རྒྱ་ནག

རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་ནས་རྒྱ་གཞུང་གི་སྙན་ཐོར་བསྐྱར་ཞིབ་དང་འབྲེལ་ནས་ཡུལ་དེའི་ནང་གི་མི་རིགས་དབྱེ་འབྱེད་དང་འབྲེལ་བའི་གནད་དོན་ཐོག་དྲི་བ་ཁག་ཅིག་གནང་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ཕེལ་རྒྱས་ལྟེ་གནས་ཁང་གིས་སྤེལ་བའི་གནས་ཚུལ་ནང་གསལ་ལྟར་ན། མི་རིགས་དབྱེ་འབྱེད་ཀྱི་རྣམ་པ་འདྲ་མིན་རྩ་འགོག་དང་འབྲེལ་བའི་རྒྱལ་ཚོགས་ཀྱི་ཁྲིམས་སྒྲིག་ལག་བསྟར་ཐོག་དཔྱད་ཞིབ་གནང་མཁན་གྱི་ཚོགས་ཆུང་ནས་དེ་སྔོན་རྒྱ་གཞུང་གིས་མི་རིགས་དབྱེ་འབྱེད་དང་འབྲེལ་བའི་ལྷན་ཚོགས་ཐེངས་ ༩༦ ཐོག་ཕུལ་བའི་སྙན་ཐོ་དེར་བསྐྱར་ཞིབ་གནང་རྗེས་ཉེ་ལམ་ཕྱི་ཟླ་ ༦ ནང་རྒྱ་གཞུང་ལ་བོད་གཙོ་གྱུར་གྲངས་ཉུང་མི་རིགས་ཀྱི་གནད་དོན་དང་འབྲེལ་བའི་དྲི་བ་ཁག་ཅིག་གནང་ཡོད་པ་རེད། རྒྱལ་ཚོགས་ཀྱི་མི་རིགས་དབྱེ་འབྱེད་ཀྱི་ཚོགས་ཆུང་ནང་མི་རིགས་དབྱེ་འབྱེད་ཐོག་གི་ཆེད་ལས་མི་སྣ་ ༡༨ ཡོད་པ་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྐུ་ཚབ་ནས་རིང་མིན་ཟླ་ ༨ ཚེས་ ༡༠ དང་ ༡༣  བར་ཚོགས་ཆུང་དེའི་མདུན་དུ་བཅར་ནས་དྲི་བ་ཁག་ཅིག་ལ་ལན་འདེབས་གསལ་བཤད་བྱ་རྒྱུ་ཡིན་པ་རེད། ད་ལན་རྒྱལ་ཚོགས་ཀྱིས་རྒྱ་གཞུང་ལ་ཕུལ་བའི་དྲི་བ་དེ་དག་མང་ཆེ་བ་དེ་སྔ་ནས་གནང་བའི་རྒྱུན་ལྡན་གྱི་དྲི་བ་ཆགས་ཀྱི་ཡོད་ཀྱང་ཐེངས་འདིའི་དྲི་བའི་ཁོངས་སུ་བོད་ནང་གི་འགྲོ་བ་མིའི་ཐོབ་ཐང་གཙོ་བཟུང་ཐོག་སོག་པོ་དང་ཡུ་གུར་གྲངས་ཉུང་མི་རིགས་རྣམས་ཀྱི་སྤྱི་མང་དང་ཆབ་སྲིད་ཐོབ་ཐང་བཅས་ཀྱི་སྐོར་དྲི་བ་ཕུལ་ཡོད་པ་མ་ཟད། ལྷག་དོན་གྲངས་ཉུང་མི་རིགས་དེ་དག་གི་ཆོས་དད་རང་དབང་དང་སྨྲ་བརྗོད་རང་དབང་། འདུ་འཛོམས་རང་དབང་སོགས་སྲུང་སྐྱོབ་གནང་རྒྱུ་ཐད་རྒྱ་ནག་གཞུང་ཕྱོགས་ནས་ཐབས་ཤེས་གང་དང་གང་གནང་ཡོད་མེད་སྐོར་དང་། བོད་མི་གཙོས་གྲངས་ཉུང་མི་རིགས་རྣམས་ལ་གང་བྱུང་དུ་དོ་དམ་དང་། བཀག་ཉར་འོག་འདས་གྲོངས་སུ་གྱུར་བའི་གནད་དོན། དེ་བཞིན་གྲངས་ཉུང་མི་རིགས་རྣམས་ཀྱི་ས་ཞིང་བཙན་འཕྲོག་བྱས་པར་གུན་གསབ་སྤྲོད་མེད་པ་སོགས་ཀྱི་གནད་དོན་མང་དག་ཐོག་དྲི་བ་ཕུལ་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་རྒྱ་གཞུང་གིས་ད་བར་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་དྲི་བ་ཁག་ལ་ལན་འདེབས་རྩ་བ་ནས་གནང་མེད་པར་སྐྱོན་བརྗོད་དང་འབྲེལ། རྒྱ་གཞུང་ནས་ངེས་པར་དུ་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གིས་བོད་གཙོས་པའི་གྲངས་ཉུང་མི་རིགས་ཀྱི་གནད་དོན་ཐོག་ཕུལ་བའི་དྲི་བ་ཁག་ལ་དམིགས་བསལ་སེམས་འཚབ་བྱས་ཐོག་རྒྱལ་ཚོགས་དང་མཉམ་ལས་གནང་རྒྱུའི་དུས་ལ་བབ་ཡོད་སྐོར་གསུངས་སོང་། ལྷག་དོན་རྒྱ་གཞུང་དེ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཞིག་ཡིན་པའི་ཆ་ནས་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་འབྲུ་དོན་ཁག་ལ་བརྩི་བཀུར་ཞུས་ཐོག་ཚོགས་ཆུང་དེས་ཕུལ་བའི་དྲི་བ་ཁག་ལ་ལན་འདེབས་གསལ་པོ་གནང་དགོས་པའི་འོས་འགན་ཡོད་སྐོར་ནན་བརྗོད་གནང་འདུག གཞི་རྩའི་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་ལ་ད་བར་རྒྱལ་སྤྱིའི་ཁྲོད་ཀྱི་སྤྱི་མང་ཚོགས་པ་འདྲ་མིན་ནས་བོད་མི་གཙོ་གྱུར་གྲངས་ཉུང་མི་རིགས་རྣམས་རྒྱ་གཞུང་གིས་བཙན་གནོན་འོག་སོ་སོའི་མི་རིགས་ཀྱི་ཆོས་དང་རིག་གཞུང་། སྐད་ཡིག་སོགས་བེད་སྤྱོད་བྱ་རྒྱུའི་ཐད་དཀའ་ངལ་ཆེན་པོ་འཕྲད་མུས་ཡིན་པའི་དངོས་ཡོད་གནས་སྟངས་འཁོད་པའི་གནས་ཚུལ་མང་པོ་ཞིག་མགོ་འབུལ་ཞུས་ཡོད་པ་མ་ཟད། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས་ཀྱང་རྒྱལ་ཚོགས་ཀྱི་ཚོགས་ཆུང་དེར་རྒྱ་གཞུང་གིས་བོད་མི་ཞིང་འབྲོག་རྣམ་པའི་ས་ཞིང་བཙན་འཕྲོག་གིས་ཁོང་ཚོར་གུན་གསབ་སྤྲད་ཀྱི་མེད་པ་དང་ལྷག་དོན་རྒྱའི་དོ་དམ་བཀག་ཉར་འོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེས་གཙོས་པའི་ད་བར་བོད་མི་བདུན་ཙམ་འདས་གྲོངས་གྱུར་ཡོད་པ་སོགས་ཀྱི་གནས་ཚུལ་ཁག་ཅིག་མགོ་འབུལ་ཞུས་ཡོད་པ་རེད།

