གསར་འགྱུར།

དེ་རིང་རྒྱ་གར་གྱི་མངའ་སྡེ་ཧ་རི་ཡཱ་ཎཱ་གྲོང་ཁྱེར་ Rewari ནང་མངའ་སྡེའི་ས་གནས་མི་འདྲ་བ་ ༡༣ ནང་དུ་དགུན་ཚོང་གཉེར་བཞིན་པའི་བོད་པའི་སུད་ཚོང་བ་ལས་གྲུབ་པའི་ཧ་རི་ཡཱ་ཎཱ་མངའ་སྡེའི་བོད་མིའི་ཚོང་པ་ཚོགས་པའི་ཚོགས་ཆེན་ཐེངས་གཉིས་པ་འཚོགས་འདུག ཚོགས་འདུའི་ཐོག་གཙོ་བོ་རྒྱུན་ལས་གསར་པ་འོས་འདེམས་གནང་རྒྱུ་གཙོས་པའི་ཁྲོམ་ར་སྲ་བརྟན་དང་སབ་གླའི་རིན་འབབ་ཀྱི་དཀའ་སེལ་ཐབས་ལམ་འཚོལ་རྒྱུ། ལུ་དྷི་ཡ་ན་ཚོང་པ་ཁག་ནས་བོད་མིའི་སུད་ཚོང་བྱ་ཡུལ་ས་གནས་ཀྱི་ཡུལ་མི་རྣམས་ལ་ཚོང་ཟོག་སྤྲོད་ཕྱོགས་སྐོར་དང་ངལ་བ་སེལ་ཐབས་བཅས་ཀྱི་ཐོག་བཀའ་བསྡུར་གནང་རྒྱུ། དེ་བཞིན་ས་ཁག་ཅིག་གི་ཚོང་པ་ནས་ས་ཁག་གཞན་ལ་ཚོང་ཟོག་ཆེད་འདོན་གནང་བར་བསྐྱོད་མི་ཆོག་པ་དང་ GST ཁྲལ་བབས་སོགས་གྲོས་གཞི་དོན་ཚན་བཅིུག་ཐོག་གྲོས་བསྡུར་གནང་གི་འདུག མཛད་སྒོའི་ཐོག་སྐུ་མགྲོན་གཙོ་བོ་སྤྱི་འཐུས་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་དང་དམིགས་བསལ་སྐུ་མགྲོན་བཀའ་ཟུར་རྒྱ་རི་སྒྲོལ་མ་མཆོག ལྡི་ལི་བསམ་ཡས་གླིང་ས་གནས་འགོ་འཛིན་དང་མངའ་སྡེའི་རྒྱ་གར་གྱི་དཔོན་རིགས་ཁག་གཅིག་དང་དཔྱ་ཁྲལ་འགན་འཛིན་གཙོས་རྒྱ་གར་རྒྱལ་ཡོངས་བཙན་བྱོལ་བོད་མིའི་ཚོང་པ་ཚོགས་པའི་སྐུ་ཚབ་དང་རྒྱ་གར་བོད་དོན་རྒྱབ་སྐྱོར་ཚོགས་པའི་སྐུ་ཚབ་འཐུས་མི་བཅས་ཚོགས་བཅར་བ་ཁྱོན་ ༥༠ ལྷག་འདུ་འཛོམས་བྱུང་འདུག སྐབས་དེར་བོད་མི་མང་སྤྱི་འཐུས་ཚོགས་གཞོན་མཆོག་དང་བཀའ་ཟུར་རྒྱ་རི་སྒྲོལ་མ་མཆོག་རྣམ་གཉིས་ཀྱིས་བོད་མིའི་སུད་ཚོང་བ་རྣམས་ནས་སོ་སོའི་ཚོང་གི་ཁེ་ཕན་ཙམ་ལ་མགོ་འཁོར་ནས་མ་བཞུགས་པར་བོད་སྤྱིའི་རྩ་དོན་སླད་ཕྱག་གྲུ་མཉམ་འདེགས་ཀྱིས་ཕྱག་ལས་གནང་སྟེ་ས་གནས་ཡུལ་མི་ཁྲོད་བོད་དོན་བརྒྱུད་བསྒྲགས་གནང་དགོས་པའི་སྐུལ་མ་གནང་བ་དང་ཆབས་ཅིག རྒྱ་གར་གྱི་དཔོན་རིགས་རྣམས་ལ་བོད་མི་གནས་ཡུལ་ཁག་ཏུ་ཡོད་པའི་སུད་ཚོང་བ་ཚོར་མཐུན་འགྱུར་གང་ཐུབ་གནང་རོགས་ཞེས་འབོད་སྐུལ་ཞུས་འདུག གཞི་རྩའི་ཧ་རི་ཡཱ་ཎཱ་མངའ་སྡེའི་བོད་མིའི་ཚོང་པ་ཚོགས་པ་ཞེས་པ་དེ་ནི་ལོ་མང་ནས་ས་གནས་དེར་ཡོད་པའི་བོད་མིའི་སུད་ཚོང་བ་རྣམས་ལ་ས་ཆ་དང་ས་གླ། དེ་བཞིན་ས་གནས་ཡུལ་མིའི་ཚོང་པ་དང་འབྲེལ་བའི་དཀའ་ངལ་འཕྲད་བཞིན་པ་རྣམས་སེལ་ཐབས་སོགས་ལ་དམིགས་ཏེ་ཕྱི་ལོ་ ༢༠༡༧ ལོར་ཆེད་འཛུགས་གནང་པ་ཞིག་ཡིན་པ་དང་། ཚོགས་ཆེན་དེ་རིང་དང་སང་ཉིན་བཅས་ཉིན་གྲངས་གཉིས་ཀྱི་རིང་འཚོགས་ཀྱི་ཡོད་པ་རེད།

ཁ་སང་ཕྱི་ཚེས་༢༠ཉིན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་རྒྱ་གར་དབུས་གཞུང་གི་འཕྲོད་བསྟེན་བློན་ཆེན་ཟུར་པ་སྐུ་ཞབས  Jagat Prakash Nadda  མཆོག་རྒྱ་གར་སྲིད་དོན་ཚོགས་པ་ཆེ་ཤོས་BJP ཚོགས་པའི་ཚོགས་གཙོ་ཐེངས་ ༡༤ པར་བསྐོ་གཞག་གནང་བར་དགའ་བསུའི་འཚམས་འདྲི་ཞུས་འདུག འཚམས་འཕྲིན་གྱི་ནང་། ཚོགས་གཙོ་མཆོག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ། རྒྱ་གར་གཞུང་མང་གཉིས་ཀྱིས་འདས་པའི་ལོ་ངོ་དྲུག་ཅུའི་རིང་བོད་ཀྱི་འཐབ་རྩོད་དང་བོད་མིར་མཐུན་འགྱུར་རྒྱབ་སྐྱོར་གནང་བར་བཀའ་དྲིན་ཤིན་ཏུ་ཆེ་ཞུས་པ་བརྒྱུད་ནས། སྐུ་ཞབས་ཁོང་གིས་ཚོགས་གཙོ་གནང་བའི་རིང་སྲིད་དོན་ཚོགས་པའི་ལས་དོན་གང་ཡོད་ཀྱི་བྱ་བ་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན་ཞེས་འཁོད་འདུག ཚོགས་གཙོ་མཆོག་གིས་ད་དུང་སྐུ་ཞབས  Jagat Prakash Nadda  ལགས་ཀྱིས་ལོ་མང་རིང་རྒྱ་གར་གྱི་ཆབ་སྲིད་སྤྱི་དང་སྒོས་སུ་BJPསྲིད་དོན་ཚོགས་པའི་ནང་ཕྱག་ལས་རྒྱ་ཆེར་གནང་ཡོད་པར་ལུང་འདྲེན་དང་སྦྲགས། སྐུ་ཞབས་ཁོང་ནི་BJP་སྲིད་དོན་ཚོགས་པའི་ལས་དོན་ཚོགས་གཙོ་མིག་དཔེར་འོས་པ་ཞིག་ཡིན་པར་བརྟེན། ད་རེས་ཁོང་ཉིད་ཚོགས་གཙོར་བསྐོས་གནང་བ་དེས་སྐུ་ཞབས་ཁོང་གི་ཁྱད་འཕགས་ཀྱི་འགོ་ཁྲིད་ཀྱི་ནུས་པ་ཡོད་པ་ཞིག་དང་། སྲིད་དོན་ཚོགས་པའི་ངོས་ནས་ཁོང་ལ་ཡིད་ཆེས་བརྟན་པོ་གནང་བ་ཞིག་མཚོན་གྱི་ཡོད་པར་བསྒྲགས་འདུག གཞན་ཡང་ཚོགས་གཙོ་མཆོག་གིས།  སྐུ་ཞབས་ཁོང་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་པ་ཡོད་མཁན་ཞིག་ཡིན་པར་མ་ཟད། བོད་དོན་ཐོག་ཡུན་རིང་རྒྱབ་སྐྱོར་གནང་མཁན་ཞིག་ཀྱང་ཡིན་པར་གསུངས་ཏེ།  བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གིས་རྒྱ་གར་རྒྱལ་ས་ལྡི་ལི་དང་། རྡ་སར་སྐུ་ཞབས་ཁོང་ཐེངས་ཁ་ཤས་མཇལ་འཕྲད་ཞུ་རྒྱུའི་གོ་སྐབས་ཐོབ་ཡོད་ཡོད་སྐོར་གསུངས་འདུག ཚོགས་གཙོ་མཆོག་གིས་འཚམས་འཕྲིན་གནང་བ་དང་ལྷན་དུ།  