གསར་འགྱུར།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་ ༡༡ པའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་ཉེ་སྔོན་གྲོས་ཚོགས་ཀྱི་ལས་ཉིན་ ༧ པའི་ཐོག་སྤྱི་འཐུས་རྣམས་ནས་བགྲོ་གླེང་གནང་ཟིན་པ་ལྟར་ཆབ་སྲིད་དང་འབྲེལ་བའི་གལ་ཆེའི་གནད་དོན་ཐད་བཀའ་ཤག་གི་གསལ་བཤད་ལེན་འདེབས་གནང་སྐབས་འདས་པའི་ལོ་བཅུའི་ཉམས་མྱོང་ལ་གཞིགས་ཏེ་རྒྱ་ནག་གཞུང་གི་ངོས་ནས་བོད་མིའི་སྒྲིག་འཛུགས་དང་སྲིད་སྐྱོང་ལ་ངོས་ལེན་རྩ་བ་ནས་བྱེད་ཀྱི་མེད་སྟབས་བོད་རྒྱ་འབྲེལ་མོལ་གྱི་གནད་དོན་དེ་༸གོང་ས་མཆོག་༸སྐུ་ཉིད་མཆོག་ནས་གནང་ན་མ་གཏོགས་བོད་མིའི་སྒྲིག་འཛུགས་དང་བཀའ་ཤག་ནས་གནང་དཀའ་བའི་ངེས་པ་རྙེད་པ་ཞིག་བྱུང་ཞེས་གསུངས་སོང་།དེ་རིང་སྔ་དྲོའི་ཚོགས་ཐེངས་དང་པོ་འདི་བཞིན་བཀའ་ཤག་གི་གསལ་བཤད་ཐོག་སྤྱི་འཐུས་རྣམས་ནས་བགྲོ་གླེང་གནང་ཟིན་ཁག་ལ་ལེན་འདེབས་གསལ་བཤད་ཐོག་ཕེབས་པ་དང་འབྲེལ་ནས་སྲིད་སྐྱོང་མཆོག་གིས་ཉེ་སྔོན་གསུམ་བཅུའི་དུས་དྲན་སྐབས་བོད་ནང་གི་ཛ་དྲག་གནས་སྟངས་ཐད་བཀའ་ཤག་གི་གསུང་འཕྲིན་ཕེབས་མ་ཐག་པ་དང་། ཐེངས་འདིའི་གྲོས་ཚོགས་ཀྱི་ཚོགས་དུས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོད་ཆོས་གྲོས་འཆར་གཏན་འབེབས་གནང་བར་༸གོང་ས་མཆོག་དང་བོད་མིའི་སྒྲིག་འཛུགས་ནས་བོད་ཀྱི་རྩ་དོན་སེལ་རྒྱུར་གཉིས་སྨན་དབུ་མའི་ལམ་གྱི་སྲིད་བྱུས་འོག་ནས་བོད་རྒྱ་འབྲེལ་མོལ་ཡོང་ཆེད་འབད་བརྩོན་ཇི་ཙམ་གནང་མིན་ལ་མ་ལྟོས་མར་འབྲེལ་མོལ་ཡོང་ཁག་པོ་ཆགས་པར་བརྟེན་བོད་མིའི་ངོས་ནས་རྒྱལ་སྤྱིའི་རྒྱབ་སྐྱོར་འཚོལ་བ་དང་འབྲེལ་ནས་རྒྱ་ནག་ལ་འབྲེལ་མོལ་དགོས་པའི་གནོན་ཤུགས་སྤྲོད་དགོས་སྐོར་འཁོད་དོན་ལྟར་དེ་སྔའི་རྒྱལ་སྤྱིའི་ཁྲོད་བོད་དོན་རྒྱབ་སྐྱོར་གྱི་གནས་བབ་ཐོག་ནས་གསལ་བཤད་གནང་ཡོད་སྐོར་གསུངས་པ་དང་ཆབས་ཅིག དེ་བཞིན་དེའི་ཐོག་སྤྱི་འཐུས་རྣམས་ཀྱིས་བཀའ་འདྲི་ཁག་ཅིག་ཕེབས་པའི་ཁྲོད་དེ་སྔའི་བཀའ་བློན་ཁྲིད་པ་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་༸གོང་ས་མཆོག་གི་ཆབ་སྲིད་ཀྱི་༸སྐུ་དབང་རྩིས་སྤྲོད་གནང་བ་དང་འབྲེལ་ཉེན་ཁ་བཅུ་ཞེས་གསུངས་ཡོད་པའི་ཐོག་ནས་ལན་འདེབས་གནང་ཡོད།དེའི་ཁྲོད་ཉེན་ཁ་ ༡༠ ཞེས་པའི་གསུང་བཤད་གནང་བའི་དོན་ཚན་ ༥ པ་སྟེ་༸གོང་ས་མཆོག་ནས་༸སྐུ་དབང་རྩིས་སྤྲོད་གནང་བའི་རྗེས་སུ་བོད་རྒྱ་འབྲེལ་མོལ་ཡོང་བར་དཀའ་ངལ་འཕྲད་ངེས་ཡིན་སྐོར་གསུངས་པ་དེར་ངོས་ལེན་ཞུས་པ་དང་། ད་ལྟའི་རྒྱ་ནག་གཞུང་འཛིན་གྱི་ལྟ་བ་ཧ་ཅང་མཁྲེགས་པོ་འཛིན་བཞིན་ཡོད་པ། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གི་ངོས་ནས་བོད་རྒྱ་འབྲེལ་མོལ་དང་འབྲེལ་བའི་གནང་སྒོ་ཁག་ད་ལྟའི་ཆར་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་རྒྱ་ཡིག་ཚན་པས་འགན་བཞེས་རྒྱུ་ཡིན་པར་བཀའ་སྩལ་བ་བཅས་ལུང་འདྲེན་གྱིས་བོད་རྒྱ་འབྲེལ་མོལ་གྱི་གནད་དོན་དེ་༸གོང་ས་མཆོག་༸སྐུ་ཉིད་མཆོག་ནས་གནང་ན་མ་གཏོགས་བོད་མིའི་སྒྲིག་འཛུགས་དང་བཀའ་ཤག་ནས་གནང་དཀའ་བའི་ངེས་པ་རྙེད་པ་ཞིག་བྱུང་ཞེས་གསུངས་སོང་། སྲིད་སྐྱོང་མཆོག་གིས་སྐབས་དེར་བཀའ་བློན་ཁྲི་ཟུར་མཆོག་གིས་ཉེན་ཁ་བཅུའི་ཐོག་གསུང་བཤད་གནང་བ་ལས་༸གོང་ས་མཆོག་གིས་ཆབ་སྲིད་ཀྱི་༸སྐུ་དབང་རྩིས་སྤྲོད་གནང་བའི་རྗེས་སུ་བོད་དོན་ཐོག་རྒྱལ་སྤྱིའི་ཁྲོད་བོད་མིའི་སྒྲིག་འཛུགས་ལ་ངོས་ལེན་དང་རྒྱབ་སྐྱོར་ཉུང་ངུ་འགྲོ་ཉེན་དང་རྒྱབ་སྐྱོར་བ་གསར་པ་རག་དཀའ་བ་ཆགས་ཉེན། བོད་ནང་དང་ཕྱི་རྒྱལ་ཁག་ཏུ་བཞུགས་པའི་བོད་མི་རྣམས་ནས་སྒྲིག་འཛུགས་ལ་ཁྲིམས་མཐུན་ངོས་ལེན་ཞུ་མཁན་ཉུང་ངུ་འགྲོ་ཉེན། བོད་མིའི་སྒྲིག་འཛུགས་ཀྱི་ཁྲིམས་མཐུན་གྱི་གཞི་རྩར་བཟུང་ཁག་པོ་ཆགས་ཉེན། དེ་བཞིན་གཞིས་བྱེས་བོད་མིའི་མཉམ་རུབ་ཀྱི་ནུས་པ་ཉམས་ཉེན། བོད་མིའི་སྒྲིག་འཛུགས་ཀྱི་དཔལ་འབྱོར་གྱི་གནས་བབ་ཉམས་ཉེན་བཅས་འཁོད་ཡོད་པ་མཐའ་དག་འདས་པའི་ལོ་བཅུའི་ནང་༸གོང་ས་མཆོག་གི་བཀའ་དྲིན་འོག་ནས་རང་ཉིད་དང་ཕྱག་རོགས་རྣམ་པས་འབད་བརྩོན་ལྷད་མེད་གནང་བར་བརྟེན་ཉམས་རྒྱུ་འགྲོ་བ་ལས་ལྡོག་ནས་གོང་འཕེལ་ཕྱིན་ཡོད་སྐོར་གསུངས་སོང་།ཉེ་ཆར་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་དང་དེའི་ནང་བོད་མིའི་སྒྲིག་འཛུགས་དང་སྲིད་སྐྱོང་ལ་ངོས་འཛིན་ཡོད་པ། ཡུ་རོབ་དང་ཨེ་ཤ་ཡའི་རྒྱལ་ཁབ་ཁག་གི་གྲོས་ཚོགས་ཀྱི་བོད་དོན་རྒྱབ་སྐྱོར་བ་སྔར་ལྷག་ཡོད་པ། དེང་སྐབས་བཙན་བྱོལ་བོད་མིའི་ས་ཕྱོགས་གང་ས་ནས་སྲིད་སྐྱོང་དང་སྤྱི་འཐུས་སུ་བཞེངས་མཁན་ཧ་ཅང་མང་པོ་ཆགས་ཡོད་པ་དེ་དག་ལས་བཙན་བྱོལ་བོད་མིའི་ཁྲོད་བོད་མིའི་སྒྲིག་འཛུགས་ལ་ངོས་འཛིན་དང་ངོས་ལེན་སྔར་ལྷག་ཡོད་པ། དེ་བཞིན་བོད་ནང་དུའང་རྒྱ་གཞུང་གིས་དྲག་གནོན་ཇི་ཙམ་བྱས་དང་བྱེད་མུས་ལ་ལྟོས་མེད་བོད་མི་ཚོས་རང་ལུས་མེར་བསྲེགས་གནང་བ་གཙོས་ངོ་རྒོལ་གྱི་ལས་འགུལ་རྒྱུན་ཆད་མེད་པ་སྤེལ་བཞིན་པ་ལས་གཞིས་ལུས་བོད་མི་རྣམས་ཀྱི་ཆོད་སེམས་སྔར་བཞིན་བརྟན་པོ་ཡོད་པ། བཅའ་ཁྲིམས་རིན་པོ་ཆེའི་དོན་ཚན་ ༡ ནང་དུ་༸གོང་ས་མཆོག་ནི་བོད་མིའི་བླ་ན་མེད་པའི་དབུ་ཁྲིད་ཡིན་པ་དང་། མགོན་པོ་༸གང་ཉིད་མཆོག་ལ་རང་ཆས་སུ་ཡོད་པའི་༸སྐུ་དབང་ཡོད་ཅེས་འཁོད་པ་དེ་ནི་ཁྲིམས་མཐུན་རང་གནས་ཡོད་པ་དང་། བོད་མིའི་སྒྲིག་འཛུགས་ཀྱི་མ་དངུལ་ས་ཡ་ ༡༠༠༠ ཙམ་ནས་ ༢༠༠༠ ལྷག་འཕར་ཆ་བྱུང་ཡོད་པ་སོགས་ཀྱི་ཐོག་ནས་གསལ་པོ་རྟོགས་རྒྱུ་ཡོད་པ་གསུངས་ཡོད།

