༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་དང་རྒྱ་ནག་ནང་གི་ནང་པ་རྣམས་ནམ་ཡང་བརྗེད་རྒྱུ་མིན་པ་དང་། རྒྱ་ནག་གི་རྣམ་འགྱུར་ལ་དུས་ནམ་ཞིག་འགྱུར་བ་འགྲོ་ཚེ་མགོན་པོ་༸གང་ཉིད་མཆོག་བོད་དང་རྒྱ་ནག་ནང་ཕེབས་རྒྱུར་གྲ་སྒྲིག་ཨང་སར་ཡིན་ཅེས་བཀའ་བསྩལ་སོང་། དེ་རིང་ཟླ་ ༡ ཚེས་ ༨ ཉིན་གནས་མཆོག་རྡོ་རྗེ་གདན་དུ་སྔོན་འགྲོའི་ཆོས་འབྲེལ་ཉིན་མཐའ་མའི་ཆོས་ཐུན་དབུ་འཛུགས་མ་གནང་གོང་ལ་ཧོང་ཀོང་དང་མ་ཀའོ་གཙོས་པའི་རྒྱ་ནག་སྐམ་ས་ཆེན་པོ་ནས་བཅར་བའི་དད་ལྡན་ཆོས་ཞུ་བ་ཁག་ཅིག་ལ་དམིགས་བསལ་བཀའ་སློབ་བསྩལ་ཡོད་པ་རེད། སྐབས་དེར་༸གང་ཉིད་མཆོག་གིས་རྒྱ་རིགས་ཆོས་ཞུ་བ་དེ་དག་ལ་བླ་མ་དང་སློབ་མའི་དབར་གྱི་དམ་ཚིག་སྐོར་བཀའ་བསྩལ་ཡོད་པ་རེད། ཁྱེད་ཚོར་ཧ་ཅང་དཀའ་ལས་ཡོད་ཀྱང་ཨུ་ཚུགས་བརྒྱབ་སྟེ་འདི་གར་ཆེད་མངགས་ཡོང་བར་བརྟེན་དམིགས་བསལ་གྱི་འཚམས་འདྲི་ཡོད་ཅེས་བཀའ་གནང་པ་དང་སྦྲགས།  གལ་ཏེ་རྒྱ་ནག་གཞུང་གིས་ཁྱེད་ཚོ་ཕར་ལོག་དགོས་པའི་སྡིག་ར་དང་བསུན་གཙེར་ཤུགས་ཆེ་བཟོ་བཞིན་ཡོད་ན་ཁྱེད་ཚོ་ཕར་ལོག་ན་འགྲིག་གི་རེད་ཅེས་ལམ་སྟོན་མཛད་པ་མ་ཟད། ལྷག་དོན་དུས་འཁོར་དབང་ཆེན་དངོས་གཞིའི་སྐབས་ངས་ཁྱེད་རང་ཚོ་དབང་གི་དམིགས་འོག་ཏུ་བཅུག་ནས་སྨོན་ལམ་རྒྱག་གི་ཡིན་ཅེས་བཀའ་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་ཆོས་ཞུ་བ་ཚོའི་ངོས་ནས་ཆོས་དད་ལ་དད་པ་གཅིག་པོ་ཙམ་མ་ཡིན་པར་ཕྱག་དཔེ་ཁག་ཉིན་རེའི་མི་ཚེའི་ནང་བལྟ་ཀློག་ཐུབ་པ་ཞིག་དང་ལྷག་པར་དུ་ཕྱག་དཔེ་དེ་དག་ནང་བཀའ་འགྲེལ་གང་གནང་པ་དེ་དག་ཐོག་ལ་ཡང་ཡང་བསམ་བློ་གཏོང་དགོས་པ་དང་དེ་བཞིན་ཆོས་གྲོགས་ཕན་ཚུན་དབར་བགྲོ་གླེང་གནང་བའི་བརྒྱུད་སོ་སོའི་སེམས་ལ་འགྱུར་བ་ཞིག་ཐེབས་ཐབས་གནང་དགོས་གལ་ཡིན་པར་ལམ་སྟོན་མཛད་ཡོད། ༸གང་ཉིད་མཆོག་གིས་རྒྱ་ནག་སྐམ་ས་ཆེན་པོ་ནང་གི་ནང་པ་ཚོ་དུས་ནམ་ཡང་བརྗེད་ཐབས་མེད་སྐོར་བཀའ་སྩལ་བ་དང་འབྲེལ་ཏེ་རྒྱ་གཞུང་གི་རྣམ་འགྱུར་ལ་དུས་ནམ་ཞིག་འགྱུར་བ་འགྲོ་ཚེ་ ༸གང་ཉིད་མཆོག་བོད་དང་རྒྱ་ནག་སྐམ་ས་ཆེན་པོ་གཉིས་ནང་ཕེབས་རྒྱུར་གྲ་སྒྲིག་ཨང་སར་ཡིན་ཅེས་བཀའ་བསྩལ་མཛད་ཡོད་པ་རེད། རྩ་བའི་ཐེངས་འདིའི་དུས་འཁོར་དབང་ཆེན་ཐོག་རྒྱ་ནག་སྐམ་ས་ཆེན་པོ་གཙོས་པའི་ཧོང་ཀོང་དང་ཐེ་ཝན་སོགས་ཀྱི་རྒྱ་རིགས་ ༩༠༠ ལྷག་ཙམ་ཆེད་བཅར་ཞུས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་གནས་མཆོག་རྡོ་རྗེ་གདན་དུ་ཉིན་བཞིའི་སྔོན་འགྲོའི་ཆོས་འབྲེལ་དུ་སློབ་དཔོན་ཀ་མ་ལ་ཤྰི་ལས་མཛད་པའི་སྒོམ་རིམ་བར་པ་དང་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོ་གཉིས་ཀྱི་བཀའ་ཆོས་བཀྲིན་བསྐྱངས་གནང་ཡོད་པ་ལྟར། སྤྱོད་འཇུག་གི་ལེའུ་དང་པོ་བྱང་ཆུབ་སེམས་པའི་ཕན་ཡོན་སྐོར་གྱི་ཆོས་འབྲེལ་བཀྲིན་སྩལ་སྐབས་ཆོས་ཞུ་བ་ཚོས་བྱང་ཆུབ་ཀྱི་སེམས་པ་དང་སྟོང་ཉིད་ཀྱི་ལྟ་བ་བསྒོམ་པ་ཡིན་ན་སྐྱེ་བ་ཕྱི་མ་མི་ལུས་བཟང་པོ་ཞིག་ཐོབ་པར་༸གོང་ས་༸སྐྱབས་མགོན་ཆེན་པོ་མཆོག་གིས་བརྒྱ་ཆ་བརྒྱ་ཐུགས་ཐག་བཅད་ཐུབ་ཀྱི་ཡོད་ཅེས་བཀའ་གནང་པ་མ་ཟད། ལྷག་དོན་ཆོས་ཞུ་བའི་ཁོངས་ལོ་རྒན་འཆི་ཁའི་ཆོས་བྱེད་མཁན་ཚོས་གཟུངས་སྔགས་བགྲང་པ་དང་སངས་རྒྱས་ཆོས་ཚོགས་མ་ལྟ་བུའི་སྟེང་ནས་བྱང་ཆུབ་ཀྱི་སེམས་པ་དང་སྟོང་པ་ཉིད་ཀྱི་ལྟ་བ་བསྒོམ་པ་ཡིན་ཚེ། ཚེ་རབས་ནས་ཚེ་རབས་བར་བདེ་ཞིང་སྐྱིད་པ་ཡོང་རྒྱུར་ལམ་སྟོན་བསྩལ་ཏེ་དེ་ནི་རང་དོན་གྲུབ་པའི་ཐབས་ཤེས་མཆོག་ཏུ་གྱུར་བ་ཞིག་རེད་ཅེས་ལམ་སྟོན་རྒྱ་ཆེ་མཛད་ཡོད། ད་དུང་༸གོང་ས་མཆོག་གིས་ཆོས་ཞུ་བ་ཚོའི་ངོས་ནས་༸གང་ཉིད་མཆོག་གིས་ཉིན་རེའི་ཆོས་འབྲེལ་སྐབས་ཆོས་ཀྱི་འགྲེལ་བརྗོད་གང་གནང་པ་དེ་དག་སེམས་ནང་ཉར་ཐུབ་པ་ཞིག་དང་། ལྷག་པར་དུ་ཆོས་གྲོགས་ཕན་ཚུན་དབར་བགྲོ་གླེང་གནང་པའི་བརྒྱུད་སེམས་ལ་འགྱུར་བ་ཤིག་ཐེབས་ཐབས་གནང་དགོས་གལ་ཡིན་པའི་ལམ་བཀའ་བསྩལ་མཛད་ཡོད་པ་རེད། གཞི་རྩའི་༸གོང་ས་མཆོག་གིས་དེ་རིང་གི་ཆོས་འབྲེལ་སྐབས་ཁ་སང་སྤྱོད་འཇུག་གི་ལེའུ་དང་པོ་བྱང་ཆུབ་སེམས་པའི་ཕན་ཡོན་ཞེས་པ་ནས་བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །  འཁོར་བའི་བཙོན་རར་བསྡམས་པའི་ཉམ་ཐག་རྣམས། །  བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང། །  འཇིག་རྟེན་ལྷ་མིར་བཅས་པས་ཕྱག་བྱར་འགྱུར། ཞེས་པའི་བར་མུ་མཐུད་ཆོས་འབྲེལ་མཛད་པ་དང་སྦྲགས། སངས་རྒྱས་པའི་ཆོས་བྱེད་མི་བྱེད་སོ་སོའི་རང་དབང་ཡིན་ཀྱང་། ཆོས་ལ་དད་པ་བྱས་ཚར་བའི་རྗེས་སུ་ཆོས་ཆོས་སུ་འགྲོ་བ་ཞིག་བྱེད་དགོས་པ་དང་། དེའང་ཚེ་འདི་ཕྱི་གཉིས་ཀྱི་བདེ་སྐྱིད་ཀྱི་རྒྱུ་དེ་རང་གི་སེམས་འདུལ་བར་བྱེད་རྒྱུ་དེ་རེད་ཅེས་ལམ་སྟོན་གནང་སོང་།  ༸གོང་ས་མཆོག་གིས་དེ་རིང་ཉིན་རྒྱབ་ཚོུད་ ༡༢།༠༠ ནས་དབུ་འཛུགས་ཀྱིས་ཚོུད་ ༣།༠༠ བར་སྤྱོད་འཇུག་ལེའུ་གཉིས་པ་སྡིག་བཤག་ནས་ལེའུ་ལྔ་པ་ཤེས་བཞིན་བསྲུང་བའི་བར་མུ་མཐུད་བཀའ་ཆོས་མཛད་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གནས་མཆོག་རྡོ་རྗེ་གདན་དུ་ཆོས་ལུགས་རིས་མེད་ཀྱི་མཛད་སྒོ་ཐོག་དབུ་ཞུགས་མཛད་ཡོད་པ་དང་། ༸གང་ཉིད་མཆོག་གིས་སྐབས་དེར་རྒྱ་གར་ནང་ལ་ཆོས་ལུགས་ཕན་ཚུན་མཐུན་སྒྲིལ་གྱི་གོམས་སྲོལ་བཟང་པོ་དེ་མུ་མཐུད་སྲ་བརྟན་གནང་ཐོག་འཛམ་གླིང་སྤྱི་ལ་མིག་དཔེ་སྟོན་ཐུབ་པ་ཞིག་དགོས་པའི་བཀའ་བསྩལ་སོང། དེའང་ཟླ་ ༡ ཚེས་ ༢ ཉིན་ནས་རྒྱ་གར་གྱི་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ནང་གི་དད་ལྡན་ཆོས་ཞུ་བ་ཚོར་དཔལ་དུས་ཀྱི་འཁོར་ལོའི་དབང་ཆེན་བཀྲིན་བསྩལ་བཞིན་ཡོད་པ་དང། དེ་རིང་ཉིན་རྒྱབ་ཀྱི་བཀའ་ཆོས་དངོས་སུ་དབུ་འཛུགས་མ་མཛད་གོང་ལ་མང་ཚོགས་ཁྲི་ཚོ་བརྒལ་བ་འདུ་འཛོམས་བྱུང་བའི་དུས་དབང་གི་གསུང་ཆོས་ར་བར་༸གོང་ས་མཆོག་དབུ་བཞུགས་ཐོག་འཛམ་གླིང་ནང་གི་ཆོས་ལུགས་འདྲ་མིན་གྱི་དབུ་ཁྲིད་བླ་ཆེན་ཁག་ཅིག་ལྷན་འཛོམས་ཀྱིས་ཆོས་ལུགས་རིས་མེད་ཀྱི་སྟབས་བདེའི་མཛད་སྒོ་ཞིག་ཚོགས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་མཛད་སྒོའི་ཐོག་ལ་བཀའ་སློབ་བསྩལ་དོན། ད་ལན་གནས་ཁྱད་པར་ཅན་འདིར་རྒྱ་གར་གྱི་ཆོས་བརྒྱུད་གཙོ་ཆེ་ཁག་གི་དབུ་ཁྲིད་རྣམ་པ་ཆེད་བཅར་ཞུས་པར་༸གང་ཉིད་མཆོག་ཐུགས་དགྱེས་ཚོར་ཆེན་པོ་བྱུང་སོང་ཞེས་བཀའ་བསྩལ་བ་དང་འབྲེལ། འཛམ་གླིང་འདིའི་སྟེང་མི་དུང་ཕྱུར་ ༧༠ ཙམ་ཡོད་པ་དང། དེ་དག་གི་ཁམས་མོས་བསམ་པ་བག་ལ་ཉལ་བ་བཅས་མི་འདྲ་བ་ཞིག་ཡོད་སྟབས། ཆོས་ལུགས་མི་འདྲ་བ་ངེས་པར་དུ་དགོས་ཀྱི་ཡོད་པ་རེད། ཆོས་ལུགས་དེ་དག་ཐམས་ཅད་ཀྱིས་མི་བྱམས་བརྩེ་དང་ལྡན་པ་ཞིག་དང། གཞན་ལ་ཕན་ཐོགས་པ། མི་བཟང་པོ་དགོས་པའི་བསླབ་བྱ་གཅིག་གྱུར་སྟོན་གྱི་ཡོད་ཅེས་བཀའ་བསྩལ་མཛད་པ་དང་ཆབས་ཅིག ༸གང་ཉིད་མཆོག་གིས་༸སྐུ་ཚེ་གང་བོ་བྱམས་བརྩེའི་ཐོག་ལ་ཤུགས་སྣོན་མཛད་རྒྱུ་ཡིན་པས་ད་རེས་འདིར་ཕེབས་པའི་ཆོས་གྲོགས་རྣམ་པ་ཚོ་གཙོས། དེ་མིན་ཕྱོགས་མཐའ་ཁག་ཏུ་བཞུགས་ཡོད་པའི་ཆོས་གྲོགས་རྣམ་པ་ཚོས་ཀྱང་ཆོས་ལུགས་ཕན་ཚུན་གཅིག་གྱུར་གྱི་འདུ་ཤེས་འཛིན་རྒྱུ་ཐོག་ཧུར་ཐག་གནང་རོགས་གནང་ཞེས་འབོད་སྐུལ་དང་བཅས་བཀའ་བསྩལ་མཛད་ཡོད་པ་རེད། དེ་བཞིན་མགོན་པོ་མཆོག་གིས་རྒྱ་གར་རྒྱལ་ཁབ་འདི་འཛམ་གླིང་འདིའི་སྟེང་གི་ཆོས་ལུགས་གཙོ་ཆེ་ཚང་མ་ཡོད་བསྡད་པའི་རྒྱལ་ཁབ་ཅིག་ཆགས་ཀྱི་ཡོད་པ་མ་ཟད། དེའང་ཆབ་སྲིད་ཀྱི་དགོས་མཁོ་གཅིག་པོ་མ་ཡིན་པར་འདས་པའི་ལོ་ངོ་སྟོང་ཁྲག་རིང་ལ་ལྟ་གྲུབ་མི་འདྲ་བའི་ཆོས་བརྒྱུད་རྣམས་ཕན་ཚུན་ལྷན་དུ་གནས་ཐུབ་པ་དེ་ནི་འཛམ་གླིང་སྤྱི་ལ་ཁྱད་དུ་འཕགས་པ་ཞིག་རེད་ཅེས་བཀའ་བསྩལ་དང་སྦྲགས། དེ་ལྟར་མུ་མཐུད་ནས་སྲ་བརྟན་གནས་པའི་ཐོག་འཛམ་གླིང་སྤྱི་ལ་མིག་དཔེ་སྟོན་ཐུབ་པ་ཞིག་བྱེད་དགོསཀྱི་རེད་ཅེས་ལམ་སྟོན་མཛད་ཡོད་པ་རེད། གཞི་རྩའི་དེ་རིང་ཐེངས་འདིའི་དུས་དབང་སྐབས་ཚོགས་པའི་ཆོས་ལུགས་རེས་མེད་ཀྱི་མཛད་སྒོར་རྒྱ་གར་ནང་གི་སིཀ་ཆོས་ལུགས་དང་གཅེར་བུ་བའི་ཆོས་ལུགས། ཁ་ཆེ་ཆོས་ལུགས། ཧིན་དུ་ཆོས་ལུགས་བཅས་ཀྱི་དབུ་ཁྲིད་ཁག་ཅིག་ཆེད་བཅར་ཞུས་འདུག