གཟའ་འཁོར་སྔོན་མའི་ཚེས་ ༢༥ ནས་ ༢༧ བར་ཁྱོན་ཉིན་གྲངས་གསུམ་རིང་རྒྱ་ནག་གི་སྲིད་བློན་ Li Keqiang རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁུལ་དུ་ཆགས་པའི་རྒྱལ་ས་ལྷ་ས་དང་ལྷོ་ཁ། དེ་བཞིན་ཉིང་ཁྲི་ས་ཁུལ་བཅས་སུ་གཞུང་འབྲེལ་བསྐྱོད་པ་དང་སྦྲགས། ས་གནས་བོད་རིགས་དང་གྲྭ་བཙུན་རྣམས་ནས་རྒྱ་ནག་གཞུང་གི་སྲིད་བྱུས་དང་ཆབ་སྲིད་ལངས་ཕྱོགས། ལྷག་པར་དུ་གྲངས་ཉུང་མི་རིགས་རྣམས་མཐུན་སྒྲིལ་ཐོག་རྒྱ་ཆིག་སྒྲིལ་གནས་ཐབས་སུ་ནུས་པ་མཉམ་སྤུངས་གནང་གལ་ཡིན་པ་སོགས་ཀྱི་གཏམ་བཤད་བྱས་ཡོད་པ་རེད། གཞི་རྩའི་རྣམ་ཀུན་རྒྱ་གཞུང་གི་གནད་ཡོད་འགོ་ཁྲིད་དང་སྲིད་བློན་ལས་ཐོག་རྣམས་བོད་རང་སྐྱོང་ལྗོངས་ཁུལ་ལ་དེ་ཙམ་བསྐྱོད་ཀྱི་མེད་པ་དང་། ཐེངས་འདིའི་ལི་ཁ་ཆཱང་གི་སྐོར་བསྐྱོད་དེ་ནི་རྒྱ་ནག་གི་སྲིད་བློན་ལས་ཐོག་ཞིག་བོད་ནང་བསྐྱོད་པ་ཆེས་ཐོག་མ་ཆགས་ཀྱི་ཡོད་པ་མ་ཟད། ཁོ་པས་གཞུང་འབྲེལ་གསར་འགོད་ལྷན་ཚོགས་ཤིག་གི་ཐོག་བོད་འདི་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་ནན་བརྗོད་དང་སྦྲགས། ས་གནས་མི་མང་གི་འཚོ་ཐབས་ཡར་རྒྱས་སོགས་ལ་དམིགས་ཏེ་བོད་ཀྱི་ས་ཁུལ་ཁག་ཏུ་འཛུགས་སྐྲུན་གྱི་ལས་གཞི་རྒྱ་སྐྱེད་མུ་མཐུད་གཏོང་བཞིན་ཡོད་སྐོར་སོགས་བཤད་ཡོད་པ་རེད།  འདི་ག་རླུང་འཕྲིན་ཁང་ནས་ད་རེས་སྲིད་བློན་ Li Keqiang གློ་བུར་དུ་བོད་ཀྱི་ས་གནས་དེ་དག་ནང་བསྐྱོད་པའི་དམིགས་ཡུལ་སོགས་དང་འབྲེལ་བཞུགས་སྒར་དུ་རྟེན་གཞི་བྱས་པའི་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་སུ་བཅར་འདྲི་ཁག་ཅིག་ཞུས་ཁོང་གིས་ Li Keqiang བོད་རང་སྐྱོང་ལྗོངས་ཀྱི་ས་ཁུལ་དེ་དག་ནང་ཡོང་དོན་ནི་འདས་པའི་ལོ་དུས་ནས་རྒྱ་དཀར་ནག་གཉིས་དབར་འབྲོག་ལམ་གྱི་གནད་དོན་གཙོས་ས་མཚམས་དང་འབྲེལ་བའི་དོན་རྐྱེན་མི་ཉུང་བ་ཞིག་བྱུང་ཡོད་སྟབས། ས་མཚམས་ས་ཁུལ་གི་བོད་རིགས་རྣམས་ཀྱི་བློ་བཀུག་ནས་རྒྱ་ནག་རང་ཉིད་ལ་ཕན་པའི་ས་མཚམས་སྲ་བརྟན་བསྐྲུན་ཐབས་སུ་ཆེད་དུ་དམིགས་པ་རེད་ཅེས་གསུངས་འདུག ཁོང་གིས་རྒྱ་གཞུང་གི་འཛུགས་སྐྲུན་སྤྱི་དང་ལྷག་དོན་མེ་འཁོར་ལྕགས་ལམ་གྱི་ལས་གཞི་དེ་དག་ས་གནས་བོད་མི་ལ་ཕན་གྱི་ཡོད་སྐོར་བཤད་པ་དེ་ཁ་ཙམ་ལས་དོན་དངོས་ཐོག་བོད་ཀྱི་ས་ཁུལ་དེ་དག་ནང་རྒྱ་ནག་གི་མི་སེར་མང་དུ་གཏང་རྒྱུ་དང་། རྒྱ་རང་ཉིད་ཀྱི་ཚོང་དོན་དང་འབྲེལ་བའི་ One Belt One Road ཞེས་བརྒྱུད་གཅིག་ལམ་གཅིག་གི་སྲིད་བྱུས་ལ་ཕན་པའི་ལས་དོན་སོགས་བྱེད་བཞིན་ཡོད་པ་གསུངས་ཡོད། སྲིད་བློན་ Li Keqiang ཡིས་སྐོར་བསྐྱོད་ཁྲོད་ཀྱི་གཏམ་བཤད་དང་འབྲེལ་ Hong kong གཙུག་ལག་སློབ་གཉེར་ཁང་གི་གྲངས་ཉུང་མི་རིགས་ཐོག་གི་མཁས་པ་ Barry Sautman ལགས་ནས་རྒྱ་གཞུང་འགོ་ཁྲིད་བོད་ནང་བསྐྱོད་སྐབས་གྲངས་ཉུང་མི་རིགས་ཤིག་དགོས་སྐོར་གསུང་བཞིན་ཡོད་ཀྱང་། དོན་ངོ་མའི་དྲི་བ་ནི་རྒྱ་ནག་གཞུང་ནས་རྒྱ་ནག་གི་རྩ་ཁྲིམས་ནང་གཏན་འབེབས་བྱས་པའི་གྲངས་ཉུང་མི་རིགས་དང་འབྲེལ་བའི་སྲིད་བྱུས་ཁག་ལག་བསྟར་དོན་ཕན་ལྡན་པ་ཞིག་གནང་གི་ཡོད་མེད་དེ་རེད་ཅེས་གསུངས་འདུག  ཨ་རི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིགས་ལགས་ནས་རང་ཉིད་ཀྱི་ Tweeter དྲྭ་གནས་ཐོག་སྲིད་བློན་ Li Keqiang ནས་ས་གནས་བོད་མི་རྣམས་རྒྱ་གཞུང་གྱི་ཆབ་སྲིད་ལངས་ཕྱོགས་ལ་རྒྱབ་སྐྱོར་བྱེད་དགོས་སྐོར་གྱི་ཨུ་ཚུགས་བརྒྱབ་རྒྱུ་ལས་ས་གནས་བོད་མིའི་མངོན་འདོད་གང་ཡིན་རྒྱུས་ལོན་གནང་སྟེ་དོན་ཕན་ལྡན་པའི་ཕྱག་ལས་གནང་གལ་ཡིན་པའང་གསུངས་འདུག

