གསར་འགྱུར།

དེ་རིང་ཨི་ཊ་ལིའི་ནང་པའི་མཐུན་ཚོགས་ནས་ཇི་ལྟར་གསོལ་བ་བཏབ་པ་ལྟར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཐུན་ཚོགས་ལ་བདེན་པ་བཞི་དང་བདེན་པ་གཉིས་ཀྱི་བཀའ་ཆོས་སྩལ་བ་དང་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་མཛད་སྐབས་སངས་རྒྱས་པའི་ཆོས་སྒོས་སུ་ནཱ་ལནྡཱའི་ཆོས་བརྒྱུད་ཐད་ཇི་ཙམ་དཔྱད་པ་གནང་བ་དེ་ཙམ་གྱིས་ངེས་ཤེས་རྙེད་ཐུབ་སྐོར་བཀའ་སྩལ་སོང་། དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་གཟིམ་ཆུང་ནས་དྲ་ལམ་བརྒྱུད་ཨི་ཊ་ལིའི་ནང་པའི་མཐུན་ཚོགས་ལ་བདེན་པ་བཞི་དང་བདེན་པ་གཉིས་ཀྱི་སྐོར་བཀའ་ཆོས་དང་བཀའ་འདྲི་ཁག་ལ་བཀའ་ལན་སྩལ་བ་དང་སྦྲགས། མགོན་པོ་༸གང་ཉིད་མཆོག་གིས་བཀའ་ཆོས་ཀྱི་ཐོག་མར་བདེན་བཞི་དང་དེའི་རྣམ་གཞག་སྐོར་བཀའ་སྩལ་བ་དང་དེ་ལས་འཕྲོས་ནས་སྤྱིར་ཆོས་ལུགས་ཚང་མའི་བསླབ་བྱ་གཙོ་བོ་ནི་སེམས་པ་བཟང་པོ་བྱེད་དགོས་པ་གསུངས་ཀྱི་ཡོད་པ་དང་དེར་ངེས་པར་དུ་གུས་བརྩི་ཞུ་དགོས་པ་དང་། ལྟ་གྲུབ་ཀྱི་ཐོག་ནས་རྒྱ་གར་ནས་བྱུང་བའི་ཆོས་ལུགས་དེ་དག་དང་དེའི་ཁྲོད་སངས་རྒྱས་པའི་ཆོས་དང་ནཱ་ལནྡཱའི་ཆོས་བརྒྱུད་རྣམས་རིགས་པའི་ལམ་ནས་གཏན་ལ་ཕབ་པ་ཞིག་ཆགས་ཀྱི་ཡོད་སྟབས་ཆོས་གྲོགས་ཚོས་དེར་སློབ་གཉེར་དང་དགོངས་པ་ཡང་ཡང་བཞེས་དགོས་པ་མ་ཟད་ལྷག་པར་དུ་སངས་རྒྱས་པའི་ཆོས་དང་ནཱ་ལནྡཱའི་ཆོས་བརྒྱུད་ཐད་ཇི་ཙམ་དཔྱད་པ་གནང་བ་དེ་ཙམ་གྱིས་ངེས་རྙེད་ཐུབ་སྐོར་བཀའ་སྩལ་སོང་། བཀའ་ཆོས་ལེགས་པར་གྲུབ་མཚམས་སུ་ཡོ་རོབ་ནང་པའི་མཉམ་འབྲེལ་ཚོགས་པའི་ཚོགས་གཙོ་སྐུ་ཞབས་ Ron Eichhorn ལགས་ཀྱིས་ནང་ཆོས་ནི་ཡོ་རོབ་ནང་ཆོས་ལུགས་གསར་པ་ཞིག་ཆགས་ཡོད་པར་བརྟེན་ནང་ཆོས་སློབ་ཁྲིད་སྐབས་སྔར་སྲོལ་གང་ཡིན་དེ་དག་རང་སོར་བཞག་དགོས་པ་དང་། ཡུལ་དུས་དང་བསྟུན་ནས་བསྒྱུར་བཅོས་གང་གནང་དགོས་མིན་ཐད་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་དེ་སྔ་བོད་དུ་ནང་ཆོས་ཐོག་མར་དར་ཚུལ་གྱི་དེ་བྱུང་ཁག་བཀའ་སྩལ་བ་དང་འབྲེལ་ཏེ་སྤྱིར་ཆོས་ཟེར་དུས་མར་བཀའ་བཏང་ནས་དེ་གནང་དང་མི་གནང་བརྗོད་རྒྱུ་དཀའ་བ་དང་གང་ཟག་སྒེར་སོ་སོའི་ངོས་ནས་འདོད་མོས་གནང་དགོས་པ་དང་སྒོས་སོ་སོའི་ཕ་མེས་ཀྱི་ཆོས་ཉར་ཚགས་གནང་དགོས་སྐོར་ལམ་སྟོན་བཀྲིན་ཆེ་བ་སྩལ་ཡོད། དེ་བཞིན་ Nichiren shu ཞེས་པའི་ཉི་ཧོང་གི་ཆོས་བརྒྱུད་ཀྱི་སྐུ་ཚབ་ Shoryu Tarabini ལགས་ཀྱིས་འབྱུང་འགྱུར་ལོ་ལྔ་བཅུའི་ནང་ནང་ཆོས་ཀྱི་འཕེལ་རིམ་དང་ཞལ་ཕྱོགས་ཇི་ལྟར་འགྱུར་བ་ཞིག་ལ་གཟིགས་ཀྱི་འདུག་གམ་ཞེས་བཀའ་འདྲི་ཞུས་པར་༸གོང་ས་མཆོག་གིས་ད་ཆ་གོ་ལོའི་ཁོར་ཡུག་གི་གནས་སྟངས་དེ་ཆེས་ཛ་དྲག་གི་ངོ་བོར་འགྱུར་བཞིན་ཡོད་པར་ངོ་སྤྲོད་མཛད་པ་དང་འབྲེལ། འདས་པའི་དུས་ཡུན་ནང་སངས་རྒྱས་རིམ་པ་ཕེབས་པ་དང་ཆོས་འཁོར་རིམ་པ་སྐོར་ཡོད་པ་སོགས་བཀའ་སྩལ་དང་ཆབས་ཅིག གཞུང་ཆེན་ཁག་ཏུ་ལྷོ་འཛམ་བུ་གླིང་འདི་ཇི་ལྟར་སྟོང་བའི་ཚུལ་གསུངས་པ་ཁག་ལུང་འདྲེན་གྱིས་བཀའ་ལན་སྩལ་སོང་། གཞི་རྩའི་ཨི་ཊ་ལི་ནང་པའི་ཆོས་ཚོགས་དེ་ནི་ཕྱི་ལོ་ ༡༩༨༥ ལོར་ཆེད་འཛུགས་གནང་སྟེ་ ༢༠༡༢ ལོར་ཁྲིམས་མཐུན་གྱི་དེབ་སྐྱེལ་གནང་ཡོད་པ་དང་། ཆོས་ཚོགས་དེའི་དམིགས་ཡུལ་གཙོ་བོ་ནི་ཁོར་ཡུག་སྲུང་སྐྱོབ་གཙོས་མི་མང་ལ་རོགས་འདེགས་ཞུ་རྒྱུ། ལྷག་པར་དུ་རྒྱ་བལ་གཉིས་ཀྱི་ནང་དུ་ནང་ཆོས་བསྐྱར་གསོ་ཐད་རྒྱབ་སྐྱོར་གནང་མཁན་གྱི་ཚོགས་པ་ཞིག་ཆགས་ཀྱི་ཡོད་པ་རེད།༸དཔལ་ལྡན་དགའ་ལྡན་ཕོ་བྲང་གི་དྲྭ་རྒྱར་མཛད་འཆར་བསྐྱང་གཏན་ཁེལ་ཁག་ཆེད་བཀོད་གནང་བར་གཞིགས་ན།  ཟླ་བ་འདིའི་ཚེས་ ༡༢ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་སྔར་ལས་བཟང་བ་ཞིག་དང་བྱམས་བརྩེའི་བདག་ཉིད་བགྱིས་ཞེས་པའི་ཚོགས་པས་གསོལ་འདེབས་ཞུས་དོན་ལྟར་དྲ་ལམ་བརྒྱུད་རྒྱ་གར་གྱི་སྔ་དྲོའི་ཆུ་ཚོད་༩ ནས་ ༡༠ བར་བཅོས་བསྒྱུར་མཁན་དང་ཤུགས་རྐྱེན་ཆེ་བའི་ན་གཞོན་བཅུ་གཉིས་ལ་བཀའ་སློབ་སྩལ་རྒྱུ་དང་། དེ་བཞིན་ཟླ་བ་ ༥ ཚེས་ ༡ ཉིན་༸གོང་ས་མཆོག་གིས་ཐའེ་ཝན་བོད་ཀྱི་ནང་བསྟན་སྨོན་ལམ་ཚོགས་ཆུང་ནས་ཇི་ལྟར་གསོལ་བ་བཏབ་པ་ལྟར་རྒྱ་གར་གྱི་སྔ་དྲོ་ཆུ་ཚོད་ ༩ ནས་ ༡༠།༣༠ བར་ཤེས་རབ་སྙིང་པོའི་བཀའ་ཆོས་དང་བཀའ་འདྲི་དགོངས་སྐོར་ཞུ་མཁན་ཚོར་བཀའ་ལན་མཛད་རྒྱུའི་མཛད་འཆར་ཐུགས་གཏན་ཁེལ་འདུག

