྱོགས་འཕྲིན་ལས་ཁུངས་ནས་ཀྱང་བོད་མི་ཚོའི་དྲ་ལམ་གྱི་བྱ་སྤྱོད་དང་སྨྲ་བརྗོད་རང་དབང་ལ་དོན་མེད་དམ་བསྒྲགས་བྱས་ཏེ་རྒྱ་གཞུང་གི་གཉའ་གནོན་ལ་ལག་རོགས་བྱེད་པའི་སྦྱོར་བ་མཐའ་དག་མཚམས་འཇོག་དགོས་པ། རྒྱ་གཞུང་དང་མགྱོགས་འཕྲིན་ལས་ཁུངས་གཉིས་ཀས་བོད་མི་ཚོའི་དྲ་ལམ་གྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཚམས་འཇོག་དགོས། ལྷག་དོན་མགྱོགས་འཕྲིན་ལས་ཁུངས་ཀྱིས་རང་གི་བྱ་སྤྱོད་རྣམས་ཚོང་ལས་དང་འགྲོ་བ་མིའི་ཐོབ་ཐང་སྐོར་གྱི་མཉམ་འབྲེལ་རྒྱལ་ཚོགས་ཀྱི་ལམ་སྟོན་རྩ་འཛིན་ལས་མ་འགལ་བ་བྱེད་དགོས་པ་གསུངས་འདུག

རྒྱ་ནག་གི་གཉན་རིམ་ཀླད་ཀོར་གྱི་སྲིད་བྱུས་ཁྲོད་དེང་སྐབས་བོད་ཀྱི་རྒྱལ་ས་ལྷ་ས་གཙོས་བོད་ཀྱི་ས་གནས་གང་སར་བོད་མི་རྣམས་ལ་དཀའ་ངལ་དུ་མ་འཕྲད་བཞིན་པའི་སྐབས་འདིར་རྒྱ་གཞུང་གིས་བོད་ཀྱི་རྒྱལ་ས་ལྷ་སའི་གྲོང་སྡེ་ཁག་ཅིག་ནས་དྲྭ་ལམ་བརྒྱུད་རྒྱལ་ཁབ་ཀྱི་གནས་ཚུལ་ཕྱི་ཕྱོགས་ལ་སྤེལ་བའི་ཉེས་མིང་གཡོགས་ཏེ་བོད་མི་སེར་སྐྱ་ ༢༢ ལྷག་འཛིན་བཟུང་གིས་ས་གནས་ཀྱི་བཀག་སྐྱིལ་ཁང་ཞིག་ཏུ་བཀག་ཉར་དང་འབྲེལ། ཁོ་ཚོར་དྲ་ལམ་གྱི་བདེ་འཇགས་སྲུང་སྐྱོབ་དང་འབྲེལ་བའི་སློབ་གསོ་སྤྲོད་བཞིན་ཡོད་འདུག ཟླ་བ་འདིའི་ཚེས་ ༡༡ ཉིན་རྒྱ་གཞུང་ཉེན་རྟོག་པས་ལྷ་ས་གྲོང་ཁྱེར་ཁྲིན་ཀན་ཆུས་ཟེར་བའི་ཁྲོམ་གཞུང་ ༡༠ པའི་རྟ་མཚོ་གྲོང་སྡེ་དང་སྒང་གྲོང་སྡེ། ཐར་པ་གྲོང་སྡེ་སོགས་ནས་ཡིན་པའི་བོད་མི་ཁྱོན་ ༢༢ ལྷག་འཛིན་བཟུང་བྱས་པར་མ་ཟད།  ཁོང་རྣམ་པའི་ལག་ཐོགས་ཁ་པར་སྔོག་གཤེར་གྱིས་གང་ཟག་སུ་དང་འབྲེལ་བ་གནང་མིན་དང་གནས་ཚུལ་གང་བཤད་མིན་རྟོག་ཞིབ་བྱས་ཏེ་ད་ལྟའི་ཆར་བོད་མི་དེ་དག་ས་གནས་བཀག་སྐྱིལ་ཁང་དུ་བཀག་ཉར་དང་དུས་ཡུན་ཉིན་གྲངས་༡༥ རིང་སྤྱི་ཚོགས་དྲྭ་ལམ་གྱི་བདེ་འཇགས་སྲུང་སྐྱོབ་ཟེར་བའི་སློབ་གསོ་སྤྲོད་བཞིན་ཡོད་པ་རེད། གསར་འགོད་པར་གནས་ཚུལ་མཁོ་སྤྲོད་པས་བོད་མི་དེ་དག་གིས་ཁ་པར་བརྒྱུད་ནད་ཡམས་དང་འབྲེལ་བའི་དཀའ་ངལ་ཇི་འཕྲད་ཀྱི་གནས་ཚུལ་ཕྱི་ཕྱོགས་ལ་སྤེལ་བར་ཁག་དཀྲིས་ཏེ་འཛིན་བཟུང་བྱས་ཡོད་པ་གསུངས་སོང་། དེང་སྐབས་བོད་ཀྱི་རྒྱལ་ས་ལྷ་ས་གཙོ་གྱུར་བོད་ས་ཡོངས་ལ་ནད་ཡམས་ཁྱབ་གདལ་ཁྲོད་སྲིད་གཞུང་གི་གཉན་རིམས་ཀླད་ཀོར་ཟེར་བའི་སྲིད་བྱུས་སྤེལ་བཞིན་པའི་ཁྲོད་མང་ཚོགས་ལ་དཀའ་ངལ་ཆེས་འཕྲད་ནས་ད་ཆ་ཟླ་བ་གཉིས་ལྷག་འགྲོ་བཞིན་ཡོད་པ་དེ་ལྟར་ནའང་། རྒྱ་ནག་གཞུང་གིས་ད་དུང་དངོས་ཡོད་གནས་ཚུལ་ལ་བཀག་སྡོམ་དང་གཉན་རིམས་ལ་སྙད་འདོགས་ཏེ་ནད་གཞི་ཕོག་ཡོད་མེད་ལ་ལྟོས་མེད་ཚང་མ་ལྷན་ཅིག་ཏུ་བཞག་པ་དང་ཟས་རྙིང་སྤྲད་པ། སྨན་བཅོས་ཀྱི་མཐུན་རྐྱེན་དུས་ཐོག་ཏུ་མ་སྦྱར་བའི་ཁར་མང་ཚོགས་ལ་རྡུང་རྡེག་བཏང་བའི་རྐྱེན་གྱིས་སེམས་ཁམས་ལ་ངལ་བ་རབ་དང་རིམ་པ་འཕྲད་བཞིན་ཡོད་པར་འགྲེལ་བརྗོད་གནང་ཡོད། གཞི་རྩའིི་རྒྱ་གཞུང་གིས་བོད་ནང་གཉན་རིམས་ཀླད་ཀོར་ཀྱི་སྲིད་བྱུས་འོག་བོད་མི་རྣམས་ལ་སྒོ་རྒྱ་བསྡམས་པའི་ཁྲོད་ལྷ་ས་ནང་བོད་མི་རེ་ཟུང་གིས་ཁང་པའི་ཐོག་ནས་མཆོང་སྟེ་རང་སྲོག་བཅད་པའི་གནས་ཚུལ་ཐོན་པ་མ་ཟད། དེ་རིང་ཁ་སང་འཕྲུལ་སྒྲ་བརྒྱུད་བོད་པའི་བེུད་ཅིག་ཁང་པའི་ཐོག་ནས་མཆོང་ཐབས་བྱས་ཡོད་ཀྱང་འབྲེལ་ཡོད་ལས་བྱེད་པས་སྐྱོབ་ཐུབ་ཡོད་པའི་བརྙན་པར་ཞིག་ཐོན་ཡོད་པ་རེད། དཔྱད་ཞིབ་པ་རྣམས་ཀྱིས་དེང་སྐབས་རྒྱ་ནག་གཞུང་གིས་བོད་མིའི་ཐོག་དམ་དྲག་སྔར་ལྷག་བྱས་དང་བྱེད་བཞིན་པ་ནི་གཙོ་བོ་འཚོགས་ལ་ཉེ་བའི་རྒྱ་ནག་དམར་ཤོག་ཚོགས་ཆེན་ཐེངས་ ༢༠ པ་དང་བསྟུན་རྒྱལ་ཁབ་ཀྱི་བདེ་འཇགས་སྲུང་སྐྱོབ་དང་འབྲེལ་བའི་ལས་གཞི་ལག་བསྟར་བྱས་པ་ཞིག་ལ་ངོས་འཛིན་གནང་གི་ཡོད་པ་དང་། འདས་པའི་ཟླ་ཤས་ཁྲོད་ཉེས་མིང་སྣ་ཚོགས་འོག་བོད་མི་རྣམས་འཛིན་བཟུང་བྱས་པའི་གནས་ཚུལ་ཐོན་དང་འཐོན་མུས་ཡིན་པ་རེད། པར་བོད་ཀྱི་དུས་བབ།

དབྱིན་ཡུལ་གྱིས་རྒྱ་ནག་དེ་དཔལ་འབྱོར་དང་འཕྲུལ་ལས་རིག་པའི་ཐོག་ནས་རྒྱལ་སྤྱིའི་བདེ་འཇགས་དང་། ལྷག་པར་དུ་ཁུལ་དེའི་བདེ་འཇགས་སོགས་ཀྱི་ཐད་ལ་ཉེན་ཁ་ཆེན་པོ་ཞིག་ཏུ་ངོས་འཛིན་གྱིས་སྐྱོན་བརྗོད་དང་བློ་འཚབ་ཀྱི་རྣམ་པ་ཤུགས་ཆེར་མངོན་གསལ་གནང་འདུག ཁ་སང་བརྒྱུད་ལམ་ཁག་གིས་གནས་ཚུལ་སྤེལ་བར་གཞིགས་ན། GCHQ Government Communications Headquarters ཞེས་དབྱིན་ཡུལ་གྱི་གསང་བ་ལས་ཁུངས་ཀྱི་གཙོ་འཛིན་སྐུ་ཞབས་ Jeremy Fleming ལགས་ཀྱིས་རྒྱ་ནག་གི་སྟོབས་ཤུགས་དང་རྒྱལ་སྤྱིའི་སྤྱི་ཚོགས་ལ་ཞེད་སྣང་ཁྲོད་ནས་དེ་འབྲེལ་ལས་དོན་མང་པོ་ཞིག་སྤེལ་བཞིན་ཡོད་པར་བརྟེན་ང་ཚོར་ཉེན་ཁ་ཆེན་པོ་ཆགས་ཡོད་པ་དང་། རྒྱ་ནག་དམར་པོའི་གཞུང་གིས་རྒྱལ་སྤྱིའི་ཁྲོད་འཕྲུལ་རིག་ཁོར་ཡུག་གི་ཐབས་བྱུས་ཐོག་ཁེ་ཕན་རྩོད་རྒྱུའི་འདོད་པ་ཡོད་སྐོར་འགྲེལ་བརྗོད་དང་འབྲེལ། འཕྲུལ་རིག་ཐོག་ནས་རྒྱལ་སྤྱིའི་བདེ་འཇགས་དང་ལྷག་པར་དུ་ཁུལ་དེའི་བདེ་འཇགས་སོགས་ཀྱི་ཐད་ལ་ཉེན་ཁ་ཆེན་པོ་ཞིག་ཏུ་ངོས་འཛིན་གྱིས་སྐྱོན་བརྗོད་དང་བློ་འཚབ་ཀྱི་རྣམ་པ་ཤུགས་ཆེར་མངོན་གསལ་གནང་འདུག ཁོང་གིས་དབྱིན་ཡུལ་གྱི་ཕ་མ་རྣམས་ཀྱིས་རང་ཉིད་ཀྱི་ཕྲུ་གུ་རྣམས་ནས་རྒྱ་ནག་གིས་བཟོས་པའི་ Tiktok བརྙན་ཆས་སྤྱོད་རྒྱུ་ཐད་ལ་དགོངས་བཞེས་གནང་དགོས་སྐོར་དང་། དེ་བཞིན་རྒྱ་ནག་གི་ངོས་ནས་འཇིགས་སྐུལ་དང་བཙན་ཤུགས་ཁྲོད་རྒྱལ་ཁབ་གཞན་རྣམས་རྩོད་ཟླའི་ངོ་བོ་དང་། ཡང་ན་ཚོང་རོགས་ཀྱི་ངོ་བོར་ལྟ་ཡི་ཡོད་པར་འགྲེལ་བརྗོད་དང་སྦྲགས། རྒྱ་ནག་གིས་རྒྱལ་སྤྱིའི་ཁྲིམས་ལུགས་དང་རང་དབང་མང་གཙོའི་ལམ་ལུགས་ཀྱི་སྤྱི་ཚོགས་ལ་འཕྲུལ་རིག་བརྒྱུད་ནས་བཙན་ཤུགས་སྤེལ་བཞིན་པར་སྐྱོན་བརྗོད་ནན་པོ་གནང་ཡོད། དེ་བཞིན་ཁུལ་དེའི་རྙིང་ཞེན་ཚོགས་པའི་འཐུས་མི་སྐུ་ཞབས་ Iain Duncan Smith ལགས་ཀྱིས་དབྱིན་ཡུལ་ནས་རྒྱ་ནག་ཐོག་འཛིན་པའི་སྲིད་བྱུས་དམ་པོ་དེ་དུས་ཐོག་ལ་ལག་བསྟར་གནང་ཐུབ་མེད་སྐོར་འགྲེལ་བརྗོད་གནང་སྟེ། ང་ཚོའི་འཚོ་བའི་ཁྲོད་ལ་རྒྱ་ནག་དེ་ཇི་ཙམ་ཉེན་ཁ་ཆེན་པོ་ཞིག་ཏུ་གྱུར་ཡོད་པ་ངོས་འཛིན་ཐུབ་དགོས་གལ་དང་། ཨུ་རུ་སུས་ཡུཀ་རེན་ལ་བཙན་འཛུལ་བྱེད་བཞིན་སྐབས་ཡུཀ་རེན་གྱིས་དེར་གདོང་ལེན་གང་འདྲ་གནང་བ་ལྟར་ང་ཚོས་ཀྱང་རྒྱ་ནག་ལ་དེ་ལྟ་བུའི་གདོང་ལེན་གནང་བའི་དུས་ལ་བབས་ཡོད་སྐོར་གསུངས་འདུག དབྱིན་ཡུལ་དུ་རྟེན་གཞི་བྱས་པའི་རྒྱ་ནག་ནག་གི་འགྲོ་བ་མིའི་ཐོབ་ཐང་འཐབ་རྩོད་པ་སྐུ་ཞབས་ Luke de Pulford ལགས་ཀྱིས་ཀྱང་རྒྱ་ནག་དེ་འཛམ་གླིང་ཞི་བདེ་དང་བརྟན་ལྷིང་ཆེད་ཉེན་ཁ་ཆེན་པོ་ཆགས་ཡོད་པ་ལྟར་ད་བར་འདི་ཕྱོགས་ནས་རྒྱ་ནག་ལ་གདོང་ལེན་གནང་མེད་པ་དེ་ལྟར་ཡང་ད་ཆ་རིམ་བཞིན་གཉིད་སད་པ་ཞིག་ཡིན་སྐོར་འགྲེལ་བརྗོད་གནང་འདུག