Day4
སྔོན་རྩིས་གཏན་འབེབས་ཀྱི་ལས་དོན་ཁྲོད་དབུས་འོས་བསྡུ་ལས་ཁང་ལ་བཀའ་འདྲི་ཁག་ཅིག་ཕེབས་པ།
དེ་རིང་སྐབས་ ༡༦ བོད་མི་མང་སྤྱི་འཐུས་ལྷན་ཚོགས་གྲོས་ཚོགས་ཚོགས་དུས་བཅུ་པའི་ལས་ཉིན་བཞི་པའི་ཚོགས་དུས་གཉིས་པའི་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༡༌༢༢ ལོའི་སྔོན་རྩིས་གཏན་འབེབས་ཀྱི་ལས་རིམ་ཐོག་ཕེབས་ཡོད་པ་དང་། སྐབས་དེར་དབུས་འོས་བསྡུ་ལས་ཁང་གི་སྔོན་རྩིས་གཏན་འབེབས་ཀྱི་ལས་དོན་ཁྲོད་འགྲོ་བཞིན་པའི་སྲིད་སྤྱི་གཉིས་ཀྱི་འོས་བསྡུའི་ལས་རིམ་དང་འབྲེལ་ནས་དབུས་འོས་བསྡུ་ལས་ཁང་ལ་བཀའ་འདྲི་ཁག་ཅིག་ཕེབས་སོང་།
སྤྱི་འཐུས་ཁག་ཅིག་གིས་སྲིད་སྤྱི་གཉིས་ཀྱི་འོས་བསྡུའི་ལས་རིམ་ཁྲོད་འཛིན་སྐྱོང་བཀའ་ཤག་ནས་ས་གནས་འགོ་འཛིན་ཁག་ཅིག་གནས་སྤོར་བཏང་པའི་གནད་དོན་དང་དེ་བཞིན་སྲིད་སྐྱོང་མཆོག་གི་ལས་ཡུན་ཚང་ལ་ཉེ་བའི་སྐབས་སུ་ཐོན་མཇལ་དུ་ཕེབས་སྲོལ་ཡོད་པ་དེ་འོས་བསྡུའི་སྐབས་སུ་ཕེབས་མི་དགོས་པ་གནང་དགོས་པའི་གཞེན་སྐུལ་གནང་ཡོད་པ་རེད། སྤྱི་འཐུས་ལ་ལས་འོས་བསྡུའི་དེབ་སྐྱེལ་བྱེད་སྐབས་དང་འོས་གྲངས་གསལ་བསྒྲགས་གནང་སྟངས། དེ་བཞིན་ཆོས་བརྒྱུད་དང་འབྲེལ་བའི་འོས་ཤོག་གཙོས་འོས་བསྡུའི་ལས་རིམ་ཁག་ཅིག་གྲ་སྒྲིག་ཚགས་ཚུད་བྱུང་མེད་པའི་དགོངས་ཚུལ་དང་བཀའ་འདྲི་ཁག་ཅིག་ཞུས་ཡོད། སྤྱི་འཐུས་ཁག་ཅིག་ནས་ཏོག་དབྱིབས་ཀྱི་ཛ་དྲག་གནས་སྟངས་ཁྲོད་འོས་བསྡུ་ལས་ཁང་ནས་ཕྱག་ལས་ཡག་པོ་གནང་ཡོད་པའི་བསྔགས་བརྗོད་གནང་མཁན་ཡང་བྱུང་སོང་བར་མ་ཟད། སྤྱི་ཡོངས་ནས་འོས་བསྡུའི་སྒྲིག་གཞི་འདི་གྲོས་ཚོགས་ནས་གཏན་འབེབས་གནང་བ་ཞིག་ཡིན་སྟབས་གྲོས་ཚོགས་འཐུས་མི་ཚོས་དེར་དགོངས་པ་བཞེས་རྒྱུ་དེ་ཡང་གལ་ཆེན་པོ་ཡིན་པའི་དགོངས་ཚུལ་གསུང་མཁན་ཡང་བྱུང་ཡོད།འོན་ཀྱང་གྲོས་ཚོགས་ནང་དབུས་འོས་བསྡུ་ལས་ཁང་གི་སྐུ་ཚབ་མེད་ཙང་སྤྱི་འཐུས་རྣམ་པའི་བཀའ་འདྲི་ཁག་འཛིན་སྐྱོང་བཀའ་ཤག་བརྒྱུད་དབུས་འོས་བསྡུ་ལས་ཁང་ལ་སྙན་སེང་ཞུས་ཏེ་གྲོས་ཚོགས་ཀྱི་ལས་ཉིན་རྗེས་མའི་སྐབས་སུ་ལན་འདེབས་གསལ་པོ་ཞིག་གྲོས་ཚོགས་སུ་ཕེབས་རྒྱུ་ཡིན་སྟབས། དེ་རིང་དབུས་འོས་བསྡུ་ལས་ཁང་གི་སྔོན་རྩིས་གཏན་འབེབས་མ་ཐུབ་པར་སྒོ་ཕྱེ་ནས་བཞག་དགོས་བྱུང་ཡོད།
དེ་རིང་སྐུ་ཚབ་དོན་གཅོད་ལས་ཁུངས་ཁག་གི་སྔོན་རྩིས་གཏན་འབེབས་གནང་སྐབས་བལ་ཡུལ་སྐུ་ཚབ་དོན་གཅོད་ལས་ཁུངས་ཀྱི་སྔོན་རྩིས་ལས་དོན་དང་འབྲེལ་སྤྱི་འཐུས་ཁག་ཅིག་ནས་སྲིད་སྐྱོང་མཆོག་གིས་ལས་ཡུན་ལོ་བཅུ་ཙམ་འགྲོ་བཞིན་པའི་ཁྲོད་དེར་བལ་ཡུལ་དུ་ཕེབས་མེད་སྟབས། ཡོང་རྒྱུའི་དུས་ཡུན་ནང་བལ་ཡུལ་དུ་ཕེབས་འཆར་ཡོད་དམ་ཞེས་དང་བལ་ཡུལ་ནང་ཡོད་པའི་སྐྱབས་བཅོལ་བོད་མི་ཚོར་འཕྲད་བཞིན་པའི་ཁྲིམས་མཐུན་གྱི་ཡིག་ཆ་དང་འཚོ་ཐབས་སོགས་ཀྱི་དཀའ་ངལ་ཐད་སྒྲིག་འཛུགས་ནས་གཟིགས་སྐྱོང་གང་འདྲ་གནང་ཡོད་མེད་སོགས་བཀའ་འདྲི་ཁག་ཅིག་ཞུས་སོང་། སྲིད་སྐྱོང་མཆོག་ནས་ད་བར་སྲིད་སྐྱོང་གི་ངོ་བོའི་ཐོག་ནས་བལ་ཡུལ་ནང་ཕེབས་མ་ཐུབ་པ་དེར་བློ་ཕམ་ཆེན་པོ་གནང་ཡོད་པ་དང་། དེ་ཡང་རྐང་རྒྱ་ནག་གཞུང་གི་གནོན་ཤུགས་འོག་བལ་ཡུལ་གཞུང་ནས་སྲིད་སྐྱོང་གིས་དབུས་པའི་བོད་མིའི་དབུ་ཁྲིད་དགུ་བལ་ཡུལ་ནང་ཕེབས་མི་ཆོག་པའི་དམ་དྲག་བྱས་པའི་དབང་གིས་ཡིན་པ་སོགས་འགྲེལ་བརྗོད་དང་སྦྲགས། སྲིད་སྐྱོང་མཆོག་སྐུ་སྒེར་ཕེབས་མ་ཐུབ་ཀྱང་བཀའ་ཤག་གི་བཀའ་བློན་ཁག་ཅིག་བལ་ཡུལ་དུ་ཕེབས་ཏེ་བོད་མིའི་གནས་སྟངས་ལ་གཟིགས་ཞིབ་སོགས་གནང་ཡོད་སྐོར་གསུངས་ཡོད།སྲིད་སྐྱོང་མཆོག་ནས་བལ་ཡུལ་ནང་སྡོད་ཁང་དང་འཚོ་ཐབས་དཀའ་ངལ་ཡོད་མཁན་ཚོར་Katmandu རྒྱལ་སའི་ཁུལ་དུ་སྡོད་ཁང་གསར་རྒྱག་བྱེད་རྒྱུ་དེ་ཆབ་སྲིད་སོགས་ཀྱི་གནས་བབ་གང་གི་ཆ་ནས་ཁག་པོ་ཞིག་ཆགས་ཡོད་སྟབས་བལ་ཡུལ་བྱམས་པ་གླིང་དང་། རྒྱ་གར་ནང་གཞིས་སྤོར་གནང་འདོད་ཡོད་མཁན་ཚོར་སྡོད་ཁང་གནང་རྒྱུའི་ལས་གཞི་ཞིག་ནང་སྲིད་ལས་ཁུངས་བརྒྱུད་གསལ་བསྒྲགས་གནང་ཟིན་ཡོད་པ་སོགས་གསུངས་སོང་། དེ་བཞིན་སྤྱི་འཐུས་ཁག་ཅིག་ནས་བལ་ཡུལ་ནང་ཆོས་དང་རིག་གཞུང་གི་ཐོག་ནས་འབྲེལ་བ་འཛུགས་ཐབས་གནང་དགོས་པའི་འབོད་སྐུལ་གནང་བ་དང་། སྦར་སིལ་སྐུ་ཚབ་དོན་གཅོད་དང་པེ་རི་སི་བོད་ཁང་ཐེབས་རྩའི་སྔོན་རྩིས་ལས་དོན་དང་འབྲེལ་ས་གནས་ཁག་ཏུ་བོད་དོན་ལས་འགུལ་སྤེལ་མཁན་ལ་བསྔགས་བརྗོད་དང་མ་འོངས་པར་འཛིན་སྐྱོང་གི་ངོས་ནས་ཕྱི་རྒྱལ་ཁག་ཏུ་བོད་ཀྱི་ཆོས་དང་རིག་གཞུང་ཐོག་ཤུགས་སྣོན་བྱེད་དགོས་པའི་དགོངས་ཚུལ་གསུང་མཁན་བྱུང་ཡོད།དེ་རིང་གི་གྲོས་ཚོགས་ལས་རིམ་ཐོག་སྔོན་རྩིས་ལས་དོན་དང་འབྲེལ་སྐུ་ཚབ་དོན་གཅོད་ལས་ཁུངས་ཁག་དང་། ལས་བྱེད་འདེམས་བསྐོ་ལྷན་ཁང་། དེ་བཞིན་སྤྱི་ཁྱབ་རྩིས་ཞིབ་ལས་ཁང་དང་དེའི་ཡན་ལག་ལས་ཁང་ཁག་བཅས་ཀྱི་རྩིས་ལོ་ ༢༠༢༡ ནས་༢༠༢༢ ལོའི་ཕྱོགས་བསྡོམས་སྔོན་རྩིས་འགྲོ་གྲོན་གྱི་དགོས་དངུལ་ཁག་གཏན་འབེབས་གནང་སྟེ་དཔལ་འབྱོར་ལས་ཁུངས་ཀྱི་སྔོན་རྩིས་གཏན་འབེབས་ལས་དོན་ཐོག་ཕེབས་ཡོད།
བོད་མིའི་སྒྲིག་འཛུགས་ཀྱི་སྲི་ཞུ་བ་དང་ལས་ཁུངས་སུ་བཅར་མཁན་ཚོས་བོད་ཆས་སྤྲས་དགོས་པའི་གྲོས་ཆོད།
དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་ ༥ པའི་ཐོག་ བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ཚོས་གཙོས་པའི་དབུས་ས་ཡན་ལག་དང་བཅས་པའི་སྲི་ཞུ་བ་ཕོ་མོ་ཁྱད་མེད་ཀྱིས་ཉིན་ལྟར་ལས་ཁུངས་སུ་བཅར་སྐབས་བོད་ཆས་སྤྲས་དགོས་པ་དང་བོད་སྐད་གཙང་མ་རྒྱག་དགོས་པ། དེ་བཞིན་ལས་ཁུངས་ཁག་ལ་བཅར་མཁན་བོད་མི་སྐྱ་སེར་སུ་རུང་ལའང་དེ་དེ་བཞིན་གྱི་གཞེན་སྐུལ་གནང་དགོས་པའི་གྲོས་ཆོད་ཅིག་མང་མོས་ཀྱིས་གཏན་འབེབས་གནང་སོང་།དེ་རིང་གྲོས་ཚོགས་ཀྱི་སྔ་དྲོའི་ཚོགས་ཐེངས་དང་པོའི་ལས་རིམ་དེ་སྤྱི་འཐུས་སྒེར་གྱི་གྲོས་ཆོད་གྲོས་འཆར་ཐོག་ཕེབས་པ་དང་འབྲེལ་ནས་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་ཀྱིས་སྒེར་གྱི་གྲོས་ཆོད་གྲོས་འཆར་བསྣམས་པར་ད་ཕན་རང་རེ་བོད་མིའི་སྒྲིག་འཛུགས་ཀྱི་དབུས་ས་ཡན་ལག་དང་བཅས་པའི་སྲི་ཞུ་བ་སུ་འདྲ་ཞིག་ཡིན་རུང་ཕོ་མོ་ཁྱད་མེད་ཀྱིས་ཉིན་ལྟར་ལས་ཁུངས་སུ་བཅར་སྐབས་བོད་ཆས་སྤྲས་དགོས་པ་དང་བོད་སྐད་གཙང་མ་རྒྱག་དགོས་པ། དེ་བཞིན་ལས་ཁུངས་ཁག་ལ་བཅར་མཁན་བོད་མི་སྐྱ་སེར་སུ་རུང་ལའང་དེ་དེ་བཞིན་གྱི་གཞེན་སྐུལ་གནང་དགོས་ཞེས་འཁོད་ཡོད་པ་ལྟར། དེའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་གིས་གཙོས་པའི་སྤྱི་འཐུས་རྣམ་པས་བགྲོ་གླེང་ལྷུག་པོ་གནང་སྟེ་གྲོས་ཆོད་ཀྱི་ཚིག་བརྗོད་ལ་འགྱུར་བ་ཕྲན་བུ་གནང་མཐར་མང་མོས་ཀྱིས་གཏན་འབེབས་གནང་ཡོད། སྐབས་དེར་གྲོས་འཆར་འདོན་མཁན་དང་རྒྱབ་སྐྱོར་གནང་མཁན་སྤྱི་འཐུས་གཉིས་ཀྱི་ངོས་ནས་བོད་བཙན་པོའི་དུས་སྐབས་ནས་བཟུང་བོད་ཀྱི་ཆས་གོས་དར་སྲོལ་དང་། ཆས་གོས་ཀྱི་དཔའ་ཉམས་བཅས་ཞིབ་རྒྱས་སུ་ངོ་སྤྲོད་གནང་བ་དང་འབྲེལ། བཙན་བྱོལ་རང་དབང་ལུང་པར་བཞུགས་པའི་བོད་མི་རྣམས་ནས་བོད་ཆས་ལེགས་པོ་སྤྲད་ཀྱི་མེད་པ་དང་གཞིས་བཞུགས་བོད་མིས་བོད་ཆས་ལེགས་པོ་སྤྲས་པའི་སྐུ་པར་ལྷན་བསྒྲིགས་ཀྱིས་བློ་འཚབ་ཡོད་པའི་རྣམ་པ་ཆེད་བཏོན་གནང་བ་མཇལ་རྒྱུ་ཡོད་པ་དང་། ལྷག་དོན་བཞུགས་སྒར་དྷརྨ་ས་ལའི་བོད་མིའི་སྒྲིག་འཛུགས་ཀྱི་དཀྱིལ་འཁོར་ལྟ་བུར་མཚོན་ན་སྲི་ཞུ་བའི་ཁོངས་ནས་སྐུ་སྐྱེད་མ་ཚོས་སྔར་ནས་ད་བར་བོད་ཆས་འཐུས་ཚང་སྤྲ་བཞིན་ཡོད་ཀྱང་། སྐྱེད་པ་ཚོས་བོད་ཆས་མ་སྤྲས་པའི་གནས་སྟངས། གཞི་རིམ་མང་ཚོགས་ཀྱི་ཐུགས་རེ་དང་སྲི་ཞུ་བའི་འགན་འཁྲི། དེ་བཞིན་བོད་ཀྱི་ཆོས་དང་རིག་གཞུང་སྲུང་སྐྱོབ་བཅས་ཀྱི་གནད་དོན་མངོན་གསལ་གནང་བ་དང་སྦྲགས། བོད་མིའི་སྒྲིག་འཛུགས་ཀྱི་སྲི་ཞུ་བ་དང་དབུ་ཁྲིད་རྣམས་མང་ཚོགས་ཀྱི་མིག་དཔེ་ཡར་ལྟ་ཞུ་ཡུལ་ཞིག་ཡིན་སྟབས་གྲོས་ཆོད་དེ་ཆེད་བཏོན་གནང་བཞིན་ཡོད་པ་གསུངས་ཡོད།སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་གྲོས་འཆར་ལ་རྒྱབ་སྐྱོར་གནང་བ་དང་འབྲེལ་ནས་འཛིན་སྐྱོང་བཀའ་ཤག་གི་ངོས་ནས་གངས་སྐྱིད་ཡོངས་རྫོགས་སྲོལ་རྒྱུན་གྱི་རྣམ་པ་ཆེད་བཟོ་གནང་ཡོད་སྐོར་གསུངས་པ་དང་ཆབས་ཅིག ཕྱི་ལོ་ ༢༠༡༡ ལོ་ནས་བཟུང་རེས་གཟའ་ལྷག་པ་ནམ་ཡིན་ལ་སྲིད་སྐྱོང་སྐུ་ཉིད་ནས་བོད་ཆས་སྤྲས་པ་དང་དེ་བཞིན་སྲི་ཞུ་བ་གཞན་ཚོར་དེ་ལྟར་སྤྲས་དགོས་པའི་སྐུལ་མ་གནང་ཡོད་པར་གསུངས་སོང་།སྤྱི་འཐུས་གཞན་ཁག་གིས་རྩ་བའི་གྲོས་ཆོད་གྲོས་འཆར་ལ་རྒྱབ་སྐྱོར་ཞུས་ཡོད་ཀྱང་གྲོས་འཆར་གྱི་ཚིག་བརྗོད་ནང་དུ་ཁམས་གཙང་ཞེས་པའི་ཐ་སྙད་དེ་ཕྱག་བསྟར་གནང་སྐབས་ངལ་བ་འཕྲད་སྲིད་པར་བརྟེན་ཚིག་བརྗོད་དེ་ཕྱིར་འཐེན་གནང་དགོས་པ་དང་། སྲི་ཞུ་བ་ཙམ་མ་ཡིན་པར་མཛད་གཙོ་རྣམ་པ་ལའང་དེ་མཚུངས་ཐུགས་འགན་ཡོད་སྟབས་ཚིག་བརྗོད་ཀྱི་ནང་དུ་དེ་ལྟར་འཁོད་དགོས་པའི་སྐོར་གླེང་སློང་གནང་བ་དང་འབྲེལ་གྲོས་ཆོད་གཏན་འབེབས་སྐབས་ཚིག་བརྗོད་ལ་འགྱུར་བ་ཕྲན་བུ་གནང་ཡོད་པ་རེད།དེ་བཞིན་སྤྱི་འཐུས་ཁག་ཅིག་ནས་གྲོས་འཆར་ལ་རྒྱབ་སྐྱོར་གནང་ཡོད་པ་དེ་ལྟར་ཡང་། སྒྲིག་གཞི་ཞིག་གི་ཐོག་ནས་མ་ཡིན་པར་མ་སྐུལ་དང་བླངས་ཀྱིས་རང་མི་རིགས་ཀྱི་ཆས་གོས་ལ་སྤོབས་པ་དང་བཅས་སྤྲས་དགོས་གལ་ཡིན་པར་གཟིགས་སྐོར་གསུངས་པ་དང་རང་ཉིད་ཀྱི་ཚོར་བའི་ཐོག་ནས་དེ་ལྟར་གནང་གནད་ཡིན་པར་གསུངས་སོང་།སྤྱི་འཐུས་ཤིག་གིས་བོད་བརྒྱུད་ནང་བསྟན་གྱི་དགོན་སྡེ་ཁག་ཏུ་བཅར་སྐབས་ཕྱི་རྒྱལ་མི་སྣ་སོགས་སུ་ཡིན་རུང་གྱོན་ཆས་འཐུས་ཚང་སྤྲས་དགོས་པའི་སྐུ་མ་གནང་གལ་སྐོར་གསུངས་ཡོད།རྩ་བའི་དེ་རིང་སྔ་དྲོའི་ཚོགས་ཐེངས་གཅིག་སྤྱིར་འཐུས་སྒེར་གྱི་གྲོས་ཆོད་གྲོས་འཆར་ཐོག་ཕེབས་པའི་རྗེས་སུ་ཉིན་འཁྱོངས་རིང་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་བཅས་པའི་སྔོན་རྩིས་གཏན་འབེབས་ཀྱི་ལས་རིམ་ཐོག་ཕེབས་ཡོད།
གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་སྤྱི་མོས་ཀྱིས་གཏན་འབེབས།
དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་བཞི་པའི་སྔ་དྲོའི་ཚོགས་དུས་ཐོག་བོད་མི་མང་སྤྱི་འཐུས་རྣམ་པས་མུ་མཐུད་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་ལྷུང་པོ་གནང་སྟེ་རྒྱ་ནག་གཞུང་ནས་བོད་མི་དཔའ་བོ་དཔའ་མོའི་མངོན་འདོད་ལ་ངེས་པར་དུ་འགན་འཁུར་བདག་སྤྲོད་ཞུ་དགོས་པ་མ་ཟད་རྒྱ་ནག་ནང་འཚོགས་ལ་ཉེ་བའི་ཨོ་ལམ་པིག་རྩེད་འགྲན་སོགས་དང་བསྟུན་བཀའ་སྤྱི་གཉིས་ཀྱིས་གཙོས་པའི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གིས་འཛམ་གླིང་ཡོངས་ཁྱབ་ཏུ་ངོ་རྒོལ་གྱི་ལས་འགུལ་རྒྱ་གང་ཆེར་སྤེལ་དགོས་གལ་ཡིན་པ་སོགས་ཀྱི་གྲོས་ཆོད་གྲོས་འཆར་དོན་ཚན་བརྒྱད་ཅན་ཞིག་སྤྱི་མོས་ཀྱིས་གཏན་འབེབས་གནང་སོང་།གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གྱི་སྔོན་གླེང་ནང་དུ་ཕྱི་ལོ་ ༡༩༥༩ ལོའི་བར་དུ་བོད་འདི་རང་དབང་རང་བཙན་གྱི་རྒྱལ་ཁབ་ཡིན་པ་དང་། དགྲ་བོ་རྒྱ་དམར་གཞུང་གིས་བོད་ལ་དྲག་པོའི་བཙན་འཛུལ་བྱས་པའི་རྗེས་སུ་རྒྱ་ནག་དམར་ཤོག་གཞུང་གིས་མི་སེར་སྤེལ་བའི་སྲིད་བྱུས་འོག་རྒྱ་རིགས་མང་པོ་བོད་སར་གནས་སྤོས་བྱས་པ། བོད་བརྒྱུད་ནང་བསྟན་རྒྱ་ནག་ཅན་དུ་འགྱུར་རྒྱུའི་སྲིད་བྱུས་འོག་དགོན་སྡེ་ཁག་གི་གྲྭ་བཙུན་ལ་ཚད་བཀག་བྱས་པ་སོགས་ལོ་རྒྱུས་ཐོག་བོད་ཀྱི་དངོས་ཡོད་གནས་བབས་དང་རྒྱ་གཞུང་གི་བྱེད་བབ་བཅས་འགྲེལ་བརྗོད་དང་སྦྲགས། བོད་རྒྱལ་ཁབ་ཆེན་པོའི་རྒྱལ་བསྟན་ཆབ་སྲིད་མི་རིགས་དང་བཅས་པའི་ཆེད་དུ་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་གྱི་རྒྱལ་གཅེས་དབའ་བོ་དཔའ་མོ་རྣམས་ཀྱི་སྙིང་སྟོབས་ལ་ཡི་རངས་དང་། ཤུལ་ལུས་ནང་མི་ཉེ་འབྲེལ་ཡོངས་ལ་གདུང་སེམས་མཉམ་བསྐྱེད། དེ་བཞིན་བོད་མི་དཔའ་བོ་དཔའ་མོ་གྲངས་ ༡༥༥ ཡིས་རང་ལུས་མེར་བསྲེགས་གནང་སྟེ་རྒྱ་གཞུང་ལ་ཞི་རྒོལ་གནང་ཡོད་པ་དེ་དག་གི་གདུང་འབོད་དང་ཞལ་ཆེམས། མངོན་འདོད་བཅས་ལ་རྒྱ་ནག་གཞུང་ནས་ངེས་པར་དུ་འགན་འཁུར་བདག་སྤྲོད་ཞུ་དགོས་པ་སོགས་ཁྱོན་དོན་ཚན་དྲུག་ཆེད་བཀོད་གནང་ཡོད་པ་རེད། སྤྱི་འཐུས་རྣམ་པས་དོན་ཚན་དེ་དག་ཐོག་བགྲོ་གླེང་གི་ཆ་ཤས་བཞེས་པ་དང་འབྲེལ་ནས་ད་ལྟའི་ཆར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་རྐྱེན་གྱིས་རྒྱལ་སྤྱིའི་ཁྱོན་ཡོངས་ཀྱིས་རྒྱ་ནག་ལ་ལྟ་སྟངས་བཟང་པོ་མེད་པའི་ཁར་རྒྱ་ནག་ནང་འཚོགས་ལ་ཉེ་བའི་རྒྱལ་སྤྱིའི་ཨོ་ལམ་པིག་རྩེད་འགྲན་སོགས་ཀྱི་གོ་སྐབས་དང་བསྟུན་བོད་མིའི་ངོས་ནས་དུས་ཚོད་དམ་འཛིན་གྱིས་ལས་འགུལ་སྤེལ་དགོས་པ་སོགས་ཀྱི་དགོངས་ཚུལ་ཆེས་ཆེར་གནང་ཡོད་སྟབས། གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་དོན་ཚན་དྲུག་པོའི་ཐོག་རྒྱ་ནག་ནང་འཚོགས་ལ་ཉེ་བའི་རྒྱལ་སྤྱིའི་ཨོ་ལམ་པིག་དང་། རྒྱ་ནག་དམར་ཤོག་གཞུང་གིས་བོད་ཞི་བའི་བཅིངས་བཀྲོལ་བཏང་ནས་ལོ་ངོ་ ༧༠ འཁོར་ཡོད་ཟེར་བའི་དུས་དྲན་སྐབས་བོད་མིའི་སྒྲིག་འཛུགས་བཀའ་སྤྱི་གཉིས་ཀྱིས་གཙོས་པའི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གིས་འཛམ་གླིང་ཡོངས་ཁྱབ་ཏུ་ངོ་རྒོལ་གྱི་ལས་འགུལ་རྒྱ་གང་ཆེར་སྤེལ་དགོས་གལ་ཡིན་པ་དང་། ལྷག་དོན་ཏོག་དབྱིབས་གཉན་རིམས་དེ་ཉིད་རྒྱ་ནག་གཞུང་གིས་འཛམ་གླིང་རྒྱལ་ཁབ་གཞན་རྣམས་རང་ཉིད་ཀྱི་དབང་འོག་ཏུ་བསྡུ་ཕྱིར་ཆེད་བཟོ་བྱས་པ་ཞིག་ཡིན་པར་རྒྱལ་ཁབ་དུ་མས་ངོས་འཛིན་གནང་མུས་ལྟར་རྒྱ་ནག་གཞུང་ནས་དེར་ངོས་ལེན་ཞུ་དགོས་པ་སོགས་ཀྱི་དོན་ཚན་གཉིས་ཁ་སྣོན་གནང་བ་དང་འབྲེལ་ཏེ་ཁྱོན་གྲོས་ཆོད་དོན་ཚན་བརྒྱད་ཅན་སྤྱི་མོས་ཀྱིས་གཏན་འབེབས་གནང་ཡོད། གཞི་རྩའི་བགྲོ་གླེང་གི་བརྒྱུད་རིམ་ཁྲོད་གྲོས་ཆོད་དེའི་ནང་གསལ་བའི་དོན་ཚན་གསུམ་པའི་ཐོག་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་བསྐྱར་བཅོས་གྲོས་ཆོད་ཅིག་བསྣམས་པར་རྒྱ་ནག་གཞུང་ལ་ཡིད་ཆེས་མེད་སྐོར་འཁོད་པ་དང་འབྲེལ་སྤྱི་འཐུས་ཁག་ཅིག་གིས་ཚིག་བརྗོད་དེ་ནི་དབུ་མའི་ལམ་དང་ཡང་ན་སྲིད་བྱུས་ལ་བསྒྱུར་བཅོས་གཏང་རྒྱུ་དང་འབྲེལ་བ་ཡོད་སྐོར་གསུངས་ནས་དགག་པ་གནང་སོང་བར་མ་ཟད། བགྲོ་གླེང་ལྷུག་པོ་གནང་མཐར་བསྐྱར་བཅོས་ཀྱི་གྲོས་ཆོད་དེའི་ཚོག་བརྗོད་ཁག་ཅིག་བསྐྱར་བཅོས་ཀྱིས་གཏན་འབེབས་ཐུབ་ཡོད་པ་རེད།
བོད་པའི་སྤྱི་ཚོགས་ནང་རྒྱ་ནག་གི་སོ་མྱུལ་ཡོད་པས་དེར་ཡིད་གཟབ་བྱེད་དགོས།
དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་ ༤ ཐོག་ལྷན་ཁང་ཁག་གི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༡་༢༢ ལོའི་སྔོན་རྩིས་ཐོག་བགྲོ་གླེང་གནང་བའི་ཁྲོད་སྔ་ལོར་རྒྱ་གར་དང་ཨ་རི་ནང་དུ་རྒྱ་གཞུང་གི་སོ་ཉུལ་བ་འཛིན་བཟུང་བྱས་པའི་གནད་དོན་ཐད་བཀའ་འདྲི་ཁག་ཅིག་ཕེབས་དོན་ལྟར། སྲིད་སྐྱོང་བློ་བཟང་སེང་གེ་མཆོག་གིས་བོད་པའི་སྤྱི་ཚོགས་ནང་དུ་རྒྱ་ནག་གི་སོ་མྱུལ་བ་ཡོད་པ་ནི་རྩོད་མེད་ཡིན་སྟབས། རྒྱ་ཆེ་མང་ཚོགས་ཀྱི་ངོས་ནས་དེ་དག་གི་ལག་ཆ་ཆགས་རྒྱུ་མེད་པར་ཡིད་གཟབ་གནང་དགོས་པའི་གཞེན་སྐུལ་ནན་པོ་གནང་སོང་།སྔ་དྲོའི་ཚོགས་ཐེངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་རྗེས་དོན་ཚན་གཉིས་ཁ་སྣོན་གནང་བ་དང་འབྲེལ་ཏེ་ཁྱོན་གྲོས་ཆོད་དོན་ཚན་བརྒྱད་ཅན་སྤྱི་མོས་ཀྱིས་གཏན་འབེབས་གནང་ཡོད་པ་དང་། དེའི་རྗེས་སུ་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་ལས་ཁུངས་མ་ལག་དང་བཅས་པའི་སྔོན་རྩིས་ཐོག་བགྲོ་གླེང་གནང་སྐབས་བྱང་ཨ་རིའི་སྔོན་རྩིས་དང་འབྲེལ་ནས་བགྲོ་གླེང་ཁྲོད་སྤྱི་འཐུས་ཁག་ཅིག་ནས་སྔ་ལོར་ཨ་རི་ནང་གི་བོད་པའི་བུ་བཅོལ་ཁང་ཞིག་གིས