རྒྱ་ནག་གཞུང་གི་ཁྲིམས་འགལ་ཉེས་གསོག་པར་རྡུང་རྡེག་ཚ་ནན་ཞེས་ཁ་ལ་ཁྱེར་ནས་ཆབ་སྲིད་ཐད་གཞུང་དང་ལྟ་སྤྱོད་མི་མཐུན་མཁན་རྣམས་དང་སྤྱི་དམངས་ཀྱི་ཆེད་དུ་ལས་འགུལ་སྤེལ་མཁན་རྣམས་ལ་དམ་དྲག་ཤུགས་ཆེ་བྱེད་བཞིན་པ་མ་ཟད་བོད་མིའི་སྤྱི་ཚོགས་ནང་ཕན་ཚུན་དབར་འགལ་ཟླའི་རིགས་བྱུང་སྐབས་བར་འདུམ་བྱ་རྒྱུ་ཡན་ཆད་ཁྲིམས་དང་མི་མཐུན་པ་ཞིག་ཏུ་བཟོས་ཡོད་པ་མངོན་གསལ་གནང་འདུག ཁ་སང་ཟླ་ ༧ ཚེས་ ༢༩ ཉིན་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཤོག་ལྷེ་ ༡༠༡ ཅན་གྱི་སྙན་ཐོ་ཞིག་འདོན་སྤེལ་གནང་ཡོད་པ་དང་། སྙན་ཐོའི་ནང་རྒྱ་ནག་དམར་ཤོག་ཚོགས་པས་གཞི་རིམ་མང་ཚོགས་ཁྲོད་བླ་མའི་ཤུགས་རྐྱེན་མེད་པ་བཟོ་བཞིན་པ་རྣམས་གསལ་བཏོན་དང་འབྲེལ་སྤྱི་ཚོགས་ཞབས་ཞུ་དང་འབྲེལ་བའི་ ལས་འགུལ་སྤེལ་མཁན་རྣམས་རྒྱ་ནག་གཞུང་གིས་གང་བྱུང་དུ་འཛིན་བཟུང་བྱས་པ་དང། དཀའ་སྡུག་མྱངས་ཟིན་པའི་མི་སྣ་དང་ལྷན་བཅར་འདྲི་བྱས་པ་སོགས་ཕྱོགས་སྒྲིག་གནང་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་ངེས་སྟོན་པ་ལྕམ་ Sophie Richardson ལགས་ཀྱིས་རྒྱ་ནག་དམར་ཤོག་ཚོགས་པའི་ལས་བྱེད་དང་ཉེན་རྟོག་པས་བོད་མིའི་ཉིན་རེའི་འཚོ་བའི་ཐོག་རྣམ་ཀུན་ནས་སྟངས་འཛིན་བྱེད་མུས་ཡིན་པ་དེ་ལྟར་ཡང། ད་ཆ་བོད་མི་རྣམས་རྒྱ་གཞུང་གི་བཀའ་འཁྲོལ་མེད་པ་དང་གཞུང་གི་ལས་དོན་དང་འབྲེལ་བ་མེད་པའི་ཐོག་འདུ་འཛོམས་ཙམ་ཡང་བྱེད་མི་ཆོག་པ་བཟོས་ཡོད་སྐོར་འགྲེལ་བརྗོད་གནང་འདུག སྙན་ཐོའི་ནང་དེ་བཞིན་འདི་ལོའི་ཕྱི་ཟླ་ ༢ ནང་བོད་རང་སྐྱོང་ལྗོངས་ཀྱི་སྤྱི་བདེ་ལས་ཁུངས་ཀྱིས་ཁྲིམས་འགལ་ལས་དོན་ཁག་ཅིག་ཡོངས་ཁྱབ་བྱས་པའི་ནང་སྐད་ཡིག་དང་། རིག་གཞུང་། ཁོར་ཡུག་བཅས་ལ་སྲུང་སྐྱོབ་དང་གོང་འཕེལ་གྱི་ལས་གཞི་ཁག་ཙམ་མ་ཟད་སྤྱི་ཚོགས་ཀྱི་བདེ་དོན་དང་འབྲེལ་བའི་མ་དངུལ་བསྡུ་རུབ་དང་རྩོད་རྙོག་རིགས་ལ་བར་འདུམ་གནང་བ་སོགས་སྲོལ་རྒྱུན་གྱི་སྤྱི་ཚོགས་ལས་དོན་ཁག་ཅིག་ཁྲིམས་འགལ་བཟོས་ཡོད་པ་ལུང་འདྲེན་དང་སྦྲགས། ལྷག་པར་དུ་བོད་རང་སྐྱོང་ལྗོངས་ཟེར་བའི་ཆབ་མདོ་དང་མཚོ་སྔོན་ཞིང་ཆེན་གྱི་ཁྱབ་ཁོངས་དམར་ལྷོའི་ཁུལ་དུ་མི་སྣ་ལྔ་ལས་གྲུབ་པའི་ཚོགས་པ་གསར་འཛུགས་བྱ་ཆོག་གི་མེད་པ་དང་། བོད་ཀྱི་རིག་གནས་གོང་སྤེལ་གྱི་ཆེད་དུ་སྐད་ཡིག་དང་། རིག་གཞུང་། ཁོར་ཡུག་བཅས་ལ་སྲུང་སྐྱོབ་བྱ་རྒྱུའི་ལས་འགུལ་རྣམས་བོད་རང་བཙན་གྱི་ལས་འགུལ་དང་འབྲེལ་བ་ཡོད་པ་མ་ཟད་ཕྱིའི་དགྲ་བོའི་སྟོབས་ཤུགས་དང་མཉམ་ལས་བྱས་པར་ངོས་འཛིན་རྒྱུར་ཐེར་བཏོན་བྱས་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྙན་ཐོ་དེ་སྤེལ་དང་འབྲེལ་རྒྱ་ནག་དེ་རྒྱལ་ཚོགས་ཀྱི་ཚོགས་མི་རྒྱལ་ཁབ་གཅིག་ཡིན་སྟབས། སྨྲ་བརྗོད་རང་དབང་དང་། འདུ་འཛོམས་རང་དབང་། རིག་གཞུང་དང་ཁོར་ཡུག་སྲུང་སྐྱོབ་བྱ་རྒྱུ་ཁས་བླངས་དགོས་ཀྱང་། རྒྱ་ནག་གཞུང་གིས་ཁྲིམས་སྒྲིག་དེ་དག་བརྩི་མེད་རྡོག་རོལ་གཏོང་བཞིན་ཡོད་པ་གསལ་པོ་ཡིན་སྐོར་གསུངས་པ་མ་ཟད་བོད་ནང་རང་དབང་ལྡན་པའི་ཚོགས་པ་ཁག་ལ་ཁྲིམས་མཐུན་མིན་པའི་ཐོག་སྟངས་འཛིན་བྱ་རྒྱུའི་ལས་དོན་དེ་དག་མཚམས་འཇོག་དགོས་པ་བརྗོད་འདུག གཞུང་དང་རྒྱལ་ཚོགས་ཀྱི་ཚོགས་མི་རྒྱལ་ཁབ་ཚོའི་ངོས་ནས་རྒྱ་ནག་གི་འགོ་ཁྲིད་ལ་གནོན་ཤུགས་སྤྲད་དེ་མང་ཚོགས་ཀྱི་འདུ་འཛོམས་རད་དབང་དང་སྨྲ་བརྗོད་རང་དབང་ལ་དམ་དྲག་བྱས་པའི་སྲིད་བྱུས་ལ་བསྐྱར་བཅོས་དགོས་པ་དང་། རྒྱལ་ཚོགས་ཀྱི་ཁྲིམས་སྒྲིག་ལ་བརྩི་སྲུང་བྱེད་དགོས་པའི་སྐུལ་མ་གནང་དགོས་པ་མ་ཟད། རྒྱལ་ཚོགས་ནང་ཚོགས་ལ་ཉེ་བའི་མི་རིགས་དབྱེ་འབྱེད་འགོག་ཐབས་ཀྱི་ཚོགས་འདུའི་སྐབས་གནད་དོན་དེ་དག་ཐོག་ངེས་པར་དུ་གླེང་དགོས་པ་གསུངས་འདུག རྩ་བའི་རྒྱ་ནག་གཞུང་གི་ངོས་ནས་བོད་མི་རིགས་འདི་གྲངས་ཉུང་མི་རིགས་ཤིག་ཆགས་ཀྱི་ཡོད་སྟབས། གྲངས་ཉུང་མི་རིགས་ལ་དབང་བའི་གཞི་རྩའི་འགྲོ་བ་མིའི་ཐོབ་ཐང་རྣམས་འཐུས་ཚང་སྤྲད་ཀྱི་ཡོད་པ་བཤད་དོན་དེ་ལྟར་ཡང་། དོན་དངོས་ཐོག་བོད་མི་རྣམས་ཀྱི་ཉིན་རེའི་འཚོ་བའི་ནང་རྒྱ་ནག་གཞུང་གིས་དམ་དྲག་ཇེ་ཆེར་དང་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་རྡོ་རོལ་བཏང་དང་གཏོང་མུས་ཡིན་པ་རེད།

རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་འདུ་ཐོག་ཨ་རིའི་སྲིད་འཛིན་གཞོན་པ་སྐུ་ཞབས་ Mike pence ལགས་ཀྱིས་རྒྱ་ནག་གཞུང་གིས་འདས་པའི་ལོ་ ༧༠ རིང་བོད་ནང་གི་བོད་མིའི་ཐོག་དྲག་གནོན་དང་མང་ཚོགས་ཀྱི་ཆོས་དད་རང་དབང་ལ་བརྩི་མེད་རྡོག་རོལ་བཏང་དང་གཏོང་མུས་ཀྱི་བྱ་སྤྱོད་ལོ་རེ་བཞིན་འཚབ་ཆེ་རུ་འགྲོ་བཞིན་ཡོད་པ་ཐེར་བཏོན་གནང་འདུགཨ་རིའི་ཕྱི་སྲིད་ལས་ཁུངས་ཀྱིས་གོ་སྒྲིག་ཞུས་པའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་འདུའི་ཉིན་མཐའ་མའི་ཐོག་ཨ་རིའི་སྲིད་འཛིན་གཞོན་པ་སྐུ་ཞབས་ Mike pence ལགས་ཀྱིས་གསུང་བཤད་གནང་ཡོད་པ་དང་། སྐབས་དེར་ཁོང་གིས་འཛམ་གླིང་ཁྲོད་ཀྱི་རྒྱལ་ཁབ་ཁག་སོ་སོའི་ཆོས་དད་རང་དབང་གི་གནས་སྟངས་ཁག་སྙིང་བསྡུས་སུ་འགྲེལ་བརྗོད་དང་སྦྲགས་ཏེ་འབྲེལ་ཡོད་གཞུང་འཛིན་ཁག་གིས་མང་ཚོགས་ཀྱི་ཆོས་དད་རང་དབང་ལ་གུས་བརྩི་དང་སྲུང་སྐྱོབ་གནང་དགོས་པའི་རེ་སྐུལ་གནང་འདུག ལྷག་པར་དུ་འཛམ་གླིང་ནང་མི་འབོར་མང་ཤོས་ཡིན་པའི་རྒྱ་ནག་རྒྱལ་ཁབ་ནང་མང་ཚོགས་ཀྱི་ཆོས་དད་རང་དབང་ལ་བརྩི་མེད་རྡོག་རོལ་གཏོང་བཞིན་པའི་གནས་སྟངས་འཚབ་ཆེ་རུ་འགྲོ་བཞིན་ཡོད་པ་ཐེར་བཏོན་གནང་བ་དང། ཕྱི་ལོ་ ༡༩༩༩ ལོ་ནས་བཟུང་ད་བར་ལོ་རེ་བཞིན་ཨ་རིའི་ཕྱི་སྲིད་ལས་ཁུངས་ཀྱི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་ནང་རྒྱ་ནག་དེ་ཆོས་དད་རང་དབང་ལ་བརྩི་མེད་རྡོག་རོལ་བཏང་མཁན་རྒྱལ་ཁབ་ལ་ངོས་འཛིན་གནང་ཡོད་པ་གསུངས་འདུག སྐུ་ཞབས་ Mike pence ལགས་ཀྱིས་འདས་པའི་ལོ་ ༧༠ ཙམ་རིང་བོད་ནང་གི་བོད་མི་ཚོ་རྒྱ་གཞུང་གི་དྲག་གནོན་འོག་གནས་ཡོད་སྟབས་ཐེངས་འདིའི་ཚོགས་འདུ་ཐོག་བོད་མི་ངོ་ཚབ་ཏུ་གཏམ་བཤད་གནང་བར་བཅར་བའི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱི་མཚན་འབོད་གནང་ནས་ད་བར་རྒྱ་གཞུང་གིས་དྲག་གནོན་ལ་ངོ་རྒོལ་དང། ཁུལ་དེའི་ནང་གི་བོད་མིའི་ཆོས་དད་རང་དབང་དང་རིག་གཞུང་སྲུང་སྐྱོབ་ཆེད་དུ་འཐབ་རྩོད་ཀྱི་སྙིང་སྟོབས་དང་བཞེངས་ཕྱོགས་བཅས་ལ་ཆེས་བསྟོད་གནང་འདུགརྒྱ་ནག་གཞུང་གིས་ཁུལ་དེའི་ནང་གི་ནང་པ་དང་ཁ་ཆེ། དེ་བཞིན་ཡི་ཤུའི་ཆོས་ལུགས་འཛིན་མཁན་གྱི་མང་ཚོགས་དྲག་གནོན་དང་བརྩི་མེད་རྡོག་རོལ་གཏོང་བཞིན་ཡོད་པ་འགྲེལབརྗོད་གནང་བ་དང་འབྲེལ། རྒྱ་གཞུང་གིས་དེང་སྐབས་དམར་ཤོག་གི་ཆབ་སྲིད་སློབ་གསོ་ལས་འགུལ་ཤུགས་ཆེ་སྤེལ་བའི་འོག་ཡུ་གུར་གྱི་ཁ་ཆེའི་མང་ཚོགས་ས་ཡ་མང་པོའི་ཆོས་དད་རང་མོས་ལ་དོ་དམ་དང་དེ་དག་གི་ངོ་བོ་མེད་པ་བཟོ་རྒྱུའི་དམིགས་ཡུལ་འཛིན་བཞིན་ཡོད་པའང་ཐེར་བཏོན་གནང་འདུག སྤྱིར་ཁ་སང་རྒྱལ་སྤྱིའི་ཆོས་དད་རང་དབང་གི་ཚོགས་འདུ་ཉིན་མཐའ་མ་དང་འབྲེལ་ནས་རྒྱལ་སྤྱིའི་བོད་དོན་ལས་འགུལ་ཁང་གི་གནས་ཚུལ་སྤེལ་བར་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་ཨ་རིའི་སྲིད་འཛིན་གཞོན་པ་སྐུ་ཞབས་ Mike pence ལགས་དང་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་གཉིས་དང་ལྷན་ཟུར་དུ་མཇལ་འཕྲད་ཞུས་པ་མ་ཟད་རྒྱ་གཞུང་གིས་སྟངས་འཛིན་འོག་བོད་ནང་གི་བོད་མིར་ཆོས་དད་རང་དབང་མེད་པ་དང་ཐ་ན་༸གོང་ས་མཆོག་གི་བཀའ་ཆོས་ཞུ་རྒྱར་བཀག་སྡོམ་དང་༸གང་ཉིད་མཆོག་གི་༸སྐུ་པར་ཙམ་ཡང་སྒྲིག་ཤོམ་གནང་མི་ཆོག་པའི་གནས་སྟངས་རྣམས་སྙན་སེང་ཞུས་འདུག ལྷག་པར་དུ་དབུ་ཁྲིད་རྣམ་གཉིས་ནས་རྒྱ་ནག་གི་འགོ་ཁྲིད་ཚོར་༸གོང་ས་མཆོག་དང་ལྷན་བོད་རྒྱ་དཀའ་རྙོག་སེལ་རྒྱུར་སྐུལ་འདེབས་གནང་ནས་བོད་ནང་གི་བོད་མི་ཚོར་དངོས་ཡོད་ཀྱི་ཆོས་དད་རང་དབང་གི་ཐོབ་ཐང་ལོངས་སུ་སྤྱོད་རྒྱུ་ཡོང་བར་འབོད་སྐུལ་ཡང་ཞུས་འདུག་པ་དང་ཆབས་ཅིག བོད་ནང་བོད་མི་ཚོས་དད་མོས་ཞུ་ཡུལ་གྱི་གནས་རི་རྣམས་སྲུང་སྐྱོབ་ཐུབ་ཚེ་དེས་རང་འབྱུང་ཁོར་ཡུག་ལ་སྲུང་སྐྱོབ་བྱས་པ་དང་གཅིག་མཚུངས་ཡིན་སྐོར་གསུངས་འདུག རྩ་བའི་ཐེངས་འདིའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་འདུ་ཐེངས་དང་པོ་ནི་ཨ་རིའི་སྲིད་འཛིན་ཌོ་ནལ་ཊམ་སྲིད་གཞུང་འོག་ཨ་རིའི་ཕྱི་སྲིད་ལས་ཁུངས་ནས་གོ་སྒྲིག་ཞུས་པ་ཞིག་ཡིན་པ་དང་། ཚོགས་ཆེན་ཐོག་འཛམ་གླིང་རྒྱལ་ཁབ་ ༨༠ ལྷག་ཙམ་ནས་འབྲེལ་ཡོད་བློན་ཆེན་ ༤༠ ཙམ་དང་ཆོས་ཕྱོགས་ཀྱི་དབུ་ཁྲིད་དང་སྐུ་ཚབ་མི་སྣ། ཆོས་དད་རང་དབང་འོག་མནར་སྤྱོད་མྱངས་པའི་མི་སྣ་སོགས་ཚོགས་བཅར་བ་ཁྱོན་ ༤༠༠ ལྷག་འདུ་འཛོམས་བྱུང་ཡོད་པ་མ་ཟད་ཚོགས་འདུའི་ཉིན་གཉིས་པར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་བསྩལ་ཡོད་པ་རེད།

