༸གོང་ས་མཆོག

ནུབ་ཕྱོགས་རྒྱལ་ཁབ་ཁག་ཏུ་དྲན་པ་ཉེར་ཞག་ཐོག་མར་ངོ་སྤྲོད་གནང་མཁན་ཞིག་ཏུ་ཡོང་གྲགས་ངོས་འཛིན་མཛད་པའི་ཝེ་ཏི་ནམ་གྱི་ནང་པའི་སློབ་དཔོན་ Thich Nhat Hanh མཆོག་དགུང་གྲངས་ ༩༥ ཐོག་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་གོང་ས་མཆོག་གིས་ཐུགས་ཕམ་མཛད་པ་དང་སྦྲགས། དམ་པ་དེ་ཉིད་ལ་བཀའ་དྲིན་རྗེས་དྲན་ལེགས་ཤོས་དེ་ནི་ཁོང་གིས་ད་བར་འཛམ་གླིང་ཞི་བདེའི་སླད་རླབས་ཆེན་གྱི་ཕྱག་ལས་མཛད་པ་དེ་མུ་མཐུད་མཇུག་སྐྱོང་གནང་རྒྱུ་དེ་ཡིན་པར་བཀའ་སྩལ་འདུག དེ་རིང་བརྒྱུད་ལམ་ཁག་ཏུ་སློབ་དཔོན་ཁོང་དགོངས་པ་རྫོགས་པའི་གནས་ཚུལ་ཐོན་མ་ཐག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་ཐུགས་གསོའི་གསུང་འཕྲིན་ཞིག་སྩལ་བའི་ནང་དུ་སློབ་དཔོན་ Thich Nhat Hanh མཆོག་ལ་གང་ཉིད་ཀྱི་མཛའ་གྲོགས་དང་ཆོས་སྤུན་དུ་འགྲེལ་བརྗོད་མཛད་དེ་ཁོང་དགོངས་པ་རྫོགས་པར་ཧ་ཅང་ཐུགས་ཕམ་བྱུང་བར་བཀའ་སྩལ་བ་དང་ཆབས་ཅིག འཛམ་གླིང་ཡོངས་དང་སྒོས་སུ་ཝེ་ཏི་ནམ་ནང་གནས་པའི་དམ་པ་དེ་ཉིད་ཀྱི་རྗེས་འབྲངས་བ་ཡོངས་ལ་ཐུགས་གསོ་མཛད་འདུགགོང་ས་མཆོག་གིས་གསུང་འཕྲིན་ནང་། སློབ་དཔོན་དམ་པ་དེ་ཉིད་ཀྱིས་ཝེ་ཏི་ནམ་གི་དམག་ལ་ཁ་གཏད་དང་། ཨ་རིའི་མི་རིགས་ནག་པོའི་སྤྱི་དམངས་ཀྱི་ཐོབ་ཐང་རྩོད་ལེན་པ་སྐུ་ཞབས་ Martin Luther King མཆོག་ལ་རྒྱབ་སྐྱོར། ལྷག་པར་དྲན་པ་ཉེར་བཞག་དང་བྱམས་བརྩེའི་སྒོ་ནས་ནང་སེམས་ཀྱི་ཞི་བདེ་ཙམ་མ་ཟད། འཛམ་གླིང་ཀུན་ལ་དོན་དམ་གྱི་ཞི་བདེ་སྐྲུན་ཐུབ་པའི་ཡོན་ཏན་གཞན་ལ་སྤེལ་བ་བཅས་ཀྱི་རླབས་ཆེན་གྱི་མཛད་རྗེས་དག་ལ་གཞིགས་ཚེ། ཁོང་གིས་དོན་དམ་པའི་མི་ཚེ་ཞིག་སྐྱེལ་ཡོད་པར་བཀའ་གནང་པ་དང་འབྲེལ། དམ་པ་དེ་ཉིད་ལ་བཀའ་དྲིན་རྗེས་དྲན་ལེགས་ཤོས་དེ་ནི་ཁོང་གིས་ད་བར་འཛམ་གླིང་ཞི་བདེའི་སླད་རླབས་ཆེན་གྱི་ཕྱག་ལས་མཛད་པ་དེ་མུ་མཐུད་མཇུག་སྐྱོང་གནང་རྒྱུ་དེ་ཡིན་པར་བཀའ་སྩལ་འདུགགཞི་རྩའི་ཝེ་ཏི་ནམ་གྱི་ནང་པའི་སློབ་དཔོན་ཆེན་པོ་Thich Nhat Hanh མཆོག་ཕྱི་ལོ་ ༡༩༦༠ རེ་གྲངས་ནང་ཝེ་ཏི་ནམ་གྱི་དམག་ལ་ཁ་གཏད་ངོ་རྒོལ་གནང་བའི་རྐྱེན་གྱིས་ལོ་མང་རིང་ཧྥ་རན་སིའི་ནང་བཙན་བྱོལ་དུ་བཞུགས་མྱོང་ཡོད་པ་དང་། མི་རིགས་ནག་པོའི་སྤྱི་དམངས་ཐོབ་ཐང་རྩོད་ལེན་པ་སྐུ་ཞབས་ Martin Luther King མཆོག་གིས་ཁོང་ནོ་སྦེལ་ཞི་བདེའི་གཟེངས་རྟགས་ཀྱི་འོས་མིར་མཚན་འདོན་གནང་མྱོང་ཡོད་པ་རེད།ཁོང་གིས་འཛམ་གླིང་ཡོངས་ལ་དགོན་སྡེ་ཁག་དང་། Plum village tradition ཞེས་པའི་འོག་སྒོམ་སྒྲུབ་ཚོགས་པ་འདྲ་མིན་ཆེད་བཙུགས་གནང་བ་དང་ད་བར་ཕྱག་དེབ་༡༠༠ ལྷག་འདོན་སྤེལ་གནང་མྱོད་པ་རེད། ཝེ་ཊི་ནམ་གཞུང་གིས་བཀའ་ཁྲོལ་འོག་སློབ་དཔོན་ཆེན་མོ་དམ་པ་དེ་ཉིད་ཕྱི་ལོ་༢༠༠༥ ལོར་རང་ཡུལ་དུ་ཆེད་ཕེབས་གནང་ཐུབ་པ་དང། ༢༠༡༨ ལོར་གཏན་དུ་ཕྱིར་ལོག་གིས་Hueཁུལ་དུ་རྟེན་གཞི་བྱས་པའི་Tu Hieu དགོན་པའི་ནང་དེ་རིང་དགོངས་པ་མ་རྫོགས་བར་དུ་སྐུ་བཞུགས་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས། ཁ་སང་ལྕམ་ Roberta Metsola མཆོག་ཡུ་རོབ་གྲོས་ཚོགས་ཀྱི་ཚོགས་གཙོར་བདམས་ཐོན་བྱུང་བར་དགའ་བསུའི་འཚམས་འདྲི་དང་སྦྲགས། ཁོང་གི་ལས་དོན་མཐའ་དག་གེགས་མེད་ལྷུན་འགྲུབ་ཡོང་བའི་སྨོན་འདུན་མཛད་འདུག དེ་རིང་༸གོང་ས་སྐྱབས་མགོན་ཆེན་པོ་མཆོག་གིས། ལྕམ་ Metsola མཆོག་གིས་མཚན་ཐོག་ལ་ཕྱག་བྲིས་ཤིག་སྩལ་བའི་ནང་དུ། ལྕམ་སྐུ་ཁོང་ལ་དགའ་བསུའི་འཚམས་འདྲི་མཛད་པ་དང་འབྲེལ། མགོན་པོ་མཆོག་དེ་སྔ་ཡུ་རོབ་གྲོས་ཚོགས་ནང་དུ་ཆིབས་བསྒྱུར་མཛད་པ་ཐུགས་དྲན་གསོ་དང་སྦྲགས། ཡུ་རོབ་གྲོས་ཚོགས་ནས་མགོན་པོ་གང་ཉིད་དང་བོད་མི་རྣམས་ལ་རྒྱབ་སྐྱོར་དང་མཐུན་འགྱུར་གནང་བར་ཐུགས་རྗེ་ཆེ་ཞུས་མཛད་འདུགལྷག་པར་དུ་༸གོང་ས་མཆོག་གིས། རང་ལོ་ ༤༣ ཡིན་པའི་ལྕམ་Roberta Metsola ཁོང་ད་བར་གྱི་ཚོགས་གཙོ་སྐུ་ན་ཆུང་ཤོས་དེ་ཆགས་ཀྱི་ཡོད་པ་དང་ཡུ་རོབ་གྲོས་ཚོགས་ཀྱི་བུད་མེད་ཚོགས་གཙོ་ཐེངས་གསུམ་པ་དེ་ཆགས་ཀྱི་ཡོད་པ་དང་འབྲེལ། གོང་ས་མཆོག་གང་ཉིད་ཀྱི་ངོས་ནས་སྐྱེས་པ་ཚོ་དང་བསྡུར་ན་བུད་མེད་རྣམས་གཞན་ལ་ཕན་བདེ་བསྒྲུབ་རྒྱུ་དང་སེམས་ཁུར་ལེན་རྒྱུའི་ནུས་པ་ཆེ་བ་ཡོད་པར་བརྟེན་ཞི་བའི་ཐོག་ནས་འཛམ་གླིང་སྣེ་ཁྲིད་ཐུབ་རྒྱུར་བུད་མེད་རྣམས་ལེགས་པོ་ཡོད་པར་ངོས་འཛིན་མཛད་ཀྱི་ཡོད་པ་བཀའ་གནང་འདུག