Tibetan Royal Year of 2151 | Year of the Wood Dragon

Day6

གྲོས་ཚོགས་ཚོགས་དུས་དྲུག་པ་མུ་མཐུད་ཚོགས་མ་ཐུབ་པ་དེ་མུར་ལྷག་པ།

སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ ལས་ཉིན་ ༤ སྟེ་ཟླ་ ༩ ཚེས་ ༢༢ ཉིན་སྤྱི་འཐུས་ ༡༩ ངོ་བཅར་མ་ཞུས་པའི་རྐྱེན་གྱིས་གྲོས་ཚོགས་ཀྱི་ངོ་ཡོད་རྩ་འབོར་གྱི་གསུམ་ཆ་གཉིས་མ་ཚང་སྟབས་གྲོས་ཚོགས་ཕྱིར་བཤོལ་དང་ལས་ཉིན་ ༥ ཚེས་ ༢༣ ཉིན་ཚོགས་གཙོ་སྦྲེལ་པོས་བཞུགས་མོལ་ཚོགས་འདུ་བསྐོང་ཡོད་ཀྱང་། སྤྱི་འཐུས་ ༡༨ ཀྱིས་མཉམ་ཞུགས་མ་གནང་བའི་ཁྲོད་དེ་རིང་སླར་ཡང་གྲོས་ཚོགས་མུ་མཐུད་ཚོགས་མ་ཐུབ་པ་དེ་མུར་ལྷག་སོང་། ཐེངས་འདིའི་གྲོས་ཚོགས་ཀྱི་ལས་ཉིན་ ༡ ཐོག་སྤྱི་འཐུས་ཤིག་ལ་རྒྱའི་གཞུང་ཚབ་ཁང་གི་མི་སྣ་དང་ཐུག་འཕྲད་བྱས་པའི་ཉེས་འཛུགས་ལས་འཕྲོས་ཏེ་ལས་ཉིན་ ༤ ཐོག་མདོ་སྟོད་སྤྱི་འཐུས་ ༡༠ དང་ཆོས་ལུགས་སྤྱི་འཐུས་ ༩ ཡིས་བདེ་སྲུང་ལས་ཁུངས་ནས་གནད་དོན་དེ་གཙང་བཟོ་མ་གནང་བར་དུ་གྲོས་ཚོགས་ལ་བཅར་ཐུབ་ཀྱི་མེད་སྐོར་གསུངས་པར་བརྟེན་གྲོས་ཚོགས་ཕྱིར་བཤོལ་གནང་དགོས་བྱུང་བའི་རྗེས། ཕྱི་ཚེས་ ༢༣ ཉིན་རྒྱབ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོའི་ལམ་སྟོན་འོག་ཚོགས་དྲུང་ལས་ཁུངས་ནས་གྲོས་ཚོགས་མུ་མཐུད་ཚོགས་ཐུབ་ཐབས་དང་གཞི་རིམ་མི་མང་རེ་འབོད་ཚོགས་པའི་ལས་འགུལ་དང་འབྲེལ་བའི་སྐོར་བཅས་བརྗོད་གཞི་ཁག་གཉིས་ཐོག་གོ་བསྡུར་གནང་སླད་སྤྱི་འཐུས་རྣམ་པའི་དབར་ལ་བཞུགས་མོལ་ཚོགས་འདུ་འཚོགས་ཐབས་གནང་ཡོད། འོན་ཀྱང་སྐབས་དེར་དབུས་གཙང་སྤྱི་འཐུས་བརྒྱད་དང་མདོ་སྨད་སྤྱི་འཐུས་དགུ། དེ་བཞིན་ཡོ་རོབ་སྤྱི་འཐུས་གཅིག་བཅས་ཁྱོན་སྤྱི་འཐུས་བཅོ་བརྒྱད་མཉམ་ཞུགས་མ་གནང་སྟབས་བཞུགས་མོལ་ཚོགས་འདུ་ཚོགས་ཐུབ་མེད་པ་རེད། བཞུགས་མོལ་ཚོགས་འདུར་མཉམ་ཞུགས་མ་གནང་མཁན་སྤྱི་འཐུས་ཐུན་མོང་གིས་དེ་རིང་སྔ་དྲོ་གསར་འགོད་གསལ་བསྒྲགས་ཤིག་སྤེལ་བར་ཚོགས་འདུའི་བརྡ་ཁྱབ་ཀྱི་ནང་དོན་དང་པོ་དང་འབྲེལ་ནས་གྲོས་ཚོགས་ནམ་ཚོགས་ཀྱི་ཚོགས་བརྡར་ངང་སྒུག་བྱེད་བཞིན་ཡོད་པས་ཟུར་དུ་གྲོས་ཚོགས་མུ་མཐུད་ཚོགས་ཐུབ་ཐབས་སྐོར་གྱི་བཞུགས་མོལ་ཚོགས་འདུར་བཅར་དགོས་གལ་གང་ཡང་མ་མཐོང་ཞེས་དང་། བཞུགས་མོལ་ཚོགས་འདུའི་ནང་དོན་གཉིས་པ་དང་འབྲེལ་ནས་གཞི་རིམ་མི་མང་གིས་ད་ལྟའི་བཙན་བྱོལ་བོད་མིའི་སྒྲིག་འཛུགས་ཀྱི་ཛ་དྲག་གནས་སྟངས་དང་འབྲེལ་བའི་བཅའ་སྒྲིག་འཕྲལ་དུ་བསྐྱར་བཅོས་གནང་དགོས་པའི་རེ་འབོད་ཕྱི་གསལ་ནང་གསལ་ཞུས་པ་དེར་ཚོགས་གཙོའི་གྲོས་ཚོགས་དབུ་འབྱེད་གཏམ་བཤད་དང་། གཞི་རིམ་མི་མང་གི་སྐུ་ཚབ་དང་། ང་ཚོའི་འཐུས་ཚབ་བཅས་ལ་ཚོགས་གཙོ་སྦྲེལ་པོས་གསལ་བཤད་གནང་བབ་ལ་ཞིབ་སྐབས་བཞུགས་མོལ་ཚོགས་འདུ་ཚོགས་ནས་དོན་ཕན་གསོས་པ་ཞིག་ཡོང་བཟོ་གང་ཡང་མ་མངོན་སྟབས་ཚོགས་བཅར་མ་ཞུས་པ་ཡིན་ཅེས་འཁོད་འདུག རླུང་འཕྲིན་ཁང་གིས་བཞུགས་མོལ་ཚོགས་འདུར་མཉམ་ཞུགས་མ་གནང་མཁན་སྤྱི་འཐུས་ཁག་གཅིག་ཁོང་རྣམས་ནས་ཚོགས་དྲུང་ལས་ཁུངས་ཀྱི་བརྡ་ཁྱབ་ལྟར་བཞུགས་མོལ་ཚོགས་འདུར་བཅར་ཡོད་ཚེ་བརྡ་ཁྱབ་ནང་གསལ་གྱི་གནད་དོན་གཉིས་ལ་ལམ་ཁ་ཞིག་འཐོན་པར་ངོས་འཛིན་གནང་གི་མེད་དམ་ཞེས་བཀའ་འདྲི་ཞུས་སྐབས་དེ་ལྟར་ཡོང་བར་གཞི་རྟེན་གང་ཡང་མེད་པ་དང་། གྲོས་ཚོགས་ནས་མར་ཕེབས་མཁན་རྣམས་ནས་ཡར་ཕེབས་ཏེ་འགན་བཞེས་པ་ཡིན་ན་གྲོས་ཚོགས་མུ་མཐུད་ཚོགས་ཐུབ་ཀྱི་རེད་ཅེས་གསུངས་སོང་།  དེ་བཞིན་ཕྱི་ཚེས་ ༢༢ ཉིན་གྲོས་ཚོགས་སུ་མ་བཅར་མཁན་ཁོངས་དང་བཞུགས་མོལ་ཚོགས་འདུར་བཅར་མཁན་སྤྱི་འཐུས་ཤིག་ལ་བཀའ་འདྲི་ཞུས་པར་བདེ་སྲུང་ལས་ཁུངས་ནས་གསལ་བཤད་གནང་རྒྱུའི་ཞལ་བཞེས་གནང་བ་ལྟར་གང་མགྱོགས་གསལ་བཤད་ཕེབས་ཐུབ་དགོས་པ་དང་། གྲོས་ཚོགས་ཚོགས་མ་ཐུབ་པ་དེ་མི་མང་རེ་འབོད་ཚོགས་པར་ཐུག་མེད་པ་དང་། ལར་ནས་བཞུགས་མོལ་ཚོགས་འདུ་ཐོག་ནང་མོལ་དང་བཀའ་མོལ་ལྷུག་པོར་བྱུང་རྒྱུའི་གོ་སྐབས་ཙམ་མ་ཟད། གྲོས་ཚོགས་སུ་གླེང་སློང་གནང་མ་ཐུབ་པའི་གནད་དོན་མང་པོ་ཞིག་བཞུགས་མོལ་སྐབས་གླེང་སློང་གནང་རྒྱུ་ཡོད་པ་ལྟར་སྤྱི་འཐུས་དེ་ཉིད་ནས་ཀྱང་གཞི་རིམ་མི་མང་གི་རེ་འབོད་ལ་ཆ་ཤས་བླངས་འདོད་ཡོད་པར་གསུངས་ཡོད། གྲོས་ཚོགས་ཚོགས་དུས་དྲུག་པ་མུ་མཐུད་ཚོགས་མ་ཐུབ་ནས་ཉིན་གྲངས་གསུམ་འགྲོ་བཞིན་པར་བརྟེན་རླུང་འཕྲིན་ཁང་གིས་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ་མཆོག་ལ་གནད་དོན་དེ་དང་འབྲེལ་བའི་བཀའ་འདྲི་ཞུ་ཐབས་ཞུས་ཡོད་ཀྱང་བཀའ་འདྲི་དང་ལེན་གནང་མ་སོང་། རྩ་བའི་ཐེངས་འདིའི་གྲོས་ཚོགས་དང་བསྟུན་གཞི་རིམ་མི་མང་རེ་འབོད་ཚོགས་པའི་གོ་སྒྲིག་འོག་འཛམ་གླིང་ས་ཕྱོགས་གང་ས་ནས་བོད་མི་ ༥༠༠ ལྷག་གིས་གངས་སྐྱིད་སིལ་སྤོལ་རྩེད་ཐང་དུ་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ ཐོག་ཁྲིམས་ཞིབ་པ་བསྐོ་གཞག་དང་འབྲེལ་བའི་བཅའ་ཁྲིམས་བསྐྱར་བཅོས་དགོས་པའི་ཞུ་འབོད་ཀྱི་ལས་འགུལ་མུ་མཐུད་སྤེལ་བཞིན་ཡོད་པ་དེ་ལྟར་ཡང་། སྤྱི་འཐུས་ཚོགས་གཙོའི་ཚོགས་འདུ་དབུ་འབྱེད་ཀྱི་གསུང་བཤད་ཐོག་གྲོས་ཚོགས་ཚོགས་དུས་ལྔ་པའི་གྲོས་ཆོད་དགོངས་དོན་བཞིན་ཁྲིམས་སྒྲིག་བསྐྱར་ཞིབ་ཚོགས་ཆུང་གི་ལས་དོན་འགྲོ་བཞིན་པ་ལྟར། འཆར་ལོའི་ཕྱི་ཟླ་གཉིས་པའི་ཟླ་མཇུག་ཏུ་འཆར་ཟིན་དང་སྙན་ཐོ་རྣམས་སྐབས་དེའི་དུས་སུ་འབུལ་ལམ་ཞུ་ཡི་རེད་ཅེས་གསུངས་པ་གཞིར་བཟུང་གཞི་རིམ་མི་མང་རེ་འབོད་ཚོགས་པས་ཚོགས་གཙོ་སྦྲེལ་པོ་མཆོག་ལ་གནད་དོན་དེ་བསྐྱར་ནན་ཞུས་ཡོད་པ་རེད།