སྐབས་དེར་ཆོས་ལུགས་ཁག་གི་དབུ་ཁྲིད་ཚོས་རང་རང་སོ་སོའི་ཆོས་ལུགས་ཀྱི་སྨོན་ལམ་གསུང་འདོན་གནང་པ་དང་འདི་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་ད་བར་འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་ཐོག་མཛད་རྗེས་རླབས་པོ་ཆེ་ཞིག་འཇོག་གནང་མཛད་པར་ཆེ་བསྟོད་ཞུས་ཡོད་པ་རེད། རྩ་བའི་རྒྱ་གར་གྱི་ཆོས་ལུགས་འདྲ་མིན་ཁག་གི་དབུ་ཁྲིད་དེ་དག་ཁ་སང་བྷི་ཧར་མངའ་སྡེའི་རྒྱལ་ས་པ་ཊ་ནཱར་རྒྱ་གར་སིཀ་ཆོས་བརྒྱུད་ཀྱི་བླ་ཆེན་གུ་རུ་གྷོ་ཝིནཌ་སིངྒ་མཆོག་སྐུ་འཁྲུངས་ནས་ལོ་ངོ་ ༣༥༠ འཁོར་བའི་མཛད་སྒོར་བཅར་ཡོད་པ་དང། ཁོང་རྣམ་པས་གོ་སྐབས་དེ་དང་བསྟུན་༸གོང་ས་༸སྐྱབས་མགོན་ཆེན་པོ་མཆོག་ལ་ཆོས་ལུགས་རིས་མེད་ཀྱི་མཛད་སྒོ་དེ་ལྟར་ཚོགས་པར་གསོལ་འདེབས་ཞུས་པ་ཞིག་ཡིན་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གནས་མཆོག་རྡོ་རྗེ་གདན་དུ་ཉིན་བཞིའི་སྔོན་འགྲོའི་ཆོས་འབྲེལ་དབུ་འཛུགས་གནང་པ་དང་འབྲེལ། དུས་དབང་ཞུ་བར་བཅར་བའི་ཆོས་ཞུ་བ་ཚོའི་ངོས་ནས་འཛམ་གླིང་འདིའི་སྟེང་ཡོད་པའི་ཆོས་ལུགས་རྣམས་ཕན་ཚུན་དབར་མཐུན་སྒྲིལ་ཡོང་བར་དགོངས་པ་བཅང་དགོས་པ་རེད་ཅེས་བཀའ་བསྩལ་སོང་། དེའང་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་འདིའི་དུས་དབང་ཐོག་བཅར་བའི་ཕྱི་ནང་གི་དད་ལྡན་ཆོས་ཞུ་བ་ཉིས་འབུམ་བརྒལ་བར་དཔལ་དུས་ཀྱི་འཁོར་ལོའི་སྔོན་འགྲོའི་ཆོས་འབྲེལ་ལ་སློབ་དཔོན་ཀ་མ་ལ་ཤྰི་ལས་མཛད་པའི་སྒོམ་རིམ་བར་པ་དང་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོ་གཉིས་ཀྱི་བཀའ་ཆོས་དབུ་འཛུགས་མཛད་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་གིས་དངོས་གཞི་སྒོམ་རིམ་བར་པའི་བཀའ་ཆོས་དབུ་འཛུགས་མ་མཛད་གོང་ལ་ཐེངས་འདིའི་དུས་དབང་ཐོག་འཛམ་གླིང་ཡུལ་འདྲ་མིན་ནས་ཕེབས་པའི་ཆོས་ཞུ་བ་ཚོར་ བདེ་སྐྱིད་ཀྱི་རྩ་བ་བྱམས་བརྩེའི་གལ་གནད་སྐོར་བཀའ་བསྩལ་བ་དང་འབྲེལ་ཏེ། འགྲོ་བ་མི་རྣམས་བདེ་བ་འདོད་པ་དང་སྡུག་ངལ་མི་འདོད་པ་གཅིག་མཚུངས་ཡིན་ཀྱང་། དེང་སྐབས་སྤྱི་ཚོགས་ནང་དུ་ཆོས་ཕྱོགས་དང་། མི་རིགས། དཔལ་འབྱོར་སོགས་ཀྱི་ཐོག་ནས་ཕན་ཚུན་དབར་དབྱེ་འབྱེད་བྱས་སྟབས། མི་མང་པོ་ཞིག་དཀའ་ངལ་ནང་དུ་ཚུད་པ་དང་ཕན་ཚུན་གསོད་རེས་ཀྱིས་མི་གསོད་ཁྲག་སྦྱོར་གྱི་གནས་སྟངས་ཡོང་གི་ཡོད་སྐོར་བཀའ་བསྩལ་བ་དང་ཆབས་ཅིག དེ་དག་མཐོང་བཞིན་དུ་འཆར་ཅན་རེད་ཅེས་སྣང་མེད་དུ་བཞག་ཚེ། དུས་རྒྱུན་ང་ཚོས་སེམས་ཅན་ཐམས་ཅད་ཟེར་བ་འདི་སྐྱག་རྫུན་ཆགས་ཀྱི་ཡོད་ཅེས་བཀའ་བསྩལ་ཡོད། དེ་བཞིན་༸གོང་ས་མཆོག་གིས་འཛམ་གླིང་འདིའི་ཐོག་ཡོད་པའི་ཆོས་ལུགས་དེ་དག་ལྟ་གྲུབ་ཀྱི་ཆ་ནས་མི་འདྲ་བ་ཡོད་རུང་། བྱམས་བརྩེའི་བསླབ་བྱ་སྟོན་མཁན་གཅིག་མཚུངས་ཡིན་ཀྱང་དེང་སྐབས་ཆོས་ལུགས་མི་འདྲ་བའི་རྒྱུ་མཚན་དུ་བྱས་ནས་མི་གཅིག་གིས་གཅིག་ལ་གསོད་རེས་བཏང་པའི་གནས་སྟངས་ཤིག་ཡོང་བའི་དུས་སྐབས་དེར་ཆོས་ལུགས་ནང་ཕན་ཚུན་དབར་གཅིག་གྱུར་གྱི་འདུ་ཤེས་འཛིན་པའི་ཐོག་ནས་ཕན་ཚུན་གཅིག་གིས་གཅིག་ལ་བརྩི་བཀུར་དང་སློབ་སྦྱོང་གནང་སྟེ་ ཆོས་ལུགས་མཐུན་སྒྲིལ་ཡོང་ཐུབ་ཡག་ཞིག་ཡིན་སྟབས། ད་ལན་དུས་དབང་ལ་བཅར་བའི་ཆོས་ཞུ་བ་ཚོའི་ངོས་ནས་ཆོས་ལུགས་མཐུན་སྒྲིལ་ཡོང་བར་དགོངས་པ་བཅང་རོགས་ཅེས་འབོད་སྐུལ་གནང་སོང་། ལྷག་པར་དུ་ད་ལན་གྱི་ཆོས་འབྲེལ་འདིའི་ཐོག་མགོན་པོ་༸གང་ཉིད་མཆོག་གིས་ཆོས་ཞུ་བ་ཚོར་༸གང་ཉིད་མཆོག་གི་ཐུགས་ཀྱི་དམ་བཅའ་གསུམ་པོ་ལས། འགྲོ་བ་མིའི་གཅིག་འགྱུར་གྱི་འགན་འཁྲི་དང་། ཆོས་ལུགས་མཐུན་སྒྲིལ། དེ་བཞིན་བོད་པ་ཞིག་ཡིན་པའི་ཆ་ནས་བོད་མི་རིགས་ཀྱི་ཆོས་དང་རིག་གཞུང་། ཁོར་ཡུག་བཅས་པ་མི་ཉམས་རྒྱུན་འཛིན་གནང་རྒྱུ་བཅས་ཀྱི་ཐོག་ངོ་སྤྲོད་ཞིབ་རྒྱས་གནང་པ་མ་ཟད། ༸གང་ཉིད་མཆོག་གིས་བོད་ལ་ཡོད་པའི་ནང་པ་སངས་རྒྱས་པའི་ཆོས་དང་འབྲེལ་བའི་རིག་གཞུང་དེ་དེང་སྐབས་འཛམ་གླིང་སྤྱིའི་སྤྱི་ནོར་ཞིག་ཆགས་ཡོད་སྟབས། དེ་མི་ཉམས་རྒྱུན་འཛིན་གནང་རྒྱུའི་ཐད་ཐེངས་འདིར་བསྡུས་པའི་བོད་མི་གཙོས་པའི་ཕྱི་རྒྱལ་མི་རིགས་དང་། ལྷག་དོན་རྒྱ་རིགས་ཆོས་ཞུ་བ་ཚོས་དགོངས་པར་བཞག་དགོས་པའི་བཀའ་བསྩལ་མཛད་ཡོད་པ་རེད། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཚོུད་ ༧།༠༠ ནས་དུས་དབང་གསུང་ཆོས་ར་བར་ཆིབས་བསྒྱུར་གྱིས་སྒྲུབ་བཤག་མཛད་ཀྱི་ཡོད་པ་དང་། ཉིན་གུང་ཚོུད་ ༡༢།༣༠ ནས་དབུ་འཛུགས་ཀྱིས་ཚོུད་ ༣།༠༠ བར་སྔོན་འགྲོིའི་བཀའ་ཆོས་བསྩལ་གནང་གི་ཡོད་རེད། དེ་རིང་ནས་དབུ་བཙུགས་མཛད་པའི་ཉིན་བཞིའི་ཆོས་འབྲེལ་དེ་ dalialama.com དང་། Kalachakra2017.net དྲ་གནས་གཉིས་ཀྱི་ཐོག་ལ་ཐད་སྲིང་གནང་གི་ཡོད་པ་མ་ཟད། དེའང་སྐད་རིགས་རྒྱ་སྐད་དང་ཧིན་དི། སོག་སྐད། དབྱིན་སྐད། ཀོ་རི་ཡ། ཨུ་རུ་སུ་སྐད། བོད་སྐད། ཝི་ཊ་ནམ་སྐད་བཅས་ཀྱི་ཐོག་གསུང་ཆོས་གསན་གཟིགས་ཞུ་རྒྱུ་ཡོད་པ་རེད།

གནས་མཆོག་རྡོ་རྗེ་གདན་དུ་ད་རེས་དུས་ཀྱི་འཁོར་དབང་ཆེན་ཐེངས་ ༣༤ པ་འདིའི་ཐོག་ལ་དུས་དབང་གོ་སྒྲིག་ཚོགས་ཆུང་གི་ངོས་ནས་ད་ལྟའི་ཆར་ཁྱོན་རྒྱལ་ཁབ་ཁག་ ༨༠ ལྷག་ནས་ཆོས་ཞུ་བ་འབུམ་གཉིས་འབྱོར་གྱི་ཡོད་པར་ཚོད་དཔག་གནང་འདུག་པ་དང་།  ཆོས་ཞུ་བ་དེ་དག་ཁྲོད་ནས་འབྲུག་དང་བལ་ཡུལ། རྒྱ་གར་གྱི་ཧི་མཱ་ལ་ཡའི་རི་རྒྱུད་ཁག་གཅིག་པོ་ནས་ཆོས་ཞུ་བ་ཁྲི་ཚོ་ཁ་ཤས་འབྱོར་འདུག། དེའང་ཐོག་མའི་འཆར་དུས་དབང་གོ་སྒྲིག་ཚོགས་ཆུང་གིས་ཧི་མཱ་ལ་ཡའི་རི་རྒྱུད་ནས་ཆེད་བཅར་ཞུས་པའི་ཆོས་ཞུ་བ་ཚོར་དམིགས་བསལ་གྱི་དཔུང་རྟགས་གནང་ནས་གསུང་ཆོས་ར་བའི་ནང་བཞུགས་གནས་ལོགས་སུ་གོ་སྒྲིག་ཞུས་ཡོད་ཀྱང་། ད་ལྟའི་ཆར་དམིགས་བསལ་གྱི་བཞུགས་གནས་གནང་པའི་ཤོང་ཚད་ལས་བརྒལ་བའི་ཆོས་ཞུ་བ་ཕེབས་ཡོད་པ་མ་ཟད། ཉིན་རེ་བཞིན་ཁུལ་དེ་དག་ནས་ཆོས་ཞུ་བ་མང་པོ་ཞིག་ཕེབས་མུས་ཡིན་སྟབས། དུས་དབང་གོ་སྒྲིག་ཚོགས་ཆུང་གིས་ཁོང་རྣམས་ཚེས་ ༢ ནས་བཟུང་དམིགས་བསལ་གྱི་དཔུང་རྟགས་བཞེས་མི་དགོས་པར་མི་མང་དཀྱུས་མ་ལྟར་ཕེབས་དགོས་སྐོར་ལམ་སྟོན་གནང་ཡོད་པ་རེད། འདི་ག་རླུང་འཕྲིན་ཁང་གིས་ད་རེས་ཧི་མཱ་ལ་ཡའི་རི་རྒྱུད་ཁག་ནས་ཆོས་ཞུ་བ་མང་པོ་ཞིག་ཕེབས་དང་ཕེབས་མུས་ཡིན་པར་བརྟེན། དེ་འདྲ་འབྱོར་དོན་གང་ཡིན་ཞིབ་དཔྱད་བྱེད་སྐབས་དང་པོ་བལ་ཡུལ་གྱི་ཤར་པ་དང་རྟ་དམག་སོགས་བལ་པོའི་ནང་པ་ཚོས་༸་གོང་ས་༸་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་གྱི་ཡོད་པ་དང་། གཉིས་པ་ལ་དྭགས་ཀྱི་ལུང་ཁུག་ཁག་ཅིག་ནས་ཀྱང་ཆོས་ཞུ་བ་དེ་སྔ་ལས་མང་བ་འབྱོར་ཡོད་པ་མ་ཟད། གསུམ་པ་བལ་ཡུལ་ཁུལ་དུ་ད་རེས་ཀྱི་དུས་འཁོར་དབང་ཆེན་དེ་དུས་དབང་མཐའ་མ་དེ་ཡིན་པར་དཀྲོག་གཏམ་ཞིག་ཁྱབ་པར་བརྟེན་ཆོས་ཞུ་བ་མང་པོ་ཕེབས་པའི་གནས་སྟངས་ཤིག་ཆགས་འདུག རྣམ་ཀུན་ཡིན་ན་ལ་དྭགས་ཁུལ་དུ་ད་ལྟའི་དུས་ཚོད་འདིའི་སྐབས་གཞུང་ལམ་ཁག་ལ་གངས་འབབ་སྟེ་འགྲོ་ལམ་འགག་པའི་གནས་སྟངས་ཆགས་ཀྱི་ཡོད་ཀྱང་། ད་བར་འགྲོ་ལམ་འགག་མེད་པ་དེས་ལ་དྭགས་ཀྱིི་ས་ཁུག་སྐྱོག་སྐྱོག་འདྲ་མིན་ནས་ཀྱང་ཆོས་ཞུ་བ་མང་པོ་ཕེབས་ཐུབ་ཡོད་པ་རེད། ད་ལན་དུས་དབང་ཐེངས་ ༣༤ པ་འདིའི་ཐོག་འབྲུག་དང་བལ་ཡུལ། རྒྱ་གར་གྱི་ཧི་མཱ་ལ་ཡའི་རི་རྒྱུད་གཞན་ཁག་ཅིག་ནས་ཕེབས་པའི་ཆོས་ཞུ་བའི་ཁོངས་སུ་དུས་འཁོར་དབང་ཆེན་ཐེངས་དང་པོ་ཞུ་མཁན་ཡང་མང་དག་ཞིག་ཕེབས་འདུག