་བོད་པའི་ཕྲུ་གུ་ལྷ་སར་འཁྲིད་ནས་བོད་ནང་གནས་སྟངས་ཡག་པོ་ཡོད་ཚུལ་འགྲེལ་བརྗོད་བྱས་པའི་གནད་དོན་དང་། སྒོས་སྔ་ལོར་རྒྱ་གར་དང་ཨ་རི་ནང་དུ་རྒྱ་གཞུང་གི་སོ་ཉུལ་བ་འཛིན་བཟུང་བྱས་པའི་གནད་དོན་དང་འབྲེལ་ནས་བོད་པའི་སྤྱི་ཚོགས་ནང་དུ་རྒྱ་གཞུང་གི་སོ་ཉུལ་བ་ཡོད་པ་ར་འཕྲོད་ལན་མང་བྱུང་བ་བཞིན་རྒྱ་ཆེ་མང་ཚོགས་ཀྱི་ངོས་ནས་ཡིད་གཟབ་གནང་དགོས་པའི་གཞེན་སྐུལ་གནང་ཡོད། དེ་བཞིན་སྤྱི་འཐུས་ཁག་ཅིག་ནས་བྱང་ཨ་མི་རི་ཀས་གཙོས་པའི་ཕྱི་རྒྱལ་ཡུལ་གྲུ་ཁག་ཏུ་མི་འབོར་གྱི་ཆ་ནས་དང་བླངས་དཔྱ་དངུལ་འབུལ་མཁན་ཉུང་བ་དང་། འོས་བསྡུའི་ལས་རིམ་ནང་ཞུགས་མཁན་དེ་བས་ཀྱང་ཉུང་བ་ཡོད་སྐོར་གྱི་བཀའ་འདྲི་ཞུས་པར་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་རྩ་བའི་དེ་སྔ་བཀའ་ཤག་སྐབས་གོང་མ་ནས་བཟུང་སྟེ་ཕྱི་རྒྱལ་ཡུལ་གྲུ་ཁག་ཏུ་གནས་བཞུགས་བོད་མི་གང་མང་ནས་དཔྱ་དངུལ་སྔར་ལྷག་གནང་ཐུབ་སླད་དུ་དཔྱ་དངུལ་གྱི་འབུལ་འབབ་ཆག་ཡང་གི་ལས་གཞི་སྤེལ་བ་སོགས་ལ་མང་ཚོགས་ནས་ཡི་རང་ཞུ་མཁན་མང་དུ་སོང་ཡོད་ཀྱང་། ཐོག་མའི་དམིགས་ཡུལ་ལྟར་ཡོང་དཀའ་སྐོར་གསུངས་པ་དང་ཆབས་ཅིག མང་ཚོགས་ཀྱི་ཀུན་སློང་ལ་དོགས་པ་མེད་ཀྱང་དུས་ཚོད་དང་འདྲི་རྩད་ཀྱི་བརྒྱུད་རིམ་བཅས་ལ་གཞིགས་པའི་དཀའ་ངལ་འཕྲད་བཞིན་ཡོད་པ་ལྟར། མང་ཚོགས་ཀྱི་ངོས་ནས་ངལ་བ་ཕྲན་བུ་འཕྲད་པར་མ་དགོངས་པར་བོད་མི་ཡིན་ཕྱིན་ཆད་ལ་དཔྱ་དངུལ་འབུལ་ལམ་ཞུ་དགོས་པའི་འོས་འགན་ཡོད་པར་སྐུལ་མ་གནང་སོང་།དེ་རིང་གི་གྲོས་ཚོགས་ཐོག་ཨ་རིའི་ཁུལ་དུ་འདས་པའི་ལོ་མང་ནས་སྔ་ལོ་བར་རྒྱ་ནག་གི་ཁུངས་ཙིའི་སློབ་གླིང་མང་དག་ཅིག་ཕྱིར་བཤོལ་གནང་ཐུབ་ཡོད་སྐོར་གླེང་སློང་གནང་བ་དང་འབྲེལ། སྲིད་སྐྱོང་མཆོག་གིས་རྒྱ་ནག་གི་ཁུངས་ཙིའི་སློབ་གླིང་མང་དག་ཅིག་ཕྱིར་བཤོལ་གནང་བར་ལས་འགུལ་སྤེལ་མཁན་ཚོགས་སྡེ་ཁག་ལ་བསྔགས་བརྗོད་གནང་བ་དང་སྦྲགས། ལས་འགུལ་དེའི་ཐོག་ནས་རྒྱལ་སྤྱིའི་ཁྲོད་རྒྱ་ནག་གི་ངོས་ནས་དངུལ་གྱི་འགྲོ་སོང་ཇི་ལྟར་བཏང་ཡང་གང་འདོད་ལྟར་བྱེད་ས་མེད་པའི་བརྡ་ལན་གསལ་པོ་ཞིག་ཆགས་ཡོད་པར་གསུངས་སོང་།དེ་བཞིན་སྤྱི་འཐུས་ཁག་ཅིག་གིས་སྔ་ལོར་བྱང་ཨ་རི་ཁུལ་དུ་གནས་བཞུགས་བོད་མིའི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་སྤྱི་ཚོགས་ཁྲོ་གནོན་ཤུགས་སྤྲད་པའི་གནད་དོན་སྐོར་གླེང་སློང་གནང་བ་དང་འབྲེལ་ནས་སྲིད་སྐྱོང་མཆོག་གིས་དོན་གྲུབ་དབང་ཆེན་ལགས་དང་བོད་ཆོལ་གསུམ་ནང་དུ་རྒྱ་གཞུང་ལ་ངོ་རྒོལ་གྱིས་ལས་འགུལ་སྤེལ་རྐྱེན་འཛིན་བཟུང་གིས་མནར་གཅོད་མྱངས་དང་མྱོང་བཞིན་པ། དེ་བཞིན་བཙན་བྱོལ་དུ་ཕེབས་ནས་ཞལ་ཞེ་གཉིས་མེད་ཀྱིས་བོད་དོན་ལས་འགུལ་སྤེལ་མཁན་རྣམས་ཀྱི་མཛད་རྗེས་ལ་ཡི་རང་བསྔགས་བརྗོད་ཞུས་པ་དང་ཆབས་ཅིག ཁོང་རྣམ་པར་སྐྱོན་བརྗོད་ཞུ་མཁན་དང་གནོན་ཤུགས་སྤྲད་མཁན་རྣམས་ལ་མཐའ་གཅིག་ཏུ་དགག་པ་ཡོད་ཅེས་གསུངས་ཡོད།རྩ་བའི་དེ་རིང་གྲོས་ཚོགས་སུ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ཁག་སྤྱི་མོས་ཀྱིས་གཏན་འབེབས་གནང་བའི་རྗེས་སུ་སྔ་དྲོའི་ཚོགས་དུས་གཉིས་པ་ནས་ཕྱི་དྲིལ་ཁྱབ་ཁོངས་སྲིད་བྱུས་ཉམས་ཞིབ་ཁང་དང་ལྡི་ལི་སྐུ་ཚབ་དོན་ཁང་། བྱང་ཨ་རི། སུད་སི། དེ་བཞིན་ཨོ་སི་ཊོ་ལི་ཡ་བཅས་སྐུ་ཚབ་དོན་ཁང་སོ་སོའི་སྔོན་རྩིས་ཐོག་བགྲོ་གླེང་གནང་ཡོད་པ་རེད།
བཙན་བྱོལ་བོད་མིའི་དང་བླངས་དཔྱ་དངུལ་དེ་དྲྭ་ཐོག་བརྒྱུད་ནས་བསྡུ་རྒྱུའི་ཚོད་ལྟའི་ལས་གཞི་དབུ་འཛུགས་གནང་འཆར་ཡོད།
དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་བཞི་པའི་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་དཔལ་འབྱོར་ལས་ཁུངས་དང་འབྲེལ་བའི་བོད་མིའི་ཡར་ཐོན་ཚོང་ལས་རམ་འདེགས་ཀྱི་ལས་གཞི་དང་། བེུད་ནུས་སྟོབས་གོང་སྤེལ་ལས་དོན། གངས་ལྗོངས་དཔལ་འབྱོར་ཞབས་ཞུ་ཁང་གི་ལས་དོན། བོད་མིའི་ཁྱད་ལས་དང་བླངས་ཞབས་ཞུ་དང་བོད་མིའི་འཛིན་སྐྱོང་བདེ་དོན་ལྷན་ཚོགས་སོགས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༡༨ ནས་ ༢༠༡༩ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་དང་སྦྲགས་སྤྱི་འཐུས་རྣམ་པས་ཞིབ་གཤེར་དང་བགྲོ་གླེང་ལས་དོན་ཐོག་ཕེབས་སོང་།
སྐབས་དེར་བོད་མི་མང་སྤྱི་འཐུས་ཁག་གཅིག་ནས་བཙན་བྱོལ་བོད་མིའི་རང་དབང་གཅེས་འཛིན་དང་བླངས་དཔྱ་དངུལ་ལག་དེབ་དང་འབྲེལ་དཔྱ་དངུལ་ལག་དེབ་བོར་བརླག་བྱུང་བ་ཚོར་གསར་བཟོ་གནང་སྟངས་དང་། དཔྱ་དངུལ་གྱི་བསྡུ་བྱ་དེ་བཞིན་རྒྱ་བལ་འབྲུག་གསུམ་དང་ཕྱི་རྒྱལ་ཁག་ལ་བཞུགས་པ་ཚོའི་དབར་ཆ་སྙོམས་བཟོ་དགོས་པ། ལྷག་པར་དུ་ཕྱི་རྒྱལ་ཁག་ནས་དཔྱ་དངུལ་བསྡུ་བྱ་སྔར་ལྷག་ཡོང་ཐབས་སུ་དྲྭ་ཐོག་ནས་བསྡུ་རྒྱུ་ཡོད་པ་ཞིག་བཟོ་གལ་ཡིན་པ་སོགས་ཀྱི་ཐོག་དགོངས་ཚུལ་ཤུགས་ཆེན་པོ་ཕེབས་ཡོད་དང་། སྐབས་དེར་དཔལ་འབྱོར་བཀའ་བློན་མཆོག་ནས་བཙན་བྱོལ་བོད་མིའི་དང་བླངས་དཔྱ་དངུལ་དེ་དྲྭ་ཐོག་བརྒྱུད་ནས་བསྡུ་རྒྱུའི་ཚོད་ལྟའི་ལས་གཞི་དབུ་འཛུགས་གནང་འཆར་ཡོད་པ་གསུངས་ཡོད།