ཁ་སང་ཨ་རིའི་གྲོས་ཚོགས་ཀྱི་ཁྲིམས་ལུགས་ཚོགས་ཆུང་ནས་ Reciprocal Access to Tibet Act ཞེས་ཨ་རིའི་མི་སེར་རྣམས་འདྲ་མཉམ་ཐོག་ནས་བོད་ལ་འགྲུལ་བསྐྱོད་ཆོག་པའི་ཁྲིམས་གཞིར་དཔྱད་ཞིབ་གནང་རྗེས་ཚོགས་ཆུང་གི་འཐུས་མི་ཡོངས་ནས་ཁྲིམས་འཆར་དེར་སྤྱི་མོས་ཐོག་རྒྱབ་སྐྱོར་ཞུས་འདུག ཁ་སང་ཨ་རིའི་གྲོས་ཚོགས་ཀྱི་ཁྲིམས་ལུགས་ཚོགས་ཆུང་ནས་་སྔ་ལོ་ཨ་རིའི་གྲོས་ཚོགས་ནང་གྲོས་ཚོགས་འཐུས་མི་ JimMcgovern ལགས་ཀྱིས་སྣེ་ཁྲིད་འོག་གྲོས་ཚོགས་འཐུས་མི་ཁག་ཅིག་ནས་ Reciprocal Access to Tibet Act ཞེས་པའི་གྲོས་འཆར་སྟོན་ཡོད་པའི་ཐོག་དཔྱད་ཞིབ་ཀྱི་ལས་རིམ་ཞིག་གནང་ཡོད་པ་དང། སྐབས་དེར་ཁྲིམས་ལུགས་ཚོགས་ཆུང་གི་ཚོགས་གཙོ་སྐུ་ཞབས་ Bob Goodlatte ལགས་ཀྱིས་ཁྲིམས་འཆར་དེས་འདས་པའི་ལོ་མང་རིང་རྒྱ་གཞུང་གི་བོད་རང་སྐྱོང་ཟེར་བ་གཙོས་པའི་བོད་ཀྱི་ས་ཁུལ་གཞན་ཁག་ཏུ་བོད་མིའི་སྨྲ་བརྗོད་རང་དབང་དང་ཆོས་དད་རང་དབང་། དེ་བཞིན་འགྲུལ་བསྐྱོད་རང་དབང་སོགས་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་གྱིས་བོད་མིའི་ཐོག་དྲག་གནོན་དང་སྡུག་རྩུབ་ཀྱི་སྲིད་བྱུས་ལག་བསྟར་བྱེད་བཞིན་པའི་གནད་དོན་འབུར་འབུར་གནང་གི་ཡོད་པའི་ཁྲོད་ད་བར་གནད་དོན་དེའི་ཐོག་རྒྱལ་སྤྱིའི་དོ་སྣང་ཡོང་ཆེད་དུ་བོད་མི་ ༡༥༠ ལྷག་ནས་རང་ལུས་མེར་སྲེག་གནང་ཡོད་པ་ལྟར། རྒྱ་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་དང་གཏོང་མུས་ཀྱི་གནས་དོན་དེ་ཕྱིར་ལ་མ་ཁྱབ་པའི་ཆེད་དུ་བོད་ནང་ཕྱིའི་མི་སྣ་འགྲུལ་བསྐྱོད་ལ་དམ་དྲག་བྱེད་བཞིན་པའི་གནད་དོན་འབུར་འདོན་གནང་འདུག རྩ་བའི་ Reciprocal Access to Tibet Act ཞེས་པའི་གྲོས་འཆར་དེའི་ནང་རྒྱ་ནག་གི་དཔོན་རིགས་དང་གསར་འགོད་པ། དེ་བཞིན་མི་སེར་རྣམས་ཨ་རིའི་ས་ཕྱོགས་གང་སར་བསྐྱོད་རྒྱུའི་མཐོང་མཆན་ཕུལ་བཞིན་ཡོད་ཀྱང་རྒྱ་ནག་གཞུང་གི་ངོས་ནས་བོད་ནང་ཨ་རི་གཙོ་གྱུར་རྒྱལ་སྤྱིའི་རང་དབང་ལྡན་པའི་རྟོག་ཞིབ་མི་སྣ་དང་གཞུང་འབྲེལ་མི་སྣ། གསར་འགོད་པ། ཡུལ་སྐོར་སྤྲོ་འཆམ་པ་བཅས་རང་དབང་ཐོག་འགྲུལ་བསྐྱོད་ཆོག་པའི་རང་དབང་འདྲ་མཉམ་དགོས་པ་དང། གལ་ཏེ་དེ་ལྟར་མ་བྱུང་ཚེ་བོད་ནང་འགྲུལ་བསྐྱོད་དམ་དྲག་དང་འབྲེལ་བའི་རྒྱ་ནག་གི་དཔོན་རིགས་རྣམས་ལ་ཨ་རིའི་ནང་བསྐྱོད་རྒྱུར་བཀག་སྡོམ་གནང་དགོས་པ། བོད་ནང་ཕྱིའི་མི་སྣ་རང་དབང་ཐོག་འགྲུལ་བསྐྱོད་ཆོག་པའི་སྲིད་བྱུས་གསར་བཟོ་བའམ་ད་ལྟ་ཕྱི་མི་བཀག་སྡོམ་གྱི་སྲིད་བྱུས་དེར་བསྒྱུར་བཅོས་མ་བྱུང་བ་ཚེ་གྲོས་ཆོད་དེའི་འོག་ད་ལྟ་ཨ་རི་ནང་བསྐྱོད་ཆོག་པའི་མཐོང་མཆན་སྤྲད་ཟིན་པའི་རྒྱ་གཞུང་འབྲེལ་ཡོད་མི་སྣ་རྣམས་ཀྱི་མཐོང་མཆན་ཕྱིར་བསྡུ་གནང་དགོས་པ་དང། ཨ་རིའི་ཕྱི་སྲིད་ལས་ཁུངས་ཀྱི་ངོས་ནས་གྲོས་ཚོགས་དང་ཁྲིམས་ལུགས་ཚོགས་ཆུང། གྲོས་ཚོགས་ཀྱི་ཕྱི་སྲིད་ལས་དོན་དང་སྲིད་བྱུས་ཚོགས་ཆུང་བཅས་ལ་ལོ་རེར་གྲོས་ཆོད་ཐོག་ལག་བསྟར་ཇི་ལྟར་གནང་ཡོད་མེད་ཀྱི་སྙན་ཐོ་འབུལ་དགོས་པ་སོགས་འཁོད་ཡོད་པ་རེད། གྲོས་འཆར་དེ་སྔ་ལོའི་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ Jim Mcgovern ལགས་ཀྱིས་སྣེ་ཁྲིད་འོག་གྲོས་ཚོགས་འཐུས་མི་ ༥༥ ནས་རྒྱབ་སྐྱོར་གནང་ཐོག་འགོད་འབུལ་ཞུས་ཡོད་པ་དང་། ད་རེས་གྲོས་ཚོགས་ཀྱི་ཁྲིམས་ལུགས་ཚོགས་ཆུང་གིས་ཁྲིམས་འཆར་དེར་རྒྱབ་སྐྱོར་ཞུས་པ་དང་སྦྲགས་ཏེ་གྲོས་ཚོགས་འོག་མའི་ནང་ཁྲིམས་འཆར་དེར་རྒྱབ་སྐྱོར་གཏན་འབེབས་གནང་རྒྱུར་རེ་བ་ཆེན་པོ་གནང་འོས་པ་ཆགས་ཡོད་པ་རེད།

