རྒྱལ་སྤྱི།

རྒྱ་ནག་གི་སྲིད་འཛིན་ཞི་ཅིན་ཕིང་བལ་ཡུལ་ནང་གཞུང་འབྲེལ་འཚམས་གཟིགས་སུ་འབྱོར་ཉེ་དང་བསྟུན་འདས་པའི་ཉིན་ཤས་ཁྲོད་བལ་ཡུལ་གཙོས་པའི་རྒྱལ་སྤྱིའི་བརྒྱུད་ལམ་ཁག་ཏུ་སྲིད་འཛིན་ཞི་ཅིན་ཕིང་གི་འཚམས་གཟིགས་སྐབས་བལ་ཡུལ་དང་རྒྱ་ནག་གཉིས་དབར་ཕན་ཚུན་དོགས་གཞི་ཡོད་པའི་མི་སྣ་རྩིས་སྤྲོད་བྱ་རྒྱུའི་ extradition treaty ཞེས་ཉེས་ཅན་རྩིས་སྤྲོད་ཀྱི་གྲོས་ཆོད་ཅིག་བཞག་སྲིད་སྐོར་གྱི་གནས་ཚུལ་མི་ཉུང་བ་ཞིག་ཐོན་ཡོད་པ་རེད། འོང་ཀྱང་དེ་རིང་ khabarhub དང་ Nepal Times སོགས་བལ་ཡུལ་གྱི་གསར་ཁང་གི་དྲྭ་གནས་ཐོག་གནས་ཚུལ་སྤེལ་བར་ཁ་སང་རེས་གཟའ་ཕུར་བུའི་ཉིན་བལ་ཡུལ་གྱི་སྲིད་བློན་སྐུ་ཞབས་ KP Sharma Oli ནས་ཡུལ་དེའི་སྲིད་བློབ་ཟུར་པ་དང་འབྲེལ་ཡོད་ཁག་གཅིག་དང་ལྷན་དུ་སྲིད་འཛིན་ཞི་ཅིན་ཕིང་གི་གཞུང་འབྲེལ་འཚམས་གཟིགས་ཁྲོད་གླེང་སློང་གནང་རྒྱུའི་གནད་དོན་ཁག་གི་ཐོག་ཆུ་ཚོད་བཞི་ཙམ་གོ་བསྡུར་གནང་ཡོད་པ་དང་། གྲོས་བསྡུར་གྱི་ལས་རིམ་ཁག་གྲུབ་མཚམས་སུ་བལ་ཡུལ་གཞུང་འཛིན་ཚོགས་པའི་མགྲིན་ཚབ་པ་ Shrestha ལགས་ནས་ཞི་ཅིན་ཕིང་གི་འཚམས་གཟིགས་ཁྲོད་བལ་ཡུལ་གཞུང་དང་རྒྱ་ནག་དབར་ཉེས་ཅན་རྩིས་སྤྲོད་བྱ་རྒྱུའི་གྲོས་ཆོད་ཐོག་གླེང་སློང་གནང་གཏན་ཁེལ་ཡོད་ཀྱང་ད་རེས་དངོས་སུ་གྲོས་ཆོད་བཞག་རྒྱུ་མིན་ཞེས་གསུངས་འདུག སྐབས་དེར་བལ་ཡུལ་གྱི་སྲོད་བློན་ཟུར་པས་དབུས་པའི་འབྲེལ་ཡོད་རྣམས་ནས་རྒྱ་ནག་གཞུང་དང་གླེང་མོལ་དང་གྲོས་ཆོད་རིགས་བཞག་སྐབས་བལ་ཡུལ་གཞུང་ནས་སོ་སོའི་རྒྱལ་ཁབ་ཀྱི་ཁེ་ཕན་ནམ་ཡང་བློས་བཏང་གནང་རྒྱུ་མིན་པ་དང་ལྷག་པར་དུ་དཔལ་འབྱོར་གྱི་གནད་དོན་དང་འབྲེལ་རྒྱ་ནག་གཞུང་གི་བུ་ལོན་འོག་མ་ཚུད་པ་ཞིག་གནང་དགོས་པའི་ལམ་སྟོན་སོགས་ཀྱང་གནང་འདུག རྩ་བའི་བལ་ཡུལ་དང་རྒྱ་ནག་དབར་ལ་ཉེས་ཅན་རྩིས་སྤྲོད་ཀྱི་གྲོས་ཆོད་བཞག་རྒྱུ་དང་འབྲེལ་ཏེ་འདས་པའི་ཉིན་ཤས་ཁྲོད་ཕྱོགས་གཉིས་ནས་གྲོས་ཆོད་དེ་དང་འབྲེལ་བའི་ཟིན་བྲིས་ཡིག་ཆ་ཁག་གྲ་སྒྲིག་བྱས་ཡོད་པའི་གནས་སྟངས་ཤིག་ཆགས་པའི་མཚམས་འདིར་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་རྒྱ་ནག་དང་བལ་ཡུལ་དབར་ལ་ཉེས་ཅན་རྩིས་སྤྲོད་བྱ་རྒྱུའི་གྲོས་ཆོད་བཞག་ཚེ་བལ་ཡུལ་ནང་ཡོད་པའི་བོད་མི་སྤྱི་དང་ཁྲིམས་མཐུན་གྱི་ཡིག་ཆ་མེད་པར་བལ་ཡུལ་ནང་བཞུགས་བཞིན་པའི་བོད་མི་ཚོར་ཆེས་ངལ་བ་ཆེན་པོ་འཕྲད་ངེས་ཡིན་པ་གསུངས་པ་དང་ཆབས་ཅིག་ཏུ་བལ་ཡུལ་གཞུང་ནས་རྒྱ་ནག་དང་ལྷན་དུ་གྲོད་ཆོས་དེ་འདྲ་བཞག་རྒྱུ་མེད་པའི་འབོད་སྐུལ་གནང་ཡོད། གཞི་རྩའི་རྒྱ་ནག་གི་སྲིད་འཛིན་ཞི་ཅིན་ཕིང་དེ་རིང་ནས་འགོ་འཛུགས་ཏེ་རྒྱ་གར་ནང་གི་གཞུང་འབྲེལ་འཚམས་གཟིགས་གྲུབ་རྗེས་སང་ཉིན་ཕྱི་ཚེས་ ༡༢ ཉིན་བལ་ཡུལ་ནང་སྐྱོད་གཏན་ཁེལ་ཡོད་པ་དང་། ཐེངས་འདིའི་རྒྱ་ནག་གི་སྲིད་འཛིན་བལ་ཡུལ་ནང་སྐྱོད་པ་དེ་ནི་དེ་སྔ་ཕྱི་ལོ་ ༡༩༩༦ ལོར་རྒྱ་ནག་གི་སྲིད་འཛིན་ Jing Zemin བལ་ཡུལ་དུ་ཐེངས་དང་པོ་བསྐྱོད་པ་ནས་བཟུང་ལོ་ངོ་ ༢༣ གྱི་རྗེས་སུ་སླར་རྒྱ་ནག་གི་སྲིད་འཛིན་བལ་ཡུལ་ནང་གཞུང་འབྲེལ་འཚམས་གཟིགས་སུ་ཡོང་བ་ཆེས་ཐོག་མ་ཆགས་ཀྱི་ཡོད་པ་རེད། ཐེངས་འདིའི་འཚམས་གཟིགས་ཁྲོད་རྒྱལ་ཁབ་ཕྱོགས་གཉིས་ཀྱི་འགོ་ཁྲིད་དབར་གཙོ་ཆེ་ཤོས་རྒྱ་ནག་གི་རྒྱུད་ཅིག་ལམ་གཅིག་གི་སྲིད་བྱུས་དང་འབྲེལ་བལ་ཡུལ་གྱི་རྒྱལ་ས་ Kathmandu ནས་བོད་དང་རྒྱ་ནག་གི་ས་མཚམས་བར་དུ་རྒྱ་ལམ་གསར་རྒྱག ཚོང་འབྲེལ་གྱི་གནད་དོན། དེ་བཞིན་བལ་ཡུལ་དང་བོད་སྐྱིད་གྲོང་བརྒྱུད་གཞིས་ཀ་རྩེ་བར་མེ་འཁོར་ལྕགས་ལམ་གསར་རྒྱག་གི་ལས་གཞི་སོགས་ཀྱི་ཐོག་གྲོས་བསྡུར་བྱ་རྒྱུ་ཡིན་པ་རེད།

ཉེ་དུས་ཨ་རིའི་གྲོས་ཚོགས་ནང་ཕྱི་ལོ་ ༢༠༡༩ ལོའི་བོད་དོན་ཁྲིམས་འཆར་ཞེས་པ་ཞིག་ངོ་སྤྲོད་གནང་བར་ཨ་མི་རི་ཀའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ནས་དགའ་བསུའི་འཚམས་འདྲི་གནང་བ་དང་འབྲེལ་ཏེ་ཁྲིམས་འཆར་དེ་གང་མགྱོགས་གཏན་འབེབས་ཡོང་བའི་ཞུ་སྐུལ་གནང་འདུག ཁ་སང་ཨ་མི་རི་ཀའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོ་སྐུ་ཞབས་ Gary Bauer ལགས་ཀྱིས་རྒྱ་ནག་ནང་གི་མང་ཚོགས་ལ་རང་ཉིད་ཀྱི་ཆོས་ཕྱོགས་དབུ་ཁྲིད་བདམ་རྒྱུའི་ཐོབ་ཐང་མེད་སྟབས། ད་རེས་ཀྱི་ཁྲིམས་འདི་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་བདམ་རྒྱུའི་འགན་དབང་དེ་བོད་བརྒྱུད་ནང་བསྟན་གྱི་དབུ་ཁྲིད་རྣམས་ལ་ཡོད་པར་ཨ་རིའི་གཞུང་ནས་རྒྱབ་སྐྱོར་ཡོད་པའི་བརྡ་ལན་ཤུགས་ཆེ་ཞིག་སྤྲོད་བཞིན་ཡོད་པ་མངོན་གསལ་གནང་གི་ཡོད་པ་མ་ཟད། རྒྱ་གཞུང་གིས་༸སྐུའི་ཡང་སྲིད་གནད་དོན་ཐད་ཐེ་བྱུས་བྱ་ཚེ་དེས་ཆོས་དད་རང་དབང་ལ་རྩིས་མེད་རྡོག་རོལ་བཏང་བ་ཞིག་ཆགས་ཀྱི་ཡོད་ཅེས་ནན་བརྗོད་གནང་འདུག