དེ་བཞིན་གོང་ས་མཆོག་གིས་གང་ཉིད་ནི་དུས་རྟགས་ཏུ་ཕན་ཚུན་བསམ་ཤེས་དང་། མཉམ་འབྲེལ། རྒྱལ་ཁབ་ཕན་ཚུན་གུས་བརྩི་ཞུ་དགོས་པར་ཡིད་ཆེད་མཛད་མཁན་ཞིག་ཡིན་པའི་ཆ་ནས། ཡུ་རོབ་མཐུན་ཚོགས་འདི་བཞིན་ཞི་བདེ་མཉམ་གནས་དང་མཉམ་ལས་ཀྱི་དཔེ་མཚོན་བཟང་ཤོས་དེ་ཡིན་སྐོར་ནན་བརྗོད་དང་སྦྲགས། དཀའ་རྙོག་གིས་ཁེངས་བའི་འཛམ་གླིང་འདིའི་ཁྲོད་ཕུགས་རྒྱང་རིང་པོའི་བསམ་བློ་ཡོད་མཁན་གྱི་འགོ་ཁྲིད་ཧ་ཅང་མཁོ་བའི་སྐབས་འདིར། མགོན་པོ་གང་ཉིད་མཆོག་ནས་འགྲོ་བ་མིའི་རིགས་ཀྱི་རྙོག་གླེང་ཡོངས་རྫོགས་དོན་དམ་གྱི་གྲོས་མོལ་དང་འཆམ་མཐུན་གྱི་བསམ་བློའི་ཐོག་ནས་སེལ་ཐུབ་རྒྱུ་ཡིན་པར་ངོས་འཛིན་མུ་མཐུད་མཛད་བཞིན་ཡོད་པ་བཀའ་གནང་སྟེ། གང་ཉིད་ཀྱིས་དེ་སྔ་ཕྱི་ལོ་ ༡༩༨༨ ལོར་ཆོད་སེམས་དེ་ག་རང་གི་ཐོག་ནས་ཡུ་རོབ་གྲོས་ཚོགས་ནང་དུ་རྒྱ་ནག་གི་འགོ་ཁྲིད་དང་ལྷན་ཕན་ཚུན་གཉིས་ཕན་གྱི་ཐོག་ནས་བོད་ཀྱི་གནད་དོན་སེལ་རྒྱུའི་དགོངས་འཆར་ཕུལ་ཡོད་པ་དང་། ༸གོང་ས་མཆོག་གིས་སྐབས་དེར་། ཕྱོགས་ཚང་མར་འདོད་བློ་ཁེངས་བའི་ཁེ་ཕན་ཞིག་ཡོད་ན་མ་གཏོགས་དོན་དམ་གྱི་གྲོས་མཐུན་ཡོང་ཤེས་ཐབས་མེད་པའི་དགོངས་གཞི་གཙོར་བཟུང་ཐོག་ཡུ་རོབ་གྲོས་ཚོགས་ཀྱི་གླེང་སྟེགས་དེ་ཆེད་མངགས་བདམས་གནང་ཡོད་པར་བཀའ་མཛད་འདུག

༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་ཟུར་པ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་གསུང་རྩོམ་སྟེ། དབྱིན་སྐད་དུ་ The Dalai Lama's Special Envoy, Memoirs of a Lifetime in Pursuit of a Reunited Tibet ༧ཏཱ་ལའི་བླ་མའི་དམིགས་བསལ་སྐུ་ཚབ། བོད་ས་ཡོངས་རྫོགས་གོང་བུ་གཅིག་ཏུ་བསྒྲིལ་རྒྱུའི་ཐོག་སྐུ་ཚེ་ཧྲིལ་པོ་འབད་བརྩོན་གནང་བའི་སྐུ་ཚེའི་ལོ་རྒྱུས། ཞེས་ཤོག་གྲངས་ ༧༢༠ ཅན་གྱི་ཕྱག་དེབ་དེ་ཕྱི་ལོ་ ༢༠༢༢ ལོའི་ཕྱི་ཟླ་ ༡༠ ནང་ཨ་རིར་རྟེན་གཞི་བྱས་པའི་ columbia university Press ཡིས་འདོན་སྤེལ་གནང་འཆར་ཡོད་པ་རེད་འདུག ཨ་རིར་རྟེན་གཞི་བྱས་པའི་ columbia university ཡི་འདི་གའི་དྲྭ་གནས་ཐོག་རིམ་པོ་དམ་པ་དེ་ཉིད་ཀྱི་གསུང་རྩོམ་ཕྱག་དེབ་དེའི་སྐོར་ངོ་སྤྲོད་གནང་བའི་ནང་། རྒྱ་རི་བློ་གྲོས་རྒྱལ་མཚན་དམ་པ་དེ་ཉིད་ནི་༸གོང་ས་མཆོག་གི་དབུས་བོད་དང་བོད་མིའི་རྩ་དོན་སླད་སྐུ་ཚེ་ཧྲིལ་པོར་སྐུ་ལས་སྐྱོན་མཁན་ཞིག་ཡིན་པར་འགྲེལ་བརྗོད་དང་འབྲེལ། རིན་པོ་ཆེ་དམ་པ་དེ་ཉིད་ཀྱི་གསུང་རྩོམ་དེའི་ནང་བོད་དང་བོད་མིའི་རྩ་དོན་སླད་བོད་རྒྱ་འབྲེལ་མོལ་ཚོགས་ཆུང་གི་ལས་དོན་གཉེར་བའི་མྱོང་བ་དང་། ལྷག་པར་དུ་༢༠༠༢ ནས་༢༠༡༢ བར་རྒྱ་ནག་གཞུང་གི་འགོ་ཁྲིད་དང་ཐད་ཀར་གཞུང་འབྲེལ་བཀའ་མོལ་གནང་བ་ཁག་ཐུགས་དྲན་གསོ་གནང་ཡོད་པ་མ་ཟད། བོད་རྒྱ་གྲོས་མོལ་གྱི་ལས་དོན་འགོ་འཛུགས་གནང་བ་ནས་བཟུང་ལས་དོན་བསྐྱངས་པའི་སྐབས་སུ་ཕྱོགས་གཉིས་ཀྱི་འབྲེལ་ལམ་དང་། གྲུབ་འབྲས་སོན་པ་དང་མ་སོན་པ་བཅས་སོ་སོར་བཀོད་ཡོད་འདུག་ལ། རྒྱ་ནག་གཞུང་གིས་བོད་ས་བཙན་བཟུང་བྱས་པའི་སྐབས་བླ་སྤྲུལ་རྣམ་པ་གཙོས་བོད་མི་རྣམས་བཙན་བྱོལ་དུ་གྱར་བའི་གནས་སྟངས་སྤྱི་དང་། སྒོས་སུ་རིན་པོ་ཆེ་དམ་དེ་ཉིད་ཀྱི་ཁྱིམ་ཚང་གི་ལོ་རྒྱུས་བཅས་གསལ་ཡོད་སྐོར་གསུངས་འདུག columbia གཙུག་ལག་སློབ་གཉེར་ཁང་གིས་ད་དུང་། རིན་པོ་ཆེ་དམ་པ་དེ་ཉིད་ཀྱི་ཕྱག་དེབ་དེའི་ནང་དུ་བོད་ཀྱི་གནད་དོན་དེ་ཕྱོགས་གཉིས་ཕན་གྱི་ཐོག་ནས་སེལ་བར་བྱ་རྒྱུའི་སླད་བོད་རྒྱ་གྲོས་མོལ་སླར་གསོ་ཡོང་བར་དོན་དམ་གྱི་ལམ་སྟོན་ཁག་གསལ་བཏོན་གནང་ཡོད་སྐོར་གསུངས་པ་མ་ཟད། བོད་ཀྱི་དེང་དུས་ཀྱི་ལོ་རྒྱུས་སྐོར་ཤེས་འདོད་ཡོད་མཁན་རྣམས་ལ་གསུང་རྩོམ་དེ་བརྒྱུད་དེ་གནད་དོན་ཚང་ཆང་ཤེས་རྟོགས་ཐུབ་རྒྱུ་ཙམ་མ་ཟད། ༸གོང་ས་མཆོག་གི་མ་འོངས་བོད་ཀྱི་འཆར་སྣང་་གི་སྐོར་ལའང་འགྲན་ཟླ་བྲལ་བ་ཞིག་ཤེས་རྟོགས་ཐུབ་རྒྱུ་ཡོད་སྐོར་གསུངས་འདུག གང་ལྟར་གསུང་རྩོམ་ཕྱག་དེབ་དེའི་ནང་བོད་གོང་བུ་གཅིག་ཏུ་སྒྲིལ་བར་༸གོང་ས་སྐྱབས་མགོན་ཆེན་པོ་མཆོག་གིས་སྐུ་ལས་ཅི་ཞིག་སྐྱོན་མིན་དང་ཉེ་རབས་བོད་ཀྱི་ལོ་རྒྱུས་མངོན་པའི་ཕྱག་དེབ་ཅིག་ཡིན་པ་རེད། བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་གསུང་རྩོམ་ཕྱག་དེབ་དང་འབྲེལ་ནས་དེ་སྔ་བོད་རྒྱ་ཞི་མོལ་ལས་དོན་ཚོགས་ཆུང་གི་ལས་ཁུངས་ཀྱི་དྲུང་ཆེ་དང་རི་པོན་ཆེ་དམ་དེ་ཉིད་ཀྱི་ཕྱག་དེབ་བརྩམས་གནང་བའི་སྐབས་སུ་ཕྱག་རོགས་གནང་མཁན་སྐལ་བཟང་ཚེ་རིང་ལགས་སུ་ཞལ་པར་བརྒྱུད་བཀའ་འདྲི་ཞུས་ཡོད། རྩ་བའི་རིན་པོ་ཆེ་དམ་པ་དེ་ཉིད་ཀྱི་གསུང་རྩོམ་ཕྱག་དེབ་དེ་ལོ་ཤས་ཀྱི་གོང་དུ་འདོན་སྤེལ་གནང་ཐབས་ཞུས་ཀྱང་འདོན་སྤེལ་གནང་ཐུབ་མེད་སྟབས། ཀློག་པ་པོ་མང་དག་ཅིག་ནས་ཕྱག་དེབ་དེར་ངང་སྒུག་གནང་བཞིན་ཡོད་པ་དང་། གསུང་རྩོམ་ཕྱག་དེབ་དེ་ནི་ཁོང་དགོངས་པ་མ་རྫོགས་གོང་མཇུག་སྒྲིལ་ཟིན་པ་ཞིག་ཆགས་ཀྱི་ཡོད་པ་རེད། རྒྱ་རི་བློ་གྲོས་རྒྱལ་མཚན་མཆོག་ནི་ཁམས་ཉག་རོང་དུ་༡༩༤༩་ལོར་འཁྲུངས་བ་དང་། བཙན་བྱོལ་དུ་ཕེབས་པའི་རྗེས་གཞོན་དུས་ནས་སྐབས་དེའི་བོད་མིའི་རང་དབང་གསར་ཤོག་གི་རྩོམ་སྒྲིག་པའི་ཐུགས་འགན་བཞེས་པ་དང་། བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་དབྱིན་ཡིག་ཐོག་གསར་ཤོག་ཐེངས་དང་པོ་བོད་ཀྱི་འབོད་སྒྲ་ཞེས་པ་དེ་འདོན་སྤེལ་གནང་ཡོད། ༡༩༧༠ ནང་ཁོང་དང་ཕྱག་རོགས་གསུམ་ནས་མཉམ་རུབ་ཀྱིས་བོད་ཀྱི་གཞོན་ནུ་ལྷན་ཚོགས་ཐོག་མར་གསར་འཛུགས་གནང་ཡོད། དེའི་རྗེས་བཙན་བྱོལ་བོད་མིའི་སྒྲིག་འཛུགས་ནང་འགོ་ཁྲིད་རིམ་པའི་གོ་གནས་སུ་བསྐོ་བཞག་བྱུང་སྟེ། ཐོག་མར་བོད་མི་དམངས་སྤྱི་འཐུས་ལྷན་ཚོགས་ཀྱི་ཚོགས་གཙོ་དང་། དེའི་རྗེས་བཀའ་བློན་གནང་། དེ་ནས་ཨ་རིའི་གྲོས་ཚོགས་ནང་བོད་དོན་རྒྱབ་སྐྱོར་གྱི་ལས་འགན་རྐང་བཞེས་ཡོད་པ་མ་ཟད། བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་༡༩༨༢ དང་༡༩༨༤ ལོར་བོད་རྒྱའི་འབྲེལ་མོལ་གནང་བར་བོད་ཀྱི་སྐུ་ཚབ་འཐུས་མིའི་ཁོངས་སུ་རྒྱ་ནག་ཏུ་ཕེབས་ཡོད་ལ། ༢༠༠༢ ནས་རྒྱ་ནག་གཞུང་དང་ཐད་ཀར་བཀའ་མོལ་གནང་མཁན་བོད་རྒྱ་འབྲེལ་མོལ་ཚོགས་ཆུང་གི་འགོ་ཁྲིད་ཀྱི་ཐུགས་འགན་ཡང་བཞེས་ཡོད་པ་རེད། མཐར་ཕྱི་ལོ་ ༢༠༡༨ ལོའི་ཕྱི་ཟླ་ ༡༠ ནང་སྐུ་ཚེ་འཕེན་པ་རྫོགས་པའི་ཡིད་སྐྱོའི་གནས་ཚུལ་བྱུང་ཡོད་པ་རེད།

བོད་རང་བཙན་མ་ཤོར་གོང་བོད་ཀྱི་རྒྱལ་ས་ལྷ་སར་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་དབུ་ཁྲིད་འོག་དབུ་འོག་དཔུང་འདེགས་ཀྱིས་ཞབས་ཞུ་སྒྲུབ་མྱོང་མཁན་དང་། ༡༩༥༩ ལོར་བཙན་བྱོལ་དུ་ཕེབས་རྗེས་སླར་ཡང་སྐབས་དེའི་བཙན་བྱོལ་བོད་གཞུང་གི་ནང་སྲིད་དང་ཤེས་རིག་དྲུང་ཆེ་ཙམ་མ་ཟད། ལྷོ་ཕྱོགས་བོད་མིའི་གཞིས་ཆགས་ཆེ་ཁག་མང་ཆེ་བའི་ནང་ས་གནས་འགོ་འཛིན་གྱི་ཐུགས་འགན་བཞེས་མྱོང་མཁན་རྩེ་དྲུང་སྐུ་ངོ་རྒྱལ་མཚན་ཆོས་ལྡན་ལགས་དགུང་གྲངས་ ༡༠༣ ཐོག་ཟླ་བ་འདིའི་ཚེས་ ༡༢ ཉིན་ཨ་རིའི་ཤར་ཕྱོགས་ཀྱི་དགོང་མོའི་ཕྱག་ཚོད་ ༢ ཙམ་ལ་ནིའུ་ཇར་སིའི་གཟིམ་ཤག་ཏུ་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུགསྐུ་ངོ་རྒྱལ་མཚན་ཆོས་ལྡན་ལགས་ནི་༡༩༢༡ ལོར་མལ་གྲོ་གུང་དཀར་སྲིབ་ན་བྱང་མ་རུ་སྐུ་འཁྲུང་བ་དང་། ༡༩༤༦ ལོར་བོད་གཞུང་དགའ་ལྡན་ཕོ་བྲང་གི་རྩེ་དྲུང་དུ་བསྐོ་བཞག་དང། ༥༨ ལོར་སྐུ་སྒེར་མཛོད་སྤུག་གི་ལས་བྱ་དང་སྤྱན་བབས་ཕོ་བྲང་གི་ཁང་གཉེར་གཅིག་ལྕོགས་ཏུ་བསྐོ་བཞག་གནང་བ་མ་ཟད། ༡༩༥༩ ལོའི་བོད་མིའི་རང་དབང་སྒེར་ལངས་དང་འབྲེལ་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་བཙན་བྱོལ་ལ་ཆིབས་བསྒྱུར་མཛད་རྗེས། ཁོང་གིས་ནོར་བུ་གླིང་ཁའི་ནང་མུ་མཐུད་སྐུ་བཞུགས་གནང་སྟེ་གཞན་ལ་མགོན་པོ་གང་ཉིད་ཕོ་བྲང་དུ་སྐུ་བཞུགས་ཡོད་ཚུལ་གྱིས་ཁོར་ཡུག་སྐྲུན་ཐབས་ཀྱི་ཐུགས་འགན་བཞེས་པ་དང་། ཚེས་༡༩ ཉིན་ལྷ་སའི་མང་ཚོགས་ལ་༸གོང་ས་མཆོག་ཉེན་གཡོལ་དུ་ཕེབས་པའི་གནས་ཚུལ་ཕྱིར་བསྒྲགས་གནང་མཁན་ཡིན་པ་བཅས། ཁོང་ནི་བོད་ཀྱི་ལོ་རྒྱུས་ཐོག་བརྗེད་དུ་མེད་པའི་བོད་མིའི་རང་དབང་སྒེར་ལངས་ཀྱི་སྔ་རྗེས་བར་གསུམ་གྱི་གནད་དོན་དངོས་སུ་མྱོང་མཁན་ད་ཆ་བོད་མི་ཉུང་ཤས་ལས་ལྷག་མེད་པའི་ཁྲོད་དགུང་ལོ་བགྲས་ཤོས་དེ་ཆགས་ཀྱི་ཡོད་པ་རེད།༡༩༥༩ ལོའི་ཕྱི་ཟླ་ ༣ པའི་ཚེས་ ༢༠ ཉིན་རང་ཉིད་ཀྱི་ནང་མི་སྐུ་འཁོར་དང་ལྷན་ལྷ་ས་ནས་བྲོས་བྱོལ་གྱིས་རྒྱ་གར་དུ་སྐྱབས་བཅོལ་ལ་འབྱོར་རྗེས། རྩེ་དྲུང་རྒྱལ་མཚན་ཆོས་ལྡན་ལགས་ཀྱིས་ཐོག་མར་བོད་མི་སྐྱབས་བཅོལ་བ་རྣམས་ལ་གཟིགས་རྟོགས་དང་། དེའི་རྗེས་རིམ་བཞིན་བོད་གཞུང་གི་ཤེས་རིག་དྲུང་ཆེ་དང་། ལྡི་ལི་དོན་གཅོད་ཀྱི་ནང་སྲིད་སྡེ་ཚན་གྱི་འགན་འཛིན། ནང་སྲིད་དྲུང་ཆེ་བཅས་ཀྱི་ཐུགས་འགན་བཞེས་པ་མ་ཟད། ཀོ་ལེ་གྷལ་དོན་ལྡན་གླིང་དང་། སྦེལ་ཀོབ་ལུགས་བསམ། མོན་གྷོ་འདོད་རྒུ་གླིང་བཅས་ཀྱི་ས་གནས་འགོ་འཛིན་དང་། མོན་གྷོ་གཏན་སློབ་ཀྱི་སློབ་སྤྱི་སོགས་གནང་སྟེ་ཁྱོན་ལོ་ངོ་ ༥༣ ལྷག་ཙམ་ལ་བོད་གཞུང་མང་གི་བདེ་དོན་སླད་ཞབས་ཞུ་ལྷོད་མེད་བསྒྲུབས་རྗེས། ཕྱི་ལོ་ ༡༩༩༢ ལོར་བགྲས་ཡོལ་ལ་ཕེབས་ཡོད་པ་རེད། གཤམ་ལ་དམ་པ་དེ་ཉིད་ཀྱིས་དེ་སྔོན་འདི་ག་རླུང་འཕྲིན་ཁང་གི་བཅར་དྲིའི་ལས་རིམ་ཞིག་གི་བརྒྱུད