Day6

སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་དབུ་འཛུགས་གནང་ནས་དེ་རིང་ཉིན་གྲངས་དྲུག་པ་དེ་ཆགས་ཡོད་ཀྱང་། བོད་མིའི་སྒྲིགས་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་འཆར་འབུལ་གྱི་ལས་རིམ་དུས་ཐོག་ཕྱིན་མ་ཐུབ་པར་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་དང་དེའི་རྗེས་འབྲས་སྤྱི་ཚོགས་ནང་ལབ་གླེང་དང་དཀའ་རྙོག་འབྱུང་བཞིན་པའི་གནད་དོན་ཐོག་བགྲོ་གླེང་མུ་མཐུད་གནང་བཞིན་པ་ལྟར། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དེ་རིང་ཉིན་རྒྱབ་ཀྱི་ཚོགས་ཐེངས་ཐོག་གནད་དོན་ཆེ་ཆུང་ལ་ལྟོས་མེད་དཀའ་ངལ་ཞིག་ཡོད་པ་གསལ་པོ་ཡིན་སྟབས། འཛིན་སྐྱོང་བཀའ་ཤག་ནས་མིག་བཙུམ་ནས་མ་བཞུགས་པར་ད་རེས་ཀྱི་གྲོས་ཚོགས་དེའི་ཐོག་སྤྱི་འཐུས་རྣམ་པས་བགྲོ་གླེང་གནང་བའི་ཐོག་གོ་བསྡུར་གནང་སྟེ་བྱ་ལམ་བྱ་བདེའི་དགོངས་བཞེས་གནང་དགོས་གལ་ཡིན་པའི་འབོད་སྐུལ་གནང་སོང་། དེ་བཞིན་སང་ཉིན་གྲོས་ཚོགས་ཀྱི་ལས་དོན་གནང་ཕྱོགས་དང་འབྲེལ་གནད་དོན་ཁག་ཅིག་གི་ཐོག་བཞུགས་མོལ་ཚོགས་འདུ་ཞིག་ཚོགས་ཀྱི་ཡོད་པ་ལྟར། བྱང་ཨ་རིའི་སྐུ་ཚབ་དོན་གཅོད་ཀྱི་གནད་དོན་ཐོག་བྱ་ལམ་བྱ་བདེ་ཇི་ཡོད་ཐོག་དགོངས་ཚུལ་གསལ་པོ་སྤུངས་དགོས་པ་དང་། དེའི་མཇུག་སྐྱོང་གང་གནང་དགོས་མིན་བཅས་ཀྱི་ཐོག་དགོངས་པ་ནན་པོ་བཞེས་དགོས་པའི་ལམ་སྟོན་གསལ་པོ་གནང་ཡོད། སྤྱིར་ཐེངས་འདིའི་གྲོས་ཚོགས་ཐོག་སྤྱི་འཐུས་རྣམ་པས་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་དང་འབྲེལ་བའི་གནད་དོན་ཐོག་ཞིབ་འཇུག་ཚོགས་ཆུང་ཆེད་འཛུགས་གནང་དགོས་སྐོར་གསུང་མཁན་དང་། ཡང་ཁག་ཅིག་གིས་དེར་མོས་མཐུན་གནང་གི་མེད་པ་མ་ཟད། སྤྱི་འཐུས་ལ་ལས་བཀའ་ཤག་དང་། བཀའ་སྤྱི་ལྷན་རྒྱས་ནས་གནད་དོན་དེའི་ཐོག་ངོ་རྒོལ་གནང་མཁན་ཚོ་དང་ལྷན་དངོས་སུ་མཇལ་འཕྲད་ཀྱིས་གནས་སྟངས་ཞི་འཇམ་གནང་དགོས་པའི་དགོངས་ཚུལ་བཏོན་ཡོད། འཛིན་སྐྱོང་བཀའ་ཤག་གི་ངོས་ནས་གནད་དོན་དེའི་ཐོག་ཁྲིམས་ཁང་ལ་ཕེབས་རྒྱུ་མ་གཏོགས་ཐབས་ལམ་གཞན་མེད་པའི་འགྲེལ་བརྗོད་གནང་གི་ཡོད་པ་རེད། རྩ་བའི་གྲོས་ཚོགས་ཀྱི་ལས་ཉིན་དྲུག་པ་དེའི་ཐོག་སྔ་དྲོ་བྱང་ཨ་མི་རི་ཀའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་དང་འབྲེལ། སྐར་རྟགས་ཅན་གྱི་དྲི་བ་དྲིས་ལན་གྱི་ལས་རིམ་ཞིག་ཀྱང་ཕེབས་ཡོད་པ་དང་། དེ་བཞིན་ཉིན་རྒྱབ་ཏུ་ཨ་རིའི་དོན་ཁང་གི་སྔོན་རྩིས་འཆར་འབུལ་ཐོག་བགྲོ་གླེང་གནང་སྐབས་སུ་ཆོས་རིག་བཀའ་བློན་མཆོག་གིས་གསལ་བཤད་གནང་པར་འདས་པའི་ཉིན་ཤས་ནང་གནད་དོན་དེའི་སྐོར་བགྲོ་གླེང་རིམ་པ་བྱུང་བའི་ནང་སྤྱི་འཐུས་ཁག་ཅིག་ནས་བཀའ་ཤག་དགོངས་པ་ཞུས་དགོས་པ་སོགས་ཀྱི་བཀའ་མོལ་མང་དག་ཞིག་གསུང་མཁན་བྱུང་ཡོད་པ་ལྟར། དེ་ལྟར་གནང་བ་ཡིན་ན་ད་ལྟའི་བོད་ཀྱི་ཛ་དྲག་གནས་སྟངས་གང་འདྲ་ཆགས་ཀྱི་ཡོད་དམ་ཞེས་དྲི་བ་གནང་སོང་། སྤྱི་འཐུས་གཞན་ཁག་ཅིག་ནས་གནད་དོན་དེའི་ཐོག་ཞིབ་འཇུག་ཚོགས་ཆུང་འཛུགས་དགོས་སྐོར་གསུངས་ཡོད་ཀྱང་ཆོས་རིག་བཀའ་བློན་མཆོག་ནས་དེ་ལྟར་གནང་དགོས་པ་ཞིག་ལ་གཟིགས་ཀྱི་མེད་པ་དང་མོས་མཐུན་རྩ་བ་ནས་མེད་ཅེས་གསལ་བཤད་གནང་སོང་།

དེ་རིང་གྲོས་ཚོགས་ཀྱི་ལས་ཉིན་དྲུག་པ་དེའི་ཐོག་ནས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་རྩིས་འགོ་དང་ལས་དོན་ཐོག་ལ་གྲོས་ཚོགས་འཐུས་མི་རྣམས་པས་བགྲོ་གླེང་གསལ་བཤད་དང་དྲི་བ་བཅས་གནང་བའི་ཁྲོད། དུས་ཚོུད་དང་དྲི་བ་མང་ཆེ་བ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭའི་སྐོར་དང་འབྲེལ་མགོན་པོ་མཆོག་དགུང་ནའི་བབ་ཀྱི་ཆ་ནས་ད་ཆ་༸སྐུ་ངལ་གསོ་བཞུགས་ཀྱི་དུས་ཚོུད་ཐོག་དགོངས་པ་བཞེས་གལ་ཡིན་པ་དང་། ཉེ་ཆར་རྡོ་རྗེ་གདན་གྱི་གསུང་ཆོས་ར་བའི་ཉེ་འགྲམ་དུ་འབར་རྫས་རྙེད་སོན་བྱུང་སྐོར་དང་། ༸གོང་ས་མཆོག་གི་གསུང་ཆོས་ཞུ་མཁན་དང་མཇལ་བཅར་ཞུ་མཁན་ཁོངས་དོགས་གཞི་ཅན་མི་སྣ་ཁ་ཤས་ཐོན་བཞིན་པ་སོགས་༸རྒྱལ་བའི་༸སྐུ་ཕྱྭ་ལ་ཉེན་ཁར་གཟིགས་བཞིན་པའི་དགོངས་ཚུལ་ཁག་ཅིག་གསུང་མཁན་བྱུང་ཡོད་སྟབས། བདེ་སྲུང་བཀའ་བློན་འཕགས་པ་ཚེ་རིང་མཆོག་གིས་བདེ་སྲུང་ཀྱི་ལས་དོན་གཙོ་བོ་༸རྒྱལ་བའི་༸སྐུ་ཕྱྭ་ཡིན་པས་ལས་ཁུངས་ཀྱི་ངོས་ནས་༸སྐུ་ཕྱྭའི་ཐད་ལ་སྔར་ལྷག་མ་གཏོགས་འཐུས་ཤོར་བཏང་བ་རྩ་བ་ནས་མེད་ཅེས་གསུངས་སོང་། གཞན་ཡང་བདེ་སྲུང་ལས་ཁུངས་དང་འབྲེལ་ནས་བོད་མི་ཆབ་སྲིད་བཙོན་པའི་གནས་སྟངས་སྐོར་དང་སྐད་འཕྲིན་སོགས་སྤྱི་ཚོགས་འབྲེལ་མཐུད་ཀྱི་བརྒྱུད་ལམ་དང་འབྲེལ་ནས་བོད་པའི་སྤྱི་ཚོགས་ནང་གི་བདེ་འཇགས་སྐོར་སོགས་གནད་དོན་མང་ཅིག་གི་ཐོག་ལའང་དྲི་བ་དང་བགྲོ་གླེང་གནང་སོང་བ་དང་། ཁྱད་པར་དུ་སྤྱི་འཐུས་རྣམ་པས་བདེ་སྲུང་བཀའ་བློན་མཆོག་ལ་དྲི་བ་ཞུ་དོན་གཙོ་གནད་གཞན་གཅིག་ནི་བཙན་བྱོལ་བོད་མི་རྣམས་ཀྱི་སྐྱབས་བཅོལ་ལག་དེབ་དྲ་ཐོག་དེབ་སྐྱེལ་ཞུ་ཕྱོགས་དང་གནས་སྤོ་སྐོར་ལ་ཡིན་སྟབས། སྲིད་སྐྱོང་བློ་བཟང་སེང་གེ་མཆོག་གིས་བར་ལམ་བོད་མི་རྣམས་ཀྱི་དྲ་ལམ་དེབ་སྐྱེལ་ཞུ་ཕྱོགས་དང་འབྲེལ་ནས་དཀའ་ངལ་མང་དག་ཅིག་འཕྲད་དང་འཕྲད་བཞིན་པ་སོང་། བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་དབུས་གཞུང་ལ་དེའི་དུས་བཀག་གི་དུས་ཚེས་དེ་ཕྱི་ཟླ་ ༩ པའི་ཟླ་མཇུག་བར་ཕར་འགྱངས་ཡོང་བར་རེ་བ་ཞུས་ཡོད་ཀྱང་། རྒྱ་ཆེ་མང་ཚོགས་ནས་ལྷོད་ཡངས་མེད་པའི་ཐོག་ནས་གསལ་བསྒྲགས་སྔོན་སོང་ལྟར་གང་སྔ་སྔ་དྲ་ཐོག་དེབ་སྐྱེལ་གནང་དགོས་གལ་ཡིན་པའི་འབོད་སྐུལ་གནང་ཡོད། ལྷག་པར་དུ་སྲིད་སྐྱོང་མཆོག་གིས་རྒྱ་གར་གཞུང་ནི་ཕ་མ་ལྟར་བོད་མི་རྣམས་ལ་གཟིགས་སྐྱོང་རྒྱ་ཆེ་གནང་དང་གནང་བཞིན་པ་སོང་ཙང་། ད་ཆ་བོད་མི་ ༩༥༥ ཡི་སྐྱབས་བཅོལ་ལག་དེབ་བཟོ་ཆེད་འབྲེལ་ཡོད་ལས་ཁུངས་སུ་སྐྱེལ་ཡོད་པ་ལྟར་དེ་ཡང་གང་མགྱོགས་བཟོ་ཐུབ་པའི་རེ་བ་དང་། དེ་དེ་བཞིན་བོད་མི་རྣམས་རྒྱ་གར་ནས་ཕྱི་རྒྱལ་དུ་ཐོན་པར་ཕྱིར་ཐོན་མཐོང་མཆན་དང་ཆོག་མཆན་གཉིས་ཀ་སྟབས་བདེ་བ་བཟོ་ཆེད་མ་འོངས་པ་ Traverl Document འམ་ཕྱིར་བསྐྱོད་ངོ་སྤྲོད་ལག་འཁྱེར་ཁོ་ནས་གོ་ཆོད་ཐུབ་རྒྱུའི་འབད་བརྩོན་སྒོ་གང་ས་ནས་གནང་མུས་ཡིན་པ་གསུངས་ཡོད། དེ་རིང་བདེ་སྲུང་ལས་ཁུངས་ཀྱི་རྩིས་འགོ་དང་ལས་དོན་ལས་འཕྲོས་ནས་སྤྱི་འཐུས་གྲོས་ཚོགས་ནང་གི་འཐུས་མི་གཅིག་གིས་རྒྱ་ནག་འཐབ་ཕྱོགས་གཅིག་གྱུར་ལས་ཁང་གི་ལས་བྱེད་དང་མཉམ་དུ་ཞལ་ལག་བཞེས་ཡོད་པའི་གནད་དོན་སྐོར་སླར་ཡང་གླེང་སློང་བྱུང་ཡོད་སྟབས། དོན་གནད་དེ་གསུང་མཁན་སྤྱི་འཐུས་རྣམ་པས་དེའི་ཐོག་ལ་བདེ་སྲུང་ལས་ཁུངས་ནས་ཞིབ་འཇུག་མཐིལ་ཕྱིན་གནང་དགོས་པ་དང་། གནས་ཚུལ་འདི་དངོས་འབྲེལ་ཡིན་ཚེ་ཧ་ཅང་གི་ཚབས་ཆེ་ཡིན་པ་གསུངས་ཡོད། སྤྱི་འཐུས་ཁ་ཤས་ནས་དོགས་གཞི་གནང་ཡུལ་འབྲེལ་ཡོད་སྤྱི་འཐུས་དེ་ཉིད་ནས་གྲོས་ཚོགས་སུ་གསལ་བཤད་གནང་བའི་ཁྲོད། བདེ་སྲུང་བཀའ་བློན་མཆོག་གིས་དེའི་ཐད་ལ་བཀའ་ལན་ལམ་སེང་དང་ཁ་ཐུག་གནང་དགོས་པའི་འབོད་སྐུལ་དང་། མཐར་ཁྲིམས་ཞིབ་ཁང་ལའང་ཞུ་ས་ཡོད་དགོས་སྐོར་གསུངས་སོང་། གཞན་ཡང་སྤྱི་འཐུས་གཅིག་གིས་ད་ཆ་གྲོས་ཚོགས་ཀྱི་ཕྱི་ལ་ངོ་རྒོལ་ལས་འགུལ་སྤེལ་བཞིན་པ་གཙོས་ངོ་རྒོལ་གྱི་ལས་རིགས་ཡོང་སྐབས་བདེ་སྲུང་ལས་ཁུངས་ནས་ཁོང་རྣམ་པ་སུ་ཡིན་སོགས་རྒྱུས་ལོན་དང་སྤྱི་ཚོགས་ཀྱི་བདེ་འཇགས་ཐོག་དགོངས་པ་བཞེས་གནང་གི་ཡོད་མེད་ཐོག་བཀའ་འདྲི་ཞུ་མཁན་བྱུང་ཡོད་སྟབས། བཀའ་བློན་མཆོག་ནས་དེ་དག་ཀུན་ལ་ངོས་ཟིན་པའི་ཐོག་ནས་འགན་འཁུར་བཞིན་ཡོད་པ་གསུངས་ཡོད། ཁ་སང་ཉིན་རྒྱབ་ནས་དེ་རིང་ཉིན་གུང་གསོལ་ཚིགས་བར་གྲོས་ཚོགས་སུ་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱི་རྒྱུན་གྲོན་དང་དམིགས་བསལ།...