ཨ་མི་རི་ཀའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་འགན་འཛིན་གྲས་ཡོད་བསྟན་འཛིན་རྡོ་རྗེ་ལགས་ཀྱིས་ཨ་མི་རི་ཀའི་གྲོས་ཚོགས་གོང་མའི་འཐུས་མི་སྐུ་ཞབས་ Rubio ལགས་དང་ Mcgovern ལགས་སོགས་ཆབ་སྲིད་ཚོགས་པ་གཉིས་ལས་གྲུབ་པའི་གྲོས་ཚོགས་འཐུས་མི་ཚོས་གྲོས་ཚོགས་གོང་མའི་ནང་ཁྲིམས་འཆར་དེ་ངོ་སྤྲོད་གནང་བར་དགའ་བསུའི་བསྔགས་བརྗོད་ཞུས་པ་དང་ཆབས་ཅིག ད་རེས་བཞུགས་སྒར་དུ་ཚོགས་པའི་བཙན་བྱོལ་བོད་མིའི་དམིགས་བསལ་ཚོགས་ཆེན་ཐེངས་གསུམ་པའི་ཐོག་ནས་༸གོང་ས་༸སྐུ་ཕྲེང་རིམ་བྱོན་ངེས་ཕེབས་ཡོང་བའི་གསོལ་འདེབས་ཞུས་པ་དང་མགོན་པོ་༸གང་ཉིད་མཆོག་གི་ཡང་སྲིད་ཀྱི་གནད་དོན་ཐད་སྤྱི་སྒེར་སུས་ཀྱང་ཐེ་བྱུས་བྱ་དབང་མེད་སྐོར་སྤྱི་མོས་ཀྱིས་གྲོས་ཆོད་གཏན་འབེབས་གནང་བ་ལའང་དགའ་བསུ་ཞུས་འདུག ལྷག་དོན་བསྟན་འཛིན་རྡོ་རྗེ་ལགས་ཀྱིས་ད་ཆ་རྒྱ་ནག་གཞུང་གིས་བོད་བརྒྱུད་ནང་བསྟན་ཙམ་མིན་པར་རྒྱ་ནག་རྒྱལ་ནང་དུ་ཡོད་པའི་ཡུ་གུར་ཁ་ཆེ་དང་ཡི་ཤུ་པ། དེ་བཞིན་ཧྥ་ལུང་གྷོང་ཆོས་བརྒྱུད་ཉམས་ལེན་དང་སྤྱི་ཚོགས་གཞན་རྣམས་ཀྱི་ཐོག་ལའང་མུ་མཐུད་ཆོས་དད་རང་དབང་རྡོག་རོལ་གྱིས་དམ་དྲག་སྔར་ལས་ཤུགས་ཆེ་རུ་བྱེད་བཞིན་པ་སོགས་ནི་དམིགས་བསལ་བློ་འཚབ་གནང་དགོས་པ་ཞིག་ཆགས་ཡོད་སྐོར་གསུངས་འདུག ལྷན་ཚོགས་དེའི་ངོས་ནས་ཨ་རིའི་གཞུང་གི་དཔལ་འབྱོར་ལྷན་ཁང་གིས་གཟའ་འཁོར་འདིའི་ནང་རྒྱ་ནག་གི་བཟོ་ཚོང་ཁང་དང་གཞུང་འབྲེལ་མིན་པའི་ཚོགས་པ་ ༢༨ ལ་ཨ་རིའི་བཟོ་ལས་ཀྱི་གྲུབ་ཆ་ཁག་གཅིག་འོར་འདྲེན་བྱ་རྒྱུར་བཀག་སྡོམ་བྱས་པའི་ཐག་གཅོད་དང་དེ་བཞིན་ཨ་རིའི་ཕྱི་སྲིད་ལས་ཁུངས་ནས་ཤིན་ཅང་ནང་ལ་དབང་ཆ་ལོག་པར་སྤྱོད་མཁན་གྱི་རྒྱ་རིགས་གཞུང་འབྲེལ་མི་སྣ་ཁག་གཅིག་ལ་ཨ་རི་ནང་སྐྱོད་རྒྱུར་བཀག་སྡོམ་བྱ་རྒྱུའི་གསལ་བསྒྲགས་སྤེལ་ཡོད་པ་བཅས་ལ་བསྔགས་བརྗོད་ཡོད་ཅེས་ཚོར་ཤུགས་ཆེན་པོས་གསུངས་འདུག གཞི་རྩའི་ Tibetan Policy and Support Act of 2019 ཞེས་པའི་ཨ་རིའི་བོད་དོན་ཁྲིམས་འཆར་གསར་པ་དེ་ཟླ་བ་སྔོན་མའི་ནང་ཨ་རིའི་གྲོས་ཚོགས་གོང་འོག་གཉིས་སུ་ཆེད་འདོན་གནང་སྟེ་ཨ་མི་རི་ཀའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དང་ཁྲིམས་ལུགས་ཚོགས་ཆུང་གཉིས་སུ་ཁྲིམས་འཆར་དེའི་དོན་ཚན་ཁག་གི་ཐོག་གྲོས་བསྡུར་དང་དཔྱད་ཞིབ་གནང་མུས་ཡིན་པ་རེད་། གལ་རེ་ཁྲིམས་འཆར་དེ་གཏན་འབེབས་ཐུབ་པ་ཡིན་ན་མ་འོངས་པར་༸གོང་ས་མཆོག་གི་ཡང་སྲིད་གནད་དོན་ལ་ཐེ་བྱུས་བྱེད་མཁན་རྒྱ་ནག་གི་འབྲེལ་ཡོད་དཔོན་རིགས་རྣམས་ཨ་རིར་བཀག་སྡོམ་གྱིས་དམ་དྲག་བྱ་རྒྱུ་སོགས་ཀྱི་འཆར་གཞི་ཡོད་པ་དང་བོད་ཀྱི་རྒྱལ་ས་ལྷ་སར་ཨ་མི་རི་ཀའི་གཞུང་ཆབ་ཁང་ཞིག་ཆེད་འཛུགས་གནང་དགོས་པ་སོགས་ཀྱི་གནད་དོན་ཚུལ་ཡོད་པ་རེད། ཨ་རིའི་བོད་དོན་ཁྲིམས་འཆར་གསར་པའི་ནང་དེ་སྔ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིས་བོད་ཐོག་འཛིན་པའི་སྲིད་བྱུས་ནང་གསལ་བའི་དོན་ཚན་ཁག་ལ་རྒྱས་བཤད་དང་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན། དེ་བཞིན་བོད་ཀྱི་རང་བྱུང་ཁོར་ཡུག་སྲུང་སྐྱོབ་དགོས་པ། ཨ་རི་གཞུང་ནས་བོད་མིར་རོགས་སྐྱོར་མུ་མཐུད་གནང་དགོས་པ་སོགས་དོན་ཚན་ཆེ་ཁག་ལྔ་ཙམ་འཁོད་ཡོད་པ་དང་། ཉེ་ཆར་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་བཞུགས་སྒར་༸རྒྱལ་བའི་ཕོ་བྲང་དུ་ཆེད་ཕེབས་ཀྱིས་དེ་འབྲེལ་ཁྲིམས་འཆར་གྱི་དོན་ཚན་ཁག་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་གསེང་ཞུས་ཡོད་པ་རེད།

མ་རྡ་ར་སི་གཙུག་ལག་སློབ་གཉེར་ཁང་གི་རྒྱ་གར་སློབ་ཕྲུག་ཁག་གཅིག་ནས་ད་ཆ་རྒྱ་གར་གཞུང་ཉེན་རྟོག་པས་བཀག་བསྐྱིལ་འོག་ཡོད་པའི་བོད་མི་དང་ལྷག་དོན་བོད་ཕྲུག་རྣམས་ལ་རྒྱབ་སྐྱོར་མཚོན་ཕྱིར་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་འདུག ཞི་ཅིན་ཕིང་ལ་ངོ་རྒོལ་བྱ་སྲིད་པའི་དོགས་གཞིའི་འོག་རྒྱ་གར་ལྷོ་ཕྱོགས་མ་རྡ་ར་སི་ནས་བོད་མི་ལས་འགུལ་བ་དང་སློབ་ཕྲུག་ ༡༠ བཅས་མུ་མཐུད་འཛིན་བཟུང་གིས་བཙོན་འཇུག་བྱས་པའི་གནས་ཚུལ་འཐོན་བཞིན་པར་བོད་མི་གཙོས་པའི་རྒྱ་གར་བ་སོགས་ནས་བློ་འཚབ་ཆེན་པོ་གནང་བཞིན་ཡོད་པའི་ཁྲོད་དེ་རིང་ཟླ་ ༡༠ ཚེས་ ༡༠ ཉིན་ཚོུད་ ༡༠༌༡༥ ཙམ་ནས་མ་རྡ་ར་སི་གཙུག་ལག་སློབ་གཉེར་ཁང་གི་རྒྱལ་སྤྱིའི་འབྲེལ་ལམ་སྡེ་ཚན་གྱི་རྒྱ་གར་སློབ་ཕྲུག་ ༢༠ ཙམ་གྱིས་མཐོ་སློབ་དེའི་ Chepauk Campus དུ་ང་ཚོ་བོད་པའི་སློབ་ཕྲུག་ཚོ་དང་མཉམ་དུ་ཡོད་ཅེས་པའི་འབོད་ཚིག་འཁོད་པའི་ཤོག་བྱང་བསྣམས་ཏེ་རྒྱ་གར་ཉེན་རྟོག་པས་ཁོང་རྣམས་འཛིན་བཀག་བསྐྱིལ་དང་བསུན་བརྩེར་བྱས་པར་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་བཞིན་འདུག་པ་མ་ཟད། བོད་པོའི་སློབ་ཕྲུག་རྣམས་གནས་སྐབས་རིང་གློད་བཀྲོལ་མ་གནང་ཚེ་དེ་རིང་ཉིན་འཁྱོངས་རིང་ལས་འགུལ་དེ་མུ་མཐུད་སྤེལ་ངེས་ཡིན་པ་དང་སང་གང་གནང་དགོས་མིན་ཐད་ལ་གྲོས་བསྡུར་ཡང་གནང་རྒྱུ་རེད་འདུག