The Sun ཞེས་པའི་བརྒྱུད་ལམ་གྱིས་གནས་ཚུལ་སྤེལ་བར་དབྱིན་ཡུལ་གྱི་སྲིད་བློན་ལྕམ་སྐུ་ Liz Truss མཆོག་གིས་ཟླ་བ་སྔོན་མར་རྒྱ་ནག་ཐོག་གི་བཞེངས་ཕྱོགས་ལ་བསྐྱར་ཞིབ་ཀྱིས་དེ་ལས་དམ་པ་གནང་རྒྱུའི་གྲ་སྒྲིག་གནང་བཞིན་ཡོད་སྐོར་དང་། རིང་མིན་བསྐྱར་ཞིབ་རྗེས་མའི་ནང་རྒྱ་ནག་དེ་དབྱིན་ཡུལ་ལ་ཉེན་ཚབས་གང་འདྲ་ཆགས་ཡོད་པ་གསལ་བཟོ་གནང་གི་ཡོད་སྐོར་བཀོད་འདུག

རིང་མིན་ཟླ་བ་རྗེས་མའི་ཚེས་ ༣ དང་ ༤ བཅས་གཉིས་རིང་འཇར་མི་ནིར་འཛམ་གླིང་ཁྲོད་སྟོབས་ཆེན་རྒྱལ་ཁབ་ ༧ དང་ཡུ་རོབ་མཐུན་ཚོགས་ལས་གྲུབ་པའི་ G7 ལྷན་ཚོགས་ཀྱི་ཕྱི་སྲིད་བློན་ཆེན་རིམ་པའི་ཚོགས་འདུ་འཚོགས་གཏན་ཁེལ་བ་དང་བསྟུན། དེ་རིང་བཞུགས་སྒར་དུ་ G7 འགོ་ཁྲིད་རྣམས་ལ་བོད་ནང་རྒྱ་ནག་གཞུང་གིས་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭ་མང་དག་ཅིག་གསར་རྒྱག་བརྒྱུད་བོད་མི་རིགས་རྩ་མེད་བཟོ་རྒྱུའི་བྱ་སྤྱོད་སྤེལ་བཞིན་པ་དེ་འཕྲལ་མར་མཚམས་འཇོག་ཐད་ལ་གནོན་ཤུགས་སྤྲོད་དགོས་ཞེས་དང་དེ་འབྲེལ་མཚན་རྟགས་བསྡུ་རུབ་ཀྱི་ལས་འགུལ་ཞིག་དབུ་འཛུགས་གནང་སོང་། བཞུགས་སྒར་དྷརྨ་སཱ་ལཱར་རྟེན་གཞི་བྱས་པའི་བོད་རྒྱལ་ཡོངས་མང་གཙོ་ཚོགས་པ་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གཉིས་མཉམ་འབྲེལ་ཐོག་དེ་རིང་སྔ་དྲོ་ཚོུད་  ༡༠ སྟེང་མེག་གྷན་བཞི་མདོར་ G7 འགོ་ཁྲིད་རྣམས་ལ་བོད་དོན་ཞུ་གཏུག་ཐོག་མཚན་རྟགས་བསྡུ་རུབ་གནང་རྒྱུའི་བདུན་ཕྲག་གསུམ་གྱི་ལས་འགུལ་དབུ་འཛུགས་གནང་སོང་།ལས་འགུལ་འདིའི་ཁྲོད་ G7 འགོ་ཁྲིད་རྣམས་ལ་འབུལ་ལམ་ཞུ་རྒྱུའི་ཞུ་ཡིག་ནང་ད་ལྟའི་ཆར་བོད་ནང་བོད་ཕྲུག་ས་ཡ་གཅིག་ལ་ཉེ་བ་རྣམས་རང་ཉིད་ཀྱི་ནང་མི་དང་སྤྱི་ཚོགས་སོགས་དང་ཁ་བྲལ་གཏོང་བཞིན་པ་དེས་རྒྱ་ནག་གི་གཞི་རྒྱ་ཆེ་བའི་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭ་དང་སྔོན་འགྲོའི་སློབ་གྲྭ་ཁག་གི་ནང་བོད་ཀྱི་ཆོས་དང་རིག་གཞུང་། སྐད་ཡིག་དང་བཅས་པ་མི་རིགས་ཀྱི་ངོ་བོ་རྩ་མེད་བཟོས་ཏེ་རྒྱ་སྒྱུར་སློབ་གསོའི་སྲིད་བྱུས་ལག་བསྟར་བྱེད་བཞིན་པ་དང་། ཕྱོགས་གཞན་ཞིག་ནས་བོད་ནང་བོད་ཡིག་སློབ་ཁྲིད་གཙོ་བོ་བྱེད་མཁན་གྱི་སློབ་གྲྭ་མང་དག་ཅིག་བཙན་དབང་གིས་སྒོ་བརྒྱབ་པ་སོགས་བོད་ནང་གི་བོད་མི་དང་དམིགས་བསལ་བོད་པའི་བུ་ཕྲུག་ཚོར་ལུས་སེམས་གཉིས་ཀར་མནར་གཅོད་ཆེས་ཆེར་གཏོང་བཞིན་ཡོད་པ། རྒྱ་ནག་གི་ཤེས་ཡོན་སྲིད་བྱུས་དེ་དག་གིས་མ་འོངས་པར་སོ་སོའི་སྐད་ཡིག་དང་རིག་གནས། སྤྱི་ཚོགས་སོགས་གང་ལའང་ཆ་རྒྱུས་མེད་པའི་བོད་པའི་མི་རབས་གསར་པ་ཞིག་སྐྱེད་སྲིང་ཐོག་ནས་མཐར་བོད་མི་རིགས་ཀྱི་ངོ་བོ་རྩ་བརླག་གཏང་རྒྱུ་དང་། བོད་ནང་རྒྱ་གཞུང་གི་དབང་བསྒྱུར་སྲ་བརྟན་བཟོ་ཐབས་སོགས་ཀྱི་སྲིད་བྱུས་སྤེལ་དང་སྤེལ་བཞིན་པ་བཅས་མངོན་གསལ་གནང་ཡོད། རྒྱ་ནག་གཞུང་ལ་བོད་ཁུལ་དུ་མི་སེར་སྤེལ་ཡུལ་གྱི་བྱ་སྤྱོད་དང་སྲིད་བྱུས་དེ་དག་མཚམས་འཇོག་དགོས་པའི་གནོན་ཤུགས་སྤྲོད་དགོས་ཞེས་འབོད་སྐུལ་བསྐྱར་ནན་གནང་འདུགརྩ་བའི་འདི་ལོའི་ཕྱི་ཟླ་ ༥ ཚེས་ ༣ ནས་ ༥ བར་ཨིན་ཡུལ་གྱི་རྒྱལ་ས་ལོན་ཌོན་དུ་ཚོགས་པའི་ G7 ལྷན་ཚོགས་ཐོག་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་རྒྱ་གཞུང་གིས་ཤིན་ཅང་ཡུ་གུར་དང་བོད་མི་བཅས་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་སྐྱོན་བརྗོད་ཤུགས་ཆེ་གནང་ཡོད། G7 ལྷན་ཚོགས་ཀྱི་ཕྱི་སྲིད་བློན་ཆེན་རྣམ་པས་རྒྱ་ནག་གཞུང་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གཙོ་འཛིན་གཙོས་རང་དབང་ཅན་གྱི་རྟོག་ཞིབ་པ་རྣམས་འཕྲལ་མར་ཁུལ་དེ་དག་ཏུ་བཀག་སྡོམ་གང་ཡང་མེད་པར་ཕེབས་འཐུས་ཆོག་མཆན་སྤྲོད་དགོས་པའི་རེ་སྐུལ་གནང་མྱོང་ཡོད་པ་ལྟར་སྐབས་དེར་རྒྱ་ནག་གཞུང་གིས་སྐྱོན་བརྗོད་དེ་དག་ལ་ངོས་ལེན་མེད་སྐོར་དང་སྦྲགས་ཏེ་ G7 ལྷན་ཚོགས་ལ་རྒྱ་ནག་གི་ནང་སྲིད་གནད་དོན་ལ་ཐེ་བྱུས་གནང་རྒྱུ་མེད་པའི་ཉེན་བརྡ་བཏང་ཡོད།