སྐུ་ཞབས་ཁོང་གིས་བོད་པའི་འཐབ་རྩོད་སྐོར་གསལ་པོ་མཁྱེན་གྱི་ཡོད་སྟབས། ཁོང་གིས་འགོ་ཁྲིད་པའི་སྲིད་དོན་ཚོགས་པས་བོད་དོན་ཐོག་སྔར་ལྷག་རྒྱབ་སྐྱོར་གནང་རྒྱུའི་རེ་བ་དང་ཡིད་ཆེས་ཡོད་པར་འབོད་སྐུད་ཀྱིས། ང་ཚོས་བོད་རྒྱ་གཉིས་ཀར་ཁེ་ཕན་ཡོད་པའི་དབུ་མའི་ལམ་གྱི་སྲིད་བྱུས་གཏན་ལ་ཕབ་སྟེ། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ལ་འབད་བརྩོན་བྱེད་ཀྱི་ཡོད་པར་གསུངས་བ་དང་སྦྲགས།  ཕྱི་ལོ་ ༢༠༡༠ ནས་བཟུང་བོད་རྒྱ་འབྲེལ་མོལ་མཚམས་ཆད་ཡོད་པ་པར་ལུང་འདྲེན་གནང་སྟེ། སྐུ་ཞབས་ཁོང་གིས་བོད་རྒྱ་གྲོས་མོལ་བསྐྱར་གསོ་ཡོང་ཐབས་ལ་རྒྱབ་སྐྱོར་གང་ཐུབ་གནང་རྒྱུའི་རེ་བ་བྱེད་བཞིན་ཡོད་པའི་སྐུལ་མ་གནང་འདུག གཞན་ཡང་ཚོགས་གཙོ་མཆོག་གིས།  རྒྱ་གར་གྱི་ཧི་མ་ཅལ་མངའ་སྡེ་ཡི་འཕྲོད་བསྟེན་བློན་ཆེན་སྐུ་ཞབས་ Rajeev Bindal ལགས་ཀྱང་ཐེངས་འདིར་ཧི་མ་ཅལ་ཁུལ་གྱི་BJPསྲིད་དོན་ཚོགས་པའི་ཚོགས་གཙོར་འོས་འདེམས་བྱུང་བར་ཡང་འཚམས་འཕྲིན་གནང་སྟེ། ཁོང་ཉིད་ཀྱང་བོད་དོན་ལ་རྒྱུས་མངའ་ཡོད་པ་ལྟར། སྔར་བཞིན་བོད་རྒྱ་ཞི་མོལ་གྱི་མཚོན་པའི་བོད་དོན་ལ་རྒྱབ་སྐྱོར་ཡོང་བའི་རེ་སྐུལ་ཞུས་འདུག

དེ་རིང་སྔ་དྲོ་ཆུ་ཚོད་བཅུ་གཅིག་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་རྒྱ་གར་གྱི་གྲོང་ཁྱེར་གྷོ་བ་དང་། ལྷོ་ཕྱོགས་མོན་གྷོ་འདོད་རྒྱུ་གླིང་བོད་མིའི་གཞིས་སྒར་དུ་རྟེན་རྟེན་གཞི་བྱས་པའི་གནད་ས་ཁག དེ་བཞིན་གནས་མཆོག་རྡོ་རྗེ་གདན་བཅས་ནང་གི་ཟླ་བ་གཅིག་ལྷག་གི་མཛད་འཕྲིན་ཁག་ལེགས་གྲུབ་ཀྱིས་བཞུགས་སྒར་དུ་༸ཞབས་སོར་བདེ་བར་འཁོད་སོང་། དེ་ཡང་མགོན་པོ་གང་ཉིད་མཆོག་མངའ་སྡེ་ཆེ་ཁག་གསུམ་ནང་གི་མཛད་འཕྲིགས་ཁག་ཡོངས་སུ་གྲུབ་སྟེ་དེ་རིང་སྔ་ཐོག་བཞུགས་སྒར་ཉེ་འདབས་སུ་རྟེན་གཞི་བྱས་པའི་གྷ་གྷལ་གནམ་ཐང་དུ་ཞབས་སོར་འཁོད་སྐབས་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་དང་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་སོགས་ནས་ཕེབས་བསུ་དང་སྦྲགས། ཆིབས་འགྲོ་བརྒྱུད་བཞུགས་སྒར་རྒྱལ་བའི་ཕོ་བྲང་དུ་ཆིབས་བསྒྱུར་བསྐྱངས་སྐབས་ཕེབས་ལམ་གྱི་གཡས་གཡོན་དུ་ས་གནས་དད་ལྡན་མང་ཚོགས་ཡོངས་ནས་ལག་ཏུ་དཀར་གཙང་གི་མཇལ་དར་དང་དྲི་བཟང་བདུག་སྤོས་སོགས་བསྣམས་ཏེ་དགའ་བསུའི་ཕེབས་སུ་གཟབ་རྒྱས་ཞུས་ཡོད། གཞི་རྩའི་༸གོང་ས་སྐྱབས་མགོན་ཆེན་པོ་མཆོག་ཟླ་བ་སྔོན་མ་སྟེ། ཕྱི་ཟླ་ ༡༢ ཀྱི་ཕྱི་ཚེས་ ༩ ཉིན་རྒྱ་ག ར་གྱི་མངའ་སྡེ་གྷོ་བ་དང་ཀར་ན་ཊ་ཀ། དེ་བཞིན་བྷི་ཧར་གསུམ་ནང་གི་བཀའ་སློབ་ལམ་སྟོན་དང་ཆོས་འབྲེལ་སོགས་ཀྱི་མཛད་འཆར་སླད་བཞུགས་སྒར་ནས་ཆིབས་ཐོན་མཛད་ཡོད་པ་དང་། འདས་པའི་ཟླ་བ་གཅིག་དང་བདུན་ཕྲག་གཅིག་ལྷག་གི་མཛད་འཕྲིན་ཁྲོད་ཕྱི་ཟླ་༡༢ ཕྱི་ཚེས་ ༡༡ ཉིན་༸གོང་ས་སྐྱབས་མགོན་ཆེན་པོ་མཆོག་གིས་གྷོ་བ་མངའ་སྡེའི་ནང་རྟེན་གཞི་བྱས་པའི་གྷོ་བ་གཙུག་ལག་སློབ་གྲྭ་ཆེན་མོའི་དགེ་ལས་སློབ་མ་རྣམས་ལ་དེང་རབས་ཀྱི་དུས་ཚོད་འདིར་དཔལ་ནཱ་ལེནྡཱའི་རིག་གནས་ཀྱི་འབྲེལ་བ་ཞེས་པའི་བརྗོད་གཞིའི་ཐོག་བཀའ་སློབ་དང་དྲི་བ་དྲིས་ལན་སོགས་ཀྱི་མཛད་འཕྲིན་བསྐྱངས་ཡོད། གྷོ་བ་ནང་གི་མཛད་འཕྲིན་ཁག་གྲུབ་མཚམས་ཏེ་ཕྱི་ཚེས་ ༡༢ ཉིན་མགོན་པོ་གང་ཉིད་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་སྒར་དུ་ཞབས་སོར་བདེ་བར་འཁོད་མཚམས་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་ཁྲི་ཟུར་རིན་པོ་ཆེ་མཆོག ཤར་བྱང་ཆོས་རྗེ་རྣམ་གཉིས། དཔལ་ལྡན་འབྲས་དཀར་སྤུངས་པའི་མཁན་བླ་འདུས་མང་དང་སེར་སྐྱ་མང་ཚོགས་སྟོང་ཕྲག་ལྷག་གིས་དཔལ་ལྡན་འབྲས་སྤུངས་བླ་སྤྱིའི་ཚོགས་ཁང་ཆེན་མོར་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་དང་། སྐབས་དེའི་ཕེབས་སྟོན་མཛད་སྒོའི་ཐོག་༸གོང་ས་མཆོག་ནས་མང་ཚོགས་ཡོངས་ལ་འཚམས་འདྲི་དང་སྦྲགས། དེ་སྔ་བོད་ནང་ལ་དཔལ་ལྡན་འབྲས་དཀར་སྤུངས་པ་ཞེས་པ་དེ་བོད་གངས་ཅན་ལྗོངས་སུ་དཔལ་ནཱ་ལེནྡཱ་ཞེས་གསུང་སྲོལ་ཡོད་པ་ལྟར་དོན་ལ་གནས་པའི་སློབ་གཉེར་ཁང་ཞིག་ཡིན་པ་སོགས་བཀའ་བསྩལ་ཡོད།༸གོང་ས་༸སྐྱབས་མགོན་ཆེན་པོ་མཆོག་གིས་ཁུལ་དེར་རྟེན་གཞི་བྱས་པའི་གདན་ས་འབྲས་སྤུངས་དང་གདའ་ལྡན་སོ་སོའི་དགོན་ཁག་ཏུ་དད་ལྡན་ཆིག་ཁྲི་བརྒལ་བར་ནང་ཆོས་ངོ་སྤྲོད་དང་ཚེ་དབང་བཅས་བཀའ་དྲིན་བསྩལ་བ་མ་ཟད། དགོན་སྡེ་ཁག་གི་རྟགས་གསལ་ལ་གཟིགས་ཞིབ་སོགས་མཛད་ཡོད་པ་དང་། ཕྱི་ཚེས་ ༢༠ ཉིན་གདན་ས་དགའ་ལྡན་རྣམ་པར་རྒྱལ་བའི་གླིང་དུ་རི་བོ་དགེ་ལྡན་པའི་སྲོལ་འབྱེད་རྗེ་ཙོང་ཁ་པ་ཆེན་པོ་༸སྐུ་མྱ་ངན་ལས་འདས་ནས་ལོ་དྲུག་བརྒྱ་འཁོར་བ་དང་བསྟུན་གོ་སྒྲིག་ཞུས་པའི་རྒྱལ་སྤྱིའི་མཁས་པའི་བགྲོ་གླེང་ཐོག་དབུ་བཞུགས་མཛད་དེ་༸རྗེ་རིན་པོ་ཆེ་མཆོག་ནི་སྔོན་གྱི་མཁས་པ་ཚོའི་ཡིད་འཕྲོག་ཐུབ་མཁན་གྱི་མཁས་པ་བསམ་གྱིས་མི་ཁྱབ་པ་ཞིག་ཡིན་པ་སོགས་བཀའ་བསྩལ་ཡོད། ལྷག་པར་དུ་ཕྱི་ཚེས་ ༢༡ ཉིན་༸གོང་ས་མཆོག་རྗེ་ཙོང་ཁ་པ་ཆེན་པོ་སྐུ་མྱ་ངན་ལས་འདས་པའི་དགོངས་རྫོགས་མཆོད་འབུལ་ཐོག་དབུ་བཞུགས་མཛད་དེ་རྗེ་དགེ་འདུན་གྲུབ་ཀྱི་མཛད་པའི་ཤར་གངས་རི་མའི་བཀའ་ཆོས་བཀའ་དྲིན་བསྩལ་ཡོད་པ་དང་། སྐབས་དེའི་མཆོད་འབུལ་མཛད་སྒོའི་ཐོག་འཇམ་མགོན་རྒྱལ་བའི་གདུང་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དགེ་ལྡན་པ་ཡོངས་ཀྱི་ཚབ་མཛད་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་བའི་བསྟན་པ་སྤྱི་དང་། ཁྱད་པར་དུ་འཇམ་མགོན་བླ་མའི་བསྟན་པར་མཛད་རྗེས་དང་བཀའ་དྲིན་འགྲན་ཟླ་མེད་པར་བསྐྱངས་པར་ཆེ་བསྟོད་དང་སྦྲགས། རྗེ་ཙོང་ཁ་པ་ཆེན་པོའི་གཟེངས་རྟགས་ཞེས་པ་ཞིག་འབུལ་ལམ་ཞུས་ཡོད། ༸གོང་ས་མཆོག་མོན་གྷོ་འདོད་རྒྱུ་གླིང་ཁུལ་གྱི་ཉིན་གྲངས་ ༡༤ ལྷག་གི་མཛད་འཕྲིན་ཁག་ལེགས་པར་གྲུབ་རྗེས་གནས་མཆོག་རྡོ་རྗེ་གདན་ཕྱོགས་སུ་ཆིབས་བསྒྱུར་མཛད་དེ་ཁུལ་དེར་རྟེན་གཞི་བྱས་པའི་དུས་འཁོར་ཐང་ཆེན་དུ་དད་ལྡན་སྟོང་ཚོ་བརྒལ་བར་ལག་ལེན་སོ་བདུན་མ་དང་། ཉེ་བརྒྱུད་འཇམ་དབྱངས་ཆོས་འཁོར་གྱི་བཀའ་ཆོས་དང་། སྤྱན་རས་གཟིགས་དང་སྒྲོལ་དཀར་། དེ་བཞིན་༸རྗེ་བཙུན་མ་ནག་མའི་བཀའ་དབང་བཅས་བསྩལ་ཡོད་པ་མ་ཟད། ཁུལ་དེར་སྐུ་ལྷོད་བཞུགས་མཛད་པའི་རིང་ལ་ཕྱི་ནང་གི་དད་ལྡན་མང་ཚོགས་ལ་མཇལ་ཁ་དང་བཀའ་སློབ། ལྷག་པར་དུ་དྲ་ཐོག་བརྒྱུད་ཨ་མི་རི་ཀའི་གྲོང་ཁྱེར་ New York ནང་འདུ་འཛོམས་བྱུང་བའི་རྒྱ་རིགས་དང་བོད་པའི་མཐོ་རིམ་སློབ་གྲའི་སློབ་ཕྲུག་སུམ་བརྒྱ་ཙམ་ལ་ཆོས་ལུགས་དང་མ་འབྲེལ་བའི་སྤྱོད་བཟང་དང་འཇིག་རྟེན་སྤྱི་སྨན་གྱི་འགན་ཁུར་ཞེས་པའི་བརྗོད་གཞིའི་ཐོག་བཀའ་སློབ་ལམ་སྟོན་དང་། གྷ་ཡ་རྫོང་ཁོངས་སུ་ཆགས་པའི་ Indian Institute of Management ཞེས་རྒྱ་གར་གྱི་ཚོང་ལས་འཛིན་སྐྱོང་སློབ་གཉེར་ཁང་གི་དགེ་ལས་སློབ་ཕྲུག་རྣམས་ལ་རྒྱ་གར་གྱི་གནའ་བོའི་རིག་གནས་ཀྱི་གལ་གནད་དང་། བྷི་ཧར་གྱི་རྒྱལ་ས་པཊ་ནར་རྟེན་གཞི་བྱས་པའི་བྷི་ཧར་གྱི་ཁྲིམས་ལུགས་རིག་པའི་ལྟེ་གནས་ཁང་དུ་ཆེ་མཐོ་ཁྲིམས་ཞིབ་པ་དང་ཁྲིམས་དཔོན་སོགས་ལ་བྱམས་པ་དང་རྙིང་རྗེ་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་ཡོད། ལྷག་པར་དུ་ཐེངས་འདིའི་མཛད་འཕྲིན་ཁྲོད། མགོན་པོ་གང་ཉིད་མཆོག་དང་བྷི་ཧར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་རྣམ་གཉིས་མཇལ་མོལ་ཐེངས་གཉིས་མཛད་པ་མ་ཟད། རིང་མིན་གནས་མཆོག་རྡོ་རྗེ་གདན་གྱི་ཉེ་འཁྲིས་སུ་ཏཱ་ལའི་བླ་མའི་ནཱ་ལེནྡཱའི་རིག་གནས་སློབ་གཉེར་ཁང་ཞིག་ཆེད་འཛུགས་གནང་གཏན་འཁེལ་ཡོད་པ་ཡོངས་གྲགས་མཛད་ཡོད། མངའ་སྡེ་ཆེ་ཁག་གསུམ་ནང་གི་མཛད་འཕྲིན་ཁག་ཡོངས་སུ་གྲུབ་མཚམས་མགོན་པོ་གང་ཉིད་མཆོག་ཁེ་ཉིན་ཕྱི་ཚེས་ ༡༨ ཉིན་མཁའ་ལམ་བརྒྱུད་པཊ་ན་ནས་རྒྱལ་ས་ལྡི་ལིར་ཆིབས་བསྒྱུར་མཛད་དེ་ཉིན་གྲངས་གཅིག་རིང་ཁུལ་དེར་སྐུ་བཞུགས་མཛད་པའི་རིང་སྐུའི་འཕྲོད་བཞེས་བརྟག་དཔྱད་གང་ལེགས་གནང་ཐོག་དེ་རིང་སྔ་དྲོ་རྒྱལ་ས་ལྡི་ལི་ནས་བཞུགས་སྒར་རྒྱལ་བའི་ཕོ་བྲང་དུ་ཞབས་སོར་བདེ་བར་འཁོད་ཡོད།

ཁ་སང་རྒྱལ་སྤྱིའི་དྲ་རྒྱའི་རང་དབང་གི་ཉིན་མོར། ཨ་རིར་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས། ཨ་རིའི་གྲོང་ཁྱེར་ནེའུ་ཡོག་ཏུ་ཡོད་པའི་ཀུ་ཤུ་རྟགས་ཅན་གྱི་ཁ་པར་བཟོ་ཚང་ལ་སོང་ནས། བཟོ་ཚོང་ཁང་དེའི་ངོས་ནས་རྒྱ་ནག་དང་ལག་འབྲེལ་གྱིས་བོད་དོན་དང་ཡུ་གུར། དེ་བཞིན་ཧོང་ཀོང་དང་བོད་སོགས་ཀྱི་གནས་ཚུལ་ལ་བཀག་སྡོམ་བྱས་ཏེ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པར་བརྗོད་དེ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག སྐབས་དེར། བོད་རང་བཙན་སློབ་ཕྲུག་ཚོགས་པའི་ཚོགས་མི་རྣམས་ཀྱིས་ཀུ་ཤུ་བཟོ་ཚོང་ཁང་གི་མདུན་དུ་ངོ་རྒོལ་ལས་འགུལ་སྤེལ་བ་མ་ཟད། ངོ་རྒོལ་བ་རྣམས་ཀྱིས་འཕྲེད་དར་མང་པོ་བཟུང་ཡོད་པ་ལས། ཀུ་ཤུ་བཟོ་ཚང་ཁང་གིས་མི་སྒེར་གྱི་གནད་དོན་དང་མིའི་རིགས་ཀྱི་མངོན་འདོད་ལ་རང་དབང་ཡོད་པར་བཀོད་ཡོད་ཡོད་ནའང་། ད་ཆ་བཟོ་ཚོང་ཁང་གིས་རྒྱ་ནག་་ལ་ལག་འབྲེལ་གྱིས་གནས་ཚུལ་བཀག་སྡོམ་བྱེད་བྱས་ཡོད་པ་མ་ཟད། མཉེན་ཆས་དང་འཚོལ་བྱེད་མ་ལག