ཆོད་གན་གྱི་དགེ་རྒན་གཏན་འཇགས་བཟོ་རྒྱུ་ཐོག་རྒྱ་གར་གཞུང་ལ་བཀའ་བསྡུར་གནང་དགོས།

སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ཁ་སང་དང་དེ་རིང་གི་ལས་ཉིན་ཐོོག་བོད་མིའི་སྒྲིག་འཛུགས་ཤེས་རིགས་ལས་ཁུངས་ཀྱི་སྔོན་རྩིས་གཏན་འབེབས་དང་སྦྲགས་ཏེ།

སྨན་པའི་སློབ་སྦྱོང་གནང་མཁན་ཚོར་བུན་གཡར་གནང་གཏན་འཁེལ་བ།

དེ་རིང་སྐབས་ ༡༦ བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་དྲུག་པའི་ཐོག་དཔལ་འབྱོར་ལས་ཁུངས་དང་དེ་འབྲེལ་ལས་ཁུངས་ཁག་གི་ལོ་འཁོར་སྔོན་རྩིས་གཏན་འབེབས་དང་ལས་དོན་གནང་ཕྱོགས་ཐོག་བགྲོ་གླེང་གནང་སྐབས་དཔལ་འབྱོར་བཀའ་བློན་མཆོག་གིས་གངས་ལྔོངས་དཔལ་འབྱོར་ཞབས་ཞུ་ཁང་གི་ལས་དོན་ཐོག་ལན་འདེབས་གསལ་བཤད་གནང་བ་དང་སྦྲགས། Education Loan འམ་ཤེས་ཡོན་དང་འབྲེལ་བའི་བུན་གཡར་ལས་གཞི་འོག་ད་ལྟའི་ཆར་ཁྱད་ལས་ཁོངས་ནས་སྨན་པའི་སློབ་སྦྱོང་གནང་མཁན་ཚོར་བུན་གཡར་གྱི་སློབ་ཡོན་གནང་གཏན་འཁེལ་ཡོད་པ་གསུངས་སོང་།སྤྱི་འཐུས་ཁག་ཅིག་གིས་དཔལ་འབྱོར་ལས་ཁུངས་ཀྱི་ཁྱབས་ཁོངས་གངས་ལྗོངས་དཔལ་འབྱོར་ཞབས་ཞུ་ཁང་ནས་བུན་གཡར་གྱི་ལས་གཞི་ཁག་ཅིག་སྤེལ་བཞིན་ཡོད་པ་དང་། བུན་གཡར་དེ་བཞིན་ང་ཚོའི་མ་འོངས་སོན་རྩ་སློབ་ཕྲུག་ཚོའི་ཤེས་ཡོན་ཐོག་བུན་གཡར་གནང་རྒྱུའི་དགོངས་པ་བཞེས་དགོས་པའི་རེ་སྐུལ་ཞུས་སོང་བ་ལྟར། དཔལ་འབྱོར་བཀའ་བློན་མཆོག་གིས་སྤྱིར་གངས་ལྗོངས་དཔལ་འབྱོར་ཞབས་ཞུ་ཁང་འདི་རྒྱ་གར་གྱི་ཁྲིམས་སྒྲིག་གཞིར་བཟུང་འགྲོ་དགོས་སྟབས་ད་ལྟའི་ཆར་དངུལ་ཁང་རང་གི་ངོ་བོར་ཆགས་མེད་ཀྱང་། མ་འཛུགས་ཀྱི་ལས་གཞི་ཁག་གནང་མུས་ཡིན་པ་སོགས་འགྲེལ་བརྗོད་གནང་བ་དང་ཆབས་ཅིག གངས་ལྗོངས་དཔལ་འབྱོར་ཞབས་ཞུ་ཁང་ནས་ཤེས་རིག་ལས་ཁུངས་དང་གོ་བསྡུར་ཞུས་ནས་ཤེས་ཡོན་དང་འབྲེལ་བའི་བུན་གཡར་ལས་གཞི་འོག་ཁྱད་ལས་ཁོངས་ནས་སྨན་པའི་ཐོག་སློབ་སྦྱོང་གནང་མཁན་ཚོར་བུན་གཡར་གྱི་སློབ་ཡོན་གནང་གཏན་འཁེལ་ཡོད་པ་གསུངས་ཡོད།   སྤྱི་འཐུས་ཁག་ཅིག་གིས་གངས་ལྗོངས་དཔལ་འབྱོར་ཞབས་ཞུ་ཁང་ལ་མི་མང་ནས་མ་འཛུགས་ཇི་ལྟར་གནང་དགོས་པ་དང་། བུན་གཡར་སྐབས་སུ་ཆ་རྐྱེན་གང་དག་དགོས་པ་སོགས་ཀྱི་ཐོག་བཀའ་དྲི་ཁག་ཅིག་ཞུས་པར་བཀའ་བློན་མཆོག་གི་ངོས་ནས་མ་འཛུགས་གནང་མཁན་ཇི་ཙམ་བྱུང་ཡང་དགའ་བསུ་ཡོད་པ་དེ་ལྟར་ཡང་། མ་འཛུགས་ཀྱི་དངུལ་དེ་དག་ངེས་པར་དུ་ཁྲིམས་དང་མཐུན་པ་ཞིག་དགོས་གལ་དང་། རྒྱ་གར་གཞུང་གི་ཚོང་དོན་ལྷན་ཚོགས་ཀྱི་ཁྲིམས་སྒྲིག་གཞིར་བཟུང་མ་ཤེར་བདག་དབང་གི་ལག་འཁྱེར་གནང་བཞིན་ཡོད་པ་སོགས་འགྲེལ་བརྗོད་གནང་སོང་།  དེ་བཞིན་དཔལ་འབྱོར་ལས་ཁུངས་ཀྱི་ཁྱབ་ཁོངས་བེུད་ནུས་སྟོབས་གོང་འཕེལ་ཚན་པ་དང་འབྲེལ་ནས་ཚན་པའི་ངོས་ནས་བོད་པའི་སྤྱི་ཚོགས་ཁྲོད་བེུད་ནུས་སྟོབས་གོང་འཕེལ་དང་འབྲེལ་བའི་ཟབ་སྦྱོང་ཁག་ཅིག་གནང་བཞིན་པར་བསྔགས་བརྗོད་དང་སྦྲགས། ཚན་པར་ཆེད་འཛུགས་གནང་བའི་རིན་མེད་ཁ་པར་འབྲེལ་མཐུད་བརྒྱུད་བེུད་ཀྱི་བེད་སྡུག་ཞུ་མཁན་ག་ཚོད་བྱུང་ཡོད་དམ་ཞེས་སོགས་བཀའ་འདྲི་ཞུ་མཁན་བྱུང་ཡོད།  དཔལ་འབྱོར་ལས་ཁུངས་དང་དེ་འབྲེལ་ཚན་པ་ཁག་གི་ལོ་འཁོར་སྔོན་རྩིས་གཏན་འབེབས་ཟིན་པའི་རྗེས་སུ་ཆོས་རིག་ལས་ཁུངས་ཀྱི་ལོ་འཁོར་སྔོན་རྩིས་གཏན་འབེབས་དང་དེ་འབྲེལ་ལས་དོན་ཁག་གི་ཐོག་བགྲོ་གླེང་གནང་སྐབས་སྤྱི་འཐུས་ལ་ལས་འདས་པའི་ཟླ་ཤས་ཁྲོད་སྤྱི་ཚོགས་ནང་༸གོང་ས་མཆོག་ལ་མཚན་སྨད་ཞུ་མཁན་ཁག་ཅིག་བྱུང་བ་དེ་དག་ལ་སྲིད་སྐྱོང་མཆོག་གིས་དབུས་པའི་འཛིན་སྐྱོང་བཀའ་ཤག་ནས་གདོང་ལེན་གནང་ཕྱོགས་ཐད་བཀའ་འདྲི་གནང་མཁན་བྱུང་སོང་། སྤྱི་འཐུས་ཁག་ཅིག་ནས་༸གོང་ས་མཆོག་ལ་མཚན་སྨད་ཞུ་མཁན་སུ་ཡིན་མིན་ལ་དབྱེ་བ་མེད་པར་ཚང་མར་ངོ་རྒོལ་གཅིག་མཚུངས་གནང་དགོས་པའི་དགོངས་འཆར་གནང་བར་ཆོས་རིག་བཀའ་བློན་མཆོག་གིས་འཛིན་སྐྱོང་བཀའ་ཤག་གི་ངོས་ནས་༸གོང་ས་མཆོག་ལ་མཚན་སྨད་ཞུ་མཁན་ཚོར་མཐའ་གཅིག་ཏུ་ངོ་རྒོལ་གནང་མུས་ཐོག་མུ་མཐུད་ནས་དེ་ལྟར་གནང་རྒྱུའི་དགོངས་བཞེས་ཡོད་ཅེས་གསུངས་ཡོད། ཆོས་རིག་ལས་ཁུངས་ནས་མ་འོངས་པར་༸གོང་ས་མཆོག་གི་ཐུགས་བསྐྱེད་ཆེན་པོ་བཞི་པོ་རྣམས་བོད་མིའི་གནས་ཡུལ་གཞིས་ཆགས་ཁག་ཏུ་ས་གནས་སོ་སོའི་སྐད་ཡིག་ཐོག་ཕབ་སྒྱུར་གནང་སྟེ་འགྲེམས་སྤེལ་གནང་གལ་ཡིན་པ་དང་ལྷག་པར་དུ་དེ་སྔ་བླ་ཆེན་རྣམ་པའི་ཚོགས་ཆེན་ཐོག་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་སྩལ་བའི་བཀའ་སློབ་ཁག་ཕྱོགས་བསྒྲིགས་ཀྱིས་དཔར་སྐྲུན་གནང་གལ་ཡིན་སྐོར་གསུངས་མཁན་བྱུང་ཡོད།དེང་སྐབས་བཙན་བྱོལ་ནང་གི་དགོན་སྡེ་ཁག་ཏུ་གྲྭ་བཙུན་གྱི་གྲངས་འབོར་ཉུང་དུ་འགྲོ་བཞིན་པ་དང་། ལྷག་པར་དུ་བོད་རིགས་གྲྭ་བཙུན་ནང་འཛུl་ཞུགས་གནང་མཁན་ཧ་ཅང་ཉུང་ངུ་ཆགས་བཞིན་ཡོད་པའི་གནད་དོན་སྐོར་གླེང་སློང་གནང་སྐབས་ཆོས་རིག་བཀའ་བློན་མཆོག་གིས་གནད་དོན་དེ་དངོས་འབྲེལ་ཡིན་པ་དང་། ད་ལྟའི་ཆར་ཆོས་རིག་ལས་ཁུངས་ཀྱི་ངོས་ནས་གྲངས་འབོར་མང་ཉུང་ལ་མ་ལྟོས་པར་ད་ཡོད་པ་རྣམས་ལ་སྤུས་ཚད་ལྡན་པ་ཞིག་ཡོང་བར་འབད་བརྩོན་ཞུ་བཞིན་ཡོད་པར་གསུངས་སོང་།གཞན་ཡང་སྤྱི་འཐུས་རྣམ་པས་ཆོས་རིག་ལས་ཁུངས་ཀྱི་སྔོན་རྩིས་ལས་དོན་དང་འབྲེལ་ཏེ་དགོན་སྡེ་ཁག་གི་དཔེ་ཁྲིད་དགེ་རྒན་དང་བོད་ནས་ཕེབས་པའི་ཁ་འཐོར་ས་གནས་ཁག་ཏུ་བཞུགས་པའི་གྲྭ་བཙུན། དེ་བཞིན་དགེ་བཤེས་མའི་བསླབ་པ་སློབ་གཉེར་གནང་ཟིན་ཁག་གི་ནུས་པ་སྔར་ལྷག་རྒྱ་སྐྱེད་གནང་བར་རོགས་རམ་གནང་དགོས་པའི་གཞེན་སྐུལ་གནང་ཡོད།གཞི་རྩའི་དེ་རིང་གི་གྲོས་ཚོགས་ལས་ཉིན་ཐོག་དཔལ་འབྱོར་ལས་ཁུངས་དང་ཆོས་རིག་ལས་ཁུངས་ཀྱི་རྩིས་ལོ་ ༢༠༢༡་༢༠༢༢ ལོའི་ཕྱོགས་བསྡོམས་སྔོན་རྩིས་འགྲོ་གྲོན་གྱི་དགོས་དངུལ་ཁག་གཏན་འཕེབས་གནང་སྟེ་ཚོགས་དུས་མཐའ་མའི་ཐོག་འཕྲོད་བསྟེན་ལས་ཁུངས་ཀྱི་སྔོན་རྩིས་གཏན་འབེབས་ལས་དོན་ཐོག་ཕེབས་ཡོད།