བོད་ཀྱི་རྒྱལ་ས་ལྷ་ས་ཡོངས་བཀག་སྡོམ་བྱས་ཏེ་ཉིན་གྲངས་ ༥༨ ཕྱིན་པའི་མཚམས་འདིར་རྒྱ་རིགས་ཚོང་པ་ Tang Yangchun ཞེས་པ་ཞིག་གིས་སྲིད་གཞུང་གིས་ནད་ཡམས་ཀླད་ཀོར་གྱི་སྲིད་བྱུས་འོག་མང་ཚོགས་ལ་བཀག་སྡོམ་དང་བརྟག་དཔྱད་རྫུན་མ་བྱས་དང་བྱེད་བཞིན་པར་མ་བཟོད་ནས་གསར་འགྱུར་ལས་ཁང་ཚོས་ལྷ་ས་ཁུལ་གྱི་གནས་སྟངས་ལ་རྟོག་ཞིབ་བྱེད་དགོས་པའི་ཞུ་སྐུལ་དང་གནས་སྟངས་འདི་མུ་མཐུད་ལྷག་ཚེ་རང་སྲོག་གཅད་རྒྱུའི་ཉེན་བརྡ་བཏང་འདུག འཕྲུལ་སྒྲ་ཐོག་ལོན་ཌོན་གཙུག་ལག་སློབ་གྲྭ་ཆེན་མོའི་ཤར་ཕྱོགས་དང་ཨ་ཕི་རི་ཀའི་ཞིབ་འཇུག་པ་དང་བོད་རིག་པའི་མཁས་དབང་ Robert Barnett ལགས་ཀྱིས་རྒྱ་རིགས་ཚོང་པ་ Tang Yangchun ཞེས་པས་ལྷ་སའི་སྲིད་གཞུང་ནས་ནད་ཡམས་སྟངས་འཛིན་བྱེད་ཕྱོགས་ཐད་སྐྱོན་འཛུགས་ཀྱིས་རང་སྲོག་གཅད་རྒྱུའི་ཉེན་བརྡ་བཏང་ཡོད་པའི་གནད་དོན་སྐོར་བརྙན་པར་ཞིག་བཞག་འདུག་ཅིང་། བརྙན་ནང་ཚོང་པ་དེས་ཁོ་པའི་ནང་མི་རྣམས་དུས་ཚོད་གཅིག་ལ་གཉན་རིམས་ཕོག་ཡོད་མེད་བརྟག་དཔྱད་བྱེད་ས་མི་འདྲ་བ་ལས་གྲུབ་འབྲས་མི་འདྲ་བར་ཐོན་སྟབས་དེ་ལྟར་ཡོང་དགོས་དོན་གང་ཡིན་ནམ་ཞེས་ཀྱི་དྲིས་ཡོད་པར་མ་ཟད། སྲིད་གཞུང་གི་ངོས་ནས་ནད་ཡམས་ཀྱི་འབྱུང་རྐྱེན་གང་ཡིན་མིན་གང་མགྱོགས་རྩད་གཅོད་བྱེད་ཐུབ་པའི་རེ་བ་བྱེད་ཀྱི་ཡོད། དོན་མེད་གོ་ལོག་དང་ཏོག་དབྱིབས་ཀྱི་གྲུབ་འབྲས་རྫུན་མ་དེར་ཆ་འཇོག་བྱས་ནས་མང་ཚོགས་རྣམས་དྲུད་དེ་སྤྱི་སྤྱོད་རླངས་འཁོར་ནང་བརྒྱངས་ཏེ་འགོག་དབྱེ་ཟུར་འཇོག་ཁང་དུ་འཇོག་མཚམས་དགོས་པ་བཤད་འདུག དེ་བཞིན་ཁོ་པས་ལྷ་ས་ནང་གི་གནས་སྟངས་མུ་མཐུད་འདི་ལྟ་བུ་ལྷག་ཚེ་རང་སྲོག་གཅད་རྒྱུ་ཡིན་སྐོར་བཤད་འདུག་པར་མ་ཟད་ལྷག་དོན་ལྷ་ས་ནང་གི་གནས་སྟངས་ཁྲོད་འདིར་མང་ཚོགས་དུ་མས་དཀའ་སྡུག་སྙན་སེང་ཞུ་ཐུབ་རྒྱུ་དཀའ་བ་གྱུར་ཡོད་པ་བཤད་འདུག སྐར་མ་ ༦ ཅན་གྱི་བརྙན་དེ་ཁ་སང་ཆུ་ཚོད་ཁ་ཤས་རྗེས་ནས་ནག་བསུབ་བཏང་ཡོད་ཀྱང་བརྙན་དེར་གཟིགས་མཁན་ཧ་ཅང་མང་པོ་བྱུང་འདུག གཞི་རྩའི་ཁོ་པ་ནི་ཚོང་པ་ཞིག་དང་རྒྱལ་ཞེན་དང་སྲིད་གཞུང་ལ་རྒྱབ་སྐྱོར་བྱེད་མཁན་ཞིག་ཡིན་འདུག་པ་དང་། ཚོང་པ་དེས་དངོས་གནས་བློ་ཁོག་ཆེན་པོའི་ཐོག་ནས་ལྷ་ས་ནང་གི་གནས་སྟངས་སྐོར་དང་ནད་ཡམས་ཀྱི་སྲིད་བྱུས་ལ་ཁག་དཀྲི་བྱས་ཏེ་མང་ཚོགས་རྣམས་ཚོད་མེད་བཀག་སྡོམ་འོག་སྨན་གྱི་མཐུན་རྐྱེན་སོགས་མ་རག་པའི་དཀའ་སྡུག་མྱོང་བཞིན་པའི་གནད་དོན་བཤད་ཡོད། བོད་ནང་གཉན་རིམས་ཀླད་ཀོར་ཞེས་པའི་སྲིད་བྱུས་འོག་ལྷ་ས་ནང་བོད་མི་མང་དག་ཅིག་ལ་ཞལ་ལག་འདང་ངེས་མེད་པའི་ཁར་ཕྱི་ལོགས་ལ་ཟས་རིན་ཧ་ཅང་འཕར་བའི་དཀའ་ངལ་འཕྲད་ཡོད།  