རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་དུས་ ༣༩ ཟུར་ཚོགས་ཐོག་རྒྱ་ནག་གི་དབང་སྒྱུར་འོག་ཡོད་པའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་བསྐྱར་དུ་ཐེར་འདོན་གནང་འདུག
ཁ་སང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་རྒྱལ་ཁབ་གཞན་གྱི་དབང་སྒྱུར་འོག་ལྷུང་བའི་གྲངས་ཉུང་མི་རིགས་དག་གི་སྲུང་སྐྱོབ་སླད་རྒྱལ་སྤྱིའི་ཚོགས་པ་ Society for Threatened people ཞེས་པའི་རྒྱལ་ཚོགས་སུ་བོད་རང་སྐྱོང་ལྗོངས་དང་དེའི་ཕྱི་ཕྱོགས་སུ་བོད་རིགས་གནས་སྡོད་ས་ཁུལ་སོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་བཟང་དུ་གཏང་རྒྱུའི་ཐབས་ལམ་ཞེས་པའི་བརྗོད་གཞི་ཐོག་ཟུར་ཚོགས་ཀྱི་ཚོགས་འདུ་ཞིག་གོ་སྒྲིག་ཞུས་པ་ལྟར། ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་དང་རྒྱལ་སྤྱིའི་མི་རིགས་དབྱེ་འབྱེད་འགོག་ཐབས་ཀྱི་ཚོགས་པའི་སྐུ་ཚབ་ Taisuke Komatsu ལགས་རྣམ་གཉིས་ནས་གསུང་བཤད་གནང་ཡོད་པ་རེད། སྐབས་དེར་སུད་སི་སྐུ་ཚབ་དོན་ཁང་གི་རྒྱལ་ཚོགས་ཀྱི་འབྲེལ་མཐུད་པ་དང་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་དང་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་འདྲ་མིན་གྱི་སྐུ་ཚབ་བཅས་ནས་མཉམ་ཞུགས་གནང་འདུག
འདི་ག་རླུང་འཕྲིན་ཁང་ནས་སུད་སི་སྐུ་ཚབ་དོན་ཁང་གི་རྒྱལ་ཚོགས་ཀྱི་འབྲེལ་མཐུད་པ་སྐལ་ལྡན་མཚོ་མོ་ལགས་སུ་ཟུར་ཚོགས་ཀྱི་ཚོགས་འདུ་སྐབས་དྲིལ་བསྒྲགས་དྲུང་ཆེ་ཤར་གླིང་ཟླ་སྒྲོན་ལགས་ནས་གསུང་བཤད་གཙོ་བོ་གང་གནང་སྐོར་དང་དེ་འབྲེལ་བཅར་འདྲི་ཁག་ཅིག་ཞུས་པར་རྒྱ་ནག་གི་དུས་བཀག་བསྐྱར་ཞིབ་ཐེངས་ ༣ མགོ་འཛུགས་རན་པ་དང་བསྟུན། འདས་ལོའི་ནང་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ཆེས་ཞན་པོ་ཆགས་ཡོད་སྟབས། གནད་དོན་དེ་དག་ཐོག་ཞིབ་འཇུག་གནང་བའི་སྒོ་ནས་གཞུང་དང་གཞུང་འབྲེལ་མིན་པའི་ཚོགས་ཁག་གི་སྐུ་ཚབ་ནས་མཉམ་ཞུགས་གནང་དགོས་པའི་རེ་སྐུལ་ཞུས་ཡོད་སྐོར་གསུངས་སོང་།
སྐུ་ཞབས་ཏ་ཡེ་སུ་ཀི་ཀོ་མཏ་སུ་ལགས་ནས་དེ་སྔ་རྒྱ་གཞུང་གིས་རྒྱལ་ཚོགས་སུ་གཞུང་འབྲེལ་མ་ཡིན་པའི་ཚོགས་ཁག་གི་ལས་དོན་ལ་འགོག་རྐྱེན་བཟོས་པའི་གནད་དོན་ལུང་འདྲེན་དང་འབྲེལ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་སྐྱོན་བརྗོད་གནང་འདུག ལྷག་དོན་རྒྱ་ནག་གི་དུས་བཀག་བསྐྱར་ཞིབ་ཐོག་ཏུའང་རྒྱ་གཞུང་ནས་དེ་སྔ་བཞིན་དངོས་ཡོད་གནས་ཚུལ་ལ་ངོས་ལེན་མེད་པར་ཚོགས་ཆུང་གི་འདྲི་རྩད་ལ་སྣང་མེད་བཏང་སྲིད་པའི་ཉེན་བརྡ་བཏང་བ་མ་ཟད་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཀྱི་ཚོགས་ཆུང་ནས་རྒྱ་ནག་ནང་གི་གྲངས་ཉུང་མི་རིགས་ཐོག་དབྱེ་འབྱེད་བྱས་པའི་གནད་དོན་ཁག་ཅིག་འགྲེལ་བརྗོད་གནང་འདུག