འདི་ག་རླུང་འཕྲིན་ཁང་ནས་རྒྱ་གར་སློབ་ཕྲུག་དེ་དག་གི་ལས་འགུལ་སྣེ་ཁྲིད་གནང་མཁན་ Elakkiyan ལགས་སུ་ཞལ་པར་བརྒྱུད་བཀའ་འདྲི་ཞུས་པར་ཁོང་གིས་ད་རེས་ཀྱི་ལས་འགུལ་དེ་ཆེད་མངགས་རྒྱ་གར་གཞུང་ཉེན་རྟོག་པས་བཀག་སྐྱིལ་འོག་ཡོད་པའི་བོད་ཕྲུག་རྣམས་ཀྱི་ཆེད་དུ་ཡིན་པ་དང་། ལྷག་དོན་ཅ་ནཡི་ས་གནས་ཉེན་རྟོག་པས་ཕྱི་ཚེས་ ༦ ཉིན་གྱི་མཚན་མོར་བོད་པའི་བེུད་གཅིག་གཙོས་ལས་འགུལ་བ་དང་སློབ་ཕྲུག་བདུན་འཛིན་བཟུང་བཙན་འཁྲིད་བྱས་ཏེ་ད་བར་ཁྱོན་བོད་མི་བཅུ་མུ་མཐུད་བཀག་ཉར་འོག་ཡོད་པ་དེ་ནི་འགྲོ་བ་མིའི་ཐོབ་ཐང་དང་འགལ་ཡོད་པ་མ་ཟད། སློབ་ཕྲུག་དེ་དག་ལ་བཙན་དབང་ཐོག་ལས་འགུལ་ནང་མཉམ་ཞུགས་གནང་རྒྱུ་མིན་པའི་མིང་རྟགས་བཀོད་བཅུག་པར་སྐྱོན་བརྗོད་གནང་སོང་། ཐེངས་འདིའི་ལས་འགུལ་བརྒྱུད་ Elakkiyan ལགས་ཀྱིས་འདས་པའི་ཉིན་ཤས་ནང་བོད་མི་འཛིན་བཟུང་བཀག་སྐྱིལ་བྱས་པའི་ཁོངས་ནས་ཕལ་ཆེ་བ་སློབ་ཕྲུག་ཆགས་ཀྱི་ཡོད་པ་དང་ལྷག་དོན་ཁ་སང་ནས་ཉིན་གྲངས་གསུམ་རིང་མ་རྡ་ར་སི་མཐོ་སློབ་ཁག་གི་ཡིག་རྒྱུགས་འགྲོ་བཞིན་ཡོད་སྟབས། སློབ་ཕྲུག་རྣམས་འཕྲལ་མར་གློད་བཀྲོལ་དགོས་པ་དང་ཁོང་རྣམས་ལ་ཅ་ནཡི་ས་གནས་ཉེན་རྟོག་པས་སུན་གཙེར་དང་ཁ་སྐྱེངས་པོ་བཟོ་རྒྱུ་སོགས་མཚམས་འཇོག་དགོས་པའི་ཞུ་སྐུལ་གནང་བཞིན་ཡོད་པ་ཚོར་ཤུགས་ཆེན་པོས་གསུངས་སོང་། དེ་བཞིན་མ་རྡ་ར་སི་གཙུག་སློབ་གཉེར་ཁང་དུ་གཙུག་ལག་རབ་བྱམས་པའི་སློབ་སྦྱོང་གནང་བཞིན་པ་མ་རྡ་ར་སའི་བོད་ཕྲུག་ཚོགས་པའི་ཚོགས་མི་དབྱངས་ཅན་སྒྲོལ་དཀར་ལགས་ཀྱིས་རྒྱ་གར་སློབ་ཕྲུག་ཁག་གཅིག་གིས་སྣེ་ཁྲིད་གནང་སྟེ་གདུང་སེམས་བསྐྱེད་ཀྱི་ལས་འགུལ་དེའི་ནང་བོད་ཕྲུག་རྣམས་མཉམ་ཞུགས་རོགས་ཞེས་གསུངས་ཡོད་ཀྱང་བོད་ཕྲུག་སློབ་མ་ ༢༥ ཙམ་ལ་ས་གནས་ཉེན་རྟོག་པས་བཙན་དབང་གིས་ལས་འགུལ་ནང་མཉམ་ཞུགས་གནང་རྒྱུ་མིན་པའི་མིང་རྟགས་བཀོད་བཅུག་སྟབས་མཉམ་ཞུགས་གནང་འདོད་ཡོད་ཀྱང་དེ་ལྟར་གནང་ཆོག་གི་མེད་སྐོར་གསུངས་སོང་། བོད་རང་བཙན་སློབ་ཕྲུག་ཚོགས་པས་དེ་འབྲེལ་གསར་འགོད་བསྒྲགས་གཏམ་ཞིག་སྤེལ་ཏེ་བོད་རང་བཙན་སློབ་ཕྲུག་ཚོགས་པ་དང་ལྷག་དོན་བཀག་བསྐྱིལ་འོག་ཡོད་པའི་བོད་མི་བཅུ་པོ་དེ་དག་ནས་རྒྱ་གར་སྲིད་བློན་ Narendra Modi མཆོག་ལ་བོད་ནང་གི་འགྲོ་བ་མིའི་ཐོབ་ཐང་གི་ཛ་དྲག་གནང་སྟངས་ཐོག་འགན་འཁུར་བཞེས་དགོས་པའི་ཞུ་སྐུལ་གནང་བ་དང་སྦྲགས། རྒྱལ་སྤྱིའི་དབུ་ཁྲིད་ཚོས་བོད་ཀྱི་དྲང་བདེན་གྱི་ལོ་རྒྱུས་ལ་རྒྱབ་སྐྱོར་གནང་སྟེ་རྒྱ་ནག་གཞུང་གིས་ཆབ་སྲིད་ཀྱི་ཐོག་ནས་མགོ་སྒུར་བཅུག་དགོས་གལ་ཡིན་པ་མ་ཟད་ད་ལྟའི་ཆར་རྒྱ་གར་གཞུང་ཉེན་རྟོག་པས་བཀག་ཉར་བྱེས་པའི་བོད་མི་བརྒྱད་པོ་དེ་དག་འཕྲལ་དུ་གློད་བཀྲོལ་དགོས་པར་ནན་བརྗོད་གནང་འདུག

NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྦོལ་མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ Houston ནང་རྟེན་གཞི་བྱས་པའི་Rockets སིལ་སྤོལ་རུ་ཁག་གི་འགན་འཛིན་ངོས་ནས་ཧོང་ཀོང་གི་ངོ་རྒོལ་ལས་འགུལ་ལ་རྒྱབ་སྐྱོར་བྱས་པའི་གནད་དོན་དེ་ནི་ཁོང་གི་སྨྲ་བརྗོད་རང་དབང་ཞིག་ཡིང་པར་འགྲེལ་བརྗོད་གནང་རྗེས། རྒྱ་ནག་གི་གཞུང་འབྲེལ་CCTV བརྙན་འཕྲིན་ལས་ཁང་ནས་ NBA  འི་སྔོན་འགྲོའི་རྩེད་འགྲན་ཆ་ཚང་རྒྱ་ནག་ནང་རྒྱང་བསྲིང་བྱ་རྒྱུ་ཕྱིར་འཐེན་བྱས་འདུག དེའང་NBA འི་ཚོགས་མི་ཡིན་པའི་ Houston Rockets རུ་ཁག་གི་འགན་འཛིན་ Daryl Morey ལགས་ཀྱིས་བདུན་ཕྲག་སྔོན་མའི་རེས་གཟའ་པ་སངས་ཉིན་རང་ཉིད་ཀྱི་ Twitter དྲ་གནས་ཐོག་ཧོང་ཀོང་ལ་རྒྱབ་སྐྱོར་གྱི་མཚོན་རྟགས་ཤིག་བརྒྱུད་སྤེལ་གནང་རྗེས།  རྒྱ་རིགས་མི་སེར་མང་པོས་དེར་ངོ་རྒོལ་གནང་པའི་རྐྱེན་གྱིས། སྐུ་ཞབས་ Morey ལགས་ཀྱིས་ལམ་སང་མཚོན་རྟགས་དེ་ཕྱིར་འཐེན་བྱས་ཏེ་དེ་ནི་ཁོང་སྒེར་གྱི་ལངས་ཕྱོགས་ཤིག་ཡིན་པའི་གསལ་བཤད་གནང་བ་མ་ཟད། NBA མཐུན་ཚོགས་ནས་དེའི་རྗེས་སུ་སྐུ་ཞབས་ Morey ལགས་ཀྱི་གནང་སྟངས་དེས་རྒྱ་ནག་གི་མང་ཚོགས་ལ་ཕོག་ཐུག་ཆེན་པོ་བཏང་ཡོད་སྟབས་དེའི་ཐོག་བློ་འགྱོད་ཡོད་པར་འགྲེལ་བརྗོད་གནང་ཡོད་པ་རེད། འོན་ཀྱང་རེས་གཟའ་ཟླ་བའི་ཉིན་ NBA མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ཉི་ཧོང་གི་ Kyodo གསར་ཁང་གི་བཅར་འདྲིར་དྭངས་ལེན་གནང་སྐབས། མཐུན་ཚོགས་དེའི་ངོས་ནས་Daryl Morey ལགས་ཀྱི་སྨྲ་བརྗོད་རང་དབང་ལ་གུས་བརྩི་ཞུ་བཞིན་ཡོད་པར་འགྲེལ་བརྗོད་གནང་བ་མ་ཟད། རེས་གཟའ་མིག་དམར་ཉིན་སླར་ཡང་སྤྱི་སྒྲགས་ཤིག་སྤེལ་བའི་ནང། NBA