Day4

དེ་རིང་སྐབས་ ༡༨ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༢ པའི་ལས་ཉིན་བཞི་པའི་ཐོག་ནང་སྲིད་ལས་ཁུངས་ཀྱི་ལོ་འཁོར་ལས་བསྡོམས་ཐོག་སྤྱི་ཡོངས་ཀྱི་བགྲོ་གླེང་དང་ལན་འདེབས་བསལ་བཤད་ཀྱི་ལས་རིམ་རྒྱུན་སྐྱོང་གནང་བའི་ཐོག  ནང་སྲིད་ལས་ཁུངས་ཀྱི་གཞིས་སྤོས་ལས་གཞིའི་སྐོར་བགྲོ་གླེང་ཁྲོད།  ནང་སྲིད་བཀའ་བློན་དཔལ་ལྡན་དོན་གྲུབ་མཆོག་གིས་ནང་སྲིད་ལས་ཁུངས་ཀྱི་ངོས་ནས་རྗེས་འབྱོར་བ་གཙོས་པའི་བོད་མི་གཅིག་ཀྱང་མ་ལུས་པར་གཟིགས་སྐྱོང་གནང་རྒྱུའི་དམ་བཅའ་བརྟན་པོ་ཡོད་པ་གསུངས་སོང་། དེ་ཡང་དེ་རིང་མུ་མཐུད་ནང་སྲིད་ལས་ཁུངས་ཀྱི་ལས་བསྡོམས་ཐོག་བགྲོ་གླེང་གི་ལས་རིམ་ཐོག་ཕེབས་པའི་ཁྲོད།  ཁ་ཉིན་ལས་ཉིན་གཉིས་པ་དང་དེ་རིང་ལས་ཉིན་བཞི་པའི་ཐོག་སྤྱི་འཐུས་ཁག་གཅིག་ནས་གཞིས་ཆགས་ཁག་ཏུ་ཞིང་ཁར་ཆུ་མེད་པའི་དཀའ་ངལ་ལོ་རེར་ཆེ་རུ་འགྲོ་བཞིན་པ་དང་འབྲེལ་ནས་ཆར་ཆུ་བདག་འཛིན་གྱི་ལས་དོན་ལ་ཤུགས་རྒྱག་དགོས་པའི་དགོངས་ཚུལ་ཕེབས་པར།  ནང་སྲིད་བཀའ་བློན་མཆོག་གིས་བཀའ་ལན་དུ།  སྤྱིར་ནང་སྲིད་ལས་ཁུངས་ཀྱིས་དེའི་ཐོག་ལས་གཞི་རིམ་པ་སྤེལ་ཡང་ས་གནས་མང་ཚོགས་ཀྱིས་ལྒ་སྨུག་སོགས་ཀྱི་ཞིང་ལས་བཏབ་ཕྱོགས་ཁྲོད་བོད་མི་རང་གི་བཟོས་པའི་དཀའ་ངལ་རྐྱེན་པས་འགོག་རྐྱེན་འཕྲད་བཞིན་ཡོད་པ་གསུངས་སོང་། དེ་བཞིན་སྤྱི་འཐུས་ཁག་གཅིག་གིས་བོད་ནས་ཕེབས་མཁན་གཙོ་བོར་འགྱུར་བའི་བོད་མི་ཁག་གཅིག་ད་དུང་གཞིས་སྤོས་ལས་གཞི་འདིའི་ནང་ཐོ་རྒྱག་མ་ཐུབ་པར་ལུས་ཡོད་པ་ནན་བརྗོད་དང་འབྲེལ། གཞིས་སྤོས་ལས་གཞི་འདི་སྒོ་རྒྱག་རྒྱུ་མེད་པའི་ཞུ་སྐུལ་གནང་མཁན་བྱུང་བར། ནང་སྲིད་བཀའ་བློན་མཆོག་གིས་ལན་འདེབས་སུ་གཞིས་སྤོས་ཀྱི་ལས་གཞིའི་ནང་དུ་མིང་ཐོ་གསར་པ་བཀོད་རྒྱུ་སོགས་གནས་སྐབས་མཚམས་འཇོག་ཞུས་པ་མ་གཏོགས་སྒོ་བརྒྱབ་མེད་པ་དང་། ནང་སྲིད་ཀྱི་ངོས་ནས་རྗེས་འབྱོར་བ་གཙོས་པའི་བོད་མི་གཅིག་ཀྱང་མ་ལུས་པར་གཟིགས་སྐྱོང་གནང་རྒྱུའི་དམ་བཅའ་བརྟན་པོ་ཡོད་པ་གསུངས་སོང་། དེ་བཞིན་སྤྱི་འཐུས་ཁག་གཅིག་གིས་རྒྱ་གར་གཞུང་གིས་ཕྱི་ལོ་ ༢༠༢༤ ལོའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ལག་བསྟར་གྱི་གནས་སྟངས་ཐད་དྲི་བ་ཕེབས་པར་ནང་སྲིད་བཀའ་བློན་མཆོག་གིས་བཀའ་ལན་དུ།  རྒྱ་གར་གཞུང་གིས་ ༢༠༢༤ ཡི་སྲིད་བྱུས་འདི་ཡོད་པར་བརྟེན་རྒྱ་གར་ནང་སྐྱབས་བཅོལ་བའི་སྤྱི་ཚོགས་མང་པོ་ཡོད་པའི་ཁྲོད་སྲིད་བྱུས་ཡོད་མཁན་གྱི་བཙན་བྱོལ་བ་ང་ཚོ་གཅིག་པོ་ཆགས་བསྡད་ཡོད་སྐོར་གསུངས་པ་དང་འབྲེལ། རྒྱ་གར་དབུས་དང་མངའ་སྡེ་རེ་རེའི་ངོས་ནས་བོད་མིར་རོགས་པ་བྱེད་བཞིན་པ་དེ་དག་འདིའི་འོག་ནས་འགྲོ་བཞིན་ཡོད་པ་དང་། བོད་མི་གཞོན་སྐྱེས་རྣམས་ལ་རྒྱ་གར་སྤྱི་ཚོགས་ནང་དུ་ལས་ཀའི་ཐོབ་ཐང་འདྲ་མཉམ་ཐོབ་རྒྱུ་བཅས་ཀྱི་ཕན་ཐོགས་ཆེན་པོ་བྱུང་ཡོད་པ་བཅས་བསྐྱར་ནན་གནང་སོང་། དེ་མིན་དེ་རིང་ནང་སྲིད་ལས་ཁུངས་ཀྱི་ལས་བསྡོམས་ཐོག་སྤྱི་ཡོངས་ཀྱི་བགྲོ་གླེང་ཁྲོད། མཉམ་འབྲེལ་གྱི་གནད་དོན་སྐོར་གླེང་སློང་མུ་མཐུད་སླེབས་པ་དང་འབྲེལ། ནང་སྲིད་བཀའ་བློན་གྱིས་མཉམ་འབྲེལ་གྱི་གནད་དོན་ཚང་མའི་ནང་རྒྱ་གར་ཁྲིམས་ཀྱི་ཐོག་ནས་ནང་སྲིད་ལས་ཁུངས་འཛུལ་ཆོག་གི་མེད་ཀྱང་དེ་མིན་གྱི་རྒྱབ་སྐྱོར་དང་རམ་འདེགས་ཞུ་བཞིན་ཡོད་པ་གསུངས་སོང་། དེ་བཞིན་གངས་ཅན་སྐྱིད་གཤོངས་རྒྱ་སྒོ་ནས་བཀའ་ཤག་བར་གཞུང་ལམ་ཐོག་ཡུལ་མི་རྒྱ་གར་བའི་གླ་འཁོར་འཇོག་བཞིན་པའི་དཀའ་ངལ་སྐོར་སྤྱི་འཐུས་གཙོས་པའི་བཞུགས་སྒར་དུ་ཕེབས་མཁན་མང་ཆེའི་བསམ་ཚུལ་སླེབ་བཞིན་པ་དང་འབྲེལ།  བཀའ་ལན་དུ་ནང་སྲིད་བཀའ་བློན་མཆོག་གིས་གངས་སྐྱིད་རྒྱ་སྒོ་ནས་བཀའ་ཤག་བར་གྱི་གཞུང་ལམ་དེ་མིང་བསྒྱུར་བྱས་པའི་བོད་མིའི་སྒྲིག་འཛུགས་ཀྱི་ས་ཁང་ནང་མེད་པ་མ་ཟད།  བོད་མིའི་སྒྲིག་འཛུགས་ལ་དེའི་ཐོག་བདག་དབང་ཡང་མེད་པ་ཡིན་ནའང་། ས་ཆ་བེད་སྤྱོད་གཏོང་བ་དང་འབྲེལ་ནས་རྒྱ་ལམ་བཟོ་ཕྱོགས་དང་ཉམས་གསོ་རིགས་ང་ཚོས་ཞུ་ཡི་ཡོད་པ་མ་ཟད། དེ་སྔ་བཀའ་ཤག་སྐབས་ ༡༥ པའི་སྐབས་ནས་བཟུང་ད་བར་ས་གནས་རྒྱ་གར་གྱི་འབྲེལ་ཡོད་ལས་ཁུངས་དང་དཔོན་རིགས་ལྷན་དུ་གླེང་སློང་དང་ཐབས་ལམ་འཚོལ་བཞིན་ཡོད་པ་གསུངས་སོང་།   དེ་བཞིན་དེ་རིང་གི་བགྲོ་གླེང་ལས་རིམ་ཁྲོད་བཞུགས་སྒར་ཁུལ་གྱི་བོད་པའི་ཁང་ཁྱིམ་ ༢༡༨ ཀྱི་གནས་སྟངས་སྐོར་དང་བལ་བོད་ས་མཚམས་ས་ཁུལ་དུ་ཆུ་རུད་ཀྱི་གནས་སྟངས་དང་། དེར་ཞིབ་འཇུག་དང་རོགས་སྐྱོར་གྱི་གནད་དོན། དེ་བཞིན་བལ་ཡུལ་ནང་གི་ཤ་ཝ་ར་གསུམ་གྱི་བོད་མི་རྣམས་རུབ་སྡོད་གཞིས་ཆགས་ཀྱི་ལས་གཞིའི་ནང་བཅུག་དགོས་པའི་གཞན་སྐུལ་ཡང་གནང་མཁན་བྱུང་སོང་། དེ་བཞིན་དེ་རིང་རྒན་གསོ་ཁང་གི་གནས་སྟངས་སོགས་ཀྱི་ཐོག་ལ་ཡང་དྲི་བ་དང་གསལ་བཤད་སོགས་མུ་མཐུད་གནང་སོང་། རྩ་བའི་དེ་རིང་ལས་ཉིན་བཞི་པའི་གྲོས་ཚོགས་དེ་བཞིན་ཉིན་རྒྱབ་ཏུ་སྤྱི་འཐུས་ལྷན་ཁང་གི་ཟུར་ཆད་ལས་རིམ་ཡོད་པ་དང་འབྲེལ་ནས་གྲོས་ཚོགས་ཉིན་ཕྱེད་ལས་འཚོགས་མ་སོང་།