བོད་མི་མང་ཚོགས་ལ་ཕན་ཚུན་གཅིག་སྒྲིལ་དགོས་པ་དང་། བཙན་བྱོལ་ནང་གི་གནས་བབ་དེ་བཟང་ཕྱོགས་ལ་བེད་སྤྱོད་དགོས་པའི་ཞུ་སྐུལ་གནང་བ་ཞིག་གསན་རོག་གནང་། རྩེ་དྲུང་རྒྱལ་མཚན་ཆོས་ལྡན་ལགས་དགོངས་པ་རྫོགས་པའི་གནས་ཚུལ་དེ་རིང་སྤྱི་ཚོགས་དྲ་ལམ་ཁག་ཏུ་ཐོན་རྗེས། བཙན་བྱོལ་བོད་མི་རྣམས་དང་དེ་སྔོན་དམ་པ་དེ་ཉིད་དང་ལྷན་དུ་དངོས་སུ་ཕྱག་ལས་གནང་མྱོང་ཡོད་མཁན་གཞུང་ཞབས་ཟུར་པ་ཁག་ཅིག་གིས་སྐུ་ངོ་མཆོག་དགོངས་པ་རྫོགས་པ་དེ་བོད་ཀྱི་ལོ་རྒྱུས་ནང་སྟོང་ཆ་ཞིག་ཆགས་ངེས་ཡིན་པར་འགྲེལ་བརྗོད་དང་འབྲེལ། དམ་པ་དེ་ཉིད་ཀྱི་ཤུལ་ལུས་ནང་མི་ཡོངས་ལ་ཐུགས་གསོའི་འཚམས་འདྲི་དང་། དམ་པ་དེ་ཉིད་འཕགས་མཆོག་སྤྱན་རས་གཟིགས་ཀྱིས་ཚེ་རབས་རྗེས་འཛིན་མཛད་རྒྱུར་ཐེ་ཚོམ་མེད་པའི་སྨོན་ལམ་ཤུགས་དྲགས་ཞུ་མཁན་འདུགམ་ཟད་དེ་རིང་བོད་མིའི་སྒྲིག་འཛུགས་ཀྱི་བཀའ་ཤག་ཚོགས་ཁང་ནང་སྲིད་སྐྱོང་སྤེན་པ་ཚེ་རིང་མཆོག་གིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་བཅས་ལྷན་འཛོམས་ཐོག་དམ་པ་དེ་ཉིད་ལ་མྱ་ངན་གུས་འདུད་མཚོན་ཆེད་གཞུང་འབྲེལ་མཆོད་འབུལ་སྨོན་ལམ་ཞིག་ཚོགས་གནང་སོང་། ལོ་རྒྱུས་ཀྱི་གནས་བབ་ཐོག་ནས་བལྟས་པ་ཡིན་ན། བོད་བསྟན་སྲིད་མི་རིགས་ཀྱི་ཆེད་ཡུན་རིང་ཤོས་ཞབས་འདེགས་ཞུ་མཁན་ཞིག་ཆགས་ཀྱི་ཡོད་སྐོར་འགྲེལ་བརྗོད་དང་འབྲེལ། ཁོང་གི་ཤུལ་ལུས་ནང་མི་ཡོངས་ལ་ཐུགས་གསོ་གནང་བ་དང་ཆབས་ཅིག ད་ལྟ་བར་དུ་ཁོང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་གཞི་དང་མཐུན་པ་དང་། བོད་མི་མང་གི་བདེ་སྡུག་ཆེད་སྐུ་ངལ་སྐྱོན་ཏེ་མི་ཚེ་དོན་དང་ལྡན་པ་སྐྱེལ་གནང་ཡོད་སྟབས་ཤུལ་ལུས་ནང་མི་རྣམས་ཀྱིས་སྤོབས་པ་བྱེད་དགོས་པ་མ་ཟད། དམ་པ་དེ་ཉིད་ཀྱི་མཛད་རྗེས་བཞག་པ་ལྟར་བོད་སྤྱི་པའི་དོན་དུ་ཕྱག་ལས་གནང་རྒྱུ་དང་། ཁོང་གི་མི་ཚེ་ལ་བལྟས་ནས་བོད་ཕྱི་ནང་གཉིས་ཀྱི་བོད་མི་རྣམས་ལ་སེམས་ཤུགས་སྤར་རྒྱུ་དང་། བོད་སྤྱི་པའི་དོན་སྒྲུབ་པར་འབད་འབུངས་སྔར་ལྷག་སྒྲུབ་དགོས་པ་བཅས་ཀྱི་གཞེན་སྐུལ་གནང་འདུག

བཞུགས་སྒར་རྡ་ས་གཙོས་པའི་རྒྱ་གར་གྱི་ས་གནས་ཁག་ཅིག་ཏུ་ཉེ་བའི་ཆར་ཏོག་དབྱིབས་གཉན་རིམ་ཁྱབ་བརྡལ་ཤུགས་ཆེར་འགྲོ་བཞིན་ཡོད་པའི་ཁྲོད། དཔལ་ལྡན་དགའ་ལྡན་ཕོ་བྲང་ཡིག་ཚང་ནས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོནམ་ཆེན་པོ་མཆོག་གི་ཕྱི་ཟླ་དང་པོའི་ནང་གི་དྲྭ་ལམ་གྱི་མཛད་འཆར་ཁག་ཆ་ཚང་གནས་སྐབས་རིང་ཕར་འགྱངས་གནང་འདུགགཞི་རྩའི་དེ་སྔའི་མཛད་འཆར་ཁག་ལ་གཞིགས་ཚེ། ༸གོང་ས་སྐྱབས་མགོན་ཆེན་པོ་མཆོག་གིས་ཟླ་བ་འདིའི་ནང་མ་ལཱི་ཞི་ཡའི་ཁ་ཆེའི་གཞོན་ནུའི་མཐུན་ཚོགས་ཀྱི་གོ་སྒྲིག་འོག་ Islam & Buddhism Eco Dialogue ཞེས་པའི་ཁ་ཆེ་དང་ནང་པའི་ཁོར་ཡུག་སྲུང་སྐྱོབ་དང་འབྲེལ་བའི་ཚོགས་འདུ་ཞིག་གི་ཚོགས་མགོན་དུ་དྲ་ཐོག་བརྒྱུད་དབུ་བཞུགས་མཛད་རྒྱུ་དང་། གཞན་ཡང་ཁ་རག་པུར་ཁུལ་དུ་རྟེན་གཞི་བྱས་པའི་རྒྱ་གར་འཕྲུལ་རིག་མཐོ་སློབ་ཁང་གིས་ཇི་ལྟར་གསོལ་འདེབས་ཞུས་དོན་ལྟར་དཀའ་ངལ་ཅན་གྱི་དུས་སྐབས་སུ་བདེ་སྐྱིད་འཚོལ་ཐབས་ཞེས་པའི་བརྗོད་གཞིའི་ཐོག་བཀའ་སློབ་ལམ་སྟོན་དང་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩོལ་གནང་འཆར་ཡོད་པ་རེད། འོན་ཀྱང་ཁ་སང་དཔལ་ལྡན་དགའ་ལྡན་ཕོ་བྲང་ཡིག་ཚང་གིས་དེ་གའི་དྲ་གནས་ཐོག་དམིགས་བསལ་གསལ་བསྒྲགས་ཤིག་སྤེལ་བར་གཞིགས་ན། ད་ཆ་རྡ་ས་གཙོས་པའི་རྒྱ་གར་གྱི་ས་གནས་གཞན་གང་སར་ཏོགས་དབྱིབས་ཀྱི་གཉན་རིམས་ཁྱབ་བརྡལ་ཤུགས་ཆེར་འགྲོ་བཞིན་པར་བརྟེན། ༸གོང་ས་མཆོག་གིས་ཕྱི་ཟླ་དང་པོའི་དྲ་ལམ་གྱི་མཛད་འཆར་ཡོངས་རྫོགས་ཕར་འགྱངས་གནང་རྒྱུ་ཐུགས་གཏན་འཁེལ་འདུག དེའི་བར་དུ་བོད་མིའི་སྒྲིག་འཛུགས་ངོས་ནས་ཁ་སང་ནས་དབུ་འཛུགས་ཀྱིས་ཉིན་གཉིས་རིང་ལས་ཁུངས་ཡོངས་རྫོགས་སྒོ་རྒྱབ་ནས་ལས་བྱེད་རྣམས་ལ་ཏོག་དབྱིབས་གཉན་རིམས་ཕོག་ཡོད་མེད་ཀྱི་བརྟག་དཔྱད་གནང་འགོ་བཙུགས་ཡོད་པ་དང་། དེ་རིང་བར་རྡ་སར་ཁྱོན་ཏོག་དབྱིབས་ནད་དུག་ཕོག་པའི་གྲངས་འབོར་དེ་མི་ ༢༠༠ ལྷག་ཙམ་ལ་ཕར་འདུགཧི་མ་ཅལ་མངའ་སྡེའི་གཞུང་གིས་ཏོག་དབྱིབས་ནད་དུག་ཁྱབ་བརྡལ་འགྲོ་བཞིན་པའི་སྐབས་འདིར་མངའ་སྡེའི་ནང་དུ་མཚན་མོའི་ཆུ་ཚོད ༡༠ པ་ནས་ཞོགས་པའི་ཆུ་ཚོད ༥ པའི་བར་དུ་མི་རྣམས་རང་ཁྱིམ་ནས་ཕྱི་ལ་ཐོན་མི་ཆོག་པ་དང་། ཆབ་སྲིད་དང་ཆོས་ཕྱོགས་ཀྱི་བྱེད་སྒོ་ཁག་གི་འདུ་འཛོམས་ཀྱང་བརྒྱ་ཆ་ལྔ་བཅུ་མ་གཏོགས་སྤེལ་མི་ཆོག་པའི་དམ་དྲག་གི་བཀོད་ཁྱབ་བཏང་ཡོད་པ་རེད།

ཟླ་འདིའི་ཚེས་གསུམ་གྱི་ཉིན། རྡུལ་ཕྲན་མཚོན་ཆ་ལྡན་པའི་རྒྱལ་སྤྱིའི་སྟོབས་ཆེན་རྒྱལ་ཁབ་ལྔ་སྟེ། ཨ་རི་དང་དབྱིན་ཡུལ། རྒྱ་ནག་དང་ཨུ་རུ་སུ། དེ་བཞིན་ཧྥ་རན་སི་ལྔ་ཡིས་ཐེངས་དང་པོར་མཉམ་འབྲེལ་གྱི་ཐོག་ནས། རྡུལ་ཕྲན་གོ་མཚོན་གྱི་དམག་འཁྲུག་སྔོན་འགོག་བྱེད་རྒྱུ་དང་། རྡུལ་ཕྲན་གོ་མཚོན་གྱི་འགྲན་བསྡུར་མི་བྱེད་རྒྱུ་ཡོངས་ཁྱབ་བསྒྲགས་གཏམ་ཞིག་སྤེལ་བ་ལྟར། བོད་ཀྱི་བླ་ན་མེད་པའི་དབུ་ཁྲིད། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བསྔགས་བརྗོད་ཀྱི་གསུང་འཕྲིན་ཞིག་སྩལ་འདུག དེ་ཡང་༸གོང་ས་མཆོག་གིས་གསུང་འཕྲིན་དེའི་ནང་། མགོན་པོ་གང་ཉིད་མཆོག་ནི་དུས་རྒྱུན་ནས་འཛམ་གླིང་ཁྱོན་ཡོངས་ལ་གོ་མཚོན་མེད་པ་དང་།རྡུལ་ཕྲན་མཚོན་ཆ་གཏན་མེད་བཟོ་ཐབས་ལ་འབད་བརྩོན་མཛད་མཁན་ཞིག་ཡིན་པའི་ཆ་ནས། ཐེངས་འདིར་སྟོབས་ཆེན་རྒྱལ་ཁབ་ལྔས་མཉམ་འབྲེལ་གྱི་ཐོག་ནས་རྡུལ་མཚོན་དམག་འཁྲུག་འགོག་ཐབས་ཀྱི་གསལ་བསྒྲགས་སྤེལ་བ་དེ་ནི་བཟང་ཕྱོགས་སུ་གོམ་སྟབས་གསར་བ་ཞིག་ལ་དགོངས་བཞེས་མཛད་བཞིན་ཡོད་པར་བཀའ་བསྩལ་འདུག གཞན་ཡང་མགོན་པོ་གང་ཉིད་མཆོག་གིས་དུས་རབས་ཉི་ཤུ་པ་འདིའི་ནང་བཟང་ཕྱོགས་ཀྱི་འགྱུར་བ་མང་པོ་བྱུང་ཡོད་ནའང་། རྡུལ་ཕྲན་མཚོན་ཆ་སོགས་ལ་བརྟེན་ནས་མི་གྲངས་ས་ཡ་ཉིས་བརྒྱ་ཙམ་གྱི་ཚེ་སྲོག་ཤོར་ཏེ་མི་མང་ལ་འཚེ་བ་གང་མང་བྱུང་བའི་དུས་རབས་ཤིག་ཀྱང་ཡིན་པར་བཀའ་འབྲེལ་གྱིས་མཉམ་འབྲེལ་གྱི་གསལ་བསྒྲགས་འདིས་ང་ཚོ་ཚང་མ་གཅིག་ལ་གཅིག་རྟེན་གྱི་འཇིག་རྟེན་ཞིག་ན་གནས་ཡོད་པའི་དངོས་དོན་མཚོན་ཡོད་ལ། དེ་ལ་བརྟེན་ནས་དུས་རབས་ཉེར་གཅིག་པ་འདི་ཞི་བདེ་དང་། མཉམ་འབྲེལ་གྱི་དུས་རབས་ཤིག་ཡོང་བའི་གོ་སྐབས་ཡོད་པ་མངོན་ཡོད་སྐོར་བཀའ་གནང་འདུག སྤྱིར་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཀྱི་གཏན་འཇགས་ཚོགས་མི་ཡིན་པའི་སྟོབས་ཆེན་རྒྱལ་ཁབ་ལྔ་པོ་དེ་དག་གིས་སྤྱི་བསྒྲགས་དེའི་ནང་། རྡུལ་ཕྲན་གྱི་དམག་འཁྲུག་བྱུང་བ་ཡིན་ན་དེའི་རྒྱལ་ཁ་སུ་ལའང་ཐོབ་རྒྱུ་མེད་པ་དང་། དེ་ལྟ་བུའི་དམག་འཁྲུག་གིས་ཕུགས་རྒྱང་རིང་པོའི་ཐོག་ནས་ཤུགས་རྐྱེན་ངན་པ་ཡོང་ངེས་ཡིན་པ་གསལ་པོ་ཡིན་སྟབས། ང་ཚོས་རྡུལ་ཕྲན་གོ་མཚོན་གྱི་དམག་འཁྲུག་སྔོན་འགོག་བྱེད་རྒྱུ་དང་། རྡུལ་ཕྲན་གོ་མཚོན་གྱི་འགྲན་བསྡུར་མི་བྱེད་རྒྱུའི་ཁས་ལེན་དམ་བཅའ་བཀོད་པ་དང་འབྲེལ།  རྡུལ་མཚོན་ཆ་ཞེས་པ་དེ་རང་ཉིད་ཀྱི་རྒྱལ་ཁབ་སྲུང་རྒྱུ་དང་། གཞན་གྱི་དབང་བསྒྱུར་དང་དམག་འཁྲུག་འགོག་ཐབས་ཆེད་མ་གཏོགས་བེད་སྤྱོད་བྱ་རྒྱུ་མེད་པའི་འགྲེལ་བརྗོད་གནང་འདུག སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་གསུང་འཕྲིན་ནང་རྒྱལ་ཁབ་དེ་དག་གི་ཆོད་སེམས་ལ་སྔགས་བརྗོད་མཛད་པ་དང་འབྲེལ། མཉམ་འབྲེལ་རྒྱལ་ཚོགས་དང་དེའི་ཁྱབ་ཁོངས་ཀྱི་ཚོགས་མི་རྒྱལ་ཁབ་སོགས་ཚང་མས་རྡུལ་ཕྲན་མཚོན་ཆའི་འཇིགས་པ་མེད་པར་བཟོ་ཐབས་ལ་འབད་བརྩོན་དང་། དེ་བཞིན་སྤྱི་ཡོངས་ནས་རྡུལ་ཕྲན་མཚོན་ཆ་གཙང་བཟོ་བྱེད་ཐབས་ལ་སྒོ་ཀུན་ནས་ཤུགས་སྣོན་གནང་དགོས་བའི་ལམ་སྟོན་མཛད་འདུག གཞན་ཡང་གསུང་འཕྲིན་དེའི་མཇུག་ཏུ། མགོན་པོ་གང་ཉིད་མཆོག་ནི་དུས་རྒྱུན་ནས་འགྲོ་བ་མི་ཡོངས་རྫོགས་གཅིག་གྱུར་ཡིན་པར་དགོངས་བཞེས་མཛད་མཁན་ཞིག་དང་། འགྲོ་བ་མིའི་རིགས་ཀྱི་བདེ་ཐང་དང་བདེ་འཇགས་ནི་ཆེས་གལ་ཆེན་གྱི་གནད་དོན་ཞིག་ཡིན་པར་དགོངས་བཞེས་མཛད་མཁན་ཞིག་ཡིན་པའི་ཆ་ནས། རྒྱལ་ཁབ་ཕན་ཚུན་བར་གྱི་གནད་དོན་ཅི་རིགས་དག་ཕྱི་འབྲེལ་གྱི་གྲོས་མོལ་དང་བསམ་ཤེས་བརྒྱུད་ནས་སེལ་ཐུབ་པ་ཞིག་ཡིན་པར་ཐུགས་ཡིད་ཆེས་བརྟན་པོ་ཡོད་པ་བཀའ་གནང་བ་དང་འབྲེལ། འདས་བའི་ལོ་རྒྱུས་ལ་ཕྱིར་མིག་མཛད་པ་ཡིན་ན་འཚེ་བ་བརྒྱུད་ནས་རྒྱུན་གནས་ཐུབ་པའི་ཞི་བདེ་ཡོང་ཐབས་མེད་པ་ནི་རྒྱལ་རབས་ལོ་རྒྱུས་ལ་བལྟས་ན་ཤེས་པ་ཡིན་ཞེས་བཀའ་བསྩལ་འདུག

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་དབུ་བཞུགས་ཐོག་དྲ་ལམ་བརྒྱུད་གཞུང་ཆེན་བཀའ་པོད་ལྔ་དང་གསང་སྔགས་རྡོ་རྗེ་ཐེག་པ་བཅས་ཀྱི་བགྲོ་གླེང་དབུ་འཛུགས་གནང་སོང་།རྒྱལ་སྤྱིའི་དགེ་ལྡན་ལྷན་ཚོགས་ཀྱིས་གོ་སྒྲིག་ཞུས་པའི་གཞུང་ཆེན་བཀའ་པོད་ལྔ་དང་གསང་སྔགས་རྡོ་རྗེ་ཐེག་པ་བཅས་ཀྱི་དཔེ་ཁྲིད་དགེ་རྒན་རྣམ་པའི་དྲ་ཐོག་བགྲ་གླེང་དེ་བཞིན་དེ་རིང་དང་སང་ཉིན་བཅས་གཉིས་རིང་འཚོགས་བཞིན་ཡོད་པ་དང་དེ་རིང་དབུ་འབྱེད་ཐོག་སྐུ་མགྲོན་གཙོ་བོ་༸གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་༸སྐྱབས་རྗེ་དགའ་ལྡན་འཇམ་མགོན་རྒྱལ་བའི་གདུང་སྲས་འཕྲིན་ལས་རྡོ་རྗེ་འཆང་མཆོག་