མཐུན་ཚོགས་ངོས་ནས་དེ་གའི་ཚོགས་མི་རྣམ་པའི་ཆབ་སྲིད་ཀྱི་ལངས་ཕྱོགས་ལ་གུས་བརྩི་ཞུ་བཞིན་པ་དང་། སྤྱིར་ཨ་རི་དང་རྒྱ་ནག་གཙོས་པའི་རྒྱལ་སྤྱིའི་མང་ཚོགས་སུ་འདྲ་ཞིག་ཡིན་རུང་གནད་དོན་འདྲ་མིན་ཐོག་བསམ་ཚུལ་འདྲ་མིན་ཡོད་པ་དེ་ཆོས་ཉིད་ཡིན་པ་བཞིན། མཐུན་ཚོགས་ངོས་ནས་དེ་གའི་རྩེད་འགྲན་པ་དང་ལས་བྱེད། དེ་བཞིན་རུ་ཁག་གི་སྦྱིན་བདག་སོགས་ཀྱི་སྨྲ་བརྗོད་རང་དབང་ལ་སྟངས་འཛིན་བྱེད་ཐུབ་ཐབས་མེད་སྐོར་འགྲེལ་བརྗོད་གནང་འདུག སྐུ་ཞབས་ Silver ལགས་ཀྱིས་བཀའ་མོལ་དེ་ལྟར་གནང་མ་ཐག    རྒྱ་ནག་གི་གཞུང་འབྲེལ་CCTV བརྙན་འཕྲིན་ལས་ཁང་དང་ tencent sports ཞེས་དྲ་རྒྱ་བརྒྱུད་རྩེད་འགྲན་ཐད་གཏོང་བྱེད་མཁན་ཚོང་ལས་ཁང་གིས་རྒྱ་ནག་ནང་ནས་རྩེད་འགྲན་དེ་རྒྱང་བསྲིངས་བྱ་རྒྱུ་ཕྱིར་འཐེན་བྱེད་རྒྱུ་གཏན་འཁེལ་ཡོད་སྐོར་བརྗོད་པ་མ་ཟད། CCTV བརྙན་འཕྲིན་ལས་ཁང་གིས། རྒྱལ་ཁབ་ཅིག་གི་ས་ཁོངས་བདག་དབང་དང་སྤྱི་ཚོགས་བརྟན་བརླིང་ལ་ཁ་གཏད་གདོང་ལེན་བྱས་པའི་གཏམ་བཤད་འདི་ལྟ་བུ་ནི་སྨྲ་བརྗོད་རང་དབང་གི་ཁྱབ་ཁོངས་སུ་རྩ་བ་ནས་གཏོགས་ཀྱི་མེད་པར་བརྗོད་དེ་སྐུ་ཞབས་ Silver ལགས་ཀྱི་བཀའ་མོལ་ལ་མཐའ་གཅིག་ཏུ་ངོ་རྒོལ་བྱས་འདུག གཞི་རྩའི་རྒྱ་ནག་ནང་དུ་སིལ་སྤོལ་རྩེད་འགྲན་ལ་དོ་དབྱིངས་ཧ་ཅང་ཆེན་པོ་ཡོད་པ་མ་ཟད། སྔར་ལོ་གཅིག་པོའི་ནང་ tencent བརྒྱུད་ NBA འི་རྩེད་འགྲན་ལྟ་མཁན་ས་ཡ་ ༥༠༠་ ལྷག་བྱུང་ཡོད་པ་དང་། NBAམཐུན་ཚོགས་ངོས་ནས་འདི་ལོའི་ཕྱི་ཟླ་ ༦ པའི་ནང་ tencent ཚོང་ལས་ཁང་དང་ལྷན་དུས་ཡུན་ལོ་ལྔ་ཅན་དང་ཨ་སྒོར་ཐེར་འབུམ་གཅིག་དང་ཕྱེད་ཀ་ལྷག་གི་ཚོང་གི་གྲོས་མཐུན་བཞག་ཡོད་པ་རེད་འདུག ད་ལྟའི་ཆར་ NBAམཐུན་ཚོགས་ཀྱི་ངོས་ ནས་ CCTV བརྙན་འཕྲིན་ལས་ཁང་གི་ཐག་གཅོད་ཐོག་འགྲེལ་བརྗོད་གང་ཡང་གནང་མི་འདུག  

རིང་མིན་རྒྱ་ནག་གི་སྲིད་འཛིན་ཞི་ཅིན་ཕིང་རྒྱ་གར་ལྷོ་ཕྱོགས་མངའ་སྡེ་ Tamil Nadu ནང་གཞུང་འབྲེལ་ཕྱོགས་བསྐྱོད་དུ་འབྱོར་གྱི་ཡོད་པ་དང་བསྟུན་རྩོམ་པ་པོ་དང་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་མངའ་སྡེ་དེའི་གྲོང་ཁྱེར་ Villupuram ནས་འཛིན་བཟུང་གིས་བཀག་ཉར་བྱས་ཡོད་པ་མ་ཟད་ཞི་ཅིན་ཕིང་གི་ལྟ་སྐོར་མཇུག་སྒྲིལ་མ་ཟིན་བར་དུ་ཁོང་ཁུལ་དེར་བཀག་བསྐྱིལ་གནང་སྲིད་པ་རེད་འདུག བརྒྱུད་ལམ་ཁག་ཏུ་ཐོན་པའི་གནས་ཚུལ་སྤེལ་གསལ་ཟླ་ ༡༠ ཚེས་ ༡༡ ནས་ ༡༣ བར་རྒྱ་གར་གྱི་ལྷོ་ཕྱོགས་གྲོང་ཁྱེར་ Mamallapuram ནང་རྒྱ་གར་གྱི་སྲིད་བློན་ Narendra Modi དང་རྒྱ་ནག་གི་སྲིད་འཛིན་ Xi Jinping གཉིས་དབར་ Sino-Indo summit ཞེས་ལོ་རྒྱུས་ཀྱི་རང་བཞིན་ལྡན་པའི་ཆེས་མཐོའི་གྲོས་མོལ་ཚང་འཛོམས་བྱ་རྒྱུ་ཡིན་པ་ལྟར་ཁ་ཉིན་གཟའ་སྤེན་པ་ཉིན་མངའ་སྡེ་དེའི་གྲོང་ཁྱེར་ Villupuram ཉེན་རྟོག་ལས་ཁང་ལ་རྒྱ་གར་གྱི་ནང་སྲིད་ལས་ཁུངས་བརྒྱུད་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་རྒྱ་དཀར་ནག་གཉིས་ཀྱི་ཆེས་མཐོའི་ལྷན་ཚོགས་ཚོགས་ཡུལ་གྱི་ས་ཚིགས་ཏུ་རྒྱ་ནག་གི་སྲིད་འཛིན་ལ་ངོ་རྒོལ་གནང་སྲིད་པའི་ཉེན་བརྡ་འབྱོར་ཡོད་སྟབས་སྔོན་འགོག་གི་ཆེད་དུ་བརྩོན་འགྲུས་ལགས་ཁ་ཉིན་ Villupuram མངའ་སྡེའི་མགྲོན་ཁང་ཞིག་ནས་འཛིན་བཟུང་གིས་ Kottappuram ས་གནས་ཉེན་རྟོག་ལས་ཁུངས་སུ་བཀག་ཉར་བྱས་ཡོད་པ་མ་ཟད་ཁོང་ནས་གོང་ཞུས་མགྲོན་ཁང་དེའི་ནང་ཁང་པ་ཞིག་རག་ཐབས་གནང་བཞིན་པ་དེས་ས་གནས་བདེ་འཇགས་ཉེན་རྟོག་པར་དོགས་ཟོན་སློང་ཡོད་པར་འགྲེལ་བརྗོད་གནང་ཡོད་པ་རེད། Villupuram བདེ་འཇགས་ཉེན་རྟོག་པ་ཁག་གཅིག་གིས་བརྗོད་པར་གཞིགས་ན་བརྩོན་འགྲུས་ལགས་ནས་ད་རེས་སླར་ཡང་སྲིད་འཛིན་ཞི་ཅིན་ཕིང་གི་ལྟ་སྐོར་དེའི་སྐབས་བོད་རང་དབང་འཁོད་པའི་འཕྲེད་དར་ཆེན་པོ་ཞིག་འཕྱར་རྒྱུའི་འཆར་གཞི་ ཡོད་སྟབས་ཁོང་གློ་བུར་དུ་ས་གནས་དེ་ནས་འཛིན་བཟུང་བྱས་ནས་ཁ་སང་སྔ་ཐོག་ Chennai གྱི་ Puzhal བཙོན་ཁང་དུ་གནས་སྤོས་བྱས་འདུག གནད་དོན་དེའི་ཐད་བསྟན་འཛིན་བརྩོན་འགྲུས་ལགས་ཀྱི་གྲོགས་པོ་ Friends of Tibet ཞེས་བོད་ཀྱི་གྲོགས་པོ་ཚོགས་པའི་འགན་འཛིན་སྐུ་ཞབས་ Sethu Das ལགས་ཀྱིས་སྤྱི་ཚོགས་དྲྭ་གནས་ཐོག་བརྩོན་འགྲུས་ལགས་ཁ་ཉིན་རེས་གཟའ་སྤེན་པ་ནས་འཛིན་བཟུང་གིས་བཀག་ཉར་འོག་ཡོད་པ་དང་སྲིད་འཛིན་ཞི་ཅིན་ཕིང་གི་ལྟ་སྐོར་མཇུག་སྒྲིལ་མ་བྱས་བར་དུ་གློད་བཀྲོལ་ཐོབ་ཐབས་མེད་པའི་གནས་སྟངས་ཞིག་ཆགས་ཡོད་པ་རེད་འདུག གཞི་རྩའི་བསྟན་འཛིན་བརྩོན་འགྲུས་ལགས་དེ་སྔོན་ཕྱི་ལོ་ ༢༠༠༢ དང་ ༢༠༠༥ སོ་སོར་སྐབས་དེའི་རྒྱ་ནག་གི་སྲིད་བློན་རྒྱ་གར་གྱི་གྲོང་ཁྱེར་ Mumbai དང་སྦེང་ལོར་གཉིས་ནང་ལྟ་སྐོར་ལ་འབྱོར་སྐབས་ངོ་རྒོལ་གྱིས་འཕྲེད་དར་འཕྱར་བར་བརྟེན་འཛིན་བཟུང་བཀག་ཉར་བྱས་མྱོང་ཡོད་པ་མ་ཟད། ཕྱི་ལོ་ ༢༠༠༦ ལོར་རྒྱ་ནག་གི་སྲིད་འཛིན་ Hu Jintao རྒྱ་གར་ལ་ལྟ་སྐོར་དུ་འབྱོར་སྐབས་རྒྱ་གར་གྱི་བདེ་འཇགས་ཉེན་རྟོག་ལས་ཁུངས་ནས་བསྟན་འཛིན་བརྩོན་འགྲུས་ལགས་ཀྱི་འགྲུལ་བཞུད་བཀག་སྡོམ་གྱིས་ཁོང་དྷརྨ་ས་ལར་བཞུགས་དགོས་པའི་དམ་བསྒྲགས་གནང་ཡོད་པ་བཅས་ཁོང་གིས་འདས་པའི་ལོ་ཡུན་མང་པོར་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་གྱི་ཁྲིམས་ཁང་དུ་དེ་འབྲེལ་གནད་དོན་གྱི་ཞུ་གཏུག་སླད་འགྲིམ་འགྲུལ་གནང་དགོས་བྱུང་ཡོད་པ་རེད།