དེ་རིང་གྲོས་ཚོགས་ཚོགས་དུས་བཞི་པའི་ལས་ཉིན་དྲུག་པའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་ལས་བསྡོམས་དང་རྒྱབ་གཉེར་སྙན་ཐོ་འགོད་འབུལ་ཞུས་པའི་ཐོག་མཉམ་འབྲེལ་དང་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ཁག་ཅིག་ནས་རྩིས་སྙན་ལན་འདེབས་དང་དོགས་འདྲིའི་ལན་འདེབས་སོགས་ལ་ཐུགས་སྣང་ཆུང་བ་ཡོད་པར་མངོན་པ་སོགས་ཀྱི་རྒྱབ་གཉེར་ཁག་ཅིག་ཕུལ་གནང་སོང་། དེ་ཡང་དེ་རིང་གྲོས་ཚོགས་ཚོགས་དུས་བཞི་པའི་ལས་ཉིན་དྲུག་པའི་སྔ་དྲོ་ཐོག་སྐར་རྟགས་ཅན་གྱི་དྲི་བ་ཁག་ཅིག་ལ་བཀའ་ལན་དང་བགྲོ་གླེང་གནང་པ་དང་། དེ་རྗེས་ནང་སྲིད་ལས་ཁུངས་ཀྱི་ལོ་འཁོར་སྙན་ཐོ་ཐོག་བགྲོ་གླེང་གི་ལས་རིམ་མཇུག་བསྡུ་ཟིན་མཚམས་ཚོགས་ཐེངས་གཉིས་པ་དང་གསུམ་པ་གཉིས་ལ་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་ལས་བསྡོམས་སྙན་ཐོ་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་ནས་འགོད་འབུལ་ཞུས་སོང་། མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་ངོས་ནས་འདས་པའི་ཟླ་བ་དགུ་ཙམ་རིང་ལ་སྤྱི་ཁྱབ་རྩིས་ཞིབ་ལས་ཁང་ནས་རྩིས་ཞིབ་ཟིན་པའི་ལས་ཁུངས་སམ་སྡེ་ཚན་ཁག་ ༡༧༨ ཡོད་པ་ལས་མང་ཚོགས་རྩིས་ཁྲའི་ཚོགས་ཆུང་ལ་ལས་ཁུངས་སམ་སྡེ་ཚན་ ༡༧༢ ཀྱི་སྙན་ཐོ་འབྱོར་བ་བཞིན་དེ་དག་ཐོག་ཞིབ་འཇུག་གནང་པའི་ཁྲོད། དུས་ཚོད་རྒྱས་བཅད་ནང་རྩིས་སྙན་ཁག་ལ་ལན་འདེབས་འབྱོར་བ་གྲངས་ ༡༢༧ བྱུང་འདུག་པ་དང། ཚོགས་ཆུང་གི་ལས་ཡུན་རིང་རྩིས་སྙན་དང། རྩིས་སྙན་ལན་འདེབས། དོགས་འདྲིར་ལན་འདེབས། དེ་བཞིན་དུ་རྩིས་ཞིབ་དང་ནང་ཞིབ་བཅས་ཀྱི་མཚོན་པའི་འབྲེལ་ཡོད་ལྷན་ཁང་ཁག་གི་རྩིས་པ་སོགས་ཁྱོན་མི་གྲངས་ ༣༡ ཙམ་ལ་འདྲི་རྩད་གནང་འདུག ཚོགས་ཆུང་གི་ངོས་ནས་སྙན་ཐོའི་ནང་སྤྱི་ཡོངས་ཀྱི་གནས་སྟངས་ཆ་ནས་རྒྱབ་གཉེར་ཁག་ ༥ སྟོན་འདུག་པ་ལས་མཉམ་འབྲེལ་ཁག་དང་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ཁག་ཅིག་ནས་རྩིས་སྙན་ལན་འདེབས་དང་དོགས་འདྲིའི་ལན་འདེབས་སོགས་ལ་ཐུགས་སྣང་ཆུང་བ་དང་། ལྷག་པར་དུ་ཁོངས་སོ་སོའི་འགན་འཛིན་ལྷན་ཚོགས་ཐོག་རྩིས་ཀྱི་སྐྱོན་གནད་མང་དག་ཅིག་ལ་རྩིས་བསུབ་བཀའ་འཁྲོལ་བཏང་བ་དང།...