དེ་བཞིན་བརྡ་སྟོན་གྱི་བརྙན་རིས་སོགས་བཀག་སྡོམ་བྱས་ཡོད་པ་ལུང་འདྲེན་གྱིས། བཟོ་ཚོང་ཁང་གིས་གནས་ཚུལ་དེ་དག་མཚམས་བཞག་པའི་ཐོག བོད་དོན་དང་དབང་གི་ཆེད་དུ་རྒྱབ་སྐྱོར་བྱེད་དགོས་བ་སོགས་ཀྱི་འབོད་སྐུལ་གྱི་འཕྲེད་དར་མང་པོ་ཁྲོམ་བསྒྲགས་གནང་འདུག གཞན་ཡང་བོད་བཙན་སློབ་ཕྲུག་ཚོགས་པའི་ལས་འགུལ་གྱི་ངེས་སྟོན་པ་པད་མ་སྒྲོལ་མ་ལགས་ཀྱིས་གཏམ་བཤད་གནང་སྟེ། སྤྱི་ལོ་ཉེས་སྟོང་བཅོ་བརྒྱད་ལོ་ནས་བཟུང་། ཀུ་ཤུ་བཟོ་ཚོང་ཁང་གིས་རྒྱ་ནག་གི་རེ་འདོད་ལྟར་ལོ་རྒྱུས་ཀྱི་སྟེང་བྱུང་མ་མྱོང་བའི་གནས་ཚུལ་བཀག་སྡོམ་བྱེད་ཀྱི་ཡོད་ལུགས་བརྗོད་ཡོད་པ་མ་ཟད། ཀུ་ཤུའི་ཁ་པར་གྱི་བྱེད་ལས་ཐོན་གསར་བཅུ་གསུམ་པའི་ནང་དུ། རྒྱ་ནག་གིས་ཐེ་ཝན་ནི་རྒྱ་ནག་གི་ཆ་ཤོས་ཡིན་པར་བརྗོད་ཡོད་པ་བཞིན། ཀུ་ཤུ་བཟོ་ཚོང་ཁང་གིས་ཐེ་ཝན་གྱི་རྒྱལ་དར་གྱི་བརྡ་སྟོན་བརྙན་རིས་སོགས་ཀུ་ཤུའི་ཁ་པར་གྱི་ནང་དུ་ནག་གསུབ་བཏང་ཡོད་པར་བརྗོད་དེ། བཟོ་ཚོང་ཁང་གིས་རྒྱ་ནག་དང་ལག་འབྲེལ་གྱིས་མི་མང་གིས་གནས་ཚུལ་ལ་རྒྱུས་ལོན་བྱེད་རྒྱུ་དང་འབྲེལ་ལམ་གྱི་བདེ་འཇགས། གཞན་ཡང་རང་དབང་གི་མངོན་འདོད་སོགས་ལ་བཀག་སྡོམ་བྱེད་བཞིན་པ་མཚམས་འཇོག་དགོས་ཞེས་པ་དང་། བཟོ་ཚོང་ཁང་གིས་རྒྱ་ནག་གི་དབང་ཆ་གཅིག་སྒྲིལ་གྱི་ལམ་ལུགས་ལ་རྒྱབ་སྐྱོར་བྱེད་མཚམས་བཞག་སྟེ། བཟོ་ཚོང་རང་གི་ངོས་ནས་ལངས་ཕྱོགས་བསྟན་པོ་བཟུང་སྟེ། འགྲོ་བ་མིའི་རིགས་ཀྱི་ཆེ་མཐོང་དང་ཆབ་སྲིད་ཀྱི་རང་དབང་སོགས་ལ་རྒྱབ་སྐྱོར་བྱེད་དགོས་ཞེས་འབོད་སྐུལ་བྱས་འདུག གཞན་ཡང་བོད་རང་དབང་སློབ་ཕྲུག་ཚོགས་པས། ཀུ་ཤུ་བཟོ་ཚོང་ཁང་གིས་རྒྱ་ནག་གི་མངོན་འདོད་སྒྲུབ་ཀྱི་ཡོད་པ་གསལ་བཤད་ཀྱིས། འདི་ལོའི་སྤྱི་ཟླ་༢ བའི་ཚེས་ ༢༦ ཉིན་ཀུ་ཤུ་བཟོ་ཚོང་ཁང་གིས་ལོ་མཇུག་གིི་མ་འཛུགས་ཀྱི་ཚོགས་ཆེན་འཚོགས་གཏན་འཁེལ་ཡོད་པར་བརྟེན། བོད་རང་བཙན་སློབ་ཕྲུག་ཚོགས་པའི་ངོས་ནས། ཀུ་ཤུ་བཟོ་ཚོང་ཁང་ལ་མ་འཛུགས་བྱེད་མཁན་རྣམས་ལ་འགྲོ་བ་མིའི་སྨྲ་བརྗོད་རང་དབང་དེ་གལ་ཆེན་དུ་བརྩི་དགོས་པའི་འབོད་བརྡ་རང་བཞིན་གྱི་སྙན་ཞུ་དབུལ་རྒྱུ་ཡིན་པར་བརྗོད་དེ། མི་མང་གིས་ཁོང་ཅག་གི་འབོད་བརྡ་རང་བཞིན་གྱི་སྙན་ཞུ་དེར་མཚན་རྟགས་བཀོད་དེ་ལས་འགུལ་དེར་རྒྱབ་སྐྱོར་བྱེད་དགོས་བའི་སྐུལ་མ་བཏང་འདུག གཞན་ཡང་ཁོང་ཚོས། ཀུ་ཤུ་བཟོ་ཚོང་ཁང་གིས་བཟོ་ཁང་གཞན་ལྟར་མ་ཡིན་པར། རྒྱ་ནག་གི་ནང་དུ་ཀུ་ཤུའི་ཁ་པར་བེད་སྤྱོད་གཏོང་ཕྱོགས་དང་འབྲེལ་ནས། རྒྱ་ནག་གི་མངོན་འདོད་ལྟར་གནས་ཚུལ་མང་པོ་བཀག་སྡོམ་བྱེད་ཀྱི་ཡོད་པ་ཡོངས་གྲགས་གནང་སྟེ། འདས་བའི་ཟླ་ངོ་གཅིག་གི་ནང་དུ། རྒྱ་ནག་གཞུང་གི་རེ་སྐུལ་ལྟར། རྒྱ་ནག་གི་ཚོང་རའི་ནང་དུ་ཀུ་ཤུ་བཟོ་ཚོང་ཁང་ནས་མཉེན་ཆས་ ༥༡༧ ཙམ་ནག་གསུབ་བཏང་ཡོད་པ་ཡོངས་གྲགས་གནང་བ་དང་འབྲེལ། སྤྱི་ལོི་ ༢༠༡༧ ལོར་ཡང་རྒྱ་ནག་གི་རེ་འདོད་ལྟར། ཀུ་ཤུ་བཟོ་ཚོང་ཁང་གིས་ VPNs ཞེས་པའི་གནས་ཚུལ་འཚོལ་བྱེད་ལས་མཉེན་ཆས་ ༦༠༠ ཙམ་ནག་གསུབ་བཏང་ཡོད་ལུགས་བརྗོད་དེ། རྒྱ་ནག་ནང་གི་འགྲོ་བ་མིའི་ཐོབ་ཐང་རྩོད་སྒྲུབ་པ་དག་ལ་མཚོན་ན། VPNs ཞེས་པ་ནི་རང་ཉིད་ལ་ཉེན་ཁ་མེད་པའི་སྒང་ནས་གནས་ཚུལ་འཚོལ་སྡུད་བྱེད་སྤྱད་གལ་ཆེན་ཞིག་ཡིན་ནའང་། ད་ཆ་རྒྱ་ནག་གིས་འཚོལ་བྱེད་མ་ལག་ཡོད་ཚད་བཀག་སྡོམ་བྱས་ཡོད་པ་ཡོངས་གྲགས་གནང་འདུག དེ་བཞིན་གྷོ་གྷེལ་བཟོ་ཚོང་ཁང་གིས་སྔོན་ཆད་རྒྱ་ནག་དང་ལྷན་དུ་Dragonfly ཞེས་པའི་འཚོལ་བཤེར་མ་ལག་གི་ལམ་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་རྒྱུའི་ལས་གཞི་དེར་བཟོ་ལས་བ་མ་མང་པོས་ངོ་རྒོལ་བྱས་པ་བཞིན། གྷོ་གྷེལ་བཟོ་ཚོང་ཁང་གིས་ལས་འཆར་དེར་གནོད་ཤུགས་སྤྲད་ནས་ཕྱིར་བསྡུ་བྱས་ཡོད་པ་ལྟར། ད་ཆ་ཀུ་ཤུ་བཟོ་ཚོང་ཁང་ལ་ཡང་མི་མང་གི་གནོད་ཤུགས་སྤྲད་ནས་རྒྱ་ནག་དང་མཉམ་དུ་ལག་འབྲེལ་བྱེད་བཞིན་པ་དེ་མཚམས་འཇོག་བྱེད་དུ་འཇུག་དགོས་ཞེས་བྲིས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་ཐོག་བྷི་ཧཱར་གྱི་རྒྱ་ས་པཊ་ནར་རྟེན་གཞི་བྱས་པའི་བྷི་ཧཱར་གྱི་ཁྲིམས་ལུགས་རིག་པའི་ལྟེ་གནས་ཁང་དུ་ཆིབས་བསྒྱུར་བཀའ་དྲིན་བསྐྱངས་ཏེ་བཀའ་སློབ་བསྩལ་འདུག