དེ་བཞིན་སྤྱི་འཐུས་ཁག་གཅིག་གིས་དཔལ་འབྱོར་ལས་ཁུངས་ཀྱི་ཁྱབ་ཁོངས་གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་སྟངས་དང་ལས་གཞི་ཇི་སྤེལ་སོགས་ཀྱི་ཐད་ལ་བཀའ་འདྲི་ཁག་གཅིག་ཞུས་སོང་བ་དང་། བཀའ་བློན་མཆོག་གིས་གངས་ལྗོངས་དཔལ་འབྱོར་ཞབས་ཞུ་ཁང་གསར་འཛུགས་གནང་རྗེས་ད་ལྟའི་ཆར་རྒྱ་གར་དངུལ་ཁང་ཆེན་མོ་ནས་བུན་གཡར་སོགས་དང་འབྲེལ་བའི་ལས་གཞི་སྤེལ་ཆོག་པའི་ཁྲིམས་མཐུན་གྱི་ལག་འཁྱེར་ཐོབ་ཡོད་པ་མ་ཟད། འདས་ལོའི་ནང་བོད་མི་སུད་ཚོང་བ་གྲངས་ ༡༣༡༦ དང་རྒྱན་ཆ་ཙག་གི་ཙིག་གི་ཚོང་པ་ ༡༩༡ དེ་བཞིན་རྟ་དྲེལ་ཁྱིམ་ཚང་ ༤༢ དང་གླ་རྒྱུག་སྣུམ་འཁོར་གཏོང་མཁན་ ༡༨༠ དབྱར་ཚོང་གནང་མཁན་ཁྱིམ་ཚང་ ༡༠༣ སོགས་ལ་བུན་གཡར་གྱི་ལས་གཞི་སྤེལ་ཏེ་ཕན་ཐོགས་ཆེན་པོ་བྱུང་ཡོད་པ་སོགས་འགྲེལ་བརྗོད་གནང་བ་དང་ཆབས་ཅིག རིམ་པས་ཚོང་ཆེན་པོ་གནང་མཁན་ཚོར་འབུམ་བཅུ་དང་བཅོ་ལྔའི་བར་གྱི་བུན་གཡར་ལས་གཞི་སྤེལ་འཆར་ཡོད་པ་དང་སླད་མར་ད་ལྟའི་བཀའ་ཤག་འདི་འཁྱུར་བའི་སྐབས་སུ་གངས་ལྗོངས་དཔལ་འབྱོར་ཞབས་ཞུ་ཁང་གི་མ་དངུལ་གནས་ཚད་དེ་བྱེ་བ་བརྒྱ་བཟོ་རྒྱུའི་དམིགས་ཚད་འཛིན་བཞིན་ཡོད་པ་གསུངས་ཡོད།
སུད་ཚོང་གནང་མཁན་ཚོའི་ཚོང་གི་བདེ་འཇགས་དང་ས་ཆའི་དཀའ་ངལ་སེལ་ཐབས་སོགས་ཀྱི་ཐོག་བཀའ་འདྲི་ཁག་གཅིག་ཕེབས་ཡོད་པ་ལྟར། དཔལ་འབྱོར་ལས་ཁུངས་ནས་འདས་པའི་ལོ་དུས་ནང་དགུན་ཚོང་གནང་མཁན་ཚོར་དངུལ་ཟོག་གྱི་ཁྲལ་བབས་དང་། ངེས་སྲུང་། དེ་བཞིན་ཚོང་ཟོག་འོར་འདྲེན་གྱི་གྱན་རྒྱ་སོགས་དང་འབྲེལ་བའི་ཟབ་སྦྱོང་དང་། དགོས་ངེས་ཀྱི་ལམ་སྟོན་གནང་མུས་ཡིན་པ། དགུན་ཚོང་བའི་དཀའ་ངལ་དེ་དག་སེལ་ཐབས་སུ་ཚོང་ལས་དེ་དག་ཁྲིམས་དང་མཐུན་པ་ཞིག་གནང་དགོས་གལ་ཡིན་པ་གསུངས་ཡོད།
གཞན་ཡང་སྐབས་དེར་སྤྱི་འཐུས་ཁག་ལ་ལས་བེུད་ནུས་སྟོབས་གོང་སྤེལ་ལས་གཞིའི་ཐོག་བཀའ་འདྲི་ཁག་གཅིག་ཞུས་པ་བརྒྱུད་ནས་ཚན་པ་དེའི་ལས་དོན་ཚགས་ཚུད་ཡོང་ཐབས་སུ་གོ་གནས་ཡོད་པའི་སྲི་ཞུ་བ་ཞིག་སྡེ་ཚན་དེའི་འགན་འཛིན་དུ་ངེས་བསྐོ་གནང་དགོས་པ་དང་། བེུད་རྣམས་ནུས་སྟོབས་འཕེལ་ཐབས་སུ་ཟབ་སྦྱོང་གི་ལས་གཞི་ཁག་ཏུ་སྐྱེས་པ་ཚོས་ཀྱང་མཉམ་ཞུགས་གནང་བ། དེ་བཞིན་གཙོ་བོ་མིའི་བསམ་བློ་ལ་འགྱུར་བ་ཐེབས་པ་ཞིག་གནང་གལ་ཡིན་པ་སོགས་ཀྱི་དགོངས་ཚུལ་ཕུལ་སོང་།
གཞི་རྩའི་དེ་རིང་ཉིན་འཁྱོངས་རིང་ལ་དཔལ་འབྱོར་ལས་ཁུངས་ཀྱི་ལས་བསྡོམས་དང་འབྲེལ་སྤྱི་འཐུས་ཁག་ ༢༠ ལྷག་ནས་བགྲོ་གླེང་གི་ཆ་ཤས་བླངས་བཞེས་ཏེ་ཕྱིའི་རོགས་ཚོགས་ཁག་གི་རོགས་དངུལ་གནས་བབས་དང་། བོད་མིའི་ཁྱད་ལས་དང་བླངས་ཞབས་ཞུ་ཁང་། དེ་བཞིན་བོད་མིའི་ཡར་ཐོན་ཚོང་ལས་རམ་འདེགས་ལས་དོན་སོགས་དཔལ་འབྱོར་ལས་ཁུངས་དང་འབྲེལ་བའི་ལས་ཁུངས་མ་ལག་དང་བཅས་པའི་ལས་གཞི་མང་དག་ཐོག་བཀའ་བསྡུར་གཟབ་རྒྱས་གནང་ཡོད།
ཆེས་མཐོའི་ཁྲིམས་ཞིབ་ཁང་ནས་ཉེ་ཆར་གྲོས་ཚོགས་སུ་བཀའ་བློན་དུ་འོས་འདེམས་གནང་བའི་གང་ཟག་ལ་དགོས་ངེས་འོས་ཤོག་བརྒྱ་ཆ་ལོན་མེད་སྟབས་ངོས་ལེན་གནང་ཐབས་མེད་པ་ཡོངས་བསྒྲགས་གནང་སོང་།
དབུས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་ནས་ཉེ་སྔོན་སྐབས་ ༡༦ པའི་བོད་པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་འདུས་ ༧ པའི་ཐོག་བཀའ་བློན་གྱི་འོས་གཞིར་བཅའ་ཁྲིམས་དོན་ཚན་ ༢༢ ལྟར་དགོས་ངེས་ཀྱི་འོས་གྲངས་བརྒྱ་ཆ་ལོན་མེད་སྐོར་དང་འབྲེལ་ནས་ངོས་ལེན་གནང་མེད་པ་ཡོངས་བསྒྲགས་གནང་སོང་།རྩ་བའི་ཉེ་སྔོན་ཉེ་སྔོན་གྲོས་ཚོགས་ཚོགས་དུས་ ༧ པའི་ལས་ཉིན་ ༤ པ། ཕྱི་ཟླ་ ༣ ཚེས་ ༢༢ ཉིན་སྤྱི་འཐུས་ལྷན་ཚོགས་སུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༢ གཞིར་བཟུང་སྲིད་སྐྱོང་བློ་བཟང་སེང་གེ་མཆོག་ནས་བཀའ་དྲུང་རྫོང་ཁ་སྟོབས་རྒྱལ་ཚེ་རིང་ལགས་བཀའ་བློན་གྱི་འོས་མིར་གྲོས་ཚོགས་ནང་ངོ་སྤྲོད་ཀྱིས་དགག་བྱ་ཡོད་མེད་གཟིགས་སྐབས། དགག་བྱ་གནང་བར་བརྟེན་གསང་བའི་འོས་བསྡུ་གནང་རྗེས་སྤྱི་འཐུས་ ༢༡ གིས་རྒྱབ་སྐྱོར་གནང་ནས་བཀའ་བློན་དུ་བདམས་ཐོན་བྱུང་བར་གསལ་བསྒྲགས་གནང་ཡོད་ཀྱང་། དེ་ཉིན་ཆེས་མཐོའི་ཁྲིམས་ཞིབ་ཁང་ནས་ཚོགས་གཙོ་སྦྲེལ་པོའི་མཚན་ཐོག་ལ་ཕྱག་བྲིས་ཤིག་ཕུལ་ཏེ་རྒྱབ་སྐྱོར་འོས་ཤོག་ ༢༡ ཐོབ་པ་དེ་ངོ་ཡོད་སྤྱི་འཐུས་ ༤༣ གྱི་བརྒྱ་ཆ་ ༥༠ ལས་ཉུང་བ་ཡིན་སྐོར་དང་འབྲེལ་བའི་ཛ་དྲག་གི་ཕྱག་བྲིས་ཕུལ་ཡོད་པ་དེ་ལྟར་ཡང་། ཚེས་ ༢༣ ཉིན་སྤྱི་འཐུས་ཚོགས་གཙོ་མཆོག་གིས་གནད་དོན་དེའི་སྐོར་གསར་འགོད་པར་དོགས་དྲི་བཀའ་ལན་གནང་སྐབས་རྩ་བའི་སྤྱི་འཐུས་ལྷན་ཚོགས་ཀྱི་ལས་དོན་བྱེད་ཕྱོགས་དང་བཀའ་མོལ་གནང་ཕྱོགས། དེ་བཞིན་འོས་འཕེན་ཕྱོགས་སོགས་ཁྲིམས་ཞིབ་ཁང་གང་གི་ཁྱབ་འོག་ཏུ་མེད་པ་དེ་ལྟར་ཡང་། ད་ལན་ཆེས་མཐོའི་ཁྲིམས་ཞིབ་ཁང་གི་ཕྱག་བྲིས་འབྱོར་བ་བཞིན་ལན་འདེབས་ཕུལ་བའི་ནང་དེ་སྔའི་གྲོས་ཚོགས་ནང་བརྒྱ་ཆ་བགོ་ཕྱོགས་ཀྱི་འགྲོ་ལུགས་གཞིར་བཟུང་ངོ་ཡོད་སྤྱི་འཐུས་ ༤༣ གྱི་བརྒྱ་ཆ་ ༥༠ དེ་ ༢༡ དང་གྲངས་ཆུང་ ༥༠ ཡིན་པ་ལྟར། བཀའ་བློན་གྱི་འོས་འདེམས་དང་འབྲེལ་བའི་སྒྲིག་གཞི་དོན་ཚན་ ༨༦ གཞིར་བཟུང་བཀའ་བློན་གྱི་འོས་མིར་དགག་བྱ་བྱུང་ཚེ་བགྲོ་གླེང་མི་དགོས་པར་ངོ་ཡོད་སྤྱི་འཐུས་ཀྱི་གསང་བའི་འོས་ཤོག་འཕང་ཐོག་འོས་འདེམས་བྱ་དགོས་པ་དང་། དེར་ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་མ་ཉུང་བའི་འོས་ཤོག་ཐོབ་དགོས་སྐོར་གསལ་ཡོད་ཀྱང་། དེ་ཉིན་སྤྱི་འཐུས་ ༤༣ ཡོད་སྟབས་བརྒྱ་ཆ་ ༥༠ ཐོབ་པར་སྤྱི་འཐུས་ ༢༡་༥ དགོས་ཀྱི་ཡོད་པ་དང་། ཚོགས་གཙོ་མཆོག་གིས་བཅའ་ཁྲིམས་དོན་ཚན་ ༤༩ པའི་ནང་སྤྱི་འཐུས་རྩ་འབོར་དང་ངོ་ཡོད་ཆ་དགོས་རྩིས་སྐོར་སྐབས་འཕྲོས་ལྷག་དཀར་ཆ་རྩིས་མ་དགོས་ཞེས་པ་དེ་ལུང་འདྲེན་གྱིས་བརྒྱ་ཆ་ ༥༠ ལོན་པར་ངོས་འཛིན་གནང་གི་ཡོད་པ་དེའི་ཐོག་གནས་ཀྱི་ཡོད་ཅེས་གསུངས་པ་མ་ཟད། ཚོགས་གཙོས་མཇུག་སྡོམ་གསུང་བཤད་ནང་དུའང་དེ་རང་ནན་བརྗོད་གནང་ཡོད་པ་རེད།དེ་རིང་ཕྱི་ཚེས་ ༤ སྔ་དྲོ་ཚོུད་ ༡༠ ཐོག་ཆེས་མཐོའི་ཁྲིམས་ཞིབ་ཁང་གི་ཚོགས་ཁང་དུ་གསར་འགོད་ལྷན་ཚོགས་ཤིག་བསྐོང་ཚོགས་གནང་ཐོག་ཁྲིམས་དྲུང་བཀྲིས་རྒྱ་མཚོ་ལགས་དབུ་བཞུགས། ཟུང་དྲུང་ཐུབ་བསྟན་ཚེ་རིང་ལགས་ཀྱིས་ཆེས་མཐོའི་ཁྲིམས་ཞིབ་ཁང་གི་བཀའ་བློན་ལ་ངོས་བཞེས་གནང་མེད་པའི་གསར་འགོད་གསལ་བསྒྲགས་སྒྲོག་སྦྱང་གནང་བའི་ནང་ཉེ་སྔོན་གྲོས་ཚོགས་ནས་བཀའ་བློན་འོས་འདེམས་ཀྱི་གསལ་བསྒྲགས་སྤེལ་མ་ཐག ཆེས་མཐོའི་ཁྲིམས་ཞིབ་ཁང་གི་ངོས་ནས་ཚོགས་གཙོ་སྦྲེལ་པོར་མང་མོས་བརྒྱ་ཆ་ ༥༠ ཡི་ཆ་རྐྱེན་ཚང་གི་མེད་སྐོར་གྱི་ཐུགས་ཞིབ་དགོས་པའི་ཕྱག་བྲིས་ཕུལ་ཡོད་པ་དང་། ཕྱག་བྲིས་ལ་བཀའ་ལན་འབྱོར་བ་དང་། ཚོགས་གཙོས་གསར་འགོད་པར་འགྲེལ་བརྗོད་གནང་བར་ཆེས་འཐོའི་ཁྲིམས་ཞིབ་ཁང་གི་ངོས་ལེན་མེད་པའི་ཐག་གཅོད་གནང་ཡོད་པ་དང་། དེ་རྗེས་ཚོགས་གཙོ་སྦྲེལ་པོས་རེ་འདུན་བཞིན་ཚོགས་གཙོ་སྦྲེལ་པོ་དང་ཁྲིམས་ཞིབ་པ་ཆེ་བ། སྲིད་སྐྱོང་བཅས་ཁྲིམས་ཞིབ་ཁང་དུ་བཞུགས་མོལ་ཚོགས་འདུ་ཚོགས་ཡོད་པ། དེ་རྗེས་བཀའ་ཤག་ཁྲིམས་ཞིབ་ཁང་ལ་བཅར་ནས་བཀའ་བསྡུར་གནང་རྗེས་བཀའ་དྲུང་ཡིག་ཚང་ནས་དམ་འབུལ་གྱི་ཞུ་སྐུལ་འབྱོར་ཡོད་པར་ཁྲིམས་ཞིབ་ཁང་ནས་བདམས་ཐོན་བཀའ་བློན་གསལ་བསྒྲགས་གནང་བའི་སྐྱེ་བོ་དེར་བཅའ་ཁྲིམས་ནང་གསལ་གྱི་ཆ་རྐྱེན་ཚང་གི་མེད་པས། དེའི་ཐོག་བཅའ་ཁྲིམས་དང་མཐུན་པའི་གནང་ཕྱོགས་ཤིག་མ་བྱུང་བར་དུ་བཅའ་ཁྲིམས་དོན་ཚན་ ༢༥ པ་ནང་གསལ་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཀྱི་ལས་རིམ་ཐོག་ཕེབས་ཐབས་མེད་པའི་ཐག་གཅོད་གནང་བ་སོགས་རྒྱུད་རིམ་ཆ་ཚང་ངོ་སྤྲོད་གནང་བ་བརྒྱུད་ཆེས་མཐོའི་ཁྲིམས་ཞིབ་ཁང་གི་ངོས་ནས་གཙོ་བོ་དོན་ཚན་ ༥ ཡི་ཐོག་ནས་ཐག་གཅོད་དང་རྒྱུ་མཚན་གསལ་བཤད་གནང་སོང་།དེའང་བཀའ་བློན་དུ་བདམས་ཐོན་བྱུང་བའི་དགོས་ངེས་གྲངས་ཚད་ཀྱི་ཆ་རྐྱེན་ནི་ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་མ་ཉུང་བའི་འོས་ཤོག་ཐོབ་དགོས་པ་དེར་འཕྲོས་ལྷག་སྐར་ཆ་བརྩི་མ་དགོས་པའི་ཆ་རྐྱེན་བཞག་མེད་པ་དང་། སྲིད་སྐྱོང་མཆོག་གིས་བཅའ་ཁྲིམས་དོན་ཚན་ ༢༢ གཞིར་བཟུང་སྤྱི་འཐུས་ལྷན་ཚོགས་སུ་བཀའ་བློན་འོས་གཞི་མིང་འདོན་གནང་བ་གང་ཞིག་བཅའ་ཁྲིམས་ནང་གསལ་དགོས་ངེས་ཀྱི་བརྒྱ་ཆའི་གྲངས་ཚད་ལོན་མེད་པ་མངོན་སུམ་དུ་གྲུབ་ཡོད་པའི་མང་མོས་མ་ཐོབ་པ་ཞིག་ལ་འོས་ཐོན་བྱུང་བའི་གསལ་བསྒྲགས་བྱས་པ་དེ་བཅའ་ཁྲིམས་དོན་ཚན་འདིའི་དགོངས་དོན་དང་འགལ་ཡོད་སྐོར་དང་འབྲེལ། བཅའ་ཁྲིམས་དོན་ཚན་ ༢༢ པའི་དགོངས་དོན་ལ་མངོན་གསལ་གྱི་གནོད་འགལ་བྱས་ཡོད་པ་གསུངས་སོང་།དེ་བཞིན་བཅའ་ཁྲིམས་དོན་ཚན་ ༢༢ རྩིས་གཞི་བརྒྱ་ཆ་ ༥༠ ཡིན་པ་དང་། དོན་ཚན་ ༤༩ ནང་གསེས་ ༡ རྩིས་གཞི་ནི་གྲངས་ཆ་གསུམ་ཆ་གཉིས་ཡིན་པ་ལྟར། སྔ་མ་ནི་བཀའ་བློན་གྱི་འོས་འདེམས་བྱེད་སྟངས་སྐོར་ཡིན་པ་དང་། ཕྱི་མ་ནི་སྤྱི་འཐུས་ལྷན་ཚོགས་དང་དེའི་རྒྱུན་ལས་སུ་སྤྱི་འཐུས་ཀྱི་ཉུང་ཚད་སྐོར་ཡིན་སྟབས་ཆ་རྐྱེན་དེ་དག་དོན་གནད་ཐ་དད་ཡིན་པ་ལས་བཀའ་བློན་འོས་ཐོན་གྱི་དགོས་ངེས་གྲངས་ཚད་ལ་སྦྱོར་མི་རུང་བ་ཡིན་པ་གསུངས་ཡོད།དེ་གཞིན་སྤྱི་འཐུས་ལྷན་ཚོགས་ནས་བདམས་ཐོན་བྱུང་བར་ངོས་འཛིན་བྱས་པའི་རྒྱབ་རྟེན་དུ་བརྒྱ་ཆ་འགོད་སྟངས་ཀྱི་རེའུ་མིག་གཞིར་བཟུང་གནང་ཡིན་པ་གསུངས་པ་དེ་ནི། ཁྲིམས་སྒྲིག་ཁག་ལ་བསྐྱར་བཅོས་སྐབས་སྤྱི་འཐུས་ལྷན་ཚོགས་ནང་མོས་མཐུན་རྒྱབ་སྐྱོར་ཇི་དགོས་ཀྱི་རེའུ་མིག་ཤོག་ངོས་གཉིས་ཅན་དང་། དེའི་མཉམ་སྤྱི་འཐུས་གྲངས་དང་བརྒྱ་ཆ་གསུམ་ཆ་ ༢ བརྒྱ་ཆ་ ༥༠ བརྒྱ་ཆ་བཞི་ཆ་གསུམ་ཞེས་པ་རེའུ་མིག་ཤོག་ངོས་གཅིག་ཅན་ཞིག་འདུག་པ་དེ་ཡིན་པ་དང་། བཀའ་བློན་གྱི་འོས་འདེམས་ཚང་མར་དེ་དོན་གནང་བ་བྱུང་ཡོད་ཅེས་བཀོདཡོད་སྟབས། དེའི་སྔའི་བཀའ་ཤག་སྐབས་ ༡༢ དང་ ༡༣ དེ་བཞིན་སྐབས་ ༡༤ དང་ ༡༥ བཅས་ཀྱི་གནད་དོན་ལུང་འདྲེན་དང་འབྲེལ་སྐབས་དེ་དག་ཐོག་བརྒྱ་ཆ་རྩིས་སྐོར་བྱེད་དགོས་པ་བྱུང་མེད་སྐོར་དང་འབྲེལ། རེའུ་མིག་དེ་ཁྲིམས་སྒྲིག་ཁག་ལ་བསྐྱར་བཅོས་སྐབས་སྤྱི་འཐུས་ལྷན་ཚོགས་ནང་མོས་མཐུན་རྒྱབ་སྐྱོར་ཇི་དགོས་ཀྱི་རེའུ་མིག་ཡིན་པ་ལས། བཀའ་བློན་གྱི་འོས་འདེམས་སྐབས་བརྒྱ་ཆ་བགོ་སྟངས་སྐོར་མིན་པ་རེའུ་མིག་འགོ་བརྗོད་ནས་རྟོགས་ཐུབ་ཀྱི་ཡོད་པ་ལྟར། སྤྱི་འཐུས་ལྷན་ཚོགས་ནས་ཡིག་ཆ་དེས་བཅའ་ཁྲིམས་དོན་ཚན་ ༢༢ ནང་གསལ་བཀའ་བློན་དུ་བདམས་ཐོན་ཡོང་བ་ལ་བརྒྱ་ཆ་ ༥༠ ལས་མ་ཉུབ་བ་དགོས་པའི་ཆ་རྐྱེན་འདིར་བསྒྱུར་བཅོས་གཏོང་ཐབས་མེད་ཅེས་ཚོགས་གཙོ་སྦྲེལ་པོར་གསལ་པོ་ཞུས་ཟིན་ཡོད་པ།