འདས་ལོར་རྒྱལ་སྤྱིའི་རྒྱལ་ཁབ་བཞི་ནང་མ་གཏོགས་བསྐྱོད་ཐུབ་མེད་ཀྱང་དྲིལ་བསྒྲགས་ཀྱི་ལས་དོན་ལ་དོ་ཕོག་ཕྱིན་པར་ངོས་འཛིན་ཞུ་ཡི་མེད།

བཀའ་ཤག་གིས་སྐར་རྟགས་ཅན་གྱི་དྲི་བར་བཀའ་ལན་དང་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་སྤྱི་མོས་ཀྱིས་གཏན་འབེབས།

དཔལ་འབྱོར་ལས་ཁུངས་ཀྱི་ལས་བསྡོམས་ཁྲོད་བུད་མེད་ནུས་སྟོབས་དང་དྭང་བླངས་དཔྱ་དངུལ་འབུལ་བབ་སོགས་ཀྱི་སྐོར་ལ་བགྲོ་གླེང་གནང་སོང་།

ཕྱི་དྲིལ་བཀའ་བློན་མཆོག་ལ་སྐུའི་གོ་སྟོན་གྲ་སྒྲིག་དང་བོད་དོན་དྲིལ་བསྒྲགས་གནང་ཕྱོགས་ཐད་འདྲི་རྩད།

དེ་རིང་གྲོས་ཚོགས་ནང་ཕྱི་རྒྱལ་བོད་ཕྲུག་སློབ་མ་ཚོར་བོད་ཡིག་བོད་སྐད་སློབ་ཁྲིད་དང་འབྲེལ་བའི་གནད་དོན་སྐོར་བགྲོ་གླེང་ལྷུག་པོ་གནང་སོང་།

གྲོས་ཚོགས་སུ་བོད་ཀྱི་སྐུ་ཚབ་དོན་གཅོད་ཁག་གི་ལས་དོན་ཐད་འདྲི་རྩད་དང་སྔོན་རྩིས་གཏན་འབེབས།

སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་སུ་སྙོན་འཛུགས་དེ་གཞི་མེད་ཡིན་པ་གསུངས་འདུག

ནང་སྲིད་བཀའ་བློན་མཆོག་ལ་བཙན་བྱོལ་བོད་མིའི་མི་འབོར་གྲངས་བཤེར་ལས་གཞིའི་ཐོག་འདྲི་རྩད་ལྷུག་པོ་གནང་སོང་།