ལྷ་ས་སྟོད་ལུང་བདེ་ཆེན་རྫོང་ཉེན་རྟོག་ཁང་དང་སྟོད་ལུང་བདེ་ཆེན་རྫོང་ནག་ཉེས་རྡུང་རྡེག་གཞུང་ལས་ཁང་ཟེར་བ་གཉིས་ཐོུང་གིས་འདི་ལོ་ཕྱི་ཟླ་བཞི་པར་ནག་ཚོགས་གཙང་སེལ་དང་ཁྲིམས་འགལ་ལ་རྡུང་རྡེག་ཟང་ཟིང་བཅོས་སྒྲིག་བཅས་ཀྱི་ཆེད་དོན་འཐབ་རྩོད་ལས་དོན་སྤེལ་རྒྱུའི་སྐོར་གྱི་གསལ་བསྒྲགས་ཞེས་པའི་དོན་ཚན་ ༡༧ ཡོད་པའི་གསལ་བསྒྲགས་ཤིག་སྤེལ་འདུག རྒྱ་གཞུང་གིས་རྒྱ་ནག་རྒྱལ་ཡོངས་ལ་སྤེལ་རྒྱུའི་ཁྲིམས་གཞི་ལྟར་ནག་ཚོགས་སྟོབས་ཤུགས་ཀྱི་ཁྲིམས་འགལ་ཉེས་གསོག་པར་རྡུང་རྡེག་ཚ་ནན་གཏོང་རྒྱུའི་སྐོར་གྱི་ཆེས་མཐོའི་མི་དམངས་ཁྲིམས་ཁང་དང་ཆེས་མཐོའི་མི་དམངས་ཞིབ་དཔྱོད་ཁང་། ཁྲིམས་འཛིན་པུའུ་བཅས་ཀྱི་བརྡ་ཁྱབ་ཞེས་པའི་དོན་ཚན་བཞི་ཅན་བརྡ་ཁྱབ་གཅིག་དང་། དོན་ཚན་ ༡༧ ཡོད་པའི་ལྷ་ས་སྟོད་ལུང་བདེ་ཆེན་རྫོང་གི་གསལ་བསྒྲགས་ཡིག་ཆ་ངོ་མ་བཅས་འདི་ག་གསར་འགོད་པར་བཏང་འབྱོར་བྱུང་བའི་ནང་འགོ་བརྗོད་དུ་ཀྲུང་དབྱངས། རྒྱལ་སྲིད་སྤྱི་ཁྱབ་ཁང་གི་ནག་ཚོགས་གཙང་སེལ་གྱི་ཆེད་དོན་འཐབ་རྩོད་བྱ་རྒྱུའི་སྐོར་གྱི་བརྡ་ཐོའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ནས་ནག་ཚོགས་སྟོབས་ཤུགས་ཀྱི་ཁྲིམས་འགལ་ཉེ་གསོག་པར་རྡུང་རྡེག་ཚ་ནན་གཏོང་ཆེད། སྟོད་ལུང་བདེ་ཆེན་ཆུས་ཀྱིས་ཆུས་ཡོངས་ཀྱི་ཁྱབ་ཁོངས་ནང་ནག་ཚོགས་གཙང་སེལ་དང་ཁྲིམས་འགལ་ལ་རྡུང་རྡེག་ཟང་ཟིང་བཅོས་སྒྲིག་གི་ཆེད་དོན་འཐབ་རྩོད་ལས་དོན་གཏིང་ཟབ་སྤེལ་རྒྱུའི་འབྲེལ་ཡོད་དོན་ཚན་གསལ་སྒྲགས་ལྟར་དེ་རིང་ནས་བཟུང་ཆུས་ཡོངས་ཀྱི་སྤྱི་བདེ་ལས་ཁུངས་ཀྱི་སྟོབས་ཤུགས་གཅིག་ཏུ་སྡུད་ནས་གཤམ་གྱི་ནག་ཚོགས་སྤྱོད་ངན་གྱི་ཁྲིམས་འགལ་ཉེས་གསོག་མི་སྣ་དང་ངན་ཚོགས་གཙོ་བོ་རྡུང་རྡེག་ཚ་ནན་གཏོང་རྒྱུ་ཞེས་འཁོད་པའི་ནག་ཚོགས་སྟོབས་ཤུགས་དོན་ཚན་ ༡༧ བཀོད་འདུག དོན་ཚན་ ༡༧ ནང་ཆབ་སྲིད་དང་སྤྱི་ཚོགས་བདེ་འཇགས་ལ་ཉེན་ཁ་བཟོ་མཁན་གྱི་སྟོབས་ཤུགས་དང་། དགོན་པ་དང་ཆོས་ལུགས་སྤྱད་ནས་མང་ཚོགས་བསླུ་ཁྲིད་དང་དཀྲོག་གཏམ་སྤེལ་ནས་ཏང་དང་སྲིད་གཞུང་གི་ཁ་གཏད་དུ་ལངས་པའི་སྟོབས་ཤུགས་སོགས་གལ་གནད་ཆེ་ཆུང་གི་དོན་ཚན་རིམ་བཀོད་བྱས་འདུག ལས་དོན་དེ་འདི་ལོ་ཕྱི་ཟླ་ ༨ ཚེས་ ༡ བར་དུས་བཀག་བཟོས་འདུག འོན་ཀྱང་མི་འདྲ་བ་ཞིག་ནི་འདི་ལོ་ཕྱི་ཟླ་གཉིས་པའི་ནང་ནག་ཆུ་རྫོང་སྤྱི་བདེ་ཉེན་རྟོག་ལས་ཁུངས་ནས་ནག་ཚོགས་གཙང་སེལ་བྱེད་ཐབས་སྐོར་སྤེལ་བའི་དོན་ཚན་ ༢༠ བཀོད་པའི་བརྡ་ཐོ་ཞིག་བཏང་བའི་ནང་ཁ་བྲལ་གཏོར་བཤིག་གི་ལས་འགུལ་སྟོབས་ཤུགས་དང་ཏཱ་བླའི་རུ་ཚོགས་དང་ཕྱིའི་དགྲ་ཕྱོགས་སྟོབས་ཤུགས་ཟེར་བ་དེ་ཚོ་མེད་པ་མ་གཏོགས་དེ་མིན་ནང་དོན་ཕལ་ཆེ་བ་གཅིག་མཚུངས་ཡིན་པ་འགྲེལ་བརྗོད་གནང་སོང་། སྟོད་ལུང་བདེ་ཆེན་རྫོང་གིས་སྤེལ་བའི་བརྡ་ཐོ་དོན་ཚན་དེ་དག་གི་གཤམ་དུ་ནག་ཉེས་ཡོད་པའི་མི་སྣ་སོ་སོས་རང་འགུལ་ངང་ངོས་ལེན་ཞུ་བར་ཡོང་ཚེ་ཁྲིམས་གཞི་ལྟར་ཁྲིམས་ཆད་ཡང་དུ་གཏོང་རྒྱུ་དང་གཏན་འབེབས་བྱས་པའི་དུས་ཚོད་ནང་ནག་ཉེས་ངོས་ལེན་ཞུ་བར་མ་ཡོང་ཚེ་ཁྲིམས་ཆད་ནན་པོ་གཅོད་རྒྱུ་ཡིན་ཞེས་དང་། ནག་ཚོགས་གཙང་སེལ་དེ་ནི་མི་མང་གི་དམག་འཐབ་ཤིག་ཡིན་པས་ངེས་པར་དུ་མི་མང་མང་ཚོགས་ཀྱི་སྟོབས་ཤུགས་ལ་བརྟེན་དགོས་པས་སྤྱི་ཚོགས་ལས་རིགས་ཁག་དང་རྒྱ་ཆེའི་མི་མང་ནས་ནག་ཚོགས་སྟོབས་ཤུགས་ཀྱི་ཁྲིམས་འགལ་ཉེ་གསོག་ཁུངས་སྣེ་ཐེར་འདོན་ཧུར་ཐག་བྱེད་དགོས་པར་འབོད་སྐུལ་དང་ཆབས་ཅིག་ཏུ་ཐེར་འདོན་བྱས་པའི་གནས་ཚུལ་ངོ་མ་ཡིན་ན་འབྲེལ་ཡོད་ལ་གཏན་འབེབས་གཞིར་བཟུང་བྱ་དགའ་སྤྲོད་རྒྱུ་མ་ཟད་ཐེར་འདོན་བྱེད་མཁན་གྱི་བདེ་འཇགས་ལ་སྲུང་སྐྱོབ་བྱེད་རྒྱུ་ཡིན་སྐོར་འཁོད་འདུག ཐེར་འདོན་གྱི་འབྲེལ་གཏུགས་བྱེད་ས་ཆུས་ནག་ཉེས་རྡུང་རྡེག་གཞུང་ལས་ཁང་དང་ཆུས་སྤྱི་བདེ་ཅུས། ཆུས་སྒྲིག་ཨུད་ལྟ་ཞིབ་ཨུ་ཡོན་ལྷན་ཁང་། ཆུས་རྩ་འཛུགས་པུའུ་བཅས་ཚན་པ་བཞིའི་ཁ་པར་ཨང་གྲངས་དང་ཉེན་རྟོག་པར་འབྲེལ་བ་བྱེད་སའི་ཁ་བྱང་སོགས་ཞིབ་ཕྲ་བཀོད་ཡོད་པ་མ་ཟད་མཇུག་ཏུ་སྟོད་ལུང་བདེ་ཆེན་རྫོང་ཉེན་རྟོག་ཁང་དང་སྟོད་ལུང་བདེ་ཆེན་རྫོང་ནག་ཉེས་རྡུང་རྡེག་གཞུང་ལས་ཁང་གཉིས་ཀྱི་རྟགས་ཐམ་བཀོད་འདུག