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གྲོས་ཚོགས་ཀྱི་ལས་ཉིན་དྲུག་པའི་ཐོག་སྐར་རྟགས་ཅན་གྱི་དྲི་བ་ཁག་ཅིག་ལ་བཀའ་ལན་གནང་པའི་ཁྲོད། བཀའ་ཤག་གི་ངོས་ནས་ཕྱི་རྒྱལ་ཁག་ཏུ་བོད་མིའི་གཞིས་ཆགས་ཟུར་འཛུགས་དང་སློབ་གྲྭ་གསར་འཛུགས་གནང་རྒྱུའི་གནས་སྟངས་དེ་དཀའ་ལས་ཁག་པོ་ཆགས་ཡོད་པ་གསུངས་སོང་། དེ་ཡང་དེ་རིང་གྲོས་ཚོགས་ཚོགས་དུས་བཞི་པའི་ལས་ཉིན་དྲུག་པའི་སྔ་དྲོ་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་ཀྱིས་བཀའ་ཤག་ནས་ཕྱི་རྒྱལ་ཡུལ་གྲུ་ཁག་ཏུ་གཞིས་ཆགས་ཟུར་འཛུགས་དང་སློབ་གྲྭ་གསར་འཛུགས་བྱེད་པའི་ཐབས་ནུས་ཡོད་པར་མཐོང་ངམ་ཞེས་དང་དེ་མིན་མིག་མཐོང་ལག་ཟིན་དུ་རང་མི་རིགས་འདི་མི་རིགས་གཞན་ནང་དུ་རྒྱ་མཚོར་ཁ་བ་བབ་པ་བཞིན་ཐིམ་དུ་འགྲོ་ངེས་པ་དེའི་ཐབས་ལམ་ཇི་འཚོལ་ཞེས་སྐར་རྟགས་ཅན་གྱི་དྲི་བ་གཉིས་ཕུལ་སོང་། སྐབས་དེར་སྲིད་སྐྱོང་མཆོག་གིས་དྲི་བའི་བཀའ་ལན་དུ་ད་ལྟའི་ཆར་ཕྱི་རྒྱལ་ཡུལ་གྲུ་ཁག་ཏུ་བོད་མིའི་ཆེད་གཞིས་ཆགས་དང་སློབ་གྲྭ་ཟུར་འཛུགས་བྱེད་ཐུབ་ཐབས་མ་མཐོང་ཞེས་དང་། ཕྱི་རྒྱལ་དུ་ཡོད་པའི་བོད་མི་རྣམས་མི་རིགས་གཞན་གྱི་ནང་སིམ་ཡལ་དུ་མི་འགྲོ་བའི་ཆེད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དུས་དང་རྣམ་པ་ཀུན་ཏུ་བོད་མི་ཚོར་བཀའ་སློབ་ལམ་སྟོན་ཕེབས་བཞིན་པའི་ཐོག་བོད་མིའི་སྒྲིག་འཛུགས་ཀྱིས་གོ་སྐབས་ནམ་བྱུང་ལ་ལམ་སྟོན་རིམ་པ་གནང་བཞིན་ཡོད་པ་མ་ཟད། ས་གནས་སོ་སོའི་བོད་རིགས་རྣམས་ནས་ཀྱང་སེམས་ཁུར་ཆེ་བཞེས་ཀྱིས་སྤྱི་ཁང་འཛུགས་སྐྲུན་དང་འབྲེལ་བོད་མིའི་ཐོུང་མ་ཡིན་པའི་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་ཆེད་འབད་བརྩོན་ཞུ་མུས་ཡིན་པ་གསུངས་སོང་། གོང་གསལ་སྤྱི་འཐུས་ཀྱིས་བསྐྱར་དུ་སྲིད་སྐྱོང་མཆོག་ལ་སྲིད་སྐྱོང་གི་སྐབས་གཉིས་ཀྱི་ལས་ཡུན་རིང་ཕྱི་རྒྱལ་ཁག་ཏུ་བོད་པའི་སློབ་གྲྭ་ཟུར་འཛུགས་བྱ་རྒྱུ་ཐད་དགོངས་པ་བཞེས་ཡོད་མེད་དང་། དེ་འབྲེལ་ཐབས་ལམ་འཚོལ་ཞིབ་གནང་པ་རྣམས་ལམ་ལྷོང་མ་བྱུང་བ་ཞིག་ཡིན་མིན་བཅས་ཀྱི་དྲི་བ་ཕུལ་བར་སྲིད་སྐྱོང་མཆོག་གིས་ཕྱི་རྒྱལ་མང་ཚོགས་ཁྲོད་བོད་པའི་གཞིས་ཆགས་ཟུར་འཛུགས་དང་སློབ་གྲྭ་གསར་འཛུགས་གནང་རྒྱུའི་བཀའ་མོལ་ཞིག་བྱུང་ཡོད་ཀྱང་། དོན་དངོས་ཐོག་ཕྱི་རྒྱལ་ཁག་ཏུ་སློབ་གྲྭ་ གསར་འཛུགས་གནང་པར་སློབ་ཕྲུག་གདང་ངེས་དང་དགེ་རྒན་ཚད་ལྡན་དགོས་པ་བཅས་ཀྱི་གཞི་རྩའི་ཆ་རྐྱེན་ཁག་ཅིག་ངེས་པར་ཚང་དགོས་པའི་གནས་སྟངས་འོག་དེ་ལྟར་ཡོང་ཐབས་མེད་སྐོར་གསུངས་པ་དང་། ལྷག་དོན་གཞིས་ཆགས་ཟུར་འཛུགས་བྱ་རྒྱུའི་ལས་འཆར་ལྟ་བུ་ལ་ཆ་མཚོན་ན་གནས་ཡུལ་དེའི་ཁྲིམས་སྒྲིག་དང་། ས་གནས་བོད་མིའི་ངོས་ནས་འདོད་མོས་ཡོད་མེད་སོགས་ཀྱི་གནས་སྟངས་དུ་མའི་ཆ་ནས་ལག་བསྟར་ཞུ་རྒྱུ་དཀའ་བ་ཆགས་ཡོད་པ་ལུང་འདྲེན་གྱིས་ད་ཆ་ས་གནས་ཁག་གཅིག་གི་ནང་སྤྱི་ཁང་གསར་རྒྱག་ཞུས་པའི་ཉེ་འཁོར་དུ་བོད་མི་གནས་སྡོད་བྱེད་མཁན་མང་དུ་འགྲོ་མུས་ཡིན་པ་གསུངས་སོང་། ད་དུང་སློབ་གྲྭ་གསར་འཛུགས་དང་འབྲེལ་ཏེ་སྤྱི་འཐུས་ཤིག་གིས་འཕྲོས་དོན་དྲི་བའི་ཚུལ་དུ་ཕྱི་རྒྱལ་ཁག་ལ་བོད་མིའི་གཞིས་ཆགས་དང་སློབ་གྲྭ་དགོས་པའི་དངོས་ཡོད་གནས་སྟངས་ཤིག་ཆགས་ཡོད་ཀྱང་། ཕྱི་རྒྱལ་དུ་ཡོད་པའི་ཕ་མ་གཉིས་ཀ་བོད་པ་ཡིན་ནའང་བུ་ཕྲུག་བོད་སྐད་མ་རྒྱབ་པའི་དཀའ་ངལ་ཆེན་པོ་འཕྲད་བཞིན་ཡོད་སྟབས། གཞིས་ཆགས་ལས་བོད་མིའི་སློབ་གྲྭ་ཟུར་