དང་ཤར་བྱང་གི་ཆོས་རྗེ་རྣམ་གཉིས་གཙོས་གདན་ས་ཁག་གི་མཁན་དང་མཁན་ཟུར་རྣམ་པ། དེ་བཞིན་བགྲོ་གླེང་གི་གསུང་བཤད་གནང་མཁན་མཁས་དབང་སོགས་ཆེད་ཕེབས་གནང་ཡོད།དེ་རིང་སྔ་དྲོ་བགྲོ་གླེང་གསུང་བཤད་དབུ་འཛུགས་མ་གནང་བའི་གོང་༸གོང་ས་མཆོག་གིས་བཀའ་སློབ་སྩལ་སོང་བ་དང་སྐབས་དེར་༸གང་ཉིད་མཆོག་གིས་འཇམ་མགོན་བླ་མའི་བསྟན་པར་ཐོས་བསམ་རྒྱ་ཆེར་གནང་རྒྱུ་ནི་གལ་ཆེན་ཡིན་པ་དང་ཁྱད་པར་དུ་བོད་གངས་ཅན་པའི་རིས་སུ་མ་ཆད་པའི་མཁས་དབང་ཚོར་གཞུང་ཆེན་བཀའ་པོད་ལྔ་འདི་ཆེས་གལ་ཆེན་ཆགས་ཀྱི་ཡོད་པའི་ལམ་སྟོན་སྩལ་དོན་བཞིན་དེ་སྔ་བོད་ལ་དབུ་མ་དང་ཚད་མ་གཉིས་ཟུང་འཇུག་གིས་སློབ་གཉེར་གནང་རྒྱུའི་སྲོལ་བཟང་པོ་ཞིག་ཡོད་པ་དང་ད་ཆ་བོད་མི་རྣམས་བཙན་བྱོལ་ལ་སླེབས་པའི་རྗེས་སུའང་གཙོ་བོ་གདན་ས་ཁག་གིས་ཐུགས་ཁུར་བཞེས་བའི་ཐོག་གཞུང་ཆེན་དེ་དག་ལ་སློབ་གཉེར་གནང་རྒྱུའི་ལམ་སྲོལ་དེ་ཉམས་པ་མེད་པའི་ཐོག་ནས་རྒྱུན་འཛིན་བཞིན་པར་ཡིད་རང་བསྔགས་བརྗོད་གནང་སོང་།དེ་བཞིན་མགོན་པོ་མཆོག་གིས་༸སྐུ་ཉིད་ད་ལན་དྲ་ལམ་བརྒྱུད་དཔེ་ཁྲིད་དགེ་རྣམ་པའི་བགྲོ་གླེང་ཐོག་ལྷན་བཞུགས་མཛད་རྒྱུའི་གོ་སྐབས་བྱུང་བར་ཐུགས་དགྱེས་ཚོར་ཆེན་པོ་བྱུང་ཞེས་བཀའ་སྩལ་བ་དང་སྦྲགས། འདས་པའི་ལོ་བརྒྱད་ཙམ་ནས་གདན་ས་ཁག་གཙོ་བོར་གྱུར་པའི་དགོན་སྡེ་ཁག་ནང་སྲོལ་རྒྱུན་གྱི་གཞུང་ཆེན་སློབ་གཉེར་དང་བསྟུན་སེམས་ཁམས་རིག་པ་དང་དེང་རབས་ཀྱི་ཚན་རིག་གི་སློབ་སྦྱོང་ཡང་དུས་མཉམ་བྱེད་ཐུབ་པ་བྱུང་ཡོད་སྐོར་བཀའ་སྩལ་ཏེ་གདན་ས་གསུམ་གཙོ་བོར་གྱུར་བའི་གཞུང་ཆེན་སློབ་གཉེར་གནང་བཞིན་ཡོད་པའི་གདན་ས་ཁག་ཡོངས་རྫོགས་ཧ་ཅང་གལ་ཆེན་ཆགས་ཀྱི་ཡོད་པས་གཞུང་ཆེན་བཀའ་པོད་ལྔའི་ཐོག་མུ་མཐུད་སློབ་གཉེར་གྱིས་སེམས་ལ་བཅོས་བསྒྱུར་དགོས་གལ་ཡིན་པར་ལམ་སྟོན་སྩལ་སོང་། བགྲོ་གླེང་དེའི་ཐོག་མར་དགའ་ལྡན་ཤར་རྩེ་མཁན་ཟུར་བྱང་ཆུབ་ཆོས་ལྡན་མཆོག་གིས་དབུ་འབྱེད་ཀྱི་མཛད་སྐོར་ད་རེས་བགྲོ་གླེང་གི་ཆ་ཤས་བཞེས་མཁན་ཚོའི་ངོས་ནས་རང་ཉིད་ཀྱི་དཔྱད་རྩོམ་དེའི་ཐོག་ནས་གསན་གཟིགས་གནང་མཁན་ཚོར་ཐུགས་ཕན་སོས་པ་ཞིག་ཡོང་བའི་གཞེན་སྐུལ་གནང་སོང་བ་དང་དེ་རིང་ཉིན་དང་པོའི་བགྲོ་གླེང་ནང་ཆ་ཤས་བཞེས་མཁན་དགེ་བཤེས་བཞི་ཡིས་ཚད་མ་རྣམ་འགྲེལ་གྱི་བརྗོད་བྱའི་སྙིང་དོན་གང་ཡིན་དང་ཚད་མ་རྣམ་འགྲེལ་གྱི་དཀའ་གནད་ཁག་ཅིག་གི་སྐོར། དེ་བཞིན་ཕར་ཕྱིན་སྟོད་ཆ་སྐབས་དང་པོའི་བཞིའི་བརྗོད་བྱ་སྙིང་དོན་གང་ཡིན་དང་གདམས་ངག་རྣམ་པ་བཅུའི་ཐེག་པ་ཆེན་པོའི་ལམ་གྱི་གནས་ཀུན་འདོད་ཚུལ། སྐབས་དེ་དག་གི་བརྗོད་བྱའི་དཀའ་གནད་ཁག་ཅིག གཞན་ཡང་མངོན་པ་མཛོད་དང་གསང་སྔགས་རྡོ་རྗེ་ཐེག་པ་བཅས་ཀྱི་སྐོར་ལ་གསུང་བཤད་དང་འདྲི་བ་དྲིས་ལན་ལྷུག་པོ་གནང་སོང་།

ཁ་སང་བོད་རིགས་ཨ་རི་བ་ Aftab Pureval ལགས་ཀྱིས་ཨ་རིའི་ Cincinnati ཡི་གྲོང་སྡེའི་སྤྱི་ཁྱབ་ཀྱི་ལས་ཁུར་དང་དམ་བཅའ་འབུལ་བཞེས་དང་སྦྲགས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་ལ་དགའ་བསུའི་འཚམས་འདྲི་མཛད་འདུགབདམས་ཐོན་ཨ་རིའི་ Cincinnati ཡི་གྲོང་སྡེའི་སྤྱི་ཁྱབ་པ་གསར་པའི་དམ་འབུལ་མཛད་སྒོ་དེ་ཁ་སང་སྔ་དྲོ་ཁུལ་དེར་རྟེན་གཞི་བྱས་པའི་ Washington Park གི་ནང་དུ་ཚོགས་ཡོད་པ་དང་མཛད་སྒོའི་ཐོག་ཨ་རིའི་ Kentucky དང་ Indiana དེ་བཞིན་ Ohio མངའ་སྡེ་སོགས་ནས་བོད་རིགས་ཚོགས་པའི་ཚོགས་མི་ཁག་ཅིག་མཉམ་ཞུགས་གནང་ཡོད་པ་མ་ཟད། སྐབས་དེར་ཁོང་རྣམས་ཀྱིས་སྐུ་ཞབས་ Aftab ལགས་སུ་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ཁོང་ལ་སྩལ་བའི་འཚམས་འཕྲིན་དེ་ཕུལ་འདུག འཚམས་འཕྲིན་དེའི་ནང་༸གོང་ས་མཆོག་གིས་ད་བར་བོད་མི་ཚོ་དང་མཇལ་མོལ་མཛད་པའི་བརྒྱུད་རིམ་ཁྲོད་བོད་མི་རྣམས་གནས་སྟངས་འདྲ་མིན་ལ་མ་ལྟོས་པའི་རང་དང་རང་ཉིད་ཀྱི་བུ་ཕྲུག་རྣམས་ནས་བོད་མིའི་ངོ་བོ་དེ་རྒྱུན་འཛིན་གནང་པའི་ཐོག་ནས་རང་གི་གནས་ཡུལ་རྒྱལ་ཁབ་ཁག་ཏུ་ཞབས་འདེགས་འདྲ་མིན་ཞུ་བཞིན་པ་མཇལ་རྒྱུ་ཡོད་པ་དེ་བློ་སྤོབས་སྐྱེད་གཞི་ཡིན་པར་བཀའ་སྩལ་འདུག ལྷག་དོན་མགོན་པོ་༸གང་ཉིད་མཆོག་གིས་ད་རེས་བོད་རིགས་ཨ་རི་བ་ཞིག་ཡུལ་དེའི་ Cincinnati ཡི་གྲོང་སྡེའི་སྤྱི་ཁྱབ་ལ་ཆེས་ཐོག་མར་འོས་འདེམས་བྱུང་བ་བཞིན་བོད་ཀྱི་རིག་གཞུང་གཅེས་ནོར་གནང་མཁན་གཞན་རྣམས་ནས་ཀྱང་དེ་དེ་བཞིན་གནང་ཐུབ་པའི་ཐུགས་རེ་ཡོད་ཅེས་བཀའ་སྩལ་བ་མ་ཟད། སྐུ་ཞབས་ཁོང་ནས་གཞན་གྱི་ཁེ་ཕན་སླད་སྤྱི་ཚོགས་ཞབས་ཞུའི་བྱ་བ་སྒྲུབ་པའི་སྐབས་སུ་རང་ཉིད་ཀྱི་ས་ཁུལ་ནང་གནས་བཞིན་པའི་ཁ་རྗེ་དབང་ཐང་དེ་ཙམ་མེད་མཁན་གྱི་སྐྱེ་བོ་དག་ལ་དམིགས་བསལ་གྱིས་སེམས་བཟང་པོའི་ཐོག་ནས་རོགས་རམ་གནང་ཐུབ་པའི་ཡིད་ཆེས་ཡོད་སྐོར་ལམ་སྟོན་མཛད་འདུགཕ་རྒྱ་གར་བ་དང་ཨ་མ་བོད་རིགས་ཡིན་པ། ཨ་རིར་འཚར་ལོངས་བྱུང་བའི་ན་གཞོན་དགུང་ལོ་ ༣༩ ལ་ཕེབས་པའི་སྐུ་ཞབས་ Aftab Karma Singh Pureval ལགས་སུ་ད་རེས་༸གོང་ས་མཆོག་གིས་དགའ་བསུའི་འཚམས་འཕྲིན་སྩལ་ཡོད་པ་དང་འབྲེལ། སྐུ་ཞབས་ཁོང་གིས་རང་ཉིད་ཀྱི་ Twitter དྲ་གནས་སུ་ཁོང་བོད་རིགས་ཨ་རི་བ་ཞིག་ཡིན་པའི་ཆ་ནས་༸གོང་ས་མཆོག་གིས་ཁོང་ལ་ངོས་འཛིན་གྱིས་འཚམས་འཕྲིན་སྩལ་བ་དེ་ནི་ཧ་ཅང་གི་སྤྲོ་སེམས་འཁོལ་བ་དང་དམིགས་བསལ་ཆེ་བསྟོད་བྱ་ཡུལ་ཞིག་ཡིན་པར་མ་ཟད། རང་ཉིད་ཀྱི་གནས་ཡུལ་གྲོང་སྡེ་ནང་མགོན་པོ་༸གང་ཉིད་མཆོག་གི་རླབས་ཆེན་མཛད་རྗེས་དག་ངོ་སྤྲོད་བྱ་རྒྱུ་ནི་རང་ཉིད་ཀྱི་འོས་འགན་ཞིག་ལ་ངོས་འཛིན་གནང་སྟེ་༸གང་ཉིད་མཆོག་ཨ་རིའི་ Cincinnati ཡི་གྲོང་སྡེར་ཆིབས་སྒྱུར་བསྐྱང་གནང་ཡོང་བའི་གསོལ་འདེབས་ཞུས་འདུག རྩ་བའི་སྔ་ལོ་ཕྱི་ཟླ་༡༡ ནང་ཨ་རིའི་ Ohio མངའ་སྡེའི་ Cincinnati ཡི་གྲོང་སྡེའི་སྤྱི་ཁྱབ་ཀྱི་འོས་བསྡུ་ནང་བོད་རིགས་ཨ་རི་བ་ Aftab Pureval ལགས་སུ་འོས་གྲངས་བརྒྱ་ ༦༤ ཐོག་ནས་གྲོང་སྡེའི་སྤྱི་ཁྱབ་ཀྱི་འོས་བསྡུའི་རྒྱལ་ཁབ་ཐོབ་ཡོད་པ་དང་ཨ་རིའི་ནང་འཚར་ལོངས་བྱུང་བའི་བོད་རིགས་ཤིག་ཨ་རིའི་གྲོང་ཁྱེར་ཆེ་གྲས་ཤིག་གི་གྲོང་སྡེའི་སྤྱི་ཁྱབ་ལ་འོས་འདེམས་བྱུང་བ་ནི་བཙན་བྱོལ་བོད་མིའི་ལོ་རྒྱུས་ནང་ཆེས་ཐོག་མ་དེ་ཆགས་ཀྱི་ཡོད་པ་རེད།  

ལྷོ་ཨ་ཕི་རི་ཀའི་ཡེ་ཤུའི་བླ་ཆེན་དམ་པ་ཌེས་མིན་ཊུ་ཊུ་མཆོག་སྐུ་ཚེའི་འཕེན་པ་རྫོགས་པར་མང་ཚོགས་ཀྱིས་མྱ་ངན་གུས་འདུད་དང་གདུང་སེམས་མཉམ་སྐྱེད་ཞུ་བཞིན་པའི་ཁྲོད་འདིར་༸གོང་ས་མཆོག་དང་ཆོས་དཔོན་ཊུ་ཊུ་གཉིས་ཀྱི་མཛའ་བརྩེའི་འབྲེལ་ལམ་སྐོར་གྱི་གློག་བརྙན་ཞིག་འདོན་སྤེལ་གྱིས། དབུ་ཁྲིད་རྣམ་གཉིས་མཇལ་མོལ་བརྒྱུད་བདེ་སྐྱིད་ཀྱི་ཚོར་བ་སྐྲུན་པ་ཁག་ལ་སྤྱི་ཚོགས་དྲ་རྒྱའི་སྟེང་མང་ཚོགས་མང་པོས་ཡིད་སྨོན་གྱིས་དགའ་བསུ་ཤུགས་དྲག་ཞུ་བཞིན་འདུགརྩ་བའི་ Mission Joy: Finding Hapiness in Troubled Times འམ་དཀའ་སྡུག་གི་དུས་སུ་བདེ་སྐྱིད་འཚོལ་བ་ཞེས་པའི་གློག་བརྙན་འདི་བཞིན་ Academy Award ཞེས་པའི་རྒྱལ་སྤྱིའི་ཁྲོད་གློག་བརྙན་དང་འབྲེལ་བའི་གཟེངས་རྟགས་ཆེ་ཤོས་བཞེས་མྱོང་མཁན་གློག་བརྙན་བཟོ་སྐྲུན་པ་གྲགས་ཅན་ Louie Psihoyos ལགས་ཀྱིས་བཟོ་སྐྲུན་གནང་བ་ཞིག་ཆགས་ཀྱི་ཡོད་པ་དང་གློག་བརྙན་འདིའི་ཆེད་༸གོང་ས་མཆོག་གི་གདན་ཞུས་ཐོག་ཆོས་དཔོན་ཊུ་ཊུ་མཆོག་ཆེད་མངགས་བཞུགས་སྒར་༸རྒྱལ་བའི་ཕོ་བྲང་དུ་ཆེད་ཕེབས་ཀྱིས་བདུན་ཕྲག་གཅིག་ཙམ་རིང་ལྷན་འཛོམས་ཀྱིས་ཕྱག་ཚོད་བཏང་བའི་བརྙན་པར་ཁག་ཅིག་གཟིགས་འབུལ་གནང་ཡོད་པ་མ་ཟད། གློག་བརྙན་འདིའི་བརྗོད་བྱའི་སྙིང་པོ་ནི་དབུ་ཁྲིད་རྣམ་གཉིས་ཀྱིས་སྙིང་རྗེ་རྩ་བར་བཟུང་པའི་ཐོག་ནས་བཟང་སྤྱོད་སྤེལ་ཕྱོགས་དང་ཆོས་དད་ཡོད་མེད་ལ་མ་ལྟོས་པའི་བླང་དོར་དང་ཡ་རབས་ཀྱི་ཐོག་ནས་མི་ཚེ་སྐྱེལ་པ་བརྒྱུད་བདེ་སྐྱིད་ཀྱི་རྩ་བ་འཛུགས་སྟངས་སོགས་ཀྱི་སྐོར་ལ་གླེང་མོལ་གནང་བའི་གྲུབ་དོན་དེ་དག་ཆགས་ཀྱི་ཡོད་པ་རེད། Mission Joy ཞེས་པའི་གློག་བརྙན་འདིའི་ནང་དུ། དཀའ་ངལ་མང་དག་ཅིག་ལ་གདོང་ལེན་གནང་སྟེ་འཛམ་གླིང་འདིའི་ཉེ་བའི་ལོ་རྒྱུས་ཀྱི་ནང་དུ་མཛད་རྗེས་རླབས་ཆེན་འཇོག་མཁན་འཛམ་གླིང་ཞི་བདེའི་དེད་དཔོན་རྣམས་གཉིས་དབར་མཇལ་འཕྲད་བྱུང་བའི་བརྙན་པར་ཁག་ཅིག་དང་འགུལ་རིས་བརྙན་པར་གསལ་སྟོན་བརྒྱུད། དབུ་ཁྲིད་གཉིས་དབར་གྱི་ཁྱད་དུ་འཕགས་པའི་མཛའ་བརྩེའི་འབྲེལ་བ་དང་ལྷག་དོན་སྒེར་སོ་སོའི་སྐུ་ཚེའི་ནང་དཀའ་ངལ་དུ་མ་འཕྲད་མྱོང་སོགས་ཀྱི་གནས་སྟངས་འདྲ་མིན་ལ་མ་ལྟོས་པར་ཐུགས་སྤྲོ་སྣང་ལྡན་པའི་སྒོ་ནས་ཕན་ཚུན་ལ་བློ་བསྐྱེད་གནང་བ་ཁག་མངོན་གསལ་གནང་བ་མ་ཟད། དབང་ཆ་གཅིག་བསྡུས་རིང་ལུགས་ཀྱི་གཞུང་ལ་གདོང་ལེན་དང་འབྲེལ་བའི་༸སྐུ་སྒེར་གྱི་ངལ་བ་ཁག་དང་དྲང་བདེན་གྱི་ཆེད་དུ་འཐབ་རྩོད་ཀྱི་འགན་བཞེས་པའི་ཐོག་ནས་འཛམ་གླིང་འགོ་ཁྲིད་ཀྱི་འགན་ཁུར་བཞེས་པའི་དབུ་ཁྲིད་ཀྱི་ལོ་རྒྱུས་བཅས་གསལ་འདོན་གནང་ཡོད་པ་རེད་འདུག