རྒྱ་གཞུང་ལ་༸སྐུའི་ཡང་སྲིད་ངོས་འཛིན་བྱ་རྒྱུའི་ཐོབ་ཐང་མེད།  

བཞུགས་སྒར་བོད་མི་མང་སྤྱི་འཐུས་གྲོས་ཚོགས་སུ་སྐབས་བཅུ་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་འཚོགས་བཞིན་ཡོད་པ་ལྟར། དེ་རིང་ལས་ཉིན་དྲུག་པའི་སྔ་དྲོའི་ཚོགས་དུས་ཐོག་འཛིན་སྐྱོང་དང་འབྲེལ་བའི་ལས་ཁུངས་ཁག་དང་། བདེ་སྲུང་ལས་ཁུངས་ཀྱི་ཁྱབ་ཁོངས་སྣེ་ལེན་འབྲེལ་མཐུད་ལས་ཁང་བཅས་ཀྱི་སྔོན་རྩིས་འགྲོ་གྲོན་གྱི་དགོས་དངུལ་མ་དངུལ་གཏན་འབེབས་ཟིན་མཚམས་སུ་ཆོས་རིག་ལས་ཁུངས་ཀྱི་དམིགས་བསལ་དང་ཟུར་བཀོད་མ་དངུལ་གཏན་འབེབས་དང་ལས་དོན་བཅས་ཀྱི་ཐོག་བགྲོ་གླེང་དབུ་འཛུགས་གནང་ཡོད་པ་རེད།སྐབས་དེར་བོད་མི་མང་སྤྱི་འཐུས་དགེ་བཤེས་ཨ་ཀྲུག་ཚེ་བརྟན་ལགས་ཀྱིས་ཉེ་ཆར་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ Geng Shuang ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དེ་ རྒྱ་ནག་གཞུང་གིས་གཏན་འདེབས་བྱས་པའི་བོད་ཀྱི་བླ་སྤྲུལ་ངོས་འཛིན་གནང་ཕྱོགས་ཀྱི་ཁྲིམས་སྒྲིག་དང་མཐུན་དགོས་སྐོར་བརྗོད་པ་དེར་ངོས་ལེན་ཞུ་ཐབས་མེད་པ་དང་། ལྷག་པར་དུ་རྒྱ་གཞུང་འདི་ཆོས་ལུགས་ཀྱི་ལམ་སྲོལ་དང་ལོ་རྒྱུས་བརྩི་མེད་རྡོག་རོལ་བཏང་མཁན་དང་། ལས་རྒྱུ་འབྲས་ལ་ཡིད་ཆེས་མི་བྱེད་མཁན། དེ་བཞིན་༸གོང་ས་མཆོག་ལ་གུས་བརྩི་མེད་མཁན་བཅས་ཆགས་ཀྱི་ཡོད་སྟབས། རྒྱ་གཞུང་ལ་༸སྐུའི་ཡང་སྲིད་ངོས་འཛིན་བྱ་རྒྱུའི་ཐོབ་ཐང་མེད་ཅེས་གསུངས་ཡོད།སྐབས་དེར་ཆོས་རིག་བཀའ་བློན་མཆོག་གིས་དབུས་པའི་སྤྱི་འཐུས་ཁག་གཅིག་ནས་༸སྐུའི་ཡང་སྲིད་ཀྱི་གནད་དོན་ཐད་རྒྱ་ནག་གཞུང་གིས་ཐེ་བྱུས་བྱེད་བཞིན་པར་ངོས་ལེན་མེད་པའི་རྣམ་འགྱུར་ནན་པོ་ཆེད་བཏོན་གནང་སོང་།སྤྱི་འཐུས་ཁག་གཅིག་ནས་ཆོས་རིག་ལས་ཁུངས་ནས་ལོ་ལྟར་དགེ་བཤེས་མའི་མཚན་ཐོག་ལ་སྔོན་རྩིས་མ་དངུལ་འཕོན་ཆེན་པོ་ཞིག་ཞུ་བཞིན་པ་དེ་རིས་མེད་ཆོས་བརྒྱུད་ཁག་གི་བཙུན་མའི་བསླབ་པ་སློབ་གཉེར་ཐོག་གནང་གི་ཡོད་མེད་དང་། དགེ་བཤེས་མའི་ཕྱག་འཁྱེར་གནང་ཕྱོགས་སོགས་ཀྱི་ཐད་བཀའ་འདྲི་ཞུས་ཡོད་པ་དང་། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བཀའ་ཤག་རིམ་པས་མིང་ཙམ་མ་ཡིན་པར་བཙུན་མའི་ཐོས་བསམ་སློབ་གཉེར་ཐོག་འབད་བརྩོན་གནང་ཡོད་པ་དང་། ད་ལྟའི་ཆར་སྤྱིར་གྲྭ་རྒྱུན་གྱི་གྲངས་འབོར་ཉུང་དུ་འགྲོ་བཞིན་ཡོད་ཀྱང་བཙུན་མའི་གྲངས་འབོར་མང་དུ་འགྲོ་བཞིན་ཡོད་པ་མ་ཟད། ཉེ་ཆར་དགེ་བཤེས་མ་ ༢༠ ལྷག་སྔགས་ཀྱི་གསན་བསམ་སློབ་གཉེར་ཐོན་ཡོད་པ་སོགས་ངོ་སྤྲོད་དང་སྦྲགས། ཆོས་རིག་ལས་ཁུངས་ནས་རིས་སུ་མ་ཆད་པའི་ཆོས་བརྒྱུད་སོ་སོའི་སློབ་གཉེར་དང་འཚམ་པའི་བཙུན་མའི་ལས་གཞི་ཚང་མ་ལ་གཅིག་མཚུངས་ཐོག་རོགས་སྐྱོར་ཞུ་མུས་ཡིན་པ་གསུངས་ཡོད།དེ་བཞིན་སྤྱི་འཐུས་ཁག་གཅིག་གིས་དགེ་བཤེས་མ་དང་འབྲེལ་བའི་ལས་དོན་སྤྱི་ཡོངས་ལ་བསྔགས་བརྗོད་དང་སྦྲགས། མ་འོངས་པར་དགེ་བཤེས་མ་དེ་དག་བཙུན་མའི་སྡེ་ཁག་དང་སྤྱི་ཚོགས་ཁྲོད་ནང་ཆོས་ངོ་སྤྲོད། དེ་བཞིན་ཆོས་བརྒྱུད་སྤྱི་འཐུས་ཀྱི་ཞབས་སྟེགས་སོགས་ཀྱི་ཐོག་ཕེབས་ཐུབ་པའི་རེ་སྨོན་ཞུ་མཁན་ཡང་བྱུང་ཡོད། ཆོས་རིག་ལས་ཁུངས་ཀྱི་སྔོན་རྩིས་ལས་དོན་སོགས་དང་འབྲེལ་ཏེ་ཆོས་རིག་ལས་ཁུངས་ནས་དེང་སྐབས་གྲྭ་ཁོངས་སུ་མེད་པའི་གྲྭ་བཙུན་རྣམ་པར་འཕྲོད་བསྟེན་དང་འཚོ་སྣོན་སོགས་ཀྱི་མཐུན་རྐྱེན་སྦྱོར་རྒྱུ་གལ་ཆེན་པོ་ཡིན་པ་སོགས་ཀྱི་དགོངས་འཆར་དང་། བོད་ཀྱི་ཟློས་གར་ཚོགས་པ་དབུ་བརྙེས་ཏེ་ལོ་ངོ་ ༦༠ འཁོར་བའི་མཛད་རིམ་སྐོར། དེ་བཞིན་གཞུང་ཆེན་རིགས་གཅིག་རྐང་འཛིན་གྱི་ལས་གཞི་ལག་བསྟར་གནང་ཕྱོགས་སོགས་ཀྱི་ཐད་བཀའ་འདྲི་ཞུ་མཁན་ཡང་བྱུང་ཡོད།  གཞན་ཡང་བགྲོ་གླེང་ཁྲོད་དོལ་རྒྱལ་གྱི་གནད་དོན་དང་དེ་བཞིན་ཆོས་རིག་ལས་ཁུངས་ཀྱི་གཞིས་ཆགས་དང་སློབ་གྲྭ་ཁག་ཏུ་ནང་ཆོས་ངོ་སྤྲོད་གནང་སྟངས་སོགས་ཀྱི་སྐོར་ལ་བཀའ་འདྲི་ཞུས་ཡོད་པ་རེད། དེ་རིང་སྔ་དྲོའི་ཚོགས་དུས་དང་པོ་ནས་ཉིན་རྒྱབ་ཚོགས་དུས་བཞི་པ་བར་དུ་བོད་མི་མང་སྤྱི་འཐུས་རྣམ་པ་པས་ཆོས་རིག་ལས་ཁུངས་ཀྱི་སྔོན་རྩིས་དང་ལས་དོན་གནང་ཕྱོགས་ཐོག་དྲི་བ་དྲིས་ལན་སོགས་གནང་གྲུབ་མཚམས་སུ་ཆོས་རིག་ལས་ཁུངས་ཀྱི་དམིགས་བསལ་འགྲོ་གྲོན་སྒོར་འབུམ་ ༦༦,༩༨༤,༤༥༠ གཏན་འབེབས་དང་། ཟུར་བཀོད་མ་དངུལ་མུ་མཐུད་སྒོ་ཕྱེ་བའི་ཐོག་ནས་འཕྲོད་བསྟེན་ལས་ཁུངས་ཀྱི་དམིགས་བསལ་འགྲོ་གྲོན་དང་ཟུར་བཀོད་མ་དངུལ་གཏན་འབེབས་དབུ་འཛུགས་གནང་ཡོད།  