འཛུགས་ཞུ་གལ་ཆེ་བ་ཆགས་ཡོད་སྐོར་གསུངས་པ་དང་འབྲེལ། སློབ་གྲྭ་གསར་འཛུགས་ཞུ་མི་ཐུབ་པའི་རྒྱུ་མཚན་གང་ཡིན་དང་། སྒྲིག་འཛུགས་ཀྱི་ངོས་ནས་གཟའ་མཇུག་སློབ་གྲྭའི་དགེ་རྒན་ཚོར་དམིགས་བསལ་མཐུན་འགྱུར་སྦྱར་རྒྱུའི་དགོས་པ་ཡོད་མེད་བཅས་ཀྱི་དྲི་བ་ཕུལ་བར་སྲིད་སྐྱོང་མཆོག་ནས་ཕྱི་རྒྱལ་ཁག་ཏུ་ཡོད་པའི་བོད་ཕྲུག་ཚོའི་ཆེད་དུ་བོད་པའི་སློབ་གྲྭ་ལོགས་སུ་བཙུགས་པ་ལ་བོད་ཡིག་ཙམ་མིན་པར་རྒྱལ་ཁབ་དེའི་ཤེས་ཡོན་གྱི་གནས་ཚད་དང་མཐུན་པའི་སློབ་སྦྱོང་འདྲ་མཉམ་ཞིག་སྤྲོད་དགོས་པ་དང་། དེ་ལ་དཔག་པའི་སློབ་ཡོན་མཐོ་པོ་ཞིག་བཞག་དགོས་པས་བོད་མིའི་མི་འབོར་དང་དཔལ་འབྱོར་གནས་བབས་བཅས་ལ་གཞིགས་ན་བོད་པའི་སློབ་གྲྭ་གསར་འཛུགས་ཞུ་ཐབས་མེད་སྐོར་གསལ་བཤད་གནང་ཡོད། དེ་བཞིན་སྐབས་དེར་སྤྱི་འཐུས་གཞན་ཞིག་གིས་བཀའ་ཤག་གི་ངོས་ནས་ཕྱི་རྒྱལ་ཡུལ་གྲུ་ཁག་གི་གཟའ་མཇུག་སློབ་གྲྭའི་དགེ་རྒན་ཚོ་ལོ་གསུམ་རེ་མཚམས་སུ་འཁྱུར་བསྟུན་ལེགས་གསོལ་དུ་ཕྱག་འཁྱེར་ཞིག་ཕུལ་སྲོལ་ཡོད་པ་བཞིན་དེ་འདྲའི་ཕྱག་འཁྱེར་ཞིག་བོད་རིགས་ཚོགས་པའི་ཚོགས་གཙོ་ ༡༤ དང་རྒྱུན་ལས་རྣམས་ལ་འབུལ་རྒྱུ་གསར་གཏོད་གནང་སྐྱོང་ཡོང་བའི་འབོད་སྐུལ་ཞུ་དོན་ལྟར་སྲིད་སྐྱོང་མཆོག་གིས་ཁོང་རྣམ་པར་དགའ་སྤོབས་ཐོག་ནས་ཕྱག་འཁྱེར་དེ་ལྟར་གནང་རྒྱུ་ཡིན་པ་བཀའ་སོགས་གནང་སོང་། གཞི་རྩའི་དེ་རིང་གྲོས་ཚོགས་ཀྱི་ལས་ཉིན་དྲུག་པའི་སྔ་དྲོའི་ཚོགས་ཐུན་སྐབས་གྲོས་ཚོགས་ཀྱི་འཐུས་མི་རྣམ་པས་སྐྱེས་ལྡན་སོ་ནམ་གྱི་ལས་གཞི་དང་རྒྱ་གར་གྱི་མི་སེར་བཟོ་རྒྱུའི་གནད་དོན་སྐོར། དེ་བཞིན་གསར་འགྱུར་སྤྱི་མཐུན་ཚོགས་པ་དང་བོད་མི་གསར་འབྱོར་སྡོད་ཁང་། གཞན་ཡང་བལ་ཡུལ་ཚེ་རིང་རྒན་གསོ་ཁང་དང་བོད་ཀྱི་བེུད་ཀྱི་ཉིན་མོ་སོགས་གནད་དོན་མང་དག་ཅིག་གི་སྐོར་ལ་གླེང་སློང་ཤུགས་ཆེ་བྱུང་སོང་།

དེ་རིང་ཟླ་ ༣ ཚེས་ ༢༠ ཉིན་གྲོས་ཚོགས་ཀྱི་ལས་ཉིན་དྲུག་པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཕྱི་དྲིལ་བཀའ་བློན་བསྐོ་གཞག་མ་གནང་པའི་ཐད་དགོས་པ་རྒྱུ་མཚན་མང་དག་ཡོད་སྐོར་གསུངས་སོང་། དེའང་ཁ་ཉིན་ཟླ་ ༣ ཚེས་ ༡༨ ཉིན་གྲོས་ཚོགས་ཀྱི་ལས་ཉིན་ལྔ་པ་དང་དེ་རིང་ལས་ཉིན་དྲུག་པ་བཅས་སུ་གྲོས་ཚོགས་འཐུས་མི་རྣམ་པས་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་སྐོར་ལས་བེུད་ཀྱི་ནུས་སྤེལ་བའི་སྲིད་བྱུས་དང་འབྲེལ་བའི་ཐོག་ལ་དོགས་འདྲི་དང་དགོངས་འཆར། མ་འོངས་ལས་དོན་ཐོག་དགོངས་འཆར་དང་གསལ་བཤད་སོགས་མང་དག་ཕེབས་ཡོད་པ་རེད། ལྷག་པར་དུ་བེུད་ཀྱི་གནད་དོན་སྐོར་ལས་སྤྱི་འཐུས་ཁ་ཤས་ཀྱིས་འཛིན་སྐྱོང་ནས་ཕོ་མོ་འདྲ་མཉམ་གསུང་བཞིན་ཡོད་ནའང་ད་ལྟའི་བཀའ་ཤག་གི་སྒྲུབ་ཆ་ཐད་བསམ་ཚུལ་དང། ཐེངས་འདིའི་གྲོས་ཚོགས་ཐོག་ནས་ཕྱི་དྲིལ་བཀའ་བློན་བེུད་ཅིག་བསྐོ་གཞག་དགོས་སྐོར་གསུངས་ཡོད་སྟབས། སྲིད་སྐྱོང་བློ་བཟང་སེང་གེ་མཆོག་གིས་བཀའ་བློན་བསྐོ་གཞག་མ་གནང་པའི་ཐད་ལ་རྒྱུ་མཚན་དུ་མ་ཡོད་ཀྱང་། གཙོ་བོ་སྲིད་སྐྱོང་མཆོག་གི་ལྟ་གྲུབ་གཞི་བཞག་བསྐོ་གཞག་གནང་གི་ཡོད་པ་བཀའ་ལན་གནང་སོང་། རྩ་བའི་དེ་རིང་ཉིན་རྒྱབ་བར་གྲོས་ཚོགས་འཐུས་མི་རྣམ་པས་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་ཁོངས་ཉེ་ཆར་ཚོགས་པའི་བེུད་ནུས་སྟོབས་གོང་སྤེལ་གྱི་ཚོགས་ཆེན་དང་པོའི་ཐོག་ལ་བགྲོ་གླེང་དང་། སྒོས་སུ་བོད་མིའི་སྒྲིག་འཛུགས་ནས་གསལ་བསྒྲགས་བསྐྱངས་པའི་བེུད་ཉིན་མོ་སྲུང་བརྩི་ཞུ་རྒྱུའི་ཐད་ལ་སྤྱི་འཐུས་རྣམ་པའི་དགོངས་ཚུལ་མང་དག་ཅིག་སྤུངས་གནང་སོང་། འོན་ཀྱང་སྲིད་སྐྱོང་མཆོག་གིས་སྐབས་དེར་སྤྱི་འཐུས་རྣམ་པའི་དྲི་བར་བཀའ་ལན་གནང་པ་དང་སྦྲགས། བོད་མིའི་སྒྲིག་འཛུགས་ཀྱི་ཐོག་ནས་ཕོ་མོ་དབྱེ་འབྱེད་རིགས་རྩ་བ་ནས་གནང་གི་མེད་ཀྱང་། བོད་པའི་སྤྱི་ཚོགས་ནང་གོམས་གཤིས་དང་ནང་བསམ་བློའི་ཐོག་ནས་དབྱེ་འབྱེད་ཡོང་གི་ཡོད་པ་དེའང་གཙོ་བོ་བོད་མིའི་སྒྲིག་འཛུགས་ཀྱི་བེུད་ནུས་སྤེལ་བའི་སྲིད་བྱུས་ཀྱི་གོ་རྟོགས་སྤེལ་བའི་བརྒྱུད་ནས་སྤྱི་ཚོགས་ཀྱི་བསམ་བློར་འགྱུར་བ་ཕྱིན་པའི་པའི་ཐོག་ནས་དབྱེ་འབྱེད་ཀྱི་བསམ་བློ་དེ་མེད་པ་ཆགས་དགོས་སྐོར་གསུངས་སོང་བ་མ་ཟད། ཁྱད་པར་དུ་སྲིད་སྐྱོང་མཆོག་གིས་འདི་ལོ་ནས་གསུམ་པའི་ཚེས་བཅིུས་དེ་བེུད་ཉིན་མོར་སྲུང་བརྩི་ཞུ་རྒྱུའི་ཐད་སྤྱི་འཐུས་འགའ་ཡིས་རན་མཚམ་གཟིགས་མིན་སོགས་དགོངས་ཚུལ་འདྲ་མིན་ཕེབས་ཡོད་ནའང་། ལོ་གཅིག་གཉིས་རྗེས་ཕན་གནོན་ཇི་བྱུང་གཟིགས་གནང་རྒྱུ་གལ་ཆེ་ཡིན་པ་གསུངས་ཡོད་པ་རེད། དེ་རིང་ཉིན་རྒྱབ་ནས་གྲོས་ཚོགས་སུ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་རྩིས་འགོ་དང་འབྲེལ་སྤྱི་འཐུས་རྣམ་པའི་སྤྱི་ཚོགས་འཕྲོད་བསྟེན་གྱི་ལས་དོན་ཐོག་ལ་དྲི་བ་དྲིས་ལན་དང་བགྲོ་གླེང་སོགས་གནང་སོང་།

བདུན་ཕྲག་སྔོན་མའི་རེས་གཟའ་སྤེན་པ་ཉིན་འཛིན་སྐྱོང་བཀའ་ཤག་གིས་འོས་བསྡུ་སྒྲིག་གཞི་བསྐྱར་བཅོས་ཁྲིམས་འཆར་ལ་དགག་པ་གནང་པའི་ཐོག་སྲིད་སྐྱོང་གིས་གཙོས་པའི་བཀའ་བློན་རྣམ་པ་གྲོས་ཚོགས་ནས་ཕྱིར་ཐོན་གནང་ཡོད་པ་རེད།  འོན་ཀྱང་དེ་རིང་གྲོས་ཚོགས་ཀྱི་ལས་ཉིན་དྲུག་པའི་ཐོག་སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པ་གྲོས་ཚོགས་ཀྱི་ལས་རིམ་ཐོག་མུ་མཐུད་མཉམ་ཞུགས་གནང་པ་དང་འབྲེལ། མ་འོངས་པར་བཙན་བྱོལ་བོད་མིའི་འོས་བསྡུ་དེ་སྔོན་འགྲོ་དང་དངོས་གཞི་བཅས་ཐེངས་གཉིས་ལས་ཐེངས་གཅིག་དགོས་སླད་དུ་ཁྲིམས་འཆར་དེར་འགྱུར་བ་གཏོང་རྒྱུ་ནི་འཛིན་སྐྱོང་བཀའ་ཤག་གི་ངོས་ནས་རྩ་ཆེ་ཤོས་ཤིག་ཏུ་བརྩི་བཞིན་ཡོད་ཅེས་གསུངས་སོང་། ཁ་ཉིན་རེས་གཟའ་སྤེན་པའི་ཉིན་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་འཆར་ཟིན་ཚོགས་ཆུང་གིས་ཞིབ་འཇུག་གནང་པའི་འོས་བསྡུའི་སྒྲིག་གཞི་བསྐྱར་བཅོས་ཀྱི་འཆར་ཟིན་དང། ཚོགས་ཆུང་གི་གྲུབ་དོན། དེ་བཞིན་རྒྱབ་གཉེར་སྙན་ཐོ་བཅས་གྲོས་ཚོགས་སུ་སྙན་སྒྲོན་ཞུས་ཡོད་པ་དང། བསྐྱར་བཅོས་ཁྲིམས་འཆར་དེའི་ནང་སྔོན་འགྲོ་དང་དངོས་གཞིའི་འོས་བསྡུ་སྒྲིག་ལུགས་རང་འཇགས་གཞག་ཡོད་པ་ལྟར། དེ་དག་གཉིས་ཀྱི་དབར་ལ་དུས་ཡུན་དེ་ཟླ་བ་གཉིས་ལྷག་ཙམ་ཐུང་དུ་བཏང་ཡོད་པ་རེད། དེ་རིང་སྲིད་སྐྱོང་མཆོག་གིས་གྲོས་ཚོགས་སུ་རེས་གཟའ་སྤེན་པ་ཉིན་བཀའ་བློན་རྣམ་པ་གྲོས་ཚོགས་ནས་ཕྱིར་ཐོན་གནང་དོན་གང་ཡིན་གསལ་བཤད་གནང་པར་རྒྱལ་སྤྱིའི་རྒྱལ་ཁབ་ཁག་དང་རྒྱ་གར་བཅས་ཀྱི་འོས་བསྡུའི་འགྲོ་ལུགས་སྤྱི་དང། ལྷག་པར་དུ་འདས་པའི་སྲིད་སྤྱིའི་འོས་བསྡུའི་སྐབས་བྱུང་བའི་སྤྱི་ཚོགས་ཁྲོད་ཀྱི་རྙོག་གླེང་དང་སྲིད་སྐྱོང་སྒེར་གྱི་མྱོང་བ། དེ་བཞིན་དུས་ཡུན་རིང་དྲག་པར་བརྟེན་ནས་བཀའ་ཤག་གི་ལས་འཆར་མང་པོ་ཞིག་ཕྱག་བསྟར་གནང་མི་ཐུབ་པའི་ངལ་བ་འཕྲད་ཡོད་སྐོར་སོགས་གསུངས་པ་དང་འབྲེལ། གལ་ཏེ་འོས་བསྡུ་ཐེངས་གཉིས་གནང་སྲོལ་ཡོད་པ་དེ་རང་འཇག་གནས་པ་ཡིན་ན།  