གསར་འགྱུར།

རྒྱ་གར་བྱང་ཕྱོགས་ལ་དྭགས་དང་བོད་ཀྱི་ས་མཚམས་སུ་བདུན་ཕྲག་ཁ་ཤས་གོང་ནས་རྒྱ་དཀར་ནག་གཉིས་ཀྱི་དབར་གདོང་ཐུག་གི་གནད་དོན་དེ་ཆེས་ཛ་དྲག་ཏུ་འགྱུར་བཞིན་པའི་དུས་སྐབས་འདིར་ཉེ་ལམ་རེས་གཟའ་པ་སངས་ཉིན་རྒྱ་གར་གྱི་ Aj tak གསར་འགྱུར་བརྒྱུད་ལམ་གྱི་གླེང་མོལ་ལེ་ཚན་ཞིག་གི་ཐོག་རྒྱ་གར་གཞུང་གི་ Kyrgyzstan ཁུལ་གྱི་གཞུང་ཚབ་ཟུར་པ་ཕུན་ཚོགས་སྟོབས་ལྡན་གྱིས་༸གོང་ས་མཆོག་ལ་ལ་གཞི་མེད་སྐྱོན་བརྗོད་དང་སྐུར་འདེབས་ཞུས་པར་ལ་དྭགས་ནང་ཚོགས་དང་དགོན་ཚོགས། གཞོན་ནུ་ཚོགས་པ། ཨ་མ་ཚོགས་པ། དེ་བཞིན་ཁྲིགས་སེ་རིན་པོ་ཆེ་མཆོག གཞན་ཡང་ཚོགས་སྒེར་ཁག་ཅིག་གིས་ངོ་རྒོལ་ཤུགས་ཆེ་གནང་འདུག་པ་མ་ཟད། དེ་རིང་ལ་དྭགས་ས་གནས་ཡོངས་ཀྱི་ཚོང་ཁང་ཁག་སྒོ་རྒྱག་ཡོད་པ་རེད་འདུགཉེ་ལམ་རྒྱ་གར་གྱི་གསར་ཁང་ Ajtak ཡི་བརྒྱུད་ལམ་ཐོག་ཕུན་ཚོགས་སྟོབས་ལྡན་ཟེར་བ་དེས་རྒྱལ་མཚམས་ཀྱི་གནད་དོན་དང་འབྲེལ་ནས་ས་ཚིགས་དེ་རྒྱ་ནག་གི་རེད་ཅེས་སུས་ཟེར་བ་རེད། གལ་སྲིད་ས་ཚིགས་དེའི་བདག་པོ་ཞིག་ཡོད་ན་དེ་ནི་བོད་ཡིན་སྲིད་པ་རེད། གནད་དོན་དེ་དང་འབྲེལ་ཏེ་༸གོང་ས་མཆོག་དྷ་སར་སྐུ་བཞུགས་གནང་ནས་དགེ་སྦྱོར་དང་གསུང་ཆོས་བསྩལ་བ་ལས། ས་ཚིགས་དེ་བོད་ཀྱི་མིན་པ་དང་རྒྱ་གར་གཞུང་གི་ཡིན་པ་སོགས་ཀྱི་བཀའ་གང་ཡང་མི་བསྩལ་བར་བཞུགས་དོན་གང་ཡིན་ནམ། ཡང་ན་རྒྱ་ནག་དང་ལག་སྦྲེལ་ཡོད་པ་རེད་དམ་ཞེས་སྐུར་འདེབས་ཞུས་པའི་བཀའ་མོལ་ཞིག་སྤྱི་ཚོགས་བརྒྱུད་ལམ་ཁྲོད་ཁྱབ་སྤེལ་ཤུགས་ཆེར་སོང་བ་དང་བསྟུན། ལ་དྭགས་ཀྱི་དད་ལྡན་མང་ཚོགས་གཙོས་ཕྱི་ནང་གི་དད་ལྡན་སྟོང་ཕྲག་མང་པོས་མི་འདོད་པའི་དགག་མཆན་དང་ངོ་རྒོལ་གྱི་རྣམ་པ་ཆེས་ཆེར་བསྟན་ནས་མང་ཚོགས་ཀྱིས་ལ་དྭགས་ནང་ཚོགས་དང་དགོན་ཚོགས་ནས་དེར་ཞིབ་དཔྱོད་དང་ངོ་རྒོལ། དེ་བཞིན་ངན་པ་ཚར་གཅོད་དགོས་པའི་རེ་འདུན་ཤུགས་ཆེ་གནང་བར་བརྟེན་ཁང་སང་ཉིན་རྒྱབ་ལ་དྭགས་ནང་པ་ཚོགས་འདུ་དང་ལ་དྭགས་དགོན་པའི་ཚོགས་འདུ། ལ་དྭགས་ནང་པ་ཚོགས་པའི་གཞོན་ནུ་ཚོགས་པ་དང་ཨ་མ་ཚོགས་པ་བཅས་ཀྱིས་དགག་པ་ཚ་ནན་གནང་བ་དང་སྦྲགས། ངོ་རྒོལ་ཤུགས་ཆེར་ཡོད་པའི་ཡིག་ངག་གཉིས་ཐོག་ནས་གསར་འགོད་གསལ་བསྒྲགས་དང་གསར་འགོད་བསྒྲགས་གཏམ་སྤེལ་ཡོད་པ་རེད།སྐབས་དེར་ལ་དྭགས་ནང་པ་ཚོགས་འདུའི་དབུས་སྐྱོང་པི་ཊི་ཀུན་བཟང་ལགས་ཀྱིས་ས་མཚམས་ཀྱི་གནད་དོན་དང་འབྲེལ་ནས་ཕུན་ཚོགས་སྟོབས་ལྡན་གྱིས་དོན་མེད་རྩ་བའི་བླ་མར་སྐུར་འདེབས་ཞུས་ཡོད་སྐོར་གསུངས་པ་དང་འབྲེལ། ༸གོང་ས་མཆོག་གིས་དེ་སྔ་ནས་ཆབ་སྲིད་ཀྱི་སྐུ་དབང་ཡོངས་རྫོགས་བཞག་གནང་སྟེ་ཆོས་ཕྱོགས་ཀྱི་ཐུགས་འགན་ཁོ་ན་བཞེས་ཀྱི་ཡོད་པ་ཤེས་བཞིན་དུ་མགོན་པོ་༸གང་ཉིད་མཆོག་ལ་སྐུར་འདེབས་ཞུས་པ་དེས་ནང་པ་ཙམ་མིན་པར་འགྲོ་བ་སྤྱི་ལ་སེམས་ཕོག་ཐུག་ཆེན་པོ་བྱུང་ཡོད་སྟབས། དེར་དམའ་འབེབས་དང་ངོ་རྒོལ་གནང་བ་དང་། གོ་གནས་ཆེན་པོ་བཟུང་མཁན་གྱིས་གཙོས་གང་ཟག་སུ་འདྲ་ཞིག་ནས་༸གོང་ས་མཆོག་ལ་འཚེ་མེད་ཞུ་མི་རུང་བ་དང་དེར་ངོ་རྒོལ་མཐའ་གཅིག་ཏུ་ཞུ་རྒྱུ་ཡིན་པ་གསུངས་སོང་།དེ་བཞིན་ལ་དྭགས་ཡོངས་ཀྱི་དགོན་པ་ཚོགས་འདུའི་དབུས་སྐྱོང་དགེ་བཤེས་ཤེས་སྒྲུབ་བྱམས་པ་ལགས་ཀྱིས་༸གོང་ས་མཆོག་ནི་དད་ལྡན་འབུམ་ཕྲག་མང་པོའི་རྩ་བའི་བླ་མ་ཡིན་པ་དང་། མགོན་པོ་མཆོག་ནི་སྔ་མོ་ནས་ང་ཚོའི་རྩ་བའི་བླ་མ་ཡིན་པ་མ་ཟད་དུས་ད་ལྟའང་རེད། མ་འོངས་པ་ལའང་ང་ཚོའི་རྩ་བའི་བླ་མ་གཅིག་པོ་དེ་ཡིན་སྐོར་གསུངས་པ་དང་འབྲེལ། བཀའ་མོལ་གནང་སྟངས་མིི་ཤེས་པ་མཁས་པའི་མིང་འཛིན་པ་ཞིག་གིས་༸གོང་ས་མཆོག་ལ་སྐུར་འདེབས་ཞུས་པར་དགོན་ཚོགས་ནས་དམའ་འབེབས་ཤུགས་དྲགས་ཞུ་རྒྱུ་ཡིན་ཞེས་དང་། ཆབས་ཅིག་ཏུ་ མགོན་པོ་མཆོག་ལ་སྐུར་འདེབས་ཞུ་མཁན་ཞིག་ཡིན་ཚེ་མི་དེ་རྒྱ་ནག་གཞུང་དང་ལག་སྦྲེལ་ཡོད་པའི་མི་ཞིག་ཡིན་སྲིད་པ་དང་དེ་ལྟར་མིན་ཚེ་གང་ཟག་དེ་སྨྱོན་པ་ཞིག་རེད་ཅེས་གསུངས་སོང་། ལ་དྭགས་ནང་པའི་གཞོན་ནུ་ཚོགས་པ་དང་ལ་དྭགས་ཨ་མ་ཚོགས་པའི་ཚོགས་གཙོ་རྣམ་གཉིས་ནས་ཀྱང་ཅི་སྟེ་ཕུན་ཚོགས་སྟོབས་ལྡན་རང་ཉིད་རང་ལ་མཁས་པར་ངོས་འཛིན་བཞིན་ཡོད་ཀྱང་ང་ཚོའི་ངོས་ནས་མཁས་པའི་ཤེས་སྤྱོད་ཅིག་ཡོད་པ་མཐོང་གི་མི་འདུག་ཞེས་དང་།  འཕགས་པ་སྤྱན་རས་གཟིགས་ཀྱི་རྣམ་སྤྲུལ་ལ་སྐུར་འདེབས་ཞུས་པ་ནི་ཁྱེད་ཀྱིས་ཤེས་ཡོན་སློབ་གསོ་གང་སྦྱངས་མིན་ཐོག་ལའང་སོམ་ཉི་བྱ་གཞི་ལས་མ་སོ་ཞེས་གསུངས་སོང་།ད་དུང་ཁ་སང་ཉིན་དགུང་ཁྲིགས་སེ་རིན་པོ་ཆེ་མཆོག་གིས་ཀྱང་སྐྱོན་བརྗོད་དང་ངོ་རྒོལ་ཤུགས་དྲག་གནང་བ་བརྒྱུད་ལ་དྭགས་ནང་ཚོགས་དང་དགོན་ཚོགས་གཉིས་ནས་ཉེས་ཅན་ལ་སྐྱོན་འཛུགས་དང་ཕུན་ཚོགས་སྟོབས་ལྡན་རང་ཉིད་ཀྱི་ངོས་ནས་༸གོང་ས་མཆོག་ལ་བཟོད་གསོལ་ཞུ་དགོས་པའི་གསལ་བསྒྲགས་སྤེལ་གནང་འདུག ལ་དྭགས་ཚོང་པའི་ཚོགས་པ་གཙོས་ལ་དྭགས་གླེའི་དཔེ་ཐུབ་ཁང་ཚན་ཤེས་རིག་འཛིན་སྐྱོང་ཚོགས་པ་དང་འབྲས་སྤུངས་ཀླུ་འཁྱིལ་ཁང་ཚན། དེ་བཞིན་བཀྲིས་ལྷུན་པོའི་དཀྱིལ་ཁང་སྟག་མོ་ཁང་ཚན་དང་འབྲས་སྤུངས་སྒོ་མང་མངའ་རིས་ཁང་ཚན་སོགས་ཚོགས་སྒེར་དུ་མས་ངོ་རྒོལ་གནང་འདུག  གོང་གི་ཚོགས་སྡེ་ཁག་གི་གསར་འགོད་གསལ་བསྒྲགས་ལ་རྒྱབ་སྐྱོར་དང་ཕུན་ཚོགས་སྟོབས་ལྡན་ལ་ངོ་རྒོལ་མཚོན་ཆེད་ལ་དྭགས་ནང་པ་ཚོགས་འདུའི་གཞོན་ནུ་ཚོགས་པ་དང་ཚོང་པ་ཚོགས་པའི་བཀོད་ཁྱབ་འོག་དེ་རིང་ལ་དྭགས་ས་གནས་ཡོངས་ཀྱི་ཚོང་ཁང་སྒོ་རྒྱག་ཡོད་པ་རེད།འོན་ཀྱང་དེ་རིང་སྔ་དྲོ་ལ་དྭགས་བརྒྱུད་ལམ་ཁག་གིས་ཕུན་ཚོགས་སྟོབས་ལྡན་གྱི་གསལ་བཤད་དང་དགོངས་སེལ་ཞུས་པའི་གནས་ཚུལ་བསྐྱར་སྤེལ་གནང་བར་རང་ཉིད་རྒྱལ་མཚམས་ཀྱི་མཁས་པའི་ངོ་བོའི་ཐོག་ནས་ཉེ་ལམ་བརྒྱུད་ལམ་ཁག་ཏུ་འགྲེལ་བརྗོད་བྱས་པ་ཞིག་ཡིན་པ་ལས་༸གོང་ས་མཆོག་ནི་ཆོས་ལུགས་ཀྱི་དབུ་ཁྲིད་ཅིག་དང་རང་ཉིད་ནས་ཀྱང་དུས་འཁོར་དབང་ཆེན་ཐེངས་འགའ་རེ་ཞུས་མྱོང་ཡོད་ཅེས་གསུངས་པ་མ་ཟད། འགྲེལ་བརྗོད་དེ་རྐྱེན་མི་མང་ཁག་ཅིག་ལ་ཕོག་ཐུག་བྱུང་ཡོད་ཚེ་དགོངས་སེལ་ཞུ་རྒྱུ་ཡིན་ཞེས་བཀོད་འདུགགཞི་རྩའི་རྒྱ་གར་བྱང་ཕྱོགས་ལ་དྭགས་སྤང་སྒོང་མཚོའི་ཁུལ་དུ་རྒྱ་དཀར་ནག་གཉིས་ཀྱི་མཐའ་སྲུང་དམག་མི་དབར་གདོང་ཐུག་གི་གནད་དོན་ཛ་དྲག་ཏུ་འགྲོ་བཞིན་འདུག་པ་མ་ཟད། རྒྱ་ནག་ཕྱོགས་ནས་དམག་མི་ཕོན་ཆེར་འགྲེམས་འཇོག་དང་། དམག་གི་གོ་མཚོན་མང་དག་ཅིག་འབོར་འདྲེན་བྱས་དང་བྱེད་མུས་ལྟར་ཉིན་ཤས་གོང་ལ་རྒྱ་གར་བྱང་ཤར་འབྲས་ལྗོངས་ཁུལ་གྱི་རྒྱ་དཀར་ནག་གཉིས་ཀྱི་ས་མཚམས་སུའང་མཐའ་སྲུང་དམག་མིའི་དབར་འཁྲུག་འཛིང་བྱུང་སྟེ་ཕྱོགས་གཉིས་ཀྱི་དམག་མིར་རྨས་སྐྱོན་ཕོག་པའི་གནས་སྟངས་བྱུང་ཡོད་པ་རེད།

རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ ༡༩ དེ་ད་ཆ་འཛམ་གླིང་གི་རྒྱལ་ཁབ་ ༢༠༠ ལྷག་ལ་ཁྱབ་གདལ་གྱིས་མི་འབུམ་དྲུག་ཅུ་ལྷག་ལ་གཉན་རིམས་དེ་ཕོག་པ་དང་མི་འབུམ་གསུམ་ལྷག་གི་ཚེ་སྲོག་ཕྱིན་པ། དེ་བཞིན་མི་མང་པོ་ཞིག་དྲག་སྐྱེད་ཕྱིན་པའི་གནས་སྟངས་གྱུར་ཡོད་པ་རེད། དེའི་ཁྲོད་ཉམས་ཞིབ་པ་ཁག་ཅིག་གིས་བོད་གཙོ་གྱུར་ས་མཐོར་ཆགས་པ་ལྷོ་ཨ་མི་རི་ཀའི་ཡུལ་ལུང་ཁག་ཅིག་ནང་ཏོག་དབྱིབས་གཉན་རིམས་ཕོག་མཁན་མི་གྲངས་ཧ་ཅང་ཉུང་བ་ཡོད་པ་ཞིབ་འཇུག་ལས་ར་འཕྲོད་བྱུང་བ་དང་སྦྲགས། ས་མཐོར་གནས་མཁན་གྱི་མི་རིགས་རྣམས་ལ་གཉན་རིམས་དེ་འགོ་དཀའ་བར་ཚོད་དཔག་གནང་གི་འདུག ཁ་སང་ Washington Post དྲྭ་གནས་ཐོག་འདོན་སྤེལ་གནང་བའི་གནས་ཚུལ་ནང་ཨོ་སི་ཊོ་ལི་ཡ་དང་བྷོ་ལི་ཝི་ཡ། ཁེ་ན་ཌ། དེ་བཞིན་སུད་སི་བཅས་ཀྱི་ཉམས་ཞིབ་པ་རྣམ་པས་བོད་དང་ལྷོ་ཨ་མི་རི་ཀའི་ནང་ཆགས་པའི་བྷོ་ལི་ཝི་ཡ་དང་ཡུ་ཀ་ཌོར་བཅས་ས་མཐོ་སར་གནས་པའི་ཡུལ་མི་རྣམས་ལ་གཉན་རིམས་ག་ཚོད་ཕོག་ཡོད་མེད་ཀྱི་གྲངས་ཐོར་ཞིབ་འཇུག་གནང་བ་ཞིག་ལུས་ཁམས་རིག་པ་དང་དབང་རྩའི་ཚན་རིག་གི་ཉིན་དེབ་ནང་སྤེལ་གནང་ཡོད་པ་རེད། ཞིབ་འཇུག་དེའི་ཁྲོད་བོད་ལྟ་བུ་ནི་རྒྱ་ནག་ལས་ལྡབ་འགྱུར་གྱིས་གཉན་རིམས་ཕོག་མཁན་ཉུང་བ་དང་དེ་བཞིན་བྷོ་ལི་ཝི་ཡ་དང་ཡུ་ཀ་ཌོར་ཨེན་ཌི་སི་ནང་དེའི་རྒྱལ་ཁབ་ཀྱི་ས་དམའ་སར་བཞུགས་པའི་མི་གྲངས་ལས་ལྡབ་འགྱུར་གསུམ་བཞི་ཙམ་གཉན་རིམས་ཕོག་མཁན་ཉུང་བ་ཡོད་པ་བཅས་ལ་གཞིགས་ནས་ས་མཐོ་སར་གནས་མཁན་ཡུལ་མི་རྣམས་ས་དམའ་སར་གནས་མཁན་ལས་གཉན་རིམས་ཕོག་མཁན་ཉུང་བ་ཡོད་པ་ཤེས་རྟོགས་བྱུང་འདུག གནད་དོན་དེ་དག་ལ་གཞིགས་ཏེ་ཉམས་ཞིབ་པ་ཚོས་ཏོག་དབྱིབས་གཉན་རིམས་དང་ས་མཐོ་ཚད་གཉིས་ཀྱི་དབར་འབྲེལ་བ་གང་ཡོད་མེད་ཞིབ་འཇུག་དབུ་འཛུགས་གནང་འདུག གཞི་རྩའི་ཉམས་ཞིབ་པ་ཚོས་ས་མཐོ་སར་བཞུགས་མཁན་རྣམས་ནས་ལུས་པོའི་ཁྲག་ནང་ oxygen འམ་འཚོ་རླུང་ཉུང་བ་སོགས་ཆགས་སྐབས་དེར་གདོང་ལེན་གནང་ཐུབ་པའི་ནུས་པ་ཡོད་པས་གཉན་རིམས་ཕོག་མཁན་ཉུང་བ་ཡོད་པར་ཚོད་དཔག་གནང་གི་འདུག འོན་ཀྱང་གཉན་རིམས་དེ་འབྲེལ་ཆེད་ལས་པས་ཁོར་ཡུག་སོགས་དང་འབྲེལ་བའི་གནད་དོན་དག་ལ་ཐེ་ཚོམ་གནང་གི་འདུག་པ་དང་ས་མཐོ་སར་གནས་བཞུགས་གནང་མཁན་གྱི་ངོས་ནས་རིམས་ནད་དེར་ཡ་ལན་ཇི་ལྟར་སྤྲད་ཕྱོགས་ཐད་ཉམས་ཞིབ་གནང་རྒྱུ་རེད་འདུག དེ་བཞིན་ཨ་རིའི་ཀེ་ལི་ཕོར་ནི་ཡའི་གཙུག་ལག་སློབ་གཉེར་ཁང་ནང་འགོས་ནད་ཐད་སློབ་སྦྱོང་གནང་མཁན་ Peter Chin-Hong ཡིས་ནད་དེ་ས་མཐོ་ཚད་ལ་མི་ལྟོས་པར་རང་ཉིད་ཀྱི་གནས་བདག་ལ་དགའ་མོས་གནང་གི་ཡོད་པ་དང་། ཕྱོགས་མཚུངས་ང་ཚོས་གཉན་རིམས་དེ་འབྲེལ་ད་ཆ་གནད་དོན་མང་དག་ཅིག་སྦྱོང་བཞིན་པ་གསུངས་འདུག ཨ་རིར་རྟེན་གཞི་བྱས་པའི་ Mayo Clinic ཀྱི་གློ་བ་དང་འབྲེལ་བའི་ཆེད་ལས་པ་ Clayton Cowl ཡིས་ད་ཆ་ཏོག་དབྱིབས་གཉན་རིམས་ཕོག་མཁན་ཚོར་དབུགས་གཏོང་ལེན་གྱི་དཀའ་ངལ་བྱུང་བ་དེ་ས་མཐོ་སར་གནས་མཁན་གྱི་ཡུལ་མི་ཚོར་ཡུན་རིང་ས་མཐོ་སར་བཞུགས་པའི་རྐྱེན་གྱིས་དཀའ་ངལ་དེར་གདོང་ལེན་ཐུབ་སྲིད་སྐོར་གསུངས་འདུག རྩ་བའི་ལྷོ་ཨ་མི་རི་ཀའི་ཨན་ཌིཡན་ཡུལ་ལུང་ལྟ་བུར་མཚོན་ན་མི་གྲངས་འབུམ་བཞི་ཙམ་ཞིག་གི་སྡོད་གནས་ཆགས་ཀྱི་ཡོད་པ་དང་། ཡུལ་ལུང་དེར་ལོ་རེར་མི་གྲངས་ས་ཡ་གསུམ་ཙམ་ཞིག་ཡུལ་སྐོར་སྤྲོ་འཆམ་ལ་ཡོང་གི་ཡོད་པ་རེད་འདུག འོན་ཀྱང་ཟླ་ ༣ ཚེས་ ༢༣ ནས་ཟླ་  ༤ པའི་བར་མི་གསུམ་འདས་གྲོངས་སུ་གྱུར་ཡོད་པ་ལས་ད་བར་མི་རྐྱེན་འདས་སུ་ཕྱིན་མེད་པ་དང་ལྷག་པར་དུ་མི་ཉུང་ཤས་ཙམ་ཞིག་ལ་མ་གཏོགས་གཉན་རིམས་དེ་ཕོག་མེད་པ་རེད།རྒྱ་གར་ལྟ་བུར་ཆ་མཚོན་ན་ད་བར་མི་འབུམ་གཅིག་ལྷག་ལ་གཉན་རིམས་ཕོག་ཡོད་པ་དང་ཁྲི་བརྒྱད་ལྷག་དྲག་སྐྱེད་དང་དེ་བཞིན་མི་གྲངས་ལྔ་སྟོང་ལྷག་རྐྱེན་འདས་སུ་ཕྱིན་ཡོད་པ་རེད། ཛ་དྲག་གི་དུས་ཚིགས་འདིར་ཁ་སང་བསྐྱར་དུ་སྲིད་བློན་ན་རནྡྲེ་མོ་དཱི་མཆོག་གིས་ཟླ་བ་འདིའི་ཟླ་མཇུག་བར་ཐེམ་སྤང་གི་བཀའ་རྒྱ་ཐེངས་ལྔ་པ་དེ་བསྒྲགས་གནང་བ་དང་བསྟུན། མང་ཚོགས་འགྲོ་འོང་གི་བྱེད་སྒོ་མང་དག་ཅིག་གུ་ཡངས་བཏང་ཡོད་པ་རེད།  