མགོན་པོ་༸གང་ཉིད་མཆོག་ལྟེ་ཁང་དུ་༸ཞབས་སོར་བདེ་བར་འཁོད་མཚམས་སུ་ལྟེ་གནས་ཁང་དུ་བྱང་ཆུབ་ལྗོན་ཤིང་ཞིག་འདེབས་འཛུགས་ཀྱིས་ཐུགས་སྨོན་མཛད་གྲུབ་རྗེས་ཚོགས་ཁང་དུ་འདུ་འཛོམས་གནང་བའི་མང་ཚོགས་ཡོངས་ལ་བྱམས་པ་དང་སྙིང་རྗེ་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་བསྩལ་ཡོད་པ་དང་། སྐབས་དེར་མགོན་པོ་མཆོག་གིས་ང་ཚོ་ཕྲུ་གུ་ཆུང་ཆུང་སྐབས་སུ་ཆོས་ལུགས་དང་མི་རིགས་སོགས་ཀྱི་དབྱེ་བ་མེད་པར་འཛུམ་དམུལ་དམུལ་ཐོག་ནས་འཚར་ལོངས་འབྱུང་བཞིན་ཡོད་ཀྱང་། རིམ་པས་སྤྱི་ཚོགས་ཁྲོད་འཚར་ལོངས་བྱུང་སྐབས་མི་རིགས་དང་རིགས་རུས། ཤ་མདོག ཆོས་ལུགས་བཅས་པ་དབྱེ་འབྱེད་བྱེད་ཤེས་ཀྱི་ཡོད་པར་བཀའ་བསྩལ་དང་སྦྲགས། འཛམ་གླིང་ཐོག་ཡོད་པའི་འགྲོ་བ་མི་ཐེར་འབུམ་བདུན་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་སྟབས། མིས་བཟོས་པའི་དཀའ་ངལ་དེ་དག་སེལ་ཐབས་གནང་དགོས་པའི་ལམ་སྟོན་མཛད་འདུག མགོན་པོ་༸གང་ཉིད་མཆོག་གིས་ལོ་ངོ་སྟོང་ཕྲག་ལྷག་ཕྱིན་ཟིན་པའི་རྒྱ་གར་གྱི་གནའ་བོའི་རིག་གནས་སྤྱི་དང་འཚེ་བ་མེད་པའི་ལྟ་གྲུབ་དེ་ནི་དེང་གི་འཛམ་གླིང་ལ་དགོས་མཁོ་ཡོད་པ་ཞིག་ཆགས་ཡོད་པ་སོགས་བཀའ་བསྩལ་ཡོད་པ་མ་ཟད། སྐབས་དེར་ལྷན་ཞུགས་གནང་བའི་ཁྲིམས་རྩོད་པའི་ཆེད་ལས་པ་རྣམས་ནས་དངུལ་གཅིག་པོའི་ཆེད་དུ་བསམ་བློ་བཏང་ནས་ཕྱིན་ཚེ་དཀའ་ངལ་སེལ་དཀའ་བར་བརྟེན་ཆེད་ལས་པ་ཚོས་སྤྱི་ཚོགས་དང་རྒྱལ་ཁབ་བདེ་སྐྱིད་ལྡན་པ་ཞིག་བཟོ་རྒྱུར་འབད་བརྩོན་གནང་དགོས་གལ་ཡིན་པའི་ལམ་སྟོན་བསྩལ་ཡོད། གཞན་ཡང་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་༸གང་ཉིད་མཆོག་ས་ཕྱོགས་གང་དུ་ཕེབས་ཀྱང་རྒྱ་གར་གྱི་མགྲིན་ཚབ་པའི་ངོ་བོའི་ཐོག་ནས་རྒྱ་གར་གྱི་གནས་བོའི་རིག་གནས་ཀྱི་གལ་གནད་དང་། བྱམས་པ། སྙིང་རྗེ། དེ་བཞིན་འཚེ་བ་མེད་པའི་ལྟ་གྲུབ་སོགས་ཀྱི་སྐོར་ལ་བཀའ་སློབ་སྩོལ་བཞིན་ཡོད་པ་སོགས་ངོ་སྤྲོད་མཛད་ཡོད་པ་རེད། གཞི་རྩའི་༸གོང་ས་མཆོག་གི་བཀའ་སློབ་མཛད་རིམ་ཐོག་མངའ་སྡེའི་ཁྲིམས་ཁང་གོང་མའི་ཆེས་མཐོའི་ཁྲིམས་ཞིབ་པ་ཆེ་བ་སྐུ་ཞབས་ Sanjay Karol ལགས་ཀྱིས་གཙོས་པའི་མངའ་སྡེའི་ཁྲིམས་ཁང་གི་ཆེས་མཐོའི་ཁྲིམས་དཔོན་དང་ལྟེ་གནས་ཁང་གི་ཁྲིམས་རྩོད་པ་དང་ལས་བྱེད་སོགས་ཆེད་ཕེབས་གནང་འདུག ༸གོང་ས་༸སྐྱབས་མགོན་ཆེན་པོ་མཆོག་སྐབས་དེའི་མཛད་རིམ་ཁག་གྲུབ་མཚམས་སུ་རྒྱལ་ས་ལྡི་ལིར་ཆིབས་ཞལ་བསྒྱུར་ཡོད་པ་དང་། མགོན་པོ་༸གང་ཉིད་མཆོག་ཉིན་གྲངས་ཁ་ཤས་རིང་ལྡི་ལིར་༸སྐུ་བཞུགས་དང་༸སྐུའི་འཕྲོད་བཞེས་བརྟག་དཔྱད་སོགས་མཛད་དེ་ཕྱི་ཚེས་ ༢༡ ཉིན་བཞུགས་སྒར་དུ་ཕྱིར་ཕེབས་མཛད་ཀྱི་འདུག སྐུ་པར་ཁག་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

འགྲོ་བ་མིའི་ཐོབ་ཐང་ཁྲིམས་རྩོད་པ་ Lin Qilei ལགས་ཀྱིས་ཨ་ཉ་སེང་སྒྲ་ལགས་ལགས་སུ་དྲང་བདེན་གྱི་ཁྲིམས་བཤེར་ཐེངས་གཉིས་པ་ཡོང་སླད་མགོ་ལོག་མི་དམངས་འབྲིང་རིམ་ཁྲིམས་ཁང་ལ་ཞུ་སྐུལ་གནང་འདུག ཟླ་བ་སྔོན་མའི་ནང་མགོ་ལོག་ཁུལ་དགའ་བདེ་རྫོང་མི་དམངས་ཁྲིམས་ཁང་གིས་དོན་མེད་ཟིང་འཁྲུག་དང་སྤྱི་ཚོགས་སྒྲིག་ལམ་ལ་གཏོར་བའི་ཉེས་མིང་འོག་ས་གནས་སྲིད་གཞུང་མི་སྣས་ལྐོག་ཟས་ཀྱི་བྱ་སྤྱོད་ཐེར་འདོན་གནང་མཁན་བོད་མི་ལས་འགུལ་བ་ཨ་ཉ་སེང་སྒྲ་ལགས་ལ་ལོ་བདུན་གྱི་བཙོན་འཇུག་ཁྲིམས་ཐག་དང་དེ་མིན་བོད་མི་གཞན་བརྒྱད་ལའང་ནག་ཉེས་དེའི་འོག་ལོ་བརྒྱད་བར་བཙོན་འཇུག་གི་ཁྲིམས་ཐག་བཅད་ཡོད་པ་ལྟར། ཁ་སང་ཨ་ཉ་སེང་སྒྲ་ལགས་ཀྱི་ཁྲིམས་རྩོད་པས་དབྱིན་ཡུལ་ནང་གི་ Free Tibet ཞེས་བོད་རང་དབང་ཚོགས་པར་འགྲེལ་བརྗོད་གནང་བར་གཞིགས་ན་ཁོང་ཟླ་ ༡ ཕྱི་ཚེས་ ༡༥ ཉིན་གྱི་སྔ་དྲོར་མགོ་ལོག་རྨ་ཆེན་རྫོང་གནམ་ཐང་དུ་འབྱོར་ནས་ཁུལ་དེའི་འབྲིང་རིམ་མི་མང་ཁྲིམས་ཁང་དུ་ཨ་ཉ་སེང་སྒྲ་ལགས་ཐུག་འཕྲད་དང་འབྲེལ་ཁོང་ལ་ཁྲིམས་བཤེར་ཐེངས་གཉིས་པ་ཡོང་སླད་མགོ་ལོག་མཐོ་རིམ་མི་དམངས་ཁྲིམས་ཁང་ལ་ཞུ་སྐུལ་གནང་ཡོད་སྐོར་གསུངས་འདུག ཁྲིམས་རྩོད་པ་ལིན་ཆི་ལི་ལགས་ཀྱིས་སྤྱིར་རྒྱ་གཞུང་གིས་བོད་མི་ཞུ་སྐུལ་བའི་ཐོག་རྡུང་རྡེག་ཚ་ནན་བཏང་ ཡོད་པ་དེ་གསལ་པོ་ཡིན་པ་དང་། ཁོང་ཚོར་དོགས་གཞི་ཅན་གྱི་ཁྲིམས་སྲོལ་འོག་དྲང་བདེན་མིན་པའི་ཁྲིམས་ཐག་བཅད་ཀྱི་ཡོད་པ་རེད། ཨ་ཉ་སེང་སྒྲ་ལགས་སུ་དྲང་བདེན་གྱི་ཁྲིམས་ཐག་གཅད་དགོས་པའི་ཞུ་སྐུལ་གནང་བ་དང་ཆབས་ཅིག ཁོང་གིས་ཁྲིམས་བཤེར་ཐེངས་གཉིས་པ་ཞིག་གནང་ཐུབ་ཀྱང་དེར་དྲང་བདེན་གྱི་ཁྲིམས་ཐག་གཅད་རྒྱུའི་ཐུགས་རེ་དེ་ཙམ་མེད་སྐོར་གསུངས་འདུག གཞི་རྩའི་ཟླ་བ་སྔོན་མའི་ཕྱི་ཚེས་ ༦ ཉིན་མགོ་ལོག་ཁུལ་མི་དམངས་ཁྲིམས་ཁང་གིས་ཨ་ཉ་སེང་སྒྲ་ལགས་སུ་ལོ་བདུན་གྱི་བཙོན་འཇུག་ཐག་བཅད་ཡོད་ཀྱང་ཁོང་གི་ཁྲིམས་རྩོད་པ་ Lin Qilei ལགས་ཀྱིས་རང་ཉིད་ཀྱི་ Twitter