རྩ་དོན་དང་སྒྲིག་འཛུགས་ལ་གནོད་པའི་དྲ་ཐོག་གི་ཚོགས་སྒེར་ཁག་རིམ་པས་སྤྱི་ཚོགས་ནང་སྟོན་གྱི་ཡིན་ཞེས་གསུངས་སོང་།

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་དྲུག་པའི་ཐོག་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་ཐོག་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་གནང་ཡོད་པ་རེད། དེ་ཡང་བདེ་སྲུང་བཀའ་བློན་འཕགས་པ་ཚེ་རིང་མཆོག་གིས་གྲོས་ཚོགས་སུ་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་ཞུས་ཟིན་མ་ཐག་བོད་མི་མང་སྤྱི་འཐུས་རྒྱུན་ལས་ཀྱིས་བདེ་སྲུང་ལས་ཁུངས་ཀྱི་སྙན་ཐོ་རྒྱས་པར་བལྟ་ཞིབ་བརྒྱུད། འདས་ལོའི་༸གོང་ས་སྐྱབས་མགོན་ཆེན་པོ་མཆོག་གི་ཆིབས་བསྒྱུར་དང་འབྲེལ་བའི་ཚེས་གྲངས་ཁག་ཅིག་དང་། འདི་ལོ་བོད་ནང་གཉེན་འཕྲད་དུ་ཕེབས་ཏེ་ཕྱིར་མ་ལོག་པའི་ཁ་གྲངས། དེ་བཞིན་ད་བར་ཨོ་སི་ཀྲི་ལི་ཡར་གཞིས་སྤོས་རྒྱན་ཁོངས་སུ་བོད་མི་ག་ཚོད་བཏང་ཡོད་མེད་སོགས་ཀྱི་བཀའ་འདྲི་ཁག་ཅིག་ཕུལ་སོང་བ་དང་། སྐབས་དེར་བདེ་སྲུང་བཀའ་བློན་མཆོག་ནས་བོད་ནང་གཉེན་འཕྲད་དུ་ཕེབས་ཏེ་ཕྱིར་མ་ལོག་མཁན་མེད་པ་དང་། ཨོ་སི་ཀྲི་ལི་ཡར་གཞིས་སྤོས་ཀྱི་ལས་གཞི་སྤྱི་ལོ་༡༩༩༦ ལོར་འགོ་བཙུགས་པ་ནས་བཟུང་ད་བར་བོད་མི་ཆབ་སྲིད་བཙོན་ཟུར་དང་འབྲེལ་ཆགས་འབྲེལ་ཡོད་ཀྱི་མི་སྣ་ ༡༣༣༨ གནས་སྤོས་ཟིན་ཡོད་པ་གསུངས་སོང་། ལྷག་པར་དུ་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་སྐབས་སུ་སྤྱི་འཐུས་ཁག་ཅིག་གིས་བར་སྐབས་ནས་བོད་པའི་སྤྱི་ཚོགས་ཁྲོད་སྤྱི་ཚོགས་འབྲེལ་མཐུད་ཀྱི་བརྒྱུད་ལམ་ཐོག་ཚོགས་པ་དང་སྒེར་གྱི་ཁ་བྱང་འདྲ་མིན་བརྒྱུད་སྤྱི་ཚོགས་ལ་ཕན་ཐོག་མེད་པའི་གནས་ཚུལ་འདྲ་མིན་སྤེལ་བཞིན་པ་སོགས་འགྲེལ་བརྗོད་དང་སྦྲགས། བདེ་སྲུང་ལས་ཁུངས་ནས་ཚོགས་པ་གསར་བཟོ་བྱེད་མཁན་དང་། དེ་དག་གི་དམིགས་ཡུལ་གང་ཡིན་སོགས་ཀྱི་ཐད་ལ་རྩད་ཞིབ་ནན་པོ་གནང་དགོས་པ་མ་ཟད། བྱུང་ན་བདེ་སྲུང་ལས་ཁུངས་ནང་ལ་དེའི་ཐད་དཔྱད་ཞིབ་གནང་མཁན་གྱི་སྡེ་ཚན་ཞིག་དགོས་གལ་ཡིན་པ་སོགས་གསུངས་ཡོད། སྐབས་དེར་བདེ་སྲུང་བཀའ་བློན་མཆོག་གིས་ད་ལྟའི་ཆར་བདེ་སྲུང་ལས་ཁུངས་ནས་དྲ་ཐོག་གི་གནས་ཚུལ་དེ་དག་ཐོག་དཔྱད་ཞིབ་གནང་མུས་ཡིན་པ་འགྲེལ་བརྗོད་དང་སྦྲགས། རྩ་དོན་དང་སྒྲིག་འཛུགས། སྒེར་བཅས་ལ་གནོད་པའི་དྲ་ཐོག་གི་ཚོགས་སྒེར་ཁག་རིམ་པས་སྤྱི་ཚོགས་ནང་སྟོན་གྱི་ཡིན་ཞེས་གསུངས་སོང་། ད་དུང་སྤྱི་འཐུས་ཁག་ཅིག་ནས་བདེ་སྲུང་ལས་ཁུངས་ཀྱི་ལས་དོན་སྤྱི་ཡོངས་ཐོག་ལ་བསྔགས་བརྗོད་དང་འབྲེལ། ༸གོང་ས་མཆོག་གི་དགོང་ལོའི་བབས་ལ་གཞིགས་ཏེ་མཛད་འཕྲིན་ཉུང་འཕྲི་གནང་རྒྱུའི་ཐད་དགོངས་བཞེས་གནང་དགོས་པའི་འབོད་སྐུལ་ཞུ་མཁན་བྱུང་སོང་བ་དང་། སྐབས་དེར་བཀའ་བློན་མཆོག་ནས་འབོད་སྐུལ་དེ་དག་དགའ་ལྡན་ཕོ་བྲང་ཡིག་ཚང་ལ་སྙན་གསེང་ཞུ་རྒྱུ་ཡིན་ཞེས་གསུངས་པ་དང་ཆབས་ཅིག ཚོགས་པ་སྐྱིད་སྡུག་དང་མི་སྒེར་ཚོའི་ངོས་ནས་ཀྱང་༸གོང་ས་མཆོག་སྐུ་ངལ་གསོ་ཆེད་མཇལ་ཁ་ཞུ་རྒྱུ་ཉུང་ཙམ་གནང་རོགས་ཞེས་འབོད་སྐུལ་སྐུལ་གནང་སོང་། གཞི་རྩའི་དེ་རིང་བདེ་སྲུང་བཀའ་བློན་མཆོག་གིས་གྲོས་ཚོགས་སུ་སྙན་སྒྲོན་གནང་བའི་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་སྙིང་བསྡུས་ནང་ལ། བདེ་སྲུང་ལས་ཁུངས་ཀྱི་ལས་འགན་གཙོ་བོ་༸གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱྭའི་ཉེན་སྲུང་ཞབས་ཞུའི་ཐོག་རང་ནུས་གང་ལྕོགས་ཀྱིས་འབད་བརྩོན་ལྷོད་མེད་ཞུས་ཡོད་པ་སོགས་འགྲེལ་བརྗོད་དང་སྦྲགས། འདས་ལོའི་ནང་༸གོང་མཆོག་གིས་རྒྱལ་སྤྱིའི་རྒྱལ་ཁབ་མི་འདྲ་བ་ལྔ་དང་། རྒྱ་གར་གྱི་ས་གནས་མི་འདྲ་བ་ ༡༦ ནང་ཆིབས་བསྒྱུར་བཀའ་དྲིན་བསྐྱངས་ཡོད་པ་འཁོད་འདུག མ་ཟད་འདས་ལོའི་ནང་བོད་ནས་གཏན་སྡོད་དང་གནས་སྐོར་ཕེབས་མཁན་བོད་མི་ ༢༨༦༡ བྱུང་བའི་ནང་ནས་རྒྱ་གར་ནང་དམིགས་བསལ་འཛུལ་ཞུགས་ཆོག་པའི་ལག་འཁྱེར་ཐོབ་པ་ ༤༨ བྱུང་ཡོད་པ་དང་། གནས་མཇལ་རྗེས་བོད་དུ་ཕྱིར་ལོག་ཕེབས་མཁན་ ༢༨༡༣ བྱུང་ཡོད་པ་མ་ཟད། ཕྱི་ཕྱོགས་ནས་བོད་ནང་གཉེན་འཕྲད་དུ་ཕེབས་མཁན་ ༡༨༧ བྱུང་ཡོད་པ་སོགས་ཀྱང་འཁོད་འདུག དེ་བཞིན་ལོ་འཁོར་འདིའི་ནང་ཕྱི་རྒྱལ་ནས་ཕྱིར་ལོག་མཐོང་ཆེན་ནམ་ Return Visa ཞུ་མཁན་གྲངས་ ༥༣༢ དང་། རྒྱ་གར་ནས་ཕྱིར་ཐོན་ལག་འཁྱེར་ Exit Permit ཞུ་མཁན་༨༣༣ བྱུང་ཡོད་པ་སོགས་ཀྱང་བཀོད་འདུག དེ་རིང་ཉིན་རྒྱབ་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་ཐོག་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་ཀྱི་ལས་རིམ་གྲུབ་མཚམས་སུ་ཕྱི་དྲིལ་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་དང་སྦྲགས། སྤྱི་འཐུས་རྣམ་པའི་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་ཀྱི་ལས་རིམ་འགོ་འཛུགས་གནང་སོང་།