དཔེར་ན་མེ་འཁོར་འགྲིམ་འགྲུལ་སོགས་དབུ་འཛུགས་དང་། མངའ་སྡེ་གཅིག་ནས་གཞན་ལ་འགྲུལ་སྐྱོད་སླད་ནང་འཛུལ་ཆོག་པའི་མངའ་སྡེ་གཉིས་ཀྱི་མོས་ཡིག་དགོས་པ། ལྷག་པར་དུ་གཉན་རིམས་ཕོག་མེད་པའི་ས་གནས་སུ་དགོན་པ་དང་ལྷ་ཁང་། དེ་བཞིན་ཅ་དངོས་ཉོ་ཚོང་གནང་རྒྱུ་སོགས་སྒོ་ཕྱེ་ཆོག་པའི་བཀའ་རྒྱ་བཏང་བ་དང་ཆབས་ཅིག མང་ཚོགས་ནས་མུ་མཐུད་སྤྱི་ཚོགས་རྒྱང་བཀྱེད་བསྟེན་དགོས་པ་དང་། ཕྱིར་སྐྱོད་སྐབས་ངེས་པར་དུ་ཁ་རས་གྱོན་དགོས་པ། དེ་བཞིན་ལས་ཁུངས་དང་སྨན་ཁང་། མང་ཚོགས་འཛོམས་སར་དུས་ནས་དུས་སུ་དུག་སེལ་སྨན་ཆུ་གཏོར་ཐོག་གཙང་སྦྲ་འཕྲོད་བསྟེན་ལག་བསྟར་དགོས་པའི་བཀོད་ཁྱབ་བཏང་ཡོད་པ་རེད། ལྷག་པར་དུ་ཧི་མཱ་ཅལ་ཀངྒ་ར་རྫོང་ལྟ་བུར་ཆ་མཚོན་ན་སྔ་དྲོ་ཚོུད་ ༦ ནས་ཕྱི་དྲོ་ཚོུད་ ༨ བར་ཕྱིར་སྐྱོད་ཆོག་པ་དང་དེ་བཞིན་སྔ་དྲོ་ ༥ ནས་ ༦ བར་འཕྲོད་བསྟེན་སླད་ལུས་སྦྱོང་སོགས་གནང་བར་ཕེབས་ཆོག་པ། དེ་བཞིན་ཀངྒ་ར་རྫོང་ནང་ལོག་དང་རྫོང་གཞན་ནང་སྐྱོད་རྒྱུ། རྫོང་གཞན་ནས་ཕེབས་མཁན་ཚོར་རྫོང་ནང་འཛུལ་ཆོག་པར་ཆོག་མཆན་མི་དགོས་པ། འོན་ཀྱང་ཀངྒ་ར་རྫོང་ནས་མངའ་སྡེ་གཞན་ལ་ཕེབས་པ་དང་དེ་བཞིན་ཚུར་ལོག་སྐབས་ཆོག་མཆན་ཞུ་དགོས་པ་སོགས་འགྲིམ་འགྲུལ་ཐད་སྒྲིག་གཞི་ཁག་ཅིག་གཏན་འབེབས་དང་སྒོས་ད་ཆ་སློབ་གྲྭ་དང་མཐོ་སློབ། གཙུག་ལག་སློབ་གཉེར་ཁང་སོགས་སྒོ་ཕྱེ་ཆོག་གི་མི་འདུག དེ་བཞིན་ཟ་ཁང་དང་ཞལ་ལག་ཉོ་སའི་ཚོང་ཟོག་ཁང་ཆུང་བ་རྣམས་ནས་སྔར་རྒྱུན་བཞིན་ཞལ་ལག་འཁྱེར་ནས་འགྲོ་དགོས་པ་ལས་སྡོད་ནས་མཆོད་མི་ཆོག་པ་དང་། གཉེན་སྒྲིག་སྐབས་མི་ ༥༠ དང་ཕུང་པོ་ཞུགས་འབུལ་སྐབས་མི་གྲངས་ ༢༠ ལས་མི་མང་བ་ཆོག་པ་སོགས་ཀྱི་བཀོད་ཁྱབ་བཏང་འདུགསྤྱིར་ཐེམ་སྤང་གི་དུས་ཚིགས་དུས་འགྱངས་དང་བསྟུན་ཉེ་ལམ་མངའ་སྡེ་གཞན་ནང་ལུས་པའི་བོད་མི་ཚོང་གཉེར་བ་དང་སློབ་ཕྲུག ཕྱག་ལས་སྣ་མིན་གནང་མཁན་རྣམས་རང་གནས་སུ་ལོག་མ་ཐུབ་པའི་དཀའ་ངལ་འཕྲད་པ་དང་། ཕྱིས་སུ་བོད་མིའི་སྒྲིག་འཛུགས་ཀྱི་རོགས་སྐྱོར་འོག་རིམ་བཞིན་བོད་ཕྲུག་གཙོས་བོད་མི་མང་དག་ཅིག་རང་གི་ས་གནས་སུ་ལོག་ཐུབ་པ་དང་སྦྲགས། ས་གནས་ལ་ཕེབས་སྐབས་སྤྱི་སྒེར་དང་ཁྱིམ་སྡོད་ཀྱི་ཟུར་བཀག་འོག་བཞུགས་དགོས་ཀྱི་ཡོད་པ་རེད། ལྷག་དོན་ད་ཆ་བཞུགས་སྒར་དྷརམ་སཱ་ལཱར་ཆ་མཚོན་ན་བདེ་ལེགས་སྨན་ཁང་གི་ཉེ་འདབས་སུ་ཆགས་པའི་ཤུག་གསེབ་ཏུ་བོད་མི་ ༡༨  དང་དབུས་སྣེ་ལེན་ཁང་དུ་ ༡༤ དེ་བཞིན་ཤེས་རབ་དགའ་ཚལ་སློབ་གླིང་དུ་མི་ ༢༥ སྤྱི་པའི་ཟུར་འཇོག་ཁང་དུ་ཟུར་བཀག་ཐོག་བཞག་ཡོད་པ་རེད།  ཤུགས་གསེབ་ལ་ཡོད་པའི་བོད་མི་ ༡༨ དེ་དག་ཉེ་ལམ་ཟླ་ ༥ ཚེས་ ༢༣ ཉིན་གཉན་རིམས་ཀྱི་ནད་རྟགས་ཡོད་མེད་བརྟག་འབྲས་སུ་ནད་རྟགས་ཐོན་མེད་པ་རེད། ཁ་སྔོན་ཚེས་ ༣༠ ཉིན་བོད་མི་ ༧ སྤྱི་པའི་ཟུར་འཇོག་ཁང་དུ་བཞུགས་རྒྱུའི་དུས་ཚོད་ཟིན་ནས་ད་ཆ་ཉིན་བཅུ་བཞིའི་ཁྱིམ་སྡོད་བཀའ་རྒྱའི་འོག་བཞུགས་མུས་རེད་འདུག

དེ་རིང་སྔ་དྲོ། བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་གཞོན་ནུ་ལྷནཚོགས་ཀྱི་ཚོགས་ཁང་གི་ནང་དུ། བོད་རང་བཙན་སློབ་ཕྲུག་ཚོགས་པ་དང་དབུས་བོད་ཀྱི་གཞོན་ནུ་ལྷན་ཚོགས་གཉིས་མཉམ་རུབ་ཀྱི་ཐོག་ནས་བསྒྲགས་གཏམ་ཞིག་སྤེལ་ཏེ།  ཉེ་ཆར་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Scott Perry ལགས་ཀྱིས་ཨ་རིའི་ངོས་ནས་བོད་རང་སྐྱོང་ལྗོངས་ནི་རང་བཙན་གྱི་རྒྱལ་ཁབ་ཅིག་ཏུ་ངོས་འཛིན་དགོས་བའི་ཁྲིམས་འཆར་ཞིག་བཏོན་པར་དགའ་བསུ་དང་ལྷན་དུ།  ཁྲིམས་འཆར་དེའི་ཁོངས་སུ་བོད་རང་སྐྱོང་ལྗོངས་ཙམ་མ་ཡིན་པར་བོད་ཆོལ་ཁ་གསུམ་པོ་ཚུད་དགོས་བའི་སྙན་ཞུ་ཕུལ་ཡོད་པ་ལྟར། སྐུ་ཞབས་ Scott Perry ལགས་ཀྱིས་ཀྱང་ཞལ་བཞེས་ཐོབ་ནས་ཁྲིམས་འཆར་དེའི་ཚིག་དོན་ལ་བསྐྱར་ཞིབ་བྱ་འཆར་ཡོད་པར་བསྒྲགས་སོང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་ཀྱིས་བོད་ཡིག་གི་བསྒྲགས་གཏམ་སྒྲོག་སྦྱངས་བྱས་པ་དང་།  བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན། རྡོ་རྗེ་ཚེ་བརྟན་ལགས་ཀྱིས་དྲ་ཐོག་བརྒྱུད་ནསདབྱིན་ཡིག་གི་ལམ་ནས་དེ་རིང་གི་བསྒྲགས་གཏམ་སྒྲོག་སྦྱང་བྱས་སོང་།   བསྒྲགས་གཏམ་གྱི་ནང་དུ།  ཁྲིམས་འཆར་འདི་ནི་ལོ་ངོ་བདུན་ཅུའི་རིང་བོད་མིས་རང་དབང་རང་བཙན་གྱི་འཐབ་རྩོད་བྱས་པའི་ལོ་རྒྱུས་ཀྱི་རྒྱལ་ཁ་ཞིག་ལ་ངོས་འཛིན་ཞུ་བཞིན་ཡོད་ལ།  ཨ་རིའི་མི་མང་གིས་བོད་རང་བཙན་ལ་རྒྱབ་སྐྱོར་དང་བོད་མིའི་བདེན་དོན་ལ་ངོས་འཛིན་ཞུས་པ་ནི་གལ་ཆེའི་གྲུབ་འབྲས་ཤིག་དང་ལོ་རྒྱུས་རང་བཞིན་ཅན་ཞིག་ལ་འགྱུར་ངེས་ཡིན་པར་བསྒྲགས་འདུག བོད་ཀྱི་གཞོན་ནུ་ཚོགས་པའི་ཚོགས་གཙོ་མགོན་པོ་དོན་འགྲུབ་ལགས་ཀྱིས།  རྒྱ་ནག་གིས་བོད་འདི་ཡུལ་མཐའ་འཁོབ་ཅིག་ཡིན་པར་བརྟེན་མི་རབས་ཁ་ཤས་ཤིག་གི་རྗེས་སུ། བོད་འདི་རྒྱལ་སྤྱིའི་སྒང་ནས་རྩ་བརླགས་སུ་འགྲོ་རྒྱུའི་རེ་བ་རྒྱག་གི་ཡོད་ནའང་།  གཞིས་བྱེས་བོད་མིའི་འཐབ་རྩོད་ཀྱི་ཁྲོད་ནས། བོད་དོན་འདི་རྒྱལ་སྤྱིའི་ཁྲོད་ཁྱབ་ཆེ་རུ་འགྲོ་བཞིན་པར་ངོ་སྤྲོད་གནང་བ་དང་སྦྲགས།  ཁྲིམས་འཆར་དེའི་ཚིག་དོན་ལ་བསྐྱར་ཞིབ་ཀྱིས་ཆོལ་གསུམ་བོད་ཁམས་ཡོངས་སུ་ཁྲིམས་འཆར་དེར་འཁོད་རྒྱུའི་འབད་བརྩོན་གནང་གི་ཡོད་པར་གསུངས་སོང་། དེ་བཞིན་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན། རྡོ་རྗེས་ཚེ་བརྟན་ལགས་ཀྱིས་ཐེངས་འདིའི་ཁྲིམས་འཆར་འདི་ནི་བོད་མི་རྣམས་ལ་མཚོན་ན་ཆེས་རྩ་ཆེ་བའི་གོ་སྐབས་ཤིག་ཡིན་པར་བརྟེན། བོད་མི་ཡོངས་ཀྱིས་ཨ་རིའི་འོས་བསྡུ་མ་རན་གྱི་བར་དུ་མཉམ་རུབ་ཀྱི་ཐོག་ནས་ཤུགས་རྒྱབ་ཏེ་བོད་དོན་གྱི་ཁྲིམས་འཆར་འདིར་རྒྱབ་སྐྱོར་ཐོབ་ཐབས་གནང་རྒྱུའི་དུས་ལ་བབ་ཡོད་པར་འདི་ལྟར་ངོ་སྤྲོད་གནང་སོང་། གཞི་རྩའི་ཟླ་འདིའི་ཚེས་༡༩ ཉིན།  ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Scott Perry ལགས་ཀྱིས་བོད་རང་སྐྱོང་ལྗོངས་ཞེས་པ་དེ་ཐ་དད་དུ་རང་བཙན་ལྡན་པའི་རྒྱལ་ཁབ་ཅིག་ཏུ་ངོས་འཛིན་དགོས་པའི་ཁྲིམས་འཆར་གསར་པ་ཞིག་ཆེད་འདོན་གནང་སྟེ། ཨ་རིའི་སྲིད་འཛིན་མཆོག་ནས་བོད་རང་སྐྱོང་ལྗོངས་ཞེས་པ་དེ་རང་བཙན་གྱི་རྒྱལ་ཁབ་ཅིག་ཏུ་ངོས་འཛིན་དགོས་པ་འཁོད་ཡོད་པ་རེད། ཉེ་སྔོན་འདི་ག་རླུང་འཕྲིན་ཁང་ནས་ཁྲིམས་འཆར་དེ་དང་འབྲེལ་ནས་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་ལ་བཀའ་འདྲི་ཞུས་སྐབས།  ཁོང་གིས། སྐུ་ཞབས་པེ་རི་ལགས་ཀྱིས་ཆེད་འདོན་གནང་བའི་ཁྲིམས་འཆར་དེ་སྐུ་ཚབ་དོན་གཅོད་ཁང་ནས་ཞུ་གཏུགས་གནང་བ་ཞིག་མིན་པ་དང་།  སྤྱིར་ཁྲིམས་འཆར་དེ་བསྣམས་པ་ཙམ་གྱིས་བོད་དོན་ཐད་རྒྱབ་སྐྱོར་མཚོན་གྱི་ཡོད་སྟབས་དོན་གཅོད་ཁང་ངོས་ནས་དེར་དགའ་བསུ་ཞུ་རྒྱུ་ཡིན་ཡང་། བོད་མིའི་སྒྲིག་འཛུགས་ཀྱི་ཆབ་སྲིད་ཀྱི་ལངས་ཕྱོགས་དེ་དབུ་མའི་ལམ་གཞིར་བཟུང་བོད་མིར་མིང་དོན་མཚུངས་པའི་རང་སྐྱོང་གི་ཁེ་དབང་རྩོད་རྒྱུ་དེ་ཡིན་སྟབས་ང་ཚོའི་རྩ་བའི་ལངས་ཕྱོགས་ལ་འགྱུར་བ་མེད་སྐོར་གསུངས་གནང་སོང་།

སྤྲུལ་སྐུ་ཨོ་རྒྱན་སྟོབས་རྒྱལ་གྱིས་ཉེ་སྔོན་དྲྭ་ཐོག་དབང་བསྐུར་ན་མི་འགྲིག་པའི་སྐོར་གསུངས་ཡོད་པའི་བཀའ་མོལ་ཆ་ཚང་ཕྱིར་འཐེན་གཙང་མ་ཞུས་པ་དང་འབྲེལ་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྙིང་ཐག་པ་ནས་དགོངས་གསོལ་ཞུས་འདུག རྩ་བའི་ཉེ་ཆར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཚེས་ ༢༩ དང་ ༣༠ བཅས་ཉིན་གཉིས་ཀྱི་རིང་ཏོག་དབྱིབས་གཉན་རིམས་རྐྱེན་པས་ཁྱིམ་སྡོད་བཀའ་རྒྱའི་འོག་གནས་པའི་བོད་མི་གཙོས་བོད་བརྒྱུད་ནང་བསྟན་རྗེས་འཇུག་རྣམས་ལ་དྲྭ་ལམ་ཐད་གཏོང་བརྒྱུད་དེ་སྤྱན་རས་གཟིགས་ཀྱི་བཀའ་དབང་བཀྲིན་བསྩལ་གཏན་འཁེལ་བ་དང་འབྲེལ། བཞུགས་སྒར་དྷརྨ་ས་ལའི་ཉེ་འགྲམ་སྦིར་གཞིས་ཆགས་ནང་གནས་སྡོད་སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་མགོན་པོ་༸གང་ཉིད་མཆོག་ནས་དྲྭ་ལམ་ཐད་གཏོང་བརྒྱུད་བཀའ་དབང་བསྩལ་རྒྱུ་དེ་ནི་གསང་སྔགས་ཁྲོམ་བསྒྲགས་གནང་བར་འགྲེལ་བརྗོད་དང་འབྲེལ་དེ་ནི་བསྟན་པ་བཤིག་པ་ཞིག་ལ་ངོས་འཛིན་བྱེད་ཀྱི་ཡོད་སྐོར་བརྗོད་རྗེས། བོད་མི་མང་ཚོགས་ཁྲོད་ནས་གནད་དོན་དེའི་ཐོག་བློ་འཚབ་དང་བཅས་སྤྱི་ཚོགས་དྲྭ་རྒྱའི་ཐོག་ཚོར་ཤུགས་ཆེན་པོས་སྤྲུལ་སྐུ་ཨོ་རྒྱན་སྟོབས་རྒྱལ་ལ་ངོ་རྒོལ་མཐའ་གཅིག་ཏུ་ཡོད་སྐོར་གསུངས་པ་དང་། ཕྱོགས་མཚུངས་སུ་༸གོང་ས་མཆོག་ལ་མཚན་སྨད་ཞུས་ཡོད་པ་དང་འབྲེལ་ཏེ་བོད་མིའི་སྒྲིག་འཛུགས་ཀྱིས་ཡིག་ངག་གཉིས་ཐོག་ནས་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུས་པར་ངོ་རྒོལ་མཐའ་གཅིག་ཏུ་ཡོད་པ་དང། ཁོང་ནས་༸གོང་ས་མཆོག་ལ་དགོངས་གསོལ་ཞུ་དགོས་པར་ནན་བརྗོད་གནང་བ་མ་ཟད། རྒྱ་གར་གཙོས་འཛམ་གླིང་ས་ཕྱོགས་གང་སར་གནས་པའི་བཙན་བྱོལ་བོད་མིའི་ཚོགས་སྐྱིད་འདྲ་མིན་དང་གཞུང་ཞབས་ཟུར་པ། ཚོགས་གཙོ་ཟུར་པ། དེ་བཞིན་དགོན་སྡེ་གྲྭ་ཚང་བཅས་ཀྱིས་བསྒྲགས་གཏམ་སྤེལ་བ་དང་སྤྱི་ཚོགས་དྲྭ་ལམ་སོགས་ཀྱི་ཐོག་ནས་ད་ལན་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུས་པ་དེར་ཆེས་བློ་ཕམ་ཡོད་པ་དང་མཐའ་གཅིག་ཏུ་ངོ་རྒོལ་གྱི་རྣམ་པ་ཤུགས་ཆེ་ཆེད་བཏོན་གནང་བཞིན་པའི་ཁྲོད། ཁ་ཉིན་ཕྱི་ཚེས་ ༣༠ ཉིན་༸དཔལ་ས་སྐྱའི་ཁྲི་འཛིན་རིན་པོ་ཆེ་མཆོག་གིས་དབུས་ས་སྐྱ་ཆོས་སྒར་འདུས་སྤྱི་ནས་བསྒྲགས་གཏམ་ཞིག་འདོན་སྤེལ་གནང་བའི་ནང་ཉོན་མོངས་པའི་གཞན་དབང་དུ་གྱུར་པའི་གང་ཟག་འགའ་རེས་སྒྲོ་སྐུར་སྐྱོན་བརྗོད་ཞུས་པ་འདི་ནི་ཆོས་དང་འཇིག་རྟེན་གང་ལ་བསམས་ཀྱང་དུས་ནམ་ཡང་བརྗེད་ཐབས་མེད་པ་ཞིག་དང་སེམས་ཕམ་ཚད་མེད་དགོས་པའི་གནས་ཚུལ་ཡིན་པ་དངོས་པོའི་ཆོས་ཉིད་ཀྱི་སྟེང་ནས་ར་སྤྲོད་ཐུབ་ངེས་ཡིན་པ་དང་། ལྷག་དོན་རྒྱལ་བསྟན་ཡོངས་སུ་རྫོགས་པའི་བསྟན་པའི་བདག་པོར་བཞུགས་བཞིན་པའི་མགོན་པོ་གང་ལ་དེ་ལྟར་སྨྲ་བར་སྤོབས་པ་ནི་བློའི་ཡུལ་ལས་འདས་པ་ཞིག་ཡིན་པ་སོགས་འཁོད་འདུག དེ་འབྲེལ་ཁ་ཉིན་ཕྱི་ཟླ་ ༥ ཚེས་ ༣༠ ཉིན་སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་ཕྱག་ཡིག་ཞིག་ཡོངས་གྲགས་གནང་བའི་ནང་སྤྱིར་ཁོང་གིས་ཉེ་ཆར་གནད་དོན་དེའི་སྐོར་གླེང་གློང་བྱེད་དགོས་དོན་ནི། རང་ངོས་ནས་གསང་ཆེན་སྔགས་ཀྱི་རྒྱུད་སྡེ་ཁག་ལ་སྦྱང་བརྩོན་མི་དམན་ཙམ་བྱེད་མྱོང་བས། འབྲས་བུ་གསང་སྔགས་རྡོ་རྗེའི་ཐེག་པའི་བསྟན་པ་རིན་པོ་ཆེ་ཡུན་དུ་གནས་ཐབས་ཁོ་ནའི་ཆེད་དུ་དམིགས་པ་ལས་རྒྱུ་མཚན་གཞན་གང་ཡང་མེད་ཀྱང། དེ་རིང་ས་སྐྱ་ཆོས་སྒར་གྱི་ཕྱག་ཡིག་དེ་མཇལ་བ་མ་ཟད། ༸སྐྱབས་རྗེ་རྫོང་སར་འཇམ་དབྱངས་མཁྱེད་བརྩེ་ཐུབ་བསྟན་ཆོས་ཀྱི་རྒྱ་མཚོ་རིན་པོ་ཆེ་མཆོག་གིས་ཞལ་པར་ཐོག་ས་སྐྱ་ཆོས་སྒར་གྱི་ཕྱག་ཡིག་དེ་མཇལ་ཡོད་མེད་འདྲི་རྩད་དང་འབྲེལ་ནས། ཕྱག་ཡིག་དེ་ནི་ས་སྐྱ་༸བདག་ཆེན་རྡོ་རྗེ་འཆང་ཆེན་པོའི་ཞལ་སྔ་ནས་དང་༸སྐྱབས་རྗེ་བདག་ཁྲི་རིན་པོ་ཆེ་རྣམ་པ་གཉིས་ཀྱི་བཀའ་དགོངས་ཡིན་ངེས་ལ་བརྟེན། སྤྲུལ་སྐུ་ཨོ་རྒྱན་སྟོབས་རྒྱལ་ཁོང་ནས་དྲྭ་ལམ་ནས་བཀའ་དབང་གནང་ན་འགྲིག་མིན་དང་འབྲེལ་བའི་སྐད་ཆ་རྣམས་ཕྱིར་འཐེན་གནང་དགོས་པའི་བཀའ་ཕེབས་ཡོད་པ་ལྟར། ས་སྐྱ་༸བདག་ཆེན་རྡོ་རྗེ་འཆང་ཆེན་པོ་མཆོག་དང་ས་སྐྱ་༸བདག་ཁྲི་རིན་པོ་ཆེ་མཆོག ༸སྐྱབས་རྗེ་རྫོང་སར་འཇམ་དབྱངས་མཁྱེན་རྩེ་རིན་པོ་ཆེ་བཅས་ཀྱི་མདུན་ནས་ཁོང་ནས་གསང་སྔགས་རྡོ་རྗེ་ཐེག་པའི་བཀའ་དབང་ཟབ་མོ་མང་དག་ཅིག་ཞུ་མྱོང་བའི་རྡོ་རྗེ་སློབ་དཔོན་ཡིན་པ་དང་། སྲོག་ལ་བབ་ཀྱང་རྡོ་རྗེ་སློབ་དཔོན་གྱི་བཀའ་བསྒྲུབ་རྒྱུ་ལས་གལ་ཆེ་བ་ཞིག་གཏན་ནས་མེད་སྟབས། ཉེ་སྔོན་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་བཤད་པའི་སྐད་ཆ་ཚང་ཕྱིར་འཐེན་གཙང་མ་ཞུ་རྒྱུ་དང་། བོད་ཀྱི་ལྷ་སྐལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྙིང་ཐག་པ་ནས་དགོངས་སེལ་བཟོད་གསོལ་ཞུ་བ་དང་སྦྲགས་སྐུ་ཚེ་བསྐལ་པ་རྒྱ་མཚོར་བརྟན་པའི་གསོལ་འདེབས་ཤུགས་དྲག་ཞུ་རྒྱུ་ཡིན་ཅེས་དང་། སླད་ཕྱིན་གང་ཟག་སུ་ཡིན་ཡང་དྲྭ་ལམ་ནས་གསང་སྔགས་ཀྱི་བཀའ་དབང་ཟབ་མོ་དག་གནང་ན་ཁོང་ནས་དགག་བྱ་གང་ཡང་ཞུ་རྒྱུ་མིན་བཅས་གསུངས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ནང་གི་དད་ལྡན་མང་པོས་ཇི་ལྟར་གསོལ་བ་བཏབ་པ་བཞིན་དྲྭ་ལམ་བརྒྱུད་འཕགས་མཆོག་ཐུགས་རྗེ་ཆེན་པོའི་དབང་ཆེན་གྱི་བཀའ་དབང་དངོས་གཞི་དང་འཕགས་པ་འཇིག་རྟེན་དབང་ཕྱུག་སེང་གེ་སྒྲའི་རྗེས་གནང་བཅས་བཀའ་དྲིན་བསྐྱངས་ཏེ་ཐེངས་འདིའི་ཆོས་འབྲེལ་རེ་ཞིག་ལེགས་གྲུབ་མཛད་སོང་།དེ་རིང་ཕྱི་ཟླ་ ༥ ཚེས་ ༣༠ ཉིན་གྱི་སྔ་དྲོ་ཕྱག་ཚོད་ ༨༌༠༠ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཟིམ་ཆུང་ནས་ཆོས་འབྲེལ་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་སུ་དྲྭ་རྒྱ་བརྒྱུད་ནས་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་དགའ་ལྡན་ཁྲི་ཟུར་རིན་པོ་ཆེ་མཆོག དེ་བཞིན་ཤར་བྱང་ཆོས་རྗེ་རིན་པོ་ཆེ་རྣམ་གཉིས་མཆོག་དང་དགོན་སྡེ་གྲྭ་ཚང་ཁག་གི་མཁན་བླ་སྤྲུལ་རྣམ་པ་བཅས། ཕྱི་ནང་གི་དད་ལྡན་མང་ཚོགས་ས་ཡ་གཅིག་ལྷག་ནས་ཐུགས་རྗེ་ཆེན་པོའི་དབང་ཆེན་གྱི་བཀའ་དབང་དངོས་གཞི་དང་འཕགས་པ་འཇིག་རྟེན་དབང་ཕྱུག་སེང་གེ་སྒྲ་ཡི་རྗེས་གནང་བཅས་ཞུས་ཡོད་པ་རེད།སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་ཐོག་མར་ཆོས་ཞུ་བ་ཚོར་འཕགས་པ་སྤྱན་རས་གཟིགས་ཀྱི་མཚན་སྔགས་མ་ཎི་ཡིག་དྲུག་དེ་དག་བགྲང་གསོག་གནང་ན་རང་གཞན་སེམས་ཅན་ཐམས་ཅད་ལ་ཕན་པའི་དགེ་མཚན་དམིགས་བསལ་བ་ཞིག་ཡོད་སྐོར་བཀའ་བསྩལ་བ་དང་འབྲེལ། འཕགས་པ་སྤྱན་རས་གཟིགས་ནི་བོད་གངས་ཅན་ལྗོངས་ཀྱི་མེ་ཏོག་གང་ལ་ཕོག་པའི་ལྷག་པའི་ལྷ་སྐལ་ཆགས་ཡོད་པར་བཀའ་བསྩལ་སོང་།དེ་བཞིན་༸གོང་ས་མཆོག་གིས་དེ་རིང་འདིར་ང་ཚོ་ནང་པ་ཚོས་བྱང་ཆུབ་སེམས་ཀྱི་སྡོམ་པ་བཟུང་གི་ཡོད་པའི་སྐབས་འདི་དང་བསྟུན་ནང་པ་མིན་པའི་འཛམ་གླིང་གི་ཆོས་ལུགས་གཞན་གྱི་འཇུག་མང་ཚོགས་ཚོས་ཀྱང་རང་ཉིད་སོ་སོའི་སྐྱབས་གནས་བླ་མ་དེ་དག་ཡིད་ལ་བསྒོམ་དགོས་པ་དང་ཁོང་རྣམ་པས་བྱང་དོར་གྱི་བསླབ་བྱ་གང་གནང་བ་དེ་ལྟར་གང་ཐུབ་ཐུབ་ཀྱིས་ཉམས་ལེན་གནང་དགོས་གལ་ཡིན་པར་ལམ་སྟོན་བཀྲིན་ཆེ་བ་བསྩལ་སོང་།ལྷག་དོན་ཆོས་འབྲེལ་གྱི་མཇུག་ཏུ་མགོན་པོ་༸གང་ཉིད་མཆོག་གིས་དུས་དང་རྣམ་པ་ཀུན་ཏུ་འགྲོ་བ་ཐམས་ཅད་ལ་གཉེན་དུ་གཟིགས་པ་ལས་དགྲ་འགེགས་ཞེས་དབྱེ་འབྱེད་མཛད་ཀྱི་མེད་པས་དད་ལྡན་མང་ཚོས་ཀྱང་དེ་ལྟར་འབད་གནད་ཡིན་པ་དང་། བྱང་ཆུབ་སེམས་པའི་སྡོམ་པ་འབོག་ཆོག་ཞུས་རྗེས་ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་དགོས་པ་མ་ཟད། ཁྱད་པར་དུ་ཁྱེད་རང་ཚོ་སོ་སོ་རང་ཉིད་ཀྱིས་བཀའ་དབང་ཞུས་པ་དེ་དག་ཉམས་ལེན་གནང་བ་ལྟར་དགའ་གཉེན་གཞན་ཚོ་ལའང་བཟང་པོའི་བསམ་བློ་གཏོང་ཕྱོགས་རྣམས་རྒྱ་གང་ཆེ་སྤེལ་དགོས་གལ་ཡིན་པར་ཐུགས་བརྩེ་ཆེན་པོས་ལམ་སྟོན་བཀྲིན་ཆེ་བ་བསྩལ་སོང་།གཞི་རྩའི་སྤྱི་སྒེར་དུ་མས་ཡང་ཡང་ཇི་ལྟར་གསོལ་བ་འདེབས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྩེ་ཆེན་པོའི་ཐོག་ནས་ཁ་སང་ཕྱི་ཚེས་ ༢༩ ཉིན་བཀའ་དབང་གི་སྟ་གོན་དང་དེ་རིང་ཚེས་ ༣༠ ཉིན་དྲྭ་ལམ་ཐད་གཏོང་བརྒྱུད་འཕགས་མཆོག་ཐུགས་རྗེ་ཆེན་པོའི་དབང་ཆེན་གྱི་བཀའ་དབང་དངོས་གཞི་དང་འཕགས་པ་འཇིག་རྟེན་དབང་ཕྱུག་སེང་གེ་སྒྲའི་རྗེས་གནང་བཅས་ཀྱི་བཀའ་ཆོས་འདི་རེ་ཞིག་ལེགས་གྲུབ་མཛད་ཡོད་པ་རེད། བཀའ་ཆས་དེའང་བོད་དབྱིན་རྒྱ་གསུམ་གྱིས་སྐད་ཡིག་གཙོས་པའི་ཁྱོན་སྐད་རིགས་འདྲ་མིན་བཅུ་བཞིའི་ཐོག་གསུང་སྒྱུར་གནང་ཡོད་པ་དང་བཀའ་དབང་དངོས་གཞི་དང་རྗེས་གནང་སྐབས་ཕྱི་ནང་གི་དད་ལྡན་མང་ཚོགས་ས་ཡ་གཅིག་ལྷག་ནས་བཀའ་དབང་དང་རྗེས་གནང་ཞུས་ཡོད་པ་རེད།