རྒྱ་གར་གཞུང་གིས་རིང་མིན་ཕྱི་ཟླ་ ༣ པའི་ནང་རྒྱ་གར་གྱི་བྷི་ཧར་མངའ་སྡེའི་ནཱ་ལེནྡྲ་རྫོང་གི་ Rajgir གྲོང་ཁྱེར་ནང་དུ་འཚོགས་གཏན་ཁེལ་བའི་རྒྱལ་སྤྱིའི་ནང་པའི་ལྷན་ཚོགས་ཐོག་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་མཛད་རྒྱུར་ཆོག་མཆན་ཕུལ་ཡོད་པ་དང། དཔྱད་ཞིབ་པ་རྣམས་ཀྱིས་རྒྱ་གར་གཞུང་གིས་ད་ཆ་༸གོང་ས་༸སྐྱབས་མགོན་ཆེན་པོ་མཆོག་གི་ཐོག་འཛིན་པའི་བཞེངས་ཕྱོགས་ལ་འགྱུར་བ་བཏང་ནས་༸གང་ཉིད་མཆོག་ལ་ཆེས་མཐོང་སྔར་ལྷག་ཕུལ་བཞིན་པ་གསུངས་འདུག དེ་རིང་ཟླ་ ༡ ཚེས་ ༤ ཉིན་རྒྱ་གར་གྱི་ Indian Express གསར་ཁང་གིས་སྤེལ་བའི་གནས་ཚུལ་ལྟར་ན། ཉེ་ཆར་རྒྱ་ནག་གཞུང་གིས་དགག་བྱ་ལ་མ་ལྟོས་པར་རྒྱ་གར་གྱི་སྲིད་འཛིན་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་ཡོད་པ་དང་། དེ་བཞིན་༸གང་ཉིད་མཆོག་རིང་མིན་ཟླ་ ༣ པའི་ནང་ཨ་རུ་ནཱ་ཅལ་ཁུལ་དུ་ཆིབས་བསྒྱུར་མཛད་རྒྱུར་ཆོག་མཆན་ཕུལ་བ་མ་ཟད། གཞན་ཡང་རིང་མིན་ཕྱི་ཟླ་ ༣ ཚེས་ ༡༧ ནས་ ༡༩ བར་བྷི་ཧར་མངའ་སྡེའི་ནཱ་ལེནྡྲ་རྫོང་གི་ Rajgir གྲོང་ཁྱེར་ནང་དུ་ཚོགས་རྒྱུའི་རྒྱལ་སྤྱིའི་ནང་པའི་ལྷན་ཚོགས་ཐོག་༸གང་ཉིད་མཆོག་ཆིབས་བསྒྱུར་མཛད་རྒྱུར་ཆོག་མཆན་ཕུལ་ཡོད་པ་ལུང་འདྲེན་གནང་པ་དང་འབྲེལ། ད་སྐབས་རྒྱ་གར་གཞུང་ཕྱོགས་ནས་སྲིད་བྱུས་དེར་བསྐྱར་ཞིབ་ཀྱིས་༸གོང་ས་མཆོག་ལ་སྔར་ལས་ལྷག་པའི་ཆེས་མཐོང་ཕུལ་བཞིན་ཡོད་སྐོར་གསུངས་ཡོད་པ་རེད། བོད་པའི་སྤྱི་ཚོགས་ཁྲོད་ནས་རྒྱ་གར་གཞུང་གི་བཞེངས་ཕྱོགས་དེར་བསྔགས་བརྗོད་ཞུ་བཞིན་ཡོད་པ་དང་། རྒྱ་གར་གྱི་ཐབས་བྱུས་དང་འབྲེལ་བའི་སྡེ་ཚན་མང་པོ་ཞིག་གིས་ཀྱང་རྒྱ་གར་གཞུང་གི་ངོས་ནས་རྒྱ་ནག་ལ་ཁོང་ཁྲོ་སློང་མིན་ལ་འཛེམས་རྒྱུ་མེད་སྐོར་འགྲེལ་བརྗོད་གནང་འདུག ཆེས་མཐོའི་མི་སྣ་གཅིག་གིས་རྒྱ་གར་གཞུང་གི་ངོས་ནས་༸གོང་ས་མཆོག་ནི་རྒྱ་གར་གྱི་གཅེས་ནོར་ཡིན་པ་ལས། རྡོག་ཁྲེས་འཕར་མ་ཞིག་མིན་པ་ད་སྐབས་གོ་དོན་རྟོགས་ཐུབ་པ་བྱུང་ཡོད་སྐོར་འགྲེལ་བརྗོད་གནང་པ་མུང་འདྲེན་གནང་འདུག དེའི་ཁྲོད་ཉེ་ཆར་སོག་པོའི་གཞུང་གིས་རྒྱ་ནག་གི་གནོན་ཤུགས་འོག་༸གོང་ས་མཆོག་ཕྱིན་ཆད་རྒྱལ་ཁབ་དེའི་ནང་གདན་ཞུ་གནང་རྒྱུ་མིན་སྐོར་བརྗོད་ཡོད་ཀྱང་། དེའི་བར་ན་རྒྱ་གར་གཞུང་གིས་༸གོང་ས་མཆོག་ལ་མངོན་གསལ་དོད་པོས་གཞུང་ཕྱོགས་ནས་ཆེས་མཐོང་ཕུལ་བ་མ་ཟད། འདས་པའི་ལོ་ངོ་ ༡༧ ནས་བཀག་པའི་དཔལ་༸རྒྱལ་བ་ཀརྨ་པ་རིན་པོ་རིན་པོ་ཆེ་མཆོག་ལའང་དེ་སྔ་དང་མི་འདྲ་བའི་འགྲུལ་བསྐྱོད་ཀྱི་རང་དབང་ཤུགས་ཆེ་ཕུལ་བའི་ཁྲོད་རིང་མིན་ Sikkim མངའ་ཁུལ་དུ་ཆིབས་བསྒྱུར་གནང་རྒྱུའི་ཆོག་མཆན་ཕུལ་ཡོད་པ་གསུངས་འདུག རྩ་བའི་འདི་ལོའི་ཕྱི་ཟླ་ ༣ པའི་ནང་ནཱ་ལེནྡྲར་འཚོགས་གཏན་ཁེལ་བའི་རྒྱལ་སྤྱིའི་ནང་པའི་ལྷན་ཚོགས་དེ་རྒྱ་གར་གྱི་རིག་གཞུང་ལྷན་ཁང་གིས་གོ་སྒྲིགས་གནང་གི་འདུག་པ་དང། དེའང་དུས་རབ་ ༢༡ ནང་དུ་ནང་ཆོས་སམ Buddhism in the 21st Century ཞེས་པའི་མིང་བྱང་འོག་ཕྱི་ཟླ་ ༣ ཚེས་ ༡༧ ནས་ ༡༩ བར་ཚོགས་ཀྱི་ཡོད་པ་དང། དེའི་ཐོག་༸གོང་ས་མཆོག་གིས་དབུས་པའི་རྒྱ་གར་དང་ཤྲི་ལངྒ། ཐེ་ལེནཌ་དང་ བྷར་མ།  སོགས་ནས་ནང་པའི་བླ་ཆེན་མང་དག་ཞིག་ནས་མཉམ་ཞུགས་གནང་གི་ཡོད་པ་དང་། དེ་བཞིན་རྒྱལ་སྤྱིའི་གློག་བརྙན་འཁྲབ་སྟོན་པ་གྲགས་ཅན་ Richard Gere ལགས་ཀྱང་མཉམ་ཞུགས་གནང་སྲིད་པ་རེད་འདུག