རྒྱལ་སྤྱི།

ཨ་རིའི་སྲིད་འཛིན་སྐུ་ཞབས་ Joe Biden མཆོག་དང་རྒྱ་ནག་དམར་ཤོག་ཚོགས་པའི་འགོ་ཁྲིད་ཞི་ཅིན་ཕིང་གཉིས་བྷ་ལི་ནང་ཚོགས་པའི་ G20 ལྷན་ཚོགས་ཀྱི་སྔ་རོལ་ཁ་སྔོན་རེས་གཟའ་ཟླ་བའི་ཉིན་མཇལ་འཕྲད་གནང་ཡོད་པ་དང་སྐབས་དེར་སྲིད་འཛིན་བྷ་ཌན་མཆོག་གིས་རྒྱ་ནག་གཞུང་ནས་བོད་དང་ཤིན་ཅང་ནང་ལག་བསྟར་བྱེད་བཞིན་པའི་དྲག་གནོན་ཅན་གྱི་སྲིད་བྱུས་ཁག་གཙོས་འགྲོ་བ་མིའི་ཐོབ་ཐང་སྐོར་གླེང་སློང་གནང་འདུགཁ་སྔོན་ཕྱི་ཚེས་ ༡༤ ཉིན་སྲིད་འཛིན་བྷ་ཌན་དང་ཞི་ཅིན་ཕིང་གཉིས་དབར་གྱི་མཇལ་མོལ་སྐོར་ཨ་རིའི་ཕོ་བྲང་དཀར་པོས་བསྒྲགས་གཏམ་ཞིག་སྤེལ་བར་དབུ་ཁྲིད་རྣམ་གཉིས་ཀྱིས་ཕྱོགས་སོ་སོའི་གནད་དོན་གལ་ཆེ་ཁག་གཙོ་གྱུར་གནད་དོན་མང་དག་ཅིག་གི་ཐོག་བསམ་ཚུལ་བརྗེ་ལེན་དང་། ལྷག་པར་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་ཏེ་སྲིད་འཛིན་བྷ་ཌན་མཆོག་གིས་རྒྱ་ནག་གཞུང་གིས་བོད་དང་ཤན་ཅང་། ཧོང་ཀོང་བཅས་ནང་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་ཐུགས་འཚབ་ཡོད་སྐོར་གསུངས་ཡོད་པ་གསལ་འདུག  ཐེ་ཝན་གྱི་གནད་དོན་དང་འབྲེལ་ཏེ་སྲིད་འཛིན་བྷ་ཌན་མཆོག་གིས་ཨ་རིའི་ངོས་ནས་རྒྱ་ནག་གཅིག་གི་སྲིད་བྱུས་ཐད་ཀྱི་བཞེངས་ཕྱོགས་ལ་འགྱུར་བ་མེད་ཀྱང་། རྒྱ་ནག་ནས་ཐེ་ཝན་གྱི་གནས་བབ་ལ་འགྱུར་བ་གཏོང་རྩིས་བྱ་ཚེ་དེར་དགག་པ་ཡོད་སྐོར་དང་སྒོས་འཛམ་གླིང་སྤྱི་ནས་ཐེ་ཝན་མཚོ་འགག་གི་ཞི་བདེ་བརྟན་ལྷིང་འདོད་ཀྱི་ཡོད་སྟབས་རྒྱ་ནག་ནས་ཐེ་ཝན་ལ་འཇིགས་སྐུལ་སོགས་ཀྱི་བྱ་སྤྱོད་ལ་དགག་པ་ཡོད་སྐོར་གསུངས་ཡོད་པ་གསལ་འདུག གཞན་ཡང་སྲིད་འཛིན་བྷ་ཌན་མཆོག་གིས་ཨ་རི་ནས་རྒྱ་ནག་དང་ལྷན་དུ་མུ་མཐུད་འགྲན་རྩོད་གནང་རྒྱུ་ཡིན་པ་དེ་ལྟར་ནའང་འགྲན་རྩོད་དེ་རྩོད་རྙོག་གི་ངོ་བོར་མ་ཆགས་པ་གནང་དགོས་པ་བསྐྱར་ནན་གནང་བ་དང་ཆབས་ཅིག་ཕན་ཚུན་ཕྱོགས་གཉིས་དབར་བཀའ་མོལ་གནང་རྒྱུའི་ལམ་ཁ་ཡོད་པར་གསུངས་ཡོད། དེ་བཞིན་བྷ་ཌན་གྱིས་ཨུ་རུ་སུས་ཡུཀ་རེན་ལ་དམག་རྒྱག་པ་དང་ཨུ་རུ་སུའི་རྡུལ་ཕྲན་མཚོན་ཆས་འཇིགས་སྐུལ་བཏང་བའི་སྐོར་གླེང་ཡོད་སྐོར་དང་།   ཨ་རྒྱ་གཉིས་ནས་གནམ་གཤིས་འགྱུར་ལྡོག་དང་འཕྲོད་བསྟེན་བདེ་འཇགས་སོགས་ཀྱི་དཀའ་ངལ་སེལ་ཐབས་ལ་མཉམ་སྦྲེལ་གནང་དགོས་པ་གསུངས་སྐོར་གསལ་འདུག གཞི་རྩའི་ཐེངས་འདིའི་སྲིད་འཛིན་བྷ་ཌན་དང་ཞི་ཅིན་ཕིང་གཉིས་དབར་གྱི་མཇལ་མོལ་དེ་ནི་སྐུ་ཞབས་བྷ་ཌན་སྲིད་འཛིན་གྱི་ཐུགས་འགན་བཞེས་ཏེ་དངོས་སུ་མཇལ་འཕྲད་གནང་བ་ཐོག་མ་ཆགས་ཡོད། དབུ་ཁྲིད་རྣམ་གཉིས་ཀྱི་མཇལ་མོལ་སྐབས་བྱུང་བའི་གནད་དོན་ཐད་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken མཆོག་གིས་རྗེས་སུ་རྒྱ་ནག་ལ་ཕེབས་ཏེ་དེ་འབྲེལ་མཇུག་སྐྱོང་གི་གོ་བསྡུར་གནང་རྒྱུ་ཡིན་པ་རེད།

ཁ་སང་ཕྱི་ཚེས་ ༡༤ ཉིན་ཡོ་རོབ་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ནང་ཅེཀ་གྲོས་ཚོགས་འཐུས་མི་དང་ཕྱི་སྲིད་ལས་དོན་མི་སྣ་སོགས་ལྷན་འཛོམས་གནང་སྟེ་ཅེཀ་སྤྱི་མཐུན་རྒྱལ་ཁབ་དང་ཡོ་རོབ་མཐུན་ཚོགས་ཀྱིས་བོད་ཀྱི་དཀའ་རྙོག་སེལ་ཐབས་སུ་གང་གནང་ཐུབ་བམ་ཞེས་པའི་གླེང་བརྗོད་ཐོག་གཞུང་འབྲེལ་བོད་དོན་ལྷན་ཚོགས་ཤིག་གནང་ཡོད། ཅེཀ་གྲོས་ཚོགས་སུ་ཚོགས་པའི་བོད་དོན་ལྷན་ཚོགས་དེ་ཅེཀ་གྲོས་ཚོགས་གོང་མའི་ཚོགས་གཞོན་སྐུ་ཞབས་ Jitka Seltvod ལགས་དང་སྐུ་ཞབས་ Jiri oberfaizer ལགས་རྣམ་གཉིས་ཀྱིས་གཙོ་འགན་བཞེས་ཏེ་ཅེཀ་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་ཅེཀ་བོད་དོན་རྒྱབ་སྐྱོར་ཚོགས་པ། ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་བཅས་ཀྱི་མཐུན་འགྱུར་འོག་གོ་སྒྲིག་ཞུས་པ་ཞིག་ཡིན་པ་རེད།ཐེངས་འདིའི་བོད་དོན་ལྷན་ཚོགས་ཐོག་བོད་ནང་གི་འགྲོ་བ་མིའི་ཐོབ་ཐང་གནས་སྟངས་དང་བོད་ནང་གི་དཀའ་ངལ་ཐོག་ཅེཀ་སྤྱི་མཐུན་རྒྱལ་ཁབ་དང་ཡོ་རོབ་མཐུན་ཚོགས་ནས་ཇི་ལྟར་སེལ་དགོས་པ།  བོད་ཀྱི་གནས་བབ་དང་བོད་རྒྱའི་དཀའ་རྙོག་སེལ་ཐབས་སུ་རྒྱལ་སྤྱིའི་འགན་འཁྲུར། བོད་ནང་གི་ཆོས་དད་རང་དབང་གནས་སྟངས། བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་སོགས་བརྗོད་གཞི་འདྲ་མིན་ཐོག་གཞུང་སྒེར་གནད་ཡོད་མི་སྣ་ཁག་གིས་བཀའ་བསྡུར་དང་གསུང་བཤད་གནང་ཡོད། ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྤྱི་ཟུར་དབང་པོ་བཀྲས་མཐོང་ལགས་ཀྱིས་འདི་ག་རླུང་འཕྲིན་ཁང་ལ་ཅེཀ་གྲོས་ཚོགས་སུ་གཞུང་འབྲེལ་བོད་དོན་ལྷན་ཚོགས་གནང་བ་འདིས་ཡོ་རོབ་རྒྱལ་ཁབ་གཞན་ཚོར་བརྡ་ལན་ནན་པོ་ཞིག་སྤྲད་ཡོད་པར་མ་ཟད་ཡོ་རོབ་མཐུན་ཚོགས་ཀྱིས་ཀྱང་ད་བར་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་གནང་སྟེ་བོད་རྒྱལ་ཁབ་འདི་ཉིད་རྒྱལ་སྤྱིའི་ཁྲིམས་ཐོག་ནས་རྒྱ་ནག་གིས་དབང་བསྒྱུར་བྱས་པར་ངོས་འཛིན་གནང་དགོས་པའི་བརྡ་ལན་ནན་པོ་ཞིག་གནང་ཐུབ་པ་བྱུང་ཡོད་ཅེས་འགྲེལ་བརྗོད་གནང་སོང།ཅེཀ་གྲོས་ཚོགས་ནང་ཚོགས་པའི་བོད་དོན་ལྷན་ཚོགས་ཐོག་གསུང་བཤད་གནང་མཁན་ཁོངས་སུ་ཅེཀ་གྲོས་ཚོགས་ཀྱི་ཚོགས་གཞོན་སྐུ་ཞབས་ Jiri oberfaizer ལགས་དང་ཅེཀ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Premysl Rabas ལགས། ཅེཀ་ཕྱི་སྲིད་ལས་ཁུངས་ཀྱི་བློན་ཆེན་གཞོན་པ་ Jiri Kazak ལགས། སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། ཡོ་རོབ་ནང་གཞུང་འབྲེལ་ཕྱོགས་སྐྱོད་དུ་ཕེབས་པའི་བོད་མི་མང་སྤྱི་འཐུས་རྣམ་པ། རྒྱལསྤྱིའི་ཁྲིམས་རྩོད་མཁས་དབང་སྐུ་ཞབས་ Michael Van walt Van praag ལགས། ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སོགས་ཆགས་ཀྱི་འདུགརྩ་བའི་ད་ལྟའི་ཆར་བོད་མི་མང་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་སྤྱི་འཐུས་བསྟན་པ་ཡར་འཕེལ་ལགས། སྤྱི་འཐུས་དབང་འདུས་རྡོ་རྗེ་ལགས་བཅས་སྤྱི་འཐུས་གསུམ་ལས་གྲུབ་པའི་ཚོགས་ཆུང་གིས་ཡོ་རོབ་རྒྱལ་ཁབ་ཁུལ་དུ་གཞུང་འབྲེལ་ཕྱོགས་སྐྱོད་གནང་བཞིན་ཡོད་པ་ལྟར། ཁ་སང་སྤྱི་འཐུས་རྣམ་པ་ཅེཀ་གྲོས་ཚོགས་སུ་ཚོགས་པའི་བོད་དོན་ལྷན་ཚོགས་ཐོག་མཉམ་ཞུགས་ཀྱིས་བོད་དོན་གཏམ་བཤད། དེ་བཞིན་ཅེཀ་གྲོས་ཚོགས་གོང་མའི་ཚོགས་གཞོན་དང་ཅེཀ་ཕྱི་སྲིད་ལས་ཁུངས་ཀྱི་བློན་ཆེན་གཞོན་པས་གཙོས་པའི་གཞུང་འབྲེལ་གནད་ཡོད་མི་སྣ་སོགས་དང་མཇལ་མོལ་གནང་ཡོད།

ཡོ་རོབ་རྒྱལ་ཁབ་ཨི་ཊ་ལི་གྲོང་ཁྱེར་ Milano ནང་ཟླ་ ༡༡ ཕྱི་ཚེས་ ༡༢ དང་༡༣ བཅས་ཉིན་གྲངས་གཉིས་རིང། Forever Tibet འམ་ཇི་སྲིད་བར་དུ་བོད་ཅེས་པའི་གླེང་བརྗོད་ཐོག་དེང་དུས་བོད་ཀྱི་རིག་གནས་དང་ཁོར་ཡུག དེ་བཞིན་ཆབ་སྲིད་ཀྱི་གནས་བབ་སོགས་ཀྱི་ཐོག་རྒྱལ་སྤྱིའི་རང་བཞིན་ལྡན་པའི་བོད་དོན་ལྷན་ཚོགས་ཞིག་བསྐོང་ཚོགས་གནང་ཡོད།ཐེངས་འདིའི་མི་ལཱ་ནོ་ནང་བསྐོང་ཚོགས་གནང་བའི་བོད་དོན་ལྷན་ཚོགས་དེ་ གཙོ་བོ་ཨི་ཊ་ལི་ནང་པའི་མཐུན་ཚོགས་གཙོ་འགན་བཞེས་ཐོག་ཨི་ཊི་ལི་དང་བོད་མཛའ་འབྲེལ་ཚོགས་པ། རྒྱལ་སྤྱིའི་བོད་དོན་ལས་འགུལ་ཁང། ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ཚོགས་པ། ཨི་ཊ་ལི་བོད་རིགས་ཚོགས་པ་བཅས་ཀྱི་མཐུན་འགྱུར་འོག་གོ་སྒྲིག་གནང་བ་ཞིག་ཆགས་ཀྱི་ཡོད་པ་རེད། ཉིན་གྲངས་གཉིས་རིང་གི་བོད་དོན་ལྷན་ཚོགས་དེ་དེང་དུས་བོད་ཀྱི་རིག་གནས་དང་བོད་ཀྱི་མཐོ་སྒང་གི་ཁོར་ཡུག་གནས་བབ། བོད་ཀྱི་ཆབ་སྲིད་ཀྱི་གནད་དོན་བཅས་ཀྱི་ཐོག་བགྲོ་གླེང་གནང་ཕྱིར་དམིགས་པ་ཞིག་ཡིན་པ་རེད།བོད་དོན་ལྷན་ཚོགས་ཐོག་བོད་དོན་ཉམས་ཞིབ་པ་དང་ལས་འགུལ་བ། གསར་འགོད་པ། སྤྱི་ཚོགས་ཞབས་ཞུ་བ། ཤེས་ཡོན་ཅན། ཤེས་ཡོན་ལྟེ་གནས་ཁང་གི་འགན་འཛིན། ཆབ་སྲིད་མི་སྣ་སོགས་གཙོ་ཞུགས་ཀྱིས་རྒྱ་ནག་གཞུང་གིས་དབང་བསྒྱུར་འོག་དེང་གི་དུས་སྐབས་སུ་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་དང་གཞིས་ལུས་བོད་མིའི་དཀའ་སྡུག བོད་མཐོ་སྒང་གི་ཁོར་ཡུག་གནས་བབ། སྐྱབས་བཅོལ་བོད་མིའི་དཀའ་ངལ། དེ་བཞིན་རྒྱ་གཞུང་གིས་འཆར་གཞི་ལྡན་པའི་སྲིད་བྱུས་ལག་བསྟར་བྱེད་བཞིན་པའི་འོག་བོད་ནང་ བོད་མིའི་ཆོས་དང་རིག་གཞུང་། སྐད་ཡིག་བཅས་རྩ་མེད་བཟོ་བཞིན་པའི་ཉེན་འཚབ་རང་བཞིན་གནད་དོན་སོགས་ཀྱི་ཐོག་བགྲེ་གླེང་གནང་ཡོད། སྤྱིར་ཐེངས་འདིའི་བོད་དོན་ལྷན་ཚོགས་ཐོག་གཏམ་གཤད་གནང་མཁན་ཁོངས་སུ་ Eurac ཉམས་ཞིབ་ལྟེ་གནས་ཁང་གི་ཤེས་ཡོན་དང་སྦྱོང་བརྡར་ཚན་པའི་འགན་འཛིན་ Gunther  Cologna ལགས་དང་ཨི་ཊ་ལི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཟུར་པ། Luciano Nobilil ལགས། རྒྱལ་སྤྱིའི་ཁྲིམས་རྩོད་མཁས་དབང་། Michael van ལགས་དང། བཀའ་ཟུར་རྗེ་བཙུན་པདྨ་མཆོག ༸གོང་ས་མཆོག་གི་ཡོ་རོབ་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས། ཨེ་མོ་རི་གཙུག་ལག་སློབ་གཉེར་ཁང་གི་སཱི་ཤེས་ཡོན་སློབ་གསོའི་འབྲེལ་མཐུད་པ་དགེ་བཤེས་བློ་བཟང་བསྟན་འཛིན་ནེ་གི་ལགས། དེ་བཞིན་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཙོས་ཕྱི་ནང་གི་མང་ཚོགས་ ༢༠༠ ལྷག་འདུ་འཛོམས་གནང་འདུག ཕྱི་ཚེས་ ༡༢ སྟེ་སྐབས་དེའི་བོད་དོན་ལྷན་ཚོགས་ཀྱི་ཉིན་དང་པོའི་དབུ་འབྱེད་དང་འབྲེལ་ཏེ་ཨི་ཊ་ལི་ Milano ནང་དུ་༸གོང་ས་མཆོག་གི་༸སྐུའི་མཛད་རྣམ་དང་འབྲེལ་བའི་དངོས་བྱུང་གློག་བརྙན་ Never Forget Tibet འམ་བོད་དུས་ནམ་ཡང་མ་བརྗེད་ཅེས་དངོས་བྱུང་གློག་བརྙན་དེ་ཕྱི་ནང་གི་གསར་འགོད་པ་དང་ཚོགས་བཅར་བ་ཚོར་གཟིགས་འབུལ་ཞུས་འདུག་པར་མ་ཟད་གློག་བརྙན་བཟོ་བསྐྲུན་གནང་མཁན་སྐུ་ཞབས་ Jean Paul Mertinez ལགས་དང་བཀའ་ཟུར་ལྷ་སྐུ་རྗེ་བཙུན་པདྨ་མཆོག་གཙོ་བཞུགས་ཐོག་གསར་འགོད་ལྷན་ཚོགས་བསྐོང་ཚོགས་གནང་འདུག

ཕྱི་ཟླ་ ༡༡ ཚེས་ ༨ ཉིན་མེཀ་སི་ཀོ་གྲོས་ཚོགས་ནང་སྐུ་ཞབས་ Salvador Caro Cabrera ལགས་ཀྱིས་མེཀ་སི་ཀོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བའི་གསལ་བསྒྲགས་གནང་ཡོད་པ་དང་འབྲེལ་ཏེ་ཕྱི་ཚེས་ ༩ ཉིན་མེག་སི་ཀོའི་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་གཞུང་ཚབ་པས་མེག་སི་ཀོའི་གྲོས་ཚོགས་སུ་སླེབས་ཐབས་ཀྱིས་གྲོས་ཚོགས་ཀྱི་ཚོགས་གཙོ་མཆོག་དང་ལྷན་མཇལ་འཕྲད་ཞུས་ནས་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བར་སྐྱོན་བརྗོད་བྱས་འདུགགནད་དོན་དེའི་ཐོག་གསལ་བཤད་དགོས་པ་དང་ གྲོས་ཚོགས་ཀྱི་ཚོགས་ཁང་ནང་རྒྱ་ནག་གི་རྒྱལ་དར་འཕྱར་དགོས་པ་སོགས་ཀྱི་དགོས་འདུན་བཏོན་ཡོད།ཉེ་ཆར་ཚེས་ ༩ ཉིན་མེཀ་སི་ཀོ་ནང་གི་རྒྱ་ནག་གཞུང་ཚབ་པ་གྲོས་ཚོགས་སུ་སླེབས་ཐབས་བྱས་ནས་གྲོས་ཚོགས་ཀྱི་ཚོགས་གཙོ་མཆོག་དང་ལྷན་མཇལ་འཕྲད་ཀྱིས་མེཀ་སི་ཀོ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བར་སྐྱོན་བརྗོད་དང་སྦྲགས་ཏེ། མེཀ་སི་ཀོ་གྲོས་ཚོགས་ཀྱི་ཚོགས་ཁང་ནང་རྒྱ་ནག་གི་རྒྱལ་དར་འཕྱར་དགོས་པའི་དགོས་འདུན་བཏོན་པར་མ་ཟད། རྒྱ་ནག་གཞུང་གིས་བོད་རྒྱབ་སྐྱོར་གནང་རྒྱུའི་ཐོབ་ཐང་དང་རང་དབང་ཆ་ཚང་ལྡན་པའི་རང་དབང་ལུང་པའི་རྒྱལ་ཁབ་ཀྱི་དབུ་ཁྲིད་དང་མི་སྒེར་བཅས་ཀྱི་རང་དབང་ལ་དམ་བསྒྲགས་བྱེད་ཐབས་སླད་མེཀ་སི་ཀོ་གྲོས་ཚོགས་ཀྱི་འགྲོ་ལུགས་ལ་བརྩི་མེད་བཏང་བ་ནི་བཟང་སྤྱོད་དང་མང་གཙོོའི་ལམ་ལུགས་དང་ཡོངས་སུ་རྒྱབ་འགལ་ཆགས་ཀྱི་ཡོད་པར་གསུངས་ཡོད།སྐུ་ཞབས་ Deputy Salvador Caro Cabrera མཆོག་གིས་རྒྱ་ནག་གཞུང་ཚབ་ཁང་གིས་ངོ་རྒོལ་སྐྱོན་བརྗོད་བྱས་པར་དགག་ལན་གནང་སྐབས་ཐེངས་འདིའི་མེག་སི་ཀོ་གྲོས་ཚོགས་ནང་མེག་སི་ཀོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བའི་གནད་དོན་དེ་ནི་བོད་མི་མང་ཚོགས་ཀྱི་བཟང་ཕྱོགས་ཀྱི་རྒྱལ་ཁ་ཞིག་ཡིན་པ་དང་། ང་ཚོའི་ཤུགས་རྐྱེན་བརྒྱུད་ནས་རྒྱ་ནག་གི་མི་རིགས་རྩ་གཏོར་རང་བཞིན་ One China Policy འམ་རྒྱ་ནག་གཅིག་གི་སྲིད་བྱུས་དེ་མངོན་གསལ་བྱུང་ཡོད་པར་དགའ་ཚོར་ཆེན་པོ་བྱུང་ཞེས་གསུངས་པ་དང་ཆབས་ཅིག་ཏུ་བོད་རང་བཙན་ཞེས་གསུངས་འདུགརྒྱ་ནག་གཞུང་གིས་རྒྱལ་ཁབ་གཞན་གྱི་ཐོག་གནོན་ཤུགས་སྤྲད་པའི་གནད་དོན་སོགས་ད་རེས་ཐེངས་དང་པོ་མ་ཡིན་པར་དེ་སྔ་ལན་མང་བྱས་ཡོད་པའི་ཁྲོད་རྒྱ་ནག་གཞུང་གིས་རྒྱ་གར་གྲོས་ཚོགས་འཐུས་མི་ཁག་གཅིག་ལ་བོད་མི་མང་སྤྱི་འཐུས་ལྷན་ཚོགས་ཀྱི་དགོང་ཚིགས་གསོལ་སྟོན་ཐོག་ལྷན་ཞུགས་གནང་བར་སྐྱོན་བརྗོད་བྱས་ཡོད་པ་དེ་ལྟར་ནའང་། རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་སླར་གསོ་གནང་བའི་གནས་སྟངས་ཀྱང་བྱུང་མྱོང་ཡོད་པ་རེད།

དབྱིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ལྷན་ཞུགས་ཐོག་ཡོ་རོབ་ Lithuania རྒྱལ་ཁབ་ཀྱི་གྲོས་ཚོགས་ནང་དུ་བོད་དོན་སྐོར་ཉན་ཞིབ་ཀྱི་ལས་རིམ་ཞིག་ཚོགས་འདུག་པ་དང་། སྐབས་དེར་སྐུ་ཚབ་དོན་གཅོད་ནས་ཡུལ་དེའི་གྲོས་ཚོགས་ནས་ལོ་རྒྱུས་ཐོག་བོད་འདི་རྒྱ་ནག་གི་ཆ་ཤས་མིན་པ་དང་། བོད་རྒྱའི་དཀའ་རྙོག་སེལ་རྒྱུའི་ཐབས་ལམ་སོགས་ཀྱི་ཐོག་ལ་གྲོས་ཆོད་གཏན་འབེབས་ཡོང་བའི་འབོད་སྐུལ་ཞུས་འདུགཉེ་ལམ་ཕྱི་ཚེས་ ༧ ཉིན་ཚོགས་པའི་བོད་དོན་ཉན་ཞིབ་ཀྱི་ལས་རིམ་དེའི་ཐོག་དབྱིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་བོད་དོན་རྒྱབ་སྐྱོར་བ་སྐུ་ཞབས་ Michael Van Walt Van Praag ལགས། དེ་བཞིན་ལི་ཐུ་ནི་ཡའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་ Laima Andrikienė ལགས་དང་གྲོས་ཚོགས་འཐུས་མི་སྐུ་ཞབས་ Andrius Navickas ལགས། དེ་བཞིན་འབྲེལ་ཡོད་ལས་བྱེད་སོགས་ལྷན་ཞུགས་གནང་འདུག སྐབས་དེར་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ལི་ཐུ་ནི་ཡ་དང་བོད་དོན་བར་གྱི་འབྲེལ་བ་དང་འབྲེལ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཚེ་མེད་ཞི་བའི་ལྟ་གྲུབ་དང་། གོ་ལ་འདིའི་ནང་ཞི་བདེ་དང་མཉམ་གནས་དགོས་རྒྱུའི་གལ་གནད་སོགས་ཀྱི་ལམ་སྟོན་བཀའ་སློབ་ཁག་ལ་ལི་ཐུ་ནི་ཡའི་མི་མང་རྣམས་ནས་དགའ་མོས་ཆེན་པོ་བྱེད་ཀྱི་ཡོད་པ་སོགས་འགྲེལ་བརྗོད་དང་སྦྲགས། མགོན་པོ་༸གང་ཉིད་མཆོག་ནས་ཀྱང་ལི་ཐུ་ནི་ཡས་རང་དབང་དང་། མང་གཙོ། དེ་བཞིན་དྲང་བདེན་སོགས་སྲུང་སྐྱོབ་ཐད་ལ་བཅངས་པའི་སྙིང་སྟོབས་ལ་རྟག་ཏུ་སྔགས་བརྗོད་མཛད་ཀྱི་ཡོད་པ་གསུངས་འདུགད་ལྟའི་ཆར་ཞི་ཅིན་ཕིང་གི་དབང་སྒྱུར་འོག་མི་རིགས་གཅིག རིག་གཞུང་གཅིག སྐད་ཡིག་གཅིག་ཅེས་པའི་སྲིད་བྱུས་ལག་བསྟར་འོག་བོད་ཀྱི་ཆོས་དང་རིག་གཞུང་། སྐད་ཡིག་སོགས་ཉམས་དམས་སུ་འགྲོ་བཞིན་པའི་གནས་སྟངས་ངོ་སྤྲོད་དང་འབྲེལ། རྒྱ་དམར་གཞུང་གིས་བོད་རྒྱ་འགྱུར་གྱི་སྲིད་བྱུས་དེའི་བརྒྱུད་ནས་བོད་ནང་ལོ་ན། ༦ ནས་ ༡༨ བར་གྱི་ཕྲུ་གུ་རྣམས་བཅའ་སྡོད་སློབ་གྲྭར་བཅུག་གི་ཡོད་པ་མ་ཟད། ཕྱི་ལོ་ ༢༠༢༠ ལོར་དེ་འབྲེལ་སྙན་ཐོ་ཞིག་ཀྱང་འདོན་སྤེལ་གནང་ཡོད་པ་དེའི་ནང་བོད་ཕྲུག་བརྒྱ་ཆ་ ༧༨ ལྷག་རང་ཉིད་ཀྱི་ཕ་མ་དང་ཁ་བྲལ་བཏང་སྟེ་རྒྱ་ནག་གིས་བཟོས་པའི་བཅའ་སྡོད་སློབ་གྲྭར་བཅུག་ཡོད་པ་འགྲེལ་བརྗོད་གནང་འདུགལྷག་པར་དུ་ཉེ་ལམ་རྒྱ་ནག་གཞུང་གིས་བོད་ནང་ལ་བཙན་དབང་ཐོག་བོད་མིའི་གཟུངས་ཁྲག་ནས་ DNA རིགས་རྫས་མཁོ་སྒྲུབ་ཇེ་ཆེར་བྱེད་བཞིན་པའི་གནས་ཚུལ་སྐོར་དང་། ཕྱོགས་ཡོངས་ནས་རྒྱ་ནག་གཞུང་གིས་ཆོས་དད་རང་དབང་གཙོས་པའི་བོད་མིའི་གཞི་རྩའི་འགྲོ་བ་མིའི་ཐོབ་ཐང་ཁག་རྩིས་མེད་རྡོག་རོལ་གཏོང་བཞིན་པ་སོགས་འགྲེལ་བརྗོད་དང་སྦྲགས། ཐེངས་འདིའི་ཉན་ཞིབ་ལས་རིམ་བརྒྱུད་ Lithuania རྒྱལ་ཁབ་ཀྱི་གྲོས་ཚོགས་ངོས་ནས་ལོ་རྒྱུས་ཁྲོད་བོད་འདི་རྒྱ་ནག་གི་ཆ་ཤས་མིན་པ་དང་། བོད་རྒྱའི་དཀའ་རྙོག་སེལ་ཐབས་སོགས་ཀྱི་ཐད་ལ་གྲོས་ཆོད་ཞིག་ངེས་པར་དུ་གཏན་འབེབས་ཡོང་བའི་འབོད་སྐུལ་ཞུས་ཡོད།གཞན་ཡང་སྐབས་དེར་སྐུ་ཞབས་ Michael Van Walt Praag ལགས་ཀྱིས་དེང་གི་དུས་སུ་རྒྱལ་སྤྱིའི་སྲིད་གཞུང་མང་པོས་རྒྱ་ནག་གཞུང་ལ་ངོ་སྲུང་དང་བསྟུན་མཁས་བྱས་ཏེ་བོད་ཀྱི་གནད་དོན་ཐོག་གླེང་སློང་གནང་རྒྱུར་འཛེམས་ཟོན་བྱེད་བཞིན་པ་དེ་ནི། རྒྱ་ནག་གཞུང་གི་བོད་རིགས་རྩ་མེད་བཟོ་རྒྱུའི་སྲིད་བྱུས་ལ་རྒྱབ་སྐྱོར་བྱེད་པ་ཞིག་མཚོན་གྱི་ཡོད་པ་སོགས་འགྲེལ་བརྗོད་དང་། ང་ཚོས་བོད་ཀྱི་བདེན་པའི་གནས་ཚུལ་འདི་ཉིད་སྣང་མེད་སྐྱུར་འཇོག་བྱ་རྒྱུ་མེད་ཅིང་། བོད་འདི་བཞིན་རྒྱ་ནག་གི་མི་ལོ་ ༧༠ རིང་ལ་ཁྲིམས་མཐུན་གྱི་དབང་སྒྱུར་ཡིན་ལུགས་བཤད་པ་དེར་གདོང་ལེན་མ་བྱེད་པར་གནས་ཐབས་མེད་པ་མ་ཟད། ཁྲིམས་འགལ་གྱིས་དབང་སྒྱུར་བྱེད་པ་དེ་དག་ནམ་ཡང་ཁྲིམས་མཐུན་གྱི་གནས་བབ་ཆགས་ཐབས་མེད་པ་རེད་སོགས་གསུངས་འདུགདེ་བཞིན་ལི་ཐུ་ནི་ཡའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་ལྕམ་སྐུ་ Laima Andrikienė ལགས་དང་གྲོས་ཚོགས་འཐུས་མི་སྐུ་ཞབས་ Andrius Navickas ལགས་ནས་ཀྱང་བོད་ཀྱི་གནད་དོན་ཐོག་ལ་ཐུགས་འཚབ་ཀྱི་རྣམ་པ་དང་། རྒྱ་གཞུང་གིས་བོད་ནང་ལས་བསྟར་བྱེད་བཞིན་པའི་སྲིད་བྱུས་དང་བྱ་སྤྱོད་ཁག་ཁྲིམས་འགལ་ཡིན་པ་སོགས་ཀྱི་གསུང་བཤད་གནང་ཡོད།ཕྱོགས་མཚུངས་ཁ་སང་ཕྱི་ཚེས་ ༡༣ ཉིནབོད་དོན་རྒྱབ་སྐྱོར་བ་དང་རྒྱལ་སྤྱིའི་ཁྲིམས་དོན་མཁས་པ་སྐུ་ཞབས་མ་ཡི་ཀེལ་ཝན་ཝལ་ཊ་ཝན་པ་རག་ Michael van Walt van Praag ལགས་སྦེལ་ཇམ་གྱི་རྒྱལ་ས་སྦར་སེལ་ Brussels དུ་ཉིན་གྲངས་གཅིག་རིང་ཆེད་ཕེབས་ཀྱིས་ཡུ་རོབ་དང་སྦེལ་ཇམ་གྱི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་གནང་སྟེ། ཡུ་རོབ་དང་སྦེལ་ཇམ་གྱི་གྲོས་ཚོགས་འཐུས་མི་ཁག་ཅིག་དང་ལྷན་དུ་བོད་རྒྱའི་དཀའ་རྙོག་སེལ་ཐབས་སུ་ཁྲིམས་ཐོག་ནས་ལྟ་སྟངས་དང་། བོད་རྒྱའི་དཀའ་རྙོག་སེལ་རྒྱུར་རྒྱལ་སྤྱིའི་ཚོགས་སྡེ་ཁག་ལའང་འགན་ཡོད་པ་སོགས་ཀྱི་ཐོག་ལ་གྲོས་བསྡུར་གནང་འདུག

ཡུན་རིང་ནས་འདི་ག་ཡོ་རོབ་རྒྱལ་ཁབ་ནང་དུ་འཇར་མན་སྐད་ཡིག་སྤྱོད་མཁན་གྱི་རྒྱལ་ཁབ་ཁག་གི་གཞུང་མང་ལ་བོད་ནང་གི་དངོས་ཡོད་གནས་ཚུལ་གོ་རྟོགས་དང་བོད་དོན་ཞུ་གཏུག་གནང་མཁན་སྐུ་ཞབས་ Uwe Meya ལགས་ཀྱིས་ཕྱི་ལོ་ ༢༠༠༢ ནས་ ༢༠༢༡ བར་རྒྱ་གཞུང་གི་དྲག་གནོན་འོག་བོད་ནང་བྱུང་བའི་གནས་ཚུལ་ཁག་འཇར་མན་སྐད་ཡིག་ཐོག་ཕྱོགས་སྒྲིག་ཞུས་པ་ Fukus Tibet ཞེས་པའི་ཕྱག་དེབ་ཅིག་འགྲེམས་སྤེལ་གནང་འདུགསྐུ་ཞབས་ Uwe Meya ལགས་ཀྱིས་འཇར་མན་སྐད་ཡིག་ནང་བོད་གནས་ཕྱོགས་སྒྲིག་ཞུས་པའི་ཕྱག་དེབ་ནང་གཙོ་བོ་འདས་པའི་ལོ་ངོ་ ༢༠ ལྷག་གི་རིང་རྒྱ་གཞུང་གི་དྲག་གནོན་དང་དམ་བསྒྲགས་ཅན་གྱི་སྲིད་བྱུས་འོག་བོད་མིས་སྐུ་ལུས་ཞུགས་འབུལ་གནང་བ་མཚོན་བོད་ནང་བྱུང་བའི་བོད་མིའི་ལས་འགུལ་ཁག་དང་རྒྱ་ནག་གཞུང་གིས་ད་བར་བོད་མི་འཛིན་བཟུང་དང་བཙོན་འཇུག