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ཐོག་གཞུང་འབྲེལ་གྲོས་ཆོད་གྲོས་འཆར་ཞིག་གི་ཐོག་ནས་བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༣ ནང་གསེས་ ༤ པའི་དགོངས་དོན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམ་ནོར་བུ་མཆོག་དང་ཁྲིམས་ཞིབ་པ་གཞན་ཀརྨ་དགྲ་འདུལ་མཆོག བསྟན་འཛིན་ལུང་རྟོགས་མཆོག་བཅས་འཕོ་འགྱུར་གནང་སོང་།དེ་རིང་གྲོས་ཚོགས་ཀྱི་སྔ་དྲོའི་ཚོགས་དུས་ཐོག་སྤྱི་འཐུས་ཨཱཙཱརྱ་ཡེ་ཤེས་ཕུན་ཚོགས་མཆོག་དང་མཁན་པོ་བསོད་ནམས་བསྟན་འཕེལ་ལགས་རྣམ་གཉིས་ཀྱིས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་གཞན་གཉིས་བཅས་འཕོ་འགྱུར་གནང་རྒྱུ་དང་འབྲེལ་བའི་གཞུང་འབྲེལ་གྱི་གྲོས་ཆོད་གྲོས་འཆར་བསྣམས་པའི་ཐོག་སྔ་ལོ་སྤྱི་འཐུས་རྒྱུན་ལས་ཀྱིས་བཅའ་ཁྲིམས་ཀྱི་དགོངས་དོན་ལྟར་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་འཕར་འགྱངས་གནང་བའི་གནད་དོན་དང་འབྲེལ་ཏེ་ཆེས་མཐོའི་ཁྲིམས་ཞིབ་ཁང་ནས་རྩད་གཅོད་གནང་བ་དང་རྒྱུན་ལས་ཀྱི་ཚོགས་མི་རྣམས་ཀྱི་འདེམས་བྱེད་ཀྱི་ཐོབ་ཐང་བཀག་བསྐྱིལ་གནང་བ་དེ་ནི་བཅའ་ཁྲིམས་དང་ཡོངས་སུ་འགལ་ཡོད་སྟབས། ཐག་གཅོད་དེར་ནམ་ཡང་ངོས་ལེན་བྱ་ཐབས་མེད་པར་འགྲེལ་བརྗོད་དང་སྦྲགས། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམས་ནས་ཁྲིམས་ཀྱི་ངོས་བཞེས་ཞེས་པའི་བརྒྱུད་སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་རྩད་དང་ཁྲིམས་ཀྱི་ངོས་བཞེས་ཞེས་པའི་དབང་ཚད་ཡོད་ཚུལ་རྒྱལ་ཁབ་གཞན་གྱི་ཁྲིམམས་སྒྲིག་དང་སྦྱར་ནས་ཞྭ་དཔེ་ལྷམ་འགེབས་བྱས་ནས་དེ་འབྲེལ་ཐག་གཅོད་ཀྱི་བཀའ་ཁྱབ་བཏང་བ་བཅས་ནི་བཙན་བྱོལ་བོད་མིའི་བཅའ་ཁྲིམས་དང་འགལ་བར་བརྟེན་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་གྲོས་ཆོད་འདི་བཞག་ཉིན་ནས་འཕོ་འགྱུར་དགོས་པའི་གྲོས་ཆོད་ཅེས་བཀོད་ཡོད་པ་རེད།བོད་མི་མང་སྤྱི་འཐུས་རྣམ་པས་གཞུང་འབྲེལ་གྱི་གྲོས་ཆོད་གྲོས་འཆར་ཐོག་བགྲོ་གླེང་གནང་མཐར་ཚོགས་གཙོ་སྦྲེལ་པོའི་སྐུ་དབང་ཐོག་ནས་གསང་བའི་འོས་བསྡུ་གནང་སྟེ་སྤྱི་འཐུས་ཀྱི་རྩ་འབོར་གསུམ་ཆ་གཅིག་ཡན་ཚང་དགོས་ཀྱི་ཡོད་པ་ལྟར། འཕོ་འགྱུར་དགོས་པའི་འོས་གྲངས་ ༣༡ དང་འཕོ་འགྱུར་མི་དགོས་པའི་འོས་གྲངས་ ༡༠ བཅས་ཚད་མཐོའི་འོས་གྲངས་ཐོག་ནས་ཁྲིམས་ཞིབ་པ་ཆེ་བ་དང་གཞན་གཉིས་འཕོ་འགྱུར་བཏང་སོང་།གཞི་རྩའི་འདས་ལོའི་ཕྱི་ཟླ་ ༨ ཚེས་ ༡༧ ཉིན་སྤྱི་འཐུས་ཚོགས་གཙོ་སྦྲེལ་པོ་རྣམ་གཉིས་ཀྱིས་ཕྱི་ཟླ་ ༩ ནང་འཚོགས་གཏན་འཁེལ་བའི་གྲོས་ཚོགས་ཚོགས་དུས་བཅུ་པ་འདི་ཏོག་དབྱིབས་གཉན་རིམས་ཁྱབ་གདལ་གྱིས་རྒྱལ་སྤྱིའི་འགྲུལ་བཞུད་བཀག་སྡོམ་གནང་རྐྱེན་ཕྱི་ལོ་ ༢༠༢༡ ལོའི་ཟླ་ ༣ པའི་ནང་ཕར་འགྱངས་གནང་བ་ཡོངས་གྲགས་གནང་ཡོད་པ་རེད།ཚོགས་གཙོ་སྦྲེལ་པོས་ཐག་གཅོད་དེ་ཡོངས་གྲགས་གནང་འཕྲལ་ཆེས་མཐོའི་ཁྲིམས་ཞིབ་ཁང་གིས་ཚོགས་གཙོ་སྦྲེལ་པོ་རྣམ་གཉིས་ཀྱི་བརྒྱུད་སྤྱི་འཐུས་ལྷན་ཚོགས་ལ་ཐག་གཅོད་དེ་ཁྲིམས་འགལ་ཡིན་པར་ངོས་འཛིན་གྱིས་ནུས་མེད་དུ་བཏང་བ་དང་འབྲེལ་སྤྱི་འཐུས་རྒྱུན་ལས་ལྷན་ཚོགས་ཀྱིས་འཕྲལ་དུ་ཁྲིམས་འགལ་ཆགས་པའི་གསལ་བསྒྲགས་དེ་ཕྱིར་འཐེན་དགོས་སྐོར་གྱི་བཀའ་ཁྱབ་དང་བརྡ་ཐོ་རིམ་པ་བཏང་ཡོད་ཀྱང་། སྤྱི་འཐུས་རྒྱུན་ལས་ནས་ཁྲིམས་འགལ་གང་ཡང་གནང་མེད་པའི་གསལ་འདེབས་དང་ཞུ་སྐུལ་གནང་བ་ལྟར། ཆེས་མཐོའི་ཁྲིམས་ཞིབ་ཁང་གིས་ཕྱི་ཟླ་ ༩ ཚེས་ ༢༥ ཉིན་སྤྱི་འཐུས་རྒྱུན་ལས་ནས་བསམ་བཞིན་དུ་བཙན་བྱོལ་བོད་མིའི་བཅའ་ཁྲིམས་ལ་བརྩི་མེད་བྱས་པའི་བྱེད་འཛོལ་ལ་ཆེད་འགལ་ཐོག་ཕྱི་ལོ་ ༢༠༢༡ ཟླ་ ༣ ཚེས་ ༡༡ ཉིན་བར་སྤྱི་འཐུས་རྒྱུན་ལས་ ༡༡ གི་འོས་སྡུའི་འདེམས་བྱེད་ཀྱི་ཐོབ་ཐང་བཀག་བསྐྱིལ་གནང་ཡོད་པ་རེད།ཆེས་མཐོའི་ཁྲིམས་ཞིབ་ཁང་གི་ཐག་གཅོད་བཀའ་ཁྱབ་དེའི་ནང་སྤྱི་འཐུས་རྒྱུན་ལས་ལྷན་ཚོགས་ཀྱི་ཚོགས་མི་དེ་དག་གིས་བཅའ་ཁྲིམས་ཀྱིས་བོད་མི་མང་སྤྱི་འཐུས་ལྷན་ཚོགས་ལ་བཀུར་བའི་ལས་འགན་བསྒྲུབ་ཐུབ་པར་བྱ་རྒྱུར་བཅའ་ཁྲིམས་སུ་ཐབས་ཤེས་དང་ལམ་སྟོན་གནང་ཕྱོགས་ཡོད་བཞིན་དུ་བཅའ་ཁྲིམས་ཀྱིས་བཀུར་བའི་ལས་འགན་མ་བསྒྲུབ་པ་དང་བཅའ་ཁྲིམས་དང་ཁྲིམས་ཡིག་ཁག་ལ་སྙིང་ནས་བརྩི་བཀུར་དང་ཉམས་ལེན་ཞུ་དགོས་པའི་བོད་ཀྱི་ཡུལ་མིའི་ལས་འགན་མ་བླངས་པའི་བྱེད་འཛོལ་དམིགས་ཏེ་སྤྱི་དམངས་ཁྲིམས་ཡིག་དོན་ཚན་ ༥༡ དགོངས་དོན་ཐག་གཅོད་བཀོད་ཁྱབ་དེ་བཏང་ཡོད་སྐོར་གསུངས་ཡོད་པ་རེད།དེ་རིང་བོད་མི་མང་སྤྱི་འཐུས་ལྷན་ཚོགས་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་གཞན་གཉིས་འཕོ་འགྱུར་གཏོང་དགོས་པའི་གཞུང་འབྲེལ་གྲོས་ཆོད་གྲོས་འཆར་ཐོག་སྤྱི་འཐུས་རྣམ་པས་བགྲོ་གླེང་གནང་སྐབས་ཁག་ཅིག་གིས་དེར་རྒྱབ་སྐྱོར་གནང་ཡོད་ཀྱང་།སྤྱི་འཐུས་འགའ་ཤིག་གིས་དགག་ཆ་དང་འབྲེལ་ཏེ་གྲོས་འཆར་དེ་བརྒྱུད་ཆེས་མཐོའི་ཁྲིམས་ཞིབ་པ་ཆེ་བ་དང་གཞན་གཉིས་འཕོ་འགྱུར་གནང་རྒྱུ་དེས་དོན་དངོས་ཀྱི་དཀའ་རྙོག་སེལ་རྒྱུར་ཕན་ཐོགས་གང་ཡང་མེད་པའི་ཁར་ད་དུང་རྙོག་གླེང་ཆེ་རུ་འགྲོ་ཉེན་ཡོད་པར་གཟིགས་ཀྱི་ཡོད་སྟབས་དེ་ལས་བཙན་བྱོལ་བོད་མིའི་བཅའ་ཁྲིམས་ལ་བསྐྱར་བཅོས་དགོས་པའི་གཞེན་སྐུལ་གནང་བ་དང་། དེ་བཞིན་གྲོས་འཆར་དེའི་ནང་གི་ཚིག་ཁ་ཤས་ལ་བསྒྱུར་བཅོས་གནང་དགོས་པའི་གཞེན་སྐུལ་གནང་བ་མ་ཟད། རྙོག་གྲ་དེ་སེལ་ཆེད་མཁས་པའི་ཚོགས་ཆུང་ཞིག་ཆེད་འཛུགས་ཀྱིས་ཞིབ་འཇུག་མཐིལ་ཕྱིན་པ་ཞིག་གནང་གལ་ཡིན་པའི་དགོངས་འཆར་ཕུལ་མཁན་བྱུང་ཡོད་པ་རེད།དེ་རིང་གི་གྲོས་ཚོགས་ཐོག་སྤྱི་འཐུས་རྣམས་ཀྱིས་གསང་བའི་འོས་བསྡུའི་ལམ་ནས་གཞུང་འབྲེལ་གྱི་གྲོས་ཆོད་གྲོས་འཆར་དེ་འོས་གྲངས་ ༣༡ དང་ ༡༠ བཅས་མང་མོས་ཀྱི་ཐོག་ནས་གཏན་འབེབས་གནང་ཡོད་སྟབས། གསར་འགོད་པས་ཆེས་མཐོའི་ཁྲིམས་ཞིབ་ཁང་ལ་དེ་འབྲེལ་ཐོག་བཀའ་འདྲི་ཞུ་ཐབས་ཞུས་ཀྱང་། ཁྲིམས་ཞིབ་ཁང་གི་ངོས་ནས་གནད་དོན་དེའི་ཐོག་བཀའ་ལན་གང་ཡང་གནང་རྒྱུ་མེད་ཅེས་གསུངས་སོང་།གཞི་རྩའི་དེ་རིང་སྔ་དྲོའི་གཞུང་འབྲེལ་གྲོས་ཆོད་གྲོད་འཆར་གཏན་འབེབས་གྲུབ་མཚམས་སུ་མུ་མཐུད་ནས་ནང་སྲིད་ལས་ཁུངས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་དང་ལས་དོན་གནང་ཕྱོགས་ཐོག་བཀའ་འདྲི་དགོངས་སྐོར་དང་བགྲོ་གླེང་གནང་ཡོད་པ་རེད།

ཉེ་ཆར་ཡོ་རོབ་མཐུན་ཚོགས་ནས་རྒྱ་ནག་འགོ་ཁྲིད་ཁག་ཅིག་ཐོག་ཉེས་ཆད་བཏང་བར་རྒྱ་གཞུང་གིས་ཡོ་རོབ་མཐུན་ཚོགས་ལ་འཁོན་ལན་སློག་པའི་གནད་དོན་དང་འབྲེལ་ནས་ཨི་ཊ་ལིའི་ཕྱི་སྲིད་བློན་ཆེན་ནས་ཁུལ་དེའི་ནང་གི་རྒྱ་ནག་གཞུང་ཚབ་ཁང་གི་གཞུང་ཚབ་པ་ Li Junhua ཕྱི་སྲིད་ལས་ཁུངས་སུ་ཆེད་སྐོང་གནང་འདུག ཉིན་ཤས་སྔོན་རྒྱ་ནག་གཞུང་ནས་ཡོ་རོབ་མཐུན་ལ་འཁོན་ལན་ཚུལ་དུ་ཡོ་རོབ་མཐུན་ཚོགས་ཀྱི་གྲོས་ཚོགས་འཐུས་མི་ལྔ་གཙོས་འབྲེལ་ཡོད་ཉམས་ཞིབ་པ་བཅས་མི་སྣ་བཅུ་རྒྱ་ནག་ནང་བཀག་འགོག་བྱས་པའི་གནས་ཚུལ་ཐོན་ཡོད་པ་རེད། མིང་ཐོའི་ནང་ཨི་ཊ་ལིའི་གྲོས་ཚོགས་འཐུས་མི་འཁོད་ཡོད་པར་བརྟེན་ཁ་སང་ཕྱི་ཚེས་ ༢༤ ཉིན་གྱི་སྔ་དྲོ་ཨི་ཊ་ལའི་ཕྱི་སྲིད་ལས་ཁུངས་ནས་ཁུལ་དེའི་ནང་གི་རྒྱ་ནག་གཞུང་ཚབ་ཁང་གི་གཞུང་ཚབ་པ་ Li Junhua ཆེད་སྐོང་གནང་འདུག འོན་ཀྱང་ཕྱོགས་གཉིས་དབར་གླེང་མོལ་གང་བྱུང་བ་རྣམས་ནང་མོལ་ཙམ་ལས་བརྒྱུད་ལམ་ཐོག་སྤྱིར་བསྒྲགས་གང་ཡང་བྱས་མི་འདུག ད་ལན་ཨ་ཊི་ལི་ཙམ་མ་ཟད་ཉིན་ཤས་ནང་ཡོ་རོབ་རྒྱལ་ཁབ་ཕ་རན་སི་དང་འཇར་མན། སྦེལ་ཇམ། ལི་ཐོན་ནིཡ། སུ་ཌན། དེ་བཞིན་ཌན་མག་བཅས་ཀྱིས་སོ་སོའི་ནང་གི་རྒྱ་ནག་གཞུང་ཚབ་ཁང་གི་གཞུང་ཚབ་པ་ཆེད་སྐོང་གིས་རྒྱ་གཞུང་ནས་ཡོ་རོབ་མཐུན་ཚོགས་ལ་འཁོན་ལན་སློག་པའི་བྱ་སྤྱོད་ལ་སྐྱོན་བརྗོད་གནང་ཡོད་པ་རེད། ཁ་སང་སྔ་དྲོ་ཨི་ཊ་ལིའི་གྲོས་ཚོགས་ནང་དུ་ཁུལ་དེའི་གྲོས་ཚོགས་འཐུས་མི་སྐུ་ཞབས་ Formentini ལགས་ཀྱིས་རྒྱ་ནག་གཞུང་གིས་ཁོང་གིས་གཙོས་པའི་ཡོ་རོབ་མཐུན་ཚོགས་ཀྱི་གནད་ཡོད་མི་སྣ་ཁག་རྒྱ་ནག་ནང་བཀག་འགོག་བྱས་པའི་གནད་དོན་ཐོག་རྒྱ་གཞུང་ལ་སྐྱོན་བརྗོད་བྱས་པ་མ་ཟད། རྒྱ་གཞུང་གིས་བོད་དང་ཤར་ཏུ་ཀི་སི་ཐན་ནང་མི་རིགས་ལྡེབ་གསོད་གཏོང་བཞིན་པའི་བྱ་སྤྱོད་ལ་བཟོད་སྲན་གནང་ཐབས་མེད་ཅེས་གསུངས་འདུག དེ་བཞིན་ཁ་སང་ཉིན་རྒྱབ་ཨི་ཊ་ལིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས་ G20 ཚོང་དོན་སྒྲིག་འཛུགས་ཀྱི་མ་འོངས་ལས་དོན་དང་འབྲེལ་ནས་ཁུལ་དེའི་ནང་གི་རྒྱ་ནག་གཞུང་ཚབ་ཆེད་འབོད་ཀྱིས་དྲ་ཐོག་ཚོགས་འདུ་ཚོགས་འདུག་པ་དང། སྐབས་དེའི་ཚོགས་འདུའི་ཐོག་གྲོས་ཚོགས་འཐུས་མི་སྐུ་ཞབས་Formentini ལགས་ཀྱིས་གོ་སྐབས་ཆེ་བཞེས་གནང་སྟེ་ཏོག་དབྱིབས་གཉན་རིམས་ ༡༩ དེ་རྒྱ་ནག་ཝུ་ཧན་ནས་མཆེད་པ་ཡིན་པ་རྒྱ་གཞུང་གི་ངོས་ནས་ཁས་ལེན་བྱེད་དགོས་པ་དང། ཨི་ཊ་ལིས་མ་འོངས་པར་རྒྱ་ནག་དང་ལྷན་དུ་ཚོང་འབྲེལ་གནང་སྐབས་བོད་གཙོས་ཧོང་ཀོང་དང་ཤར་ཏུ་ཀི་སི་ཐན་བཅས་ཀྱི་གནད་དོན་མཚོན་པའི་ཁུལ་དེའི་ནང་གི་འགྲོ་བ་མིའི་ཐོབ་ཐང་གི་གནད་དོན་བློས་བཏང་བྱེད་ཀྱི་མ་རེད་ཅེས་གསུངས་འདུག ཁ་སང་གི་ཚོགས་འདུའི་ཐོག་ཨི་ཊ་ལིའི་ Lega ཆབ་སྲིད་ཚོགས་པའི་གྲོས་ཚོགས་འཐུས་མི་སྐུ་ཞབས་Formentini ལགས་ཙམ་མ་ཟད། ཨི་ཊ་ལིའི་ནང་གི་ཆབ་སྲིད་ཚོགས་པ་གཞན་ཚང་མས་ཞལ་གཅིག་གྲག་གིས་རྒྱ་ནག་གཞུང་གིས་བོད་དང་ཤར་ཏུ་ཀི་སི་ཐན། ཧོང་ཀོང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་པའི་ནན་སྐུལ་གནང་འདུག