ཉེ་ཆར་ཕྱི་ཚེས་ ༣ ཉིན་དབུ་འཛུགས་ཀྱིས་ཚེས་ ༥ བར་བཞུགས་སྒར་གངས་སྐྱིད་ཚོགས་ཁང་གསར་པའི་ནང་དུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ པའི་དགོངས་དོན་འོག་ཚོགས་དྲུང་ལས་ཁུངས་ཀྱི་རྐང་འགན་བཞེས་ཐོག་བསྐོང་ཚོགས་གནང་བའི་དམིགས་བསལ་ཚོགས་ཆེན་ཐེངས་གསུམ་པ་དེ་རིང་དངོས་སུ་མཇུག་སྒྲིལ་དང་སྦྲགས། ༸གོང་ས་༸སྐྱབས་མགོན་༸སྐུ་ཕྲེང་བཅུ་བཞི་པ་ཆེན་པོ་མཆོག་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བ་དང་། ཇི་སྲིད་བོད་ཁ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་༸སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་མགྲིན་དབྱངས་གཅིག་གྱུར་གྱི་གསོལ་འདེབས་རྒྱུ་སོགས་ཀྱི་གྲོས་ཆོད་ཁག་གཅིག་གཏན་འབེབས་གནང་སོང་། ཐེངས་འདིའི་དམིགས་བསལ་ཚོགས་ཆེན་གྱི་བརྗོད་གཞི་གཙོ་བོ་ནི་བོད་མིའི་སྒྲིག་འཛུགས་ཀྱི་ལོ་ལྔ་དང་ལྔ་བཅུའི་འཆར་གཞི་དང་། ༸རྒྱལ་དབང་༸སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་ཞེས་ཆགས་ཀྱི་ཡོད་པ་ལྟར། ཚོགས་དུས་རིང་ལ་ཚོགས་བཅར་བ་རྣམ་པ་ཚོགས་ཆུང་བཅུར་ཆ་བགོད་གནང་སྟེ་བརྗོད་གཞི་གཉིས་པོའི་ཐོག་ས་གནས་མི་མང་གི་དགོངས་འཆར་བསྡུ་རུ་བྱུང་ཁག་སྙན་སྒྲོན་དང་། དགོངས་ཚུལ་གསར་པ་གང་ཡོད་རྣམས་སྤུངས་ཏེ་གྲོས་བསྡུར་སྦྱང་བཤད་གནང་མཐར་དེ་རིང་ཚོགས་དུས་ཉིན་མཐའ་མའི་ཐོག་༸རྒྱལ་དབང་༸སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་དང་འབྲེལ། ཚོགས་བཅར་བ་རྣམ་པ་མགྲིན་དབྱངས་གཅིག་གྱུར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་༸སྐུ་ཕྲེང་བཅུ་བཞི་པ་ཆེན་པོ་མཆོག་༸སྐུ་ཚེ་༸ཞབས་པད་བསྐལ་པ་བརྒྱ་ཕྲག་བར་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བའི་གསོལ་བ་ཕུར་ཚུགས་སུ་འདེབས་རྒྱུ་དང་། ཇི་སྲིད་བོད་ཁ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་མགྲིན་དབྱངས་གཅིག་གྱུར་གྱི་གསོལ་བ་ཕུར་ཚུགས་སུ་འདེབས་རྒྱུ། ༸རྒྱལ་བའི་ཡང་སྲིད་ངོས་འཛིན་གནང་རྒྱུའི་འགན་དབང་ཆ་ཚང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཉིད་མཆོག་དང་། ༸གོང་ས་ཏཱ་བླའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་ཁོ་ནར་ཡོད་པ་ལས་གཞན་རྒྱལ་ཁབ་དང་གཞུང་། སྒྲིག་འཛུགས། མི་སྒེར་བཅས་སུ་ལ་ཡང་མེད། དེ་བཞིན་རྒྱ་ནག་གཞུང་གིས་དེ་སྔོན་བོད་བརྒྱུད་ནང་བསྟན་གྱི་སྤྲུལ་སྐུ་ངོས་འཛིན་བྱས་པ་སྤྱི་དང་། ལྷག་པར་དུ་ཕྱི་ལོ་ ༢༠༠༧ ལོར་གཏན་འབེབས་གནང་བའི་བླ་སྤྲུལ་ཡང་སྲིད་ངོས་འཛིན་བྱེད་ཕྱོགས་ཀྱི་བཙན་བཀའ་ཨང་ལྔ་པའི་བརྒྱུད་༸རྒྱལ་བའི་ཡང་སྲིད་ངོས་འཛིན་བྱེད་ཕྱོགས་ཐད་བྱུས་ངན་བཏོན་དང་འདོན་བཞིན་པ་དེར་དགག་པ་མཐའ་ཅིག་ཏུ་བྱ་རྒྱུ་ཞེས་གྲོས་ཆོས་ནང་གསེས་བཞི་ཅན་ཞིག་སྤྱི་མོས་ཀྱིས་གཏན་འབེབས་གནང་ཡོད།   ཚོགས་ཆེན་གྱི་གྲོས་གཞི་ལྔ་དང་ལྔ་བཅུའི་འཆར་གཞི་དང་འབྲེལ་ཏེ་ཚོགས་ཆུང་སོ་སོའི་རྒྱབ་གཉེར་ཁག་དང་རྒྱ་ཆེའི་མང་ཚོགས་ཀྱི་དགོངས་འཆར་ཡིག་ཐོག་ཏུ་གང་ཡོད་པ་རྣམས་བཀའ་སྤྱི་གཉིས་ནས་བཀའ་བསྡུར་དཔྱད་ཞིབ་གནང་སྟེ་ཕྱག་བསྟར་གནང་རྒྱུ་ཡིན་ཞེས་སྤྱི་མོས་ཀྱིས་གྲོས་ཆོད་གཏན་འབེབས་གནང་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ད་རེས་༸གོང་ས་མཆོག་དང་༸སྐུའི་ཡང་སྲིད་ཀྱི་གནད་དོན་ཐོག་སྤྱི་མོས་ཀྱིས་གྲོས་ཆོད་བཞག་ཐུབ་པ་དེ་རྒྱལ་རབས་ལོ་རྒྱུས་དང་རྩ་དོན། དེ་བཞིན་ཆོས་ཕྱོགས་བཅས་ཕྱོགས་ཡོངས་ནས་རླབས་ཆེན་གྱི་བརྡ་ལན་ཞིག་བཏང་ཐུབ་ཡོད་ཅེས་གསུངས་སོང་། དེ་བཞིན་ཐེངས་འདིའི་ཚོགས་ཆེན་ཐོག་ལྔ་དང་ལྔ་བཅུའི་ལས་གཞི་དང་འབྲེལ་བའི་དགོངས་འཆར་ཕེབས་པ་ཁག་ཕྱག་བསྟར་ཇི་ཐུབ་གནང་ངེས་དང་། མ་འོངས་པར་དགོངས་འཆར་གནང་སྐབས་ཆབ་སྲིད་དང་རྩ་དོན་ཐོག་དགོངས་པ་ཆེ་ཙམ་བཞེས་རྒྱུ་གལ་ཆེན་པོ་ཆགས་ཀྱི་འདུག་ཅེས་གསུངས་པ་དང་ཆབས་ཅིག་ཏུ་ ལོ་རྗེས་མ་སྟེ་ཕྱི་ལོ་ ༢༠༢༠ ལོ་དེ་༸གོང་ས་མཆོག་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་རྒྱུ་ཡིན་པ་ཡོངས་བསྒྲགས་གནང་སོང་།    གཞི་རྩའི་དམིགས་བསལ་ཚོགས་ཆེན་ཐེངས་གསུམ་པའི་ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་ལྷན་ཁང་གི་སྐུ་ཚབ། བཀའ་ཟུར་དང་སྤྱི་ཟུར། དེ་བཞིན་རྒྱ་བལ་འབྲུག་གསུམ་གྱི་ས་གནས་འགོ་འཛིན་དང་ས་གནས་འཐུས་མིའི་སྐུ་ཚབ། བོད་རང་དབང་བདེན་པའི་ལས་འགུལ་ཚོགས་ཆུང་ཁག་གི་སྐུ་ཚབ་རྣམ་པ། བོད་མི་གནས་ཡུལ་ཕྱི་རྒྱལ་ཡུལ་གྲུག་ཁག་གི་བོད་རིགས་སྤྱི་མཐུན་ཚོགས་པ་དང་བོད་རིགས་ཚོགས་པའི་སྐུ་ཚབ། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་བཅས་ཁྱོན་ས་གནས་ཁག་འདྲ་མིན་ ༢༤ ལྷག་ནས་ཚོགས་བཅར་བ་ ༣༤༠ ལྷག་མཉམ་ཞུགས་གནང་ཡོད་པ་དང་། ཚོགས་བཅར་བ་རྣམས་ལ་སང་རེས་གཟའ་ཉི་མའི་ཉིན་སྔ་དྲོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་བཀའ་སློབ་བཀའ་དྲིན་བསྩལ་གྱི་ཡོད་པ་རེད།