དཀའ་སྡུག་གི་དུས་སུ་བདེ་སྐྱིད་འཚོལ་བ་ཞེས་པའི་༸གོང་ས་མཆོག་དང་ཡི་ཤུའི་ཆོས་དཔོན་ཊུ་ཊུ་གཉིས་དབར་གྱི་མཛའ་བརྩེའི་འབྲེལ་ལམ་དང་མཇལ་མོལ་སྐོར་གྱི་གློག་བརྙན་འདིའི་ནང་བཅར་འདྲི་བྱེད་མཁན་གྱིས་དབུ་ཁྲིད་རྣམ་གཉིས་དབར་གྱི་ཁྱད་དུ་འཕགས་པའི་མཛའ་བརྩེའི་འབྲེལ་ལམ་སྐོར་བཀའ་འདྲི་ཞུས་སྐབས་ཆོས་དཔོན་ཊུ་ཊུ་ཡིས་༸གོང་ས་མཆོག་ནི་དམ་པ་ཁོང་ལ་དུས་ཀུན་ཏུ་ངལ་བ་བཟོ་མཁན་ཞིག་ཡིན་ཚུལ་གྱི་ཞལ་ཤོབ་དང་སྦྲགས་མགོན་པོ་༸གང་ཉིད་ལ་ཧ་ཅང་ཡིད་སྨོན་ཞུ་འགོ་བཙུགས་པའི་ཉིན་མོ་དེ་དྲན་གསོ་མཛད་པར་མ་ཟད། ༸གང་ཉིད་མཆོག་གིས་༸སྐུ་ཉིད་ནམ་ཞིག་དགོངས་པ་རྫོགས་ཚེ་༸གང་ཉིད་ཀྱིས་ཐུགས་མཉེས་བའི་མཛའ་གྲོགས་ཆོས་དཔོན་ཊུ་ཊུ་མཆོག་མུ་མཐུད་དྲན་གསོ་གནང་རྒྱུ་ཡིན་པར་བཀའ་ལན་སྩལ་ཡོད་པ་མཇལ་རྒྱུ་ཡོད་འདུགད་རེས་ཡེ་ཤུའི་ཆོས་དཔོན་ཆེན་མོ་ཌེ་སི་མོན་ཊུ་ཊུ་མཆོག་དགོངས་པ་རྫོགས་པར་མྱ་ངན་རྗེས་དྲན་ཞུ་བཞིན་པ་དང་འབྲེལ་༧གོང་ས་མཆོག་དང་ཆོས་དཔོན་དམ་པ་དེ་ཉིད་གཉིས་ཀྱི་མཛའ་འབྲེལ་གློག་བརྙན་ཞིག་འདོན་སྤེལ་གནང་བར་སྤྱི་ཚོགས་དྲ་རྒྱའི་སྟེང་མང་ཚོགས་མང་པོས་ཡིད་སྨོན་དང་དགའ་བསུ་ཞུ་བཞིན་པའི་ཁྲོད་འདིར། ཨ་རིའི་སྲིད་འཛིན་ཟུར་པ་སྐུ་ཞབས་ Barack Obama ལགས་ཀྱིས་ཆོས་དཔོན་ Desmond TuTu མཆོག་ནི་འཛམ་གླིང་ནང་དྲང་བདེན་དང་འཚེ་མེད་ཞི་བའི་ཐམས་ལམ་ཐོག་ནས་ཞི་བདེ་སྐྲུན་ཐབས་གནང་མཁན་རླབས་ཆེན་གྱི་སྐྱེས་བུ་ཞིག་ཡིན་པར་འགྲེལ་བརྗོད་གནང་སྟེ་དམ་པ་ཁོང་ངོས་རང་གཙོས་མི་མང་པོ་ཞིག་གི་སློབ་སྟོན་པ་དང་བློས་ཐུབ་གྲོགས་པོ། དེ་བཞིན་བཟང་སྤྱོད་ཀྱི་མིག་དཔེ་ལྟ་ཡུལ་ཞིག་ཡིན་ཞེས་གསུངས་འདུག དེ་བཞིན་རྒྱ་གར་གྱི་རྩོམ་པ་པོ་སྐུ་ཞབས་ Joy Bhattachariya ལགས་ཀྱིས་ཆོས་དཔོན་ཊུ་ཊུ་མཆོག་དགོངས་པ་རྫོགས་པར་ངོས་རང་ཧ་ཅང་བློ་ཕམ་བྱུང་ཞེས་དང་དམ་པ་ཁོང་ནི་ཐུགས་རྒྱུད་བཟང་ཞིང་གཞན་ལ་བརྩེ་སེམས་ལྡན་པའི་དབུ་ཁྲིད་ཅིག་ཡིན་པར་བསྔགས་བརྗོད་དང་འབྲེལ། ད་རེས་དམ་པ་དེ་ཉིད་དགོངས་པ་རྫོགས་པ་དང་འབྲེལ་ནས་འདོན་སྤེལ་གནང་བའི་༸གོང་ས་མཆོག་དང་ཆོས་དཔོན་རྣམ་གཉིས་ཀྱི་མཛའ་བརྩེའི་འབྲེལ་ལམ་སྐོར་གྱི་གློག་བརྙན་འདི་བཞིན་སེམས་ལ་ཧ་ཅང་ཟུག་པོ་འདུག་ཅེས་ཡིད་སྨོན་ཞུས་འདུག    ཡང་ Abhay K ཞུས་མཁན་ཞིག་གིས་ Mission Joy ཞེས་པའི་གློག་བརྙན་འདིའི་ནང་དུ། ༸གོང་ས་མཆོག་དང་ཊུ་ཊུ་གཉིས་ཀྱི་བཀའ་མོལ་གནང་བ་རྣམས་མང་ཚོགས་ཀྱི་གསན་འཇོག་དགོས་པའི་བཀའ་མོལ་ཡག་ཤོས་དེ་ཡིན་པར་གསུངས་འདུགགཞི་རྩའི་ཟླ་བ་སྔོན་མའི་ཚེས་ ༢༦ རེས་གཟའ་ཉི་མའི་ཉིན་ལྷོ་ཨ་ཕི་རི་ཀའི་ཡི་ཤུའི་བླ་ཆེན་ Desmond Tutu མཆོག་ དགུང་གྲངས་  ༩༠ ཐམ་པར་སྐུ་ཚེའི་འཕེན་པ་རྫོགས་པར་ལྷོ་ཨ་ཕི་རི་བ་ཚོས་བདུན་གཅིག་གི་རིང་ཡུལ་དེའི་ནང་མྱ་ངན་གུས་འདུད་དང་དམ་པ་ཁོང་གི་མཛད་རྗེས་རྣམས་དྲན་གསོ་ཞུས་ཏེ་ཟླ་བ་འདིའི་ཚེས་ ༡ ཉིན་ Cape Town  གྱི་ St. George ལྷ་ཁང་དུ་གཞུང་འབྲེལ་ཐོག་ནས་ཆོས་དཔོན་ཊུ་ཊུ་མཆོག་གི་འདས་མཆོད་ཀྱི་ཆོ་ག་བསྒྲུབས་ཡོད་པ་རེད། འོན་ཀྱང་ད་རེས་ལྷོ་ཨ་ཕི་རི་ཀའི་ནང་དུ་ཆོས་དཔོན་ཊུ་ཊུ་མཆོག་གི་’འདས་མཆོད་ཀྱི་ཆོ་གར་༸གོང་ས་མཆོག་ཆིབས་སྒྱུར་མཛད་ཐུབ་མིན་ཐད་གླེང་སློང་གང་ཙམ་ཞིག་བྱུང་ཡོད་པའི་ཁྲོད་ཡུལ་དེའི་ནང་ཡོད་པའི་ལྷོ་ཨ་ཕི་རི་ཀའི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཆོས་དཔོན་ཊུ་ཊུ་མཆོག་གི་གཞུང་འབྲེལ་འདས་མཆོད་ཀྱི་ཆོ་གར་མཉམ་ཞུགས་གནང་སྟེ་ཆོས་དཔོན་ཊུ་ཊུ་མཆོག་གི་ཐེབས་རྩའི་འགན་འཛིན་དང་མཇལ་འཕྲད་ཀྱིས་མ་འོངས་འཆར་གཞིའི་སྐོར་གྲོས་བསྡུར་གནང་བ་མ་ཟད། ཁུལ་དེར་ལྷན་འཛོམས་གནང་བའི་གནད་ཡོད་མི་སྣ་དང་ཆོས་ཕྱོགས་ཀྱི་མི་སྣ་སོགས་དང་མཇལ་མོལ་གྱིས་ཁོང་རྣམས་ནས་༸གོང་ས་སྐྱབས་མགོན་ཆེན་པོ་མཆོག་དང་ཆོས་དཔོན་ཊུ་ཊུ་གཉིས་ཀྱི་ཐུན་མོང་མ་ཡིན་པའི་མཛའ་འབྲེལ་ལ་ཡི་རང་བསྔགས་བརྗོད་གནང་བ་དང་འབྲེལ་གལ་ཏེ་ཏོག་དབྱིབས་གཉན་རིམས་ཀྱི་རྐྱེན་པས་འགྲུལ་བཞུད་ལ་བཀག་སྡོམ་མེད་ན་འདས་མཆོད་ཀྱི་ཆོ་གར་མགོན་པོ་༸གང་ཉིད་མཆོག་ཕེབས་ན་སྙམ་པའི་རེ་འདོད་ཡོད་སྐོར་གསུངས་ཡོད་པ་རེད། ཡི་ཤུའི་ཆོས་དཔོན་ཊུ་ཊུ་མཆོག་དགོངས་པ་རྫོགས་པར་ལྷོ་ཨ་ཕི་རི་ཀའི་ནང་གི་གནད་ཡོད་མི་སྣ་གཙོས་ཡུལ་དེའི་མང་ཚོགས་ཡོངས་ཙམ་མ་ཟད། འཛམ་གླིང་ས་ཕྱོགས་གང་ས་ནས་དམ་པ་ཁོང་ལ་མྱ་ངན་གུས་འདུད་ཞུ་བཞིན་པའི་ཁོངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀྱང་ཆོས་དཔོན་ཊུ་ཊུ་དགོངས་པ་རྫོགས་པའི་གནས་ཚུལ་གསན་མ་ཐག་ཐུགས་སྨོན་དང་ཁོང་གི་ཤུལ་ལུས་ནང་མི་རྣམས་ལ་ཐུགས་གསོའི་གསུང་འཕྲིན་སྩལ་གནང་ཡོད་པ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྤྱི་འཐུས་ཚོགས་གཙོ་བཅས་ནས་ཀྱང་ཐུགས་གསོའི་གསུང་འཕྲིན་གནང་ཡོད།