འཛིན་སྐྱོང་བཀའ་ཤག་ནས་གྲོས་ཚོགས་འཐུས་མི་རྣམ་པའི་དགོངས་ཚུལ་ལ་གོ་བསྡུར་ནན་པོ་གནང་ཐོག་བྱ་ལམ་བྱ་བདེའི་དགོངས་བཞེས་དགོས་པའི་འབོད་སྐུལ་གནང་བ།

སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་དབུ་འཛུགས་གནང་ནས་དེ་རིང་ཉིན་གྲངས་དྲུག་པ་དེ་ཆགས་ཡོད་ཀྱང་། བོད་མིའི་སྒྲིགས་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་འཆར་འབུལ་གྱི་ལས་རིམ་དུས་ཐོག་ཕྱིན་མ་ཐུབ་པར་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་དང་དེའི་རྗེས་འབྲས་སྤྱི་ཚོགས་ནང་ལབ་གླེང་དང་དཀའ་རྙོག་འབྱུང་བཞིན་པའི་གནད་དོན་ཐོག་བགྲོ་གླེང་མུ་མཐུད་གནང་བཞིན་པ་ལྟར། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དེ་རིང་ཉིན་རྒྱབ་ཀྱི་ཚོགས་ཐེངས་ཐོག་གནད་དོན་ཆེ་ཆུང་ལ་ལྟོས་མེད་དཀའ་ངལ་ཞིག་ཡོད་པ་གསལ་པོ་ཡིན་སྟབས། འཛིན་སྐྱོང་བཀའ་ཤག་ནས་མིག་བཙུམ་ནས་མ་བཞུགས་པར་ད་རེས་ཀྱི་གྲོས་ཚོགས་དེའི་ཐོག་སྤྱི་འཐུས་རྣམ་པས་བགྲོ་གླེང་གནང་བའི་ཐོག་གོ་བསྡུར་གནང་སྟེ་བྱ་ལམ་བྱ་བདེའི་དགོངས་བཞེས་གནང་དགོས་གལ་ཡིན་པའི་འབོད་སྐུལ་གནང་སོང་། དེ་བཞིན་སང་ཉིན་གྲོས་ཚོགས་ཀྱི་ལས་དོན་གནང་ཕྱོགས་དང་འབྲེལ་གནད་དོན་ཁག་ཅིག་གི་ཐོག་བཞུགས་མོལ་ཚོགས་འདུ་ཞིག་ཚོགས་ཀྱི་ཡོད་པ་ལྟར། བྱང་ཨ་རིའི་སྐུ་ཚབ་དོན་གཅོད་ཀྱི་གནད་དོན་ཐོག་བྱ་ལམ་བྱ་བདེ་ཇི་ཡོད་ཐོག་དགོངས་ཚུལ་གསལ་པོ་སྤུངས་དགོས་པ་དང་། དེའི་མཇུག་སྐྱོང་གང་གནང་དགོས་མིན་བཅས་ཀྱི་ཐོག་དགོངས་པ་ནན་པོ་བཞེས་དགོས་པའི་ལམ་སྟོན་གསལ་པོ་གནང་ཡོད། སྤྱིར་ཐེངས་འདིའི་གྲོས་ཚོགས་ཐོག་སྤྱི་འཐུས་རྣམ་པས་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་དང་འབྲེལ་བའི་གནད་དོན་ཐོག་ཞིབ་འཇུག་ཚོགས་ཆུང་ཆེད་འཛུགས་གནང་དགོས་སྐོར་གསུང་མཁན་དང་། ཡང་ཁག་ཅིག་གིས་དེར་མོས་མཐུན་གནང་གི་མེད་པ་མ་ཟད། སྤྱི་འཐུས་ལ་ལས་བཀའ་ཤག་དང་། བཀའ་སྤྱི་ལྷན་རྒྱས་ནས་གནད་དོན་དེའི་ཐོག་ངོ་རྒོལ་གནང་མཁན་ཚོ་དང་ལྷན་དངོས་སུ་མཇལ་འཕྲད་ཀྱིས་གནས་སྟངས་ཞི་འཇམ་གནང་དགོས་པའི་དགོངས་ཚུལ་བཏོན་ཡོད། འཛིན་སྐྱོང་བཀའ་ཤག་གི་ངོས་ནས་གནད་དོན་དེའི་ཐོག་ཁྲིམས་ཁང་ལ་ཕེབས་རྒྱུ་མ་གཏོགས་ཐབས་ལམ་གཞན་མེད་པའི་འགྲེལ་བརྗོད་གནང་གི་ཡོད་པ་རེད། རྩ་བའི་གྲོས་ཚོགས་ཀྱི་ལས་ཉིན་དྲུག་པ་དེའི་ཐོག་སྔ་དྲོ་བྱང་ཨ་མི་རི་ཀའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་དང་འབྲེལ། སྐར་རྟགས་ཅན་གྱི་དྲི་བ་དྲིས་ལན་གྱི་ལས་རིམ་ཞིག་ཀྱང་ཕེབས་ཡོད་པ་དང་། དེ་བཞིན་ཉིན་རྒྱབ་ཏུ་ཨ་རིའི་དོན་ཁང་གི་སྔོན་རྩིས་འཆར་འབུལ་ཐོག་བགྲོ་གླེང་གནང་སྐབས་སུ་ཆོས་རིག་བཀའ་བློན་མཆོག་གིས་གསལ་བཤད་གནང་པར་འདས་པའི་ཉིན་ཤས་ནང་གནད་དོན་དེའི་སྐོར་བགྲོ་གླེང་རིམ་པ་བྱུང་བའི་ནང་སྤྱི་འཐུས་ཁག་ཅིག་ནས་བཀའ་ཤག་དགོངས་པ་ཞུས་དགོས་པ་སོགས་ཀྱི་བཀའ་མོལ་མང་དག་ཞིག་གསུང་མཁན་བྱུང་ཡོད་པ་ལྟར། དེ་ལྟར་གནང་བ་ཡིན་ན་ད་ལྟའི་བོད་ཀྱི་ཛ་དྲག་གནས་སྟངས་གང་འདྲ་ཆགས་ཀྱི་ཡོད་དམ་ཞེས་དྲི་བ་གནང་སོང་། སྤྱི་འཐུས་གཞན་ཁག་ཅིག་ནས་གནད་དོན་དེའི་ཐོག་ཞིབ་འཇུག་ཚོགས་ཆུང་འཛུགས་དགོས་སྐོར་གསུངས་ཡོད་ཀྱང་ཆོས་རིག་བཀའ་བློན་མཆོག་ནས་དེ་ལྟར་གནང་དགོས་པ་ཞིག་ལ་གཟིགས་ཀྱི་མེད་པ་དང་མོས་མཐུན་རྩ་བ་ནས་མེད་ཅེས་གསལ་བཤད་གནང་སོང་།