རྒྱ་གར་གཞུང་གི་ངོས་ནས་ད་ལན་༸གོང་ས་མཆོག་ལ་ནང་པའི་ལྷན་ཚོགས་ཐོག་དབུ་བཞུགས་མཛད་རྒྱུའི་ཆོག་མཆན་ཕུལ་བ་དེ་ནི་༸གོང་ས་མཆོག་གིས་རྣམ་ཀུན་༸གང་ཉིད་མཆོག་  Son of India འམ་རྒྱ་གར་གྱི་བུ་ཞིག་ཡིན་པ་དང། མགོན་པོ་༸གང་ཉིད་མཆོག་ལ་སྐུ་ཡོན་གང་བྱུང་བ་དེ་དག་ཆ་ཚང་དཔལ་ནཱ་ལེནྡྲའི་མཁས་པ་རྣམས་ཀྱི་སྐུ་དྲིན་ཉག་གཅིག་ཡིན་ཅེས་གསུངས་པར་ལེགས་སྐྱེས་ཕུལ་བ་ལྟ་བུ་ཡིན་སྐོར་གསུངས་ཡོད། Indian Express གསར་ཁང་གིས་གསུངས་པར་གཞུགས་ཚེ། ཕྱི་ལོ་ ༢༠༡༧ ལོ་འདིའི་ནང་རྒྱ་ནག་ཙམ་མ་ཟད་ རྒྱ་གར་གཞུང་ནས་ཀྱང་རང་ཉིད་ཀྱི་སྟོབས་ཤུགས་ངོམ་རྒྱུའི་ལོ་ཞིག་བཟོ་རྩིས་གནང་གི་ཡོད་པ་དང་། ནང་པའི་ཆོས་དེ་ཐོག་མ་རྒྱ་གར་ནས་དར་བ་ཞིག་ཡིན་སྟབས། དེ་རྒྱ་གར་གྱི་བཟང་ཕྱོགས་ཀྱི་སྟོབས་ཤུགས་ཤིག་ཆགས་དགོས་ངེས་ཡིན་པ་གསུངས་འདུག

གནས་མཆོག་རྡོ་རྗེ་གདན་དུ་ད་རེས་དུས་འཁོར་དབང་ཆེན་ཐེངས་ ༣༤ པ་འདིའི་ཐོག་ལ་འཛམ་གླིང་ས་ཕྱོགས་གང་ས་ནས་ཆོས་ཞུ་བ་ཁྲི་ཚོ་དུ་མ་རིམ་བཞིན་འབྱོར་མུས་ཡིན་པ་དང་། རྒྱལ་ཁབ་འདྲ་མིན་ནས་ཆེད་བཅར་ཞུས་པའི་ཆོས་ཞུ་བ་དེ་དག་ལས་འགའ་ཞིག་གནམ་གྲུ་དང་། རླངས་འཁོར། མེ་འཁོར། སྤྱི་སྤྱོད་རླངས་འཁོར་ལ་སོགས་པའི་བརྒྱུད་ནས་འགྲུལ་བཞུད་གནང་སྟེ་ཕེབས་ཡོད་ཀྱང་། འབྲུག་དང་བལ་ཡུལ་སོགས་ས་མཚམས་ཁག་ནས་ཕེབས་པའི་ཆོས་ཞུ་བ་མང་དག་ཞིག་ཉིན་གྲངས་མང་པོའི་རིང་གོམ་པ་བརྒྱབ་ནས་ཕེབས་ཡོད་པ་མ་ཟད། དེ་རྗེས་མེ་འཁོར་དང་རླངས་འཁོར་སོགས་བརྒྱུད་ནས་འགྲུལ་བཞུད་གནང་དགོས་ཀྱི་ཡོད་པ་རེད་འདུག དེ་བཞིན་ཐེངས་འདིའི་དུས་འཁོར་དབང་ཆེན་ཐོག་བལ་བོད་ས་མཚམས་གློ་སྨོན་ཐང་ཁུལ་ནས་ཀྱང་ཆོས་ཞུ་བ་མི་གྲངས་ ༢༠ ཙམ་འབྱོར་འདུག་པ་དང་། དེ་དག་ཚང་མ་དོ་སྐྱེལ་རླངས་འཁོར་ནང་ཉིན་གྲངས་གཉིས་ཙམ་རིང་འགྲུལ་བཞུད་གནང་པ་དང་དེ་རྗེས་སྤྱི་སྤྱོད་རླངས་འཁོར་སོགས་འགྲིམས་ནས་ཕེབས་འདུག གཞི་རྩའི་ཐེངས་འདིའི་དཔལ་དུས་ཀྱི་འཁོར་ལོའི་དབང་ཆེན་ཐོག་འབྲུག་དང་བལ་ཡུལ་གཉིས་ཀྱིས་གཙོས་རྒྱ་གར་གྱི་ཧི་མཱ་ལ་ཡའི་རི་རྒྱུད་ཁག་ནས་ཆོས་ཞུ་བ་བཅར་མཁན་གྱི་གྲངས་འབོར་དེ་དུས་དབང་གོ་སྒྲིག་ཚོགས་ཆུང་ནས་ཚོད་དཔག་གནང་པ་ལས་ཆེས་བརྒལ་ནས་ཕེབས་ཡོད་སྟབས། དུས་དབང་གོ་སྒྲིག་ཚོགས་ཆུང་གིས་ཧི་མཱ་ལ་ཡའི་རི་རྒྱུད་ནས་ཆེད་བཅར་ཞུས་པའི་ཆོས་ཞུ་བ་ཚོར་དམིགས་བསལ་གྱི་དཔུང་རྟགས་གནང་ནས་གསུང་ཆོས་ར་བའི་ནང་བཞུགས་གནས་ལོགས་སུ་གོ་སྒྲིག་ཞུས་ཡོད་ཀྱང་། ད་ལྟའི་ཆར་དམིགས་བསལ་གྱི་བཞུགས་གནས་གནང་པའི་ཤོང་ཚད་ལས་བརྒལ་བའི་ཆོས་ཞུ་བ་ཕེབས་ཡོད་པར་བརྟེན།  དུས་དབང་གོ་སྒྲིག་ཚོགས་ཆུང་གིས་ཁོང་རྣམས་དེ་རིང་ནས་བཟུང་དམིགས་བསལ་གྱི་དཔུང་རྟགས་བཞེས་མི་དགོས་པར་མི་མང་དཀྱུས་མ་ལྟར་ཕེབས་དགོས་སྐོར་ལམ་སྟོན་གནང་ཡོད་པ་རེད། གནས་ཚུལ་ཤེས་རྟོགས་བྱུང་བར་གཞིགས་ཚེ། ཁ་སང་ཟླ་ ༡ ཚེས་ ༢ བར་ཧི་མཱ་ལ་ཡའི་རི་རྒྱུད་ནས་དངོས་སུ་ཕེབས་པའི་ཆོས་ཞུ་བའི་གྲངས་འབོར་དེ་ཆིག་ཁྲི་ལྷག་བྱུང་འདུག

༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་དུས་ཀྱི་འཁོར་ལོའི་དབང་ཆེན་གོ་སྒྲིག་གནང་མཁན་བོད་མིའི་སྒྲིག་འཛུགས་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་བསྩལ་ཐོབ་སྟེ་༸གོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་དབུ་འཛུགས་མཛད་སོང་། དེ་རིང་ཕྱི་ལོ་ ༢༠༡༧ ཟླ་ ༡ ཚེས་ ༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་གནས་མཆོག་རྡོ་རྗེ་གདན་དུ་འཛམ་གླིང་ཡུལ་གྲུ་འདྲ་མིན་ནས་ཆེད་བཅར་ཞུས་པའི་ཕྱི་ནང་གི་དད་ལྡན་ཆོས་ཞུ་བ་ཆིག་འབུམ་བརྒལ་བར་དཔལ་དུས་འཁོར་དབང་ཆེན་ཐེངས་ ༣༤ པ་དབུ་འཛུགས་བསྐྱངས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་དུས་འཁོར་གྱི་གསུང་ཆོས་ར་བའི་བཞུགས་ཁྲིར་༸ཞབས་སོར་བདེ་བར་འཁོད་གྲུབ་མཚམས་༸གོང་ས་མཆོག་གིས་དེར་འདུས་ཕྱི་ནང་གི་དད་ལྡན་ཆོས་ཞུ་བ་རྣམས་ལ་སྔོན་འགྲོའི་བཀའ་སློབ་སྩལ་དོན། ཆོས་ཞུ་བ་ཚོས་ད་ལན་གནས་འདིར་དུས་འཁོར་དབང་ཆེན་ཞུ་ཟིན་རྗེས་རང་ཉིད་ཀྱི་མི་ཚེར་འགྱུར་བ་ཕྱིན་པ་ཞིག་བྱེད་དགོས་པ་ལས། དེ་མིན་རང་རྒྱུད་ལ་འགྱུར་ལྡོག་གང་ཡང་མ་ཕྱིན་ཚེ་དུས་འཁོར་དབང་ཆེན་ཞུ་བར་བསླེབས་པ་དེ་དཀའ་ལས་རེད་ཅེས་བཀའ་བསྩལ་སོང་། དེ་བཞིན་༸གོང་ས་མཆོག་གིས་ཆོས་ཞུ་བ་ཚོ་ད་རེས་ནང་པའི་གནས་མཆོག་རྡོ་རྗེ་གདན་འདིར་དོན་གཉེར་ཆེན་པོས་དུས་འཁོར་དབང་ཆེན་ཞུ་བར་ཆེད་བཅར་གནང་པ་ཞིག་ཡིན་སྟབས། གཙོ་ཆེ་ཤོས་དེ་ནི་ཆོས་ཞུ་བ་ཚོའི་ངོས་ནས་ཆོས་ཆོས་སུ་སོང་བ་ཞིག་བྱེད་དགོས་གལ་ཡིན་པར་བཀའ་སྩལ་གནང་པ་མ་ཟད། ལྷག་པར་དུ་འཛམ་གླིང་འདིའི་སྟེང་ཡོད་པའི་ནང་པ་ཙམ་མ་ཟད། ཆོས་ལུགས་གཞན་གང་ཞིག་ཡིན་ཀྱང་། ཆོས་ལུགས་དེ་དག་གི་རྗེས་འབྲང་པ་ཚོས་ཆོས་ལུགས་དེའི་རྗེས་འབྲང་པའི་མིང་ཙམ་འཛིན་པ་མིན་པར། གཙོ་བོ་ཆོས་ལུགས་དེ་དག་གི་སྟོན་པ་དེ་ཉིད་ནས་བཀའ་གང་བསྩལ་བ་དེ་ལག་བསྟར་འཁེལ་བ་ཞིག་བྱེད་དགོས་གལ་ཡིན་སྟབས། དེ་འདྲ་ཞིག་བྱུང་ཚེ་དོན་དངོས་ཀྱི་ཆོས་བྱེད་པའི་དགོས་དོན་གྲུབ་པ་དང་ཆོས་ཆོས་སུ་སོང་བ་ཞིག་བྱུང་བ་རེད་ཅེས་བཀའ་ནན་བསྩལ་ཡོད། ༸གང་ཉིད་མཆོག་གིས་ད་དུང་ཚེ་འདིར་མི་ལུས་ཐོབ་པ་དང་ཆོས་རབ་ཏུ་རྣམ་པར་འབྱེད་པའི་རྣམ་དཔྱོད་དེ་ལྟ་བུ་ཞིག་ཡོད་པ་དེ་སྡིག་པ་བསོག་པའི་རྒྱུ་རྐྱེན་ལ་མ་འགྲོ་བར་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པའི་རྒྱུར་འགྲོ་བ་ལ་བེད་སྤྱོད་ཐུབ་པ་ཡིན་ན་དངོས་འབྲེལ་མཁས་པ་རེད་ཅེས་བཀའ་བསྩལ་བ་མ་ཟད། ལྷག་དོན་མགོན་པོ་མཆོག་གིས་ཆོས་ཞུ་བ་ཚོར་ཉིན་རེའི་མི་ཚེའི་ནང་དུ་ལུས་ངག་ཡིད་གསུམ་གྱི་སྤྱོད་ལམ་ལ་འགྱུར་བ་ཞིག་གཏོང་བར་ཕན་ཐོགས་ཆེ་ཤོས་དེ་ཐབས་བྱང་ཆུབ་ཀྱི་སེམས་དང་གྲོགས་སྟོང་ཉིད་རྟོགས་པའི་ལྟ་བ་གཉིས་ཡིན་ཅིང་། དེ་ལྟར་སྒོམ་པའི་འབྲས་བུ་ལ་ལུས་བདེ་བ་དང་སེམས་སྐྱིད་པ། བར་ཆད་སེལ་བ། དེ་བཞིན་ཚེ་སྒྲུབ་ཀྱང་དེ་ཉིད་ཡིན་པ་དང་། ཚེ་ཕྱི་མ་ལའང་མི་ལུས་བཟང་པོ་གཅིག་ཐོབ་ངེས་ཡིན་པ་རེད་ཅེས་བཀའ་བསྩལ་མཛད་ཡོད། དེ་རིང་སྔ་དྲོ་སྔོན་འགྲོའི་ཆོས་འབྲེལ་ལེགས་པར་གྲུབ་མཚམས་སུ་༸གོང་ས་མཆོག་གིས་ཐེངས་འདིའི་དུས་དབང་སྐབས་༸གང་ཉིད་མཆོག་ནས་བསྩལ་རྒྱུའི་སྔོན་འགྲོའི་བཀའ་ཆོས་དེ་སྤྱོད་འཇུག་ཆེན་མོ་དང་སྒོམ་རིམ་བར་པ་གཉིས་ཀྱི་གཞུང་ཡིན་པ་བཀའ་སྩལ་དང་སྦྲགས། དེ་རྗེས་ཉིན་དང་པོའི་ཆོས་འབྲེལ་སློབ་མ་རྗེས་འཛིན་གྱི་བཀའ་ཆོས་བཀྲིན་བསྐྱངས་ཡོད་པ་རེད། རྩ་བའི་དུས་འཁོར་དབང་ཆེན་གྱི་མཛད་རིམ་ལྟར་གཞིགས་ན། སང་ཉིན་ཟླ་ ༡ ཚེས་ ༣ དང་ ༤ བཅས་ལ་ས་ཆོག་དང་རྡུལ་མཚོན་གྱི་དཀྱིལ་འཁོར་འབྲི་བཞེངས་གནང་རྒྱུ་དང་། ཚེས་ ༥ ནས་ ༨ བར་མགོན་པོ་༸གང་ཉིད་མཆོག་གིས་སྔོན་འགྲོ་ཆོས་འབྲེལ་དུ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོ་དང་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་གསུང་ཆོས་བསྩལ་རྒྱུ་ཡིན་པ་རེད། དེ་རྗེས་ཚེས་ ༩ ཉིན་དཀྱིལ་འཁོར་བརྒྱན་ཅིང་མཆོད་གར་དང་། ཚེས་ ༡༠ ཉིན་བཀའ་དབང་སྔོན་འགྲོ་སློབ་མ་སྟ་གོན། ཚེས་ ༡༡ ནས་ ༡༣ བར་དུས་འཁོར་དབང་ཆེན་གྱི་བཀའ་དབང་དངོས་གཞི་བསྩལ་རྒྱུ། མཐར་ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་མི་འཇིགས་རྡོ་རྗེའི་ཁམས་སུ་བརྟན་ཕྱིར་བརྟན་བཞུགས་བསྟར་འབུལ་ཞུ་རྒྱུ་དང་ཚེ་དབང་བསྩལ་རྒྱུ་བཅས་ཀྱི་མཛད་རིམ་བང་སྒྲིག་ཡོད་པ་རེད། ༸གོང་ས་མཆོག་ནས་བསྩལ་རྒྱུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པའི་ཆོས་འབྲེལ་ཆ་ཚང་ dalialama.com དང་། kalachakra2017.net དྲ་ཚིགས་གཉིས་ཀྱི་ཐོག་ཐད་གཏོང་གནང་གི་འདུག