ཨ་རིའི་ New York ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཁ་སང་ཚེས་ ༣ ཉིན་གསར་འགོད་གསལ་བསྒྲགས་ཤིག་འདོན་སྤེལ་དང་སྦྲགས། རྒྱ་ནག་གཞུང་གིས་འཛིན་བཟུང་བཀག་ཉར་བྱས་པའི་ཧོང་ཀོང་གི་ཞི་རྒོལ་བ་རྣམས་འཕྲལ་དུ་གློད་བཀྲོལ་དགོས་པ་དང་ཧོང་ཀོང་གི་ལས་འགུལ་བ་དང་དེ་དག་གི་ནང་མི། སློབ་ཕྲུག་རྣམས་ནས་ཞི་བའི་ངོ་རྒོལ་དང་འབྲེལ་བའི་གནས་ཚུལ་རྣམས་སྤྱི་ཚོགས་དྲྭ་ལམ་བརྒྱུད་མཁོ་གཏོང་བྱེད་རྒྱུར་སུན་གཙེར་མི་བཟོ་བ་ཙམ་དུ་མ་ཟད་རྒྱ་ནག་སྐམ་ས་ཆེན་པོའི་རྒྱ་རིགས་རྣམས་ཧོང་ཀོང་གི་ཞི་བའི་ལས་འགུལ་ཁྲོད་མཉམ་ཞུགས་གནང་བཅུག་དགོས་པ་བརྗོད་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་ངེས་སྟོན་པ་ལྕམ་ Sophie Richardson ལགས་ཀྱིས་རྒྱ་ནག་གཞུང་གི་དཔོན་རིགས་ཚོས་ཧོང་ཀོང་ནང་གི་ཞི་རྒོལ་རྐྱེན་པས་རྒྱ་ནག་སྐམ་སའི་མང་ཚོགས་ལ་སེམས་འགུལ་ཐེབས་སྲིད་པའི་བློ་འཚབ་ཆེན་པོ་ཡོད་པར་བརྟེན་ཧོང་ཀོང་གི་ཞི་རྒོལ་ལ་རྒྱབ་སྐྱོར་གྱི་རྣམ་པ་སྤྱི་འདྲ་ཞིག་ལའང་དྲག་གནོན་བྱས་དང་བྱེད་མུས་ཡིན་པ་དེ་ལྟར་ཡང། དོན་དངོས་སུ་རྒྱ་ནག་སྐམ་ས་ཆེན་པོའི་རྒྱ་རིགས་ཚོས་ཧོང་ཀོང་གི་མང་གཙོའི་ལས་འགུལ་ལ་རྒྱབ་སྐྱོར་བྱས་པ་ནི་ཕྱོགས་གཉིས་ཀའི་མང་ཚོགས་ནས་མང་གཙོའི་རིན་ཐང་ལ་གཅིག་གྱུར་གྱི་ཆེ་མཐོང་ཡོད་པ་ཞིག་མཚོན་གྱི་ཡོད་སྐོར་གསུངས་འདུག འགྲོ་བ་མིའི་ཐོབ་ཐང་བལྟ་ཞིབ་ཚོགས་པས་གསར་འགོད་གསལ་བསྒྲགས་དེའི་ནང་འདི་ལོའི་ཕྱི་ཟླ་ ༦ པའི་ཟླ་སྟོད་ནས་འགོ་འཛུགས་བྱས་པའི་ཧོང་ཀོང་ནང་གི་གཞི་རྒྱ་ཆེ་བའི་ཞི་རྒོལ་དང་འབྲེལ་ཏེ་ད་ཆ་རྒྱ་ནག་གཞུང་ནས་སྐམ་ས་ཆེན་མོའི་ནང་ཧོང་ཀོང་གི་ཞི་རྒོལ་དང་འབྲེལ་བའི་གནས་ཚུལ་རིགས་ལ་དམ་དྲག་ཤུགས་ཆེ་བྱེད་བཞིན་པ་མ་ཟད་ཧོང་ཀོང་ནང་གི་ཞི་རྒོལ་དེ་དག་ཕྱིའི་སྟོབས་ཤུགས་ཀྱིས་ངལ་སྐུལ་བྱས་པའི་ཁ་བྲལ་བའི་འཚེ་བ་ཅན་གྱི་ལས་འགུལ་ཞིག་ཡིན་པར་འཁྱོག་བཤད་དྲིལ་སྒྲགས་རྒྱ་གང་ཆེ་སྤེལ་བཞིན་ཡོད་པ་རེད། ཚོགས་པ་དེས་རྒྱ་ནག་སྐམ་སའི་གཞུང་གིས་འདི་ལོའི་ཕྱི་ཟླ་ ༦ པ་ནས་བཟུང་ཧོང་ཀོང་གི་ཞི་རྒོལ་བ་དང་མང་གཙོའི་ལས་འགུལ་ལ་རྒྱབ་སྐྱོར་བྱེད་མཁན་དེ་བཞིན་དྲྭ་རྒྱའི་བརྒྱུད་ལས་འགུལ་ལ་རྒྱབ་སྐྱོར་གྱི་རྣམ་པ་བསྟན་མཁན་མང་པོ་ཞིག་འཛིན་བཟུང་དང་། སློབ་མ་རྣམས་ལ་དེའི་ནང་མཉམ་ཞུགས་གནང་ཆོག་གི་མེད་པའི་ཉེན་བརྡ་བཏང་ཡོད་སྐོར་འགྲེལ་བརྗོད་ཀྱིས་ད་ལྟ་རྒྱ་ནག་གཞུང་གི་འཛིན་བཟུང་བཀག་ཉར་འོག་ཡོད་པའི་རྒྱ་རིགས་སྐམ་སའི་མི་སྣ་ཁག་གཅིག་མངོན་གསལ་གནང་འདུག   དེའང་ཕྱི་ཟླ་ ༧ པའི་ནང་རང་ཉིད་ཀྱི་ Twitter བརྒྱུད་རྒྱ་ནག་གཞུང་ལ་སྐྱོན་བརྗོད་དང་ཧོོང་ཀོང་ནང་གི་ལས་འགུལ་ལ་རྒྱབ་སྐྱོར་གནང་རྐྱེན་འཛིན་བཟུང་བྱས་པ་ Quan Shixin དང་ཕྱི་ཟླ་ ༨ པའི་ནང་wechat སྐད་འཕྲིན་བརྒྱུད་ཧོང་ཀོང་གི་ལས་འགུལ་ལ་རྒྱབ་སྐྱོར་གྱི་འཕྲིན་ཐུང་སྤེལ་བས་འཛིན་བཟུང་བྱས་པ་ Ba Luning དེ་བཞིན་ཕྱི་ཟླ་ ༩ པའི་ནང་སྐད་འཕྲིན་དང་ངོ་དེབ་བརྒྱུད་ཧོང་ཀོང་གི་མང་གཙོའི་ལས་འགུལ་ལ་རྒྱབ་སྐྱོར་གྱི་གླུ་གཞས་བརྒྱུད་སྤེལ་བྱས་རྐྱེན་འཛིན་བཟུང་བྱས་པ་ Lai Rifu གཞན་ཡང་ཕྱི་རྒྱལ་གྱི་བརྒྱུད་ལམ་ལ་ཧོང་ཀོང་ནང་གི་གནད་དོན་སྐོར་སྐད་ཆ་བཤད་པ་དང་ Twitter བརྒྱུད་གནས་ཚུལ་སྤེལ་མཁན་ Chen Yunfei བཅས་ད་ལྟའང་བཙོན་ཁང་ནང་ཡོད་པ་མ་ཟད། ཁོང་རྣམ་པ་མང་ཆེ་བ་གཙོ་བོ་འཁྲུག་རྩོད་སློང་བའི་ནག་ཉེས་འོག་འཛིན་བཟུང་ཡོད་པ་དེ་ནི་རྒྱ་ནག་གཞུང་གིས་རྒྱུན་དུ་དེ་གཞུང་ལ་དྲྭ་རྒྱའི་བརྒྱུད་ཞི་བའི་སྒོ་ནས་སྐྱོན་བརྗོད་བྱེད་མཁན་རྣམ་པར་ཡང་ཡང་སྤྱོད་པའི་ཐ་སྙད་ཅིག་ཡིན་པ་དང་། ནག་ཉེས་དེ་ཐེངས་དང་པོ་ཕོག་རྣམས་བཙོན་ཁང་དུ་ལོ་ལྔ་བར་བཅུག་སྲིད་པའི་ཉེན་ཁ་ཡོད་སྐོར་བརྗོད་འདུག འགྲོ་བ་མིའི་ཐོབ་ཐང་བལྟ་ཞིབ་ཚོགས་པས་རྒྱ་ནག་གི་ཉེན་རྟོག་པས་ཧོང་ཀོང་གི་གནད་དོན་དང་འབྲེལ་ཡུལ་དེའི་ནང་གི་ལས་འགུལ་བ་དང་། ཤེས་ཡོན་མི་སྣ། ཁྲིམས་རྩོད་པ། སྤྱི་ཚོགས་དྲྭ་ལམ་བཀོལ་སྤྱོད་བྱེད་མཁན་སོགས་མི་སྣ་མང་དག་ཅིག་ཁྲིམས་སར་བཀུག་ཏེ་འདྲི་རྩད་སྣ་ཚོགས་དང་། དུས་རྟག་ཏུ་ཁ་པར་གཏོང་ནས་རྒྱུས་ལོན་བྱས་པ་མ་ཟད། ཧོང་ཀོང་ནང་སློབ་སྦྱོང་བྱེད་བཞིན་པའི་རྒྱ་ནག་སྐམ་སའི་སློབ་མ་རྣམས་ལ་ཧོང་ཀོང་གི་ལས་འགུལ་ཁྲོད་ཞུགས་མི་ཆོག་པའི་ཉེན་བརྡ་བཏང་བ་མ་ཟད། དབྱར་ཁའི་དགུང་གསེང་སྐབས་རྒྱ་ནག་སྐམ་སར་འབྱོར་སྐབས་ཧོང་ཀོང་ལ་ཕྱིར་ལོག་རྗེས་ལས་འགུལ་ཁྲོད་ཞུགས་ཀྱི་མིན་ཞེས་པའི་མཚན་རྟགས་འགོད་དུ་བཅུག་འདུག