ཐོག་ཨ་ཉ་སེང་སྒྲ་ལགས་ནས་ནག་ཉེས་ངོས་ལེན་གནང་མེད་པ་མ་ཟད། མུ་མཐུད་གོང་རིམ་ལ་ཞུ་གཏུག་གནང་རྒྱུའི་ཆོད་སེམས་བརྟན་པོ་ཡོད་པ་གསུངས་ཡོད་པ་རེད། ལྷག་དོན་ཨ་ཉ་སེང་སྒྲ་ལགས་ཀྱིས་གཙོས་པའི་བོད་མི་བརྒྱད་ལ་ལོ་བརྒྱད་བར་བཙོན་འཇུག་ཁྲིམས་ཐག་བཅད་ཡོད་པའི་གནས་ཚུལ་ཐོན་རྗེས་བོད་མི་དང་བོད་དོན་རྒྱབ་སྐྱོར་ཚོགས་པ་འདྲ་མིན་གྱིས་མཉམ་འབྲེལ་བསྒྲགས་གཏམ་འདོན་སྤེལ་གནང་བར་རྒྱ་གཞུང་གིས་དེ་གའི་དཔོན་རིགས་ཀྱིས་ལྐོག་ཟའི་གནད་དོན་ཐེར་འདོན་གནང་མཁན་བོད་མི་འབྲོག་པ་ཨ་ཉ་སེང་སྒྲ་ལགས་ལ་ཉེས་མེད་ཉེས་འཛུགས་ཀྱིས་བཙོན་འཇུག་ཁྲིམས་ཐག་བཅད་པར་སྐྱོན་བརྗོད་ཤུགས་ཆེ་དང་འབྲེལ། གནད་དོན་དེ་ནས་རྒྱ་གཞུང་གིས་རང་གི་ཆོས་དང་རིག་གཞུང་བཅས་ཀྱི་ཐོབ་ཐང་རྩོད་མཁན་བོད་མིའི་ཐོག་དྲག་གནོན་ཇི་ཙམ་བྱེད་ཀྱི་ཡོད་པ་མངོན་གསལ་ཆགས་ཀྱི་ཡོད་པ་གསུངས་ཡོད་པ་རེད།

བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་ཟུར་པ་རྒྱ་རི་སྒྲོལ་མ་མཆོག་གིས་ཁ་སང་རྒྱལ་ས་ལྡི་ལིར་ད་ལྟའི་ཆར་ང་རང་སྲིད་སྐྱོང་གི་འོས་མི་ཞིག་མ་རེད། འོན་ཀྱང་མ་འོངས་པའི་སྲིད་སྐྱོང་ལ་མངོན་འདོད་བྱེད་མཁན་ཞིག་ཡིན་པ་གསུངས་སོང་། འདི་ག་རྒྱ་གར་གྱི་རྒྱལ་ས་ལྡི་ལིའི་ KMC མཐོ་རིམ་སློབ་གཉེར་ཁང་དུ་ཁ་སང་དང་ཁ་ཉིན་བཅས་ཉིན་གྲངས་གཉིས་ཀྱི་རིང་སློབ་གཉེར་ཁང་དེའི་སློབ་ཕྲུག་ཚོགས་པས་གོ་སྒྲིག་འོག་ལོ་རེར་དུས་སྟོན་ཞིག་འཚོགས་ཀྱི་ཡོད་པ་ལྟར་ཁ་སང་ཕྱི་དྲོ་དུས་སྟོན་ཉིན་མཐའ་མའི་ཪོལ་དབྱངས་འདུ་འཛོམས་ཀྱི་མཛད་སྒོའི་སྐུ་མགྲོན་གཙོ་བོར་བཀའ་ཟུར་སྒྲོལ་མ་རྒྱ་རི་མཆོག་གདན་ཞུ་གནང་གདུག་པ་དང་། སྐབས་དེར་སློབ་ཕྲུག་ཚོགས་པས་རྒྱ་རི་སྒྲོལ་མ་མཆོག་ནི་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་ཞིག་ཡིན་པ་མ་ཟད་མ་འོངས་པའི་སྲིད་སྐྱོང་གི་འོས་མི་ཞིག་ཡིན་སྐོར་སོགས་ཀྱི་ངོ་སྤྲོད་གནང་སོང་བར་བཀའ་ཟུར་སྒྲོལ་མ་རྒྱ་རི་མཆོག་གིས་ད་ལྟའི་ཆར་ང་རང་སྲིད་སྐྱོང་གི་འོས་མི་ཞིག་མ་རེད། འོན་ཀྱང་མ་འོངས་པའི་སྲིད་སྐྱོང་ལ་མངོན་འདོད་བྱེད་མཁན་ཞིག་དང་། ལྷག་དོན་ཁྱེད་རང་ཚོའི་རྒྱབ་སྐྱོར་དང་ཁྱད་པར་དུ་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་ཚོར་ཞབས་འདེགས་ཞུ་ཐུབ་པའི་རེ་བ་བྱེད་ཀྱི་ཡོད་ཅེས་སོགས་གསུངས་སོང་། གཞི་རྩའི་ད་ལྟའི་སྐབས་ ༡༥ པའི་བཀའ་ཤག་དང་སྐབས་ ༡༦ པའི་སྤྱི་འཐུས་བཅས་ཀྱི་ལས་ཡུན་དེ་ ༢༠༢༡ ལོར་ཚང་འགྲོ་ཡི་ཡོད་ཀྱང་། བཙན་བྱོལ་བོད་མིའི་འོས་བསྡུ་ཆེན་མོའི་ལས་རིམ་ཁག་ ༢༠༢༠ ལོ་འཇུག་ནས་དབུ་འཛུགས་གནང་གི་ཡོད་པ་ལྟར། སྤྱི་ཚོགས་ནང་ད་ལྟ་ནས་སྲིད་སྐྱོང་གི་འོས་མི་འདོན་ཕྱོགས་དང་འབྲེལ་བའི་བགྲོ་གླེང་མུ་མཐུད་གནང་དང་གནང་བཞིན་པའི་ཁྲོད་འདིར་བཀའ་ཟུར་རྒྱ་རི་སྒྲོལ་མ་མཆོག་ནི་ད་ལྟའི་ཆར་ཡོངས་གྲགས་སུ་སྲིད་སྐྱོང་ལ་མངོན་འདོད་ཡོད་གསུང་མཁན་འོས་མི་ཆེས་ཐོག་མ་དེ་ཆགས་ཀྱི་ཡོད་པ་རེད། Kirori Mal མཐོ་རིམ་སློབ་ཕྲུག་གི་དུས་སྟོན་ཐོག་ནང་སྲིད་བཀའ་ཟུར་མཆོག་ལ་མཐོ་རིམ་སློབ་གྲྭའི་སློབ་ཕྲུག་རྣམས་ལ་བཙན་བྱོལ་ནང་གི་བོད་མིའི་གནས་སྟངས་ངོ་སྤྲོད་གནང་ཆེད་གདན་ཞུ་ཕུལ་བ་ཞིག་ཡིན་པ་ལྟར་རོལ་དབྱངས་འདུ་འཛོམས་ཐོག་བཅར་བའི་སློབ་ཕྲུག་ཚོར་བཀའ་ཟུར་མཆོག་གིས་སློབ་ཕྲུག་ཁྱེད་རང་ཚོ་དཀའ་ངལ་རྩ་བ་ནས་མེད་པར་རང་དབང་ལུང་པ་ཞིག་ཏུ་སྐྱེས་པའི་རིན་ཐང་དང་བསོད་ནམས་དེ་ངོས་འཛིན་ཐུབ་པ་ཞིག་བྱེད་དགོས་པ་དང་། ལྷག་པར་དུ་ལོ་རྒྱུས་སུ་རྒྱ་གར་གྱི་ངོས་ནས་སོ་སོའི་ཁྱིམ་མཚེས་རྒྱལ་ཁབ་ཚོར་བཙན་འཛུལ་བྱས་པ་སོགས་ཀྱི་ལོ་རྒྱུས་མེད་པ་མ་ཟད། དཀའ་ངལ་ཡོད་པའི་རྒྱལ་ཁབ་ཚོར་རྒྱབ་སྐྱོར་གནང་མཁན་ཞིག་ཡིན་པ་བཞིན་ཕྱི་ལོ་ ༡༩༥༩ ལོར་བོད་ལ་ཆབ་སྲིད་ཀྱི་དཀའ་ངལ་འཕྲད་རྐྱེན་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མི་མང་པོ་ཞིག་རྒྱ་གར་དུ་བཙན་བྱོལ་ལ་ཕེབས་ཡོད་པ་དང་། ད་ལྟ་བར་ལོ་ངོ་ ༦༠ ཕྱིན་པའི་ལོ་རྒྱུས་ནང་བོད་ཀྱི་ཆབ་སྲིད་གནས་སྟངས་ལ་འགྱུར་བ་ཕྱིན་མེད་པར་བོད་མི་ཚོར་དཀའ་ངལ་མུ་མཐུད་འཕྲད་བཞིན་པ་སོགས་ཀྱི་གནད་དོན་ངོ་སྤྲོད་གནང་བ་དང་འབྲེལ་རྒྱ་གར་བ་ཚོས་བོད་དོན་ཐོག་རྒྱབ་སྐྱོར་གནང་དགོས་པའི་སྐུལ་མ་སོགས་ཀྱང་གནང་ཡོད་པ་རེད།