ཁ་སང་ཟླ་ ༧ ཚེས་ ༢༠ ཉིན་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ཏུ་གནས་ཚུལ་ཐོན་པར་རྒྱ་གཞུང་གི་དྲག་པོའི་དམག་དང་རྒྱ་ནག་མི་དམངས་བཅིངས་བཀྲོལ་དམག་གཉིས་ཟུང་འབྲེལ་ཐོག་བོད་ཀྱི་ས་ཐོག་ཏུ་དྲག་པོའི་དམག་གི་སྦྱོང་བརྡར་བྱས་ཡོད་པ་དང་། དམག་སྦྱོང་ནང་ཐད་འཕུར་གནམ་གྲུའི་ཁ་ལོ་བ་རྣམས་ས་ཆ་མཐོ་སར་རང་ཉིད་ཀྱི་དམག་རྩལ་ཆེད་བཏོན་གྱིས་རྟོག་ཞིབ་བྱས་པ་མ་ཟད་ཐད་འཕུར་གནམ་གྲུ་ནས་ས་ངོས་སུ་མར་བབ་ནས་དམག་སྦྱོང་སྤྲོད་བཞིན་པའི་རྣམ་པ་མངོན་རྒྱུ་འདུག ཐེངས་འདིའི་དམག་སྦྱོང་ནི་བོད་ཀྱི་ས་ཐོག་ཏུ་འདས་པའི་གཟའ་འཁོར་གཉིས་ཀྱི་ནང་དྲག་པོའི་དམག་སྦྱོང་བྱས་པ་ཐེངས་གཉིས་པ་དེ་ཆགས་ཀྱི་ཡོད་པ་བརྗོད་འདུག རྒྱ་ནག་དམག་དོན་ཆེད་ལས་པ་ Song Zhongping ཡིས་རྒྱ་ནག་གཞུང་འབྲེལ་གསར་ཁང་ Global Times ལ་དམག་སྦྱོང་སྤྲོད་དོན་ནི་ནམ་ཞིག་དམག་འཁྲུག་རིགས་བྱུང་ཚེ་རང་ཉིད་ཀྱི་དགྲ་བོར་གདོང་ལེན་བྱ་རྒྱུའི་གྲ་སྒྲིག་ཞིག་ཡིན་པ་དང་། ཐེངས་དེའི་དམག་སྦྱོང་སྤྲོད་ས་བོད་ཀྱི་ས་ཐོག་ཏུ་ཆགས་ཀྱི་ཡོད་སྟབས། རྒྱལ་ཁབ་སུ་ཞིག་གི་ཆེད་དུ་དམག་སྦྱོང་དེ་ལྟར་སྤྲོད་ཀྱི་ཡོད་པ་ནི་མཁྱེན་གསལ་རེད། སྤྱིར་དམག་གི་རྒྱལ་ཁ་གསོན་རྒྱུར་དམག་སྦྱོང་དེ་དག་ནི་གནད་ཆེ་ཡིན་པ་དང་། དམག་སྦྱོང་དེ་རིགས་ནི་རྒྱལ་ཁབ་རང་ཉིད་ཀྱི་དམག་མི་རྣམས་ལ་ངེས་མཁོ་དང་གལ་ཆེ་ཆགས་ཀྱི་ཡོད་པ་བཤད་ཡོད་པ་རེད། རྩ་བའི་ཉེ་སྔོན་རྒྱ་གཞུང་གིས་དམག་དོན་གྲ་སྒྲིག་དང་། རྒྱལ་སྲུང་། ས་མཚམས་སྲུང་སྐྱོབ། གནམ་གྲུ་དང་མེ་ཤུགས་འཕུར་མདའི་བཀོལ་སྤྱོད་བྱ་ཕྱིར་རྒྱ་གར་ཨ་རུ་ནཱ་ཅལ་གྱི་ས་མཚམས་དང་ཉེ་བའི་བོད་ལྷུན་རྩེ་རྫོང་གྱི་ཡུལ་སྨད་གྲོང་སྡེར་བཀོལ་སྤྱོད་བྱེད་མི་མེད་པར་གནམ་གཤིས་བརྟག་དཔྱད་ཁང་ཞིག་འཛུགས་སྐྲུན་བྱས་ཡོད་པ་དང་། སྐབས་དེར་རྒྱ་གར་གྱི་བརྒྱུད་ལམ་ཆེ་ཁག་ནས་རྒྱ་དཀར་ནག་གཉིས་ཀྱི་ས་མཚམས་ཀྱི་ཉེ་འཁོར་དུ་གནམ་གཤིས་བརྟག་དཔྱད་ཁང་གསར་འཛུགས་བྱས་པ་དེ་ནི་དུས་ནམ་ཞིག་རྒྱ་དཀར་ནག་གཉིས་དབར་དམག་འཁྲུག་རིགས་བྱུང་ཚེ་རྒྱ་ནག་མི་དམངས་བཅིངས་བཀྲོལ་དམག་ལ་རོགས་རམ་བྱ་ཕྱིར་ཡིན་པར་སེམས་འཚབ་ཀྱི་རྣམ་པ་ཆེད་བཏོན་བྱས་ཡོད་པ་རེད།

རྒྱ་ནག་གཞུང་གིས་མཚོ་སྔོན་ཞིང་ཆེན་མཚོ་ཤར་ཁུལ་བ་ཡན་ནམ་དཔའ་ལུང་ཧེ་རིགས་རང་སྐྱོང་རྫོང་ཆུ་མ་ཞང་དུ་དམག་དཔུང་ཕོན་ཆེ་འགྲེམས་འཇོག་གིས་བོད་མི་ཞིང་འབྲོག་རྣམས་ཀྱི་འཚོ་བརྟེན་གནང་ས་ཆག་ཆུ་གྲམ་པ་ཞེས་པའི་རྒྱུག་ཆུ་ཁ་བསྒྱུར་གྱི་ལས་གཞི་སྤེལ་བཞིན་འདུག དེ་རིང་ཟླ་ ༧ ཚེས་ ༢༠ ཉིནདྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བརྙན་པར་དང་བཅས་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་ཟླ་བ་འདིའི་ཟླ་སྟོད་ནས་བཟུང་དཔའ་ལུང་རྫོང་ཆུ་མ་ཞང་གི་ཆག་ཆུ་གྲམ་པ་ཁ་བསྒྱུར་གྱི་ལས་གཞི་འགོ་འཛུགས་བྱས་པ་དང། ལས་གཞི་དེའི་རྐྱེན་པས་ཆག་ཆུ་ས་ཆའི་སྐྲ་སེང་སྡེ་བ་དང་གྲོ་སྡེ་བ། མགོན་པོ་རྒྱུ། ཨ་མཆོག་དང་ཨ་སྡེ་བཅས་ཞིང་ལས་གཉེར་མཁན་བོད་རིགས་སྡེ་བ་ལྔའི་འཚོ་རྟེན་ལ་དོ་ཕོག་ཆེན་པོ་བཟོས་འདུག ལྟེ་གནས་ཁང་དེས་ས་གནས་བོད་མི་ཚོས་རྒྱ་གཞུང་གིས་ཆག་ཆུ་གྲམ་པ་ཁ་བསྒྱུར་བྱ་ཚེ་ཁོ་ཚོའི་ཞིང་ཁར་ཆུ་འདྲེན་དང་སྒོ་ཕྱུགས་ལ་རྩྭ་ཆུ་མི་འདང་བའི་སེམས་ཁུར་དང་། ས་གནས་ཀྱི་རང་འབྱུང་ཁོར་ཡུག་ལ་གནོད་སྐྱོན་ཐེབས་རྒྱུ་ཡིན་པར་སེམས་འཚབ་གནང་གི་ཡོད་པ་མ་ཟད། རྒྱ་གཞུང་གིས་ལས་གཞི་དེའི་ཁྲོད་ཡུར་བ་རྐོ་སྐབས་ལོ་ཏོག་སྐྱེས་པའི་ས་ཞིང་བསྔོག་ནས་ཡུལ་མི་ཚོར་ཁ་གསབ་གང་ཡང་སྤྲད་མེད་པ་རེད། རྒྱ་ནག་གཞུང་གིས་ཁུལ་དེར་གནས་སྡོད་བོད་མི་ཞིང་འབྲོག་རྣམས་ལ་རྒྱུག་ཆུ་ཁ་ཕྱོགས་བསྒྱུར་རྒྱུའི་ལས་གཞི་དེའི་སྐོར་གང་ཡང་བརྗོད་མེད་པ་མ་ཟད་ལས་གཞི་དེ་སྤེལ་ནས་བདུན་ཕྲག་གཅིག་ཙམ་ཕྱིན་ཟིན་ཡོད་ཀྱང་། བོད་མི་ཚོས་རྒྱུག་ཆུ་དེ་རྒྱུ་མཚན་གང་གི་ཆེད་དུ་ཁ་ཕྱོགས་བསྒྱུར་བ་དང་། རྒྱུག་ཆུ་གང་གི་ཕྱོགས་སུ་འདྲེན་གྱི་ཡོད་མེད་སོགས་ཀྱི་གནད་དོན་ཐོག་ཤེས་རྟོགས་གང་ཡང་མེད་སྟབས། ད་ཆ་ས་གནས་བོད་མི་ཚོས་ཆག་ཆུ་གྲམ་པ་ཁ་བསྒྱུར་གྱི་ལས་གཞི་དེ་ནི་ས་ཁུལ་དེའི་དབང་ཆ་ཆེ་ཤོས་འཛིན་མཁན་རྒྱ་ཧེ་རིགས་སྡེ་བར་ཞིང་ཆུ་འདྲེན་པའམ་ཆུ་རགས་དང་གཏེར་ཁ་བསྔོག་འདོན་གྱི་ལས་གཞི་སོགས་ས་གནས་སྲིད་གཞུང་གི་འཛུགས་སྐྲུན་ཁེ་ལས་ཀྱི་ཆེད་དུ་སྤེལ་བཞིན་པར་དོགས་གཞི་དང་ཚོད་དཔག་གནང་གི་ཡོད་འདུག