ཨོ་སི་ཊོ་ལི་ཡའི་ནང་སློབ་སྦྱོང་བྱེད་མཁན་རྒྱ་རིགས་ཚོའི་ཕ་མར་རྡིག་ར་སྐུལ་ནས་རང་ཉིད་ཀྱི་བུ་ཕྲུག་རྣམས་ཨོ་གླིང་ནང་གི་འབྲེལ་ཡོད་ལས་འགུལ་ནང་ཞུགས་ཆོག་གི་མེད་པའི་གནོན་ཤུགས་སྤྲད་པ་ཡང་བྱུང་འདུག ལྕམ་སྐུ་ Sophie Richardson ལགས་ཀྱིས་རྒྱ་ནག་སྐམ་སའི་ལས་འགུལ་བ་རྣམས་དང་དྲྭ་ལམ་བརྒྱུད་ཧོང་ཀོང་ལ་རྒྱབ་སྐོར་གནང་མཁན་རྣམས་ཀྱིས་སྙིང་སྟོབས་ཆེན་པོས་རྒྱལ་སྤྱིའི་འགྲོ་བ་མིའི་ཡོངས་ཁྱབ་ཐོབ་ཐང་སྲུང་སྐྱོབ་གནང་་ཡོད་པར་འགྲེལ་བརྗོད་དང་འབྲེལ། རྒྱལ་སྤྱིའི་ཁྲོད་ཀྱི་རྒྱལ་ཁབ་གཞན་ཚོས་ངེས་པར་དུ་འགྲོ་བ་མིའི་ཐོབ་ཐང་ལ་རྒྱབ་སྐྱོར་དང་འབྲེལ་ཏེ་རྒྱ་ནག་གཞུང་གི་ཆེས་སྡུག་རྩུབ་ཀྱི་བྱ་སྤྱོད་ལ་སྐྱོན་བརྗོད་བྱས་པ་བརྒྱུད་སྙིང་སྟོབས་ཅན་གྱི་རྒྱ་རིགས་དེ་གལ་རྒྱབ་སྐྱོར་གྱི་རྣམ་པ་ཆེད་བཏོན་གནང་དགོས་ཀྱི་ཡོད་པ་གསུངས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེང་གི་ཟིང་འཁྲུག་ཆེ་བའི་སྤྱི་ཚོགས་ནང་མེས་པོ་དམ་པ་གྷཱཾ་དྷཱི་མཆོག་གི་འཚེ་མེད་ཞི་བའི་ཐབས་ལམ་གྱི་ལམ་སྟོན་དགོས་མཁོ་ཆེ་བ་ཡིན་པར་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་ནས་ཉེ་ཆར་རྒྱ་གར་གྱི་ Livemint ཞེས་པའི་གསར་ཁང་གིས་བདག་ཉིན་ཆེན་པོ་མེས་པོ་དམ་པ་གྷཱཾ་དྷཱི་མཆོག་༸སྐུ་འཁྲུངས་ནས་ལོ་ངོ་ ༡༥༠ འཁོར་བའི་དུས་དྲན་དང་བསྟུན་གྷཱཾ་དྷཱི་མཆོག་གི་མཛད་རྗེས་སྐོར་གྱི་བཀའ་འདྲིར་བདག་ཉིན་ཆེན་པོ་མེས་པོ་དམ་པ་གྷཱཾ་དྷཱི་མཆོག་གི་འཚེ་མེད་ཞི་བའི་ཐབས་ལམ་གྱི་ལམ་སྟོན་ནི་དེང་གི་དཀའ་རྙོག་ཆེ་བའི་སྤྱི་ཚོགས་ནང་དགོས་མཁོ་ཧ་ཅང་ཆེ་ཞིང་། ཐབས་ལམ་དེ་ནི་གོ་ལའི་དཀའ་ངལ་ཁག་སེལ་རྒྱུའི་ཐབས་ལམ་བཟང་ཤོས་ཤིག་ཏུ་གཟིགས་ཀྱི་ཡོད་པ་བཀའ་ནན་བསྩལ་འདུག སྐབས་དེར་༸གོང་ས་མཆོག་གིས་མགོན་པོ་མཆོག་ལ་མེས་པོ་དམ་པ་གྷཱཾ་དྷཱི་བརྒྱུད་སེམས་འགུལ་གང་ཐེབས་སྐོར་བཀའ་འདྲིར་གྷཱཾ་དྷཱི་མཆོག་ནི་དུས་རབས་ ༢༠ པའི་ནང་འཚེ་མེད་ཞི་བའི་ལྟ་གྲུབ་ཐོག་ནས་ཤུགས་རྐྱེན་ཆེན་པོ་འཇོག་མཁན་གྱི་ཕུལ་བྱུང་སྐྱེས་པོ་ཞིག་ཡིན་པ་དང་དམ་པ་ཁོང་ནས་རྒྱ་གར་གྱི་ལོ་ངོ་ ༣༠༠༠ གྱི་གནའ་བོའི་རིག་གཞུང་གི་འཚེ་བ་མེད་པའི་ལྟ་གྲུབ་དང་བྱམས་བརྩེའི་བསླབ་བྱ་གཉིས་དངོས་སུ་རྒྱ་གར་གྱི་རང་བཙན་འཐབ་རྩོད་ཀྱི་ལས་འགུལ་ནང་སྤྱོད་དེ་རིན་ཐང་ལྡན་པ་ཞིག་བཟོས་ཡོད་པས་དེ་ནི་རླབས་ཆེན་ཞིག་ཡིན་པར་མངོན་པར་བསྟོད་པ་དང་ཆབས་ཅིག་ཏུ་སྐབས་དེར་མི་སྣ་ཁག་གཅིག་གིས་འཚེ་མེད་ཞི་བའི་ཐབས་ལམ་དེ་ཡིད་ཆེས་གནང་མེད་ཀྱང་དཀའ་ཚེགས་ཆེ་བའི་དུས་སྐབས་ལ་འཚེ་མེད་ཞི་བའི་ཐབས་ལམ་དེ་ནུས་པ་ལྡན་པ་ཞིག་ཏུ་གྱུར་ནས་རིམ་པས་ལྷོ་ཨ་ཕི་རི་ཀའི་སྲིད་འཛིན་དམ་པ་ Nelson Mandela དང་ཨ་རིའི་སྤྱི་དམངས་ཐོབ་ཐང་རྩོད་ལེན་པ་གྲགས་ཅན་ Marthin Luther King དམ་པ་མཆོག་བཅས་ནས་ཀྱང་གྷཱཾན་དྷཱིའི་ཐབས་ལམ་ལ་རྗེས་སུ་འབྲང་ཡོད་པ་བཀའ་བསྩལ་འདུག དེ་བཞིན་གསར་འགོད་པས་༸གོང་ས་མཆོག་ལ་ད་ལྟའི་དུས་སྐབས་སུ་གྷཱཾ་དྷཱིའི་ལྟ་གྲུབ་དང་འཚེ་མེད་ཞི་བ་གཉིས་དབར་སྐབས་དོན་གྱི་འབྲེལ་བ་ཇི་ཆགས་སྐོར་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་དེང་སྐབས་རྒྱལ་སྤྱིའི་ཚན་རིག་པ་མང་པོ་ཞིག་ནས་བྱམས་བརྩེ་ནི་འགྲོ་བ་མིའི་ལྷན་སྐྱེས་སུ་ཡོད་པ་ཞིག་ལ་ངོས་འཛིན་གནང་བཞིན་ཡོད་པ་བཀའ་བསྩལ་བ་དང་སྦྲགས། གནའ་བོའི་དུས་སྐབས་སུ་རང་ཉིད་གནས་སྡོད་བྱ་ཡུལ་གྱི་སྤྱི་ཚོགས་ཁྱོན་ཡོངས་དེ་སོ་སོའི་ནང་མི་དང་གྲོང་གསེབ་ལ་ངོས་འཛིན་གནང་བཞིན་ཡོད་ཀྱང་། ད་ཆ་སྤྱི་ཚོགས་ཞེས་པ་དེ་འཛམ་གླིང་ཁྱོན་ཡོངས་ལ་ངོས་འཛིན་གནང་བཞིན་པ་དང་ལྷག་དོན་དེའི་ནང་གི་འགྲོ་བ་མི་རྣམས་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་སྟབས། འགྲོ་བ་མི་གཅིག་གྱུར་གྱི་འདུ་ཤེས་ཐོག་ནས་དགོངས་པ་བཞེས་ཐུབ་ཚེ་འཚེ་མེད་ཞི་བ་དང་གྷཱཾ་དྷཱིའི་ལྟ་གྲུབ་དབར་འབྲེལ་བ་ཧ་ཅང་ཆེན་པོ་ཆགས་ཀྱི་ཡོད་པ་བཀའ་བསྩལ་བ་མ་ཟད་འགྲོ་བ་མི་སྒེར་གཅིག་ལ་མཚོན་ན་ང་ཚོའི་མ་འོངས་དང་མ་འོང་པའི་ཡར་རྒྱས་ཀྱི་གནས་བབ་གཉིས་ད་ལྟའི་འཛམ་གླིང་གི་སྤྱི་ཚོགས་ཁྱོན་ཡོངས་ལ་རག་ལུས་ཡོད་པར་བཀའ་བསྩལ་ཡོད་པ་རེད། ༸གོང་ས་མཆོག་གིས་ལོ་རྒྱུས་ཀྱི་ཐོག་ནས་འཕགས་བོད་དབར་ཆོས་ཕྱོགས་ནས་བླ་སློབ་ཀྱི་འབྲེལ་བ་དམིགས་བསལ་ཡོད་སྐོར་དང་བར་སྐབས་ཤིག་ནས་རྒྱ་གར་གནའ་བོའི་རིག་གཞུང་དེ་དག་ཉམས་གུད་དུ་ཕྱིན་ཡོད་སྟབས་རིག་གཞུང་དེ་དག་མི་ཉམས་རྒྱུན་འཛིན་ཆེད་བོད་པ་ཚོས་བདག་གཅེས་ལེགས་པོ་གནང་ཡོད་པ་མ་ཟད། མགོན་པོ་༸གང་ཉིད་མཆོག་གི་༸སྐུ་ཚེ་ཧྲིལ་པོའི་ཐུགས་འགན་གཙོ་བོ་བཞི་ཡོད་པའི་ནང་ནས་རྒྱ་གར་གྱི་ལོ་ངོ་སྟོང་ཕྲག་ལྷག་གི་ལོ་རྒྱུས་ལྡན་པའི་གནའ་བོའི་རིག་གཞུང་སླར་གསོ་གནང་ཐབས་སུ་ཐུགས་བརྩོན་གནང་བཞིན་ཡོད་པ་སོགས་ཀྱང་ངོ་སྤྲོད་མཛད་འདུག