ཆབས་ཅིག་འཕྲུལ་སྒྲ་ཐོག་ཏུ་ད་ཆ་ལྷ་ས་ནང་ནད་ཡམས་ཀྱི་ཉེན་ཚབས་ཆུང་བའི་ས་ཚིགས་ཀྱི་མང་ཚོགས་རྣམས་རང་ཁྱིམ་ནས་ཕྱིར་ཐོན་ཆོག་ཀྱང་རང་ཉིད་སོ་སོའི་ས་ཚིགས་ནས་ཕྱིན་ཐོན་ཆོག་གི་མེད་པར་མ་ཟད་ཕྱི་ཕྱོགས་ནས་དངོས་ཟོག་ཉོས་པ་རྣམས་བཞི་མདོ་ནས་ལེན་ཆོག་གི་ཡོད་པའི་གནས་ཚུལ་བཀོད་འདུག

འདི་ལོའི་ཕྱི་ཟླ་ ༨ པ་ནས་བཟུང་བོད་ནང་ཏོག་དབྱིབས་གཉན་རིམས་ ༡༩ པ་ཁྱབ་གདལ་ཆེས་ཆེར་འགྲོ་བཞིན་པའི་ཁྲོད་རྒྱ་གཞུང་གིས་གཉན་རིམས་ཀླད་ཀོར་ཞེས་པའི་སྲིད་བྱུས་ལག་བསྟར་འོག་རྒྱལ་ས་ལྷ་ས་གཙོས་བོད་རང་སྐྱོང་ལྗོངས་ཟེར་བའི་ས་ཁུལ་མང་ཆེ་བ་སྒོ་རྒྱ་བསྡམས་ནས་ཟླ་བ་གཉིས་ཙམ་འགྲོ་མུས་ཀྱི་མཚམས་འདིར་རྒྱ་ནག་གཞུང་ཕྱོགས་ནས་མང་ཚོགས་ལ་གཉན་རིམས་འགོག་ཐབས་ཀྱི་ལས་དོན་དང་དེ་འབྲེལ་ངལ་བ་འཕྲད་པ་རྣམས་ལ་དངུལ་གཙོ་གྱུར་ཉེར་མཁོ་ཁག་མཐུན་རྐྱེན་སྦྱོར་བཞིན་ཡོད་པར་བཤད་འདུག་ཀྱང་། རྒྱལ་ས་ལྷ་ས་ནང་བོད་མི་མང་དག་ཅིག་ལ་ཞལ་ལག་འདང་ངེས་མེད་པའི་ཁར་ཕྱི་ལོགས་ལ་ཟས་རིན་ཧ་ཅང་འཕར་བའི་དཀའ་ངལ་འཕྲད་བཞིན་པར་མ་ཟད། ལྷག་པར་ད་ལྟའི་ཆར་བེད་སྤྱོད་ཆེ་བའི་ཁ་པར་གྱི་འགྲོ་གྲོན་སྔར་ལྷག་འཕར་ཡོད་པ་སོགས་ཀྱི་ངལ་བ་འཕྲད་བཞིན་འདུག དེ་རིང་བོད་ཀྱི་རྒྱལ་ས་ལྷ་སའི་གྲོང་ཁྱེར་ལས་ཁུངས་ཀྱིས་མང་ཚོགས་ཁྲོད་ལོ་ན་བགྲེས་པ་དང་། ཚོང་ལས་གཉེར་མཁན། ཉམ་ཐག ནད་པ། ཞོར་ལས་པ་སོགས་སྡེ་ཁག་བརྒྱད་ལ་དབྱེ་ནས་དངུལ་གྱི་རོགས་སྐྱོར་བྱ་རྒྱུ་ཡིན་པའི་གསལ་བསྒྲགས་ཤིག་སྤེལ་འདུག་ཀྱང་། ཕྱོགས་གཞན་ཞིག་ནས་ས་གནས་སུ་དུས་ད་ལྟའང་ཞལ་ལག་འདང་ངེས་མེད་པའི་ཁར་ཕྱི་ལོགས་ལ་ཟས་རིན་ཧ་ཅང་འཕར་བའི་དཀའ་ངལ་འཕྲད་བཞིན་པ་དང་། ལྷག་པར་དུ་འདས་པའི་ཉིན་ཤས་ནང་ China Mobile ཞེས་བོད་ཁུལ་དུ་ལག་ཐོགས་ཁ་པར་ཚོང་ལས་ཁང་གིས་མང་ཚོགས་ལ་ཁ་པར་སྤྱོད་པར་རིན་གོང་རྒྱུན་ལྡན་ལས་ལྡབ་ལོག་སྤར་ཆ་བྱས་ཡོད་སྟབས་འདས་པའི་གཟའ་འཁོར་ནང་བོད་ནས་བརྙན་དང་འདྲ་པར་ཕྱིར་འགྱར་བྱུང་བ་ལས་རྣམ་ཀུན་ཁ་པར་སྤྱོད་པར་འགྲོ་གྲོན་རྒྱ་སྒོར་ ༡༥༠ ནས་ ༢༠༠ བར་ཡིན་པ་ལ་ད་ལྟ་རྒྱ་སྒོར་ ༦༠༠ ནས་ ༧༠༠ དང་ཁ་ཤས་ལ་རྒྱ་སྒོར་ ༡༠༠༠ ལྷག་ཡིན་པའི་གནས་ཚུལ་མང་དག་ཅིག་མཐོང་རྒྱུ་འདུག བརྙན་པར་གཞན་ཞིག་གི་ནང་གཉན་རིམས་ཁྱབ་གདལ་རྐྱེན་གྱིས་བོད་མི་ཞིག་ལ་ལྕག་ཐགས་བརྒྱབ་སྟེ་ཁྱིམ་ནས་བཙན་ཁྲིད་བྱེད་བཞིན་པ་དང་། དེར་ཞུ་གཏུག་བྱེད་མཁན་མི་གཞན་ཞིག་ལ་གཅར་རྡུང་བཏང་ཡོད་པ་མངོན་རྒྱུ་འདུག་པར་མ་ཟད། དེ་བཞིན་བརྙན་གཞན་ཞིག་གི་ནང་ས་གནས་བོད་མི་ཞིག་གིས་ལས་བྱེད་པས་ལོ་ན་བགྲེས་པ་ལའང་གཅར་རྡུང་བཏང་ཡོད་སྐོར་བཤད་འདུག དེ་རིང་རྒྱ་ནག་གཞུང་གིས་མང་ཚོགས་ལ་རོགས་སྐྱོར་བྱ་རྒྱུ་ཡིན་པའི་གསལ་བསྒྲགས་སྤེལ་བ་དེ་དང་འབྲེལ། བོད་གནད་དབྱེ་ཞིབ་པའི་ཁྲོད་རྒྱ་གཞུང་གིས་རོགས་སྐྱོར་གྱི་གསལ་བསྒྲགས་བྱས་པ་དེ་དག་མང་ཚོགས་ཀྱི་དངོས་ཡོད་དཀའ་ངལ་དང་མཐུན་གྱི་མེད་པ་དང་ད་བར་བོད་ནང་ལོགས་ཀྱི་བོད་མི་དང་ཐ་ན་རྒྱ་རིགས་མང་དག་ཅིག་ནས་ཀྱང་རྒྱ་ནག་གཞུང་གི་དྲ་རྒྱའི་ཐོག་གང་བཤད་པ་རྣམས་རྫུན་གཏམ་ཁོ་ན་ཡིན་པར་གསུང་མཁན་ཇེ་མང་དུ་འགྲོ་ཡོད་པ་ལྟར་མང་ཚོགས་ལ་དོན་དངོས་ཐོག་དངུལ་ལག་པར་རག་ཐུབ་རྒྱུ་ཁག་པོ་ཆགས་ཡོད་པ་གསུངས་འདུག བོད་ནང་འདས་པའི་ཟླ་བ་གཉིས་ཙམ་ནས་གཉན་རིམས་དང་གཞུང་གི་དམ་དྲག་གི་ངལ་བ་ཆེས་འཕྲད་པའི་ཁྲོད་ཁ་སང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ ༡༩ པའི་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་སྒྲགས་ཐེངས་ ༡༣༠ སྤེལ་སྐབས་བོད་མིའི་སྒྲིག་འཛུགས་ཀྱི་ངོས་ནས་ཁ་ཉིན་རེས་གཟའ་ལྷག་པ་ནས་དབུ་འཛུགས་གནང་སྟེ། ལས་ཁུངས་ཁག་གི་ངོས་ནས་རེས་གཟའ་ལྷག་པ་ནམ་ཡིན་ལ་ལས་ཁུངས་སོ་སོའི་ནང་གཞིས་བཞུགས་རྒྱ་ཆེ་མང་ཚོགས་རྣམས་ལ་ཆེད་ཀྱིས་དམིགས་ཆུ་ཚོད་གཅིག་རིང་རྗེ་བཙུན་སྒྲོལ་མའི་གཟུངས་སྔགས་གསོག་སྒྲུབ་གནང་བ་དང་འབྲེལ། གཞིས་ལུས་བོད་མི་རྣམས་ཀྱི་ངོས་ནས་དངངས་སྐྲག་མ་གནང་བར་གཉན་རིམས་འགོག་ཐབས་ཀྱི་གནང་སྒོ་ཁག་མུ་མཐུད་གནང་དགོས་པའི་སྐུལ་མ་གནང་ཡོད།