ལྷག་པར་དུ་ཆེས་མཐོའི་ཁྲིམས་ཞིབ་ཁང་ནས་བཅའ་ཁྲིམས་དང་འགལ་བའི་བྱ་སྤྱོད་རྣམས་གསལ་འདོན་གནང་ཟིན་རྗེས་ད་དུང་མུ་མཐུད་ སྤྱི་འཐུས་ལྷན་ཚོགས་ནང་ལས་དོན་བྱེད་ཕྱོགས་དང་བཀའ་མོལ་གནང་ཕྱོགས། འོས་འཕེན་སྟངས་ཁྲིམས་ཞིབ་ཁང་གང་གི་ཡང་ཁྱབ་ཁོངས་ལ་ཡོད་མ་རེད་ཅེས་གསུངས་པ་ནི་བཅའ་ཁྲིམས་དོན་ཚན་ ༤༦ དང་ ༥༨ གཉིས་མཉམ་བསྲེས་བཏང་སྟེ་འགྲེལ་ལོག་གནང་བ་ཞིག་ཡིན་པ། བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་སྲུང་སྐྱོབ་བྱ་རྒྱུ་དེ་ཁྲིམས་ཞིབ་ཁང་གི་འདོར་དུ་མེད་པའི་ལས་འགན་ཡིན་སྟབས། འོས་ཐོན་མ་བྱུང་བའི་འོས་གཞི་དེར་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཡོང་བའི་ཞུ་སྐུལ་བྱུང་བ་ཡང་རང་བཞིན་གྱིས་ངོས་བཞེས་གནང་ཐབས་མེད་སྐོར་དང་། བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༦ ནང་གསལ་ལྟར། ཆེས་མཐོའི་ཁྲིམས་ཞིབ་ཁང་འདི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་དང༌། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན་པ་དང་། དེར་བཅའ་ཁྲིམས་ཀྱི་ཚིག་དོན་འགྲེལ་བརྗོད་བྱེད་པའི་སྐུ་དབང་དང་། དེ་བཞིན་བཅའ་ཁྲིམས་དོན་ཚན་ ༥ ནང་གསལ་ལྟར་ཁྲིམས་ལུགས་དང་། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་གང་རུང་ནུས་ལྡན་ཡིན་མིན་བཅའ་ཁྲིམས་ཀྱི་ཚད་འཛིན་ཐག་གཅོད་བྱེད་པའི་སྐུ་དབང་བཅས་བཙན་བྱོལ་བོད་མིའི་བཅའ་ཁྲིམས་ཀྱིས་ཆེས་མཐོའི་ཁྲིམས་ཞིབ་ཁང་ལ་བསྐུར་ཡོད་པས། ཀ་བ་གསུམ་གྱི་དབང་ཆའི་ས་མཚམས་ལས་མ་འགལ་བའི་ཐོག་ནས་ཐག་གཅོད་བྱས་པ་ཞིག་ཡིན་པ་དང་། བཅའ་ཁྲིམས་ཀྱིས་བསྐུར་བའི་འགན་དབང་རྣམས་ལག་བསྟར་བྱེད་སྐབས་སུ་བཅའ་ཁྲིམས་ཀྱི་དགོངས་དོན་ལ་དོ་ཕོག་དང་གནོད་འགལ་བྱེད་པའི་བྱ་སྤྱོད་མཐོང་བཞིན་དུ་དེར་སྣང་མེད་དམ། གུ་བཤངས་སམ། བབ་བསྟུན་ནམ། མཐུན་འགྱུར་བྱ་རྒྱུ་ནི་ཁྲིམས་ཞིབ་ཁང་གནས་དགོས་པའི་རྒྱུ་མཚན་དང་རྒྱབ་འགལ་ཡིན་པས། ཁྲིམས་ཞིབ་ཁང་ནས་བཅའ་ཁྲིམས་སྲུང་སྐྱོབ་ཀྱི་དམ་བཅའ་ནམ་ཡང་འདོར་ཐབས་མེད་པ་བཅས་གསུངས་སོང་།
ཁྲིམས་ཞིབ་ཁང་གི་གསར་འགོད་ལྷན་ཚོགས་གྲུབ་རྗེས་གསར་འགོད་པ་རྣམས་ནས་སྤྱི་འཐུས་ཚོགས་གཙོ་པདྨ་འབྱུང་གནས་ལགས་སུ་འཀའ་འདྲི་ཞུས་པར་སྤྱི་འཐུས་ལྷན་ཚོགས་ཀྱི་ངོས་ནས་བཀའ་བློན་བདམས་མཐོན་གྱི་གསལ་བསྒྲགས་གནང་བའི་ཐོག་དེ་སྔ་བཅའ་ཁྲིམས་དགོངས་དོན་བཞིན་བརྒྱ་ཆ་ ༥༠ ལོན་པར་ངོས་འཛིན་ཐག་གཅོད་གནང་བ་དེའི་ཐོག་གནས་ཀྱི་ཡོད་པ་གསུངས་སོང་།
དེ་བཞིན་ད་རེས་ཆེས་མཐོའི་ཁྲིམས་ཞིབ་ཁང་གི་སྤྱི་འཐུས་ལྷན་ཚོགས་ནས་བཅའ་ཁྲིམས་དོན་ཚན་ ༢༢ དགོངས་དོན་ལ་མངོན་གསལ་ཐོག་གནོད་འགལ་བྱས་ཡོད་སྐོར་གསུངས་པའི་ཐོག་ལན་འདེབས་གནང་ཡོད་པ་རེད།
དེའི་བར་ན་བཀའ་བློན་གྱི་འོས་མི་བཀའ་དྲུང་རྫོང་ཁ་སྟོབས་རྒྱལ་ལགས་བཀའ་དྲུང་གི་ལས་གནས་ནས་རྩ་དགོངས་ཞུས་ཟིན་པ་ལྟར། ད་ལྟའི་འཕྲོད་བསྟེན་ལས་ཁུངས་ཀྱི་དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས་བཀའ་དྲུང་ཡིག་ཚང་གི་དྲུང་ཆེར་བསྐོ་གཞག་གནང་ཡོད་པ་བཞིན་ཟླ་ ༤ ཚེས་ ༨ ནས་ལས་ཁུར་དབུ་འཛུགས་གནང་གི་ཡོད་པ་རེད།
བོད་རྒྱ་འབྲེལ་མོལ་ཐོག་འཐུས་ཤོར་སོང་བར་ངོས་འཛིན་བྱེད་ཀྱི་མེད།
དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༧ པའི་ལས་ཉིན་ ༤ པའི་ཚོགས་དུས་དང་པོའི་ཐོག་སྲོད་སྐྱོང་མཆོག་ལ་བོད་རྒྱ་འབྲེལ་མོལ་དང་དབུ་མའི་ལམ་གྱི་སྲིད་བྱུས་ཐོག་སྐར་རྟགས་ཅན་གྱི་དྲི་བ་གཉིས་ཕུལ་ཡོད་པ་རེད།བོད་མི་མང་སྤྱི་འཐུས་ཟླ་བ་ཚེ་རིང་ལགས་ཀྱིས་སྐར་རྟགས་ཅན་གྱི་དྲི་བ་གཉིས་གནང་བ་ལས་གཅིག་སྲིད་སྐྱོང་མཆོག་གིས་བོད་རྒྱ་འབྲེལ་མོལ་དེ་ཕྱི་ལོ་ ༢༠༡༠ ལོ་ནས་ཆད་པ་རེད་ཅེས་གསུངས་ཡོད་པ་དང་། དེ་བཞིན་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་དེ་མིན་འབྲེལ་ཡོད་ཁག་གིས་ཕྱི་ལོ་ ༢༠༡༡ ལོ་ནས་འབྲེལ་མོལ་ཆད་ཡོད་སྐོར་གསུང་བཞིན་ཡོད་པ་ལྟར་དེ་གཉིས་ལས་གང་བདེན་མིན་བཀའ་འདྲི་ཞུས་པར་སྲིད་སྐྱོང་མཆོག་གིས་ཕྱི་ལོ ༢༠༡༠ ལོའི་ཕྱི་ཟླ་དང་པོ་ནང་བོད་རྒྱ་འབྲེལ་མོལ་གྱི་ཚོགས་འདུ་མཐའ་མ་དེ་གནང་བ་ནས་བཟུང་བོད་རྒྱའི་སྐུ་ཚབ་དབར་བསྐྱར་དུ་འབྲེལ་མོ་བྱུང་མེད་སྟབས། དུས་དེར་འབྲེལ་མོལ་གྱི་མཚམས་ཆད་པར་ངོས་འཛིན་གནང་གི་ཡོད་སྐོར་གསུངས་ཡོད།སྲིད་སྐྱོང་མཆོག་གིས་དེ་ལས་འཕྲོས་ཏེ་བོད་མི་མང་སྤྱི་འཐུས་ཁག་གཅིག་ནས་བོད་རྒྱ་འབྲེལ་མོལ་མ་བྱུང་བའི་འགན་དེ་བཀའ་ཤག་གི་སྐབས་གང་ལ་ཡོད་མེད་སྐོར་བཀའ་འདྲི་ཞུས་སྐབས་དེ་སྔའི་བཀའ་ཤག་གིས་འབད་བརྩོན་གནང་དོན་ལྟར་ད་ལྟའི་བཀའ་ཤག་ནས་དེ་ལྟར་གནང་བཞིན་ཡོད་པ་ལས་འཐུས་ཤོར་སོང་བར་ངོས་འཛིན་རྩ་བ་ནས་གནང་གི་མེད་པར་བཀའ་ལན་གནང་བ་མ་ཟད། ཆབ་སྲིད་ཀྱི་སྐུ་དབང་ཡོངས་རྫོགས་བཀའ་ཤག་ལ་གནང་བའི་རྗེས་སུ་ཆབ་སྲིད་ཀྱི་འགན་དེའང་བཀའ་ཤག་ལ་ཡོད་པ་ལྟར་༸གོང་ས་མཆོག་གི་ཐུགས་སྣང་འོག་བཀའ་ཤག་གིས་ཕྱག་ལས་གནང་མུས་ཡིན་ཞེས་གསུངས་ཡོད།སྤྱི་འཐུས་ཟླ་བ་ཚེ་རིང་ལགས་ཀྱིས་དབུ་མའི་ལམ་གྱི་སྲིད་བྱུས་ཀྱི་བདག་དབང་ཡོངས་རྫོགས་འཛིན