དེ་རིང་རྒྱ་ནག་གཞུང་འབྲེལ་གྱི་ Global Times ཞེས་པའི་གསར་ཁང་གིས་གནས་ཚུལ་སྤེལ་བའི་ནང་དུ། འདི་ལོ་རྒྱ་ནག་དམར་ཤོག་སྲིད་གཞུང་བཙུགས་ནས་ལོ་ངོ་བརྒྱ་འཁོར་བ་དང་། བོད་ཞི་བའི་བཅིངས་གྲོལ་ཟེར་བ་བཏང་ནས་མི་ལོ་བདུན་ཅུ་འཁོར་བའི་དུས་སྟོན་ལ་འཁེལ་གྱི་ཡོད་སྟབས། བོད་ཀྱི་མཐའ་མཚམས་ཁག་སྔར་ལས་དམ་དྲག་བྱེད་རྒྱུ་ཡིན་པར་བསྒྲགས་འདུགདེ་ཡང་གསར་གནས་དེར་འཁོད་པ་ལྟར་ན། རྒྱ་ནག་གིས་ས་བགོས་བྱས་པའི་བོད་རང་སྐྱོང་ལྗོངས་ཀྱིས་བོད་དབུས་ཁུལ་དང་ས་འབྲེལ་ཡོད་པའི་མཐའ་མཚམས་ཁག་བཅོ་ལྔ་རུ་ལས་འགུལ་མང་པོ་ཞིག་བཀག་སྡོམ་བྱས་ཡོད་པའི་བརྡ་ཁྱབ་བཏང་བ་མ་ཟད། མཐའ་མཚམས་དེ་དག་ཏུ་ཁྲིམས་འགལ་གྱི་ཐོག་ནས་འགྲུལ་སྐྱོད་བྱས་མི་ཐོག་ཆོག་པར་བཀོག་སྲུང་དོ་དམ་ལ་ཤུགས་སྣོན་བྱེད་རྒྱུ་ཡིན་པར་བསྒྲགས་འདུག དེ་བཞིན་བོད་རང་སྐྱོང་ཉིན་རེའི་ཚགས་པར་གྱིས་གནས་ཚུལ་སྤེལ་བའི་ནང་དུ་ཡང་། བོད་རང་སྐྱོང་ལྗོངས་ཀྱི་མི་མང་བདེ་འཇགས་ཚན་ཁག་དང་ཕྱི་འབྲེལ་སྡེ་ཚན་གཉིས་ཀྱིས་ཀྱང་མཉམ་འབྲེལ་གྱིས་བསྒྲགས་ཡིག་ཅིག་ཕྱི་ལ་བཀྲམས་པའི་ནང་དུ། བོད་ཀྱི་མཐའ་མཚམས་ཁག་ཏུ་བྱེད་སྒོ་བཅོ་ལྔ་མིང་འདོན་གྱིས་བཀག་སྡོམ་བྱེད་རྒྱུ་ཡིན་པར་ཡོངས་གྲགས་བྱས་པའི་ནང་དུ། ཡིག་ཆ་ཚད་ལྡན་མེད་པར་མཐའ་མཚམས་ཁག་ཏུ་འགྲུལ་སྐྱོད་བྱེད་མི་ཆོག་པ་དང་། བྲོས་བྱོལ་པར་ལྟ་རྟོགས། རྒྱལ་ཁབ་ཀྱིས་སྲུང་སྐྱོབ་ཀྱི་འོག་ཏུ་ཡོད་པའི་རི་སྐྱེས་སྲོག་ཆགས་རྔོན་པ་དང་རྩི་ཤིང་རིགས་འཐུ་བ་སོགས་ཀྱང་བཀག་སྡོམ་ནན་མོ་བྱེད་རྒྱུ་ཡིན་པར་འཁོད་འདུག གཞན་ཡང་། བཀག་སྡོམ་གྱི་ལས་གཞི་དེའི་ཁོངས་སུ། མི་སྒེར་གྱི་གནམ་འཕུར་གྱི་ལས་རིགས་སྤྱི་དང་། མཐའ་མཚམས་ཀྱི་འབྲེལ་ལམ་དང་ས་མཚམས་ཀྱི་མངོན་རྟགས། དེ་བཞིན་དམག་མིའི་མཐུན་རྐྱེན་སོགས་ལ་གནོད་གཞིའི་ལས་རིགས་བྱུང་བ་ཤེས་རྟོགས་བྱུང་ཚེ། ཁྲིམས་ལྟར་ཐག་གཅོད་བྱེད་རྒྱུ་ཡིན་པ་མ་ཟད། ནག་ཉེས་ར་འཕྲོད་བྱུང་ཚེ་ཐད་ཀར་ཁྲིམས་ཁང་གི་ཆེས་མཐོ་དཔོན་རིགས་ལ་རྩིས་སྤྲོད་བྱེད་རྒྱུ་ཡིན་ལུགས་གསལ་འདུག རྒྱ་ནག་གི་བཀོད་འདོམ་འོག་གི་བོད་རིག་པའི་ལྟེ་གནས་ཀྱི་རྒྱ་རིགས་འགོ་གཙོ་ཟུར་བ། Zhu Xiaoming ཟེར་བས་གསར་ལམ་ལ་བརྗོད་པ་ལྟར་ན། ཐེངས་འདིའི་བཀག་སྡོམ་བྱས་པའི་ལས་གཞིའི་རིགས་དེ་དག་ནི་ས་གནས་ཀྱི་ཡུལ་ཁྲིམས་ནང་དུ་སྔ་མོ་ནས་གནས་ཡོད་པ་ཞིག་ཡིན་པ་དང་། བཀག་སྡོམ་དེ་དག་ནི་མཐའ་མཚམས་ཀྱི་བདེ་འཇགས་སྲུང་སྐྱོབ་ལ་དམིགས་པའི་བྱེད་ཐབས་ཤིག་ཡིན་པར་འགྲེལ་བརྗོད་དང་སྦྲགས། ཕྱི་ལོ་ ༢༠༢༠ ལོར།  རྒྱ་ནག་དབུས་གཞུང་གིས་བོད་ཁུལ་དུ་རྒྱལ་ཁབ་ཀྱི་བདེ་འཇགས་ཀྱི་གཙོ་བྱས་པའི་ཞི་བདེ་དང་བརྟན་བརླིང་ལ་ཤུགས་སྣོན་གྱིས། མི་མང་གི་འཚོ་བ་ཡར་རྒྱས་དང་ཁོར་ཡུག་གཅེས་སྐྱོང་རྒྱུན་འཛིན། དེ་བཞིན་མཐའ་མཚམས་བདེ་འཇགས་སྲུང་སྐྱོབ་སོགས་ལ་ཆེད་དམིགས་ཀྱིས་ལས་གཞི་རྒྱ་བསྐྱེད་བྱས་ཡོད་སྟབས། ད་ལྟའི་ཆར་མཐའ་མཚམས་ཁག་བཅོ་ལྔ་ཡིས་ཀྱང་ལས་གཞ་དེ་དག་ལག་བསྟར་བྱེད་རྒྱུ་གལ་ཆེན་ཡིན་ལུགས་བརྗོད་འདུག གཞི་རྩའི་ས་བྱི་ལོའི་བོད་ཁམས་ཡོངས་ཀྱི་ཞི་རྒོལ་ཆེན་མོ་དང་བསྟུན་ནས། རྒྱ་ནག་གིས་བོད་ནང་གི་མཐའ་མཚམས་ཁག་ལ་ལྟ་རྟོགས་ཀྱི་ལས་གཞི་ལྟོས་བཅོས་ཀྱིས་ཤུགས་སྣོན་བྱས་ཡོད་སྟབས།   བོད་ཁུལ་ནས་བཙན་བྱོལ་དུ་བྲོས་བྱོལ་ལ་ཡོང་མཁན་གྱི་མི་རབས་ཤིག་རྒྱུན་ཆད་པ་ལྟ་བུར་གྱུར་པ་མ་ཟད། འདས་བའི་ལོ་འགའི་རིང་རྒྱ་ནག་གིས་བོད་ཁུལ་གྱི་མཚའ་མཚམས་ཁག་ཏུ་ཁང་ལས་གསར་རྒྱག་གིས་མི་མང་གནས་སྤོར་བྱེད་ཤུགས་ཆེ་རུ་བཏང་སྟེ། མཐའ་མཚམས་ཀྱི་སྟོབས་ཤུགས་རྒྱ་བསྐྱེད་བྱེད་བཞིན་པའི་ཁྲོད། བོད་མི་བྲོས་བྱོལ་དུ་ཡོང་མཁན་གྱི་གནས་བབ་དེ་ནི་ལྟག་ཆུ་ཆད་པའི་རྫིང་བུ་ལྟ་བུར་གྱུར་ཡོད་པ་རེད།