དེས་རྒྱ་མིའི་རྒྱུག་ཁྱི་དེ་ཚོར་འོས་བསྡུའི་སྐབས་སུ་དཀྲོག་གཏམ་སྤེལ་རྒྱུར་དུས་ཚོད་མང་པོ་རག་པའི་ཉེན་ཁ་ཆེན་པོ་ཡོད་པ་གསུངས་སོང་། དེ་བཞིན་ད་ལན་འཛིན་སྐྱོང་བཀའ་ཤག་གིས་གྲོས་ཚོགས་ནས་ཕྱི་ཐོན་གནང་པ་དེས་གྲོས་ཚོགས་ལ་བརྩི་འཇོག་མ་ཞུས་པ་ཞིག་མིན་སྐོར་གསུངས་ཡོད། སྲིད་སྐྱོང་མཆོག་གིས་གྲོས་ཚོགས་སུ་གསལ་བཤད་ཞུས་ཟིན་མཚམས་སུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་གཙོ་སྦྲེལ་པོ་གཉིས་ནས་ཚོགས་ཆུང་ལ་དེ་སྔའི་གྲོས་ཆོད་གཞིར་བཟུང་གིས་ལམ་སྟོན་དང་བཀོད་ཁྱབ་གནང་སྐོར་གསལ་བཤད་དང་འབྲེལ། འོས་བསྡུའི་སྒྲིག་གཞི་བསྐྱར་བཅོས་ཁྲིམས་འཆར་སྙན་ཐོ་འདིར་གྲོས་ཚོགས་འཐུས་མི་དང་བཀའ་ཤག་གཉིས་ཀྱི་ཐོག་ནས་བགྲོ་གླེང་དང། དོན་ཚན་རེ་རེ་བཞིན་གཏན་འབེབས་གནང་རྒྱུ་གཙོས་ཟུར་བརྗོད་གྲོས་འཆར་སོགས་བསྣམ་ཕེབས་རྒྱུར་གྲོས་ཚོགས་སུ་ལམ་ཁ་ཡོད་ཅེས་གསུངས་ཡོད། གཞི་རྩའིདེ་རིང་སྔ་དྲོའི་གྲོས་ཚོགས་ཀྱི་ཚོགས་ཐེངས་དང་པོར་འོས་བསྡུའི་སྒྲིག་གཞི་བསྐྱར་བཅོས་དང་འབྲེལ་ནས་སྲིད་སྐྱོང་མཆོག་གིས་གཙོས་པའི་བཀའ་བློན་རྣམ་པ་གྲོས་ཚོགས་ནས་ཕྱིར་ཐོན་གནང་པའི་གནད་དོན་ཐོག  སྲིད་སྐྱོང་གིས་གསལ་བཤད་དང་ཚོགས་གཙོའི་ལམ་སྟོན་གསུང་བཤད་མ་གནང་གོང་ཁ་ཉིན་ཟླ་ ༣ ཚེས་ ༡༨ ཉིན་བོད་ཁམས་ཉ་རོང་ནས་ཡིན་པའི་རང་ལོ་ ༢༤ སོན་པའི་བོད་མི་ན་གཞོན་པདྨ་རྒྱལ་མཚན་ལགས་ཀྱིས་རྒྱ་གཞུང་གིས་བོད་མི་ཐོག་འཛིན་པའི་སྲིད་བྱུས་ལ་ཞི་རྒོལ་སླད་རང་ལུས་མེར་བསྲེགས་གནང་པའི་གནས་ཚུལ་རྣམས་གྲོས་ཚོགས་སུ་སྙན་སྒྲོན་ཞུས་ཏེ་བོད་མི་མང་སྤྱི་འཐུས་ལྷན་ཚོགས་ཀྱིས་ཁོང་གི་ནང་མི་ཉེ་འབྲེལ་རྣམས་ལ་གདུང་སེམས་མཉམ་བསྐྱེད་ཞུས་སོང་།

དེ་རིང་ཟླ་ ༩ ཚེས་ ༢༦ ཉིན་གྲོས་ཚོགས་ཀྱི་ལས་ཉིན་དྲུག་པར་བོད་མིའི་སྒྲོག་འཛུགས་ཤེས་རིག་ལས་ཁུངས་ཀྱི་ལོ་འཁོར་ལས་བསྡོམས་ཐོག་བགྲོ་གླེང་གནང་སྐབས་སྤྱི་འཐུས་རྣམ་པས་ཤེས་རིག་ལས་ཁུངས་ཀྱིས་དེ་སྔ་འགྲེམས་སྤེལ་གནང་བའི་བྱང་ཨ་རིའི་གཟའ་མཇུག་སློབ་གྲྭའི་བོད་ཡིག་སློབ་དེབ་ཁག་བོད་ཀྱི་བརྡ་སྤྲོད་རིག་པའི་གཞུང་ལུགས་དང་མཐུན་གྱི་མེད་པར་སྐྱོན་བརྗོད་ཤུགས་ཆེ་སྦྲགས་དྲི་བ་དྲི་ལན་གནང་སོང་། སྐབས་དེར་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་གཟའ་མཇུག་སློབ་གྲྭའི་བོད་ཡིག་སློབ་དེབ་ཐོག་མ་རྩོམ་སྒྲིག་གནང་ཕྱོགས་ཀྱི་རྒྱབ་ལྗོངས་ལོ་རྒྱུས་ངོ་སྤྲོད་དང་འབྲེལ། སློབ་དེབ་ཁག་ ༣ འདོན་སྤེལ་གནང་པའི་ནང་ཁྱོན་ཤོག་གྲངས་ ༦༠༩ ཡོད་པའི་ལས་ཤོག་གྲངས་ ༩ མ་གཏོགས་གཞན་ཚང་མ་བརྡ་སྤྲོད་རིག་པ་དང་མཐུན་པ་བཟོས་ཡོད་པ་དང་། ཤོག་གྲངས་ ༩ པོའི་དེའང་ཕྱི་རྒྱལ་གྱི་བོད་རིགས་སློབ་མ་རྣམས་ནས་བོད་སྐད་བཤད་ཐུབ་ཕྱིར་ཆེད་དམིགས་གནང་པ་ཞིག་ཡིན་པ་མ་ཟད། བོད་ཀྱི་སྐད་ཡིག་དེ་སྐད་ཡིག་གཉིས་པའི་ཚུལ་དུ་སློབ་ཁྲིད་མི་བྱེད་ཐབས་མེད་བྱུང་སྐོར་གསུངས་སོང་། ལྷག་དོན་བཀའ་བློན་མཆོག་གིས་གྲོས་ཚོགས་འཐུས་མི་རྣམས་ནས་ཤེས་རིག་ལས་ཁུངས་ཀྱི་གནང་སྟངས་དེ་རྒྱ་གཞུང་གིས་བྱེད་སྟངས་ལས་ཆེས་སྡུག་པ་རེད་གསུངས་པར་ངོས་ལེན་རྩ་བ་ནས་ཞུ་ཐབས་མེད་ཅེས་བཀའ་ལན་གནང་སོང་། ལར་ནས་ཤེས་རིག་བཀའ་བློན་མཆོག་གིས་སློབ་དེབ་དེ་དག་སྤུས་ཚད་དང་ལག་ལེན་དངོས་ནང་ཚད་ལྡན་ཞིག་ཡོང་ཆེད་ལོ་གཅིག་རིང་ཚོད་ལྟའི་ཐོག་ནས་བེད་སྤྱོད་བྱ་རྒྱུ་ཡིན་པ་དང་གནད་འགག་བྱུང་ཚེ་སློབ་དེབ་དེ་ཕྱིར་འཐེན་ཞུ་ཆོག་པར་འགྲེལ་བརྗོད་གནང་ཡོད་པ་རེད། རྩ་བའི་གནད་དོན་དེའི་ཐོག་གྲོས་ཚོགས་སུ་སྤྱི་འཐུས་ཁག་ཅིག་ནས་གཟའ་མཇུག་གི་སློབ་དེབ་དེ་དག་ཤེས་རིག་ལས་ཁུངས་ཀྱི་ངོ་བོའི་ཐོག་ནས་མ་ཡིན་པར། ས་གནས་རང་གི་ངོ་བོའི་ཐོག་ནས་དཔར་བསྐྲུན་གནང་ཐུབ་ན་དགེ་མཚན་ཆེ་བར་གཟིགས་ཀྱི་ཡོད་པའི་དགོངས་ཚུལ་ཕུལ་ཡོད་པ་རེད། ཡང་ལ་ལས་སློབ་དེབ་དེའི་བརྒྱུད་ཕྱི་རྒྱལ་དུ་འཚར་ལོངས་བྱུང་བཞིན་པའི་བོད་ཕྲུག་རྣམས་དམའ་མཐའ་ལ་བོད་པའི་གཤིས་ལུགས་དང་བོད་སྐད་སྐྱོན་ཡག