སྤྱིར་ད་རེས་རྒྱ་ནག་གཞུང་ནས་ཡོ་རོབ་མཐུན་ཚོགས་ཀྱིས་ཁུལ་དེའི་ནང་གི་འགོ་ཁྲིད་ཚོར་སྲིད་དོན་གྱི་ཉེས་ཆད་བཏང་བར་འཁོན་ལན་ཚུལ་དུ་ཡོ་རོབ་མཐུན་ཚོགས་ཀྱི་གྲོས་ཚོགས་འཐུས་མི་དང་འབྲེལ་ཡོད་ཉམས་ཞིབ་པ་ཚོ་བཅས་མི་སྣ་ ༡༠ རྒྱ་ནག་ནང་དུ་བཀག་འགོག་བྱས་པར་ཡོ་རོབ་མཐུན་ཚོགས་ཀྱི་གྲོས་ཚོགས་འཐུས་མི་ལས་གྲུབ་པའི་ IPAC ཞེས་རྒྱ་ནག་ལ་གདོང་ལེན་བྱེད་མཁན་གྱི་གྲོས་ཚོགས་འཐུས་མི་ཁག་ནས་ཟླ་ ༣ ཚེས་ ༢༢ ཉིན་རྒྱ་ནག་གཞུང་གི་བྱ་སྤྱོད་ལ་སྐྱོན་བརྗོད་ཀྱིས་སྤྱིར་བསྒྲགས་ཤིག་སྤེལ་ཏེ་ཁོང་རྣམས་ནས་རྒྱ་ནག་དམར་ཤོག་ཚོགས་པའི་གཞུང་གི་གནོན་ཤུགས་འོག་རང་ཉིད་ཀྱི་དམིགས་ཡུལ་ལ་འགྱུར་བ་གང་ཡང་མེད་ཐོག་དྲང་བདེན་དང་རང་དབང་བཅས་པ་སྲུང་སྐྱོབ་བྱེད་རྒྱུ་རེད་ཅེས་དང། དེ་བཞིན་ང་ཚོའི་གྲོས་ཚོགས་དང་མང་ཚོགས་ཀྱི་སྨྲ་བརྗོད་རང་དབང་ཐོག་དྲག་གནོན་བྱེད་མཁན་ཚོར་ང་ཚོས་དུས་ནམ་ཡང་མགོ་སྒུར་གྱི་མ་རེད་ཅེས་རྒྱ་ནག་གཞུང་ལ་ནན་བརྗོད་ཀྱང་གནང་ཡོད་པ་རེད།

དེ་རིང་གྲོས་ཚོགས་ཀྱི་ལས་ཉིན་དགུ་པའི་ཐོག་ཤེས་རིག་ལས་ཁུངས་ཀྱི་སྔོན་རྩིས་དང་ལས་དོན་བྱེད་ཕྱོགས་ཐོག་བགྲོ་གླེང་གནང་བ་ཁྲོད་སྤྱི་འཐུས་མང་དག་ཅིག་གིས་སློབ་གྲྭའི་དགེ་རྒན་ཚོར་གསོལ་ཕོགས་འདང་ངེས་ཤིག་མེད་སྟབས་དེ་ལྟར་གནང་དགོས་པ་དང་དེ་བཞིན་ཆོད་གན་གྱི་ངོ་བོར་བཀོད་སྒྲིག་གནང་བའི་དགེ་རྒན་རྣམས་གཏན་འཇགས་སུ་བསྐོ་གཞག་དགོས་པར་ཞལ་གཅིག་གྲག་གིས་གཞེན་སྐུལ་གནང་སོང་།ཁ་སང་ཉིན་རྒྱབ་ཤེས་རིག་ལས་ཁུངས་ཀྱི་ལས་དོན་གནང་ཕྱོགས་དང་འབྲེལ་བགྲོ་གླེང་དང་དྲི་བ་དྲིས་ལན་བཅས་དབུ་འཛུགས་གནང་སྟེ་དེ་རིང་སྔ་དྲོ་དེའི་ཐོག་མུ་མཐུད་བགྲོ་གླེང་གནང་སྐབས་སྤྱི་འཐུས་མང་དག་ཅིག་གིས་གཏན་ཉིན་སློབ་གྲྭ་ཁག་ཏུ་ཤེས་ཡོན་ཚད་དང་ལྡན་པ་ཡོང་མིན་ནི་གཙོ་བོ་དགེ་རྒན་རྣམ་པར་རག་ལས་ཡོད་སྟབས་སློབ་གྲྭ་ཁག་གི་དགེ་རྒན་ཚོ་སྤུས་ཚད་ལྡན་པ་ཞིག་ཡོང་བར་དགེ་རྒན་ཚོའི་གསོལ་ཕོགས་གཙོས་འགྱུར་མཐུན་རྐྱེན་ཁག་སྤར་ཐབས་གནང་དགོས་གལ་དང་འབྲེལ། ཆོད་གན་གྱི་ངོ་བོར་བཀོད་སྒྲིག་གནང་བའི་དགེ་རྒན་རྣམས་གཏན་འཇགས་སུ་བསྐོ་གཞག་གནང་དགོས་གལ་དང་ལྷག་དོན་ཉེ་དུས་བོད་ལུགས་ཀྱི་གནམ་ལོ་གསར་བཞེས་སྐབས་༸གོང་ས་མཆོག་གིས་བོད་ཕྲུག་ཚོར་བོད་ཡིག་ལ་དམིགས་བསལ་དོ་སྣང་ཤུགས་ཆེ་བྱེད་དགོས་ཞེས་བཀའ་ནན་བསལ་བ་ལུང་འདྲེན་གྱིས་བོད་ཡིག་དགེ་རྒན་ཚོར་གསོལ་ཕོགས་སྤར་ཆ་ཐད་དམིགས་བསལ་དགོངས་པ་བཞེས་དགོས་པའི་དགོངས་འཆར་ཕུལ་མཁན་ཡང་བྱུང་སོང་།ཤེས་རིག་བཀའ་བློན་མཆོག་གིས་དབུས་བོད་སློབ་འཛིན་ཚོགས་དང་སམ་བྷོ་ཌའི་དགེ་རྒན་རྣམ་པའི་གསོལ་ཕོགས་ནི་བཙན་བྱོལ་བོད་མིའི་གནས་བབ་ལ་གཞིགས་པའི་ཞན་པོ་ཞིག་ལ་ངོས་ལེན་གནང་གི་མེད་པ་དང་ད་ཆ་བོད་སློབ་འཛིན་སྐྱོང་ཚོགས་པའི་སློབ་གྲྭ་རྣམས་ཤེས་རིག་ལས་ཁུངས་ནས་བརྩི་བཞེས་མུས་ཡིན་པའི་གནས་སྟངས་འོག་ནས་ད་ལྟའི་ཆར་དགེ་རྒན་རྣམ་པའི་གསོལ་ཕོགས་སྤར་ཆ་གནང་དཀའ་ཡང་། མ་འོངས་པར་བོད་སློབ་འཛིན་ཚོགས་ཀྱི་སློབ་གྲྭ་ཁག་ཡོངས་རྫོགས་རྩིས་ལེན་རྩིས་སྤྲོད་གྲུབ་རྗེས་སྐབས་དེའི་སློབ་གྲྭ་དང་སློབ་ཕྲུག་གི་གནས་བབ་བཅས་ལ་གཞིགས་པའི་དགོངས་བཞེས་གནང་རྒྱུ་ཡིན་ཞེས་བཀའ་ལན་གནང་ཡོད།སྤྱི་འཐུས་གཞན་ཞིག་གིས་གལ་ཏེ་ཤེས་རིག་ལས་ཁུངས་ནས་ཆོད་གན་གྱི་དགེ་རྒན་རྣམས་གཏན་འཇགས་སུ་བསྐོ་གཞག་གནང་ཐབས་བྲལ་བ་ཡིན་ཚེ་ཁོང་རྣམས་ཐུགས་བདེ་དང་ལས་གནས་ནས་དགོངས་ཞུ་མི་གནང་བའི་སླད་གཏན་འཇགས་སུ་བསྐོ་གཞག་གནང་རྒྱུའི་ཞལ་བཞེས་གནང་དགོས་པའི་དགོངས་འཆར་ཕུལ་སོང་། ཡང་དཔེ་སྟོན་སློབ་མ་རྣམ་པའི་དབྱིན་ཇིའི་སྐད་ཡིག་རང་རྐྱ་འཕེལ་ཡོང་ཐབས་དང་འབྲེལ་བའི་བཀའ་འདྲི་ཕེབས་དོན་ལྟར་བཀའ་བློན་མཆོག་གིས་ཉེ་ཆར་ཤེས་ཡོན་ལྷན་ཚོགས་དང་ལམ་སྟོན་ཚོགས་ཆུང་གི་ལྷན་ཚོགས་ཐོག་སློབ་གྲྭ་ཁག་བཅིུས་ནང་བཅར་འདྲི་གནང་སྟེ་ཉམས་ཞིབ་བརྒྱུད་དབྱིན་ཇིའི་བསླབ་གཞི་རྩ་འཛིན་ཚད་ལྡན་ཞིག་གཏན་འབེབས་གནང་ཡོད་སྐོར་གསུངས་སོང་།བགྲོ་གླེང་སྐབས་ཆ་བཤེས་བཞེས་མཁན་སྤྱི་འཐུས་ཁག་ཅིག་ནས་ཏཱ་ལའི་བླ་མའི་མཐོ་སློབ་དང་འབྲེལ་ནས་བོད་ཁྱིམ་གྱི་འཛིན་རིམ་བཅིུས་སློབ་མ་རྣམས་ངེས་པར་དུ་ཏཱ་ལའི་བླ་མའི་མཐོ་སློབ་ལས་རྒྱ་གར་གྱི་མཐོ་སློབ་གཞན་ཁག་ནང་བསྐྱོད་ཚེ་དེ་དག་ལ་བོད་ཁྱིམ་གྱི་ངོས་ནས་སློབ་ཡོན་གནང་གི་མེད་པར་གསལ་བཤད་དགོས་སྐོར་བཀའ་འདྲི་ཞུས་སོང་བ་དང་སྐབས་དེར་བཀའ་བློན་མཆོག་གིས་ཏཱ་ལའི་བླ་མའི་མཐོ་སློབ་འདི་བོད་ཕྲུག་ཁྱིམ་སྡེས་གཙོ་བོ་འགན་བཞེས་ཏེ་རྒྱ་གར་གཞུང་གིས་ངོས་འཛིན་ཐོབ་པའི་གཙུག་ལག་སློབ་གཉེར་ཁང་ཞིག་ཡིན་པ་དང་འདི་སྲ་བརྟན་དང་རྒྱུན་གནས་ཐུབ་པར་སློབ་མའི་སློབ་འཇུག་དེ་གལ་འགངས་ཆེན་པོ་ཆགས་ཀྱི་ཡོད་སྐོར་དང་། གལ་ཏེ་སློབ་ཕྲུག་རང་གི་ངོས་ནས་མཐོ་སློབ་དེར་བསྐྱོད་འདོད་མེད་ཚེ་སློབ་ཡོན་མ་རག་པའི་དཀའ་ངལ་ཡོད་ན་དེར་ཤེས་རིག་ལས་ཁུངས་ཀྱི་ངོས་ནས་རམ་འདེགས་ཞུ་རྒྱུའི་ལམ་ལུགས་སྲོལ་ཞིག་ཡོད་པར་ངོས་འཛིན་གནང་གི་ཡོད་ཅེས་གསུངས་སོང་།གྲོས་ཚོགས་སུ་བཀའ་བློན་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ JNU མཐོ་སློབ་ནང་འདས་པའི་ལོ་ཤས་ནས་སློབ་ཡོན་སྤར་ཆ་ཤུགས་ཆེ་གནང་རྐྱེན་བོད་རིགས་སློབ་མ་རྣམས་ལ་སློབ་འཇུག་གི་དཀའ་ངལ་འཕྲད་པ་དང་ད་ཆ་མཐོ་སློབ་དེར་སློབ་གཉེར་གནང་བཞིན་པའི་སློབ་མ་བཅུ་ཙམ་ལས་མེད་པའི་གནས་སྟངས་འགྲེལ་བརྗོད་ཀྱིས་ཤེས་རིག་ལས་ཁུངས་ནས་གནད་དོན་དེའི་ཐད་ལྡི་ལི་བོད་ཀྱི་སྐུ་ཚབ་དོན་གཅོད་བརྒྱུད་འབྲེལ་ཡོད་མཐོ་སློབ་ལ་འབྲེལ་བ་གནང་རྒྱུའི་ཐབས་ཤེས་གང་ཐུབ་གནང་ཡོད་ཀྱང་དེར་དོན་འབྲས་སོན་ཡོད་མེད་ལ་ལྟོས་མེད་མུ་མཐུད་འབད་བརྩོན་ཞུ་རྒྱུ་ཡིན་པར་བཀའ་ལན་གནང་ཡོད།གཞི་རྩའི་དེ་རིང་གྲོས་ཚོགས་ཀྱི་སྔ་དྲོའི་ཚོགས་དུས་དེའི་ཐོག་གཞན་ཡང་རྒྱ་གར་དབུས་གཞུང་གི་གྲོས་ཚོགས་འཐུས་དང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་སྐུ་ཞབས་ Pandit Ram Swaroop Sharma ལགས་སྐུ་ཚེ་འཕེན་པ་རྫོགས་པར་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་ཞིག་ཀྱང་གཏན་འབེབས་གནང་ཡོད་པ་དང་ཉིན་རྒྱབ་ཀྱི་ཚོགས་དུས་བཞི་པར་ནང་སྲིད་ལས་ཁུངས་ཀྱི་སྔོན་རྩིས་དང་ལས་དོན་བྱེད་ཕྱོགས་ཐོག་བགྲོ་གླེང་ཕེབས་ཡོད་པ་རེད།

རྒྱ་ནག་གི་རྒྱལ་ས་པེ་ཅིང་དུ་གནས་སྡོད་བྱས་པའི་བོད་ཀྱི་རྩོམ་པ་པོ་ཚེ་རིང་འོད་ཟེར་ལགས་ཀྱིས་རང་ཉིད་སྒེར་གྱི་Twitter དྲ་གནས་སུ་གངས་རིན་པོ་ཆེ་དང་དེའི་དབུས་སུ་ཆགས་པའི་རྒྱང་གྲགས་དགོན་པའི་འདྲ་པར་ཁག་ཅིག་བཀོད་པ་དང་འབྲེལ།  ད་ཆ་རྒྱ་ནག་གཞུང་གིས་བོད་མིའི་སྲོལ་རྒྱུན་གྱི་རིག་གཞུང་ལ་རྡོག་རོལ་གྱིས་བོད་ཁུལ་གྱི་དགོན་སྡེ་ཁག་ཡུལ་སྐོར་ལྟེ་གནས་ཙམ་ཞིག་ལ་བསྒྱུར་བཞིན་ཡོད་སྐོར་བྲིས་འདུགདེའང་ཁོང་གིས་འདྲ་པར་དེ་དག་དང་ལྷན་འཕྲིན་ཐུང་ཞིག་སྤེལ་བའི་ནང་དུ། བོད་མིའི་སྲོལ་རྒྱུན་ལྟར་ན། གངས་རིན་པོ་ཆེར་སྐོར་བ་ ༡༣ བརྒྱབ་རྗེས་གཞི་ནས་ནང་སྐོར་དུ་ཕེབས་སྲོལ་ཡོད་པ་ལྟར།   གཞི་ནས་ཁུལ་དེར་རྟེན་གཞི་བྱས་པའི་གནའ་བོའི་རི་གྲོང་སྟེ་ལྷིང་འཇགས་ཀྱི་རྒྱང་གྲགས་དགོན་པ་མཇལ་སྲོལ་ཡོད་ཀྱང་།  ད་ཆ་གངས་རིན་པོ་ཆེའི་འདབས་སུ་བོད་ཀྱིིིི་རིག་གཞུང་དང་ལམ་སྲོལ་ལ་མ་བལྟས་པར་རྒྱ་རིགས་ཡུལ་སྐོར་སྤྲོད་འཆམ་པ་མང་པོས་ལྟ་སྐོར་གྱི་འཛིན་བྱང་ཉོས་རྗེས་གང་འདོད་དུ་སྤྲོ་འཆམ་ལ་འགྲོ་བཞིན་མ་ཟད།  རྒྱང་གྲགས་དགོན་པ་ནི་ཡུལ་སྐོར་བ་རྣམས་ཀྱིས་རྒྱང་ལྟ་བྱེད་སའི་གར་སྟེགས་ལྟ་བུ་ཞིག་ཏུ་སྒྱུར་ཡོད་པ་གསུངས་འདུག མ་ཟད་ཁོང་གིས་འདྲ་པར་དང་བཅས། དགོན་གྲོང་གི་འབྲེལ་ཡོད་ལས་བྱེད་ཀྱི་སྣེ་ལེན་འོག  དགོན་པའི་ཐོག་ཁར་མི་རིགས་མཐུན་སྒྲིལ་དང་མེས་རྒྱལ་ལ་དགའ་ཞེན་མཚོན་ཆེད་དུ། རྒྱ་ནག་གི་རྒྱལ་དར་སྒྲེང་འཛུགས་བྱས་ཡོད་པ་མཐོང་རྒྱུ་ཡོད་སྐོར་གསུངས་འདུགརྩ་བའི་རྒྱ་ནག་གིས་བོད་མིའི་ལོ་ངོ་སྟོང་ཕྲག་གི་ལོ་རྒྱུས་ལྡན་པའི་སྲོལ་རྒྱུན་གྱི་རིག་གནས་ལ་སྣང་མེད་བྱེད་བཞིན་པའི་ཐད་ནས་བོད་ཕྱི་ནང་གཉིས་ནས་སེམས་འཚབ་བྱེད་མཁན་ཡོང་གི་ཡོད་པ་དང་། དེའང་སྔོན་ཆད་བོད་གསེར་རྟ་བླ་རུང་སྒར་གྱི་དུར་ཁྲོད་དུ་རྒྱ་མིའི་ཡུལ་སྐོར་བ་བརྒྱ་ཁྲག་བརྒལ་བས་བོད་མིའི་སྲོལ་རྒྱུན་བྱ་གཏོར་གྱི་ལམ་ལུགས་ལ་ལྟད་མོ་ལྟ་བཞིན་པའི་འདྲ་པར་ཁྱབ་སྤེལ་བྱེད་བཞིན་པ་དང་འབྲེལ་ནས།  བོད་ཀྱི་ལོ་རྒྱུས་སྨྲ་བ་ཚེ་རིང་ཤཱཀྱ་ལགས་ནས་བོད་མིའི་ཐུན་མོང་མ་ཡིན་པའི་ལམ་ལུགས་དེ་ཡུལ་སྐོར་བའི་སྣང་བ་སྤྲོ་སྐྱིད་ཀྱི་ལྟད་མོ་ལྟ་སའི་ཚོང་གི་ལྟེ་གནས་ལྟ་བུར་འགྱུར་བཞིན་པར་སྐྱོན་བརྗོད་གནང་བ་ཡོད་པ་དང་། དེ་བཞིན་རྩོམ་པ་པོ་ཚེ་རིང་འོད་སེར་ལགས་ཀྱིས་ཀྱང་གསེར་རྟའི་དུར་ཁྲོད་དེར་སྐྱེ་བ་མི་རྟག་པ་མཚོན་ཆེད་ཀྱི་འཛུགས་སྐྲུན་རྒྱ་ཆེར་བྱས་ཏེ་ད་ཆ་དུར་ཁྲོད་དེ་གློག་བརྙན་ལྟ་བུ་ཞིག་ཏུ་བསྒྱུར་བ་མ་ཟད་ཁ་ཁུ་སིམ་པའི་དགོན་གྲོང་གི་འཚོ་བ་དེ་རྔོན་པའི་དམིགས་འབེན་དུ་ལྷུང་འདུག་ཅེས་སྐྱོན་བརྗོད་གནང་ཡོད་པ་རེད།ད་དུང་རྒྱ་ནག་གི་ཡུལ་སྐོར་བ་མང་པོ་གང་འདོད་དུ་བོད་ཁུལ་གྱི་གནའ་བོའི་དགོན་གྲོང་དུ་འཆམ་ཉུལ་གྱིས། བོད་མི་རྣམས་ཀྱི་ཆོག་མཆན་ཡོད་མེད་ལ་མ་ལྟོས་པར་པར་དང་བརྙན་བླངས་ནས་དྲ་ལམ་དུ་འཇོག་བཞིན་ཡོད་པ་མང་པོ་མཐོང་རྒྱུ་ཡོད་པ་མ་ཟད།  ཐ་ན་བདག་ཅག་གི་སྟོན་པ་རིན་པོ་ཆེ་ཡི་སྐུ་འདྲའི་སྟེང་དུ་འཛེགས་ནས་པར་བརྒྱབ་སྟེ་དྲ་ལམ་དུ་བཀོད་པ་སོགས་ཀྱི་གནད་དོན་ཡང་དྲ་ལམ་དུ་ཐོན་ཏེ་བོད་མིའི་སྤྱི་ཚོགས་ཀྱི་ཁྲོད་གླེང་སློང་མང་པོ་བྱུང་ཡོད་པ་མ་ཟད། སྔར་ལོ་འདི་ག་རླུང་འཕྲིན་ཁང་ལ་བོད་ནང་གི་བོད་མི་ཞིག་གིས་གནས་ཚུལ་མཁོ་སྤྲོད་བྱས་པའི་ནང་དུ། མཚོ་སྔོན་ཞིང་ཆེན། མཚོ་སྔོན་པོའི་གཡས་གཡོན་དང་། དམིགས་བསལ་དུ་བྲག་དཀར་རྫོང་ཁོངས་སུ་རྒྱ་ནག་གིས་བཙན་བཀའ་བཏང་ནས། ལམ་འགྲམ་གྱི་མ་ཎི་དར་ལྕོག་དང་རྡོ་འབུམ།  དེ་བཞིན་མཆོད་རྟེན་སོགས་ཁོར་ཡུག་འབག་བཙོག་བཟོ་བྱེད་ཡིན་པར་བསྙད་ནས་གཙང་བཟོ་བྱེད་དགོས་བའི་བཀའ་བཏང་སྟེ་ཡོད་ཚད་གཙང་བཟོ་བྱས་ཟིན་པའི་གནས་ཚུལ་ཡང་ར་སྤྲོད་བྱུང་ཡོད།