ཕྱི་ལོ་ ༢༠༠༨ སྟེ་ས་བྱི་ལོའི་ཞི་རྒོལ་སྐབས་རྒྱ་ནག་གིས་བོད་མདོ་སྨད་རྔ་བ་ཨ་མཆོག་མཚན་ཉིད་དགོན་གྱི་དགེ་འདུན་པ་ཁག་ཅིག་འཛིན་བཟུང་བྱས་པའི་ཁོངས་ནས། མི་ལོ་བཅུ་གསུམ་ལྷག་གི་ཁྲིམས་ཐག་བཅད་པའི་གྲྭ་ཀླུ་སྒྲུབ་ཡེ་ཤེས་ལགས་དང་ཀླུ་སྒྲུབ་ཕུན་ཚོགས་གཉིས་འདི་ལོའི་ཟླ་བ་གསུམ་པའི་ཚེས་ ༡༩ དང་༢༠ ཉིན་གློད་གྲོལ་གྱིས་གྲྭ་ཀླུ་སྒྲུབ་ལགས་དངོས་སུ་རང་དགོན་དུ་ཕེབས་ཐུབ་པ་བྱུང་འདུག བཞུགས་སྒར་དུ་གནས་སྡོད་བྱེད་མཁན་གྱི་ཨ་མཆོག་མཚན་ཉིད་དགོན་གྱི་ཡུལ་མི་ཞིག་གིས་གནས་ཚུལ་མཁོ་སྤྲོད་བྱས་པ་ལྟར་ན། གྲྭ་ཀླུ་སྒྲུབ་ཡེ་ཤེས་ལགས་ཕྱིར་མཚན་ཉིད་དགོན་གྲོང་དུ་འབྱོར་ནས་གྲྭ་མང་གིས་ལོག་ཕེབས་ཀྱི་མཇལ་དར་སྒྲོན་གྱི་ཡོད་པའི་པར་ཞིག་དང་བཅས་གནས་ཚུལ་མཁོ་མཁོ་སྤྲོད་གནང་བ་དང་ལྷན་དུ། ད་ལྟའི་ཆར་གྲྭ་ཀླུ་སྒྲུབ་ཕུན་ཚོགས་ལགས་གློད་གྲོལ་ཐོབ་ཡོད་པ་ཙམ་ལས། གང་དུ་བཞུགས་ཡོད་པ་སོགས་ཀྱི་གནས་ཚུལ་གསལ་བོར་ཤེས་རྟོགས་བྱུང་མེད་པར་ངོ་སྤྲོད་གནང་སོང་། གཞན་ཡང་ཁོང་གིས་ད་ལྟའི་ཆར་བོད་ཕྱི་ནང་གཉིས་སུ་དམ་དྲག་གི་རྐྱེན་གྱིས་གནས་ཚུལ་ཆ་ཚང་རྒྱུས་ལོན་བྱེད་ཐབས་བྲལ་བར་བརྟེན། ད་ལྟའི་ཁོང་གཉིས་ཀྱི་གཟུགས་གཞིའི་གནས་བབ་སོགས་ཀྱི་ཐད་ནས་གནས་སྐབས་སུ་སྐད་ཆ་གང་ཡང་ཤེས་ཐབས་བྲལ་ནའང་། རིམ་པའི་གནས་ཚུལ་ཞིབ་རྒྱས་ཕྱི་ལ་ཐོན་པར་རེ་བ་ཡོད་པར་ངོ་སྤྲོད་གནང་སོང་། གཞི་རྩའི་ས་བྱིའི་ལོའི་ཞི་རྒོལ་གྱི་སྐབས་སུ། ཨ་མཆོག་མཚན་ཉིད་དགོན་དུ་དགེ་འདུན་ཁག་ཅིག་གི་སྣེ་ཁྲིད་ཀྱི་ཐོག་ནས། སྐྱ་སེར་ཕོ་མོ་མང་པོ་འདུ་འཛོམས་ཀྱིས་དགོན་པའི་ཉེ་འཁྲིས་ཀྱི་ས་གནས་མི་དམངས་སྲིད་གཞུང་གི་ཐོག་ཁའི་རྒྱ་ནག་གི་དར་དམར་མར་ཕབ་སྟེ་བོད་ཀྱི་གངས་སེང་གི་རྒྱལ་དར་བསྒྲེངས་འཛུགས་གནང་སྟེ། བོད་ནང་འགྲོ་བ་མིའི་ཐོབ་ཐང་དགོས་པ། ༸གོང་ས་མཆོག་བོད་ནང་གདན་འདྲེན་ཞུ་དགོས་པ། དེ་བཞིན་༸པཎ་ཆེན་ཆུང་སྲིད་རིན་པོ་ཆེ་མྱུར་དུ་ཀློད་གྲོལ་དགོས་པ་སོགས་ཀྱི་སྐད་འབོད་འོག་རྒྱ་ནག་གིས་བོད་ནང་འཛིན་པའི་དྲག་གནོན་སྲིད་ཇུས་ལ་ཞི་བའི་ངོ་རྒོལ་གནང་ཡོད་པ་དང་། ཕྱི་ཟླ་ ༣ པའི་ཚེས་ ༡༨ ཉིན་ནས་རྒྱ་ནག་གི་དྲག་ཆས་སྤྲས་པའི་དམག་མི་འབོར་ཆེན་གྱིས་ཨ་མཆོག་མཚན་ཉིད་དགོན་པའི་བྱེད་སྒོ་ཡོངས་དང་དགེ་འདུན་པ་ཡོངས་ཀྱི་འགྲོ་སྐྱོད་རང་དབང་ལ་བཀག་སྡོམ་གྱིས་དགེ་འདུན་པ་ཁག་ཅིག་འཛིན་བཟུང་བྱས་པའི་ཁྲོད་དུ་གྲྭ་ཀླུ་སྒྲུབ་ཡེ་ཤེས་དང་ཀླུ་སྒྲུབ་ཕུན་ཚོགས་གཉིས་ལ་མི་ལོ་ཧྲིལ་བོ་༡༣ ལྷག་གི་བཙོན་ཐག་བཅད་ཡོད་པ་དང་། སྐབས་དེར་འཛིན་བཟུང་བྱས་པའི་དགེ་འདུན་པ་ཁག་ཅིག་རྗེས་སུ་ག་ལེར་གློད་གྲོལ་བཏང་ཡོད་པ་རེད་འདུག བཞུགས་སྒར་དུ་རྟེན་གཞི་བྱས་པའི་ཀརྟི་བྱིས་བ་གྲྭ་ཚང་གིས་འདོན་སྤེལ་བྱས་པའི་མི་ཐོག་གསུམ་གྱི་རྨ་ཁ་ཞེས་པའི་དཔེ་དེབ་ཀྱི་ནང་དུ་གྲྭ་ཀླུ་སྒྲུབ་ཡེ་ཤིས་དང་ཀླུ་སྒྲུབ་ཕུན་ཚོགས་གཉིས་ཀྱི་ལོ་རྒྱུས་འཁོད་པའི་ནང་དུ། རྔ་བ་མཚན་ཉིད་དགོན་གྱི་དགེ་འདུན་པ་ཁག་ཅིག་རྒྱ་ནག་གིས་འཛིན་བཟུང་བྱས་ཏེ་ཟླ་བ་དྲུག་ལྷག་ལ་མི་སྤྱོད་ལས་འདས་པའི་གཅར་རྡུང་བྱས་མཐར། རྔ་བ་ཁུལ་རྐ་ཁོག་རྫོང་གི་ཨ་མཆོག་ཕྱུགས་ལས་ཀྱི་ཞལ་དཀར་ཚང་གི་ཨ་མཆོག་མཚན་ཉིད་དགོན་གྱི་གྲྭ་ཀླུ་སྒྲུབ་ཕུན་ཚོགས། རང་ལོ་ ༢༣ ཡིན་པ་ཡིན་པ་ཁོངས་ལ་ཁྲིམས་ཐག་ལོ་ ༡༣ བཅད་པ་དང་། ཁོང་ནི་ཨ་མཆོག་མཚན་ཉིད་དགོན་གྱི་འཛིན་གྲྭ་ཞིག་གི་སྐྱོར་དཔོན་ཡིན་པ་དང་། སྨྲ་སེང་བཞད་སྒྲ་ཞེས་པའི་དུས་དེབ་ཀྱི་རྩོམ་སྒྲིག་པ་ཡིན་པར་འཁོད་ཡོད་པ་དང་། རྐ་ཁོག་ཨ་མཆོག་མའི་ཚེ་རིང་བཀྲ་ཤིས་ཚང་གི་བུ་ཀླུ་སྒྲུབ་ཡེ་ཤེས་ལགས་ནི་སྐབས་དེར་དགུང་ལོ་ ༣༣ ཡིན་པ་ཁོང་ལ་བཙོན་ཐག་ ༡༣ དང་ཟླ་བ་ ༦ ལྷག་གི་ཁྲིམས་ཐག་བཅད་ཡོད་པར་གསལ་བོར་འཁོད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་སྣེ་ཁྲིད་པའི་བཀའ་ཤག་སྐབས་ ༡༥ པའི་ལས་ཡུན་རྫོགས་ལ་ཉེ་བ་དང་བསྟུན། སྲིད་སྐྱོང་མཆོག་གིས་ཟླ་བ་འདིའི་ཚེས་ ༣ ནས་རྒྱ་གར་ལྷོ་ཕྱོགས་ཀྱི་བོད་མིའི་གཞི་ཆགས་ཁག་ལ་སྐོར་བསྐྱོད་དང་སྦྲགས་མི་མང་རྣམས་ལ་ཐུགས་རྗེ་ལེགས་འབུལ་ཞུ་བཞིན་པ་ལྟར། ཁོང་ཐོག་མར་ཀོ་ལེ་གྷལ་དོན་ལྡན་གླིང་དང་དེའི་རྗེས་ཧུན་སུར་རབ་རྒྱས་གླིང་བཅས་སུ་ཆེད་ཕེབས་ཀྱིས་བོད་མི་གང་མང་ཐུག་འཕྲད་གནང་ནས་གཏམ་བཤད་གནང་ཡོད་པ་མ་ཟད། ཁ་སང་སྔ་དྲོ་ཕྱག་ཚོད་  ༡༡  ཙམ་ལ་སྦེལ་ཀོབ་གཞིས་ཆགས་སུ་ཕེབས་འབྱོར་གྱིས་གཞུང་དང་གཞུང་འབྲེལ་མིན་པའི་ཚོགས་པ་ཁག་དང་ས་གནས་ཀྱི་ལྷ་མོ་ཚོགས་པས་སྣེ་ལེན་གཟབ་རྒྱས་ཞུས་སོང་།སྲིད་སྐྱོང་མཆོག་གིས་ཐོག་མར་བོད་ཁྱིམ་དང་སམ་བྷོ་ཊའི་སློབ་ཕྲུག་རྣམས་ལ་གསུང་བཤད་གནང་བ་མ་ཟད། ཉིན་རྒྱབ་དགོན་སྡེ་ཁག་ལ་གནས་གཟིགས་དང་ཕྱི་དྲོ་ཕྱག་ཚོད་༦ པའི་ཐོག་སེ་ར་བླ་སྤྱིའི་མདུན་ཐང་དུ་དགེ་འདུན་པ་རྣམས་ལ། མང་ཚོགས་ཀྱིས་ཁོང་ལ་ཆབ་སྲིད་ཀྱི་འགན་བསྐུར་བ་བཞིན། ཁོང་གིས་ཞབས་འདེགས་གང་ཐུབ་ཞུས་པའི་ལས་དོན་ཆེ་ཁག་སྙན་གསེང་དང་། ལྷག་པར་ཁོང་གིས་སྲིད་སྐྱོང་གནང་བའི་དུས་ཡུན་ཁྲོད་ཤེས་ཡོན་དང་དཔལ་འབྱོར། གཞིས་ཆགས་ཡར་རྒྱས་བཅས་གང་ཅིའི་ཐད་ལ་འཕེལ་རྒྱས་ཆེན་པོ་ཕྱིན་ཡོད་པར་བསྒྲགས་སོང་། སྲིད་སྐྱོང་མཆོག་གིས་སྐབས་དེར་། ཕྱི་ལོ་ ༢༠༢༠ ལོའི་ལོ་མཇུག་ཏུ་ཨ་རིའི་སྲིད་འཛིན་མཆོག་གིས་མཚན་རྟགས་བཀོད་པ་དང་འབྲེལ་ཡུལ་དེའི་ཁྲིམས་སུ་བཅས་པའི་ཨ་རིའི་གཞུང་གི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གྱི་སྔ་རྗེས་ཀྱི་བརྒྱུད་རིམ་ངོ་སྤྲོད་གནང་བ་དང་འབྲེལ། དེ་སྔ་ང་ནི་བོད་མི་གཅིག་པོས་ངོས་འཛིན་གནང་བའི་སྲིད་སྐྱོང་ཞིག་ཡིན་ནའང་། ཨ་རིས་ཁྲིམས་གཞི་དེ་གཏན་འབེབས་གནང་བ་ནས་བཟུང་སྟེ་ང་ནི་ཨ་རི་གཞུང་ནས་ངོས་འཛིན་གནང་བའི་སྲིད་སྐྱོང་ཞིག་ཆགས་ཡོད་ཅེས་གསུངས་བ་དང་ཆབས་ཅིག    མ་འོངས་པར་ཁོང་གི་ལས་ཡུན་ཚང་བའི་རྗེས་སུ་སྲིད་སྐྱོང་གསར་པ་སུ་ཕེབས་ཀྱང་ཕྱག་ལས་གནང་བར་སྟབས་བདེ་པོ་བཟོས་ཡོད་སྐོར་གསུང་སོང་།མ་ཟད་ཉེ་བའི་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག་སྐོར་ལ་གསུང་བཤད་གནང་བ་དང་འབྲེལ་ད་སྐབས་རྒྱ་གར་དང་ཞི་བདེ་རྒྱ་མཚོའི་ཐབས་བྱུས་ནང་བོད་ཀྱི་གནད་དོན་དེ་ ཚུད་ཐུབ་ཡོད་སྐོར་འགྲེལ་བརྗོད་གནང་སོང་། སྲིད་སྐྱོང་མཆོག་གིས་ད་དུང་དེ་རིང་རྒྱལ་བའི་ཕོ་བྲང་ཁུལ་དུ་སྦེལ་ཀོབ་གཞིས་ཆགས་གསར་རྙིང་གཉིས་ཀྱི་མང་ཚོགས་ལ་གཏམ་བཤད་གནང་ཡོད་པ་དང་། སྦེལ་ཀོབ་ཀྱི་གཏམ་བཤད་ཀྱི་རྗེས་སུ་མོན་གྷོ་འདོད་རྒུ་གླིང་ལ་ཕེབས་ཀྱི་ཡོད་པ་རེད།

བོད་ཨ་མདོ་རྔ་བ་ནས་ཡིན་པའི་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་འདི་ལོའི་ཕྱི་ཟླ་དང་པོའི་ནང་རྒྱ་ནག་གསང་བའི་ལས་ཁུངས་ཀྱི་མི་སྣས་འཛིན་བཟུང་བྱས་པའི་རྗེས་གར་སོང་ཆ་མེད་དུ་གྱུར་འདུགདེ་ཡང་ཨ་རི་རླུང་འཕྲིན་ཁང་གི་བོད་སྐད་སྡེ་ཚན་གྱིས་གནས་ཚུལ་སྤེལ་བར་གཞིགས་ན།རྩོམ་པ་པོ་སྒོ་ཤེས་རབ་ལགས་ད་ལོའི་ཕྱི་ཟླ་དང་པོའི་ནང་རྒྱ་ནག་གི་གྲོང་ཁྱེར་ཁྲིན་ཏུ་རུ་བོད་ལྗོངས་ལྷ་ས་གྲོང་ཁྱེར་གྱི་གསང་བའི་ལས་ཁུངས་ཀྱི་མི་སྣས་འཛིན་བཟུང་བྱས་ཡོད་སྐོར་ངོ་སྤྲོད་གནང་འདུག་པ་མ་ཟད། ཁོང་འཛིན་བཟུང་བྱས་པའི་རྗེས་སུ་ཁོང་གང་དུ་བཀག་ཉར་བྱས་ཡོད་མིན་དང་། ཁོང་གི་གནས་སྟངས་ཅི་འདྲ་ཡོད་མིན་སོགས་ཀྱི་གནས་ཚུལ་ཤེས་རྟོགས་མི་ཐུབ་པར་གར་སོང་ཆ་མེད་དུ་གྱུར་ཡོད་པ་སོགས་མིང་བརྗོད་འདོད་མེད་པའི་བོད་མི་ཞིག་གི་གནས་ཚུལ་མཁོ་སྤྲོད་གནང་འདུག ཁོང་གིས་ད་དུང་རྩོམ་པ་པོ་སྒོ་ཤེས་རབ་རྒྱ་མཚོ་ལགས་རྒྱུ་མཚན་ཅི་ཞིག་ལ་བརྟེན་ནས་འཛིན་བཟུང་བྱས་པ་ཤེས་ཐུབ་ཀྱི་མེད་པའི་ཁར་རྒྱ་ནག་གཞུང་གིས་རྩོམ་པ་པོ་སྒོ་ཤེས་རབ་རྒྱ་མཚོ་ལགས་ཀྱི་ནང་མི་དང་ཉེ་འབྲེལ་རྣམས་ལ་གནས་ཚུལ་དེ་གསང་རྒྱ་བྱ་དགོས་པ་དང་།ཅི་སྟེ་རྒྱ་གཞུང་གི་བཙན་བཀའ་ལ་བརྩི་འཇོག་མ་བྱས་ཚེ་ཁྲིམས་འགལ་ཡིན་པར་འཇིགས་སྐུལ་བྱས་ཡོད་པ་རེད་འདུག