༸རྒྱལ་བའི་༸སྐུ་ཕྱྭའི་ཐོག་སྔར་ལྷག་མ་གཏོགས་འཐུས་ཤོར་བཏང་བ་རྩ་བ་ནས་མེད།

དེ་རིང་གྲོས་ཚོགས་ཀྱི་ལས་ཉིན་དྲུག་པ་དེའི་ཐོག་ནས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་རྩིས་འགོ་དང་ལས་དོན་ཐོག་ལ་གྲོས་ཚོགས་འཐུས་མི་རྣམས་པས་བགྲོ་གླེང་གསལ་བཤད་དང་དྲི་བ་བཅས་གནང་བའི་ཁྲོད། དུས་ཚོུད་དང་དྲི་བ་མང་ཆེ་བ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭའི་སྐོར་དང་འབྲེལ་མགོན་པོ་མཆོག་དགུང་ནའི་བབ་ཀྱི་ཆ་ནས་ད་ཆ་༸སྐུ་ངལ་གསོ་བཞུགས་ཀྱི་དུས་ཚོུད་ཐོག་དགོངས་པ་བཞེས་གལ་ཡིན་པ་དང་། ཉེ་ཆར་རྡོ་རྗེ་གདན་གྱི་གསུང་ཆོས་ར་བའི་ཉེ་འགྲམ་དུ་འབར་རྫས་རྙེད་སོན་བྱུང་སྐོར་དང་། ༸གོང་ས་མཆོག་གི་གསུང་ཆོས་ཞུ་མཁན་དང་མཇལ་བཅར་ཞུ་མཁན་ཁོངས་དོགས་གཞི་ཅན་མི་སྣ་ཁ་ཤས་ཐོན་བཞིན་པ་སོགས་༸རྒྱལ་བའི་༸སྐུ་ཕྱྭ་ལ་ཉེན་ཁར་གཟིགས་བཞིན་པའི་དགོངས་ཚུལ་ཁག་ཅིག་གསུང་མཁན་བྱུང་ཡོད་སྟབས། བདེ་སྲུང་བཀའ་བློན་འཕགས་པ་ཚེ་རིང་མཆོག་གིས་བདེ་སྲུང་ཀྱི་ལས་དོན་གཙོ་བོ་༸རྒྱལ་བའི་༸སྐུ་ཕྱྭ་ཡིན་པས་ལས་ཁུངས་ཀྱི་ངོས་ནས་༸སྐུ་ཕྱྭའི་ཐད་ལ་སྔར་ལྷག་མ་གཏོགས་འཐུས་ཤོར་བཏང་བ་རྩ་བ་ནས་མེད་ཅེས་གསུངས་སོང་། གཞན་ཡང་བདེ་སྲུང་ལས་ཁུངས་དང་འབྲེལ་ནས་བོད་མི་ཆབ་སྲིད་བཙོན་པའི་གནས་སྟངས་སྐོར་དང་སྐད་འཕྲིན་སོགས་སྤྱི་ཚོགས་འབྲེལ་མཐུད་ཀྱི་བརྒྱུད་ལམ་དང་འབྲེལ་ནས་བོད་པའི་སྤྱི་ཚོགས་ནང་གི་བདེ་འཇགས་སྐོར་སོགས་གནད་དོན་མང་ཅིག་གི་ཐོག་ལའང་དྲི་བ་དང་བགྲོ་གླེང་གནང་སོང་བ་དང་། ཁྱད་པར་དུ་སྤྱི་འཐུས་རྣམ་པས་བདེ་སྲུང་བཀའ་བློན་མཆོག་ལ་དྲི་བ་ཞུ་དོན་གཙོ་གནད་གཞན་གཅིག་ནི་བཙན་བྱོལ་བོད་མི་རྣམས་ཀྱི་སྐྱབས་བཅོལ་ལག་དེབ་དྲ་ཐོག་དེབ་སྐྱེལ་ཞུ་ཕྱོགས་དང་གནས་སྤོ་སྐོར་ལ་ཡིན་སྟབས། སྲིད་སྐྱོང་བློ་བཟང་སེང་གེ་མཆོག་གིས་བར་ལམ་བོད་མི་རྣམས་ཀྱི་དྲ་ལམ་དེབ་སྐྱེལ་ཞུ་ཕྱོགས་དང་འབྲེལ་ནས་དཀའ་ངལ་མང་དག་ཅིག་འཕྲད་དང་འཕྲད་བཞིན་པ་སོང་། བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་དབུས་གཞུང་ལ་དེའི་དུས་བཀག་གི་དུས་ཚེས་དེ་ཕྱི་ཟླ་ ༩ པའི་ཟླ་མཇུག་བར་ཕར་འགྱངས་ཡོང་བར་རེ་བ་ཞུས་ཡོད་ཀྱང་། རྒྱ་ཆེ་མང་ཚོགས་ནས་ལྷོད་ཡངས་མེད་པའི་ཐོག་ནས་གསལ་བསྒྲགས་སྔོན་སོང་ལྟར་གང་སྔ་སྔ་དྲ་ཐོག་དེབ་སྐྱེལ་གནང་དགོས་གལ་ཡིན་པའི་འབོད་སྐུལ་གནང་ཡོད། ལྷག་པར་དུ་སྲིད་སྐྱོང་མཆོག་གིས་རྒྱ་གར་གཞུང་ནི་ཕ་མ་ལྟར་བོད་མི་རྣམས་ལ་གཟིགས་སྐྱོང་རྒྱ་ཆེ་གནང་དང་གནང་བཞིན་པ་སོང་ཙང་། ད་ཆ་བོད་མི་ ༩༥༥ ཡི་སྐྱབས་བཅོལ་ལག་དེབ་བཟོ་ཆེད་འབྲེལ་ཡོད་ལས་ཁུངས་སུ་སྐྱེལ་ཡོད་པ་ལྟར་དེ་ཡང་གང་མགྱོགས་བཟོ་ཐུབ་པའི་རེ་བ་དང་། དེ་དེ་བཞིན་བོད་མི་རྣམས་རྒྱ་གར་ནས་ཕྱི་རྒྱལ་དུ་ཐོན་པར་ཕྱིར་ཐོན་མཐོང་མཆན་དང་ཆོག་མཆན་གཉིས་ཀ་སྟབས་བདེ་བ་བཟོ་ཆེད་མ་འོངས་པ་ Traverl Document འམ་ཕྱིར་བསྐྱོད་ངོ་སྤྲོད་ལག་འཁྱེར་ཁོ་ནས་གོ་ཆོད་ཐུབ་རྒྱུའི་འབད་བརྩོན་སྒོ་གང་ས་ནས་གནང་མུས་ཡིན་པ་གསུངས་ཡོད། དེ་རིང་བདེ་སྲུང་ལས་ཁུངས་ཀྱི་རྩིས་འགོ་དང་ལས་དོན་ལས་འཕྲོས་ནས་སྤྱི་འཐུས་གྲོས་ཚོགས་ནང་གི་འཐུས་མི་གཅིག་གིས་རྒྱ་ནག་འཐབ་ཕྱོགས་གཅིག་གྱུར་ལས་ཁང་གི་ལས་བྱེད་དང་མཉམ་དུ་ཞལ་ལག་བཞེས་ཡོད་པའི་གནད་དོན་སྐོར་སླར་ཡང་གླེང་སློང་བྱུང་ཡོད་སྟབས། དོན་གནད་དེ་གསུང་མཁན་སྤྱི་འཐུས་རྣམ་པས་དེའི་ཐོག་ལ་བདེ་སྲུང་ལས་ཁུངས་ནས་ཞིབ་འཇུག་མཐིལ་ཕྱིན་གནང་དགོས་པ་དང་། གནས་ཚུལ་འདི་དངོས་འབྲེལ་ཡིན་ཚེ་ཧ་ཅང་གི་ཚབས་ཆེ་ཡིན་པ་གསུངས་ཡོད། སྤྱི་འཐུས་ཁ་ཤས་ནས་དོགས་གཞི་གནང་ཡུལ་འབྲེལ་ཡོད་སྤྱི་འཐུས་དེ་ཉིད་ནས་གྲོས་ཚོགས་སུ་གསལ་བཤད་གནང་བའི་ཁྲོད། བདེ་སྲུང་བཀའ་བློན་མཆོག་གིས་དེའི་ཐད་ལ་བཀའ་ལན་ལམ་སེང་དང་ཁ་ཐུག་གནང་དགོས་པའི་འབོད་སྐུལ་དང་། མཐར་ཁྲིམས་ཞིབ་ཁང་ལའང་ཞུ་ས་ཡོད་དགོས་སྐོར་གསུངས་སོང་། གཞན་ཡང་སྤྱི་འཐུས་གཅིག་གིས་ད་ཆ་གྲོས་ཚོགས་ཀྱི་ཕྱི་ལ་ངོ་རྒོལ་ལས་འགུལ་སྤེལ་བཞིན་པ་གཙོས་ངོ་རྒོལ་གྱི་ལས་རིགས་ཡོང་སྐབས་བདེ་སྲུང་ལས་ཁུངས་ནས་ཁོང་རྣམ་པ་སུ་ཡིན་སོགས་རྒྱུས་ལོན་དང་སྤྱི་ཚོགས་ཀྱི་བདེ་འཇགས་ཐོག་དགོངས་པ་བཞེས་གནང་གི་ཡོད་མེད་ཐོག་བཀའ་འདྲི་ཞུ་མཁན་བྱུང་ཡོད་སྟབས། བཀའ་བློན་མཆོག་ནས་དེ་དག་ཀུན་ལ་ངོས་ཟིན་པའི་ཐོག་ནས་འགན་འཁུར་བཞིན་ཡོད་པ་གསུངས་ཡོད། ཁ་སང་ཉིན་རྒྱབ་ནས་དེ་རིང་ཉིན་གུང་གསོལ་ཚིགས་བར་གྲོས་ཚོགས་སུ་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱི་རྒྱུན་གྲོན་དང་དམིགས་བསལ། དམིགས་བཀར། ཟུར་བཀོལ་དང་བཅས་པ་རྩིས་འགོ་སྤྱིའི་ཐོག་བགྲོ་གླེང་བཀའ་བསྡུར་ཞིབ་ལྷུག་གནང་གྲུབ་རྗེས་ཉིན་གུང་རྒྱབ་ནས་ཕྱི་དྲིལ་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་དང་དེ་བཞིན་ཨ་རིའི་སྐུ་ཚབ་དོན་གཅོད་ཁང་གི་རྩིས་འགོ་སྤྱིའི་ཐོག་ཕེབས་ནས་བགྲོ་གླེང་དང་དྲི་བ་དྲིས་ལན་བཅས་གནང་ཡོད་པ་རེད།