རྒྱ་ནག་གིས་ཤིན་ཅང་ནང་ཡུ་གུར་གཙོས་པའི་ཁ་ཆེའི་མི་རིགས་གཞན་ཁག་ལ་མནར་གཅོད་ཀྱིས་ཆེས་དྲག་གནོན་ཅན་གྱི་སྲིད་བྱུས་ལག་བསྟར་བྱེད་བཞིན་པར་བརྟེན་ཨ་རི་གཙོས་ཁེ་ན་ཌ་དང་། ཡོ་རོབ་མཐུན་ཚོགས་དེ་དབྱིན་ཡུལ་བཅས་ནས་རྒྱ་ནག་གི་འགོ་ཁྲིད་ཁག་ཅིག་ལ་སྲིད་དོན་གྱི་ཉེས་ཆད་འགེལ་བ་དང་དེ་ལྟར་ཡང་། འགོ་ཁྲིད་དེ་དག་ཁོངས་སུ་ཤིན་ཅང་ཡུ་གུར་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་དང་རྒྱ་ནག་དབུས་ལྷན་ཁང་གི་ཚོགས་མི་ Chen Quanguo གི་མིང་མེད་སྟབས།  ཁོ་ལའང་དེ་ལྟར་ཉེས་ཆད་འགེལ་དགོས་པའི་ཞུ་སྐུལ་གྱི་ལས་འགུལ་སྤེལ་བཞིན་འདུག  Free Tibet ཞེས་དབྱིན་ཡུལ་བོད་དོན་རྒྱབ་སྐྱོར་ཚོགས་པས་ད་རེས་ནུབ་ཕྱོགས་རྒྱལ་ཁབ་ཁག་གིས་རྒྱ་ནག་དམར་ཤོག་ཚོགས་པའི་སྲིད་བྱུས་ལ་ཤུགས་རྐྱེན་ཤུགས་ཆེ་བཟོ་མཁན་ Chen Quanguo ལ་རྒྱ་ནག་གི་དཔོན་རིགས་གཞན་ལྟར་གཅིག་མཚུངས་ཁྲིམས་ཆད་མ་བཏང་ཚེ་དེས་རྒྱ་ནག་གཞུང་ལ་ཞེད་སྣང་བྱེད་ཀྱི་ཡོད་པའི་བརྡ་ལན་ཞིག་ཆགས་ཀྱི་ཡོད་པ་དང་། རྒྱལ་ཁབ་དེ་དག་གི་གཞུང་གིས་ད་རེས་བསྐྱར་དུ་ཚོང་དོན་དེ་འགྲོ་བ་མིའི་ཐོབ་ཐང་གི་གནད་དོན་ལས་གཙོ་བོར་ངོས་འཛིན་ཡོད་པ་གསུངས་འདུག རྒྱ་ནག་གི་འགོ་ཁྲིད་ཁག་ཅིག་ལ་ཉེས་ཆད་འགེལ་བ་དེས་ནུབ་ཕྱོགས་རྒྱལ་ཁབ་ཁག་གིས་རྒྱ་གཞུང་ལ་གདོང་ལེན་ཐུབ་པའི་རྣམ་པ་མངོན་གསལ་གནང་ཡོད་ཀྱང་ད་དུང་ཡ་ལན་འདང་ངེས་ཞིག་མེད་པར་གསུངས་འདུག དཔེར་ན་བོད་མི་དང་ཡུ་གུར་མི་རིགས་ཀྱི་ངོ་བོ་དང་ལོ་རྒྱུས་བཅས་པ་རྩ་མེད་བཟོ་བ་དང་། མང་ཚོགས་ས་ཡ་མང་པོ་ངལ་རྩོལ་བསྒྱུར་བཀོད་སོགས་ཀྱི་ལས་དོན་སྤེལ་མཁན་གཙོ་བོ་ Chen Quanguo  ལྟ་བུར་ཉེས་ཆད་འགེལ་དགོས་པ་དང་ཆབས་ཅིག ཁོས་རང་ཉིད་ཀྱི་བྱ་སྤྱོད་སྤེལ་ཁག་ལ་འགན་ཁུར་བ་ཞིག་བཟོ་དགོས་པ་གསུངས་འདུག དབྱིན་ཡུལ་བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་འགན་འཛིན་ Sam Walton ལགས་ཀྱིས་ད་རེས་ནུབ་ཕྱོགས་རྒྱལ་ཁབ་ཁག་གིས་མཉམ་རུབ་ཐོག་ནས་ཐག་གཅོད་གནང་བ་དེར་དགའ་བསུ་ཞུས་འདུག་པ་དེ་ལྟར་ཡང་། དེའི་ནང་ Chen Quanguo མེད་པར་བློ་ཕམ་ཡོད་སྐོར་གསུངས་འདུག གཞི་རྩའི་ Free Tibet  ཚོགས་པས་དེ་སྔ་འཛམ་གླིང་ཡུ་གུར་ལྷན་ཚོགས་དང་དབྱིན་ཡུལ་བོད་རིགས་ཚོགས་པ་བཅས་མཉམ་འབྲེལ་ཐོག་ཡུལ་དེའི་ཕྱི་སྲིད་བློན་ཆེན་སྐུ་ཞབས་ Dominic Raab ལགས་སུ་ global human rights sanctions regime list ཞེས་པའི་ཁྲིམས་སྒྲིག་འོག་ Chen Quanguo དབྱིན་ཡུལ་དུ་བསྐྱོད་རྒྱུར་བཀག་སྡོམ་གནང་དགོས་པའི་གསར་འགོད་གསལ་བསྒྲགས་དང་གཏམ་བཤད་ཀྱི་ལས་རིམ་གོ་སྒྲིག་གནང་སྟེ་ཞུ་སྐུལ་གྱི་ལས་འགུལ་སྤེལ་ཡོད་པ་དང་། ད་རེས་རྒྱལ་ཁབ་ཁག་ནས་རྒྱ་ནག་གིས་དཔོན་རིགས་ལ་ཉེས་ཆད་འགེལ་བ་དེའི་ཁོངས་ Chen Quanguo མེད་རྐྱེན་ཚོགས་པས་ཁོ་བོར་སྲིད་དོན་གྱི་ཉེས་ཆད་འགེལ་བར་དབྱིན་ཡུལ་ཕྱི་སྲིད་བློན་ཆེན་སྐུ་ཞབས་ Domin Raab མཆོག་གི་མཚན་ཐོག་ཏུ་ཞུ་སྐུལ་གྱི་ལས་འགུལ་ཞིག་སྤེལ་འདུག་པ་དང་། ལས་འགུལ་དེའི་ཐོག་མང་ཚོགས་གང་མང་ནས་མཚན་རྟགས་བཀོད་དགོས་པར་འབོད་སྐུལ་གནང་འདུགད་ལན་ཨ་རི་གཙོས་ཁེ་ན་ཌ་དང་། དབྱིན་ཡུལ་དེ་བཞིན་ཡོ་རོབ་མཐུན་ཚོགས་ནས་ཤིན་ཅང་གི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ།  རྒྱ་ནག་གིས་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ཟུར་པ་ Zhu Hailun གཙོས་ལས་བྱེད་བགྲེས་པ་ Wang Junzheng དང་།  Wang Mingshan དེ་བཞིན་ཤིན་ཅང་སྤྱི་དམངས་བདེ་འཇགས་ལས་ཁུངས་ཀྱི་འགན་འཛིན་ Chen Mingguo ལ་རྒྱལ་ཁབ་དེ་དག་ནང་འགྲུལ་བཞུད་དང་རྒྱུ་ནོར་ཡོད་པ་དེ་དག་ལོངས་སྤྱོད་རྒྱུར་བཀག་སྡོམ་གནང་ཡོད་པ་རེད།  སྤྱིར་ད་ལན་ཁེ་ན་ཌ་དང་དབྱིན་ཡུལ། ཡོ་རོབ་མཐུན་ཚོགས་ཀྱི་གྲངས་ཐོར་ Chen Quanguo   མེད་ཀྱང་ཨ་མི་རི་ཀའི་ངོས་ནས་དེ་སྔ་སྲིད་འཛིན་ཟུར་པ་སྐུ་ཞབས་ Donald Trump མཆོག་གི་སྐབས་སུ་ Global Magnitsky Act ཞེས་པའི་ཁྲིམས་གཞིའི་འོག་ Chen Quanguo  ལ་སྲིད་དོན་གྱི་ཉེས་ཆད་འགེལ་ཡོད་པ་རེད།

དེ་རིང་ཉིན་རྒྱབ་སྐབས་༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༡་༢༢  ལོའི་སྔོན་རྩིས་ནང་འགྲོ་གྲོན་སྒོར་ས་ཡ་ ༢༦༩༨༡༣༡༤༩༨ གཏན་འབེབས་གནང་སོང་།དེ་རིང་གྲོས་ཚོགས་ཀྱི་ལས་ཉིན་བརྒྱད་པའི་ཉིན་རྒྱབ་ཀྱི་ཚོགས་དུས་ཐོག་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་གིས་རྩིས་ལོ་ ༢༠༢༡་༢༢ ལོའི་གཏོང་ལེན་ཁྲིམས་ཡིག་སྙན་སྒྲོན་གནང་བ་དང་འབྲེལ་ཏེ་སྤྱི་འཐུས་རྣམ་པས་སྤྱི་མོས་ཀྱིས་རྒྱབ་སྐྱོར་གནང་ཐོག་རྩིས་ལོ་ ༢༠༢༡་༢༢ ལོའི་དགོས་དངུལ་འགྲོ་གྲོན་སྒོར་ས་ཡ་ ༢༦༩༨༡༣༡༤༩༨ གཏན་འབེབས་གནང་སོང་བ་དང་དེ་ནི་སྔ་ལོའི་གྲོས་ཚོགས་ནས་གཏན་འབེབས་ཟིན་པའི་སྔོན་རྩིས་དང་བསྡུར་ན་སྒོར་ས་ཡ་བཅོ་ལྔ་ཙམ་ཉུང་བ་ཆགས་ཀྱི་འདུགཕྱོགས་བསྡོམས་མ་དངུལ་དེའི་ནང་སྦེང་ལོར་ལྷོ་སྤྱི་ལས་ཁུངས་དང་ས་གནས་འཐུས་མིའི་ཚོགས་འདུ་མེད་པའི་ས་གནས་ཁག་ལྔའི་སྔོན་རྩིས་འགྲོ་འཆར་དང་དེ་བཞིན་འཕྲོད་བསྟེན་ཁྱབ་ཁོངས་མངོན་དགའ་སློབ་གྲྭ་དང་སྨན་ཁང་ཁག་གསུམ་བཅས་ཀྱི་འགྲོ་འཆར་མ་དངུལ་ས་ཡ་ ༥༣༧༢༢༣༦༣ ཚུད་མེད་པ་རེད།སྐབས་བཅོ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་འདི་ཟླ་ ༣ ཚེས་ ༡༥ ནས་དབུ་འཛུགས་ཀྱིས་ཚེས་ ༣༡ བར་ཁྱོན་ཉིན་གྲངས་ ༡༥ རིང་འཚོགས་གཏན་འཁེལ་ཡོད་པ་དང་སྔོན་རྩིས་གྲོས་ཚོགས་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་ཐོག་བགྲོ་གླེང་ཐོག་ནས་གཏན་འབེབས་གནང་སྲོལ་ཡོད་ཀྱང་། ད་ཆ་རྒྱ་གར་ཧི་མཱ་ཅལ་གྱི་ཁྱིམ་མཚེས་མངའ་སྡེ་པན་ཇབ་ནང་ཏོག་དབྱིབས་གཉན་རིམས་ཁྱབ་གདལ་གྱི་གནས་སྟངས་ཇེ་སྡུག་ཏུ་འགྲོ་བཞིན་པར་བརྟེན་ཁ་སང་གྲོས་ཚོགས་ཀྱི་ལས་ཉིན་བདུན་པའི་ཐོག་གྲོས་ཚོགས་ཀྱི་ལས་རིམ་ལ་ཅུང་བསྐྱར་བཅོས་གནང་སྟེ་དེ་རིང་ཉིན་རྒྱབ་ཏུ་རྩིས་ལོ་ ༢༠༢༡་༢༢ ལོའི་སྔོན་རྩིས་དངོས་སུ་གཏན་འབེབས་དང་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ལས་དོན་གནང་ཕྱོགས་ཐོག་བགྲོ་གླེང་གཙོས་ལས་རིམ་གཞན་ཁག་ཅིག་གནང་རྒྱུ་ཡིན་པ་རེད།ད་ཆ་ལོ་གཅིག་ཙམ་གྱི་རྗེས་སུ་ཚོགས་པའི་གྲོས་ཚོགས་ཀྱི་ཚོགས་དུས་འདི་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་མཐའ་མ་དེ་ཆགས་ཀྱི་ཡོད་པ་དང་ཐེངས་འདིའི་གྲོས་ཚོགས་ཐོག་བཀའ་ཤག་གིས་སྔོན་རྩིས་འཆར་འབུལ་ཞུས་པར་ཆབ་སྲིད་ཐོག་བརྒྱ་ཆ་ ༢༣་༦༣ དང་ཤེས་རིག་ཐོག་བརྒྱ་ཆ་ ༢༢་༣༢ འཛིན་སྐྱོང་ཐོག་བརྒྱ་ཆ་ ༢༡་༩ སྤྱི་ཚོགས་ཐོག་བརྒྱ་ཆ་ ༡༨་༧༨  འཕྲོད་བསྟེན་ཐོག་བརྒྱ་ཆ་ ༨་༧༣ དེ་བཞིན་ཆོས་རིག་ཐོག་བརྒྱ་ཆ་ ༢་༢༤ དང་ཁྲིམས་བཟོ་ཐོག་བརྒྱ་ཆ་ ༢་༣ བཅས་ཞུས་ཡོད་པ་རེད།དེ་རིང་གྲོས་ཚོགས་ཀྱི་སྔ་དྲོའི་ཚོགས་དུས་ཐོག་སྤྱི་འཐུས་རྣམས་ནས་མུ་མཐུད་འཕྲོད་བསྟེན་ལས་ཁུངས་ཀྱི་ལས་བསྡོམས་ཐོག་བགྲོ་གླེང་དང་དྲི་བ་དྲིས་ལན་བཅས་གནང་བའི་ཁྲོད་སྤྱི་འཐུས་ཤིག་ནས་སྨན་བཅོས་ལྟ་སྐྱོང་ལས་གཞིར་བསྐྱར་ཞིབ་གནང་ཡོད་མེད་དང་ད་ལྟའི་ཆར་གནས་སྟངས་ཇི་ཆགས་དང་ལས་གཞི་འདིར་ཞུགས་མཁན་ཇི་ཡོད་དང་ཁོང་རྣམ་པར་དོན་ཕན་ཇི་བྱུང་སོགས་ཀྱི་ཐོག་བཀའ་འདྲི་ཁག་ཅིག་ཞུས་པར་འཕྲོད་བསྟེན་བཀའ་བློན་མཆོག་གིས་དེ་འབྲེལ་བཀའ་ལན་གནང་ཡོད་པ་རེད།བགྲོ་གླེང་གི་ལས་རིམ་ཐོག་སྤྱི་འཐུས་ཤིག་གིས་བཙན་བྱོལ་བོད་མིའི་སྤྱི་ཚོགས་ཁྲོད་སེམས་ཁམས་མི་བདེ་བ་དང་ལྷག་དོན་སྨྱོ་རྫས་ངན་གོམས་དང་ཆང་རག་སོགས་སྤྱོད་མཁན་བོད་རིགས་ན་གཞོན་མང་དག་ཅིག་འབྱུང་བཞིན་པའི་དཀའ་ངལ་ཐེར་འདོན་གནང་བ་དང་འབྲེལ། དཀའ་ངལ་དེ་དག་སེལ་ཐབས་སུ་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་གཙོས་གཞུང་འབྲེལ་མིན་པའི་ཚོགས་སྡེ་ཁག་ནས་བོད་རིགས་གཞོན་སྐྱེས་དག་ལ་སྨན་བཅོས་ཀྱི་མཐུན་འགྱུར་སྦྱར་བ་དང་ལྷན་དུ་ཁོང་རྣམས་མ་འོངས་པར་དྲག་སྐྱེད་ཡོང་སྐབས་འཚོ་བའི་མཐུན་རྐྱེན་བསྐྲུན་ཕྱིར་ལས་ཀ་ཆུང་ཚགས་རིགས་སྤྲོད་དགོས་པའི་གཞེན་སྐུལ་གནང་སོང་།

ཁ་ཉིན་ཕྱི་ཚེས་ ༢༡ ཉིན་དབུས་འོས་བསྡུ་ལས་ཁང་གིས་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་དངོས་གཞིའི་འོས་གཞི་ཁག་ཡོངས་ཁྱབ་གནང་བ་དང་ཆབས་ཅིག འོས་གཞི་རྣམས་ནས་དངོས་གཞིའི་འོས་བསྡུ་དང་འབྲེལ་བའི་ལུགས་མཐུན་གྱི་དྲིལ་བསྒྲགས་ལས་དོན་ཁག་གནང་ཆོག་པའི་གསལ་བསྒྲགས་གནང་ཟིན་པ་ལྟར་སྲིད་སྐྱོང་གི་འོས་གཞི་ཨ་རིའི་དོན་ཟུར་དང་ཚོགས་ཟུར་སྤེན་པ་ཚེ་རིང་ལགས་ཀྱིས་ངོ་དེབ་ཐད་གཏོང་བརྒྱུད་དེ་སྔོན་འགྲོའི་མཇུག་སྡོམ་དང་དངོས་གཞིར་ཕྱོགས་པ་ཞེས་པའི་བརྗོད་གཞིའི་ཐོག་གསུང་བཤད་དང་སྦྲགས་དངོས་གཞིའི་དྲིལ་བསྒྲགས་ཀྱི་ལས་དོན་ཁག་དབུ་འཛུགས་གནང་ཡོད།གསུང་བཤད་ཀྱི་ཐོག་མ་དེར་སྤེན་པ་ཚེ་རིང་ལགས་ཀྱི་གཞི་རྩའི་ལྟ་གྲུབ་སྤྱི་སྙོམས་དྲང་བདེན་ཞེས་པའི་ཐོག་གསར་རྩོམ་གནང་བའི་གླུ་གཞས་རྒྱང་བསྲིངས་གནང་སོང་བ་དང་། སྤེན་པ་ཚེ་རིང་ལགས་ཀྱིས་སྔོན་འགྲོའི་འོས་བསྡུའི་སྐབས་དྲིལ་བསྒྲགས་ཀྱི་ལས་དོན་སྤེལ་ཁག་ལ་ཕྱོགས་བསྡོམས་གནང་བ་དང་འབྲེལ་ཏེ་འོས་བསྡུར་ཆ་ཤས་བཞེས་མཁན་སྤྱི་དང་ལྷག་པར་དུ་རྒྱབ་སྐྱོར་བ་ཡོངས་ལ་ཐུགས་རྗེ་ཆེ་ཞུས་པ་མ་ཟད། དངོས་གཞིའི་དྲིལ་བསྒྲགས་ཀྱི་ལས་དོན་དང་འབྲེལ་ནས་བོད་མི་མི་རེ་ངོ་རེ་ནས་བོད་སྤྱིའི་རྩ་དོན་ཐོག་ནུས་པ་མཉམ་སྤུངས་ཐུབ་རྒྱུར་ཆེད་དམིགས་ཀྱིས་བོད་མི་སྤྱི་དང་སྒོས་གཞོན་སྐྱེས་ཁྲོད་ནས་ལོ་རེ་རེ་ལ་ཉིན་གྲངས་གཅིག་དང་ཡང་ན་བདུན་ཕྲག་གཅིག་གཉིས་གང་རུང་ལ་རང་གི་ངོས་ནས་དུས་ཚོད་ཟུར་འདོན་གྱིས་བོད་དོན་དྲིལ་བསྒྲགས་སོགས་ཀྱི་ལས་དོན་ནང་ཞུགས་འདོད་ཡོད་རིགས་རྣམས་ཀྱི་མིང་གཞུང་བསྡུ་རུབ་ཐོག་ལས་གཞི་ཁག་དྲ་ཐོག་ནས་དབུ་འཛུགས་གནང་རྒྱུ་ཡིན་པ་དང་། དེའི་ནང་མཉམ་ཞུགས་གནང་མཁན་ཚོར་མ་འོངས་པར་ཕྱི་དྲིལ་ལས་ཁུངས་བརྒྱུད་བོད་དོན་དང་འབྲེལ་བའི་གནས་ཚུལ་རྣམས་དུས་ཐོག་ལ་གནང་རྒྱུ་ཙམ་མིན་པར་དགོས་ངེས་ཅན་གྱི་ཟབ་སྦྱོང་སོགས་གནང་སྟེ་མ་འོངས་པར་རྒྱལ་སྤྱིའི་གཞུང་དང་སྲིད་གཞུང་ཁག་ལ་བོད་མི་མང་ནས་ཞུ་གཏུག་དང་དྲིལ་བསྒྲགས་ཀྱི་ལས་དོན་སྤེལ་ཐུབ་པ་བཟོ་རྒྱུ་དང་། གཞོན་སྐྱེས་ཁྲོད་འགོ་ཁྲིད་གང་མང་འཐོན་རྒྱུ་སོགས་ཀྱི་དགེ་མཚན་ཡོད་སྐོར་གསུངས་ཡོད།   