ཨ་རིའི་གྲོས་ཚོགས་གོང་འོག་གཉིས་ཀྱི་ནང་ཆབ་སྲིད་ཚོགས་པ་དབྱེ་མེད་ཀྱི་གྲོས་ཚོགས་འཐུས་མིས་རྒྱབ་སྐྱོར་གནང་རྗེས་ཕྱི་ལོ་ ༢༠༡༨ ཟླ་ ༡༢ ནང་ཨ་རིའི་སྲིད་འཛིན་གྱིས་མཚན་རྟགས་བསྐྱོན་ཏེ་གཏན་འབེབས་གནང་བ་ Reciprocal Access to Tibet Act ཞེས་བོད་ནང་འདྲ་མཉམ་འགྲུལ་བསྐྱོད་ཀྱི་ཐོབ་ཐང་དགོས་པའི་ཁྲིམས་གཞི་དེའི་ཁྲོད་ཨ་རིའི་ཕྱི་སྲིད་ལས་ཁུངས་ཀྱིས་ཨ་རིའི་གཞུང་འབྲེལ་མི་སྣ་དང་གསར་འགོད་པ། དེ་བཞིན་མི་སེར་རྣམས་བོད་ནང་འགྲུལ་བསྐྱོད་གནང་བར་བཀག་སྡོམ་བྱེད་མཁན་རྒྱ་ནག་དཔོན་རིགས་ཚོའི་མིང་ཐོ་དང་བཅས་པའི་བོད་དོན་སྙན་ཐོ་ཞིག་ལོ་གཅིག་གི་མཚམས་སུ་གྲོས་ཚོགས་སུ་འགོད་འབུལ་ཞུ་དགོས་པ་ལྟར། ཟླ་བ་སྔོན་མར་ཕྱི་སྲིད་ལས་ཁུངས་ནས་སྙན་ཐོ་དེ་གྲོས་ཚོགས་སུ་འགོད་འབུལ་ཞུ་དུས་རན་ཡོད་ཀྱང་ད་བར་དེ་ལྟར་ཕུལ་མེད་སྐོར་ཐེར་འདོན་གནང་འདུག དེ་རིང་ཕྱི་ཚེས་ ༡༨ ཉིན་ལྷོ་རྒྱ་ནག་སྔ་དྲོའི་ཆ་འཕྲིན་གྱིས་ཨ་རིའི་གྲོས་ཚོགས་ཀྱི་གནས་ཚུལ་ཡོང་ཁུངས་གསུམ་ཙམ་ལུང་འདྲེན་དང་འབྲེལ་གནས་ཚུལ་སྤེལ་བར་སྲིད་འཛིན་ Trump གྱི་གཞུང་འཛིན་ནས་འགྲོ་བ་མིའི་ཐོབ་ཐང་གི་གནད་དོན་ཐད་རྒྱ་ནག་ལ་གནོན་ཤུགས་སྤྲད་རྒྱུའི་ཐོག་སླེབས་སྐབས་ཧ་ཅང་ལྷོད་ཡངས་ཀྱི་རྣམ་པ་སྟོན་བཞིན་ཡོད་པའི་ཁྲོད། ད་ལྟའི་ཆར་ཨ་རིའི་གྲོས་ཚོགས་གོང་འོག་གཉིས་ཀྱི་ནང་ཆབ་སྲིད་ཚོགས་པ་དབྱེ་མེད་ཀྱི་གྲོས་ཚོགས་འཐུས་མི་རྣམས་ནས་དེར་བློ་འཚབ་དང་འབྲེལ་ཨ་རིའི་གཞུང་ལ་བོད་ནང་འདྲ་མཉམ་འགྲུལ་བསྐྱོད་ཀྱི་ཁྲིམས་འཆར་དང་འབྲེལ་སྙན་ཐོ་དེ་འདོན་སྤེལ་གནང་རྒྱུར་གནོན་ཤུགས་སྤྲོད་བཞིན་ཡོད་པ་རེད་འདུག གསར་ཤོག་དེས་ད་དུང་ཨ་རིའི་ཕྱི་སྲིད་ལས་ཁུངས་ཀྱིས་ཕྱི་ལོ་ ༢༠༡༨ ཕྱི་ཟླ་ ༣ པ་ནང་འདོན་སྤེལ་གནང་བའི་སྙན་ཐོར་ལོ་དེར་ཨ་རིའི་གཞུང་འབྲེལ་མི་སྣ་ ༩ ཡི་བོད་ནང་བསྐྱོད་རྒྱུའི་ཆོག་མཆན་ཞུས་ཡོད་ཀྱང་། རྒྱ་གཞུང་གིས་རྒྱ་ནག་ནང་གི་ཨ་རིའི་གཞུང་ཚབ་པ་ Terry Branstad  ལགས་ཀྱིས་གཙོས་པའི་གཞུང་འབྲེལ་མི་སྣ་ ༥ ལ་མཐོང་མཆན་སྤྲད་མེད་པའི་གནས་ཚུལ་ཐོན་ཡོད་པ་ལུང་འདྲེན་གནང་བ་མ་ཟད། སྤྱིར་དེ་སྔ་ཨ་རིའི་གཞུང་འཛིན་རིམ་པས་གྲོས་ཚོགས་སུ་འགོད་འབུལ་ཞུ་དགོས་པའི་སྙན་ཐོ་ཁག་དུས་འགྱངས་བྱས་པའི་གནད་དོན་བྱུང་མྱོང་ཡོད་ཀྱང་། འདས་ལོའི་ནང་ད་ལྟའི་གཞུང་འཛིན་གྱི་སྲིད་འཛིན་གཞོན་པ་ Mike Pence ལགས་གཙོས་ཨ་རིའི་སྲིད་གཞུང་གི་གནད་ཡོད་མི་སྣ་རྣམས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་སྐྱོན་བརྗོད་ཀྱི་གཏམ་བཤད་རིགས་གནང་རྒྱུ་ཕྱིར་འཐེན་དང་དུས་འགྱངས་བྱས་པ། རྒྱ་གཞུང་གིས་ Xinjiang ཡུ་གུར་མང་ཚོགས་ཐོག་ཉེས་ཆད་གཏང་རྒྱུའི་གསལ་བསྒྲགས་ཕྱིར་འགྱར་བྱས་པ། དེ་བཞིན་ཕྱི་སྲིད་ལས་ཁུངས་ཀྱི་བོད་དོན་དམིགས་གསལ་སྐུ་ཚབ་ཀྱི་ས་དམིགས་ད་ལྟའང་སྟོང་པ་བཞག་པ། ལྷག་པར་དུ་ད་ལྟའི་གཞུང་འཛིན་པ་རྣམས་ཀྱིས་རྒྱལ་ཁབ་ཀྱི་བདེ་སྲུང་དང་ཕྱི་འབྲེལ་སྲིད་བྱུས་ཐད་ཕྱི་གསལ་ནང་གསལ་དེ་ཙམ་གནང་གི་མེད་པས་གནད་དོན་དེ་དག་ཐོག་གྲོས་ཚོགས་ཀྱི་སྐུ་དབང་ལ་བརྩི་བཀུར་ཞུ་གནང་གི་མེད་པ་བཅས་ལ་བརྟེན་ནས་ཨ་རིའི་གྲོས་ཚོགས་གོང་འོག་གཉིས་ཀྱི་ནང་དུ་བོད་དོན་ཁྲིམས་འཆར་དང་འབྲེལ་བའི་སྙན་ཐོ་དུས་ཐོག་ཏུ་འགོད་འབུལ་ཞུ་རྒྱུར་ཐུགས་སྣང་དང་གནོན་ཤུགས་སྤྲོད་བཞིན་ཡོད་པ་རེད་འདུག རྒྱལ་ས་ Washington DC ནང་དུ་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འཛིན་སྐུ་ཞབས་ Matteo Meccaci ལགས་ཀྱིས་བོད་ནང་འདྲ་མཉམ་འགྲུལ་བསྐྱོད་ཀྱི་ཁྲིམས་འཆར་དེ་ལག་བསྟར་གནང་མིན་དང་འབྲེལ་ཏེ་ཨ་རིའི་གཞུང་འཛིན་གྱི་ངོས་ནས་ཚོང་འབྲེལ་ཁེ་ཕན་ལས་ལྷག་པའི་འགྲོ་བ་མིའི་ཐོབ་ཐང་གི་གནས་སྟངས་དང་སྒོས་འདྲ་མཉམ་འགྲུལ་བསྐྱོད་ཀྱི་ཁྲིམས་འཆར་དེར་དོན་དམ་གྱི་ཐུགས་འཁུར་བཞེས་ཀྱི་ཡོད་མེད་ཚོད་ལྟ་ལྟ་བུ་ཞིག་ཆགས་ཡོད་པ་གསུངས་འདུག རྩ་བའི་རྒྱལ་སྤྱིའི་བོད་དོན་ལས་འགུལ་ཁང་གིས་ཕྱི་ཟླ་ ༡༢ ཚེས་ ༡༠ སྟེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་ནས་ལོ་ངོ་ ༣༠ འཁོར་བའི་དུས་ཚིགས་ཐོག་གོ་སྒྲིག་ཞུས་པའི་མཛད་སྒོར་ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་ཨ་རིའི་ཕྱི་སྲིད་ལས་ཁུངས་ཀྱིས་བོད་ནང་འདྲ་མཉམ་འགྲུལ་བསྐྱོད་ཀྱི་ཁྲིམས་འཆར་དང་འབྲེལ་བའི་སྙན་ཐོ་འདོན་སྤེལ་གནང་རན་ཡོད་སྐོར་གསུངས་ཡོད་པ་རེད། ལྷོ་རྒྱ་ནག་སྔ་དྲོའི་ཆ་འཕྲིན་གྱིས་དེང་སྐབས་ཨ་རི་དང་རྒྱ་ནག་གཉིས་དབར་ཚོང་གི་འབྲེལ་ལམ་ཡག་པོ་མེད་པའི་གནས་སྟངས་ཁྲོད་ཉེ་ཆར་ Trump སྲིད་གཞུང་གིས་རྒྱ་ནག་དང་ལྷན་དུ་ཚོང་འབྲེལ་བསྐྱར་གསོ་བྱེད་རྒྱུའི་གན་རྒྱ་རིམ་པ་དང་པོ་དེ་བཞག་ཡོད་པ་ལྟར། ཨ་རི་གཞུང་གིས་སྙན་ཐོ་གྲོས་ཚོགས་སུ་འགོད་འབུལ་ཞུ་དབང་དུ་བཏང་ཡང་། སྙན་ཐོ་བཞེས་མཁན་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་དང་འགྲོ་བ་མིའི་ཐོབ་ཐང་ཚོགས་ཆུང་སོགས་ཀྱི་སྙན་ཐོ་དེའི་ཁོངས་ནས་གང་ཙམ་ཞིག་ཡོངས་གྲགས་གནང་མིན་དེའང་ད་ལྟའི་ཆར་ཚོད་དཔག་གནང་དཀའ་བའི་གནས་ཡིན་པ་གསུངས་འདུག རྩ་བའི་ཨ་རིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གཙོས་ཚོགས་ཆུང་བཞིའིསྙན་ཐོ་དེ་ངོས་བཞེས་གནང་རྗེས་སྙན་ཐོ་དེ་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཚོགས་ཚུང་ལ་ཕུལ་གནང་གི་ཡོད་པ་རེད།