རྩ་བའི་ཟླ་ ༧ ཚེས་ ༡༠ ཉིན་ས་གནས་བོད་མི་ཚོས་ཆག་ཆུ་གྲམ་པ་ཁ་བསྒྱུར་གྱི་ལས་གཞི་དེ་འགོག་ཐབས་བྱས་པར་ས་གནས་སྲིད་གཞུང་གིས་གསང་བའི་མི་སྣ་དང་ཉེན་རྟོག་པ་སོགས་ཆེད་གཏོང་གིས་ཡུལ་མིར་དྲག་གནོན་དང་འཇིགས་སྐུལ་བྱས་ཏེ་ད་ཆ་ལས་གཞི་དེ་བཙན་དབང་ངང་སྤེལ་མུས་ཡིན་པ་དང་། ཉེ་སྔོན་རྒྱ་གཞུང་གིས་བཙན་དབང་འོག་རྒྱུག་ཆུ་ཁ་ཕྱོགས་བསྒྱུར་བའི་བརྙན་ཐུང་དེ་སྤྱི་ཚོགས་དྲྭ་ལམ་བརྒྱུད་ཁྱབ་སྤེལ་ཆེན་པོ་བྱུང་བའི་ནང་རྒྱ་གཞུང་གི་དམག་དཔུང་རུ་སྒྲིག་ནས་ས་གཤོང་འཕྲུལ་འཁོར་གྱིས་ས་གནས་བོད་མིའི་ཞིང་ཁར་བསྔོག་འདོན་བྱས་ནས་ཆུ་ལམ་བཟོ་བཞིན་ཡོད་པ་དང་། སྐབས་དེར་འཕྲེད་དར་དམར་པོ་ཆེན་པོ་ཞིག་གི་སྟེང་རྒྱ་ཡིག་ཐོག་རྒྱ་ནག་གཞུང་གི་ཁྲིམས་ལུགས་ལྟར་ཆུ་ལ་སྟངས་འཛིན་བྱོས། སྲིད་གཞུང་ལ་རོགས་འདེགས་བྱོས་ཞེས་འབོད་ཚིག་བྲིས་པ་མངོན་རྒྱུ་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་ནག་གི་ཆུ་བོ་བཅོས་སྐྱོང་དོ་དམ་སྲིད་བྱུས་དེ་ལྟ་བུ་ནི་རྒྱུན་གནས་བྱེད་ཐབས་མེེད་པ་ཞིག་ལ་འགྲེལ་བརྗོད་དང་འབྲེལ། རྒྱ་ནག་གཞུང་གིས་གཙང་ཆུ་ཁ་བསྒྱུར་གྱི་ལས་གཞི་ཁག་མྱུར་དུ་མཚམས་འཇོག་ནས་ས་གནས་བོད་མིའི་འཐུང་ཆུའི་ཐོབ་ཐང་ལ་བརྩི་བཀུར་དགོས་པ་དང་། ཁོར་ཡུག་ཡུན་གནས་ཐུབ་པའི་སྲིད་བྱུས་ཡར་རྒྱས་གཏོང་དགོས་པ། དེ་བཞིན་རྒྱ་གཞུང་གིས་ཆུ་བོ་བཅོས་སྐྱོང་ལས་གཞི་འཆར་འགོད་དང་ལག་བསྟར་བྱེད་སྐབས་ངེས་པར་དུ་ཁོར་ཡུག་གི་ཡུན་གནས་དང་མང་ཚོགས་ཀྱི་འཚོ་རྟེན་རྩ་ཆེར་འཛིན་དགོས་པ་བཅས་ཀྱི་འབོད་སྐུལ་གནང་འདུག

བོད་རང་སྐྱོང་ལྗོངས་སྟོད་ལུང་བདེ་ཆེན་ཡུལ་ཚོར་འདི་ལོ་ཕྱི་ཟླ་ ༥ ཚེས་ ༦ ཉིན་བོད་མི་སྒེར་གྱི་ས་ཞིང་འདེབས་ལས་བྱེད་སྒོ་ཚུགས་ལ་ཉེ་བའི་སྐབས་རྒྱ་མིས་ས་ཞིང་ཐོག་དོན་མེད་ཆུ་བཏང་རྐྱེན་གནོད་སྐྱོན་བཏང་བར་བརྟེན་བོད་མི་ཚོས་ས་ཞིང་འདེབས་ལས་གནང་མ་ཐུབ་པ་གྱུར་སྟབས། རྒྱ་མི་དེ་དང་ས་ཞིང་བདག་པོ་བོད་མི་ལ་ལས་དབར་དངོས་སུ་འཁྲུག་རྩོད་བྱུང་འདུག འཁྲུག་རྩོད་ཀྱི་དོན་རྐྱེན་དེ་བྱུང་སྐབས་རྒྱ་མིས་བོད་མིའི་ཐོག་རླངས་འཁོར་གང་བྱུང་དུ་བཏང་བས་བོད་མི་གསུམ་རླངས་འཁོར་གྱིས་བརྫིས་ནས་རྨས་སྐྱོན་ཆེན་པོ་བཟོས་འདུག འོན་ཀྱང་དོན་རྐྱེན་དེའི་ཐད་ས་གནས་བདེ་ཆེན་ཡུལ་ཚོའི་འགོ་ཁྲིད་ཀྱིས་དོན་རྐྱེན་བཟོ་མཁན་རྒྱ་མིའི་རྒྱབ་སྐྱོར་གྱིས་དྲང་བདེན་གྱི་ཐག་གཅོད་བྱས་མེད་པ་རེད་འདུག རྒྱ་མིས་བོད་མི་ཁ་ཤས་རླངས་འཁོར་འོག་བརྗིས་ཏེ་རྨས་སྐྱོན་བཏང་རྗེས་རླངས་འཁོར་བཏང་ནས་ལུང་ཕུག་ཞིག་ལ་བྲོས་བྱོལ་ཕྱིན་ཡོད་པ་དང་རླངས་འཁོར་གྱི་ལམ་ཁ་མེད་མཚམས་ནས་རྐང་ཐང་བྲོས་ཡོད་པར་བརྟེན་བོད་མི་ལ་ལས་རྗེས་དེད་བཏང་མཐར་འཛིན་བཟུང་གིས་ཉེས་བརྡུང་ནན་པོ་བཏང་ཡོད་འདུག ད་ལྟའི་ཆར་རླངས་འཁོར་གྱིས་བརྫིས་ཏེ་རྨས་སྐྱོན་ཕོག་པའི་བོད་མི་དེ་དག་རྒྱ་ནག་གི་སྨན་ཁང་ཆེ་བ་ཞིག་ཏུ་ཛ་དྲག་གི་མྱུར་སྐྱོབ་ཞུ་བཞིན་ཡོད་པ་རེད་འདུག གནས་ཚུལ་ངོ་སྤྲོད་པས་འགྲེལ་བརྗོད་གནང་དོན་ད་ལྟའི་ཆར་དོན་རྐྱེན་དེའི་ཐད་ཐག་གཅོད་གཙང་མ་ཞིག་མ་བྱུང་བར་ལྷག་ཡོད་པ་དང་ལྷག་དོན་རྨས་སྐྱོན་ཕོག་པའི་བོད་མི་དེ་དག་གི་མིང་དང་གནས་སྟངས་ཇི་ཆགས། རྒྱ་མིའི་མིང་གང་ཡིན་སོགས་ཞིབ་ཕྲ་གསལ་རྟོགས་ཐུབ་མེད་སྐོར་གསུངས་སོང་། སྤྱིར་བོད་ནང་རྒྱ་ནག་གི་འགོ་ཁྲིད་ཚོས་རྒྱ་མི་དང་བོད་མིའི་དབར་དཀའ་ངལ་བྱུང་སྐབས་རྒྱུན་དུ་རྒྱ་མིར་རྒྱབ་སྐྱོར་དང་ཡང་ན་ཉེས་ཅན་པའི་ལག་ནས་ལྐོག་རྔན་བླངས་ནས་དྲང་བདེན་གྱི་ཐག་གཅོད་བྱེད་ཀྱི་མེད་པའི་གནས་ཚུལ་ཡང་ཡང་ཐོན་གྱི་ཡོད་པ་ལྟར། འདི་ལོ་བོད་རང་སྐྱོང་ལྗོངས་གཞིས་རྩེ་གྲོང་ཁྱེར། རྣམ་གླིང་རྫོང་།  རྡོར་རྗེ་ཤང་། གཉའ་མོ་གྲོང་ཚོའི་ནང་། ལོ་གཉིས་སྔོན་ཏེ་ཕྱི་ལོ་ ༢༠༡༦ ལོར་རྒས་མི་ཞིག་ལྐོག་བསད་བཏང་བའི་མི་གསོད་གྱོད་གཞི་ཞིག་ཐོན་ཡོད་པ་དང་། ས་གནས་རྒྱ་གཞུང་གི་འབྲེལ་ཡོད་ལས་བྱེད་དང་ཉེན་རྟོག་པས་མི་གསོད་མཁན་གྱི་ཉེས་ཅན་པའི་ལག་ནས་ལྐོག་རྔན་བླངས་པའི་གནས་ཚུལ་ཐོན་མྱོང་ཡོད་པ་རེད།