སྔོན་འགྲོའི་འོས་བསྡུའི་སྐབས་ཞུས་དོན་བཞིན་ནད་ཡམས་ཁྱབ་གདལ་གྱི་རྐྱེན་གྱིས་ས་གནས་ཁག་ལ་ཕྱོགས་བསྐྱོད་དྲིལ་བསྒྲགས་གནང་རྒྱུ་མིན་པའི་ཁས་ལེན་ཞུས་པ་ལྟར་དངོས་གཞིའི་སྐབས་སུ་ཡང་ཕྱོགས་སྐྱོད་རིགས་གང་ཡང་གནང་རྒྱུ་མིན་པ་དེ་ལྟར་ཡང་། དངོས་གཞིའི་འོས་བསྡུ་ཆེན་མོ་མ་བསླེབ་ པའི་བར་དུ་དྲྭ་ཐོག་བརྒྱུད་བོད་མིའི་ངོ་བོ་སྲུང་སྐྱོབ་བྱེད་ཕྱོགས་དང་བོད་ནང་གི་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ། མི་མང་གི་དཔལ་འབྱོར་ཡར་རྒྱས་གཏོང་ཐབས། དེ་བཞིན་བོད་ཕྲུག་ཚོར་དོན་སྙིང་ལྡན་པའི་ཤེས་ཡོན་སྤྲོད་ཕྱོགས་དང་མང་གཙོ་འཕེལ་རྒྱས་སོགས་བརྗོད་གཞི་མི་འདྲ་བཅུ་གཉིས་ཙམ་གྱི་ཐོག་ནས་བགྲོ་གླེང་དང་། དྲི་བ་དྲིས་ལན་གྱི་ལས་རིམ་བང་སྒྲིག་པ་ཁག་ཡོངས་གྲགས་གནང་ཡོད།  དེ་བཞིན་ཚོགས་ཟུར་སྤེན་པ་ཚེ་རིང་ལགས་ཀྱིས་དངོས་གཞིའི་དྲིལ་བསྒྲགས་དང་འབྲེལ་བའི་གསུང་བཤད་ཀྱི་ལས་རིམ་ཐོག་ཁོང་ཉིད་མ་འོངས་པར་སྲིད་སྐྱོང་དུ་འདེམས་འཐོན་བྱུང་ཚེ་བོད་ཀྱི་རྩ་དོན་སྒྲུབ་ཐབས་གཙོས་མ་འོངས་པའི་ལས་འཆར་དང་འབྲེལ་བའི་ Manifesto ཞེས་སྲིད་བྱུས་ཀྱི་བསྒྲགས་གཏམ་གྱི་དེབ་ཆུང་ཞིག་ཡོངས་གྲངས་གནང་ཡོད།གཞི་རྩའི་སྤེན་པ་ཚེ་རིང་ལགས་སྤྱི་སྙོམས་དྲང་བདེན་དང་ནུས་པ་མཉམ་སྤུངས། དེ་བཞིན་གོམ་པ་མདུན་སྤོ་བཅས་གཞི་རྩའི་ལྟ་གྲུབ་གསུམ་གྱི་ཐོག་ནས་ཕྱི་ལོ་ ༢༠༢༡ ལོའི་སྲིད་སྐྱོང་གི་འོས་གཞིར་ཞུགས་ཡོད་པ་དང་སྔོན་འགྲོའི་འོས་བསྡུ་ཆེན་མོའི་སྐབས་སུ་ཁོང་ལ་ཁྱོན་འོས་གྲངས་ ༢༣༧༦༢ ཐོབ་ཡོད་པ་རེད།

འདི་ལོའི་བོད་མིའི་གསུམ་བཅུའི་སྒེར་ལངས་ཐེངས་ ༦༢ པའི་སྔ་ཉིན་ལ་རྒྱ་ནག་གཞུང་གིས་དམ་དྲག་བྱེད་ཤུགས་ཇེ་ཆེར་གཏང་རྒྱུའི་བཀོད་ཁྱབ་བཏང་དོན་ལྟར་དུས་ད་ལྟའི་ཆ་ལའང་བོད་མི་རྣམས་དགོན་པ་ཁག་ལ་མཆོད་མཇལ་ཞུ་གཙོས་ཆོས་ཕྱོགས་ཀྱི་གནང་སྒོ་གནང་བར་ངལ་བ་ཆེན་པོ་འཕྲད་བཞིན་ཡོད་པ་རེད་འདུགtibetwatch འམ་བོད་གནས་ལྟ་ཞིབ་གིས་གནས་ཚུལ་སྤེལ་བར་རྒྱ་ནག་གཞུང་གིས་བྱེས་བཞུགས་རྒྱ་ཆེ་མང་ཚོགས་རྣམས་ལ་ཇོ་ཁང་གིས་གཙོས་པའི་དགོན་སྡེ་ཁག་ལ་མཆོད་མཇལ་ཞུ་བར་ཕེབས་སྐབས་རྒྱལ་སྒོ་ནས་ལུས་བཤེར་བྱ་རྒྱུ་གཙོས་མི་མང་ཁྲོད་མི་གསུམ་ལས་མང་བ་འདུ་འཛོམས་མི་ཆོག་པ་དང་། ཇོ་ཁང་སོགས་ལ་གླིང་སྐོར་ཕེབས་སྐབས་མི་སྣ་གསུམ་ལས་མང་བ་མཉམ་དུ་ཕེབས་ཆོག་གི་མེད་པར་དམ་དྲག་བྱེད་བཞིན་ཡོད་པ་མ་ཟད། ལྷ་སའི་བར་སྐོར་ཀྱི་ལམ་ཟུར་ཡོད་ཚད་དུ་ཉེན་རྟོག་པ་དང་རྟོག་ཞིབ་བྱེད་མཁན་གྱིས་བོད་མི་ཁོ་ནར་ཞིབ་བཤེར་བྱེད་མུས་ཡིན་པ་བཀོད་འདུག བོད་གནས་ལྟ་ཞིབ་ཁང་གིས་ལྷ་ས་ནས་གནས་ཚུལ་ཁུངས་ལྡན་མཁོ་སྤྲོད་གནང་བར་གསུམ་བཅུའི་དུས་དྲན་གྱི་དུས་ཚིགས་ནས་བཟུང་ཇོ་ཁང་གཙོས་ལྕགས་པོ་རིའི་གཡས་གཡོན་ཀྱི་ས་ཚིགས་ཡོངས་སུ་རྫོགས་པར་རྒྱ་ནག་གཞུང་གིས་ཉེན་རྟོག་པ་དང་དམག་མི་འབོར་ཆེན་འགྲེམས་འཇོག་གིས་བོད་མི་ཁོ་ནར་དམ་དྲག་དང་ལྟ་སྲུང་ནན་པོ་བྱེད་བཞིན་ཡོད་སྟབས། དྲག་པོའི་ཁོར་ཡུག་གི་རྐྱེན་གྱིས་དགོན་པར་མཆོད་མཇལ་དང་སྐོར་ར་ཕེབས་རྒྱུ་མཚམས་འཇོག་བྱས་པ་ཡིན། དེ་མིན་ཉེན་ཁ་ཆེན་པོ་འདུག་ཅེས་འགྲེལ་བརྗོད་གནང་སྐོར་བཀོད་འདུགབོད་གནས་ལྟ་ཞིབ་ཁང་གིས་ཇོ་ཁང་དང་བར་སྐོར་སོགས་ཀྱི་དྲག་པོའི་ཁོར་ཡུག་རྣམས་གསལ་འདོན་གནང་བ་དང་མཉམ་དུ་པར་རིས་ཁག་གཉིས་ཙམ་ཆེད་འཇོག་གནང་འདུག པར་རིས་དང་པོའི་ནང་རྒྱལ་ས་ལྷ་སའི་ཇོ་ཁང་གི་མདུན་དུ་གནམ་གཤིས་ཤིན་ཏུ་ནས་གྲང་ངར་ཆེ་ཞིང་ཁ་བས་བཏུམས་ཡོད་ཀྱང་། བོད་རིགས་སྐྱེས་པ་ཞིག་ལ་རྒྱའི་ཉེན་རྟོག་པ་གསུམ་གྱིས་སྐོར་བ་དང་གཅིག་གིས་ལུས་བཤེར་བྱས་པ་དང་གཅིག་གིས་དཔེ་ཁུག་སྔོག་བཞིན་པ། གཞན་གཅིག་གིས་མིང་འགོད་བཞིན་པའི་དྲག་པོའི་གནས་སྟངས་མངོན་རྒྱུ་འདུག་པ་མ་ཟད། པར་རིས་གཞན་གཅིག་གི་ནང་དུ་རྒྱའི་ཉེན་རྟོག་པས་དམག་ཆས་སྤྲས་ནས་ལག་ཏུ་མེ་མདའ་བཟུང་སྟེ་རྟོག་ཞིབ་ནན་པོ་བྱེད་བཞིན་ཡོད་པ་མཐོང་རྒྱུ་འདུགགཞི་རྩའི་སྔར་ལོའི་ཕྱི་ཟླ་བཅུ་གཉིས་ཀྱི་ཟླ་མཇུག་ཏུ་ཨ་རིའི་གྲོས་ཚོགས་ཀྱིས་ཚད་མཐོའི་རྒྱབ་སྐྱོར་གནང་སྟེ་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བཀོད་ནས་ཡུལ་དེའི་ཁྲིམས་སུ་བཅས་པའི་ཕྱིར་ཉིན་དེར་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་མཁའ་དབྱིངས་སུ་དམག་གི་རང་བཞིན་ལྡན་པའི་ཐད་འཕུར་གནམ་གྲུ་ཁག་ཅིག་བཏང་ནས་འཇིགས་སྐུལ་གྱི་རྣམ་པ་ཡང་བསྟན་ཡོད་པ་རེད།