སུད་སི་ནང་གནས་སྡོད་རང་ལོ་ ༤༥ སོན་པའི་ཚེ་རིང་དབང་འདུས་ལགས་ཀྱིས་རྒྱབ་ཏུ་ཉལ་ཆས་བླུགས་པའི་ལྟོ་ཆས་དང་ལག་ཏུ་བོད་རྒྱལ་ཁབ་ཆེན་པོའི་རྒྱལ་དར། དེ་བཞིན་རྒྱབ་ཏུ་འཛམ་གླིང་གཞུང་མང་ནས་རྒྱ་ནག་གི་དངོས་ཟོག་ཉོ་ཚོང་མཚམས་འཇོག་དགོས་ཞེས་འབོད་ཚིག་འཁོད་པའི་ཤོག་སྦྱང་འཕྱང་ནས་སུད་སི་ནང་བོད་དོན་ཞི་བའི་གོམ་བགྲོད་གནང་བཞིན་འདུག ཚེ་རིང་དབང་འདུས་ལགས་ཀྱིས་སུད་སི་ནང་བོད་དོན་ཞི་བའི་གོམ་བགྲོད་ལས་འགུལ་དེ་ཟླ་བ་འདིའི་ཚེས་ ༢༧ ཉིན་རེས་གཟའ་ལྷག་པ་དང་བསྟུན་རང་ཉིད་ཀྱི་གནས་ཡུལ་སུད་སི་ས་གནས་ Winterthur ནས་དབུ་འཛུགས་གནང་འདུག་ཅིང་། ལས་འགུལ་དེ་གཙོ་བོ་ཉེ་བའི་ཆར་རྒྱ་ནག་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཁྱབ་གདལ་དང་རྒྱ་གཞུང་གིས་རྫུན་བཟོ་ཧམ་བཤད་ཁྲོད་འཛམ་གླིང་མང་ཚོགས་ཧ་ཅང་མང་པོའི་ཚེ་སྲོག་ཤོར་བཞིན་པའི་གཉན་འཕྲང་གི་དུས་སྐབས་འདིར་འཛམ་གླིང་གཞུང་མང་ལ་རྒྱ་གཞུང་གིས་གདོང་རིས་ངོ་མ་གསལ་བཏོན་དང་། དེ་ལྟ་བུའི་ནག་ཉེས་ཀྱི་འགན་ཡོངས་རྫོགས་རྒྱ་ནག་གཞུང་ནས་འཁྱེར་བཅུག་དགོས་པ། ཕྱིའི་རྒྱལ་ཁབ་ཀྱི་གཞུང་མང་ལ་རྒྱ་ནག་གི་དངོས་ཟོག་ཉེ་ཚོང་མཚམས་འཇོག་དང་རྒྱ་གཞུང་དང་འབྲེལ་ཐག་གཅོད་རོགས་ཞེས་ཞུ་འབོད་གནང་རྒྱུ་མ་ཟད། ལྷག་དོན་ས་གནས་མང་ཚོགས་ཁྲོད་ལ་བོད་ནང་གི་བོད་མིའི་རང་དབང་གི་གནས་སྟངས་གཙོས་པའི་དངོས་ཡོད་གནས་ཚུལ་ཁག་ངོ་སྤྲོད་གནང་རྒྱུ་བཅས་ལ་ཆེད་དམིགས་ཀྱིས་ཐེངས་འདིའི་ཞི་བའི་གོམ་བགྲོད་ཀྱི་ལས་འགུལ་སྤེལ་བཞིན་ཡོད་པ་རེད་འདུགསྤྱིར་སུད་སི་ནང་དུ་གནས་སྡོད་བོད་དོན་ཞི་བའི་གོམ་བགྲོད་ལས་འགུལ་སྤེལ་མཁན་བོད་མི་ཚེ་རིང་དབང་འདུས་ལགས་ཆ་མཚོན་ན་ཐེངས་འདིའི་ཞི་བའི་གོམ་བགྲོད་ཀྱི་ལས་འགུལ་སྤེལ་བ་ཙམ་མ་ཟད་དེ་སྔོན་ཁོང་ནས་སུད་སི་གྲོང་ཁྱེར་ཛུ་རིག་ནས་འཇར་མི་ནི་གྲོང་ཁྱེར་ Frankfurt བར་བོད་རང་དབང་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བ་དང་། དེ་བཞིན་སུད་སི་རྒྱལ་ས་ bern ནས་ཇི་ནི་ཝ་བར་གྱི་བོད་དོན་གོམ་བགྲོད་ལས་འགུལ་བཅས་ཀྱི་ནང་མཉམ་ཞུགས་གནང་མྱོང་ཡོད་པ་ཞིག་ཡིན་པ་རེད།ལས་འགུལ་དེ་བརྒྱུད་ནས་སུད་སི་དང་རྒྱལ་སྤྱིའི་གཞུང་མང་ནས་ད་བར་རྒྱ་ནག་ལས་ཁྱབ་གདལ་བྱུང་བའི་ནད་ཡམས་རྐྱེན་པས་ད་བར་རྒྱལ་སྤྱིའི་ཁྲོད་མང་ཚོགས་དུ་མའི་ཚེ་སྲོག་ཤོར་དང་ཤོར་མུས་ཡིན་པ་ལྟར། སུད་སི་གཞུང་མང་ཚོས་ཀྱང་རྒྱ་ནག་གི་དངོས་ཟོག་ཉེ་ཚོང་གནང་རྒྱུ་མེད་པ་དང་ལྷག་དོན་རྒྱ་གཞུང་གིས་རྒྱ་ནག་ཝུ་ཧན་ནས་ཁྱབ་གདལ་སོང་བའི་ཏོག་དབྱིབས་གཉན་རིམས་རྐྱེན་པས་གོ་ལའི་ཁྱོན་ཡོངས་སུ་འགྲོ་བ་མི་སྟོང་ཕྲག་མང་པོའི་ཚེ་ཤོར་བའི་འགན་ཡོངས་རྫོགས་རྒྱ་གཞུང་རང་ནས་འཁུར་འཇུག་དགོས་ཞེས་འབོད་སྐུལ་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ནས་དབུ་འཛུགས་ཀྱིས་ཉིན་གཉིས་ཀྱི་རིང་ལ་བསྐྱང་རྒྱུའི་འཕགས་པ་ཐུགས་རྗེ་ཆེན་པོའི་དབང་ཆེན་གྱི་བཀའ་དབང་སྟ་གོན་དབུ་འཛུགས་དང་འབྲེལ། འཕགས་པ་ཐུགས་རྗེ་ཆེན་པོའི་བཀའ་དབང་འདི་འཐོབ་རྒྱུ་ཡོད་ཅེས་བཀའ་བསྩལ་སོང་།༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ནང་གི་དད་ལྡན་སྤྱི་སྒེར་དུ་མས་ཡང་ཡང་ཇི་ལྟར་གསོལ་བ་འདེབས་དོན་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༥ ཚེས་ ༢༩ ཉིན་འཕགས་པ་ཐུགས་རྗེ་ཆེན་པོའི་དབང་ཆེན་གྱི་སྟ་གོན་བཀའ་དྲིན་དབུ་འཛུགས་མཛད་པའི་སྐབས་དྲྭ་ཐོག་ནས་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་དགའ་ལྡན་ཁྲི་ཟུར་རིན་པོ་ཆེ་མཆོག དེ་བཞིན་ཤར་བྱང་ཆོས་རྗེ་རིན་པོ་ཆེ་རྣམ་གཉིས་མཆོག་དང་དགོན་སྡེ་གྲྭ་ཚང་ཁག་གི་མཁན་བླ་སྤྲུལ་རྣམ་པ་བཅས། གཞན་ཡང་ཕྱི་ནང་གི་དད་ལྡན་སེར་སྐྱ་མང་ཚོགས་ཁྲི་ཚོ་བརྒལ་བས་བཀའ་དབང་ཞུས་ཡོད་པ་རེད།འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མཎ་དྲལ་རྟེན་གསུམ་འདེགས་འབུལ་ཞུས་ཡོད་པ་རེད།སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་ཐོག་མར་ཆོས་ཞུ་བ་ཚོར་དད་དམ་གཡོ་བ་མེད་པར་དྲྭ་ཐོག་བརྒྱུད་དེ་འཕགས་པ་ཐུགས་རྗེ་ཆེན་པོའི་བཀའ་དབང་ཞུ་ཚེ་དེ་ལྟར་འཐོབ་རྒྱུ་ཡོད་པ་དང་དེ་མིན་རྣལ་འབྱོར་བླ་མེད་ཀྱི་བཀའ་དབང་དེ་དག་དམིགས་བསལ་ཡིན་སྐོར་ལམ་སྟོན་བསྩལ་སོང་།དེ་བཞིན་༸གོང་ས་མཆོག་གིས་མགོན་པོ་༸གང་ཉིད་མཆོག་གིས་༸སྐུའི་ཐུགས་བསྐྱེད་དམ་བཅའ་བཞི་པོ་ངོ་སྤྲོད་མཛད་དེ་དང་པོ་འགྲོ་བ་མི་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པར་བཀའ་བསྩལ་བ་དང་འབྲེལ་ནས་ཨ་རིའི་མི་ནི་སོ་ཊའི་ནང་ཉེན་རྟོག་པས་མི་རིགས་དཀར་ནག་དབྱེ་འབྱེད་ཀྱིས་མི་རིགས་ནག་པོར་གཉའ་གནོན་ཚད་མེད་གཏོང་བཞིན་པའི་བརྙན་པར་གཟིགས་སྐོར་དང་འབྲེལ་ཏེ་དེ་ལྟར་མི་རིགས་དཀར་ནག་དང་ཆོས་ལུགས་ཀྱི་འཐེན་འཁྱེར་བྱེད་རྒྱུ་མེད་པར་ལམ་སྟོན་མཛད་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་འཕགས་པ་སྤྱན་རས་གཟིགས་དང་བོད་གངས་ཅན་ལྗོངས་ཀྱི་བོད་མིའི་དབར་ཐུན་མོང་མ་ཡིན་པའི་ལས་ཀྱི་འབྲེལ་བ་ཡོད་སྐོར་བཀའ་བསྩལ་བ་དང་འབྲེལ། བོད་ལ་དུས་ལོག་བྱུང་སྐབས་ཇོ་བོ་ཝ་ཏི་བཟང་པོ་བལ་ཡུལ་ནས་དྷ་སར་གདན་ཞུ་གནང་ཡོད་པ་ལྟར། འཕགས་པ་ཝ་ཏི་བཟང་པོ་ནི་འཕགས་པ་སྤྱན་རས་གཟིགས་ཀྱི་སྣང་བརྙན་ཐུན་མིན་ཞིག་ཡིན་སྐོར་བཀའ་བསྩལ་བ་དང་ཆབས་ཅིག་ཏུ་འདས་པའི་ལོ་ངོ་ ༦༠ ནང་ཇོ་བོ་ཝ་ཏི་བཟང་པོའི་དཀོན་གཉེར་དེ་མགོན་པོ་༸གང་ཉིད་མཆོག་གིས་མཛད་སྐོར་བཀའ་བསྩལ་དང་། ༸གོང་ས་མཆོག་ནས་ཉིན་ལྟར་ཇོ་བོ་ཝ་ཏི་བཟང་པོའི་སྐུ་མདུན་དུ་ཐུགས་སྨོན་མཛད་སྐབས་ཞལ་རས་ལ་འགྱུར་བ་འགྲོ་བར་གཟིགས་ཚུལ་བྱུང་ཞེས་བཀའ་བསྩལ་བ་མ་ཟད། ལྷག་དོན་མགོན་པོ་༸གང་ཉིད་མཆོག་ནི་འཕགས་པ་སྤྱན་རས་གཟིགས་ཀྱི་མགྲོན་གཉེར་ཞིག་ཡིན་ཞེས་བཀའ་བསྩལ་ཡོད།༸གོང་ས་མཆོག་གི་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བསྩལ་གྲུབ་པའི་རྗེས་སུ་ཆོས་ཞུ་བ་ཚོར་དགེ་བསྙེན་དང་བྱང་ཆུབ་སེམས་པའི་སྡོམ་པ་འབོག་ཆོག་བསྩལ་བ་དང་འབྲེལ། རང་དོན་དང་གཞན་དོན། འཕྲལ་གྱི་ཚོགས་བསགས་སྒྲིབ་བྱང་། དེ་བཞིན་སེམས་ལ་སྤོབས་པ་དང་སྤྲོ་བ་འཕེལ་བར་ཧ་ཅང་གི་གནད་འགག་ཆེན་པོ་ཡིན་པས་བྱང་ཆུབ་ཀྱི་སེམས་ལས་ལྷག་པ་མེད་ཅེས་ལམ་སྟོན་མཛད་ཡོད།ལྷག་དོན་དེ་རིང་གི་ཆོས་འབྲེལ་མཇུག་ཏུ་༸གོང་ས་མཆོག་གིས་ཁྱེད་རང་ཚོས་དོ་ནུབ་རྨི་ལམ་བརྟག་དགོས་པར་བརྟེན་ཁྱེད་རང་ཚོ་མ་ཉལ་གོང་ལ་འཕགས་པ་སྤྱན་རས་གཟིགས་ཀྱི་མཚན་སྔགས་མ་ཎི་ཡིག་དྲུག་དང་རྟ་མགྲིན་གཟུངས་སྔགས། དེ་བཞིན་སྟོང་པ་ཉིད་ཀྱི་ལྟ་བར་བསམ་བློ་གཏོང་དགོས་ཞེས་བཀའ་ནན་བསྩལ་བ་དང་། ཆབས་ཅིག་ཏུ་ཐུགས་བརྩེ་ཆེན་པོས་ཁྱེད་རང་ཚོ་བློ་བདེ་པོ་བྱོས་ཨ་ཞེས་བཀའ་བསྩལ་ཡོད།གཞི་རྩའི་སྤྱི་སྒེར་དུ་མས་ཡང་ཡང་ཇི་ལྟར་གསོལ་བ་འདེབས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྩེ་ཆེན་པོའི་ཐོག་ནས་དེ་རིང་ཕྱི་ཚེས་ ༢༩ ཉིན་བཀའ་དབང་གི་སྟ་གོན་དང་སང་ཚེས་ ༣༠ ཉིན་དྲྭ་ལམ་ཐད་གཏོང་བརྒྱུད་བཀའ་དབང་གི་དངོས་གཞི་བཅས་བཀའ་ཆོས་དེ་བོད་དབྱིན་རྒྱ་གསུམ་གྱིས་སྐད་ཡིག་གཙོས་པའི་ཁྱོན་སྐད་རིགས་འདྲ་མིན་བཅུ་བཞིའི་ཐོག་གསུང་སྒྱུར་གནང་གི་ཡོད་པ་དང་། དེ་རིང་བཀའ་དབང་གི་སྟ་གོན་སྐབས་ཕྱི་ནང་གི་དད་ལྡན་མང་ཚོགས་ས་ཡ་གཅིག་དང་འབུམ་བདུན་ལྷག་གིས་གསན་གཟིགས་དང་བཀའ་དབང་ཞུས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་སྒེར་ཡིག་ཚང་༸དཔལ་ལྡན་དགའ་ལྡན་ཕོ་བྲང་གིས་དྲྭ་ལམ་ནས་དབང་བསྐུར་ཐོབ་མིན་དང་བརྒྱུད་པར་སེལ་ཞུགས་མིན། གསང་སྔགས་ཁྲོམ་བསྒྲགས་རུང་མིན་སོགས་དང་འབྲེལ་བའི་གསལ་བཤད་སྤེལ་འདུགདེའང་བར་སྐབས་འཇིག་རྟེན་ཁྱོན་ཡོངས་སུ་རིམས་ནད་ཀྱི་དབང་གིས་འདུ་འཛོམས་བྱེད་ཐབས་མེད་སྟབས་དད་ལྡན་མང་པོས་དྲྭ་ལམ་བརྒྱུད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཞལ་མཇལ་གསུང་ཐོས་དང་། འཕགས་མཆོག་ཐུགས་རྗེ་ཆེན་པོའི་བཀའ་དབང་གནང་སྩོལ་ཡོང་བའི་གསོལ་འདེབས་ནན་ཞུའི་ངོར་ཞལ་བཞེས་བཀའ་དྲིན་ཐོབ་པ་དེ་ལྟར་ཡང་། དྲྭ་ལམ་ནས་དབང་བསྐུར་ཐོབ་མིན་དང་། བརྒྱུད་པར་སེལ་ཞུགས་མིན། གསང་སྔགས་ཁྲོམ་བསྒྲགས་རུང་མིན་སོགས་དྭོགས་འདྲི་སྣ་ཚོགས་ཤིག་འདུག་པར་གསལ་བཤད་མདོར་བསྡུས་ཤིག་ཞུ་རྒྱུར། སྤྱིར་གནའ་བོའི་དུས་སུ་མིག་དང་རྣ་བའི་མངོན་ཤེས་ཐོབ་པའི་གང་ཟག་རྣམས་ཀྱིས་གྲངས་མེད་འཇིག་རྟེན་ཁམས་ཀྱི་ཕ་རོལ་ནས་ཆོས་འཆད་ཉན་དང་། དེ་ལ་བརྟེན་ནས་ས་ལམ་གྱི་འབྲས་བུ་བརྙེས་པའི་བྱུང་བ་མདོ་ལས་གསལ་བར་གསུངས་པ་དེ་དག་སྒྲ་ཇི་བཞིན་པར་ཀུན་གྱིས་འདོད་བཞིན་པ་ལྟར། དེང་རབས་འཕྲུལ་ལས་དྲྭ་རྒྱ་དང་བརྙན་འཕྲིན་སོགས་ཀྱང་རང་བྱུང་འབྱུང་ཁམས་ལ་གནས་པའི་རྫས་ནུས་སྦྱོར་སྤྱད་ལས་བྱུང་བས། དེ་ལ་བརྟེན་པའི་མཐོང་ཐོས་ཀྱི་ཤེས་པའང་བསླུ་མེད་ཚད་མའི་བློར་འདོད་པ་ལ་སྐྱོན་གང་ཡང་མེད་པས་དྲྭ་ལམ་བརྒྱུད་ཆོས་བཀའ་སྩལ་རིགས་སློབ་མས་ཐོབ་མིན་ལ་དྭོགས་པ་བྱེད་དགོས་མ་མཆིས། སྤྱིར་རྒྱུད་སྡེ་དང་འཕགས་བོད་ཀྱི་དཀྱིལ་ཆོག་དགོངས་འགྲེལ་ཚད་མ་རྣམས་ནས་དབང་གི་རྣམ་གཞག་སྐོར། གང་གིས་དབང་སྐུར་བ་རྡོ་རྗེ་སློབ་དཔོན་གྱི་མཚན་ཉིད། གང་དུ་དབང་བསྐུར་བ་དཀྱིལ་འཁོར་གྱི་རྣམ་གཞག གང་ལ་དབང་བསྐུར་བའི་སློབ་མའི་མཚན་ཉིད། གང་སྐུར་བའི་དབང་གི་ཆོ་གའི་རིམ་པ་བཅས་ཆེས་ཞིབ་པར་གསུངས་ཡོད། དེ་དག་ལས་སློབ་དཔོན་དང་སློབ་མ་མཚམས་གཅིག་ཏུ་ཡོད་དགོས་པར་གསུངས་པ་གཅིག་ཀྱང་མི་སྣང་། དབང་གི་དགོས་པ་ནི་སློབ་མའི་རྒྱུད་ལ་སྐུ་བཞིའི་ས་བོན་ཐེབས་ངེས་སུ་འཇོག་ཅིང་། ཡི་དམ་དེ་དང་དེའི་བསྙེན་སྒྲུབ་ལས་གསུམ་ལ་དབང་བར་བྱས་པ་ཡིན་ཞིང་། དབང་གི་ངོ་བོ་ནི་རྒྱུད་སྡེ་རང་རང་གི་ལམ་དང་མཐུན་པའི་རྟོགས་པའི་ཡོན་ཏན་ཁྱད་པར་བ་རེ་རྒྱུད་ལ་མ་མཐར་ཡང་མོས་པ་ཡིད་བྱེད་ཀྱི་ཚུལ་དུ་བསྐྱེད་པར་བྱེད་པ་དེ་ཡིན་ལ། དེ་ཡང་སློབ་དཔོན་གྱིས་ཆོ་གའི་ཚིག་རིས་ལྟར་བརྡ་ལེགས་པར་སྤྲད་པ་ན། སློབ་མས་དེ་བཞིན་དམིགས་རྣམ་བསྐྱངས་ཏེ་དྲི་མ་གང་དག་པ་དང་། ནུས་པ་གང་འཇོག་པ། ལམ་གང་བསྒོམ་པ་ལ་དབང་བར་བྱས་པ་རྣམས་ཡིད་ལ་གསལ་ངེས་བྱུང་ན་དབང་ངེས་པར་དུ་ཐོབ། དབང་རྫས་བུམ་ཆུ་སོགས་ནི་དབང་གི་ངོ་བོ་དེ་དག་བསྐྱེད་པའི་གྲོགས་སུ་གྱུར་པ་ལས་མེད་མི་རུང་གི་རྒྱུ་མིན། ཉན་ཐོས་ཀྱི་ཐེག་པར་ལུང་འབོགས་པ་གཙོ་བོ་ཡིན་ཞིང་། དེ་ལའང་འདུལ་བ་ལུང་གཞིར། ལུང་ནོད་པར་སློབ་མ་ཐོས་པའི་ཉེ་སྐོར་ལས་མཐོང་བའི་ཉེ་སྐོར་དུ་ཡོད་དགོས་པར་མ་གསུངས། སྤྱིར་དམ་ཆོས་འདུལ་བའི་ལས་ཀྱི་ཆོ་ག་རྣམས་མངོན་སུམ་དུ་དགོས་པ་ཤ་སྟག་ཡིན་མོད། དགག་དགོས་ཁྱད་པར་བའི་དབང་གིས་བུ་མོ་ཆོས་སྦྱིན་མ་སྟོན་པ་རང་ཉིད་ཀྱིས་འཕྲིན་གྱི་སྒོ་ནས་ད་ཆོག་ཉེས་མེད་ཕུན་ཚོགས་ཀྱིས་བསྙེན་པར་རྫོགས་པར་མཛད་ཡོད། མདོ་དཀོན་བརྩེགས་ལས་སངས་རྒྱས་ཀྱིས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་པ་སངས་རྒྱས་ཀྱི་གསུང་དབྱངས་ཀྱིས་གོ་བར་མཛད་དེ་’ཆོས་སྟོན་ནས་འབྲས་བུ་ལ་བཀོད་པར་གསུངས་ཤིང་། བྱང་སེམས་ཀྱི་སྡོམ་པ་ཡང་རྟེན་གྱི་དྲུང་ནས་ཐོབ་པ་ཀུན་ལ་གྲགས་ཤིང་གྲུབ་པ་ལྟར་རོ།། སྔགས་ཀྱི་ཐེག་པར་ཆོས་ཀྱི་ཆེ་བ་འདོན་སླད་སྐབས་རེ་སློབ་མའི་གྲངས་བཅད་གནང་བ་དང་། ཡང་སྐབས་རེ་ཁྲོམ་དབང་གི་ཕྱག་སྲོལ་སྔར་ནས་ཡོད་དེ། ཤམ་བྷ་ལར་དུས་ཀྱི་འཁོར་ལོ་ཁྲོམ་ཆོས་སུ་གནང་བ་དང་། སློབ་དཔོན་རིན་པོ་ཆེས་ཨོ་རྒྱན་ཡུལ་གྱི་རྒྱལ་འབངས་ཀུན་བཏུལ་ནས་བཀའ་དབང་ཁྲོམ་ཆོས་སུ་མཛད་པ། འཇིགས་མེད་གླིང་པ་དང་། ཀཿཐོག་རིག་འཛིན་ཚེ་དབང་ནོར་བུ། གཏེར་བདག་གླིང་པ་སོགས་ཚད་ཐུབ་དུ་མས་ཁྲོམ་དབང་བསྐུར་བ་རང་རང་གི་རྣམ་ཐར་དུ་གསལ། གྲངས་ཚད་ཙམ་གྱིས་དབང་སྐུར་ཆོག་མི་ཆོག་གི་ས་མཚམས་འཛིན་ན་རྒྱུད་སྨིན་པའི་སློབ་མ་ཚད་ལྡན་སྟོང་ཕྲག་སོགས་དུས་གཅིག་ཏུ་འབྱུང་མི་ཆོག་པའམ་བྱུང་ཡང་དེ་དག་གི་དོན་བྱ་མི་རུང་བར་འགྱུར་བས་སྟོན་པའི་དགོངས་པ་དེ་ལྟ་བུའི་གུ་དོག་ཅན་ཞིག་ཡིན་ག་ལ་རིགས། རྣལ་འབྱོར་གྱི་དབང་ཕྱུག་མི་ལ་བཞད་པའི་རྡོ་རྗེའི་རྣམ་ཐར་དུ་དབང་བསྐུར་བར་སེམས་བསྐྱེད་བཟང་པོ་དང་། ཆོ་ག་ཚང་བ་དང་། བསྐྱེད་རིམ་གསལ་བ་བརྟན་པ་དང་། ལྷ་སྐོན་ཚད་དུ་སྐྱོལ་བ་དང་། དེ་རྣམས་ཡོད་ན་དག་དེས་ཆོག་སྟེ། ཞེས་དང་། ཤི་བོ་ལ་དབང་བསྐུར་བ་ཡང་རྣམ་ཐར་དེ་ཉིད་དུ་བྱུང་བས་དགག་དགོས་དབང་གིས་ཕྱག་ལེན་ཡངས་དོག་ཅི་རིགས་པར་བྱུང་ངོ་། མདོར་ན། རྡོ་རྗེ་སློབ་དཔོན་དང་སློབ་མ་མཚན་ཉིད་ཚང་བ་གཞིར་བཅས། དྲྭ་ལམ་ནས་སྐུ་མངོན་སུམ་པ་ལྟ་བུའི་མདུན་དུ། སློབ་དཔོན་གྱིས་རང་གིས་དམིགས་འོག་ཏུ་བཅུག་པའི་སློབ་མ་དད་ཅན་རྣམས་ལ་དབང་བརྡ་འཕྲོད་ངེས་སུ་བསྐུར་ན་དབང་བསྐུར་བར་ཐོབ་སྟེ། དབང་གི་དགོས་པ་དེས་རྫོགས་པས་སོ། དེ་ལྟ་བུའི་སྒོ་ནས་དབང་ཞུ་ན་དྲྭ་ལམ་ནས་ཀྱང་བརྒྱུད་པ་ཚད་ལྡན་ཐོབ་ངེས་ཏེ། རྨི་ལམ་གྱི་སྣང་བའམ་དག་སྣང་དུ་བྱུང་བའི་བྱིན་རླབས་ཉེ་བརྒྱུད་ཀྱི་ཆོས་ཚན་དང་། ལོ་ངོ་བརྒྱ་ཕྲག་དུ་མའི་རྗེས་གཏེར་ནས་སྟོན་པའི་ཆོས་རྣམས་ལའང་ཆོས་མགོ་སྟོན་པ་ལ་ཐུག་པའི་བརྒྱུད་པ་ཚད་མར་གྱུར་པ་ཀུན་གྱིས་ཁས་ལེན་གནང་བཞིན་པ་ཡིན་པས་དྭོགས་གཞིར་བྱ་དགོས་མ་མཆིས་སོ།། འོན་ཀྱང་བླ་མ་ལ་དད་གུས་མེད་པའི་སྐྱེ་བོ་རྣམས་ནི་དབང་གྲལ་དུ་འཚང་རུང་དབང་མི་ཐོབ་པར་ངེས་པས་དེ་དོན་དགོངས་འཇགས་ཞུ་ཞེས་༸དཔལ་དགའ་ལྡན་ཕོ་བྲང་ཡིག་ཚང་གིས་ཕྱི་ལོ་ ༢༠༢༠ ཟླ་ ༥ ཚེས་ ༢༩ ལ་ཞེས་གསལ་བཤད་ཀྱི་བཀའ་ཡིག་བསྩལ་འདུག

ཉེ་ལམ་སྤྱི་ཟུར་སྤྲུལ་སྐུ་ཨ་རྒྱན་སྟོབས་རྒྱལ་གྱིས་༸གོང་ས་མཆོག་ལ་མཚན་སྨད་ཞུས་པའི་གནད་དོན་དང་འབྲེལ་ཏེ་༸གོང་ས་མཆོག་ལ་མཚན་སྨད་ཞུ་མཁན་སུ་ཡིན་ཡང་ངོ་རྒོལ་མཐའ་གཅིག་ཏུ་ཡོད་པ་དང་དེ་བཞིན་སྲིད་སྐྱོང་དང་བཀའ་ཤག་གི་བཞེངས་ཕྱོགས་གང་ཡིན་གསལ་བཤད་གནང་འདུགབོད་མིའི་སྒྲིག་འཛུགས་ཀྱི་སྒྲ་བརྙན་གཏད་གཏོད་ལས་རིམ་བརྒྱུད་ཁ་སང་སྲིད་སྐྱོང་བློ་བཟང་སེང་གེ་མཆོག་གིས་༸གོ་ས་མཆོག་ལ་མཚན་སྨད་ཞུ་མཁན་ལ་ངོ་རྒོལ་མཐའ་གཅིག་ཏུ་ཡོད་པ་དང་སྲིད་སྐྱོང་དང་བཀའ་ཤག་གི་བཞེངས་ཕྱོགས་དེ་སྔ་ཡོད་པ་བཞིན་ད་ལྟའང་གནས་ཡོད་པ་དང་མ་འོངས་པར་ཡང་མུ་མཐུད་གནས་རྒྱུ་ཡིན་པ། འདི་ལོ་བཀའ་ཤག་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད་པ་ལྟར། ༸གོང་ས་མཆོག་གིས་དགུང་ལོ་ ༡༦ ནས་བཟུང་སྟེ་ད་བར་ བོད་ཆོས་སྲིད་གཉིས་ཀྱི་དབུ་ཁྲིད་ཀྱི་ཐུགས་འགན་བཞེས་གནང་བ། མགོན་པོ་གང་ཉིད་ཀྱི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་མགོ་ཁྱག་ཁྱག་བྱ་རྒྱུ་བྱུང་ཡོད་སྐོར་དྲན་བསྐུལ་གནང་བ་དང་སྦྲགས། ༸གོང་ས་མཆོག་ནི་བསྟན་པ་དར་སྤེལ་གནང་མཁན་ཞིག་ལས་བསྟན་པ་བཤིག་མཁན་ཞིག་རྩ་བ་ནས་མིན་པ་སོགས་གསུངས་པ་མ་ཟད། ད་ལན་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུས་པ་དེར་ཧ་ལས་པའི་བློ་ཕམ་ཡོད་པ་དང་། མཐའ་གཅིག་ཏུ་ངོ་རྒོལ། མོས་མཐུན་རྩ་བ་ཉིད་ནས་མེད་པ་མ་ཟད། ལྷག་དོན་ཨོ་རྒྱན་སྟོབས་རྒྱལ་ནས་ཀྱང་༸གོང་ས་མཆོག་གི་བཀའ་དྲིན་བསམ་ཤེས་བྱེད་པའི་ཐོག་ནས་བཟོད་གསོལ་ཞུ་དགོས་པ་གསུངས་འདུགརྩ་བའི་ཐེངས་འདིའི་གནད་དོན་དང་འབྲེལ་བོད་མི་མང་ཚོགས་ནས་ཡིག་ངག་གཉིས་ཐོག་བློ་ཕམ་དང་ངོ་རྒོལ་གྱི་རྣམ་པ་ཤུགས་ཆེ་ཆེད་བཏོན་གནང་བཞིན་པ་མ་ཟད། སྐུ་བཅར་རྣམ་རྒྱལ་གྲྭ་ཚང་།  སྟོད་རྒྱུད་གྲྭ་ཚང། རྒྱལ་སྤྱིའི་དགེ་ལྡན་ལྷན་ཚོགས། གཞུང་ཞབས་ཟུར་པ། སྤྱི་འཐུས་ཚོགས་གཙོ་ཟུར་པ་སོགས་ཚོགས་སྒེར་ཀུན་ནས་སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་༸གོང་ས་མཆོག་ལ་མཚན་སྨད་ཞུས་པར་ངོ་རྒོལ་གྱི་རྣམ་པ་ཤུགས་ཆེད་བཏོན་གན་ངབ་མ་ཟད། དེའི་ཐོག་ཆོས་རིག་བཀའ་བློན་གྱིས་གསལ་བཤད་ཅིག་ཕེབས་ཡོད་པ་དེས་སྤྱི་ཟུར་ཁོང་གིས་་༸གོང་ས་མཆོག་ལ་མཚན་སྨད་ཞུས་པར་ངོ་རྒོལ་བྱེད་རྒྱུ་ལས་ལྡོག་ཏེ་ཁོང་ལ་དག་འབུད་བྱ་ཐབས་བྱེད་བཞིན་པར་སྐྱོན་བརྗོད་ཤུགས་ཆེ་གནང་བ་དང་འབྲེལ་ཏེ། མང་པོ་ཞིག་ནས་བཀའ་ཤག་ལ་ཐད་ཀར་ཕྱག་བྲིས་ཕུལ་བ་བརྒྱུད་ཆོས་རིག་བཀའ་བློན་ལས་གནས་ནས་དགོངས་པ་ཞུ་དགོས་པའི་དགོས་འདུན་གནང་མཁན་ཡང་མང་དག་ཅིག་ཡོང་བཞིན་ཡོད་པ་རེད། གང་ལྟར་ད་ལྟའི་ཆར་ཐད་ཀར་ཕྱག་བྲིས་ཕུལ་བ་དང་། བསྒྲགས་གཏམ་སྤེལ་བ། དེ་བཞིན་དྲྭ་རྒྱའི་བརྒྱུད་ལམ་སོགས་ཀྱི་ཐོག་སྤྲུལ་སྐུ་ཨོ་རྒྱན་སྟོབས་རྒྱལ་ལ་སྐྱོན་བརྗོད་དང་ངོ་རྒོལ་གྱི་རྣམ་པ་ཤུགས་ཆེན་པོ་འདོན་བཞིན་པའི་ཁྲོད། ཁག་ཅིག་གིས་སྙིང་རྗེ་བསྒོམ་ཐོག་གནད་དོན་དེར་གཟིགས་ཕྱོགས་མཁན་ཡང་འདུག དཔེར་ན་དེ་རིང་༸གོང་ས་མཆོག་གི་དྲྭ་ཐོག་བཀའ་ཆོས་དེ་ཞུ་བར་ཆེད་མངགས་ལ་དྭགས་བྱང་ཐང་ས་ཁུལ་ནས་རྒྱལ་ས་གླེ་རུ་དྲྭ་རྒྱའི་ཆ་རྐྱེན་སོགས་ལེགས་པར་དགོངས་ཏེ་ཕེབས་པའི་བོད་མི་རྒན་གྲས་ཤིག་གིས་སྤྲུལ་སྐུ་ཨུ་རྒྱན་སྟོབས་རྒྱལ་གྱིས་༸གོང་ས་མཆོག་ལ་མཚན་སྨད་ཞུས་པའི་གནད་དོན་དེ་ཐོས་སྐབས་སྤྲུལ་མིང་པ་ཁོང་ལ་སྙིང་རྗེ་ཚད་མེད་སྐྱེས་པའི་ཚོར་བ་བྱུང་ཞེས་གསུངས་པ་ད་ཆ་སྤྱི་ཚོགས་དྲྭ་ལམ་ཁག་ཏུ་ཁྱབ་སྤེལ་འགྲོ་བཞིན་འདུག