བོད་མིའི་སྒྲིགས་འཛུགས་ཀྱི་སྲིད་སྐྱོང་བློ་སེང་གེ་མཆོག་ནས་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༢༨ མཇུག་སྒྲིལ་དང་སྦྲགས། བོད་མིའི་ངོས་ནས་དབུ་མའི་ལམ་གྱི་སྲིད་བྱུས་ལ་ཆོད་སེམས་བརྟན་པོའི་ངང་མུ་མཐུད་གནས་ཡོད་པ་དང་། བོད་རྒྱ་གཉིས་དབར་གྱི་གནད་དོན་སེལ་རྒྱུའི་ཐབས་ལམ་གཅིག་རང་ཡོ
ད་པ་དེ་ནི་གྲོས་མོལ་རེད་ཅེས་གསུངས་འདུག
དེ་ཡང་བཞུགས་སྒར་རྡ་ས་ཉེ་འདབས་སུ་རྟེན་གཞི་བྱས་པའི་ Asia Health Resorts ཞེས་པའི་མགྲོན་ཁང་དུ་ཁ་སང་དང་ནས་དབུ་འཛུགས་ཀྱིས་དེ་རིང་བར་ཉིན་གྲངས་གཉིས་རིང་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༢༨ དེ་འཚོགས་ཡོད་པ་དང་། དེ་རིང་ཉིན་རྒྱབ་ཏུ་ཚོགས་འདུ་ལེགས་གྲུབ་དང་བསྟུན། བོད་མིའི་སྒྲིག་འཛུགས་ཀྱི་དྲ་གནས་ཐོག་གསར་འགོད་གསལ་བསྒྲགས་ཤིག་སྤེལ་བ་དེའི་ནང། ཐེངས་འདིའི་ཚོགས་འདུའི་ཐོག་ཚོགས་བཅར་བ་རྣམས་ནས་རྒྱ་ནག་ནང་གི་ཆབ་སྲིད་ཀྱི་འགྱུར་ཁྲོད་དང་བོད་རྒྱ་འབྲེལ་མོལ་གྱི་མ་འོངས་གནས་བབས། དེ་བཞིན་རྒྱལ་སྤྱིའི་ཆབ་སྲིད་ཀྱི་འཕོ་འགྱུར་བཅས་ཀྱི་ཐོག་ལ་བཀའ་བསྡུར་ལྷུག་པོ་གནང་ཡོད་པ་རེད་འདུག
སྲིད་སྐྱོང་བློ་བཟང་སེང་གེ་མཆོག་གིས་ད་ལན་གྱི་གསར་འགོད་གསལ་བསྒྲགས་འདིའི་བརྒྱུད་བོད་རྒྱ་གཉིས་དབར་གྱི་དཀའ་རྙོག་དེ་ཞི་བའི་གྲོས་མོལ་བརྒྱུད་ནས་སེལ་ཐབས་བྱ་རྒྱུར་ཆོད་སེམས་བརྟན་པོ་ཡོད་པ་བསྐྱར་ནན་གནང་པ་དང་སྦྲགས། ཕྱོགས་གཉིས་གྲོས་མོལ་བརྒྱུད་ནས་མ་གཏོགས་བོད་ཀྱི་གནད་དོན་སེལ་རྒྱུར་ཐབས་ལམ་གཞན་གང་ཡང་མེད་ཅེས་འགྲེལ་བརྗོད་ག
ནང་འདུག
རྩ་བའི་ད་བར་བོད་རྒྱ་གཉིས་དབར་འབྲེལ་མོལ་ཐེངས་ ༩ བྱུང་ཟིན་ཡོད་པ་དེ་ལྟར་ཡང། འབྲེལ་མོལ་མཐའ་མ་དེ་ཕྱི་ལོ་ ༢༠༡༠ ལོའི་ཕྱི་ཟླ་ ༡ པོའི་ཟླ་མཇུག་ཏུ་གནང་རྗེས། འབྲེལ་མོལ་སྣེ་འཁྲིད་གནང་མཁན་གཉིས་ཀྱིས་ལས་གནས་ནས་དགོངས་ཞུ་གནང་པ་མ་ཟད། ད་བར་འབྲེལ་མོལ་བསྐྱར་མཐུད་གནང་མ་ཐུབ་པར་དེ་མུར་ལྷག་ཡོད་པ་རེད།
ཐེངས་འདིའི་ཚོགས་འདུའི་ཐོག་སྲིད་སྐྱོང་མཆོག་གིས་དབུས་པའི་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་གཉིས་དང་། བདེ་སྲུང་བཀའ་བློན་མཆོག དེ་བཞིན་དགའ་ལྡན་ཕོ་བྲང་གི་དྲུང་ཆེ་གཉིས་སོགས་ཁྱོན་ཚོགས་བཅར་བ་ ༡༣ ནས་མཉམ་ཞུགས་གནང་ཡོད་པ་རེད།
ཚོགས་འདུ་དེའང་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་ཆབ་སྲིད་ཀྱི་ཐུགས་འགན་བཞེས་པ་ནས་བཟུང་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༦ དེ་ཆགས་ཀྱི་ཡོད་པ་དང་། ལྷག་དོན་ད་ལན་སྲིད་སྐྱོང་མཆོག་གིས་སྲིད་སྐྱོང་གི་ལས་ཡུན་གཉིས་པ་བཞེས་པའི་རྗེས་ཀྱི་བོད་རྒྱ་ཞི་མོལ་དང་འབྲེལ་བའི་ཚོགས་འདུ་ཐེངས་དང་པོ་ཆགས་ཀྱི་ཡོད་པ་རེད།