་སྐྱོང་བཀའ་ཤག་གཅིག་པོར་ཡོད་པ་ལས་གཞན་སུ་ལའང་མེད་དམ་ཞེས་དང་དེ་བཞིན་མང་ཚོགས་ནས་མ་སྐུལ་དང་བླངས་ཀྱིས་ཚོགས་སྒེར་སུ་རུང་ནས་གཞུང་ལ་དབུ་འོག་དཔུང་འདེགས་གནང་ནས་འགན་ཁུར་གནང་ཚེ་འགྲིག་མིན་སྐོར་སྐར་རྟགས་ཅན་གྱི་དྲི་བ་ཕུལ་བར་སྲིད་སྐྱོང་མཆོག་གིས་དབུ་མའི་ལམ་གྱི་སྲིད་བྱུས་དེ་བོད་རྒྱ་ཞི་མོལ་ཡོང་ཐབས་སླད་དུ་བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཀྱིས་གཏན་ལ་ཕབ་པའི་སྲིད་བྱུས་ཤིག་ཡིན་པ་དང་ལག་བསྟར་གནང་རྒྱུའི་འགན་ཁུར་བཀའ་ཤག་ལ་ཡོད་སྟབས་དེའི་བདག་དབང་བཀའ་ཤག་ལས་གཞན་སུ་གང་ལ་མེད་པ་དང་མང་ཚོགས་ནས་དབུ་འོག་དཔུང་འདེགས་གནང་ཚེ་མ་འགྲིག་པ་མེད་ཅེས་གསུངས་སོང་། སྲིད་སྐྱོང་མཆོག་གིས་ད་དུང་བཀའ་ཤག་ནས་འགྲེལ་བཤད་གནང་བའི་དབུ་མའི་ལམ་གྱི་སྲིད་བྱུས་དེ་གཞུང་འབྲེལ་ཆགས་ཀྱི་ཡོད་པ་དང་། ཚོགས་པ་གཞན་ཞིག་གིས་བཀའ་ཤག་གི་འགྲེལ་བཤད་ལས་བརྒལ་བའི་འགྲེལ་བཤད་གནང་ཚེ་དེ་བཀའ་ཤག་གི་འགྲེལ་བཤད་དེ་འགྲིག་པར་ངོས་འཛིན་དགོས་གནད་ཡིན་པ་གསུངས་ཡོད།རྩ་བའི་གྲོས་ཚོགས་ཚོགས་དུས་ ༧ པའི་ལས་ཉིན་ ༤ པའི་ཚོགས་དུས་དང་པོའི་ཐོག་སྐར་རྟགས་ཅན་གྱི་དྲི་བར་ལན་འདེབས་གྲུབ་མཚམས་སུ་བཀའ་ཤག་སྐབས་ ༡༥ ནང་བཀའ་བློན་འཕར་མ་ཞིག་བསྐོ་གཞག་དང་། དེ་རྗེས་ཕྱི་དྲིལ་ལས་ཁུངས་ཀྱི་ཁྱབ་ཁོངས་དོན་གཅོད་ཁག་གི་སྔོན་རྩིས་ཐོག་བགྲོ་གླེང་མུ་མཐུད་གནང་ཡོད་པ་རེད།
Kadrung Tobgyal Tsering nominated new Kalon of 15th Kashag
https://www.youtube.com/embed/VA7yZCM-do8
བཀའ་དྲུང་སྟོབས་རྒྱལ་ཚེ་རིང་ལགས་མང་མོས་ཀྱིས་བཀའ་བློན་དུ་བདམས་ཐོན་གནང་བ།
སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཞི་པའི་ཐོག་སྲིད་སྐྱོང་བློ་བཟང་སེང་མཆོག་གིས་ད་ལྟའི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་བཀའ་ཤག་སྐབས་ ༡༥ པའི་བཀའ་བློན་དུ་མཚན་འདོན་གནང་དོན་བཞིན་ཁོང་ལ་མང་མོས་ཀྱིས་བཀའ་བློན་དུ་བདམས་ཐོན་གནང་སོང་།དེ་རིང་ཟླ་ ༣ ཚེས་ ༢༢ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཞི་པ་དབུ་འཛུགས་གནང་བ་དང་འབྲེལ། བོད་རྒྱ་འབྲེལ་མོལ་དང་དབུ་མའི་ལམ་གྱི་སྲིད་བྱུས་ཐོག་སྐར་རྟགས་ཅན་གྱི་དྲི་བ་དང་ལན་འདེབས་ཀྱི་ལས་རིམ་གྲུབ་རྗེས། སྲིད་སྐྱོང་མཆོག་གིས་གྲོས་ཚོགས་སུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༡ པའི་དགོངས་དོན་བཀའ་དྲུང་སྟོབས་རྒྱལ་ཚེ་རིང་ལགས་བཀའ་བློན་གྱི་འོས་མིར་མཚན་འདོན་གནང་ཡོད་པ་རེད། སྲིད་སྐྱོང་མཆོག་གིས་བཀའ་བློན་གྱི་འོས་མི་ངོ་སྤྲོད་གནང་གྲུབ་རྗེས་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་རང་ཉིད་ཀྱི་ལངས་ཕྱོགས་དང་ལྟ་གྲུབ་གཞིར་བཞག་ཐོག་ནས་དགག་བྱ་གནང་ཡོད་སྟབས། མཛོང་ཁ་སྟོབས་རྒྱལ་ཚེ་རིང་ལགས་སུ་སྤྱི་འཐུས་རྣམ་པས་གསང་བའི་འོས་ཤོག་འཕངས་རྗེས་སྤྱི་འཐུས་རྩ་འབོར་ ༤༣ ནས་འོས་པ་ ༢༡ དང་མི་འོས་པ་ ༡༨ སྟོང་པ་ ༢ དང་རྩིས་མེད་ ༡ བཅས་མང་མོས་ཐོག་ནས་སྐབས་ ༡༥ པའི་བཀའ་ཤག་ལྷན་ཚོགས་ཀྱི་བཀའ་བློན་དུ་བདམས་ཐོན་བྱུང་ཡོད་པ་རེད།སྤྱི་འཐུས་རྣམས་ནས་འོས་ཤོག་མ་འཕང་གོང་དུ་སྲིད་སྐྱོང་བློ་བཟང་སེང་གེ་མཆོག་གིས་ད་ལྟའི་བཀའ་བློན་འོས་མི་འདི་ལ་དགག་པ་གནང་མཁན་སྤྱི་འཐུས་གཅིག་བྱུང་ཡོད་ཀྱང་། ད་ལྟའི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་ཐེགས་པ་རིམ་འཛེམས་ཀྱིས་དབུས་བོད་མིའི་སྒྲིག་འཛུགས་ནང་ལ་ཕྱག་ལས་ཡུན་རིང་གནང་མཁན་ལྷག་བསམ་ཅན་ཞིག་ཡིན་པ་དང་ཁོང་ལ་བཀའ་བློན་གྱི་འོས་ཆོས་ཚང་ཡོད་སྐོར་ནན་གསུངས་གནང་ཡོད།གསར་འགོད་པས་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་སུ་བཀའ་བློན་དུ་བདམས་ཐོན་བྱུང་བ་དང་འབྲེལ་བཅར་འདྲི་ཁག་ཅིག་ཞུས་པར་ཁོང་གིས་རིང་མིན་ཕྱི་ཟླ་དྲུག་པའི་ཟླ་མཇུག་ཙམ་ལ་ཁོང་གི་རྒས་ཡོལ་འཕར་འགྱངས་ཀྱི་དུས་ཚོད་རྫོགས་ཀྱི་ཡོད་སྟབས། སྲིད་སྐྱོང་མཆོག་ནས་ཁོང་བཀའ་ཤག་སྐབས་ ༡༥ པ་དབུ་འཛུགས་པ་ནས་ད་བར་བཀའ་དྲུང་གི་ཕྱག་ལས་གནང་མུས་ཡིན་པར་དགོངས་བཞེས་ཀྱིས་བཀའ་ཤག་སྐབས་ ༡༥ པའི་ཕྱག་ལས་གནང་རྒྱུ་ལྷག་བསྡད་ཁག་རྒྱུན་འཁྱོངས་གནང་དགོས་པར་བཀའ་ཕེབས་ལྟར་ངོས་བཞེས་གནང་ཡོད་སྐོར་གསུངས་སོང་།གཞི་རྩའི་མཛོངས་ཁ་སྟོབས་རྒྱལ་ཚེ་རིང་ལགས་ཕྱི་ལོ་ ༡༩༥༥ ཕྱི་ཟླ་ ༧ ཚེས་ ༡ ཉིན་འཁྲུངས་ཡོད་པ་དང་། ཕྱི་ལོ་ ༡༩༧༣ ལོར་རྒྱ་གར་རྒྱལ་ཡོངས་འབྲིང་རིམ་སློབ་གཉེར་ལེགས་པར་ཐོན་མ་ཐག་རང་གཞུང་གི་བཀའ་འབྲེལ་ལྟར་ཐོག་མར་བལ་ཡུལ་ཤར་ཁུམ་བུ་སློབ་གྲྭར་ལོ་བཞིའི་རིང་དགེ་ཆེ་གནང་བ་དང་། དེ་རྗེས་མུ་མཐུད་གཞུང་ཞབས་ལས་གནས་སུ་ཞུགས་པ་ལྟར་ད་བར་སྲི་ཞུའི་ལས་འགན་ཐོག་ལ་ཐེགས་པ་རིམ་འཛེགས་ཀྱིས་རྩིས་པ་དང་། དྲུང་ཡིག བཟོ་མགོ མཉམ་དྲུང་། ལ་སྤྱི། ས་གནས་འགོ་འཛིན། ནང་སྲིད་དང་འཕྲོད་བསྟེན་གཉིས་སུ་གཟུང་དྲུང་དང་དྲུང་འཕར། ཤེས་རིང་དྲུང་ཆེ་བཅས་ཀྱི་ལས་འགན་ཞུས་ཡོད་པ་དང་། ད་ལྟ་བཀའ་དྲུང་ལས་ཐོག་ཡིན་པ་བཅས་ཁྱོན་མི་ལོ་ ༤༠ ལྷག་གི་རིང་དབུས་བོད་མིའི་སྒྲིག་འཛུགས་ཀྱི་སྲི་ཞུའི་ཕྱག་ལས་གནང་བཞིན་ཡོད་པ་རེད།