རྩ་བའི་སྒོ་ཤེས་རབ་རྒྱ་མཚོ་ལགས་ནི་བོད་ཨ་མདོ་རྔ་བ་ནས་འཁྲུངས་ཤིང་།རྔ་པ་ཀིརྟི་དགོན་ཆེན་ནས་ནང་པའི་གཞུང་ཆེན་ཁག་ལ་སློབ་སྦྱོང་གནང།དེ་རྗེས་རྒྱ་གར་དང་བལ་ཡུལ།རྒྱ་ནག་སོགས་ཀྱིས་མཚོན་པའི་ཨེ་ཤེ་ཡའི་རྒྱལ་ཁབ་མང་པོར་འགྲུལ་བཞུད་གནང་ནས་ཉམས་ཞིབ་གནང་། ཕྱི་ལོ་༡༩༩༨ལོར་རྔ་པ་ཀིརྟི་དགོན་ཆེན་གྱི་གཙོས་རྔ་པ་ཁུལ་གྱི་དགོན་ཁག་བཞི་བཅུ་ལྷག་ལ་རྒྱ་ནག་གཞུང་གིས་རྒྱལ་གཅེས་ཆོས་གཅེས་ཞེས་པའི་གཏིང་ནག་གི་སྲིད་བྱུས་སྤེལ་སྐབས་ཞི་རྒོལ་དང་སྦྱར་ཡིག་སྣ་ཚོགས་ཤེིག་འགྲེམས་སྤེལ་གནང་བའི་རྐྱེན་གྱིས་ལོ་ངོ་ཧྲིལ་པོ་བཞི་ལྷག་ལ་རྒྱ་ནག་གིས་བཙོན་འཇུག་བྱས། དེ་རྗེས་སླར་ཡང་ཉིས་སྟོང་བརྒྱད་ལོར་བོད་ཁམས་ཡོངས་སུ་ས་བྱི་ཞི་རྒོལ་ཆེན་མོ་བྱུང་སྐབས་ལྷ་ས་ནས་ཨ་མདོ་རྔ་བའི་དགེ་འདུན་པ་ཚོས་སྣེ་ཁྲིད་བྱས་ནས་ཞི་རྒོལ་གནང་སྟབས། རྒྱ་གཞུང་གིས་འཛིན་བཟུང་བྱས་ཏེ་ལོ་ངོ་གཅིག་གི་རིང་ལ་བཙོན་འཇུག་ཏུ་བཞུགས་དགོས་བྱུང་འདུག     ཉིས་སྟོང་དགུའི་ལོར་ཁོང་གིས་བརྩམས་པའི་ཕྱག་དེབ་ང་ཚོ་སད་རན་ཞེས་པ་ལ་བོད་ཁམས་ཡོངས་ནས་མཚན་སྙན་ཆེན་པོ་ཐོབ་ཡོད་པ་མ་ཟད།ཁོང་གི་བརྩམས་ཆོས་རྒྱུན་ཤེས་དང་ལམ། དཔྱད་འཚོལ་དང་ལྟ་ཚུལ། རང་ལམ་རང་འཚོལ། བླང་དོར་ལྟ་ཚུལ། སྐྱེས་ཆེན་གྱི་བཞུད་ལམ་སོགས་དེབ་གྲངས་བརྒྱད་ལྷག་པར་སྐྲུན་གནང་པ་མ་ཟད། ཁོང་གིས་དཔེ་ཁྲིད་གནང་བའི་དབུ་མ་འཇུག་པ་དང་། གཏམ་རྒྱུད་གསེར་ཐང་། ས་སྐྱ་ལེགས་བཤད་སོགས་ལ་ཡང་ཉན་མཁན་ཁྲི་སྟོང་མང་པོ་བྱུང་ཡོད་པ་རེད།

གཟའ་འཁོར་སྔོན་མའི་རེས་གཟའ་པ་སངས་ཉིན་ཐེ་ཝན་གྱི་གྲོང་ཁྱེར་ Hualien ནང་མེ་འཁོར་བརྡབ་སྐྱོན་བྱུང་སྟེ་འགྲུལ་བཞུད་པ་མང་དག་ཅིག་རྐྱེན་འདས་སུ་གྱུར་བའི་ཡོད་སྐྱོའི་གནས་ཚུལ་བྱུང་བ་དང་སྦྲགས། བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་གཞུང་མང་གཉིས་ལ་ཐུགས་གསོའི་གསུང་འཕྲིན་བསྩལ་འདུག དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་གྱི་སྲིད་འཛིན་ལྕམ་སྐུ་ Tsai Ing-wen གྱི་མཚན་ཐོག་ལ། Hualien གྲོང་ཁྱེར་ནང་མེ་འཁོར་བརྡབ་སྐྱོན་བྱུང་ནས་མང་ཚོགས་ཀྱི་ཚེ་སྲོག་ཤོར་བར་ཐུགས་ཕམ་ཡོད་པ་དང་སྦྲགས། ཐེ་ཝན་མང་ཚོགས་རྣམས་ནི་ ༸མགོན་པོ་༸གང་ཉིད་མཆོག་གི་ཐུགས་མཉེས་བོ་གནང་ས་ཞིག་དང་ཡང་སྒོས་རྐྱེན་ངན་འདིའི་རིགས་བྱུང་མཚམས་སུ་རྐྱེན་ངན་དེ་ང་ཚོ་ཚང་མའི་ཐོག་ཏུ་ཡོང་བ་ལྟར་ཚོར་བ་ཡོང་གི་ཡོད་པས། ཐེ་ཝན་གྱི་སྲིད་འཛིན་གཙོས་པའི་གོད་ཆགས་དེའི་འོག་རྐྱེན་འདས་སུ་གྱུར་མཁན་རྣམས་ཀྱི་ནང་མི་སོགས་ལ་ཐུགས་གསོ་སྩལ་འདུག གཞན་ཡང་ཐེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོས་ནས་གནས་ཚུལ་དེ་བྱུང་མ་ཐག འཕྲལ་དུ་མེ་འཁོར་བརྡབ་སྐྱོན་ཁྲོད་འདས་གྲོངས་སོང་བར་བསྔོ་སྨོན་དང་རྨས་སྐྱོན་བྱུང་བ་རྣམས་མྱུར་དུ་དྲག་སྐྱེད་སླད་ས་གནས་ཧོ་ལན་དུ་གསོལ་འདེབས་བསྔོ་སྨོན་ཆེད་ཕེབས་འདུག་པ་དང་། སྐབས་དེར་ལྕམ་སྐུ་ཚ་ཡི་ཨིང་ཝིན་ནས་ཁོང་རྣམ་པར་ཐུགས་རྗེ་ཆེ་ཞུས་ཡོད་པ་དེ་གའི་ངོ་དེབ་ནང་འཁོད་འདུགགཞི་རྩའི་བརྒྱུད་ལམ་ཁག་གིས་གནས་ཚུལ་ལ་གཞིགས་ན། ཉེ་ལམ་ཐེ་པི་ནས་ Taitung གྲོང་ཁྱེར་དུ་བསྐྱོད་མཁན་གྱི་ Taiwan Express མེ་འཁོར་དེ་དོས་སྐྱེལ་རླངས་འཁོར་ཞིག་དང་རྡུང་ཁ་བརྒྱབ་ནས། མེ་འཁོར་ནང་འགྲུལ་བཞུད་པ་ ༤༩༠ ཙམ་ཡོད་པའི་ཁྲོད། མེ་འཁོར་གྱི་ཁ་ལོ་བ་གཙོས་པའི་མི་གྲངས་ ༥༠ ཙམ་རྐྱེན་འདས་སུ་གྱུར་ཡོད་པ་དང་། དེ་བཞིན་མི་གྲངས་ ༦༠ ཙམ་ཞིག་ Hualien གྲོང་ཁྱེར་གྱི་སྨན་ཁང་ཁག་ནང་སྨན་བཅོས་གནང་བཞིན་ཡོད་པར་འཁོད་འདུག རྩ་བའི་ཐེ་ཝན་ནང་དེ་སྔ་ཕྱི་ལོ་ ༡༩༤༨ ལོར་མེ་འཁོར་གྱི་དོན་རྐྱེན་ཚབས་ཆེན་ཞིག་བྱུང་ནས་མི་གྲངས་ ༦༤ ཙམ་ཞིག་འདས་གྲོངས་སུ་གྱུར་ཡོད་པའི་འཕྲོར་ད་ཐེངས་ཀྱི་མེ་འཁོར་དོན་རྐྱེན་དེ་ལོ་ངོ་བཅུ་ཕྲག་བདུན་ནང་གི་ཛ་དྲག་གི་དུས་བབ་ཅིག་ཆགས་འདུག

བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་གོང་ས་༸སྐྱབས་མགོན་ཆེན་པོ་མཆོག་གིས་བྷལ་ཊིག་མཚོ་རྒྱུད་རྒྱལ་ཁབ་ཁག་གི་གྲོས་ཚོགས་འཐུས་མི་དང་ཤེས་ཡོན་མི་སྣའི་སྐུ་ཚབ་ཁག་གཅིག་དང་ལྷན་དུ་ད་ལྟ་དང་མ་འོངས་པའི་ཡ་རབས་དང་སྤྱོད་བཟང་བརྗོད་གཞིའི་བགྲོ་གླེང་ཐོག་ཚོགས་མགོན་དུ་དབུ་བཞུགས་ཀྱིས་འགྲོ་བ་མི་རྣམས་ནི་སྤྱི་ཚོགས་ལ་བརྟེན་པའི་སེམས་ཅན་ཞིག་ཡིན་སྟབས་འགྲོ་བ་མིའི་རང་བཞིན་དེའང་བྱམས་བརྩེའི་བདག་ཉིད་ཡིན་སྐོར་དང་འབྲེལ་ནས་གོ་ལ་གཅིག་གྱུར་དང་འབྲེལ་བའི་སློབ་གསོ་སྤྲོད་དགོས་པའི་ལམ་སྟོན་མཛད་སོང་།དེ་རིང་སྔ་དྲོ་ཕྱག་ཚོད་ ༩ ཐོག་༸གོང་ས་༸སྐྱབས་མགོན་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་བྷལ་ཊིག་མཚོ་རྒྱུད་རྒྱལ་ཁབ་ཁག་གི་གྲོས་ཚོགས་འཐུས་མི་དང་ཤེས་ཡོན་མི་སྣའི་སྐུ་ཚབ་ཁག་ལ་བཀའ་སློབ་ལམ་སྟོན་སྩལ་སྐབས་གོ་ལ་འདིར་འཚོ་གནས་བྱེད་བཞིན་པའི་འགྲོ་བ་མི་ཐེར་འབུམ་བདུན་ཡོད་པ་དེ་དག་ཀུན་ཆོས་ཁས་ལེན་མིན་ལ་ལྟོས་མེད་བདེ་སྐྱིད་འདོད་པ་གཅིག་མཚུངས་ཡིན་སྟབས་ང་ཚོ་ཕན་ཚུན་དབར་གཅེན་གཅུང་གི་འདུ་ཤེས་འཛིན་དགོས་གལ་ཡིན་པ་དང་དེ་ལྟར་གནང་ཚེ་མ་འོངས་པའི་འཛམ་གླིང་འདི་ཡང་བདེ་སྐྱིད་དང་ཞི་བདེ། བྱམས་བརྩེ་ལྡན་པ་ཞིག་ཡོང་ཐུབ་ངེས་ཡིན་པར་བཀའ་སྩལ་སོང་། དེ་བཞིན་མགོན་པོ་༸གང་ཉིད་མཆོག་གིས་ལ་ཊི་ཝི་ཡ་དང་ཨིས་ཊོ་ནི་ཡ། བྷལ་ཊིག་བཅས་ཀྱི་མི་མང་ཚོར་འགྲོ་བ་མི་ཐེར་འབུམ་བདུན་པོ་རྣམས་གཅིག་གྱུར་གྱི་འདུ་ཤེས་ཐོག་ཞབས་འདེགས་ཞུ་རྒྱུའི་ནུས་པ་ཁྱད་པར་བ་ལྡན་ཡོད་པར་ལམ་སྟོན་སྩལ་བ་དང་སྦྲགས། ལྷག་པར་དུ་དེང་གི་ཆར་དམག་འཐབ་ཀྱི་ཐོག་ནས་ངལ་བ་ཁག་སེལ་རྒྱུའི་བསམ་བློ་ཡོད་པ་ནི་དུས་ཚོད་ཡོལ་བའི་སྐད་ཆ་ཞིག་ཡིན་པ་མ་ཟད་གོ་མཚོན་ཐོག་འགྲོ་གྲོན་བཏང་བ་ནི་དེ་བས་ཀྱང་བེད་མེད་ཡིན་པ་བཀའ་སྩལ་སོང་།དེ་རིང་གི་བརྗོད་གཞི་དང་འབྲེལ་ནས་ཚོགས་ཞུགས་པས་བཀའ་འདྲི་དགོངས་སྐོར་ཞུ་མཁན་མང་དག་ཅིག་བྱུང་ཡོད་པ་ལྟར་དེ་དག་ཁོངས་ནས་ལ་ཊི་ཝི་ཡའི་གྲོས་ཚོགས་འཐུས་མི་དང་ཚན་རིག་དང་ཤེས་ཡོན་བློན་ཆེན་ཞིག་གིས་མིའི་མི་ཚེ་སྐྱེལ་སྟངས་ཁྲོད་རང་ཉིད་ཀྱིས་སྔར་སློབ་གཉེར་གནང་ཟིན་པའི་སློབ་སྦྱོང་དེ་དག་དུས་ཀྱི་འགྱུར་འགྲོས་དང་མཐུན་པར་གོང་འཕེལ་གཏོང་ཐབས་སུ་གང་བྱེད་དགོས་སམ་ཞེས་བཀའ་འདྲི་ཞུས་པར་༸གོང་ས་མཆོག་གིས་ང་ཚོ་འགྲོ་བ་མི་ཡིན་པའི་ཆ་ནས་ཐུན་མིན་གྱི་ཀླད་པ་ཞིག་ཡོད་སྟབས་ཀླད་པ་དེ་སྤྱད་ནས་ཤེས་ཡོན་གོང་འཕེལ་གཏོང་གནད་ཡིན་པ་དང་། དེང་དུས་ཀྱི་ཤེས་ཡོན་ལམ་ལུགས་ནང་ལ་མིའི་ལྷན་སྐྱེས་བཟང་སྤྱོད་གོང་འཕེལ་གཏོང་ཐབས་དང་གོ་ལ་གཅིག་གྱུར་དང་འབྲེལ་བའི་སློབ་གསོ་སྤྲོད་དགོས་པ་སོགས་ཀྱི་ལམ་སྟོན་སྩལ་སོང་།ལ་ཊི་ཝི་ཡའི་གྲོས་ཚོགས་འཐུས་མི་ཟུར་པ་སྐུ་ཞབས་ Davis Stalts ལགས་ཀྱིས་མིའི་མི་ཚེར་འཕྲད་པའི་དཀའ་ངལ་སྤྱི་དང་སྒོས་སུ་ཆབ་སྲིད་དང་འབྲེལ་བའི་ངལ་བ། དེ་བཞིན་དབང་ཆ་དང་དཔལ་འབྱོར་ལ་ཞེན་པའི་ངལ་བ་དེ་དག་སེལ་ཐབས་ཇི་ལྟར་གནང་དགོས་སམ་ཞེས་པའི་བཀའ་འདྲི་ཞུས་པར་༸གོང་ས་མཆོག་གིས་སྔ་མོ་ཡིན་ན་དམག་དང་འབྱོར་བའི་སྟབས་ཤུགས་གཙིགས་ཆེར་འཛིན་ན་ཡང་རིམ་བཞིན་འགྱུར་བ་ཕྱིན་ནས་དེང་སྐབས་སྤྱི་ཚོགས་རིང་ལུགས་ལ་དོ་སྣང་ཆེན་པོ་བྱེད་ཀྱི་ཡོད་སྟབས། སྤྱི་ཚོགས་རིང་ལུགས་ཚད་ལྡན་བཟང་སྤྱོད་ཀྱི་རང་བཞིན་ཡོད་པ་ཞིག་དགོས་གལ་ཡིན་པར་བཀའ་སྩལ་སོང་།དེ་བཞིན་བཟོད་སྒོམ་གནང་རྒྱུ་དེ་ཆེས་དཀའ་བའི་གནད་དོན་ཞིག་ཡིན་སྟབས་དེར་གཉེན་པོ་ཇི་ལྟར་བསྟེན་དགོས་སམ་ཞེས་བཀའ་འདྲིར་མགོན་པོ་༸གང་ཉིད་མཆོག་གིས་ང་ཚོར་ངལ་བ་གང་ཞིག་འཕྲད་ཀྱང་དེའི་རྒྱུ་རྐྱེན་གང་ཡིན་ཞིབ་དཔྱད་གནང་གལ་དང་། ཅི་སྟེ་ངལ་བ་དེ་སེལ་ཐབས་ཡོད་ཚེ་སྙིང་སྟོབས་ཆེན་པོས་སེལ་ཐབས་གནང་དགོས་པ་སོགས་ལམ་སྟོན་མཛད་སོང་། དེ་རིང་གི་བརྗོད་གཞི་ད་ལྟ་དང་མ་འོངས་པའི་ཡ་རབས་དང་སྤྱོད་བཟང་ཐོག་བགྲོ་གླེང་གནང་གྲུབ་མཚམས་སུ་ལ་ཊི་ཝི་ཡའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Uldis Budrikis ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་མཉམ་ཞུགས་བ་ཡོངས་ཀྱི་ཚབ་ཞུས་ནས་བཀྲིན་ཆེ་ཞུ་རྒྱུ་དང་། ལྷག་དོན་༸གོང་ས་མཆོག་གིས་བྱམས་བརྩེ་དང་བཟང་སྤྱོད་ཐོག་བཀའ་སློབ་གནང་ཁག་གོང་འཕེལ་ཐད་འབད་བརྩོན་གང་ཐུབ་ཞུ་ངེས་ཡིན་ཞེས་ཞུས་པ་དང་ཆབས་ཅིག