གྲོས་ཚོགས་སུ་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་སྙན་ཐོ་འགོད་འབུལ་ཞུས་པ།

དེ་རིང་གྲོས་ཚོགས་ཚོགས་དུས་བཞི་པའི་ལས་ཉིན་དྲུག་པའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་ལས་བསྡོམས་དང་རྒྱབ་གཉེར་སྙན་ཐོ་འགོད་འབུལ་ཞུས་པའི་ཐོག་མཉམ་འབྲེལ་དང་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ཁག་ཅིག་ནས་རྩིས་སྙན་ལན་འདེབས་དང་དོགས་འདྲིའི་ལན་འདེབས་སོགས་ལ་ཐུགས་སྣང་ཆུང་བ་ཡོད་པར་མངོན་པ་སོགས་ཀྱི་རྒྱབ་གཉེར་ཁག་ཅིག་ཕུལ་གནང་སོང་། དེ་ཡང་དེ་རིང་གྲོས་ཚོགས་ཚོགས་དུས་བཞི་པའི་ལས་ཉིན་དྲུག་པའི་སྔ་དྲོ་ཐོག་སྐར་རྟགས་ཅན་གྱི་དྲི་བ་ཁག་ཅིག་ལ་བཀའ་ལན་དང་བགྲོ་གླེང་གནང་པ་དང་། དེ་རྗེས་ནང་སྲིད་ལས་ཁུངས་ཀྱི་ལོ་འཁོར་སྙན་ཐོ་ཐོག་བགྲོ་གླེང་གི་ལས་རིམ་མཇུག་བསྡུ་ཟིན་མཚམས་ཚོགས་ཐེངས་གཉིས་པ་དང་གསུམ་པ་གཉིས་ལ་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་ལས་བསྡོམས་སྙན་ཐོ་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་ནས་འགོད་འབུལ་ཞུས་སོང་། མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་ངོས་ནས་འདས་པའི་ཟླ་བ་དགུ་ཙམ་རིང་ལ་སྤྱི་ཁྱབ་རྩིས་ཞིབ་ལས་ཁང་ནས་རྩིས་ཞིབ་ཟིན་པའི་ལས་ཁུངས་སམ་སྡེ་ཚན་ཁག་ ༡༧༨ ཡོད་པ་ལས་མང་ཚོགས་རྩིས་ཁྲའི་ཚོགས་ཆུང་ལ་ལས་ཁུངས་སམ་སྡེ་ཚན་ ༡༧༢ ཀྱི་སྙན་ཐོ་འབྱོར་བ་བཞིན་དེ་དག་ཐོག་ཞིབ་འཇུག་གནང་པའི་ཁྲོད། དུས་ཚོད་རྒྱས་བཅད་ནང་རྩིས་སྙན་ཁག་ལ་ལན་འདེབས་འབྱོར་བ་གྲངས་ ༡༢༧ བྱུང་འདུག་པ་དང། ཚོགས་ཆུང་གི་ལས་ཡུན་རིང་རྩིས་སྙན་དང། རྩིས་སྙན་ལན་འདེབས། དོགས་འདྲིར་ལན་འདེབས། དེ་བཞིན་དུ་རྩིས་ཞིབ་དང་ནང་ཞིབ་བཅས་ཀྱི་མཚོན་པའི་འབྲེལ་ཡོད་ལྷན་ཁང་ཁག་གི་རྩིས་པ་སོགས་ཁྱོན་མི་གྲངས་ ༣༡ ཙམ་ལ་འདྲི་རྩད་གནང་འདུག ཚོགས་ཆུང་གི་ངོས་ནས་སྙན་ཐོའི་ནང་སྤྱི་ཡོངས་ཀྱི་གནས་སྟངས་ཆ་ནས་རྒྱབ་གཉེར་ཁག་ ༥ སྟོན་འདུག་པ་ལས་མཉམ་འབྲེལ་ཁག་དང་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ཁག་ཅིག་ནས་རྩིས་སྙན་ལན་འདེབས་དང་དོགས་འདྲིའི་ལན་འདེབས་སོགས་ལ་ཐུགས་སྣང་ཆུང་བ་དང་། ལྷག་པར་དུ་ཁོངས་སོ་སོའི་འགན་འཛིན་ལྷན་ཚོགས་ཐོག་རྩིས་ཀྱི་སྐྱོན་གནད་མང་དག་ཅིག་ལ་རྩིས་བསུབ་བཀའ་འཁྲོལ་བཏང་བ་དང། དོགས་འདྲིའི་ལས་འདེབས་སྐབས་ངག་ཐོག་དང་ལམ་སྲོལ་ཙམ་ལས་ཁུངས་ཕལ་ཆེར་ཞིབ་ཡུལ་གྱི་སྒྲིག་གཞི་ཚད་ལྡན་མེད་པ་སོགས་མ་འོངས་པར་རྩིས་ཞིབ་ཀྱི་ལས་དོན་ངལ་བ་འབྲས་མེད་དུ་འགྱུར་ཉན་ཡོད་པ་བཞིན་ཡིད་གཟབ་གནང་དགོས་པ་སོགས་རྒྱབ་གཉེར་ཁག་ཅིག་གསལ་བཏོན་གནང་སོང། འདི་ག་རླུང་འཕྲིན་ཁང་གིས་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་སྙན་ཐོ་འགོད་འབུལ་ཟིན་རྗེས་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་སུ་མང་ཚོགས་རྩིས་ཁྲ་ཚོགས་ཆུང་གི་ལས་དོན་གནང་ཕྱོགས་དང་ཐེངས་འདིའི་སྙན་ཐོའི་སྐོར་བཀའ་འདྲི་ཞུས་ཡོད། རྩ་བའི་སྤྱི་འཐུས་ལྷན་ཚོགས་སྐབས་ ༡༦ པའི་གྲོས་ཚོགས་ཚོགས་དུས་ ༢ གྲོས་ཆོད་ཡིག་ཆ་ཨང་ ༤༥ པ་ལྟར། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང། ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༡༢༠ དང་ ༡༢༡ དགོངས་དོན། སྤྱི་འཐུས་ཚོགས་གཙོ་སྦྲེལ་པོས་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་ཚོགས་མིར་བསྐོ་གཞག་གནང་སྲོལ་ཡོད་པ་ལྟར། སྔ་ལོའི་ཕྱི་ཟླ་ ༡༡ ནང་ཚོགས་གཙོ་སྦྲེལ་པོས་སྐབས་ ༨ པའི་མང་ཚོགས་རྩིས་ཁྲའི་ཚོགས་ཆུང་གི་ཚོགས་མིར་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་དང་། ཀླུ་ཚང་རྒྱ་རིགས་མཐར་ལགས། སྤྱི་འཐུས་སློབ་དཔོན་ཐུབ་བསྟན་རྒྱལ་ཚན་ལགས། སྤྱི་འཐུས་དཀོན་མཆོག་ཡར་འཕེལ་ལགས། སྤྱི་འཐུས་གེ་བ་ཚང་ངག་དབང་ཐར་པ་ལགས་བཅས་བསྐོ་གཞག་གནང་ཡོད་པ་རེད།  

སྲིད་སྐྱོང་མཆོག་གིས་ཕྱི་རྒྱལ་ཁག་ཏུ་བོད་མིའི་གཞིས་ཆགས་དང་སློབ་གྲྭ་གསར་འཛུགས་གནང་ཐབས་མེད་པ་གསུངས་སོང་།