དེ་རིང་ཟླ་ ༡༢ ཚེས་ ༣༡ ཉིན་གནས་མཆོག་རྡོ་རྗེ་གདན་ཁུལ་གྱི་རིས་མེད་ཆོས་ལུགས་གྲོགས་པོའི་མཐུན་ཚོགས་ཀྱིས་ཇི་ལྟར་གསོལ་འདེབས་ཞུས་དོན་ལྟར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཉིན་རྒྱབ་ཏུ་དུས་དབང་ཆོས་ར་བར་གྷ་ཡ་ཁུལ་དུ་རྟེན་གཞི་བྱས་པའི་རྒྱ་གར་གྱི་སློབ་གྲྭ་ཉི་ཤུ་རྩ་ལྔའི་དགེ་ལས་སློབ་ཕྲུག་སྟོང་ཕྲག་བརྒལ་བར་བདེ་སྐྱིད་དང་ལྡན་པའི་མི་ཚེའི་སྙིང་པོ་སྐོར་བཀའ་སློབ་བསྩལ་ཡོད་པ་རེད། སྐབས་དེར་༸གོང་ས་མཆོག་གིས་ཆེས་ཐོག་མར་དེ་རིང་གནས་ཁྱད་པར་ཅན་འདིར་སློབ་ཕྲུག་མང་པོ་ཞིག་འཛོམས་སར་༸གང་ཉིད་མཆོག་གིས་བཀའ་སློབ་བསྩལ་རྒྱུའི་གོ་སྐབས་བཟང་པོ་བྱུང་བར་དགའ་འོས་པར་ངོས་བཞེས་ཀྱིས་འཚམས་འདྲི་མཛད་ཡོད་པ་དང་། འགྲོ་བ་མིའི་གཅིག་གྱུར་གྱི་གཞི་རྩ་དེའི་ཐོག་བདེ་སྐྱིད་དང་ལྡན་པའི་འཛམ་བུ་གླིང་ཞིག་ཡོང་ཐབས་གནང་དགོས་སྐོར་དང་། ལྷག་དོན་དུས་རབས་ ༢༡ པའི་གཞོན་སྐྱེས་ཚོར་དམིགས་བསལ་གྱི་འོས་འགན་ཞིག་ཡོད་པར་བཀའ་བསྩལ་མཛད་ཡོད་པ་རེད། མགོན་པོ་༸གང་ཉིད་མཆོག་གིས་མུ་མཐུད་གསུངས་པར་ངོས་རང་ད་ལྟ་ལོ་ ༨༡ ལ་སྤེབས་ཡོད་པ་དང་། ངོས་ལ་ད་ལྟའི་མི་ཚེ་ཧྲིལ་པོ་འདིའི་ནང་དཀའ་ངལ་མང་དག་ཞིག་འཕྲད་ཡོད་ཀྱང་། རྒྱལ་ཁབ་འདྲ་མིན་ནང་བསྐྱོད་རྒྱུའི་གོ་སྐབས་བྱུང་བ་དེའི་བརྒྱུད་ངོས་ལ་ཡིད་ཆེས་བརྟན་པོ་ཞིག་རྙེད་ཡོད་པ་ནི་ངལ་བ་གང་ཞིག་འཕྲད་པ་དེ་སེལ་བར་སོ་སོ་རང་ཉིད་ལ་རག་ལུས་ཡོད། ང་ཚོ་ཚང་མ་འགྲོ་བ་མི་གཅིག་མཚུངས་ཡིན་པ་དང་འཛམ་བུ་གླིང་འདི་བདེ་སྐྱིད་དང་ལྡན་པ་ཞིག་ཡོང་བར་ལྡེ་མིག་ལྟ་བུ་དེ་གཅིག་གྱུར་གྱི་འདུ་ཤེས་འཛིན་རྒྱུ་དེ་ཡིན་པར་ལམ་སྟོན་བཀའ་སློབ་བསྩལ་ཡོད་པ་རེད། ཁྱད་པར་དུ་༸གོང་ས་མཆོག་གིས་སློབ་ཕྲུག་ཁྱེད་རང་ཚོ་མ་འོངས་པར་འཛམ་བུ་གླིང་འདི་བདེ་སྐྱིད་དང་ལྡན་པ་ཞིག་བཟོ་རྒྱུའི་འགན་ཡོད་པ་དང་། དེ་ལྟར་ཡོང་བར་ནང་སེམས་ཀྱི་ཞི་བདེ་དེ་གཙོ་བོ་ཆགས་ཡོད་སྟབས། ནང་སེམས་ཀྱི་ཞི་བདེ་ཡོང་བར་བྱམས་དང་སྙིང་རྗེ་གཉིས་པོ་མེད་དུ་མི་རུང་བ་ཞིག་ཡིན་སྐོར་སོགས་ལམ་སྟོན་མཛད་ཡོད་པ་རེད། དེ་བཞིན་༸གང་ཉིད་མཆོག་གིས་དེང་སྐབས་རྒྱ་གར་གྱི་ཤེས་ཡོན་སྡེ་ཚན་ཁག་ཅིག་གིས་ཆོས་དང་མ་འབྲེལ་བའི་བཟང་སྤྱོད་ཀྱི་སློབ་ཚན་སློབ་ཁྲིད་གནང་ཐབས་གནང་བཞིན་པར་ཡི་རངས་བསྔགས་བརྗོད་གནང་ཡོད་པ་ཟད། ཤེས་ཡོན་ནི་མི་ཚེ་དོན་སྙིང་ལྡན་པ་ཞིག་ཡོང་བར་བྱེད་པའི་ཐབས་ལམ་ཞིག་ཡིན་པ་དང་། ཤེས་ཡོན་གྱི་ལམ་ལུགས་དེའི་འོག་ནས་སྤྱི་ཚོགས་ནང་མི་ཚེའི་དོན་སྙིང་སྐོར་གནས་ཚུལ་ཁྱབ་སྤེལ་ཐུབ་ཀྱི་ཡོད་པའི་ལམ་སྟོན་མཛད་ཡོད། གཞི་རྩའི་མ་གྷ་ད་གཙུག་ལག་སློབ་གཉེར་ཁང་དང་། གྷ་ཡ་མཐོ་རིམ་སློབ་གྲྭ།   New Enlightenment བཅས་ཀྱིས་༸གོང་ས་མཆོག་གི་བཀའ་སློབ་གོ་སྒྲིག་ཞུ་དོན་ནི་བྱམས་བརྩེ་ལྡན་པའི་སྤྱི་ཚོགས་ཤིག་ཡོང་བར་མི་རབས་གཞོན་པ་ཚོ་སྐྱེད་སྲིང་གནང་རྒྱུ་དེ་ཡིན་པ་རེད། ༸གོང་ས་མཆོག་ནས་བྷི་ཧར་མངའ་སྡེའི་སློབ་ཕྲུག་སྟོང་ཕྲག་བརྒལ་བར་བདེ་སྐྱིད་དང་ལྡན་པའི་མི་ཚེའི་སྙིང་པོ་སྐོར་བཀའ་སློབ་བསྩལ་རྒྱུའི་མཛད་རིམ་ལེགས་པར་གྲུབ་བསྟུན་ས་གནས་དེར་རྟེན་གཞི་བྱས་པའི་སྔ་འགྱུར་རྙིང་མའི་དཔལ་ཡུལ་ཐུབ་བསྟན་བཤད་སྒྲུབ་ཆོས་འཁོར་དར་རྒྱས་གླིང་གསར་བཞེས་ལེགས་གྲུབ་བྱུང་བའི་མཛད་སྒོར་དབུ་བཞུགས་མཛད་ཡོད་པ་རེད། རྩ་བའི་དེ་རིང་ཉིན་རྒྱབ་ཏུ་༸གོང་ས་མཆོག་དུས་དབང་གསུང་ཆོས་ར་བར་ཆིབས་བསྒྱུར་མ་གནང་གོང་ལ་སློབ་གྲྭ་དེ་དག་གི་སློབ་ཕྲུག་སྐུ་ཚབ་ཚོས་རིག་གཞུང་འཁྲབ་སྟོན་དང་། བརྗོད་གཞི་འདྲ་མིན་ཐོག་གཏམ་བཤད་གནང་པ་མ་ཟད། ཁག་ཅིག་གིས་རྒྱ་གར་དང་འབྲེལ་བ་སྦྱར་ནས་བོད་ཀྱི་ཆབ་སྲིད་གནད་དོན་སྐོར་ཡང་གསུངས་ཡོད་པ་རེད།