བོད་མི་ཚོར་ད་ལྟ་འཕྲད་བཞིན་པའི་ཆབ་སྲིད་ཀྱི་དཀའ་ངལ་དེ་འདྲ་ཞིག་ལོ་མང་གོང་ནས་ང་ཚོ་ལའང་འཕྲད་མྱོང་ཡོད་པ་ཞིག་རེད། དེས་ན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་འབྲུ་དོན་ལྟར་བོད་མི་ཚོར་རང་དབང་ཆ་ཚང་བ་ཞིག་རག་པར་ང་ཚོས་དུས་རྟག་ཏུ་རྒྱབ་སྐྱོར་ཡོད་ཅེས་གསུངས་པ་དང་ལྷན་དུ་༸གོང་ས་མཆོག་གི་དྲུང་ནས་དྲན་ཤེས་བཞིན་བཅས་ཀྱི་བཀའ་ཆོས་ཞུ་རྒྱུ་བྱུང་བར་བཀྲིན་བླ་མེད་དུ་ཆེ་ཞེས་གསུངས་པ་དང་སྦྲགས། དེ་བཞིན་ཁོང་གིས་མ་འོངས་པར་བོད་ལ་རང་དབང་འཐོབ་ཚེ་ང་ཚོའི་དབར་གྲོགས་པའི་འདུ་ཤེས་ཡོད་པ་དེ་སྔར་ལྷག་སྲ་བརྟན་ཡོང་བར་ཐུགས་རེ་ཡོད་ཅེས་ཞུས་སོང་།རྩ་བའི་དེ་རིང་དྲྭ་ཐོག་གི་བགྲོ་གླེང་ལས་རིམ་ཁག་ལེགས་གྲུབ་དང་བསྟུན་མགོན་པོ་༸གང་ཉིད་མཆོག་གིས་ཐུགས་བསྐྱེད་ཆེན་པོ་བཞིའི་དགོངས་གཞི་དང་འབྲེལ་བའི་ངོ་སྤྲོད་སྙིང་བསྡུས་ཤིག་མཛད་ཡོད་པ་རེད། ༸དཔལ་ལྡན་དགའ་ལྡན་ཕོ་བྲང་གི་དྲྭ་རྒྱར་མཛད་འཆར་བསྐྱང་གཏན་ཁེལ་ཁག་ཆེད་བཀོད་གནང་བར་གཞིགས་ན། ཟླ་བ་འདིའི་ཚེས་ ༧ ཉིན་ཨི་ཊ་ལིའི་ནང་པའི་ཚོགས་པ་ནས་ཇི་ལྟར་གསོལ་བ་བཏབ་པ་ལྟར་༸གོང་ས་མཆོག་གིས་དྲ་ལམ་བརྒྱུད་བདེན་པ་བཞི་དང་བདེན་པ་གཉིས་ཀྱི་བཀའ་ཆོས་སྩལ་རྒྱུ་དང་དེ་བཞིན་ཚེས་ ༡༢ ཉིན་འཛམ་གླིང་སྔར་ལས་བཟང་བ་ཞིག་དང་བྱམས་བརྩེའི་བདག་ཉིད་བགྱིས་ཞེས་པའི་ཚོགས་པས་གསོལ་འདེབས་གོ་སྒྲིག་ཞུས་དོན་ལྟར་དྲ་ལམ་བརྒྱུད་བཅོས་བསྒྱུར་མཁན་དང་ཤུགས་རྐྱེན་ཆེ་བའི་ན་གཞོན་བཅུ་གཉིས་ལ་བཀའ་སློབ་དང་བཀའ་འདྲི་དགོངས་སྐོར་ཞུ་མཁན་ཚོར་བཀའ་ལན་མཛད་རྒྱུའི་མཛད་འཆར་ཐུགས་གཏན་ཁེལ་འདུག

རྒྱ་ནག་གི་བདེ་སྲུང་བློན་ཆེན་ཡུ་རོབ་རྒྱལ་ཁབ་ཁག་ཅིག་ཏུ་གཞུང་འབྲེལ་སྐོར་སྐྱོད་བྱེད་བཞིན་པ་དང་བསྟུན་བདུན་ཕྲག་སྔོན་མའི་རེས་གཟའ་ལྷག་པའི་ཉིན་ Hungary ཡི་རྒྱལ་ས་ Budapest ནང་དུ་འབྱོར་སྐབས་ཡུལ་དེའི་ཕྱོགས་འགལ་ཚོགས་པའི་ཚོགས་མི་ཁག་ཅིག་གིས་རྒྱ་ནག་གི་བློན་ཆེན་ཕྱོགས་སྐྱོད་ལ་ངོ་རྒོལ་གྱི་རྣམ་པ་ཆེད་བཏོན་གནང་བའི་ཁྲོད་ Budapest གྲོང་ཁྱེར་སྤྱི་ཁྱབ་གཞོན་པ་སྐུ་ཞབས་ Ference Garencser ལགས་ཀྱིས་གྲོང་ཁྱེར་ཚོགས་ཁང་མདུན་དུ་བོད་ཀྱི་རྒྱལ་དར་སྒྲེང་འཛུགས་ཀྱིས་རྒྱ་ནག་གི་བློན་ཆེན་ལ་ངོ་རྒོལ་གྱི་རྣམ་པ་བསྟན་འདུགདེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་ཉེ་ཆར་ཕྱི་ཟླ་ ༣ ཚེས་ ༢༤ ཉིན་རྒྱ་ནག་གི་བདེ་སྲུང་བློན་ཆེན་ Wei Fenghe Hungary ཡི་རྒྱལ་ས་ Budapest ནང་དུ་གཞུང་འབྲེལ་སྐོར་སྐྱོད་དང་འབྲེལ་ནས་ Hungary ཡི་སྲིད་འཛིན་ Janos Ader དང་སྲིད་བློན་གཞན་པ། དེ་བཞིན་བདེ་སྲུང་བློན་ཆེན་བཅས་དང་ལྷན་དུ་ཐུག་འཕྲད་བྱས་ཡོད་སྐོར་བཀོད་འདུག སྐབས་དེར་ཡུལ་དེའི་ཕྱོགས་འགལ་ཚོགས་པའི་ཚོགས་མི་ཁག་ཅིག་གིས་སྲིད་འཛིན་གྱི་ལས་ཁུངས་ཉེ་འགྲམ་དུ་ཆགས་པའི་གྲོང་ཁྱེར་ཚོགས་ཁང་མདུན་དུ་ཤིན་ཅང་ནང་གདུག་རྩུབ་ཀྱི་མནར་གཅོད་མྱོང་བཞིན་པ་རྣམ་ལ་དྲང་བདེན་དགོས་ཞེས་འཁོད་པའི་ཕྲེད་དར་འཕྱར་ཏེ་རྒྱ་ནག་གི་བདེ་སྲུང་བློན་ཆེན་ལ་ངོ་རྒོལ་བྱས་ཡོད་པ་མ་ཟད་སྐབས་དེར་གྲོང་ཁྱེར་སྤྱི་ཁྱབ་གཞོན་པ་ Ference Garencser ལགས་ཀྱིས་ཚོགས་ཁང་གི་སྒེའུ་ཁུང་ཕྱོགས་སུ་བོད་ཀྱི་རྒྱལ་དར་སྒྲེང་འཛུགས་ཀྱིས་ Hungary གཞུང་ནས་རྒྱ་ནག་དང་ལྷན་དུ་འབྲེལ་བ་གནང་བར་ངོ་རྒོལ་གནང་འདུག སྐུ་ཞབས་ Ference ལགས་ཀྱིས་ Hungary གཞུང་གིས་རྒྱ་ནག་དམར་ཤོག་ཚོགས་པའི་དཔོན་རིགས་ལ་དགའ་བསུ་ཞུས་པར་བློ་ཕམ་ཡོད་སྐོར་དང་འབྲེལ་ནས་ དམར་ཤོག་རྒྱལ་ཁབ་ཁག་དང་ལྷན་དུ་འབྲེལ་མོལ་སྐབས་ཐིག་དམར་པོའི་ཚད་འཛིན་ཞིག་དགོས་ངེས་ཡིན་པ་དང་རྒྱ་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་རྒྱལ་ཁབ་སུས་ཀྱང་སྣང་མེད་དུ་བཞག་རྒྱུ་མེད་པར་གསུངས་འདུག Budapest གྲོང་ཁྱེར་སྤྱི་ཁྱབ་གཞོན་པ་སྐུ་ཞབས་ Ference Garenscer ལགས་དེ་སྔ་ཕྱི་ལོ་ ༢༠༡༣ ལོར་བཞུགས་སྒར་དྷརྨ་ས་ལར་ཕེབས་མྱོང་ཡོད་པ་དང་སྐབས་དེར་ཁོང་གིས་བོད་ཀྱི་ཆོས་དང་རིག་གཞུང་། ལོ་རྒྱུས་དང་དཀའ་སྡུག་བཅས་ཀྱི་ཐོག་མཁྱེན་རྟོགས་བྱུང་ཡོད་པ་ལྟར་བོད་དོན་ལ་གདུང་སེམས་མཉམ་བསྐྱེད་སླར་ལྷག་གནང་མཁན་ཞིག་ཏུ་གྱུར་ཡོད་པ་རེད།ཡུ་རོབ་ཁུལ་གྱི་བརྒྱུད་ལམ་ཁག་གིས་རྒྱ་ནག་གི་བདེ་སྲུང་བློན་ཆེན་གྱི་ངོས་ནས་ཐེངས་འདིའི་འཚམས་གཟིགས་དེ་ཙོ་བོ་རྒྱལ་ཁབ་ཕྱོགས་གཉིས་དབར་དམག་གི་འབྲེལ་ལམ་ཤུགས་ཆེ་རུ་གཏང་རྒྱུར་ཆེད་དམིགས་བྱས་ཡོད་པ་བཀོད་འདུག Hungary གཞུང་འཛིན་ཚོགས་པས་བརྒྱུད་ལམ་ཁག་ལ་ཐེངས་འདིའི་རྒྱ་ནག་གི་བློན་ཆེན་སྐོར་སྐྱོད་དང་འབྲེལ་བའི་གནས་ཚུལ་གང་ཡང་འགྲེལ་བརྗོད་བྱས་པ་དེ་ལྟར་ཡང་ཉེ་ཆར་ Hungary གཞུང་གིས་རྒྱ་ནག་གི་ཏོག་དབྱིབས་སྔོན་ཁབ་གཉིས་པ་དེ་ངོས་ལེན་བྱས་པ་དང་འབྲེལ། ད་ལན་གྱི་ཐུག་འཕྲད་དེའི་ཐོག་རྒྱ་ནག་གི་ཏོག་དབྱིབས་སྔོན་ཁབ་ཚོང་འགྲེམས་དང་འབྲེལ་བའི་གླེང་མོལ་བྱ་རྒྱུ་ཡིན་པར་ཚོད་དཔག་གནང་བཞིན་འདུག རྩ་བའི་ Hungary ཡིས་རྒྱ་ནག་དང་ཨུ་རུ་སུའི་ཏོག་དབྱིབས་སྔོན་ཁབ་ལ་ངོས་བཞེས་གནང་བ་དང་འབྲེལ་ནས་ཡུལ་དེའི་མང་ཚོགས་ཁྲོད་སྔོན་ཁབ་རྒྱག་རྒྱུའི་ལས་གཞི་དེ་ཡུ་རོབ་རྒྱལ་ཁབ་གཞན་ལས་ཚགས་ཚུད་པ་དང་མགྱོགས་པ་འགྲོ་བཞིན་ཡོད་པ་བརྗོད་ཀྱི་ཡོད་ཀྱང་། ཁ་ཉིན་ཚེས་ ༣༡ ཉིན་ Hungary ནང་ད་བར་ཉིན་མ་གཅིག་གི་ནང་དུ་ཏོག་དབྱིབས་གཉན་རིམས་འོག་འདས་གྲོངས་སུ་གྱུར་མཁན་གྱི་གྱི་གྲངས་འབོར་ཆེ་ཤོས་ཆགས་ཡོད་པ་དང་དེ་ཉིན་མི་ ༣༠༢ གཉན་རིམས་རྐྱེན་གྱིས་འདས་གྲོངས་སུ་གྱུར་ཡོད་པ་རེད།  ད་བར་ཧང་གྷི་རིར་ཏོག་དབྱིབས་གཉན་རིམས་རྐྱེན་གྱིས་འདས་གྲོངས་སུ་གྱུར་བའི་གྲངས་འབོར་དེ་ ༢༠༧༠༠ ལྷག་ཆགས་ཡོད་པ་རེད།

ཉི་ཧོང་བོད་ཀྱི་སྐུ་ཚབ་དོན་གཅོད་ཁང་ནས་ཡུལ་དེའི་གཞུང་འཛིན་ཚོགས་པའི་སྤྱི་ཁྱབ་ལས་ཁུངས་སུ་ཆེས་ཐོག་མའི་བོད་ནང་གི་ཛ་དྲག་གནས་སྟངས་སྐོར་གླེང་འདུགཁ་སང་ཉི་ཧོང་བོད་ཀྱི་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཡུལ་དེའི་གཞུང་འཛིན་གུ་ཡངས་མང་གཙོ་ཆབ་སྲིད་ཚོགས་པའི་སྤྱི་ཁྱབ་ལས་ཁུངས་སུ་ཆེད་བཅར་གྱིས་ཕྱི་སྲིད་ཚོགས་ཆུང་གི་ཚོགས་གཙོ་དང་ཉི་ཧོང་གྲོས་ཚོགས་འཐུས་མི་སྐུ་ཞབས་ Sato Masahisa ལགས་གཙོས་ཚོགས་ཆུང་གི་ཚོགས་མི་མདུན་སར་བོད་ནང་གི་ད་ལྟའི་ཛ་དྲག་གནས་སྟངས་སྐོར་ངོ་སྤྲོད་ཞུས་པ་དང་འབྲེལ། བོད་ནང་རིག་གནས་གསར་བརྗེའི་རྣམ་པ་གསར་པ་ཞིག་ཁྱབ་བཞིན་པའི་ཁོངས་རྒྱ་གཞུང་གིས་བོད་ཀྱི་ས་ཁུལ་གང་སར་ཉེན་རྟོག་ལས་ཁུངས་བཙུགས་ཏེ་བོད་མི་རྣམས་ལ་དམ་དྲག་དང་ཕྱི་རྒྱལ་ཡུལ་གྲུ་ཁག་ལ་འབྲེལ་བ་གནང་འཇུག་གི་མེད་པ་མ་ཟད། ད་ཆ་བོད་ནི་ཉེན་རྟོག་པའི་རྒྱལ་ཁབ་ལྟ་བུར་ཆགས་པ་དང་ལྷག་དོན་རྒྱ་གཞུང་གིས་དབུལ་སྐྱོར་ལས་གཞི་ཟེར་བར་ཁ་གཡར་ནས་བོད་མིའི་ངོ་བོ་དང་། ཆོས་རིག སྐད་ཡོད་བཅས་པ་རྩ་གཏོར་གྱི་སྲིད་བྱུས་སྤེལ་བཞིན་ཡོད་སྟབས་ཨ་རི་གཞུང་ནས་ཕྱི་ལོ་ ༢༠༢༠ ལོའི་བོད་དོན་ཁྲིམས་འཆར་ལ་ཚད་མཐོའི་རྒྱབ་སྐྱོར་གནང་སྟེ་གཏན་འབེབས་གནང་ཡོད་པ་བཞིན་ཉི་ཧོང་གཞུང་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་དགོས་པའི་ཞུ་སྐུལ་གནང་འདུགསྐབས་དེར་སྐུ་ཞབས་ Sato Masahisa ལགས་ཀྱིས་ཉི་ཧོང་གི་གུ་ཡངས་མང་གཙོ་ཆབ་སྲིད་ཚོགས་པའི་སྤྱི་ཁྱབ་ལས་ཁུངས་སུ་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་ཅིག་ནས་བོད་ཀྱི་གནད་དོན་སྐོར་འགྲེལ་བརྗོད་ཞུས་པ་ཐོག་མ་དེ་ཆགས་ཡོད་སྟབས་དེས་ཉི་ཧོང་གྲོས་ཚོགས་འཐུས་མི་རྣམ་པར་བོད་དོན་སྐོར་གོ་རྟོགས་དང་རྒྱབ་སྐྱོར་ལས་འགུལ་སྤེལ་ཕྱོགས་སྐོར་གྱི་འཆར་གཞིར་རམ་འདེགས་གནང་ཡོད་ཅེས་གསུངས་པ་མ་ཟད། ཉི་ཧོང་གི་གྲོས་ཚོགས་འཐུས་མི་ཁག་ཅིག་ནས་བོད་ནང་གི་དམ་དྲག་དང་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཀྱི་གནད་དོན། དེ་བཞིན་བོད་མིའི་སྒྲིག་འཛུགས་སོགས་ཀྱི་སྐོར་དོན་གཅོད་ལ་བཀའ་འདྲི་གནང་འདུགབོད་ནང་གི་གནས་སྟངས་སྤྱིའི་སྐོར་ངོ་སྤྲོད་ཞུས་གྲུབ་མཚམས་སུ་དོན་གཅོད་ནས་ཉི་ཧོང་གི་གསར་ཁང་གྲགས་ཅན་ NHK དང་། Jiji press དེ་བཞིན་ Kyodo སོགས་ཀྱི་གསར་འགོད་པ་ཁག་ཅིག་ལ་བོད་དོན་སྐོར་འགྲེལ་བརྗོད་གནང་བ་དང་ཆབས་ཅིག་དེ་འབྲེལ་སྐོར་གྱི་ཡིག་ཆ་ཁག་འགྲེམས་སྤེལ་གནང་འདུག