བོད་ཀྱི་ཆོས་རིག སྐད་ཡིག་བཅས་པ་རྩ་མེད་བཟོ་ཐབས་ཀྱི་སྲིད་བྱུས་སྤེལ་ཁག་དང། དེ་བཞིན་རྒྱལ་སྤྱིའི་ཁྲོད་བོད་དོན་ཞུ་གཏུག་དང་གོ་རྟོགས་ལས་འགུལ་སྤེལ་བ་སོགས་གསལ་བའི་བོད་གནས་ཕྱོགས་སྒྲིག་ཞུས་པའི་ཕྱག་དེབ་ཅིག་ཆགས་ཀྱི་ཡོད་པ་རེད།སྐུ་ཞབས་ Uwe Meya ལགས་ཀྱིས་ཕྱི་ལོ་ ༢༠༠༢ ལོར་ཁོང་འཇར་མན་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གནང་སྐབས་ནས་བཟུང་སྟེ་བོད་ནང་བྱུང་བའི་གནས་ཚུལ་ཁག་ཕྱོགས་སྒྲིག་གནང་ཞིང་། དུས་ནས་དུས་སུ་འབྲེལ་ཡོད་བོད་དོན་རྒྱབ་སྐྱོར་ཚོགས་པ་ཁག་ལ་བོད་གནས་ཆེད་གཏོང་གནང་གི་ཡོད་པ་རེད་འདུག ཕྱི་ཟླ་ ༡༡ ཕྱི་ཚེས་ ༤ ཉིན་སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་གདན་ཞུས་ཐོག་དབུ་འབྱེད་གནང་ཡོད་ཅིང། དབུ་འབྱེད་འདུ་འཛོམས་ཐོག་སུད་བོད་མཐུན་གྲོགས་ཀྱི་ཚོགས་གཙོ་གཙོས་རྒྱུན་ལས་རྣམས་ཕེབས་འདུག སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སྐུ་ཞབས་ Uwe Meya ལགས་ཀྱིས་བོད་གནས་ཕྱོགས་སྒྲིག་ཞུས་པའི་ཕྱག་དཔེ་བརྒྱུད་ནས་འཇར་མན་སྐད་ཡིག་ལོངས་སུ་སྤྱོད་མཁན་ཚོར་བོད་ནང་བྱུང་བའི་དངོས་ཡོད་གནས་ཚུལ་ཁག་སྟབས་བདེ་པོའི་ཐོག་ནས་ལྟ་ཀློག་ཐུབ་པ་དང་ཞིབ་འཇུག་གི་རྩ་འཛིན་དུ་ཕན་ཐོགས་ངེས་ཡིན་པར་གསུངས་ཡོད། རྩ་བའི་ Fukus Tibet ཞེས་པའི་དཔེ་དེབ་རྩོམ་པ་པོ་སྐུ་ཞབས་ Uwe Meya ལགས་ནི་ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་ཞིག་དང། དེ་སྔ་ཕྱི་ལོ་ ༡༩༨༨ ལོར་བོད་ཀྱི་རྒྱལ་ས་ལྷ་སར་བྱུང་བའི་བོད་མིའི་ཞི་རྒོལ་ཆེན་མོ་དངོས་སུ་གཟིགས་མཁན་ཕྱི་རྒྱལ་མི་རིགས་ཤིག་ཆགས་ཡོད་པར་མ་ཟད། ཁོང་གིས་ Tibet initiatve Deutschland ཞེས་འཇར་མན་བོད་དོན་རྒྱབ་སྐྱོར་ཚོགས་པ་ཆེས་ཐོག་མ་གསར་འཛུགས་གནང་ཡོད། ད་ལྟའི་ཆར་ཁོང་གི་སུད་བོད་མཐུན་གྲོགས་ཀྱི་འགན་འཛིན་ལྷན་ཚོགས་ཀྱི་ཚོགས་མི་ཞིག་ཀྱང་ཆགས་ཀྱི་ཡོད་པ་རེད།

འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཐེངས་ཉི་ཤུ་རྩ་བདུན་པ་ཚོགས་པ་དང་བསྟུན་བོད་ཀྱི་ཁོར་ཡུག་ཉམས་ཞིབ་པ་དང་ལས་འགུལ་བ་བཅས་ལས་གྲུབ་པའི་རུ་ཁག་ཞིག་གིས་བོད་ཀྱི་ཁོར་ཡུག་གནད་དོན་དང་འབྲེལ་བའི་ཞུ་གཏུག་ལས་འགུལ་སྤེལ་བཞིན་འདུགཁ་སང་ཚེས་ ༦ ཉིན་Eygpt རྒྱལ་ཁབ་ཀྱི་གྲོང་ཁྱེར་ Sharm El Sheikh ནང་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་དང་འབྲེལ་བའི་ COP 27 ཞེས་པའི་ཁོར་ཡུག་ལྷན་ཚོགས་དབུ་འཛུགས་གནང་བའི་ཐོག་རྒྱལ་སྤྱིའི་རྒྱལ་ཁབ་ ༡༢༠ ལྷག་གི་དབུ་ཁྲིད་དང་སྐུ་ཚབ་སོགས་ཁྱོན་གནད་ཡོད་མི་སྣ་ཁྲི་ཚོ་ལྷག་ལྷན་འཛོམས་གནང་ཡོད་པར་མ་ཟད། བོད་མིའི་ཁྲོད་ནས་དངོས་སུ་མཉམ་ཞུགས་གནང་ཐུབ་མཁན་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་དོན་གྲུབ་དབང་མོ་ལགས་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་འབུམ་རམས་པ་བློ་བཟང་དབྱངས་མཚོ་ལགས། བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་པདྨ་སྒྲོལ་མ་ལགས། ཨེ་ལིངྣ་ལགས། བོད་གནས་ལྟ་ཞིབ་ཁང་གི་ཉམས་ཞིབ་པ་བསྟན་འཛིན་ཆོས་སྐྱིད་ལགས་བཅས་ཆགས་ཀྱི་འདུག ཁ་སང་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་དངོས་སུ་དབུ་འཛུགས་གནང་བ་དང་བསྟུན། བོད་མིའི་སྐུ་ཚབ་རྣམས་ཀྱིས་སྐབས་དེར་ཁོར་ཡུག་དང་འགྲོ་བ་མིའི་ཐོབ་ཐང་གི་གནད་དོན་ཐོག་ཕྱག་ལས་གནང་མཁན་ཁག་གཅིག་གིས་གོ་སྒྲིག་གནང་བའི་ཚོགས་འདུ་ཐོག་མཉམ་ཞུགས་གནང་སྟེ་བོད་མཐོ་སྒང་གི་ཁོར་ཡུག་དང་གནམ་གཤིས་གནས་སྟངས་ཀྱི་གལ་གནད། ལྷག་དོན་རྒྱ་ནག་གི་བཙན་འཛུལ་འོག་བོད་ཀྱི་ཁོར་ཡུག་ལ་གནོད་འཚེ་ཕོག་པའི་གནད་དོན་ཁག་གི་ཐོག་གཏམ་བཤད་གནང་བ་དང་ཆབས་ཅིག་ཁོར་ཡུག་གནད་དོན་ཐོག་ཕྱག་ལས་གནང་མཁན་རྒྱལ་ཚོགས་ཀྱི་སྐུ་ཚབ་ཁག་གཅིག་དང་རྒྱ་གར་དབུས་གཞུང་གི་ཁོར་ཡུག་བློན་ཆེན་སྐུ་ཞབས་ Bhunpender Yadav མཆོག་བཅས་ལ་ཞུ་གཏུག་ཡིག་ཆ་ཕུལ་འདུགརྩ་བའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོི་ལའི་གནམ་གཤིས་འགྱུར་ལྡོག་གི་ལྷན་ཚོགས་ཐེངས་ཉི་ཤུ་རྩ་བདུན་པ་ཁ་སང་ནས་ཚེས་ ༡༨ བར་ཉིན་གྲངས་ ༡༢ རིང་ཚོག་ཀྱི་ཡོད་པ་དང་བསྟུན་སང་ཉིན་བོད་མིའི་སྐུ་ཚབ་ཀྱི་ངོས་ནས་ཁུལ་དེའི་ Regency མགྲོན་ཁང་ནང་དུ་ཁོར་ཡུག་ཐོག་གི་གཏམ་བཤད་ལས་རིམ་ཞིག་ཐོག་མཉམ་ཞུགས་གནང་རྒྱུ་གཙོས་དེ་ནས་ཚེས་ ༡༢ དང་ ༡༦ བཅས་ལའང་ COP 27 ཚོགས་འདུ་འཚོག་ཡུལ་དེ་ཉིད་ཀྱི་ཚོགས་ཁང་ཆེན་མོ་ཞིག་ནང་ཚོགས་པ་ཁག་ཅིག་གིས་གོ་སྒྲིག་གནང་རྒྱུའི་ཁོར་ཡུག་ཚོགས་འདུ་འདྲ་མིན་གཉིས་ནང་མཉམ་ཞུགས་ཀྱིས་བོད་ཀྱི་ཁོར་ཡུག་གནད་དོན་སྐོར་གཏམ་བཤད་དང་ཞུ་གཏུགས་གང་མང་གནང་རྒྱུ་རེད་འདུག

དེ་རིང་དང་སང་ཉིན་བཅས་ཉིན་གྲངས་གཉིས་རིང་ཡོ་རོབ་འཇར་མ་ནིའི་རྒྱལ་ཁབ་ཀྱི་གྲོང་ཁྱེར་ Munster ནང་ G7 ཞེས་ཨ་རི་དང་དབྱིན་ཡུལ། ཁེ་ན་ཌ་དང་ཕ་རན་སི། ཨི་ཊ་ལི། འཇར་མན། དེ་བཞིན་ཉི་ཧོང་བཅས་རྒྱལ་སྤྱིའི་མང་གཙོའི་རྒྱལ་ཁབ་ཆེ་གྲས་བདུན་གྱི་ཕྱི་སྲིད་བློན་ཆེན་རྣམ་པའི་ལྷན་ཚོགས་ཤིག་ཚོགས་ཀྱི་ཡོད་པ་དང་བསྟུན། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ལྷན་ཚོགས་ཐོག་འགྲོ་བ་མིའི་ཐོབ་ཐང་གཙོས་བོད་དོན་དང་འབྲེལ་བའི་གནད་དོན་ཁག་ལ་ངེས་པར་དུ་གླེང་སློང་གནང་དགོས་པའི་ཞུ་སྐུལ་གནང་འདུག ཞུ་སྐུལ་ནང་རྒྱ་གཞུང་གི་དྲག་པོའི་སྲིད་བྱུས་དེ་དག་བོད་དང་བོད་མིའི་གནད་དོན་ལ་གནོད་སྐྱོན་དང་དོ་ཕོག་གཏོང་བཞིན་པ་མ་ཟད་བོད་ཀྱི་ཁྱིམ་མཚེས་རྒྱལ་ཁབ་ཁག་གིས་གཙོས་པའི་རྒྱལ་སྤྱིའི་ཁྱོན་ཡོངས་ཀྱི་བདེ་འཇགས་ལའང་གནོད་སྐྱོན་དང་དོ་ཕོག་ཆེན་པོ་གཏོང་བཞིན་ཡོད་པ་སོགས་འགྲེལ་བརྗོད་དང་སྦྲགས། ཕྱི་སྲིད་བློན་ཆེན་རྣམ་པའི་ཚོགས་འདུ་ཐོག་རྒྱ་ནག་གི་སྲིད་བྱུས་དེ་དག་གི་ཤུགས་རྐྱེན་དང་གདོང་ལེན་གནང་ཕྱོགས་སོགས་ལ་དགོངས་པ་བཞེས་གལ་ཆགས་ཡོད་པ་གསུངས་འདུག འདས་པའི་ལོ་བཅུའི་ནང་ཞི་ཅིང་ཕིང་གི་དབང་འཛིན་འོག་རྒྱ་ནག་འདི་སྔར་ལས་ཆེས་དམ་བསྒྲགས་ཆེ་ཞིང་དྲག་པོའི་དམག་ཆས་ཀྱིས་བཀྲིས་པའི་གཅིག་སྡུད་རིང་ལུངས་ཀྱི་རྒྱལ་ཁབ་ཅིག་ཏུ་གྱུར་ཡོད། བོད་ལ་ཆ་མཚོན་ན་རྒྱ་ནག་དམར་ཤོག་གཞུང་གིས་བོད་ཕྲུག་གཙོས་བོད་མི་རྣམས་རང་ཉིད་ཀྱི་སྐད་ཡིག་དང་ནང་ཆོས་སོགས་ཐུན་མོང་མ་ཡིན་པའི་རིག་གཞུང་ཁག་དང་རྒྱང་ཐག་རིང་དུ་གཏོང་བཞིན་ཡོད་པ་སོགས་འགྲེལ་བརྗོད་དང་སྦྲགས། རྒྱལ་སྤྱིའི་འགོ་ཁྲིད་དང་མང་ཚོགས་རྣམས་ཀྱིས་རྒྱ་གཞུང་གི་ཐབས་བྱུས་ལྡན་པའི་སྲིད་བྱུས་དེ་དག་ལ་ངོས་ལེན་གནང་རྒྱུ་མེད་པར་མ་ཟད་ལྷག་པར་དུ་རྒྱ་གཞུང་གིས་བོད་གཙོས་ཤིན་ཅང་དང་ཧོང་ཀོང་སོགས་ཀྱི་ནང་ལག་བསྟར་བྱེད་བཞིན་པའི་སྲིད་བྱུས་ཁག་ལ་རྒྱལ་སྤྱིའི་འགོ་ཁྲིད་རྣམ་པས་གླེང་སློང་དང་གདོང་ལེན་སོགས་མ་གནང་བར་སྣང་མེད་དུ་བཏང་ཚེ་རྒྱ་ནག་གཞུང་ནས་ད་ཡོད་སྲིད་བྱུས་ཁག་གི་ཐོག་ལ་མུ་མཐུད་དྲག་པོའི་སྲིད་གཞན་ལག་བསྟར་བྱེད་ཀྱི་རེད་ཅེས་གསུངས་འདུག