དེ་རིང་ཕྱི་ལོ་ ༢༠༢༠ ཟླ་ ༡ ཚེས་ ༡༧ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་གྱི་མཛད་འཕྲིན་ཁག་ཡོངས་སུ་ལེགས་གྲུབ་ཀྱིས་བྷི་ཧཱར་གྱི་རྒྱལ་ས་པ་ཊ་ནར་ཆིབས་༸ཞལ་མ་བསྒྱུར་བའི་སྔོན་དུ་མཆོད་རྟེན་རིན་པོ་ཆེར་གནས་གཟིགས་མཛད་དེ་བདག་ཅག་གི་སྟོན་པ་ཤཱཀྱ་ཐུབ་པའི་སྐུ་བརྙན་རིན་པོ་ཆེར་ཐུགས་སྨོན་མཛད་ཡོད་པ་དང་། སྐབས་དེར་མགོན་པོ་༸གང་ཉིད་མཆོག་ནས་ཕྱི་ནང་གི་གསར་འགོད་པའི་བཀའ་འདྲི་དང་ལེན་གྱིས་བདེ་སྐྱིད་ཀྱི་རྩ་བ་ནི་སེམས་པ་བཟང་པོ་བྱེད་རྒྱུ་ཡིན་པ་དང་ད་ཆ་ཚན་རིག་མཁས་པ་ཚོས་འགྲོ་བ་མིའི་གཞི་རྩའི་རང་བཞིན་དེ་བྱམས་པ་ཡིན་པ་སྒྲུབ་བཞིན་ཡོད་སྟབས། ཆོས་དད་དང་ཡིད་ཆེས་ཡོད་མེད་ལ་བལྟོས་མེད་ཚང་མས་སེམས་པ་བཟང་པོ་བྱེད་རྒྱུར་དོ་སྣང་གནང་གལ་ཡིན་པར་ལམ་སྟོན་མཛད་ཡོད་པ་རེད། མགོན་པོ་༸གང་ཉིད་མཆོག་གིས་ནང་པ་སངས་རྒྱས་པའི་ཆོས་སྤྱི་དང་ལྷག་པར་དུ་དཔལ་ནཱ་ལེནྡཱ་ནས་བརྒྱུད་པའི་རིག་གནས་དེ་དག་དད་པ་རྐྱང་པའི་ཐོག་ནས་བྱེད་རྒྱུ་མིན་པར་རིགས་པའི་ལམ་ནས་དཔྱད་རྒྱུ་ཡོད་པ་དང་། དེང་གི་གོ་ལའི་ཐོག་ཚན་རིག་དང་དཔུང་པ་མཉམ་གཤིབས་འགྲོ་ཐུབ་མཁན་གྱི་ཆོས་གཅིག་པོ་དེ་ཆགས་ཡོད་པ་བཀའ་བསྩལ་འདུག བྱང་ཆུབ་མཆོད་རྟེན་དྲུང་དུ་གནས་གཟིགས་གྲུབ་མཚམས་སུ་༸གོང་ས་མཆོག་མཁའ་ལམ་བརྒྱུད་བྷི་ཧཱར་གྱི་རྒྱལ་ས་པ་ཊ་ནར་ཆིབས་བསྒྱུར་མཛད་ཡོད་པ་ལྟར། མགོན་པོ་༸གང་ཉིད་མཆོག་ཆུ་ཚོད་ ༡༡ ཡོལ་ཙམ་ལ་རྒྱལ་ས་པ་ཊའི་གནམ་ཐང་དུ་༸ཞབས་སོར་བདེ་བར་འཁོད་སྐབས་བོད་མི་གཙོས་པའི་ས་གནས་ཀྱི་དད་ལྡན་མང་ཚོགས་རྣམས་ནས་དགའ་དད་སྤྲོ་གསུམ་གྱི་སྒོ་ནས་ཕེབས་བསུ་གཟབ་རྒྱས་ཞུས་འདུག ཉིན་དགུང་གི་ལྗགས་སྨིན་དེ་བཞིན་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་དང་ལྷན་བཞེས་གནང་སྟེ་ཆུ་ཚོད་གཅིག་ཙམ་རིང་བཀའ་མོལ་གནང་བ་མ་ཟད། མགོན་པོ་༸གང་ཉིད་མཆོག་གིས་སྤྱི་ཁྱབ་བློན་ཆེན་མཆོག་གི་ཕྱག་ལས་རྣམས་ལམ་ལྷོངས་ཡོང་རྒྱུར་ཐུགས་སྨོན་སླད་ཆོས་ཀྱི་འཁོར་ལོའི་༸སྐུ་བརྙན་ཞིག་ཕྱག་རྟགས་སུ་གསོལ་བསྩལ་དང་། སྤྱི་ཁྱབ་བློན་ཆེན་མཆོག་ནས་མགོན་པོ་༸གང་ཉིད་མཆོག་ལ་བདག་ཅག་གི་སྟོན་པའི་༸སྐུ་བརྙན་ཞིག་ཕུལ་འདུག མཛད་འཆར་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་དེ་རིང་པ་ཊ་ནར་༸སྐུ་ཞུགས་མཛད་དེ་སང་ཉིན་སྔ་ཐོག་ཁུལ་དེར་རྟེན་གཞི་བྱས་པའི་ཁྲིམས་ལུགས་རིག་པའི་སློབ་གཉེར་ཁང་དུ་བཀའ་སློབ་བཀའ་དྲིན་བསྩལ་རྒྱུ་དང་དེ་རྗེས་མཁའ་ལམ་བརྒྱུད་རྒྱལ་ས་ལྡི་ལིར་ཆིབས་༸ཞལ་བསྒྱུར་གནང་མཛད་ཀྱི་ཡོད་པ་རེད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་ ༡༢ ཚེས་ ༢༤ ཉིན་གནས་མཆོག་རྡོ་རྗེ་གདན་དུ་༸ཞབས་སོར་བདེ་བར་འཁོད་པ་ནས་བཟུང་སྟེ་ཁུལ་དེའི་དུས་འཁོར་ཐང་ཆེན་དུ་དད་ལྡན་སྟོང་ཚོ་བརྒལ་བར་ཉིན་གྲངས་དྲུག་གི་རིང་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མ་དང་སྤྱན་རས་གཟིགས་དང་སྒྲོལ་དཀར་གྱི་བཀའ་དབང་། དེ་བཞིན་འདི་ལོའི་མགོ་སྟོད་གནས་མཆོག་རྡོ་རྗེ་གདན་དུ་བསྩལ་བའི་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་འཕྲོ་སྐྱོང་བཅས་བཀའ་དྲིན་བསྐྱངས་ཡོད་པ་རེད།བཀའ་ཆོས་ཀྱི་མཛད་འཕྲིན་ཡོངས་རྫོགས་ལེགས་པར་བསྐྱངས་གྲུབ་པའི་རྗེས་སུའང་ཁུལ་དེར་༸སྐུ་བཞུགས་མཛད་རིང་ལ་ལྷོ་ཤར་ཨེ་ཤ་ཡའི་དད་ལྡན་ཆོས་ཞུ་བ་གཙོས་པའི་འཛམ་གླིང་ཤར་ནུབ་བཅས་ཕྱོགས་མཐའ་གང་སར་ནས་བཅར་བའི་དད་ལྡན་མང་ཚོགས་ལ་ཐུགས་བརྩེ་བ་ཆེན་པོས་མཇལ་ཁ་དང་བཀའ་སློབ་བསྩལ་བ། དེ་བཞིན་ཁ་ཉིན་ཕྱི་ཚེས་ ༡༤ ཉིན་གྷ་ཡ་རྫོང་ཁོངས་སུ་ཆགས་པའི་ Indian Institute of Management ཞེས་རྒྱ་གར་གྱི་ཚོང་ལས་འཛིན་སྐྱོང་སློབ་གཉེར་ཁང་གི་དགེ་ལས་སློབ་ཕྲུག་རྣམས་ལ་རྒྱ་གར་གྱི་གནའ་བོའི་རིག་གནས་སྐོར་ལ་བཀའ་སློབ་ལམ་སྟོན་བསྩལ་ཡོད་པ་རེད། ༸སྐུ་པར་ཁག་༸དཔལ་ལྡན་དགའ་ལྡན་ཕོ་བྲང་ཡིག་ཚང་།