གསར་འགོད་པས་སླར་༸གོང་ས་མཆོག་ལ་༸སྐུ་ཉིད་མཆོག་ནས་མེས་པོ་དམ་པ་གྷཱཾ་དྷཱི་བཞིན་༸སྐུ་ཚེ་ཧྲིལ་པོའི་རིང་དཀའ་ཚེགས་དུ་མ་བྱུང་ཡོད་པར་ལྟོས་མེད་བཟང་ཕྱོགས་ཀྱི་དགོངས་པ་ཇི་ལྟར་བཞེས་ཀྱི་ཡོད་དམ་ཞེས་བཀའ་འདྲི་ཞུས་པར་མགོན་པོ་མཆོག་གིས་འཛམ་གླིང་ཐོག་ཡོད་པའི་འགྲོ་བ་མི་ཐེར་འབུམ་བདུན་ཁྲོད་༸སྐུ་ཉིད་མཆོག་འགྲོ་མི་གཅིག་ཡིན་པའི་འདུ་ཤེས་ཐོག་ནས་ཕན་ཚུན་དབར་ཁྱད་པ་གང་ཡང་གཟིགས་ཀྱི་མེད་པར་བཀའ་བསྩལ་བ་དང་སྦྲགས། ༸གོང་ས་མཆོག་གིས་དུས་ཀུན་ཏུ་བོད་མི་ཚོར་རྒྱ་མི་རིགས་དང་ཁ་གཏད་འཛིན་པ་ལས་མཛའ་གྲོགས་ཀྱི་འདུ་ཤེས་བཟུང་ན་ཁེ་ཕན་ཆེ་བ་ཡོད་པ་བཀའ་བསྩལ་གྱི་ཡོད་སྐོར་དང་། ད་ཆ་བོད་རྒྱ་གཉིས་དབར་ཡོད་པའི་དཀའ་རྙོག་དེ་གཙོ་བོ་རྒྱ་ནག་དམར་ཤོག་གི་འགོ་ཁྲིད་འགའ་ཤས་ཤིག་གིས་བྱེད་སྟངས་ཡིན་པ་ལས་མི་མང་དཀྱུར་མ་ཚོ་དང་འབྲེལ་བ་མེད་པས་དེར་ནམ་ཞིག་འགྱུར་བ་འགྲོ་རྒྱུ་ཡོད་པ་དང་ལྷག་དོན་རྒྱ་རིགས་འགོ་ཁྲིད་ཁག་གཅིག་གིས་རྒྱ་གཞུང་ནས་འདས་པའི་ལོ་ ༧༠ རིང་བོད་ཐོག་འཛིན་པའི་སྲིད་བྱུས་དེ་དངོས་ཡོད་གནས་ཚུལ་དང་མཐུན་གྱི་མེད་པ་ཤེས་རྟོགས་བྱུང་ནས་ད་ཆ་བོད་དོན་དཀའ་རྙོག་སེལ་སླད་ཅི་བྱ་གཏོལ་མེད་དུ་འགྱུར་བཞིན་པའི་གནས་སྟངས་འོག་རྒྱ་ནག་ནང་རིམ་པས་འགྱུར་བ་འགྲོ་ཡི་ཡོད་སྟབས། གནས་སྟངས་དེའི་འོག་མགོན་པོ་༸གང་ཉིད་མཆོག་མ་འོངས་ལོ་གཅིག་གཉིས་ནང་རྒྱ་ནག་ནང་ཕེབས་རྒྱུའི་རེ་བ་གཟིགས་ཀྱི་ཡོད་ཀྱང་མགོན་པོ་མཆོག་ནས་རྒྱ་གར་གྱི་རང་དབང་ལ་ཐུགས་ཧ་ཅང་མཉེས་པོ་ཡོད་པ་མ་ཟད། རྒྱ་གར་ནང་རང་དབང་ངང་ཡུན་རིང་བཞུགས་པ་དེས་ངོས་རང་གཅེས་ལང་གཏོང་འདུག་ཅེས་ཞལ་ཤོབ་དང་སྦྲགས་ནས་བཀའ་བསྩལ་གནང་འདུག ༸གོང་ས་མཆོག་གིས་༸སྐུ་ཉིད་མཆོག་ལ་གྷཱཾ་དྷཱི་མཆོག་དངོས་སུ་ཞལ་མཇལ་རྒྱུའི་གོ་སྐབས་བྱུང་མེད་ཀྱང་གྷཱཾ་དྷཱི་ཞེས་པའི་མཚན་སྙན་ཡོངས་སུ་གྲགས་པས་མཚན་ཡང་ཡང་གསན་མྱོང་ཡོད་སྟབས་བོད་ནང་བཞུགས་པའི་སྐབས་སུ་མཚན་མོའི་རྨི་ལམ་ནང་གྷཱོ་དྷའི་མཆོག་མཇལ་མྱོང་ཡོད་པར་བཀའ་བསྩལ་སྐབས་གསར་འགོད་པས་གལ་ཏེ་༸གོང་ས་མཆོག་ལ་གྷཱཾ་དྷཱི་མཆོག་དངོས་སུ་མཇལ་རྒྱུའི་གོ་སྐབས་བྱུང་ཚེ་བཀའ་མོལ་གང་གནང་རྩིས་ཡོད་དམ་ཞེས་པའི་བཀའ་འདྲི་ཞུས་པར་༸གོང་ས་མཆོག་གིས་དང་པོར་ངོས་ནས་ཁོང་གི་ཞབས་ལ་འདུད་རྒྱུ་དང་དེ་རྗེས་ཁོང་ནས་ངོས་ལ་རྒྱ་ནག་གི་མཉམ་དུ་དཀའ་རྙོག་སེལ་ཐབས་ཀྱི་ལམ་སྟོན་ཁག་གཅིག་གནང་སྲིད་ཀྱི་རེད་ཅེས་བཀའ་ལམ་མཛད་ཡོད་པ་རེད།

བྱང་ཀེལ་ཕོ་ནི་ཡའི་བོད་རིགས་སྤྱི་མཐུན་ཚོགས་པ་ནས་ Richmond གྲོང་སྡེ་ལྷན་ཚོགས་དང་སྤྱི་ཁྱབ་ལ་བོད་རིགས་སྤྱི་མཐུན་ཚོགས་པའི་སྡེ་བཞི་ཕུན་ཚོགས་གླིང་ཚོགས་ཁང་ཆགས་ཡུལ་གཞུང་ལམ་ལ་ Dalai Lama གཞུང་ལམ་ཞེས་མཚན་གདགས་རྒྱུ་ཞུ་སྐུལ་རིམ་པར་གནང་བ་ལྟར་ཁ་སང་ཕྱི་ཚེས་ ༢ ཉིན་ཀེལ་ཕོ་ནི་ཡའི་ Richmond གྲོང་སྡེ་ལྷན་ཚོགས་ཀྱི་འཐུས་མིའི་ཚོགས་འདུའི་ཐོག་སྤྱི་མོས་ཀྱིས་བོད་རིགས་སྤྱི་མཐུན་ཚོགས་པའི་སྡེ་བཞི་ཕུན་ཚོགས་ཁང་ཆགས་སའི་གཞུང་ལན་ལ་ཏཱ་ལའི་བླ་མའི་གཞུང་ལམ་ཞེས་མཚན་འདོགས་རྒྱུར་ཐུགས་ཐག་གཅོད་པ་མ་ཟད། དེའི་འགྲོ་གྲོན་ཆ་ཚང་གྲོང་སྡེ་ལྷན་ཚོགས་ནས་གནང་རྒྱུར་ཞལ་བཞེས་བྱུང་འདུག རླུང་འཕྲིན་ཁང་གིས་བྱང་ཀེལ་ཕོ་ནི་ཡའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཟུར་པ་བསྟན་འཛིན་རང་གྲོལ་ལགས་སུ་བཅར་འདྲི་ཞུས་པར་སྡེ་བཞི་ཕུན་ཚོགས་གླིང་ཚོགས་ཁང་ཆགས་སའི་གཞུང་ལམ་ལ་ཏཱ་ལའི་བླ་མའི་མཚན་འདོགས་རྒྱུའི་ཐག་གཅོད་གནང་བ་དེ་ལོ་རྒྱུས་ནང་གནད་འགགས་ཅན་ཞིག་ཡིན་པ་དང་། ལོ་ངོ་བཅུ་ཕྲག་མང་པོའི་རིང་༸གོང་ས་༸སྐྱབས་མགོན་ཆེན་པོ་མཆོག་ནས་བོད་རིགས་ཙམ་མིན་པར་རྒྱལ་སྤྱིའི་ཁྲོད་ཆོས་དང་རིག་གཞུང། ཁོར་ཡུག མི་རིགས་མཐུན་སྒྲིལ་ཡོང་ཐབས་སུ་མཛད་འཕྲིན་བླ་ན་མེད་པར་བསྐྱངས་བའི་བྱིན་རླབས་ཤིག་ཀྱང་ཡིན་པར་འགྲེལ་བརྗོད་གནང་སོང་། གཞི་རྩའི་བྱང་ཀེལ་ཕོ་ནི་ཡའི་བོད་རིགས་སྤྱི་མཐུན་ཚོགས་པས་གྲོང་སྡེ་ལྷན་ཚོགས་དང་གྲོང་སྡེ་སྤྱི་ཁྱབ་སྐུ་ཞབས་ Tom Butt ལགས་ཀྱི་མཚན་ཐོག་ཏུ་སྡེ་བཞི་ཕུན་ཚོགས་གླིང་ཚོགས་ཁང་ཆགས་ཡུལ་Huntington གཞུང་ལམ་གྱི་ཆ་ཤས་ཤིག་ལ་ Dalai Lama གཞུང་ལམ་ཞེས་མཚན་བསྒྱུར་བཅོས་གནང་དགོས་པ་དང་དེ་བཞིན་འདི་ལོ་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༤ ལ་ཕེབས་པར་༸རྒྱལ་བའི་༸སྐུའི་འཁྲུངས་སྐར་ཉིན་མོར་ཏཱ་ལའི་བླ་མའི་ཉིན་མོ་ཞེས་གསལ་བསྒྲགས་དགོས་པའི་འབོད་སྐུལ་ཞུས་པ་བཅས་གཞུང་ལམ་དེར་གནས་སྡོད་མང་ཚོགས་ཁག་ལས་མཚན་རྟགས་བསྡུ་རུབ་ཀྱིས་ཞུ་སྙན་ཕུལ་ཡོད་པ་ལྟར། Richmond གྲོང་སྡེ་ལྷན་ཚོགས་ནས་ཟླ་བ་ ༧ ཚེས་ ༡༦ ཉིན་༸གོང་ས་མཆོག་ལ་ཆེ་བསྟོད་དང་སྦྲགས་ཟླ་ ༧ ཚེས་ ༦ ཉིན་མོ་དེ་ཏཱ་ལའི་བླ་མའི་ཉིན་མོ་ཞེས་ཡོངས་བསྒྲགས་གནང་ཡོད་པ་རེད།