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གྲོས་ཚོགས་ཀྱི་ལས་ཉིན་དྲུག་པའི་ཐོག་སྐར་རྟགས་ཅན་གྱི་དྲི་བ་ཁག་ཅིག་ལ་བཀའ་ལན་གནང་པའི་ཁྲོད། བཀའ་ཤག་གི་ངོས་ནས་ཕྱི་རྒྱལ་ཁག་ཏུ་བོད་མིའི་གཞིས་ཆགས་ཟུར་འཛུགས་དང་སློབ་གྲྭ་གསར་འཛུགས་གནང་རྒྱུའི་གནས་སྟངས་དེ་དཀའ་ལས་ཁག་པོ་ཆགས་ཡོད་པ་གསུངས་སོང་། དེ་ཡང་དེ་རིང་གྲོས་ཚོགས་ཚོགས་དུས་བཞི་པའི་ལས་ཉིན་དྲུག་པའི་སྔ་དྲོ་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་ཀྱིས་བཀའ་ཤག་ནས་ཕྱི་རྒྱལ་ཡུལ་གྲུ་ཁག་ཏུ་གཞིས་ཆགས་ཟུར་འཛུགས་དང་སློབ་གྲྭ་གསར་འཛུགས་བྱེད་པའི་ཐབས་ནུས་ཡོད་པར་མཐོང་ངམ་ཞེས་དང་དེ་མིན་མིག་མཐོང་ལག་ཟིན་དུ་རང་མི་རིགས་འདི་མི་རིགས་གཞན་ནང་དུ་རྒྱ་མཚོར་ཁ་བ་བབ་པ་བཞིན་ཐིམ་དུ་འགྲོ་ངེས་པ་དེའི་ཐབས་ལམ་ཇི་འཚོལ་ཞེས་སྐར་རྟགས་ཅན་གྱི་དྲི་བ་གཉིས་ཕུལ་སོང་། སྐབས་དེར་སྲིད་སྐྱོང་མཆོག་གིས་དྲི་བའི་བཀའ་ལན་དུ་ད་ལྟའི་ཆར་ཕྱི་རྒྱལ་ཡུལ་གྲུ་ཁག་ཏུ་བོད་མིའི་ཆེད་གཞིས་ཆགས་དང་སློབ་གྲྭ་ཟུར་འཛུགས་བྱེད་ཐུབ་ཐབས་མ་མཐོང་ཞེས་དང་། ཕྱི་རྒྱལ་དུ་ཡོད་པའི་བོད་མི་རྣམས་མི་རིགས་གཞན་གྱི་ནང་སིམ་ཡལ་དུ་མི་འགྲོ་བའི་ཆེད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དུས་དང་རྣམ་པ་ཀུན་ཏུ་བོད་མི་ཚོར་བཀའ་སློབ་ལམ་སྟོན་ཕེབས་བཞིན་པའི་ཐོག་བོད་མིའི་སྒྲིག་འཛུགས་ཀྱིས་གོ་སྐབས་ནམ་བྱུང་ལ་ལམ་སྟོན་རིམ་པ་གནང་བཞིན་ཡོད་པ་མ་ཟད། ས་གནས་སོ་སོའི་བོད་རིགས་རྣམས་ནས་ཀྱང་སེམས་ཁུར་ཆེ་བཞེས་ཀྱིས་སྤྱི་ཁང་འཛུགས་སྐྲུན་དང་འབྲེལ་བོད་མིའི་ཐོུང་མ་ཡིན་པའི་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་ཆེད་འབད་བརྩོན་ཞུ་མུས་ཡིན་པ་གསུངས་སོང་། གོང་གསལ་སྤྱི་འཐུས་ཀྱིས་བསྐྱར་དུ་སྲིད་སྐྱོང་མཆོག་ལ་སྲིད་སྐྱོང་གི་སྐབས་གཉིས་ཀྱི་ལས་ཡུན་རིང་ཕྱི་རྒྱལ་ཁག་ཏུ་བོད་པའི་སློབ་གྲྭ་ཟུར་འཛུགས་བྱ་རྒྱུ་ཐད་དགོངས་པ་བཞེས་ཡོད་མེད་དང་། དེ་འབྲེལ་ཐབས་ལམ་འཚོལ་ཞིབ་གནང་པ་རྣམས་ལམ་ལྷོང་མ་བྱུང་བ་ཞིག་ཡིན་མིན་བཅས་ཀྱི་དྲི་བ་ཕུལ་བར་སྲིད་སྐྱོང་མཆོག་གིས་ཕྱི་རྒྱལ་མང་ཚོགས་ཁྲོད་བོད་པའི་གཞིས་ཆགས་ཟུར་འཛུགས་དང་སློབ་གྲྭ་གསར་འཛུགས་གནང་རྒྱུའི་བཀའ་མོལ་ཞིག་བྱུང་ཡོད་ཀྱང་། དོན་དངོས་ཐོག་ཕྱི་རྒྱལ་ཁག་ཏུ་སློབ་གྲྭ་ གསར་འཛུགས་གནང་པར་སློབ་ཕྲུག་གདང་ངེས་དང་དགེ་རྒན་ཚད་ལྡན་དགོས་པ་བཅས་ཀྱི་གཞི་རྩའི་ཆ་རྐྱེན་ཁག་ཅིག་ངེས་པར་ཚང་དགོས་པའི་གནས་སྟངས་འོག་དེ་ལྟར་ཡོང་ཐབས་མེད་སྐོར་གསུངས་པ་དང་། ལྷག་དོན་གཞིས་ཆགས་ཟུར་འཛུགས་བྱ་རྒྱུའི་ལས་འཆར་ལྟ་བུ་ལ་ཆ་མཚོན་ན་གནས་ཡུལ་དེའི་ཁྲིམས་སྒྲིག་དང་། ས་གནས་བོད་མིའི་ངོས་ནས་འདོད་མོས་ཡོད་མེད་སོགས་ཀྱི་གནས་སྟངས་དུ་མའི་ཆ་ནས་ལག་བསྟར་ཞུ་རྒྱུ་དཀའ་བ་ཆགས་ཡོད་པ་ལུང་འདྲེན་གྱིས་ད་ཆ་ས་གནས་ཁག་གཅིག་གི་ནང་སྤྱི་ཁང་གསར་རྒྱག་ཞུས་པའི་ཉེ་འཁོར་དུ་བོད་མི་གནས་སྡོད་བྱེད་མཁན་མང་དུ་འགྲོ་མུས་ཡིན་པ་གསུངས་སོང་། ད་དུང་སློབ་གྲྭ་གསར་འཛུགས་དང་འབྲེལ་ཏེ་སྤྱི་འཐུས་ཤིག་གིས་འཕྲོས་དོན་དྲི་བའི་ཚུལ་དུ་ཕྱི་རྒྱལ་ཁག་ལ་བོད་མིའི་གཞིས་ཆགས་དང་སློབ་གྲྭ་དགོས་པའི་དངོས་ཡོད་གནས་སྟངས་ཤིག་ཆགས་ཡོད་ཀྱང་། ཕྱི་རྒྱལ་དུ་ཡོད་པའི་ཕ་མ་གཉིས་ཀ་བོད་པ་ཡིན་ནའང་བུ་ཕྲུག་བོད་སྐད་མ་རྒྱབ་པའི་དཀའ་ངལ་ཆེན་པོ་འཕྲད་བཞིན་ཡོད་སྟབས། གཞིས་ཆགས་ལས་བོད་མིའི་སློབ་གྲྭ་ཟུར་འཛུགས་ཞུ་གལ་ཆེ་བ་ཆགས་ཡོད་སྐོར་གསུངས་པ་དང་འབྲེལ། སློབ་གྲྭ་གསར་འཛུགས་ཞུ་མི་ཐུབ་པའི་རྒྱུ་མཚན་གང་ཡིན་དང་། སྒྲིག་འཛུགས་ཀྱི་ངོས་ནས་གཟའ་མཇུག་སློབ་གྲྭའི་དགེ་རྒན་ཚོར་དམིགས་བསལ་མཐུན་འགྱུར་སྦྱར་རྒྱུའི་དགོས་པ་ཡོད་མེད་བཅས་ཀྱི་དྲི་བ་ཕུལ་བར་སྲིད་སྐྱོང་མཆོག་ནས་ཕྱི་རྒྱལ་ཁག་ཏུ་ཡོད་པའི་བོད་ཕྲུག་ཚོའི་ཆེད་དུ་བོད་པའི་སློབ་གྲྭ་ལོགས་སུ་བཙུགས་པ་ལ་བོད་ཡིག་ཙམ་མིན་པར་རྒྱལ་ཁབ་དེའི་ཤེས་ཡོན་གྱི་གནས་ཚད་དང་མཐུན་པའི་སློབ་སྦྱོང་འདྲ་མཉམ་ཞིག་སྤྲོད་དགོས་པ་དང་། དེ་ལ་དཔག་པའི་སློབ་ཡོན་མཐོ་པོ་ཞིག་བཞག་དགོས་པས་བོད་མིའི་མི་འབོར་དང་དཔལ་འབྱོར་གནས་བབས་བཅས་ལ་གཞིགས་ན་བོད་པའི་སློབ་གྲྭ་གསར་འཛུགས་ཞུ་ཐབས་མེད་སྐོར་གསལ་བཤད་གནང་ཡོད། དེ་བཞིན་སྐབས་དེར་སྤྱི་འཐུས་གཞན་ཞིག་གིས་བཀའ་ཤག་གི་ངོས་ནས་ཕྱི་རྒྱལ་ཡུལ་གྲུ་ཁག་གི་གཟའ་མཇུག་སློབ་གྲྭའི་དགེ་རྒན་ཚོ་ལོ་གསུམ་རེ་མཚམས་སུ་འཁྱུར་བསྟུན་ལེགས་གསོལ་དུ་ཕྱག་འཁྱེར་ཞིག་ཕུལ་སྲོལ་ཡོད་པ་བཞིན་དེ་འདྲའི་ཕྱག་འཁྱེར་ཞིག་བོད་རིགས་ཚོགས་པའི་ཚོགས་གཙོ་ ༡༤ དང་རྒྱུན་ལས་རྣམས་ལ་འབུལ་རྒྱུ་གསར་གཏོད་གནང་སྐྱོང་ཡོང་བའི་འབོད་སྐུལ་ཞུ་དོན་ལྟར་སྲིད་སྐྱོང་མཆོག་གིས་ཁོང་རྣམ་པར་དགའ་སྤོབས་ཐོག་ནས་ཕྱག་འཁྱེར་དེ་ལྟར་གནང་རྒྱུ་ཡིན་པ་བཀའ་སོགས་གནང་སོང་། གཞི་རྩའི་དེ་རིང་གྲོས་ཚོགས་ཀྱི་ལས་ཉིན་དྲུག་པའི་སྔ་དྲོའི་ཚོགས་ཐུན་སྐབས་གྲོས་ཚོགས་ཀྱི་འཐུས་མི་རྣམ་པས་སྐྱེས་ལྡན་སོ་ནམ་གྱི་ལས་གཞི་དང་རྒྱ་གར་གྱི་མི་སེར་བཟོ་རྒྱུའི་གནད་དོན་སྐོར། དེ་བཞིན་གསར་འགྱུར་སྤྱི་མཐུན་ཚོགས་པ་དང་བོད་མི་གསར་འབྱོར་སྡོད་ཁང་། གཞན་ཡང་བལ་ཡུལ་ཚེ་རིང་རྒན་གསོ་ཁང་དང་བོད་ཀྱི་བེུད་ཀྱི་ཉིན་མོ་སོགས་གནད་དོན་མང་དག་ཅིག་གི་སྐོར་ལ་གླེང་སློང་ཤུགས་ཆེ་བྱུང་སོང་།

Latest news