དེ་བཞིན་བོད་ཡིག་འབྲི་ཀློག་ཡོང་ཐབས་ཙམ་ལས་སྙན་ངག་སུམ་རྟགས་ཀྱི་ཐོག་ལ་རེ་བ་གང་ཡང་གནང་གི་མེད་སྟབས། ཤེས་རིག་ལས་ཁུངས་ནས་གཟའ་མཇུག་སློབ་གྲྭའི་སློབ་དེབ་རྩོམ་སྒྲིག་གི་ལས་གཞིར་མུ་མཐུད་རྒྱབ་སྐྱོར་གནང་སྐྱོ་ཡོང་བའི་འབོད་སྐུལ་གནང་མཁན་ཡང་བྱུང་སོང་། དེ་རིང་གི་གྲོས་ཚོགས་ནང་གཞན་ཡང་སྤྱི་འཐུས་འགའ་ཞིག་གིས་ད་ཆ་དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ཤེས་རིག་ལས་ཁུངས་ལ་རྩིས་སྤྲོད་གནང་བཞིན་པའི་རྐྱེན་གྱིས་ས་གནས་ས་ཐོག་ཏུ་དགེ་རྒན་གདང་ངེས་ཞིག་མེད་པ་དང་། ལྷག་དོན་སློབ་འཁྲིད་གནང་ཕྱོགས་སོགས་ཀྱི་ཐད་ལ་འཐུས་ཤོར་ཆེན་པོ་འགྲོ་མུས་ཡིན་པའི་ཐོག་ལ་དྲི་བ་ཁ་ཤས་ཕེབས་སོང་བར་བཀའ་བློན་མཆོག་གིས་བཀའ་ལན་གནང་ཡོད་པ་རེད། ཤེས་རིག་ལས་ཁུངས་ཀྱི་འཛིན་སྐྱོང་འོག་མེད་པའི་རང་སྐྱོང་སློབ་གྲྭ་ཁ་ཤས་ནང་བོད་རིགས་མ་ཡིན་པའི་སློབ་མའི་གྲངས་འབོར་མང་དུ་འགྲོ་བ་དང་ཆབས་ཅིག གཞིས་ཆགས་ཁག་གི་ཕ་མ་རྣམས་ནས་འདོད་མོས་ཡོད་པ་ལྟར་ཤེས་རིག་ལས་ཁུངས་ཀྱི་སྲིད་བྱུས་རྐྱེན་པས་སློབ་གྲྭ་དེ་དག་ནང་བུ་ཕྲུག་གཏོང་ཐུབ་ཀྱི་མེད་པའི་དཀའ་ངལ་སོགས་འཕྲད་སྐོར་གླེང་ནས་དེའི་ཐོག་དགོངས་པ་བཞེས་དགོས་པའི་དགོངས་འཆར་ཕུལ་མཁན་བྱུང་ཡོད་པ་རེད།

དེ་རིང་ཟླ་ ༩ ཚེས་ ༢༦ ཉིན་གྲོས་ཚོགས་ཀྱི་ཚོགས་དུས་གཉིས་པའི་ལས་ཉིན་དྲུག་པ་འདིའི་ཐོག་ནས་ བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ནང་དངོས་སུ་བཞུགས་ནས་ཞབས་ལོ་ ༣༤ སོང་བ་ད་ལྟའི་ཤེས་རིག་དྲུང་ཆེ་འབུམ་རམས་པ་ངག་དབང་རབ་རྒྱས་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་ཏུ་འོས་འདེམས་གནང་སོང་། དེ་ཡང་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཉིས་ལས། ཁྲིམས་ཞིབ་པ་ཚེ་རིང་དོན་གྲུབ་མཆོག་གིས་འདི་ལོའི་ཕྱི་ཟླ་ ༡༡ ཚེས་ ༡ ནས་མཛད་ཁུར་དགོངས་པ་སྔ་སྣུར་ཞུས་ཡོད་སྟབས། དེ་རིང་གྲོས་ཚོགས་ནས་ཁྲིམས་ཞིབ་པ་གཅིག་གི་འོས་འདེམས་གནང་ཡོད་པ་རེད། སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་བཙན་བྱོལ་བོད་མིའི་བཅའ་ཁྲིམས་ལིའུ་ ༦ དོན་ཚན་ ༦༣ ནང་གསེས་དང་པོའི་དགོངས་དོན་ལྟར། ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་སྤྱི་འཐུས་ཚོགས་གཙོ་ཚོགས་གཞོན་མཆོག དེ་བཞིན་སྲིད་སྐྱོང་མཆོག་བཅས་ནས་ཁྲིམས་ཞིབ་པ་ཆེ་བ་ཟུར་པ་རྣམ་རྒྱལ་ཚེ་རིང་མཆོག་དང་བཀའ་ཟུར་ཀརྟི་རིན་པོ་མཆོག དེ་བཞིན་བཀའ་ཟུར་ཚེ་རིང་ཕུན་ཚོགས་མཆོག་བཅས་ལས་བསྡུས་པའི་འོས་མི་འདེམས་སྒྲུག་ཚོགས་ཆུང་ཞིག་ཆེད་འཛུགས་གནང་དོན། ད་ལྟའི་དྲིལ་བསྒྲགས་དྲུང་ཆེ་སྣང་ས་ཆོས་སྒྲོན་ལགས་དང་ཤེས་རིག་དྲུང་ཆེ་འབུམ་རམས་པ་ངག་དབང་རབ་རྒྱས་ལགས་གཉིས་ཁྲིམས་ཞིབ་པའི་འོས་མིག་ཏུ་མིང་འདོན་གནང་ཡོད་པ་རེད། དེ་རིང་གྲོས་ཚོགས་སུ་ངོ་ཡོད་སྤྱི་འཐུས་ ༤༣ རྣམས་ཀྱིས་འོས་ཤོག་འཕེན་པའི་ཁྲོད་ཤེས་རིག་དྲུང་ཆེ་ངག་སབང་རབ་རྒྱལ་ལགས་ལ་ར་འོས་གྲངས་...