རྒྱལ་སྤྱིའི་བོད་དོན་ལས་འགུལ་ཁང་ནས་ཐེངས་འདིའི་ཕྱི་སྲིད་བློན་ཆེན་རྣམ་པའི་ཚོགས་འདུ་ཐོག་རྒྱ་ནག་གཞུང་གིས་བོད་མིའི་བླ་སྤྲུལ་ཡང་སྲིད་ཀྱི་གནད་དོན་ལ་ཐེ་བྱུས་བྱས་པར་ངོ་རྒོལ་གྱི་རྣམ་འགྱུར་གསལ་པོ་བཏོན་དགོས་པ་དང་། བོད་ཀྱི་གནད་དོན་འདི་རྒྱལ་སྤྱིའི་བདེ་འཇགས་དང་འབྲེལ་ནས་ཡོད་སྟབས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སྐོར་དང་བོད་མཐོ་སྒང་གི་གནམ་གཤིས་སྟངས་ཀྱི་གལ་གནད། རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་དང་ཁོར་ཡུག་ལ་གནོད་འཚེ་གཏོང་བཞིན་པའི་བྱ་སྤྱོད་སོགས་ལ་ངེས་པར་དུ་གླེང་སློང་གནང་དགོས་པ་མ་ཚད་པར་བོད་ནང་གི་དངོས་ཡོད་གནས་སྟངས་ཤེས་རྟོགས་སླད་རྒྱལ་སྤྱིའི་རང་དབང་ལྡན་པའི་ཚོགས་ཆུང་དང་གསར་འགོད་པ། གཞི་རིམ་མང་ཚོགས་དང་འབྲེལ་བའི་ཚོགས་པ་ཁག་གི་སྐུ་ཚབ་བོད་ནང་ལ་རང་དབང་ལྡན་པའི་ཐོག་འགྲོ་སྐྱོད་ཐུབ་ཐབས་ལ་འབད་བརྩོན་གནང་དགོས་པ་གསུངས་འདུག © imageBROKER

རྒྱ་ནག་གཞུང་གིས་རྒྱལ་ནང་ཙམ་མ་ཚད་པར་རྒྱལ་སྤྱིའི་རྒྱལ་ཁབ་འདྲ་མིན་ནང་ཐེ་བྱུས་ཅན་གྱི་བྱ་སྤྱོད་སྣ་ཚོགས་སྤེལ་བཞིན་པ་ལྟར་བར་སྐབས་ Netherlands ནང་ཡོད་པའི་བོད་མི་རྣམས་ལ་ས་གནས་རྒྱ་ནག་གཞུང་ཚབ་ལས་ཁུངས་ཀྱི་ལས་བྱེད་སོགས་ཀྱིས་ཁ་པར་བརྒྱུད་འཇིགས་སྐུལ་ཡང་ཡང་བྱེད་བཞིན་པའི་གནས་སྟངས་འབྱུང་བཞིན་ཡོད་པ་རེད། ཁ་ཉིན་ཕྱི་ཚེས་ ༣༡ ཉིན་ནི་ཐར་ལན་ཌི་བོད་རིགས་ཚོགས་པ་དང་ནི་ཐར་ལན་ཌི་བོད་དོན་རྒྱབ་སྐྱོར་ཚོགས་པ། དེ་བཞིན་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་བཅས་ཐུན་མོང་གིས་ཡུལ་དེའི་སྲིད་བློན་སྐུ་ཞབས་ Mark Rutte མཆོག་གི་མཚན་ཐོག་ལ་རྒྱ་ནག་གིས་ཁ་པར་བརྒྱུད་ནི་ཐར་ལན་ཌིའི་མི་སེར་དང་ལྷག་པར་ས་གནས་བོད་མི་རྣམས་ལ་འཇིགས་སྐུལ་ཡང་ཡང་བྱེད་བཞིན་ཡོད་པར་འགྲེལ་བརྗོད་དང་སྦྲགས་ཏེ། སྲིད་བློན་མཆོག་གིས་གནད་དོན་དེར་ངེས་པར་དུ་དགོངས་བཞེས་ཀྱིས་གདོང་ལེན་གནང་རོགས་ཞེས་སོགས་ཀྱི་སྙན་ཞུ་ཕུལ་འདུག་པར་མ་ཟད། ཚོགས་པ་ཁག་གསུམ་གྱིས་ཞིབ་འཇུག་གནང་སྐབས་ས་གནས་བོད་མི་བཅུ་ལྷག་ལ་ཁ་པར་བརྒྱུད་འཇིགས་སྐུལ་བྱས་པའི་གནས་སྟངས་ར་སྤྲོད་བྱུང་བར་མངོན་གསལ་དང་སྦྲགས། ཁ་པར་གཅིག་གི་སྒྲ་འཇུག་དང་བཅས་པའི་ཞིབ་ཕྲའི་གནས་ཚུལ་དཔང་རྟགས་ཚུལ་དུ་ཕུལ་ཡོད་པ་མ་ཚད་པར་ཞིབ་འཇུག་གི་བརྒྱུད་རིམ་ཁྲོད་ལ་ལས་རྒྱ་ནག་གཞུང་ཚབ་ལས་ཁུངས་ཀྱི་ལས་བྱེད་ཡིན་ཞེས་ངོས་ལེན་བྱས་ཡོད་པ་དང་། ཁག་གཅིག་གིས་སོ་སོའི་ངོ་སྤྲོད་སྦས་གསང་བྱེད་བཞིན་ཡོད་པ་གསལ་འདོན་གནང་འདུག རྒྱ་གཞུང་གིས་ཕྱིར་རང་དབང་ལུང་པའི་ནང་ལ་ཡོད་པའི་མི་སེར་ཐོག་ལྟ་སྲུང་དང་འཇིགས་སྐུལ་གྱི་བྱ་སྤྱོད་སྤེལ་བཞིན་པ་འདི་ནི་ས་གནས་ཀྱི་མི་ཙམ་མིན་པར་ཡུལ་དེའི་མི་སེར་དང་རྒྱལ་ཁབ་སྤྱིའི་བདེ་འཇགས་སོགས་ལ་བློ་འཚབ་གནང་གནད་ཡིན་པ་སོགས་འགྲེལ་བརྗོད་དང་སྦྲགས། སྲིད་བློན་སྐུ་ཞབས་ Mark Rutte མཆོག་གིས་རྒྱ་ནག་གི་བྱ་སྤྱོད་འདི་ཡོ་རོབ་མཐུན་ཚོགས་ནང་གླེང་སློང་དང་སྦྲགས་ཐུན་མོང་གི་ངོས་ནས་གདོང་ལེན་གནང་རྒྱུའི་ཐབས་བྱུས་མངོན་གསལ་གནང་དགོས་པ་མ་ཟད་བོད་མི་དང་ཡུ་གུར་བ་སོགས་དང་དངོས་སུ་ཐུག་འཕྲད་ཀྱིས་ཁོང་རྣམ་པའི་གནས་སྟངས་སྦས་གསང་མེད་པར་འགྲེལ་བརྗོད་ཐུབ་པའི་ཁོར་ཡུག་བསྐྲུན་དགོས་པ་གསུངས་འདུག ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཀྲས་མཐོང་བསྟན་འཛིན་དབང་པོ་ལགས་ཀྱིས་ཞུ་སྙན་དེ་དང་འབྲེལ་ནས་གསུངས་པར་དེ་ལྟ་བུའི་མི་སྒེར་གྱི་གནས་ཚུལ་ལ་བརྩི་མེད་རྡོག་རོལ་བཏང་བ་ནི་ཁྲིམས་འགལ་ཡིན་སྟབས་ཁུལ་དེའི་གཙོ་འཛིན་རྣམས་ཀྱིས་སྟངས་འཛིན་བྱེད་ཕྱོགས་དང་མཇུག་སྐྱོང་དོན་འཁྱོལ་གནང་རྒྱུ་ཁག་པོ་ཡོད་ཀྱང་། གལ་ཏེ་གནད་དོན་དེ་གླེང་སློང་ཤུགས་ཆེར་མ་བྱས་ཚེ་དེའི་མཇུག་འབྲས་སུ་འཇིགས་སྐུལ་བ་དེ་དག་སྣང་མེད་དུ་འགྲོ་རྒྱུ་ཙམ་མ་ཟད་འཇིགས་སྐུལ་བྱ་ཡུལ་དེ་ནག་ཉེས་ཅན་ཆགས་ཉེན་ཡོད་སྐོར་གསུངས་འདུག